الزوادة اليومية

  لقد تعلّمت الله معك... بيخبّروا عن نابوليون بونابرت لمّا رجع من المنفى وإجتمع بالأسرة المالكة، سألوه شو إختبرت بالمنفى؟  جاوب : المنفى هوّي حياة تعلّمت فيها كيف إتقبّل الخسارة متل ما إفرح بالرّبح، تعلّمت إنّي إتعلّم من غلطي لأنّو الإنسان ضعيف ومعرّض للخسارة، تعلّمت إنّي حبّ وجرّب كيف بدّي كون محبوب، بإختصار المنفى والحكم والحرّيّة والسّجن هنّي حياة والحلو إنّي تعلّمت إنّو لازم على طول بالحياة ومن الحياة إتعلّم. الزّوّادة بتقلّي وبتقلّك : الحياة هيّي فصول، وبالفصول في مواد وفي دروس، حلو نضلّ على طول طلّاب علم ومعرفة نتعلّم من كلّ حدث، والله معك. المصدر : صفحة Jesus My Lord

  إزرع هالوردة بجنينتك بيخبرو إنّو في بنت بتقول إنها بتحبّ الورود كتير بتجمعلن صورهن و وين ما بتشوف جنينة بتتأمّلها بس و لا مرّة زرعت وردة عندها! متل اللي بيقول أنا بحب الله كتير و وين ما بيشوف ناس عم يصلّوا بيقول إنّو كتير حلو اللي عم يعملوه بس و لا مرّة صلّى معن! إزرع هالوردة بجنينتك و صير واحد منّن بدل ما تتفرّج عليهن!  شارك بالصلا و وقتها كل شي بيصير إلو معنى... الله معكن. المصدر : صفحة Jesus My Lord

  الله عندو مشروع ! بيخبرو عن ضيعة كانت معروفة بالزراعة بس وصل وقت الأراضي ما بقا طلّعت محصول متل قبل مع إنّو بعدن الفلّاحين عم يهتمّوا فيها بنفس الطريقة! صاروا الضِيَع اللي حولن تزدهر و هنّي مش قادرين يعملوا شي لوقت ما شب زغير فكّر بحلّ و لاقى فكرة.  قلّن بدل ما نتعب عالفاضي و أرضنا ما عم تساعدنا منشتري محصول باقي الضِيَع و منتاجر فيه!  و هيك صار و كبرت تجارتن و إزدهرت!  الزوّادة بتقلنا إنّو أوقات نحنا منكون عم نقتل حالنا كرمال شي و منزعل إذا ما زبط بوقت الله عندو مشروع لكل واحد مِنا و مخطّط لحياتو أحلى بكتير من اللي نحنا منفكّر فيه! الله معكن. المصدر : صفحة Jesus My Lord

  الصلا نور لحياتنا بيقول القدّيس يوحنّا فم الذَّهب إنّو لمّا يطلع الضّو و تشرق الشمس بتتخبّى الوحوش الضارية بوكارها و ما بقا تطلع هيك كمان بيصير كل ما نحنا صلّينا!  الصلا نور لحياتنا و طول ما هالنور موجود كلّ قوى الشرّ بتبطّل تقدر تأثّر علينا!  صلّوا و لا تملّوا! الله يرافقكن! المصدر : صفحة Jesus My Lord

  الصّديق الله معك... سألو سقراط مين هوّي الصّديق الحقيقي؟  جاوب وقال : هوّي يلّي من نظرة بيفهمك، وبس تحكي بيقلبو بيصغيلك، ولمّا بتشكيلو همومك بيساعدك بيتقاسمها معك ليصير حملها أخفّ، وإذا شي نهار ضيّعت الطّريق الصّحيح بيكون مرشدك، وإذا بكيت بتكون إيدو الأسرع لتمسحلك دموعك، كلّ مرّة بتحترمو بيكون عم بيقدّرك وإذا شي نهار غبت عن عيونو ما بيسمح إنّك تغيب عن قلبو، بيفتش عنّك حتّى يلاقيك. الزّوّادة بتقلّي وبتقلّك : بزمن صارت الصّداقة بحاجة لشهود خلّيني أنا وإنت نشهد إنّو الصّداقة موجودة ونكون رسل لإلها، والله معك. المصدر : صوت المحبّة

  أبناء الله بيقول القدّيس غريغوريوس النيصي : "بالأمس كنّا نولد أبناء للبشر، واليوم نولد أبناء لله." أنت اليوم إبن الله و عندك كل إمتيازات الإبن و زيادة! اعطينا يا ربّ نكون إلك أبناء صالحين و نقدر نكون صورتك بهالعالم حتّى الناس يشوفوك فينا.  اليوم كلنا عم نقلّك يا ربّ إننا رحّ نعيش بنوِّتنا إلك للآخر و رح نبلّش هالشي بالصلا اللي علّمتنا اياها و نقلّك : "أبانا" الذي في السماوات... المصدر : صفحة Jesus My Lord

  كمشة لوز بيخبرو عن ولد زغير بيشتغل بالصيفيّة بيساعد بقطف اللوز من البساتين تا يطلّع مصروفو.  قَلّو الزلمي اللي عم يشتغل معو إذا بتساعدني اليوم و ما بتلتهي بتكسير اللوز بوقت الشغل رح عبّيلك إيدَيك التنين و جيابك لوز.  تطلّع هالصبي بإيديه و جيابو و شافن زغار فكّر و قلّو ما رح إلتهي أبداً بس بتعبّيلي إيديك إنت و جيابك إنت و بتعطيني اياهن!  خلّونا نتعلّم نطلب من الربّ نِعَم حسب مقياسو هوّي مش حسب ما منشوف نحنا البشر بنظرتنا المحدودة الضيقة!  يا ربّ... عطاياك لامتناهية و يداي صغيرتان... الله يرافقكن! المصدر : صفحة Jesus My Lord

  بكرا بس نوقف قدّام ربنا شو رح نقلّو؟ من أقوال القدّيس بيو :  "إنّ المحبّة هي المقياس الَّذي على أساسه سيحاسِب الربّ الجميع." بكرا بس نوقف قدّام ربنا شو رح نقلّو؟  أنا هلقد جمّعت مصاري، أنا كان معي هيدي السيارة، أنا كان عندي هالبيت...؟ أكيد لأ!  رح يقلّك قدّيش حبّيت الناس حولك؟  قدّيش حبّيت خيّك و ما كنت أناني؟  ربنا ما رح يسألك عن شي إلّا عن الحبّ اللي بقلبك!  طول ما الله ما نسي يوعّيك يعني عندك فرصة حتّى تجدّد قلبك و تملّي حبّ! والله معك! المصدر : صفحة Jesus My Lord

  المحبّ الحقيقي الله معك... زوّادة اليوم قصّة حقيقيّة خبّرها أحد مقدّمي البرامج الصباحيِّة قال : إنّو بيوم من الإيّام سأل المستمعين مين هوّي المحبّ الحقيقي؟  وبسرعة إنهالت الإجابات على الإذاعة عبر الهاتف والرّسائل القصيرة والواتسآب وكلّ وسائل الإتّصال الإجتماعي، المذيع دهش من الإجابات يلّي كانت حاملة أجمل وألطف الكلام، بس في جواب إستوقف المذيع كان على الشّكل التّالي :  المحبّ الحقيقي مش يلّي بيبكي عليك لمّا بتموت، هوّي يلّي بيموت لمّا إنت بتبكي. الزّوّادة بتقلّي وبتقلّك : كتار يلّي بيقدّموا الأكاليل وبدلها لمّا الأشخاص بيموتوا، قلال يلّي بيقدّموا وردة لإنسان على قيد الحياة، خلّينا نقدّر النّاس خلال حياتهن ونسمّعو كلمة حلوة أفضل ما ننتظر نهار وفاتهن حتّى نرثيهن بالكلام الجميل، والله معك. المصدر : صوت المحبّة

  قلب الصّفحة الله معك... بيخبّر أحد أساتذة اللّغة العربيّة وبيقول: لمّا كنت تلميذ بالمدرسة كنت على طول ما إفهم شغلتين لمّا الإستاذ بيقلّنا حطّوا نقطة على السطر وبلّشوا من جديد، أو لمّا يقلّنا غيّروا الصّفحة وبلّشوا بصفحة جديدة، لمّا كبرت وصرت إستاذ اكتشفت إنّو التغيير ما بيكون بنقطة على السّطر أو بقلب الصّفحة إنّما بتغيير الكتاب. الزّوّادة بتقلّي وبتقلّك : الإنسان بالحياة مرّات كتيرة التّغيير بيطلب منا نقلب صفحات ونغيّر كتب، بس شو حلو نحافظ على مبادينا الإنسانية والمسيحيّة، والله معك. المصدر : صوت المحبّة

  المودّة الله معك... بيخبّروا عن شاب كان كتير يحب السّفر، هدفو من السّفر التعرّف على بلدان جداد وحضارات جديدة، قصد الهند وكان عندو رغبة يلتقي أحد الرّهبان البوديّين وهيك صار، لمّا إلتقى الرّاهب دار بيناتهن حديث شيّق، وبنهاية الحديث طلب من الرّاهب نصيحة، قلّو بدل النّصيحة رح بعطيك تنين، أوّل نصيحة بتقول ما تتعب نفسك لتوصل لإنسان ما بيعمل مجهود ليوصل لعندك، وما تحارب العالم كرمال إنسان مش قادر يحارب كبرياؤو كرمالك، والنّصيحة التّانية بتقول ولا يوم بحياتك تفتكّر إنّو الإعتذار من الشّخص يلّي بتحبّو هوّي علامة ضعف ،بالعكس هوّي تقدير للمحبّة والمودّة يلّي بتجمعك بهالشّخصيّة. الزّوّادة بتقلّي وبتقلّك : لمّا الرّب خلق الإنسان ميّزو إنّو علائقي ما بيقدر يعيش وحدو، خلّينا نبني علاقات جيّدة مع الآخرين أساساتها مرتكزة على الإحترام والمودّة، والله معك. المصدر : صوت المحبّة

  مدرسة الحياة الله معك... من بعد ما تخرّجوا من الثّانوية التقوا رفاق مقاعد الدّراسة مع بعض وصار كل واحد يخبّر عن إختصاصو الجامعي، وشو تعلّم بالجامعة، وكيف عم بيطبّق شو تعلّم بالحياة اليوميّة، كلّ واحد كان عم يحكي والبقيّة عم يسمعولو بفرح، الطّبيب حكي والمحامي حكي والمهندس حكي ووصل الدّور بالكلام لأحد الجنود يلّي شارك بحرب فيتنام وكان عندو إعاقة، قال أنا ما فتت على جامعة، أنا دخلت على المدرسة الحربيّة وشاركت بحرب فيتنام وتعلّمت إنّو الإنكسار صعب وإذا انكسرت ما حدا بيساعدني لأنطلق من جديد إلّا ذاتي، والإتكال الوحيد هوّي على الله وعلى إرادتي، لازم الإنسان يكون صبور وقوي، لازم ينتصر على كلّ التّجارب والصّعاب يلّي بتعترضو على دروب الحياة، ممنوع إنّو يبكي لازم يغني ويبتسم رغم الصّعاب ويبكّي كلّ التّجارب عند حدود صبرو وإبتسامتو. الزّوّادة بتقلّي وبتقلّك : على دروب الحياة كتار هنّي الصّعاب يلّي بيعترضونا، مرّات كتيرة منوقع، نيّالنا إذا لقينا سمعان القيرواني ناطرنا ليحمل عنّا الصّعاب، ونيّالنا إذا كنّا سمعان وعلى طول حاضرين لنساعد الآخرين بحمل صلبانهن، والله معك. المصدر : صوت المحبّة

  كُنْ لنا حصناً منيعاً بيقول أحد علماء النفس إنّو إذا شخص قدر يستفزّك كون أكيد إنّو عقلك كمان شريك بهالشي معو! يا ربّ بالقدّاس منقول :  كُنْ لنا حصناً منيعاً... ساعدنا نحصّن حالنا بوجه كلّ شي بيبعدنا عنّك، بوجه كلّ شي بيخلفنا نحنا و خَينا الإنسان، بوجه كل شي جوّاتنا واقف بيننا و بين تعاليمك إنت اللي وصّيتنا نحب بعضنا... آميـــــــن! المصدر : صفحة Jesus My Lord

الله والنّاس   الله معك... بيخبّروا عن شاب قضّى كلّ حياتو حابب يعرف شو الفرق بين الله والإنسان وما حدا كان يعطيه الجواب الشّافي الوافي. بيوم من الإيّام قصد منسكة على راس الجبل إستقبلو ناسك متقدّم بالسّن، قبل التّحيّة سألو :  ممكن تقلّي شو الفرق بين الله والإنسان؟  جاوبو بكلّ حكمة وقداسة لمّا بتطلب طلب من الإنسان بتحطّ راسك بالأرض وبتطلب الطلب، لمّا بدّك تطلب من الربّ بترفع راسك بالعالي وبتطلب طلبك، والأهمّ من هيك لمّا بتخاف إنسان بتهرب من وجّو، بس لمّا بتخاف الله بيصير عندك رغبة وشوق إنّك تشوف وجّو، ما قدر الشبّ إلّا ما رفع راسو لفوق وقال يا ربّ ما تحرمني من إنّي شوف وجّك. الزّوّادة بتقلّي وبتقلّك : تنين ما فينا نعيش بلاهن الله والنّاس خلّينا نعيش مع النّاس تحت نظر الله ورعايتو، والله معك. المصدر : صوت المحبّة

  هموم الشّغل الله معك... بيخبّروا عن شاب من بعد ما تعذّب من كتر ما خانوه رفاقو بالشّغل، وطعنوا بضهرو، بليلة من اللّيالي كان عم يتشارك مع بيّو هموم الشّغل، بيقلّو بيّو : يا إبني بنصحك ولا يوم تطلّع وراك إنت وماشي على دروب الحياة، لأنّك رح بتشوف كتير أمور بتوجّعك وبتئذيك، رح بتشوف أنواع من النّاس، النّوع الأوّل بيكره تقدّمك ونجاحك، النّوع التّاني بيتمنى إنّك تضلّ محلّك والنّوع التّالت بينام وبيحلم إنّك تضل وراه، بوصّيك تضلّ ماشي بطريق الحق لو كنت لوحدك، أفضل ما تكون قائد جيش على طريق الغلط. الزّوّادة بتذكّرني وبتذكّرك : بكلام الربّ يسوع أنا الطّريق والحق والحياة، خلّينا أنا وإنت نجاهد الجهاد الحسن ولا يوم نتأثّر بأحاديث النّاس، خلّينا نحطّ إيدنا على المحراث ما نتطلّع لورا نمشي على درب الرّب يلّي بوصّلنا للحقيقة والحياة، والله معك. المصدر : صوت المحبّة

  الذّاكرة الله معك...   بيخبّروا عن طلّاب بكلّيِّة الطبّ كانوا عم يتحادثوا مع بعض عن الذّاكرة، وإذا كان من الممكن تحديد مكان وجودها، أكيد صار في شبه إجماع على وجود الذّاكرة في العقل البشريّ وبالتحديد بالحافظة، في طالب إعترض على النّظريّة وقال :  الذّاكرة موجودة بقلب الإنسان مش بيعقلو، ويلّي بيأكّد نظريتي إنّو الإنسان بيشوف بعينو وبيحفظ براسو وكتار يلّي منشوفهن بعيونّا ومننساهن بس الإنسان بيحبّ بقلبو ومن الصّعب جدًا جدًا إنّو ينسى يلّي منحبّهن. الزّوّادة بتقلّي وبتقلّك : الله محبّة والقلب هوّي مصدر الحبّ، خلّينا نشوف بعيونّا ونحبّ بقلوبنا، هيك منكون عم ننشّط ذاكرتنا الفكريّة والقلبيّة ومنقدر نحب أكتر ونحفظ أكتر، والله معك. المصدر : صوت المحبّة

  بتحبّي عنجدّ؟ بيخبرو عن صبيّة سألت رفيقتها كيف بتعرفي و بتتأكّدي إنّك بتحبّي شخص عنجدّ؟  جاوبت الرفيقة : لمّا يكون في إشيا بتوجّع كتير بس إنتي تختاري تبقي و ما  تفلّي! قَولكن يسوع ما كان فيه يتفادى آلام  الصليب؟  قولكن ما كان قادر يفلّ و ما يتوجّع هلقدّ؟  أكيد كان قادر!  بس ليش بقي رغم الوجع؟  لأنّو بيحبنا أكتر من كتير!  فإذن رمز الحبّ مش القلب... فعليًّا رمز الحب هوّي علامة الصليب...  صليب الربّ يحمي بيوتكن و عيالكن. آميـــــــن! المصدر : صفحة Jesus My Lord

  إحملوا صليبكن بفرح "إن أراد أحد يأتي ورائي فلينكر نفسه ويحمل صليبه ويتبعني" (مت ١٦: ٢٤) إحملوا صليبكن بفرح و تذكّروا إنّو الربّ ما بيحمِّل حدا أكتر من قدرتو و ما تنسوا إنّو بيعطي أكبر معاركو لأقوى جنودو... بليلة عيد إرتفاع الصليب المقدّس منصلّيلك يا ربّ تكون معنا و تحمينا بعلامة الصليب و كل ما ضعفنا تذكّرنا إنّو الصليب مش النهاية و إنّو هوّي بوّابة تا نوصل للقيامة... آميـــــــن. المصدر : صفحة Jesus My Lord

  شكرًا الله معك... بيخبّروا إنّو بيوم من الإيّام سئل أحد الفلاسفة الإغريق لمين بتحبّ تقول شكراً بالحياة اليوميّة؟  جاوب بحبّ قول شكراً لكلّ إنسان وقف حدّي لمّا كنت محتاج، ولكلّ مين عطاني نصيحة لأنّو شجّعني لكمّل الدّرب بطريقة أفضل وأنجح، ولكلّ مين رافقني على دروب الحياة وكان السّبب برسم إبتسامي على وجّي وبقلبي، وبحب إشكر كلّ مين علّمني لأنّو ترك بصمة بحياتي، وبالختام بحبّ إشكر كلّ إنسان حبّني رغم كلّ الأخطاء والنّقايص يلّي موجودة عندي لأنّو بهالمحبّة عطاني فرصة لحتّى إكبر وإتقدّم على دروب الحياة. الزّوّادة بتقلّي وبتقلّك : ما لازم ولا يوم نتردّد نقول شكراً لكلّ الأشخاص يلّي الرّب بيحطّن بطريقنا لأنّهن سبب نموّنا ونجاحاتنا وخلّينا نتذكّر إنّو بالشّكر بتدوم النّعم، والله معك. المصدر : صوت المحبّة

  وسائل الإتِّصال الله معك... حابب أنا وإنتو اليوم نتأمّل بهالحادثة يلّي صارت مع بيل غيت صاحب شركة مايكروسوفت، ونظريّة شبّاك بكلّ بيت.  بيوم من الإيّام كان مجتمع مع موظّفي شركة الميكروسوفت، واحد منّهن حب يحرجوا بسؤال قدّام الكلّ، بيسألو : برأيك شو أهمّ وسيلة إتّصال بعالم اليوم، العالم الرّقمي؟  جاوبو بكلّ بساطة كلّ الوسائل الآلية وشبه الآلّية مهمّة بس إذا بدّك الأهم هيّي التّواصل وجهًا لوجه، والأهمّ هيّ نظرة الإنسان لخيّو الإنسان. الزّوّادة اليوم بتدعيني وبتدعيك : للتّأمّل بنظرات يسوع، نظر للشّاب الغني وحبو، نظر لأرملة نائين أقام إبنها من بين الأموات، نظر للأبرص أعاد خلقو من جديد، خلّينا اليوم ننظر بعيوننا ونرحم بقلوبنا، والله معك. المصدر : صوت المحبّة

المساعدة الله معك... بيخبّروا إنّو بيوم من الإيّام في صبيّة قصدت مدينة السّلام، قابلت الأم تريزا دي كالكوتا وقالتلها : أنا كتير حابّي إنّي ساعد النّاس المحتاجين، بس مع الأسف ما معي مصاري وما عندي القوّة إنّي إنزل إشحد لحتّى ساعدن.  بتقلّها الأم تريزا لحتّى نساعد النّاس مش من الضروري أبدًا إنّو نكون ناس أقوياء أو أغنياء، المهم إنّو نكون أنقياء القلوب ونفوسنا طيّبة.  الزّوّادة بتقلّي وبتقلّك : تذكّر إنّو الربّ بيطوّب أنقياء القلوب لأنّو أنقياء القلوب بيورتوا الأرض، والله معك. المصدر : صوت المحبّة

  التّنعّم بالحياة الله معكن... بيخبّروا عن شاب كان يحلم على طول بحياة جميلة وسعيدة، عاش وإختبر عالم الرغبة واللّذة والشّهوات، بس على طول كان يحسّ بفراغ وحزن كتير كبير، بيوم من الإيّام قصد ناسك على راس الجبل طلب إنّو يعترف أقرّ بكلّ خطاياه، لمّا سألو ليش عمل كلّ هالخطايا جاوبو : كنت حابب عيش أجمل حياة على وجه الأرض، جاوبو النّاسك: سمحلي قلّك إنّك إخترت الطّريق الغلط لحتّى تتنعّم بأجمل حياة، مطلوب منّك تلات خطوات أوّل خطوة إنّك تحطّ الرّب يسوع نصب عينيك، تمشي ويكون هدفك الوحيد إنّك توصل لعندو، الخطوة التّانية لازم تحطّ الكتاب المقدّس بين إيديك، ويكون هوّي مرشدك على دروب الحياة، تتغذّى من كلامو  لأنّو الإنسان بيحيى من كلمات الله، الخطوة التّالتة والأخيرة لازم تحطّ كلّ شهوات ورغبات العالم تحت إجريك وتردّد على طول للرّب وحده تسجد إياه وحده تعبد، وهيك بتعيش أجمل حياة على وجه الأرض. الزّوّادة بتقلّي وبتقلّك : نحنا على طول بصراع مع العالم وشهواتو، خلّينا نتتلمذ على إيدين يسوع يلّي تجرّب بالبريّة وإنتصر من خلال الصّوم والصّلاة، ونردّد معو لتكن مشيئتك لا مشيئتنا يا رب، والله معك. المصدر : صوت ا

  خيفان ؟ الحلّ عَنَّا ! خيفان؟ عِتلان همّ إشيا؟ مش حاسِس بالأمان؟  هالباقة من آيات الكتاب المقدّس إلَك!  تذكَّر إنّو الإنجيل كتاب الحياة و الربّ بيحكينا من خلالو! "الرَّبُّ يَحْفَظُكَ مِنْ كُلِّ سُوءٍ. يَحْفَظُ نَفْسَكَ.  الرَّبُّ يَحْفَظُ خُرُوجَكَ وَدُخُولَكَ مِنَ الآنَ وَإِلَى الدَّهْرِ" (سفر المزامير ١٢١: ٧، ٨) "عَلَى اللهِ تَوَكَّلْتُ فَلاَ أَخَافُ. مَاذَا يَصْنَعُهُ بِي الإِنْسَانُ؟" (سفر المزامير ٥٦: ١١) "الرَّبُّ رَاعِيَّ فَلاَ يُعْوِزُنِي شَيْءٌ" (سفر المزامير ٢٣: ١) "كَثِيرَةٌ هِيَ بَلاَيَا الصِّدِّيقِ، وَمِنْ جَمِيعِهَا يُنَجِّيهِ الرَّبُّ" (سفر المزامير ٣٤: ١٩) "لاَ تَخَفْ لأَنِّي مَعَكَ، وَأُبَارِكُكَ" (سفر التكوين ٢٦: ٢٤) المصدر : صفحة Jesus My Lord

  بركة إيّام زمان بيخبرو عن صبي قلّو لجدّو شو الفرق بين إيّامكن و إيّامنا؟ قلّو الجدّ كلمات ما رح ينساها أبدًا!  جاوبو : نحنا حياتنا كان فيها تعب جسدي بس بالنا مرتاح و إنتو حياتكن اليوم إخترعتوا إشيا تريحوا جسمكن بس ما عندكن سلام داخلي و بالكن مش مرتاح! معو حق هالختيار!  كل الكبار بيقولولنا عا إيّامنا كان في "بركة"... طيّب وين راحت هالبركة؟!  الخطيّة إجت غطّت عليها... حبّ المال غطّى عليها... الأنانيّة غطّت عليها... و الأهمّ البعد عن الله و قلّة الإيمان غطّوا عليها كتير!  بدكن تعيشوا بركة إيّام زمان؟  صرتوا تعرفوا شو لازم تعملوا!  الله معكن! المصدر : صفحة Jesus My Lord

    مين هوّي يسوع؟ الله معكن... بتخبّر معلّمة من معلمّات التّعليم المسيحي، إنّو بيوم من الإيّام قرّرت تسأل تلاميذها يلّي عم يتحضّروا للمناولة الأولى مين هوّي يسوع بنظرهن؟  أُعجبت جداً بالإجابة يلّي قالها أحد الطّلاب بكلّ براءة :  يسوع هوّي الطّريق، الحق، والحياة، التّواضع، الوداعة والحنان، التّسامح، العطف والغفران، يسوع هوّي كلّ شيء، هوّي القادر على كلّ شي، بس الأهم هوّي المحبّة يلّي بتخبّي كلّ شي.  الزّوّادة بتقلّي وبتقلّك : يا ريت فينا نكون متل هالطّفل ويكون يسوع كلّ شيء بحياتنا هوّي الألف والياء، هوّي نقطة الإنطلاق والوصول، هوّي البداية والنهاية، والله معكن. المصدر : صوت المحبّة

  إيد الله الله معكن... بيخبّروا عن شاب كتير غني، قرّر يتخلّى عن غناه ويترهّب، باع بيتو وأرضو وكلّ ممتلكاتو، قصد الصّحراء ودخل على أوّل دير طلب مقابلة ريّس الدير، لمّا التقوا بيخبّرو عن رغبة قلبو بالتّرهّب وبيقلّو بعرف إنّو السّلطة بتمثّل الرّب، جايي حطّ بين إيديك كلّ يلّي بملكو لحتّى تتصرّف فيه لمجد الله وخير النّاس  ، جاوب الريّس أهلا وسهلا فيك بقلب جماعتنا الدّيريّة صار فيك تعتبر حالك تلميذ عم تتعرّف على الحياة الرّهبانيّة، الشّاب بيشكر الريّس وبيطلب منّو أوّل وصيّة بيعطيه ياها، هوّي وعلى باب حصن الدير، قلّو الريّس يا إبني يلّي بيترك كلّ شي بيملكو بإيد الله، رح بيحس إيد الله عم تحملو كلّ حياتو. الزّوّادة بتقلّي وبتقلّك : خلّينا نحطّ حياتنا بين إيدين الرّب وشو حلو نحسّ بإيدو عم بتجمّلنا حياتنا عم بتنقّيها من كلّ العيوب، والله معك. المصدر : صوت المحبّة

  قول الحقيقة مهما كلّف الأمر   بيقولوا إنّو الصّداقة و الحب بيزَهّروا مطرَح ما بيكونوا الناس صادقين! الزوّادة اليوم بتقلَّك حافِظ عا أصدقاءَك و عالنّاس اللّي بتحبُّن، كون صادِق معُن شو ما كانِت الظّروف و تذكَّر إنّو أوقات يمكِن الحقيقة تكون قاسية بس ما في غيرها بيِبني العلاقات عا أسُس قويّة.  منُقرا بالكتاب المقدّس : "الشِّفَاهُ الْكَاذِبَةُ رِجْسٌ لَدَى الرَّبِّ، وَمَسَرَّتُهُ بِالْعَامِلِينَ بِالصِّدْقِ."  (الأمثال ٢٢:١٢)  الصّادِق محبوب عالأرض و بالسّما!  قد ما كان الكِذب عم يلمَع تذكَّر إنّو وحدها الحقيقة من دَهَب... الله يرافقكُن! المصدر : صفحة Jesus My Lord

  نسيت إنّو عيش الله معكن... بيخبّروا عن رجّال متقدّم بالسّن كان عم بيخبّر أحفادو هوّي وعلى فراش الموت وقلّهن : لمّا كنت بالمدرسة كنت رح موت لإنجح وفوت على الجامعة، بعد الجامعة كنت رح موت لإتخرّج من الجامعة وإتوظّف بشركة محترمة، خلال أوّل كم سنة من الشغل كنت رح موت لإتزوّج ويصير عندي ولاد، تجوّزت وكنت رح موت لحتّى علّم ولادي وكمّل شغلي بنشاط وعلى طول قدّم الأفضل، لمّا خلّصت شغل كنت رح موت لحتّى إحصل على تعويض مرتّب، اليوم أنا وعم موت لاحظت إني خلال كلّ حياتي نسيت إني عيش. الزّوّادة بتقلّي وبتقلّك : عيش حياتك بفرح، إتّكل على الرّب هوّي يلّي بيلبّس زنابق الحقل وبيطعمي طيور السّما، إنت بالنّسبة إلو أهمّ من الزّنابق والطّيور، سلّم حياتك للربّ عيشها بإيمان وبتقوى وبفرح، والله معك. المصدر : صوت المحبّة

  الإستفادة الله معكن... زوّادة اليوم مأخوذة من كلام لقمان الحكيم يلّي سألو إبنو عن مصدر حكمتو، جاوبو :  بحياتي تعرّفت على عدد كتير كبير من الحكماء، وتعلّمت منّهن دروس كتيرة، بحبّ لخّصهن بأربعة :  الأوّل بيقول إذا كنت عم بتصلّي حافظ على قلبك، وإذا كنت بمجلس النّاس أضبط لسانك، وإذا كنت ببيوت النّاس حافظ على بصرك، وإذا كنت عم تاكل حافظ على معدتك، وتنين ما تذكرهن أبدًا إذا النّاس غلطوا بحقك، وإذا أحسنت لحدا ما تخلي إيدك الشمال تعرف شو عملت إيدك اليمين. الزّوّادة بتقلّي وبتقلّك :  لازم تستفيد من كلّ النّاس يلّي بتلتقيهن بحياتك الجيّدين بيعطونا السّعادة، السّيئين بيعطونا التّجربة وأسوأ النّاس بيعطونا دروس ما مننساها مدى الحياة، والله معك. المصدر : صوت المحبّة