الزوادة اليومية

القِجّة الله معك... بيخبّرو عن صبي زغير اشترالو بَيّو قِجّة وقلّو : «يا بيّي هيدي القِجّة لحتَّى تخبِّي قرشَك الأبيض ليومَك الأسود، لمَّا بيكون معك مصاري لازم تحطُّن بالقِجِّة وبس تنتلي مناخدها على البنك بيصير عندك حساب بتستعملو وقت الحاجة».  الصبي انبسط بالفكرة وبلَّش يجمِّع بالقِجِّة وصار عندو حلم إنّو تِنتِلي. وبيوم من الأيَّام بيِجي لعند بَيّو وبإيدو القجِّة وبيقلّو : «بابا القجِّة انتَلِت». البيّ بياخدها على البنك لحتَّى يفتح حساب لإبنو بس كانت الصدمة كبيرة لمَّا شاف بين المصاري قطع من الكرتون المدوّر. بيسأل إبنو عن السبب، قلّو ما كنت مفكّرِ إنّو المهمّ شو حطّ فيها، كنت مفكِّر إنّو المهم تِنتِلي القِجّة. الزوّادة بتقلّي وبتقلّك : حياتنا مِتل القجِّة، مش مُهمّ إنّو نملّيها، المهم من شو منملّيها، بحِبّ أتذكّر أنا ويّاك إنّو المفكرة المتلانة ما بتعني حياة متلانة، والله معك. المصدر : صوت المحبّة

  الصوم قصاص ؟! بيخبرو عن صبي زغير كان يفكِّر الصَوم قصاص لأنّو كل ما يروح يعترف يقلّو الأبونا لازم تصوم يوم!  كبر هالصبي و هالفكرة بِقيِت معو لوقت ما مرّة إلتقى بأبونا ختيار و عم يحكوا عن الصوم و قلّو الأبونا إنّو لَو الصوم قصاص ليش كلّ القدّيسين كانوا يصوموا!؟ إنت بس تصوم بتكون عم تتقرّب من الربّ، عم تحبّو، و عم تبعد عن الخطيِّة! إنت لمَّا تصوم بتكون عم تعيش مع يسوع و تختبر معو قدَّيش الإشيا الأرضيِّة فانية و شو في إشيا أهمّ بكتير... فكِّر فيا و الله معك! المصدر : صفحة Jesus My Lord

  الإسكندر والفيلسوف الله معك... بيخبّرو عن الإسكندر الكبير، إنّو قرّر يكرّم أحد الحكماء بالمملكة، يلّي عملّو خدمة كبيرة.  بيستدعيه لعندو وبيقِلّو : «إنت مُفضِل على المملكة، طلوب شو ما بدّك وأنا حاضر إنِّي نفِّذلك». هالرجُل الحكيم بياخذ القرار على محمل الجدّ، بيتوجّه لعند أمين الصندوق وبيطلب ألف ليرة دهب. أمين الصندوق بيتوجَّه لعند الإسكندر وبيعترض، لأنّو المبلغ المالي كتير كبير، بس الإسكندر قَلّو : «نفِّذلو طلبو لتلات أسباب : الأوَّل لأنّو آمَن بكلمتي.  التاني لأنّو آمَن إنّي غني التالت لأنّو آمَن بإرادتي الطيبة، إنِْي رح نفِّذ يلّي وعدتو فيه، اعطيه اللي بدّو ياه لأنّو آمَن بكلمتي وبقدرتي وحقِّقلو مطلبو». الزوّادة بتقلّي وبتقلَّك : الله بَيّ وبيحبّ ولادو وبيعطِيُن كل شي هِنّي بحاجة لإلو، بيكفي إنُّن يطلبو وكلمتو كلمة، غير كل كلمات البشر، هوّي قادر على كلّ شي وما بدّو غير خيرنا، خلّونا بهالنهار، نقعد مع هالبيّ ونشاركو بوقتنا، بأحاسيسنا بحاجاتنا وهوّي بيهتمّ بالباقي، والله معك. المصدر : صوت المحبّة

  قَوِّي جوانحك ! من أشهر أقوال المكرَّم أبونا بشارة أبو مراد : "الصلاة والصوم جناحان نطير بهما إلى السماء." اليوم بالصوم الكبير عِنّا فرصة كتير كبيرة نقوّي جوانحنا منيح إن كان الصوم أو الصلاة و نكون عم نطير صوب السما نلتقي بالربّ! يا يسوع ساعدنا نفهم أهميِّة صومنا و قوّينا بوجه التجارب و سامحنا عا خطايا عملناها بوقت ضعف... آمــــــــــــين. المصدر : صفحة Jesus My Lord

  الله هوي العاطي الله معك... بيخبّرو عن صبي إجا لعند النَّبي موسى وطلب مِنّو إنّو يطلب من الربّ يخلّيه يصير غني.  سألو موسى : «بتحِب تغتني بأوّل تلاتين سنة من حياتك، أو بآخر تلاتين سنة»؟  احتار الصبي، وبعد تفكير، قرّر يغتني بأوَّل تلاتين سنة من حياتو، لسببَين : الأوّل إنّو بيتنعّم بأوّل تلاتين سنة من الحياة وأكتر من هَيك، مَنّو أكيد إنَّو رح بيعيش للستّين من عمرو. موسى صلّى والربّ إستجاب صلاتو، وصار الصبي غني والله فاض عليه من الخيرات أكتر من اللازم. الصبي صار شبّ فتح مؤسّسات، وزاد غنى وصار يساعد كل محتاج بيطلب منّو، وأكتر من هيك صار يفتح مؤسسات ويساعد كل الناس.  خلصو التلاتين سنة والشبّ بعدو عم يغتني، موسى بيسأل الربّ وبيقلّو : «خلصو التلاتين سنة وهالشبّ بعدو غني وغناه عَم بيزيد».  جاوبو ربنا وقلّو : «شفت هالإبن وَفي وصالح، عَم يفتح بواب الرزق لولادي البشر، كرمال هيك ما سكّرت باب رزقي بوِجّو». الزوّادة بتقلّي وبتقلّك : لَـمَّا الربّ بيعطيك أعطي بإسمو، وما تكون بخيل، تذكّر على طول إنّو الكريم الله بيكرمو، والله معك. المصدر : صوت المحبّة

  خطايانا بيجرحوا يسوع بيخبرو عن إمّ كلّ سنة بفترة الصوم بتعمل لولادها نشاط حلو كتير. بتعمل إكليل شوك كبير من خشب و بتشكّ فيه أعواد خشب زغار كتير و بتحط علبة حَدّو. كل ما حدا من الولاد عمل تصرّف حلو أو ساعد حدا بيشيل عود من الإكليل بيحطها بالعلبة متل كأنّو شال شوكة من إكليل الربّ و ساعد يخفّف وجع يسوع! حلوة هالروح اللي عم تزرعها هالإم بولادها... عطينا يا ربّ نفهم متل هالولاد إنّو خطايانا بيجرحوا يسوع و توبتنا و الخير اللي منعملو بيشفوه. المصدر : صفحة Jesus My Lord

  قَدِّسوا صَوماً بيقول أحد القدِّيسين : "الصوم الحقيقي هو الَّذي يتدرَّب فيه الصائم على ضبط النفس ويستمرّ معه ضبط النفس كمنهج حياة." الصوم بحد ذاتو مش هدف، هوّي وسيلة تا تساعدنا نوصل عالسما!  الصوم تا نتعلّم مِنّو إشيا نعيشها عاطول هوّي مش مرحلة و بتخلص!  الله يبارك صومكن و كل إيّامكن. المصدر : صفحة Jesus My Lord

  الصوم جسر عبور إلى السَّماء بيقول القدّيس مقاريوس : "إنَّ أوَّل العصيان كان من آدم أبينا في الفردوس بسبب شهوة الطعام، وأوّل الجهاد من سيِّدنا المسيح كان في البريّة في الصيام" (بستان الرهبان، طبعة ١٩٥١، جزء أول، ص ٢٥). هون منفهم إنّو الصوم وسيلة تا نوصل لغفران الخطايا و نتحرّر من عبوديّة الخطيّة اللي بتبعدنا عن الله و بتخلّي تجارب الشرّير تتمكّن مِنّا!  عطينا يا ربّ نصوم بكلّ إيمان و يكون صَومنا أوَّل خطوة صوبك و صوب القيامة و ساعدنا و متل ما منقول بصلاة الأبانا :  نجِّنا من الشرِّير... آمــــــــــــين. المصدر : صفحة Jesus My Lord

  أصابع الإيد الله معك... بيخبّرو إنّو مَرّة اختلفو أصابع الإيد الخمسة، مين مِنّن الريّس!  قال الإبهام : «تطلّعو منيح كيف أنا بعيد عنكن كأني وَحدي، كلّكن بميل وأنا بميل، أكيد أنا الأهمّ بيناتكن»!  بيرِد السبابة : «لأ يا حبيبي، أنا الآمر والناهي، أنا الأهم»! بيقول الإصبع التالت : «عم تتخانقو عالفاضي، أنا أطوَل شي فيكن، ليك كيفكن مبيّنين متل الأقزام قدّامي، كيف إلكُن عَين تقولو إنكُن أهمّ منّي»؟!  بيجاوب البنصر : «بسّ ذكّروني مين اللي إلو شرَف خاتم الزواج؟ ولا واحد منكن أنا بس عندي هالميزة»! شويّ بيتعجّبو كلّن بَس سمعو صوت الخنصر، إنّو بعد ناقص هالزغير! بيقلُّن : «أنا مَنِّي ضخم مِتل الإبهام، ولا بعطي أوامر، ومَنّي طويل وما بتزيّني الخواتم، بس أنا كل ما تعبتو إنتو وعَم تشتغلو شي بتلقو عليّي وأنا بسندكُن... أنا خادمكن»! الزوّادة بتقلّي وبتقلّك : الربّ وصّانا وقلّنا إذا بدكُن تكونو عظماء، لازم تكونو متواضعين، خدّام وزغار. ومدرسة الحياة بتعلّمنا نكون متل الشمعة يلّي بتدوب تَ تضوي لغيرها ومتل هالخنصر، بالرغم من زغِرنا وضعفنا نخدم خَينا الإنسان من كل قلبنا والله يلّي بيشوف بيكافينا، والله معك

  أنا ما بعرف شي! بتعرفوا إنّو في صلاة إسمها ما بعرف؟ بس تقعد بينك و بين حالك و تحكي مع الله بلا حسابات و تقلّو يا ربّ أنا ما بعرف شي! ما بعرف شو بدّي أعمل و لا بعرف شو لازم قول و لا وين بدّي روح و لا لوين واصل و لا عارف إتصرّف و لا عارف آخد قرار... و أختم صلاتك بـ : بس إنت بتعرف!  و خلص الحكي... بس تحطّ كلّ شي بإيد الله و تترك الباقي عليه ما بقا تعتل همّ شي... ها هي حياتي في يديك إفعل بها ما تريد. المصدر : صفحة Jesus My Lord

  شاول شاول لماذا تضطهدني؟ مار بطرس معروف إنّو كان عصبي و حتّى إنّو كان واعد يسوع إنّو شو ما يصير هوّي معو بعدين نكرو ٣ مرّات. مارتا إخت لعازر كانت تهتمّ بالإشيا الأرضيّة بتتذكّروا لمّا قلها يسوع مارتا مارتا أنتِ تهتمّين بأمور كثيرة و المطلوب واحد. مار بولس كان أكبر الأعداء للمسيحيّين و كان هدفو يدمّر الكنيسة حتّى قلّو الربّ : شاول شاول لماذا تضطهدني؟ و غيرن كتار من الشخصيّات المهمّة بالإنجيل المقدّس، ما كانوا كاملين أبدًا حتّى إنّن كانوا خاطيين... قد ما كنت بعيد عن الله هوّي رح يضل يفتّش عليك تا يشفيك، شو ما كانوا أغلاطك يسوع بيسامحك و بيحبَّك بس إنت سلِّم حياتك إلو و ما تخاف تتقرّب منّو خصوصاً بهالصوم المبارك... رحمتو كبيرة. المصدر : صفحة Jesus My Lord

  صوم لربَّك ! "وَأَمَّا أَنْتَ فَمَتَى صُمْتَ فَٱدْهُنْ رَأْسَكَ وَٱغْسِلْ وَجْهَكَ، لِكَيْ لَا تَظْهَرَ لِلنَّاسِ صَائِمًا، بَلْ لِأَبِيكَ ٱلَّذِي فِي ٱلْخَفَاءِ. فَأَبُوكَ ٱلَّذِي يَرَى فِي ٱلْخَفَاءِ يُجَازِيكَ عَلَانِيَةً." (مَتَّى ٦:‏١٧-‏١٨) يا ربّ عطينا نعمة الصوم بلا ما نضلّ عم نخبّر الناس و نقول إنّنا صايمين، علّمنا يكون صَومنا واحد من أسس علاقتنا معك وحدك إنت و بس و يكون رابط مميّز بين وجودنا عالأرض و طريقنا صَوب السما... آمــــــــــــين. المصدر : صفحة Jesus My Lord

  الأعمال الصالحة الله معك... بيخبّرو عن رجّال، مات وطلع على السماء، وكان كتير فرحان لمّا القدّيس بطرس خصّصلو ملاك يكون عم بيرافقو. لـمّا بلّش بالجولة السماويِّة كان مندهش بالمناظر الطبيعيِّة.  وأكتر من هيك كان عَم بيشوف قصور فخمة وكتير حلوة، إنَّما بعد شوي بيلاقي حالو قدّام بيوت من خشب وألواح من تَنَك.  بيوقف مندهش ومصدوم لـَمَّا قلّو الملاك : «هيدا البيت الخشبي هوّي بيتك»  جاوب بغضب :  «هيدا بيتي»؟ قلّو الملاك : «نحنا منعمّر بيوت بقيمة الأعمال الصالحة يلّي بتعملوها على الأرض، وبِقَدَر ما بعتّلنا أعمال ما كان عِنّا إمكانية إلّا إنّو نعمّرلك هالبيت الخشبي الزغير». الزوّادة بتقلّي وبتقلّك : السما بتبلِّش على الأرض وكل عمل منيح بتعملو على الأرض بْيِتدَوّن بسجلّات الملكوت، والربّ بيحاسبك عليه باليوم الأخير، والله معك. المصدر : صوت المحبّة

  زهرة البنفسج 🪻   ليش كل ما نفوت عا كنيسة بزمن الصوم بيكون المذبح مغطّى باللون البنفسجي و الأبونا بيلبس كمان هاللون بهالوقت من السنة؟ هاللون رمز للتوبة و الإنتظار، الكنيسة بالصوم بتدعي للتوبة و العودة للربّ و منكون كمان ناطرين قيامة الربّ يسوع. كمان زهرة البنفسج منشوفها بكتير من الأيقونات حول إمنا مريم و هيّي بترمز للتواضع.  هاللون بالكنيسة عندو دلالات كتيرة، لمّا تشوفوه تذكّروا معانيه و فكروا بهدف وجودنا عهالأرض اللي هوّي إنّو نرجع نلتقي بالربّ!  صومنا مناسبة تا نتأمَّل بكلّ هالإشيا و الله معكن. المصدر : صفحة Jesus My Lord

  فرح العطاء الله معك... بيجاوب أحد الأغنياء لمّا سألوه وين لاقى السعادة؟ و بيقول :  أوّل شي فكّرت إنّو لمّا تملك إشيا بتكون مبسوط بس مش مزبوط ما لقيت سعادتي هونيك. رجعت قلت لازم إملك إشيا غالية بس كمان ما لقيت الفرح اللي عم فتِّش عليه. بعدين صرت إشتري إشيا مصمَّمة بس إلي ما حدا غيري عندو اياها تا حسّ إنّي مميّز بس كمان ما كانت تدوم هالفرحة... بنهار بيوصلّي رسالة عالمكتب فيها طلب مساعدة لمستشفى مرضى السرطان. قدّمت المساعدة و ما فكَّرت مرتين بس انطلب منّي روح زور المستشفى. هونيك عرفت قيمة الحياة و نعمة الصحّة و فرح العطاء لمّا مساعدتّي الزغيرة عطيت الناس أمل كبير... هيدا الفرح الحقيقي اللي بقي معي!  الزوّادة بتقلّي وبتقلّك : الصوم المبارك مناسبة للعطاء، مش ضروري العطاء المادّي... إبتسامة صادقة لإنسان حزين بتفرّح قلبو و قلبكن... والله معك. المصدر : صفحة Jesus My Lord

  البناء على أساسات صلبة الله معك... بيخبّرو عن مهندس معماري كان كتير شاطر، نفّذ مشروع سكَني كبير بوقت كتير قليل، وكانو كلّ الناس عَم بيهنّوه على هالمشروع يلّي منظرو كتير حلو. بس مع الأسف، بعد فترة، بلّشو البنايات يسقطو وحدة ورا التانية. من الصدمة مات المهندس، ولمّا إجِت السلطات القضائيِّة والجنائيِّة لتحقِّق بسبب سقوط البنايات، إكتشفت إنّو البِنا معمِّر على صخور رمليِّة مش على صخور صلبة وأساساتو ما كانت متينة. الزوّادة بتقلّي وبتقلّك : ما تنغَرّ بالمظاهر الخارجيِّة، مش كلّ شي بيلمع هوّي دَهب، ولمَّا بدّك تِبني أيّ مشروع أسِّس على الصخر الصَّلب مش على الرمال المتحرِّكة، والله معك. المصدر : صوت المحبّة

  عيد الحبّ ❤️ اليوم عيد الحبّ، وما فيني خلّيه يقطع من دون ما إحكي عن الحبّ. مين منّا ما بيحبّ؟  منبلّش بالطّفل الزغير ومنخلص مع كلّ إنسان كبير. الكل بيعرف يحبّ! بس حُبّ عَن حُبّ بيِفرق !! في حبّ المصلحة اللي نتيجتو فشل العلاقات، وفي حُبّ بدِّي سمِّي : "جواب الحبّ"!  حبّ الطّفل هوّي حب بريء للشّخص اللي بيعطيه الحنان والحبّ.  حبّ اللي ما بيخاف من شي لمّا يكون بين إيدين اللي بيحبُّن!  بيعمل أيّ شي من دون خوف لأنّو بيعرف إنّو اللي بيحبّو مش ممكن يئذيه. الله حبنا حُبّ كبير ما بيوقف عا حدود! حَبّنا حُبّ من دون شروط. حَبّنا لدرجة إنّو مات كرمالنا. معقول ما نحبّو نحنا بدورنا من دون شرط أو مصلحة؟! مستعدّين نجاوب على حبّ الله :  بدِّي حبّ متلك يا ربّ؟ حُبّ بيمرق بالصّليب وبينتهي بالقيامة؟ عيد حُبّ مبارك عالجميع يسوع بيحبّنا، خلّونا نحبّو... والله معكن.

  الصِعاب بتعلِّم الله معك... الزوّادة اليوم بتدعينا لحتّى نفكِّر بهالقول كلّ مرّة منحِسّ إنّو نحنا مارقين بصعوبة كبيرة : «الأمواج الهادية ما بتعمل بحّار جيِّد... والسما الصافية ما بتعمل طيّار جيِّد... والحياة بدون صعوبات ما بتصنع شخص قوي». الزوّادة بتقلّي وبتقلّك : كون قوي وواجِه تحدِّيات الحياة، ولا مَرَّة تسأل ليش، تذكّر يلّي ما بيقبل التضحية رح يشتري الأسف والندم بأغلى الأثمان، والله معك. المصدر : صوت المحبّة

العصا والكلب الله معك... بيخبّرو عن لحّام، كان كل يوم يجي كلب ويوقف قدّام ملحمتو، وكان يكِبّلّو قطعة من اللحمة ياكلها الكلب ويفلّ هوّي وعَمّ بيهزّ بدنبو، لَبيوم من الإيّام كان اللحّام كتير معصّب، بدَل ما يعطيه قطعة لحمة ضربو بالعصا، هرب الكلب وكان كتير منزعج من يلّي صار معو، بيقرّر ما يرجع لعند هاللحام أبدًا.  بس بعد فترة جاع، وكانت النتيجة إنّو رجع لعند هاللحام، بس اللحام ما ضربو، إكتفى إنّو هدّدو بالعصا، هرب.  الزوّادة بتقلّي وبتقلّك : هيك نحنا والمجرّب، الربّ إنتصر عليه وغلبو بواسطة الصليب، بيكفي نحنا نرسم إشارة الصليب على وجوهنا لمّا بيعترضنا وساعتها منقدر نتغلّب عليه، والله معك. المصدر : صوت المحبّة

إيمان الأربعة بإنجيل القدّيس مرقس الفصل ٢ منقرا قصّة شفاء المخلَّع اللي إذا منجي منفكّر يسوع شفاه بسبب إيمان أصحابو اللي كانوا مُصرّين يوصلوه عند يسوع لأنّن أكيدين إنّو خلاصو و دواه عند المسيح حتّى إنّن فتحوا السقف و نزّلوه منو... بالمختصر... إعرف تختار أصحابك و الناس اللي حولك لأنّو هالخيار عندو تأثير كبير عا حياتك و عا علاقتك بالربّ... الله معك. المصدر : صفحة Jesus My Lord

  يسوع هو الباب الله معك... بيخبّرو عن إمّ كانت عَم تشرح لَبِنْتها إنّو يسوع هوّي الباب يلّي من خلالو مندخل للسما، بتسأل البنت إمها : «كيف يعني»؟ بتقلّها : «إذا رِحتي لعند حدا من رفقاتك وشفتِيُن كاتبين على باب البيت : الدخول من الباب الجانبي، شو بتعملي»؟ قالتلها : «أكيد بدخُل من الباب الجانبي».  بتسألها الإم من جديد : «طَيّب إذا وعيتي بالليل وشِفتي حَدا عم بيفوت على البيت من الشبّاك شو بتعملي»؟ قالتلها : «أكيد بقول عَنّو سِرّاق وحرامي، لأنّو مَنّو داخِل من الباب».  ساعتها بتقلّها الإمّ : «السما ذات الشي، بابها هُوّي يسوع إذا ما مندخُل من خلالو منكون لصوص وحراميّي». الزوّادة بتقلّي وبتقلّك : إذا بدنا نفوت على السما، لازم نمرق بيسوع لأنّو هوّي الباب، وكل واحد بَدّو يوصل لبيت الآب لازم يعبُر بيسوع، لأنّو هوّي الراعي وباب الحظيرة يلّي من خلالو مندخل لحضن الآب، والله معك. المصدر : صوت المحبّة

إحمل صليبك بفرح بيخبرو عن ستّ ختيارة قالت لحفيدها : ما تقول إنَّك مريض حتّى لو كنت عنجد مريض. إستغرب الشبّ... كمَّلِت الستّ و قالت : ما تقول أنا مريض، قول أنا عم بشفى! و الفرق كبير... كون إيجابي و تذكّر إنّو وجود الربّ بحياتك بيخلّيك تحمل صليبك بفرح و تمشي... والله معك المصدر : صفحة Jesus My Lord

  الله محبّة الله معك... بيخبّرو إنّو بيوم من الإيَّام، نِزِل مخلوق من الفضاء بمركبتو الفضائيِّة على الأرض والتقى بمجموعة من الشباب وسألُن :  «شو في عندكُن على الأرض شي مُميَّز»؟  جاوبوه :  «نحنا في عِنَّا إختراع إسمو العالم الرقمي، هيدا من أهمّ الإختراعات». جاوب المخلوق الفضائي :  «هيدا شي كتير قديم نحنا منعرفو من زمان، غَير هَيك شو عندكُن»؟  جاوبوه : «نحنا إخترعنا مركبة منطلع فيها على الفضا، لبعيد، منوصل على القمر، وهلّق عم نعمل دراسات لنوصل للمرّيخ»، قَلُّن :  «هيدا شي قديم، شو عندكن أهمّ من هيك»؟ واحد من هالشباب كان كتير مؤمن قلّو :  «نحنا عِنّا إله كبير تجسّد وصار طفل كتير زغير لحتَّى يخلِّصنا ويجعل مِنّا إخوة وأبناء للآب السماوي». ساعتها بِكي المخلوق الفضائي وقلّو :  «صح إنتو عندكُن شي نحنا بعد ما سمعنا فيه، انشالله بتوصلو لعِنّا بأسرع وقت ممكن لحتَّى تخبّرونا عَنّو». الزوّادة بتقلّي وبتقلّك : نحنا يلّي إختبرنا جمال يسوع الإله الكبير يلّي صار كتير زغير، لازم نخبِّر عَنّو ونشهد لمحبتو قدّام كلّ يلّي بعد ما عرفوه.  هيدا أتمَن كنز عنّا، حرام ما نعِلنو لكلّ الناس، والله معك. المصدر :

  إتطَلّعوا لفوق !   محور الزوّادة اليوم المزمور ١٢١ اللي بيقول :   "أَرْفَعُ عَيْنَيَّ إِلَى الْجِبَالِ، مِنْ حَيْثُ يَأْتِي عَوْنِي! مَعُونَتِي مِنْ عِنْدِ الرَّبِّ، صَانِعِ السَّمَاوَاتِ وَالأَرْضِ. لاَ يَدَعُ رِجْلَكَ تَزِلُّ. لاَ يَنْعَسُ حَافِظُكَ. إِنَّهُ لاَ يَنْعَسُ وَلاَ يَنَامُ حَافِظُ إِسْرَائِيلَ. الرَّبُّ حَافِظُكَ. الرَّبُّ ظِلٌّ لَكَ عَنْ يَدِكَ الْيُمْنَى. لاَ تَضْرِبُكَ الشَّمْسُ فِي النَّهَارِ، وَلاَ الْقَمَرُ فِي اللَّيْلِ. الرَّبُّ يَحْفَظُكَ مِنْ كُلِّ شَرّ. يَحْفَظُ نَفْسَكَ. الرَّبُّ يَحْفَظُ خُرُوجَكَ وَدُخُولَكَ مِنَ الآنَ وَإِلَى الدَّهْرِ." هالمزمور واحد من مزامير "المصاعد" و جغرافيا المسافر عا أورشليم بيشوف سلسلة جبال متل جبل الجلجثة و جبل الزيتون و جبل التجلّي و غيرها إعتبر المرنِّم إنّو من هالجبال بتجي المعونة و مساعدة الربّ إلو بوقت كتار بعدُن موجهين نظرهن عهالأرض بدل ما يتطلّعوا لفوق!  الله يحميكن و يوم مبارك مع يسوع. المصدر : صفحة Jesus My Lord

  تاجر الجوز بيخبرو عن زلمي متِّكل عا الله بكلّ شي و مسلَّم حياتو لمشيئة الربّ عالآخِر. كل يوم بيصلِّب إيدو عا وجّو و بيروح عا شغلو.  هوّي بيّاع جوز كان يحطّ هالكيس عا ضهرو و يروح عالسّوق بس هوّي ما كان منتبِه إنّو الكيس مخزوق و عم يوقَع منّو حبوب جوز أوقات.  مِرقِت سنين و شِتي و صيف و ربيع و خريف حتَّى هالزلمي شاف أعداد كبيرة من شجر الجوز طُلعِت بأرضو عالطّريق اللّي بيمشيها كلّ يوم و صار تاجِر جوز كبير بلا ما يعرِف مين اللّي زرَع هالشجرات! إيمانو هوّي اللّي زرَعلو اياهن!  لمّا سلَّم حياتو للربّ، الله اهتمّ فيه كتير منيح بلا ما يعوز هوّي إنّو يطلُب شي! لتكن مشيئتَك يا ربّ اليوم و كلّ يوم... آمــــــــــــين! المصدر : صفحة Jesus My Lord

  جملة بتضَحّك الله معك... بيخبّرو عن مَلِك، لما إستلم الحِكِم، طلب من كلّ أبناء المملكة إنّو يبعتولو جِمَل لحتّى يختار مِنُّن جملة ويكتبها على خاتمو الملكي، وهالجملة تضحّكو وتنسّيه الحالة يلّي هوّي فيها.  الكلّ بيبعتولو، والملك بيختار هالعبارة : «ما في شي باقي». الزوّادة بتقلّي وبتقلّك : ما في شي باقي، إذا كنت حزين، تذكّر إنّو الحزن مَنّو باقي وإذا كنت بحالة يأس كمان مَنّو باقي تذكّر إنّو بَعد الشتي جايي ربيع، والله معك. المصدر : صوت المحبّة

  شوكولا قبل الغدا ؟! لمّا إبنك يصير يبكي و يصرخ بدّو شوكولا قبل الغدا بتعطيه؟  أكيد لأ... بس لمّا ياكل شي بيغذّي أكيد بتعطيه. فكرة إنّو إنت بتعرف الأحسن لإبنك و بالتوقيت المناسب بتتطبّق على علاقتنا مع ربنا!  هوّي بَينا السماوي و بيعرف التوقيت المناسب لكل شي بحياتنا و نحنا عاطول مستعجلين بدنا كل شي بسرعة!  يا ربّ أنا بوثق بتوقيتك و بمشروعك لحياتي، لتكن مشيئتك... آمــــــــــــين. المصدر : صفحة Jesus My Lord

تقاسم خيرات الأرض الله معك... بيوم مِن الإيَّام كنت قاعد بالقهوة عم بتفرّج على نملة كانت عَم بتفتّش على شي لتاكلو، وبتلاقي حالها قدّام طاولة بتعربِش عليها بتلاقي في كومة من السكَّر، أكلت لحتَّى شِبعِت، ونِزلِت عن الطاولة، وبسرعة بيِجو نملتَين تنَين وتلاتة وجيش من النمل كلُّن أكلو وشبعو.  فكَّرت بهالمشهد، وعرِفت إنّو النملات في عندُن طريقة تواصُل نحنا منجهلها، بَس المهمّ إنّو عرفو كيف بدّن يخبّرو بعض لحتّى يتقاسمو الخير يلّي الربّ عطاهُن ياه. الزوّادة بتدعيني وبتدعيك : لعَيش الشراكة والمحبِّة ولتقاسم خيرات الأرض، مش مطلوب مِنّا نِقضي على الفقر، المطلوب نتقاسم خيرات الأرض مع بعض، والله معك. المصدر : صوت المحبّة

  ما تِحكموا عالناس ! بيخبرو عن زلمي عندو دكّان شوي فات صبي زغير. قام صاحب الدّكان قلّها لَمرتو :  هيدا أغبَى ولد بالعالَم شوفي. فتَح إيديه و حطّ بإيد ٢٠ ألف ليرة و بإيد ٥٠ ألف ليرة و قلّو إختار، قام الصّبي أخَد الـ ٢٠ ألف و فلّ! قلّها شِفتي!  كل يوم بيٍجي و كل يوم بعمِل فيه هيك و بياخُد الـ ٢٠ ! بعد فترة سمعِت المَرا الصّبي عم يخبِّر رفقاتو بالحيّ و عم يقلُّن مفكّرني ما بِفهَم بس أنا بعرِف كتير منيح إنّو نهار اللّي باخُد الـ ٥٠ ألف رح تُخلَص اللِّعبة و ما بقا يطلعلي شي! ما تحكموا عالناس! ما تحكموا عالناس! ما تحكموا عالناس!  هيك يسوع قال و هيك لازم نتصرَّف... الله معكن. المصدر : صفحة Jesus My Lord