الزوادة اليومية

رحمة ربنا كبيرة كتير! بيقول أحد الآباء القدّيسين:  "ليست خطيئة بلا مغفرة إلّا التي بلا توبة!" قد ما كانت خطيّتنا كبيرة إذا تبنا ربنا بيغفرلنا اياها و قد ما كانت خطيّتنا زغيرة إذا ما تِبنا رح تبقى الخطيّة خطيّة! رحمة ربنا كبيرة كتير و ناطر مبادرة مِنّا تا يمحي كل أغلاطنا بس كمان ما تنسو إنّو كمان عدالة الله جايي و وقتها ما رح يفيد الندم! ما تخلّو كبرياءكن و عنادكن يبعدوكن عن يسوع... الله يرافقكن عاطول! المصدر : صفحة Jesus My Lord

  قبطان سفينة حياتنا اليوم في نصيحة زغيرة لكل واحد مِنّا قاعد بسفينة حياتو بنصّ البحر مش عارف شو ناطرو و لا شو بدّو يعمل، ناطر يتصيّد فرصة توَصلو عا برّ الأمان...  الزوّادة بتقلّي و بتقلّك : ما تكِبّ شبكتك بالمَي قبل ما يجي يسوع... هوّي بيدلّك وين في سمك!  بتتذكّر شو صار مع التلاميذ لمّا اتّكلوا عا حالن و ما تصيّدوا شي و بس إجا يسوع كيف تخزّقت شباكن من تقل السمك...  يا رب عطاياك و نِعَمَك كتيرة و نحنا أوقات كتيرة ما منستاهل و إنت ما بتوقف تعطينا و تزيد... منشكرك يا رب عا كل شي و منطلب منّك بكل ثقة تكون قبطان سفينة حياتنا و توصّلنا عالسما. المصدر : صفحة Jesus My Lord

  مفهوم القوّة قريت اليوم على صفحة من صفحات إحدى الروزنامات الفرنسيّة ما معناه، الحديد قوي النار بتدوّبو، النّار قويّة المياه بتطفيها، المياه قويّة الشّمس بتجعلها تتبخّر، الشّمس قويّة الغيوم تخفيها، الغيوم قويّة الهواء بيبعثرها، الهوا قوي الجبال بتقهرو، الجبال قوية البشر بتحطّمها، الإنسان قوي الموت بيقتلو، الموت قوي يسوع المسيح قهرو. الزّوّادة بتقلّي وبتقلّك : بعد خبرة الحياة وصراع الأجيال مع الموت لازم نآمن بحقيقة ما بتتغيّر، هيّ هيّ مبارح اليوم وللأبد، يسوع هوّي القيامة والحياة هوّي يلّي غلب الموت بالموت، والله معكن. المصدر : صوت المحبّة

  صلبوا إيدكن عا وجكن من الأقوال اللي حِلو التأمّل فيها عن الصليب هيّي للقدّيس يوحنّا ذهبيّ الفم لمّا قال : "المسيح لا يقود مركبات كبقيّة الملوك، ولا يطلب جزية، ولا يطرد أناسًا، ولا يطلب حرّاسًا، إنّما يسلك بوداعته العظيمة يتغنَّى بالصليب وبمآثره على الإنسان في شبه أنشودة جميلة: الصليب أزال العداوة بين الله والإنسان، وجاء بالمصالحة.  جعل الأرض سماءً، وجمع الناس مع الملائكة هدَّم حصون الموت، وحطَّم قوة الشرير". لمّا تبلشوا نهاركن صَلبوا إيدكن عا وجكن، لمّا تخافوا صلبوا إيدكن عا وجكن، لمّا تشتغلوا صلبوا إيدكن عا وجكن، لمّا تزعلوا، لمّا تفرحوا، قبل ما تناموا، بس توعوا... حضور الصليب بكل لحظة من حياتنا يعني حضور يسوع المصلوب!  تمسّكوا بصليبكن لأنّو خشبة خلاصكن... آميـــــــن. المصدر : صفحة Jesus My Lord

  ما تخافوا ! "فلا تهتمّوا للغد لأن الغد يهتم بما لنفسه يكفي اليوم شرّه" (مت ٦: ٣٤) شو ما صار و عم يصير الزوّادة اليوم بتقلكن ما تخافوا. يسوع بيقلكن ما تهتمّوا ببكرا و شو رح يحمل معو. الله اللي خلق الوقت و هوّي بيعرف شو صار مبارح و هوّي معنا اليوم و بكرا و كل يوم... منسلمك يا رب وطننا و حياتنا كلها بأزغر تفاصيلها... مِنّك يا رب منطلب. المصدر :  صفحة Jesus My Lord

  إيد الله بتقول القدّيسة تريزيا الطفل يسوع :  "أن نحاول القيام بالخير تجاه الناس من دون مساعدة الله هو أمرٌ شبه مستحيلٍ، كمن يريد أن يُشرق الشمس في منتصف الليل." ما في عمل بينجح إذا إيد الله مش موجودة فيه و ربنا مش مباركو و قد ما جرّبو الناس ما بيقدرو يعملو شي وَحدُن! يا رب بارك أعمالنا و حياتنا و حط إيدك بكل تفصيل و عاطول ذَكّرنا إنّو معك كل شي غير إنت يا نور العالم و شمس الكون. المصدر : صفحة Jesus My Lord

مين منكن صلّى اليوم؟ بيخبرو عن قائد جيش جمع عسكرو و أخد منّن سلاحاتن و قلّن بعد شوي نازلين عالمعركة. صارو يتطلّعو ببعضن، إنّو كيف بدنا نروح نحارب بلا سلاح! قالولو: سيدنا ما فينا نروح! قلّن ليش؟ قالولو: كيف بدنا ندافع عن حالنا؟! منموت! قلّن: مين منكن صلّى اليوم؟ سكتو كلّن... و هون ذكّرهن بقول للقدّيس خوسيماريا أسكريفا : "المسيحيّ دون صلاة هو كالجنديّ دون سلاح." و نحنا اليوم كجنود للربّ عهالأرض ما تنسو عاطول تتفقّدو سلاحكن و تّطوروه تا تضلّو حاضرين ما حدا بيعرف أيمتى بيجدّ علينا معركة مع الشرّ!  صلّوا! صلّوا! صلّوا! الربّ يحميكن وين ما كنتو، آمــــــــــــين. خدّام الرب ®

إتْكل على الله ! مع كل شي عم نمرق فيه من ظروف بشعة و منّنام عا شي منوعى عا شي كتار مِنّا تعبوا و استسلموا و يئسوا من حالن إنّن قادرين يعملوا فرق أو تغيير بالحالة اللي وصلنالها.  الزوّادة اليوم رسالة من القدّيس أوغسطينوس لكل واحد مِنّا بتقول : "إِحذر من اليأس من نفسك فقد أوصيت أن تتَّكِل على الله لا على ذاتك". والله معكن. المصدر : صفحة Jesus My Lord

  حِبّ و بس ! إذا شفت حدا ماشي بالصحرا ما بتسألو عطشان؟ بدّك تشرب؟ بتسألو شو بدّك تشرب؟!  نفس الشي الشخص اللي شايفو عم يتخبّط ما بتسألو عندك مشكلة؟  بتسألو بشو بساعدك؟! في ناس بتعمل حالها مهتمّة بس بتكون عم تسأل رفع عتب و في ناس قلبها بتعطيك اياه بلا ما إنت تطلب. بس بدّك تساعد ما تنطر حدا يطلب و لا تنطر مقابل... حِبّ و بس!  هيك ربنا علّمنا و هيك لازم نكون إيد الله عالأرض!  الرب يسوع يرافقكن و الروح القدس يلهمكن بهاليوم و كل يوم... آميـــــــن. المصدر : صفحة Jesus My Lord

  الجرح الحقيقي بيخبّروا عن صبي كان عم يلعب بالبيت، وقّع مزهرية من الكريستال، قديمة جداً مزيّنة بأجمل الرّسومات، لمّا حاول يلمّ القطع المتكسّرة ويخفي غلطتو انجرح، ركض لعند إمّو  قالتلو: لمّا الكريستال بينكسر بينتهي الصّوت بسرعة، وبتضلّ القطع متناثرة بتجرح يلّي بيلمسها، متل الكلام الجارح يلّي بسرعة الصّوت بيختفي وبيضلّ الألم بالقلب. الزّوّادة بتقلّي وبتقلّك : يا ريت منفكّر بكلماتنا، منتخلى عن الكلمات الجارحة، لأنّها بتخدش الآذان وبتجرح الأبدان، والله معكن. المصدر : صوت المحبّة

أعطينا من شجاعة سيبستيانوس  بيخبرو إنّو كان في شب إسمو سيبستيانوس فات عالجيش تا يقدر يساعد المسيحيين المضطهدين.  صار يتفقّد المحبوسين و يدفن الشهداء و تلقّب بمحامي الكنيسة.  لمّا رفض يسجد للأصنام حبسو الملك.  ساعتها ظهر يسوع المسيح و معو ٧ ملايكة تفاجأوا الموجودين و كتار منّن آمنوا!  عصّب الملك كتير و أمر إنّو يربطوه لسيبستيانوس عا خشبة و يصوبوا عليه بالسهام الحديد نجرح كتير و نزف كتير فكّروه مات تركوه و فلّوا.  إجت ستّ مسيحيّة إسمها إيرينا عالَجِتلو جروحو و نصحوه يتخبّى بس ما قِبل و كمّل التبشير بالإيمان.  و لمّا الملك شافو عايش عصّب كتير و أمر يضربوه تا يموت... و هيك لِبس إكليل الشهادة...  يا رب اعطينا من شجاعة سيبستيانوس، آمــــــــــــين! المصدر : صفحة Jesus My Lord

رفيق دربنا ! "ماذا يهمّك إن كان يرغب يسوع أن يقودك عبر الصحراء أو عبر المروج، طالما هو دائماً بجانبك، كي تصل إلى الأبديّة المباركة."  وحدة من أفكار بادري بيو اللي نحنا اليوم كتير بحاجة نتذكّرها! قد ما كان صعب الظرف و قد ما كانت الطريق وِعرة و قد ما كان في قدّامنا مطبّات كل هالإشيا تفاصيل إذا كان يسوع هوّي رفيق دربنا!  ربنا عارف وين بدّو يوصّلنا و بيرسم لكل واحد الطريق اللي بتقوّيه و بتخلّيه يكون حاضر تا يوصل عالسما و يعيش فرح الرب اللي رح يعَوضو عن كل مرّة زعل و ما فهم فيها حكمة ربنا...  يا يسوع، ها هي حياتي في يديك إفعل بها ما تريد. المصدر : صفحة Jesus My Lord

  مقياس الله ومقياس البشر  كلنا منعرف إنّو مقياس البشر وتقديرهن مش دايمًا مطابق للحقيقه.  إسمع زوادة اليوم: إنسأل أحدهن: - مين بيستحق لقب العاقل؟ جاوب: - الشخص اللي بيلاقي شي يتعلّمو من أي إنسان تاني. وإنسأل من جديد : - ومين بيستحق لقب الغني؟ وجاوب: - هويّ الإنسان المقتنع بحالو. ورجع إنسأل : - ومين بيتمتّع بالإحترام؟ قال: - هوي اللي بيحترم كل خليقه من خلايق ألله. شو قولك اليوم نعيد النظر بمقاييسنا، ونخلّيها تصير مطابقة للحقيقة؟ المصدر : صوت المحبّة

  إبن الله ما بيخاف !!   بيخبرو عن نملة كل يوم الصبح بتضهر من بيتها حتّى تفتّش عا أكل و هيّي عارفة إنّو كل ما تروح رح تتعرّض لأخطار كتيرة.  يمكن يقتلها إنسان أو حدا من الحيوانات أو يوقع عليها شي حجر أو يمكن حتّى ترجع إيديها فاضيين و ما تلاقي أكل بس بالرغم من كل هالأفكار اللي بتمرق ببالها بتروح لأنّو هدفها تأمّن أكلها لفصل الشتي و أملها بالحياة أكبر من كل الخطر اللي عم تواجهو.  نحنا نفس الشي، منعرف إنّو في أخطار كتير حولنا  بس ما لازم نستسلم و نتخبّى، لازم نواجه لأنّو إبن الله ما بيخاف، إبن الله بيآمن و بيتّكل عا رَبّو... مع بداية هالنهار الجديد، صَلبوا إيدكن عا وجكن و امشوا... الله معكن. المصدر : صفحة Jesus My Lord

  الأخد والعطاء قال كان فيه مرّة عجوز عاقلة إلها حفيد بتحبّو كتير... ولا مرّه رفضتلو طلب... طلب منها مرّة قطعة فضّه لأنو الإيام ضيّقه معو، قالت له: - بخزانتي فيه قطعة واحدة.  خدها.  اشتغل.  وارتاح وردّها. أخدها الشاب وردّها. وتكرّرت الحادثه أكتر من مرّة، لحين ما مرّة أخدها وما ردّها. ولمّا بعد مدّة رجع يطلب، قالتلو ستّو:  - روح ع الخزانه وخود المال، مع إنها عارفه إنّو ما فيه شي.  مدّ إيدو وطلعت سلّتو فاضيه.  قلّها: - ما فيه فضّه يا ستّي بالخزانه. قالت: - مطرح اللي ما بتحطّ شي ما بتلاقي شي.  الخزانه فاضيه لأنّك ما ردّيت القطعة. إخوتي ، ونحن شو عم نوضع حتّى نلاقي؟ شو عم نزرع حتّى نحصد؟ منقول جيلنا ضايع، علاقاتنا غير صادقة، ما فيها شفافية.  بلدنا مليان فوضى: شو عم نعمل ت يكون غير هيك؟ شو رأيك اليوم، تقرّر شو بدّك تحصد، وتبلّش تزرع ع هالأساس؟ المصدر : صوت المحبّة

  حملن بقلبك قريت بمجلّه هالعِبرة وحبّيت إنقلّك ايّاها.  بتقول العِبرة: - إنت حاسس إنّو الناس تقال عليك؟ ما تحملهن ع أكتافك، احملهن بقلبك! زوّادة اليوم دعوة إلك إنت اللي في حدّك شخص ما بتقدر إلّا ما تلاقيه تقيل، شو رأيك تحاول توجد فيه شي بينحبّ وتنطلق من هون؟  الزوّادة بتعرف إنّو هالدعوة منها هيّنه أبدًا، بس مش يسوع قلّنا:  «أدخلوا من الباب الضيّق؟» المصدر : صوت المحبّة

بيستاهل ربنا شوي من وقتك! بيخبرو عن أبونا بيحبّوه الناس كتير بالضيعة اللي بيقدّس فيها إلّا زلمي واحد!  قالولو: شو ما كان سبب الخلاف إنت و الأبونا لازم تروح عالقدّاس!  قلّن: ما القدّاس هوّي المشكلة!  أنا ما بعرفو للأبونا تا كون مختلف معو... تفاجأوا إنّو كيف فيه القدّاس يكون مشكلة!  كَمّل و قلّن: هالأبونا عندو وعظة كتير طويلة و أنا ما فيّي إتحمّل أقعد هلقد وقت عم بسمع...  قالولو: ما بتسمع أخبار عالتلفزيون؟ قلّن مبلا، قالولو ما بتحضر فيلم بالسينما؟ قلّن مبلا، قالولو ما بتحضر ماتش فوتبول؟  قلّن مبلا! قالولو: كل هالإشيا أطول بكتير من وعظة الأبونا و عم تتحمّل تقعد تسمعن إنت و مبسوط... بيستاهل ربنا شوي من وقتك تسمع كلمتو و تفرح برفقتو هوّي اللي مات كرمالك عالصليب!  يوم مبارك❤️ المصدر : صفحة Jesus My Lord

وحدك الحق و الحقيقة منقرا بالكتاب المقدّس :  "إِنْ رَأَيْتَ ظُلْمَ الْفَقِيرِ وَنَزْعَ الْحَقِّ وَالْعَدْلِ فِي الْبِلاَدِ، فَلاَ تَرْتَعْ مِنَ الأَمْرِ، لأَنَّ فَوْقَ الْعَالِي عَالِيًا يُلاَحِظُ، وَالأَعْلَى فَوْقَهُمَا" (سفر الجامعة ٥: ٨) يا رب، بهالأرض في ظلم كتير و يوم عن يوم عم تِدبل العدالة.  يا رب، بهالأرض في شر كتير و يوم عن يوم الحب عم يِدبل.  يا رب بهالأرض في قسوة كتير و يوم عن يوم عم تِدبل الرحمة... العدالة و الحب و الرحمة إنت وحدك مصدرن يا ربّ!  إذا عم يختفوا من الأرض هوّي لأنّو الناس بعدت عنّك!  نَوِّر عقول البشر تا يفهموا إنّو وحدك الحق و الحقيقة و إنّو بدونك الأرض صحرا... ما تتركنا يا رب و اعطينا الرجا و الأمل إنّو بالآخر و لا ممكن الظلم و الشر و القسوة يربحوا! المصدر : صفحة Jesus My Lord

  لنرفع هواتفنا لنلتقط الصور! بيقول البابا فرنسيس بوَحدة من المقابلات: "لماذا في مرحلة معيّنة، يقول الكاهن الذي يترأّس الإحتفال : “لنرفع قلوبنا؟”.  هو لا يقول :  “لنرفع هواتفنا لنلتقط الصور!.  لا إنّه أمر سيء جدا!  أقول لكم إنّه يحزنني جداً عندما أحتفل بالقدّاس الإلهي، هنا، في الساحة أو في البازيليك، وأرى العديد من الهواتف المرتفعة، وليس فقط من قبل المؤمنين، وإنّما من قبل بعض الكهنة والأساقفة أيضا (…).. القدّاس ليس عرضاً مسرحيّاً: بل هو اللقاء بآلام الرب وقيامته".  منِتركّكن تتأمّلوا بهالموقف اللي بيضل يتكرّر قدّامنا و يمكن نحنا منعملو!  حتّى نرجع للأساس و نرجع نفهم و نعيش معنى القدّاس و نجدّد علاقتنا مع الرب.  آميـــــــن، يوم مبارك! المصدر : صفحة Jesus My Lord

الكذب كذب !! مين هوّي الكذّاب؟ اللي بيألّف شائعة و بتنتشر، اللي بينقل حكي و بيزيد و بينقّص مِنّو، اللي بيبالغ و بيزيدها و بيعطي الإشيا أكبر من حجمها، اللي بيخبّر نص حقيقة اللي بيناسبو و بيخبّي النص التاني، اللي بيكذب عن قصد و اللي بيقول ما بيأثّر كذبة بيضا انجبرت قولها تا خلّص حالي و غيرن كتير... الكذب كذب شو ما كانت الظروف اللي وصلت إلو.  منقرا برؤيا يوحنا إنّو من بين اللي ما بيفوتو عالسما جميع الكذبة!  "وَأَمَّا الْخَائِفُونَ وَغَيْرُ الْمُؤْمِنِينَ وَالرَّجِسُونَ وَالْقَاتِلُونَ وَالزُّنَاةُ وَالسَّحَرَةُ وَعَبَدَةُ الأَوْثَانِ وَجَمِيعُ الْكَذَبَةِ، فَنَصِيبُهُمْ فِي الْبُحَيْرَةِ الْمُتَّقِدَةِ بِنَارٍ وَكِبْرِيتٍ، الَّذِي هُوَ الْمَوْتُ الثَّانِي»"... الله معكن! المصدر : صفحة Jesus My Lord

  قسّمها بتهون عندك مشكله؟  ومين منّا ما عندو مشاكل؟  إنت اللي عندك مشكلة كبيرة، وما عدت عارف كيف بدّك تحلَّا، عالم حكيم رح يعطيك هالنصيحة.  وبيقول: - كنت لاحظ دايمًا إنّو اللي كان يكبّلني قدّام مسألة علميّة صعبة، هو تعقيدها بالذات.  فكنت بادر إلى تقسيم هالمسألة لعناصر بسيطة، وحلّن واحد ورا التاني، وفجأه كان ضغط الصعوبة يخفّ.  تمامًا متل وقت بيكون بدّك تقرا مقالة أو جريدة أو كتاب فرد دفعة.  بتحسّ إنّك ما فهمت شي.  بس لمّا ترجع بِتَروّي تقراه كلمة ورا كلمة، ومقطع ورا مقطع، بيوضح المعنى وبيسهل النص. هالعالم بيدعيك اليوم تبلّش تفصّل مشكلتك مهما كان نوعها، وبدل ما تشدّ ع الخيط وينعقد أكتر، جرّب تفكّ عقده ورا عقده وبتشوف كيف الحبل بيحلّ.  الزوّادة بتقلّك اليوم :  كون متل المسافر اللي قبل ما يمشي بيدرس سفرتو ع الخارطه وبيقسّمها مراحل.  ومن محطّه لمحطّه، بتقصّر السفرة وبتسهل الطريق وبتوصل بالسلامة. المصدر : صوت المحبّة

  و شو أحلى من إنّو نقدّم يومنا للربّ نهار جديد، نعمة جديدة، و شو أحلى من إنّو نقدّم يومنا للربّ.  القدّيسة تريزيا الطفل يسوع كانت تقدّم كل إيّامها ليسوع و كتبت الصلا اللي كانت تردّدها كل يوم، تَعو نصلّيها معها: بإسم الآب والإبن والروح القدس، الإله الواحد. آميـــــــن. يا إلهي! إنّي أقّدّم لكَ كلّ أفعالي في هذا اليوم من أجل نيّات ومجد قلب يسوع الأقدس.  أرغب أن أقدّس كلّ نبضة من نبضات قلبي، كلّ فكرة لديّ، وأبسط أعمالي، بتوحيدها مع استحقاقاته اللّامتناهية.  وأرغب أن أعوّض عن خطاياي بإلقائها في أتون حبّه الرحيم. يا إلهي! أسألُكَ لأجلي ولأجل أعزائي نعمة تتميم إرادتك المقدسة بشكلٍ كامل، وقبول أفراح وأحزان هذه الحياة الفانية حبًّا بكَ، حتّى نتّحد معاً في السماء يوماً ما إلى الأبد. آميـــــــن. يوم مبارك مع تريز و يسوع🌹 المصدر : صفحة Jesus My Lord

  شوف بكل واحد خيي سأل مرّة رجّال حكيم تلاميذو كيف بيقدرو يعرفو إنّو خلص الليل وإنّو الفجر طلّ. وصارو يجاوبوه: - لمّا منلمح النور؟ قلّن: - لأ. - لمّا منميّز اللون الأسود من اللون الأبيض؟ قلّن: - كمان لأ. - لكن أيمتى يا معلّم بيطلّ الفجر؟ وجاوبن الحكيم: - لمّا بتتطلّعو لبعيد بعيد، وبتلمحو إنسان جايي صوبكن، وبدون ما تعرفو مين هوي، بتقولو: هيدا خيّي، ساعتها وبس ساعتها، بيكون الفجر طلّ. الزوّادة عم تسألك :  قادر اليوم، تقوم بهالتحدّي، وتختار من حواليك شخص واحد، عادة ما بترتاحلو، وتقول: اليوم، بدّي شوف فيه وجه خيّي؟ وتعاملو وتحبو ع هالأساس؟ ويمكن، بهالطريقه، من خيّ لخيّ، بيوصل يوم ومنصير فيه كلّنا سوا عيلة واحدة، وساعتها بيكون الفجر طلّ!!! المصدر : صوت المحبّة

  الإشيا يلّي منستغني عنها   ضَهَرو تنَين ستّات يمشو بالسوق.  وصارت واحدة منن توقف قدّام كل واجهه وتتأمّل فيها.  وقالتلا صديقتها: عايزة شي؟ عم بتفتشي ع شي؟ جاوبتها: لأ! بس عم شوف قدّيش فيه إشيا بقدر إستغني عنها. الزوّادة بتدعيك تتأمّل بهالدراسة الواقعيّة يللي بتقول: - قتل إنسان بالحرب بيكلّف نصّ مليون دولار. - إطلاق إنسان برحله فضائيّة لإكتشاف الفضا، بيكلّف 05 مليار دولار. - إنقاذ إنسان من الموت ومن الجوع بيكلّف 01 دولار. بتركك اليوم تتأمّل هالأعداد، وتربطن بالخبريّه وتاخد منّن العبره اللي بتريدا. المصدر : صوت المحبّة

  ضلّكن عم تتمرّنو 💪🏼 بيخبرو عن تنين أصحاب قرّرو يشاركو بمسابقة ركض.  واحد منّن كل يوم يوعى بكّير و يروح يتمرّن و التاني يضحك عليه يقلّو ما في داعي أبداً للتمرين ما أنا بطل السنة الماضية و أسرع واحد بالمدرسة.  بيوم السبق بلّشت المنافسة و كان اللي ما تمرّن هوّي الأوّل بس وصل لنص السبق و ما بقا قدر يكمّل من التعب و انسحب و بالآخر ربح رفيقو اللي تمرّن كل يوم!  الزوّادة بتقلّي وبتقلّكن : ما تتّكلو عا قوّتكن وحدها لازم تضلّو عم تتمرّنو بكل شي بالحياة حتّى بعلاقتنا مع ربنا!  ما بيكفي قول أنا مؤمن و خلص، لازم ضل صلّي و غذّي إيماني تا يكبر أكتر و صير أقرب للرب!  الله يرافقكن و يعطيكن القوّة تكَملوا كل شي للآخر. المصدر : صفحة Jesus My Lord

وحدو يسوع الدايم دايم... من أقوال الآباء القدّيسين عن المعموديّة إنّو من خلالها بيصير الإنسان مواطِن سماوي عم يعيش غُربتو عالأرض و راجِع!  و بيقولو كمان إنّو بالمعمودية الإنسان بيصير إبن للربّ و إذا غلَّط بيصير إبن ضال!  الله ما بيقبَل نحنا اللّي صِرنا أبناء إلو نكون أجراء لو كنّا خاطيين...  تذكّروا مثَل الإبن الضال لمّا رجع الصّبي و طلَب من بيّو يشتغِل عندو و يعاملو متل الأجراء ما قِبِل!  و تذكّروا كمان شو بيقول الكتاب المقدّس قدّيش الفرحة بالسّما كبيرة بتكون بتوبة خاطي واحَد يعني برجعِة إبن كان بعيد!  اليوم فرصَة إلنا نجدّد وعْدنا للرّب إنّنا نكون أبناء صالحين و نُوعدو إنّنا رح نخبّر و نبشّر الكلّ إنّو كل شي فاني و وحدو يسوع الدايم دايم...🌺 المصدر : صفحة Jesus My Lord

  الدايم دايم ! بيخبرو عن صبي زغير سمع بقصّة عيد الغطاس و إنّو يسوع بيمرق عالبيوت و قرّر يقعد ينطرو. كانت ليلة شتي و هوا و عواصف و برد ، فكّر هالصبي إنّو كيف يسوع بدو يمشي بهالطقس قام حطلّو عالطاولة جاكيت و ولّع الدفّاية و حطلّو كباية شاي و قعد ناطر.  شوي بتروح الكهربا!  قال رح ضوي شموع أحسن ما يتفركش يسوع و يروِّح حالو!  و بقي ناطر... بعدين نعس هالصبي و غفي... و اليوم هالصبي صار كبير و بعدو بينطر يسوع أكيد تغيّرت الطريقة بس النيّة بقيت وحدة و هيي يحس بوجود المسيح بحياتو.  بين براءة الطفولة و هموم و مسوؤليّات الحياة يسوع ما ترك هالصبي ولا لحظة و إنت إذا بعد ما لمست وجود الرب بحياتك صرت تعرف الطريقة!  قد ما كان عمرك بدك قلب طفل زغير و بس!  بعيد الغطاس بواب السما مفتوحة و مليارات الصلوات و الدعوات إنرفعت للرب بهاليوم و هوي ما بيرد خايب ولا حدا صلى بإيمان و الله معكن. الدايم دايم! المصدر : صفحة Jesus My Lord

  قوس القزح بيوم من الإيّام، ألوان العالم كلّو إلتقت وبلّشت تتقاتل.  كل لون يدّعي إنّو هو الأحلى والأهمّ والأنفع، ويتفاخرو ع صوت عالي إنّو كل واحد هوي الأفضل.  وعليت الصرخة وما ضلّ حدا ما سمع صوتن عم يتخانقو. ولكن فجأه، بيلمع برق وبيقصف رعد، وبينهمر المطر بغزارة.  إرتعبت الألوان وإلتمّت ع بعضها، كل لون عم يجرّب يحمي التاني. إلتفت الشتي صوبن وقلُّن :  «ما أغباكن! عم تتخانقو مع بعضكن! وكل واحد عم يجرّب يسيطر ع التاني! مش عارفين إنّو ألله هو اللي خلقكن كلكن، لرسالة معيّنه وفريده ومميّزه، ولو مختلفه؟؟ امسكو إيدين بعضكن وتعو صوبي! وألله، رح يزرعكن بالسما قوس قزح رائع ت يبرهن إنّو بيحبكن كلكن وإنّو قادرين تعيشو سوا بسلام.. ورح يكون هالقوس علامة رجا لكل الإيام اللي جايي وعهد ما بيفنى إنّو هوي معكن للأبد».  الزوّادة بتقلّي وبتقلّك : كلما شفت قوس قزح تتذكّر هالخبريّه وتفكّر إنّو إذا كنّا مختلفين، نحن متكاملين، وكل ما التقيت بشخص اليوم تقبّل إختلافو وما تحوّلو لخلاف وتشكر ألله ع غنى التنوّع، وتحوّلو لتكامل ووحده؟ المصدر : صوت المحبّة

  الجوهر هوّي الأهم ! بيخبرو عن مجموعة أصحاب بيزوروا من وقت للتاني إستاذن الختيار. صاروا يحكوا عن حياتن و كيف ما في شي منيح و كل شي صعب و يقارنوا حياتن مع بعضن... قام الأستاذ عمل قهوة و حط عالصينية فناجين من كل الأحجام و الأشكال شي بلاستيك شي كرتون شي قزاز شي كريستال شي كبير شي زغير...  كلّن تسابقوا ياخدوا الفناجين الحلوين و الغاليين شوي كلّن وقفوا يشربوا و تطلّعوا ببعضن!  حطّلن قهوة مالحة!  و قلّن إنّو القهوة الحلوة كانت بالفناجين المتواضعة و بس عمل هالشي تا يفرجيهن إنّو بس يهتم الإنسان بالمظاهر ما بيوصل لمطرح و تا يذكّرن إنّو الجوهر هوّي الأهم و إنّو اذا هنّي شايفين حياة غيرن مثاليّة و مش عاجبتن حياتن مش ضروري يكون اللي شايفينو صح أو لا لازم يقارنوا حالن مع حدا!  أشكروا الله عا كل شي و إشتغلوا عا حالكن يصير قلبكن أحلى و هيدا الأهم! الله يرافقكن... المصدر : صفحة Jesus My Lord

حط إيدك بإيدنا ! بيخبرو إنّو كان في حبل معقود كتير و تنين أصحاب عم يفكرو كيف بدّن يفكّو العقدة الكبيرة.  قال الأوّل منجيب سكّين منقصها و خلص!  قلّو التاني أهين شي تنقّي الطريقة السهلة و تهرب من المشكلة بس أحسن نفتّش عا أوّل الحبل و نلحق العقد و نفكّن وحدة وحدة بتنحل وحدها العقدة الكبيرة!  حِلو نبلّش سنتنا الجديدة بأمل، بإصرار إنّو ما رح نستسلم قدّام العقد، ما رح نختار الطريق السهل، رح نواجه و نوصل لأهدافنا إذا كانت بتخدم مشيئة ربنا أكيد!  يا رب حط إيدك بإيدنا و ساعدنا نفك المشاكل و العقد اللي رح تواجهنا معك ما منخاف من شي!  الربّ يبارك السنة الجديدة و تبقو مجموعين مع اللي بتحبّوهن بالصحّة و الفرح و الأمان. المصدر : صفحة Jesus My Lord