الزوادة اليومية

  نقطة تحوّل بميلادك يا ربّي بتكبر المحبّة، بتنمحى الخطايا بكل الدني! يسوع اللي صار إنسان حتّى يشفينا من خطيِّتنا، يسوع اللي حَبنا لدرجة إنُّو صار يشبهنا، اللي تواضع و وُلِد بمغارة فقيرة بوقت هوّي ملك الملوك!  كيف بدنا نُوفيه حقّو؟!  و نحنا بدل ما نردّلّو لَو شوي من جميلو منعمل إشيا بِتزَعلو!  منوعدك يا ربّ هالسنة العيد يكون نقطة تحوّل بحياتنا و منوعدك إنّو رح نعمل أكتر ما فينا حتّى نستاهل نكون تلاميذ إلك... آمين! المصدر : صفحة Jesus My Lord

  خبّيتِلّك إمّك ! في قصّة منقولة بتقول :  كان في صبي زغير صلّى ليسوع و قلّو :  يا يسوع بدّي أوعى بكرا الصبح يكون عندي  بيسيكلات جديدة شكراً آمين!  وعي تاني يوم ما في بيسيكلات!  رجع راح صلّى : يا يسوع يمكن كنت مشغول بس عم ذكرك بالبيسيكلات، شكراً آمين!  وعي تاني يوم ما في شي!  قرّر هالصبي يستعمل وسيلة ضغط عا يسوع و فات عالبيت حمل صورة لمريم العدرا و راح خبّاها بالجنينة و راح يصلّي مرّة جديدة و قلّو :  يا يسوع أنا خبّيتِلّك إمّك، إذا بدّك ترجع تشوفها بتجبلي البيسيكلات!  هالقصّة بتضحّك و بتفرجينا براءة الأطفال اللي حتّى هنّي بيعرفوا قدّيش مريم غالية عا قلب يسوع!  كرِّموها عظِّموها ملِّكوها في القلوب. المصدر : صفحة Jesus My Lord

ما يزعجني بالحياة الله معك... بيوم من الإيّام سألو المهاتما غاندي مين يلّي بيزعجك بالحياة؟  جاوب :  بيزعجني الإنسان يلّي لمّا بتسمعو عم يحكي بيكون عم يحكيك بنظريّات سامية ومبادئ كتير كبيرة، بس لمّا بيكون عم بينفذّ كلّ مشاريعو بتتنفّذ إنطلاقًا من مصالحو الشخصيِّة. الزّوّادة بتقلّي وبتقلّك : شو حلو بالجماعة نتخطّى الأنا ونوصل لل نحنا، نتطلع من الدائرة الزغيرة وننفتح على الجماعة، هيك مصالحنا بتزول ومنطبّق المبادئ العامّة، والله معك. المصدر : صوت المحبّة

  طلعت سهلة! "الروح القدس يعلّمكم في تلك الساعة ما يجب أن تقولوا." (لو ١٢:١٢) منعتل همّ قبل الإشيا بمدري قدّيش و منخطّط و منفكّر و منتخايل كيف الإشيا بدّا تكون و لمّا نوصل عليها و تخلص منقول:  الحمدلله مرقت و كانت أسهل بكتير من ما كنت متخايل!  مش المواقف طلعت سهلة!  وحي الروح القدس إلنا كيف نتصرّف و شو نقول هوّي اللي خلّانا نحسّ هيك!  يا ربّ قدّام كلّ إستحقاق، عطينا روحك القدّوس اللي انزرع فينا من نهار اللي تعمّدنا حتّى يكون هوّي قائد حياتنا و معو نحقّق مشيئتك الكاملة بحياتنا... أرسل روحك أيّها المسيح فيتجدّد وجه الأرض! المصدر : صفحة Jesus My Lord

مصدر القوّة الله معك... بإحدى مدارس فنون القتال الصّيني، صار جدل بين الطلّاب عن القوّة ومصدرها، وانقسموا الطلّاب منّن كان يقول المصدر هوّي القلب والبعض التّاني العقل، وغيرهن قالوا العضلات المفتولة، وتعدّدت الآراء والأقوال وكان أحد الأساتذة عم يسمع، بس ما عم يعطي أي ردّة فعل تقدّموا الطلّاب منّو وسألوه عن القوّة، جاوب بكلّ بساطة :  القوّة إنّو نحافظ على هدوءنا وقت الغضب، ونبتسم وقت الألم، ونعتني بالآخرين يلّي بحاجة لمساعدتنا وقت يلّي بتكون قلوبنا مجروحة. إستنتجوا الطلّاب إنّو الإنسان بحدّ ذاتو قوّة ما بتنقسم. الزّوّادة بتقلّي وبتقلّك : الإنسان هوّي قوّة بحدّ ذاتو ببعض الأوقات بيضعف، وقتها لازم يعرف يردّد مع بولس الرسول أنا قوي بالربّ يلّي بيقوّيني، والله معك. المصدر : صوت المحبّة

  راجع حساباتك !   "صار إبنًا للإنسان لكي يصير بنو الإنسان أبناء الله."  (من أقوال القدّيس يعقوب السروجي) قرّب عيد الميلاد اللي هوّي مناسبة نتذكّر فيها كلّ الأحداث اللي وصّلت لخلاصنا...  يسوع الربّ الإله نزل عالأرض و صار إنسان متلنا حتّى بتواضعو و حبّو إلنا يخلّينا نصير أبناء للربّ!  نحنا شو عملنا بهالبنوّة؟  إستاهلناها؟ كلّ واحد منّا مدعو يراجع حساباتو و يشوف و تذكّروا إنّو طول ما ربنا عطانا يوم جديد يعني عِنّا فرصة نصحّح أغلاطنا... الله معك. المصدر : صفحة Jesus My Lord

  السُّقوط الله معك... بيخبّروا عن شاب كان كتير عتبان على الله وعلى طول يلوم ربنا ويقول عنّو مش عادل.  بيوم من الإيّام بيلتقي رجّال بيدخل معو بحوار عن عدالة الله وبيصير يتذمّر ويقول الله على الفقير، ليك فلان وعلتان كيف عايشين بعاد عن الله، وربنا مطولّن عمرن وعم يرتفعوا لأعلى المناصب، بيقلّو الرّجال ما تحسدهن إنّو عم يعلوا يلّي بيعلا كتير وقعتو بتصير توجع وتخوّف أكتر.  الزّوّادة بتذكّرني وبتذكّرك : بكلام بيّاتنا وجدودنا، ما في شجرا وصلت لعند خالقها، وما في طير علّا وإرتفع إلّا متل ما علاّ وقع، والله معك. المصدر : صوت المحبّة

  دبّر حياتي! منقرا بالكتاب المقدّس :  "و تفرحُ بجميع الخيرات الَّتي أعطاها إيَّاكَ الربّ لك و لبيتِكَ"  (تث ٢٦ : ١١) يا ربّ، كتار بحاجة يقرو هالآية اليوم، كتار بحاجة لفرح إنت مصدرو، كتار بحاجة لحب و خير إنت مباركهن... بحبّك يا رب!  إنت اللي دبّرت كل شي من أوّل دقيقة بهالكون دبّر حياتي! المصدر : صفحة Jesus My Lord

نفس المصير الله معك... سألو بطل الشّطرنج الرّوسي الشّهير غاري كاسباروف يلّي كان أصغر لاعب روسي بيربح بطولة العالم سنة ١٩٨٥، شو تعلّمت من لعبة الشطرنج؟ جاوب بكلّ بساطة :  تعلّمت ما أنتظر ولا أي منصب بالحياة، لأنّو الحياة معركة متل لعبة الشطرنج بنهايتها الملك والجندي رح بيتساووا وبينحطّوا بنفس العلبة. الزّوّادة بتقلّي وبتقلّك : شو ما كان مركزنا أو منصبنا بالحياة، بعد الموت كلّنا رح ننحط بصندوق ونندفن تحت التّراب، يا ريت منتذكّر قول أيّوب :  عريان من بطن إمّي خرجت عريان لبطن الأرض رح إرجع، والله معك. المصدر : صوت المحبّة

  الله ما بيهون عليه زعل إبنو! شو هيّي الشغلة الوحيدة اللي فيك تعطيها لغيرك حتّى لو إنت ما عندك إياها ؟ الفرح! فيك إنت ما تكون فرحان بس بفعل زغير مِنَّك بتفرّح قلب حزين! اليوم يمكن إشيا كتيرة مزعلتك بس تذكّر إنّو الله ما بيهون عليه زعل إبنو!  كون إنت مصدر فرح لغيرك و ربنا أكيد رح يحط بطريقك ناس يكونوا مصدر فرح لقلبك!  نهاركن حلو مع يسوع! المصدر : صفحة Jesus My Lord

  تلات بيوت بيوَصلو عالسما في جملة حلوة كتير بتقول :  تلات بيوت بيوَصلو عالسما :  بيت القربان، بيت المسبحة  و بيت فيه عيلة بتصلّي! نهاركن حلو مع يسوع و بيوتكن مباركة! آميـــــــن. المصدر : صفحة Jesus My Lord

نصيحة قبل التخرُّج الله معك... بيخبّروا عن تلميذ قبل ما يتخرّج عن مقاعد الدّراسة، قصد مكتب مدير المدرسة لحتّى يشكرو على الـ ١٥ سنة يلّي قضّاهن بالمدرسة، بس قبل ما ينطلق للمعترك الجامعي طلب منّو تلات نصايح، إبتسم المدير وقلّو : بنصحك ما تضيّع وقتك بتلاتي :  ما تتحسَّر على الماضي لأنّو ما بيرجع، ما تقارن حالك بغيرك لأنك فريد بالحياة وما حدا بيشبهك، ما تحاول ترضي كلّ النّاس هالأمر من سابع المستحيلات. الزّوّادة بتقلّي وبتقلّك : عيش اللّحظة وتذكّر إنّو الربّ عطاك نعمة إسمها نعمة الوقت الحاضر، نيّالك إذا بحياتك كنت مرتاح الضمير وعايش بالتقوى ومخافة الله، ولا يوم تخاف من النّاس، والله معك. المصدر : صوت المحبّة

  أهدافو واضحة! كل شخص في بقلبو يسوع المسيح رح يجرّب الشيطان يتدخّل حتّى يخربلو إيمانو. من أكبر أهدافو إنّو و لا إنسان يوصل للوطن السماوي... ليش؟  لأنّو هوّي كان هونيك بيوم من الإيّام و أعمالو سبّبت إنّو الربّ يبعدو!  حربنا مع عدو عارف منيح شو عم يعمل و أهدافو واضحة!  بس دعمنا و سلاحنا أقوى و هدفنا أوضح!  "أَسْتَطِيعُ كُلَّ شَيْءٍ فِي الْمَسِيحِ الَّذِي يُقَوِّينِي." (في ٤: ١٣).  ما تخافوا! الله عاطول معكن المصدر : صفحة Jesus My Lord

  قلم الرّصاص الله معك... بيخبّروا عن رسّام كان يرسم بساحة الفنّانين بإيطاليا وما كان يرسم إلّا بقلم رصاص.  بيوم من الإيّام بيسألوه عن السّبب، بيقلّهن قلم الرصاص كتير بيذكّرني بالحياة، كتير منكون حابّينا ومرتاحين فيا لمّا بتكون مستقيمة متلو بتكون حلوة وسهلة، بس كتير منزعل لمّا بتنكسر وبتصير كتير شبيهة لقلم رصاص مكسور قسمين، بس شو حلو لمّا مننتبه إنّو عنا القدرة نبريها متلو لحتّى نبلّش نرسم فيها أجمل اللّوحات. الزّوّادة بتقلّي وبتقلّك : دروب الحياة مش ممكن تكون كلّها مستقيمة، إذا وقعنا على الطّرقات المعوجّة لازم نوقف ونكمّل المسير، على طول بعد كلّ سقطة في بداية جديدة، والله معك. المصدر : صوت المحبّة

  أتحبُّني؟ باللغة اليونانيَّة في كتير كلمات بتعبّر عن الحب.  لمّا يسوع سأل بطرس و قلّو أتحبّني؟ إستعمل بالسؤال لفظ أغابي و بطرس لمّا جاوب إستعمل لفظ فيلو.  والفرق بيناتن بيشبه الفرق  بين : ‏Love و Like باللغَّة الإنكليزيَّة. يسوع كان سؤاله واضح عم يسأل عن الحب و مش إذا بطرس معجب بأعمالو و بوجودو معن!  و اليوم كتار معجبين بالمسيح و بيشوفوه بطريقة حلوة أو مش متل الباقيين بس قلال كتير اللي بيحبّوه! كتار عجبتهن حكمة المسيح، وكتار ما بيآمنوا بيسوع بس معجببن باللي عملو... هالناس متل بطرس ما فهموا السؤال!  خلّي يا ربّ حبّك الحقيقي يسكن بقلوبنا و يكونوا أعمالنا و أفكارنا و أقوالنا جواب لسؤالك و يقولوا منحبّك يا رب! آمين! المصدر : صفحة Jesus My Lord

  مواجهة الشرّ بالحبّ بيقول أحد الكتّاب :  "التعوّد على الشرّ هو ما ينبغي أن نحزن له." نحنا بطبيعتنا منتعوّد بسرعة عالإشيا!  بس فكرة إنّو نتعوّد على هلقد كميّة من الشرّ و نصير نحسّو شي عادي مش مقبولة! يا رب عطينا القوّة نواجه الشرّ بالحب و ما نتعب حتّى نضل عم نبشّر فيك و ننشر تعاليمك اللي وحدها قادرة تحارب الشر بهالعالم و تِغلبو!  يوم مبارك! المصدر : صفحة Jesus My Lord

  اعطينا نآمِن متلِك بيقول القدّيس أوغسطينوس عن إمنا مريم :  "حَبِلَت به مريم في ذِهنها قبل أن تحبَل بِه في جسدِها." يا مريم إنتي اللّي يسوع سَكَن قلبِك قبل ما يتجسَّد من خلالِك... اعطينا نآمِن متلِك و نحبّو متلِك حتى يسكُن فينا كمان خصوصًا انو عم يقرِّب عيد الميلاد... آميـــــــن. المصدر : صفحة Jesus My Lord

  العَيش براحة الله معكن... بيخبّروا عن شاب كان كتير ملبّك بعيشتو، على طول معبّس زعلان وتعبان، ما بيعرف لا يرتاح ولا يريّح اللّي حدّو، كتار يلّي جرّبوا ينصحوه ويقولولو هوّنها بتهون، بس أبدًا، على طول حامل السلّم بالعرض. بيوم من الإيّام كان قاعد بساحة الضّيعة بيوصل رجّال كبير بالعمر وبيبلّش يهمهم على راسو، بيقلّو الختيار يا إبني لحتّى تكون مرتاح بنصحك تمشي على دروب الحياة وما تسمع القال والقيل، ولمّا بتسمع لازم ما تحكي، تجرّب تكون أخرس أطرش، وإذا شفت مناظر زعجتك تذكّر إنّو بالعالم في كتير عميان، ولمّا بتحسّ الحمل صار تقيل والأفكار صارت عم تتقاذفك إنسى لأنّو النّسيان نعمة ولمّا بتطبّق هالقواعد صدّقني بتعيش مرتاح. الزّوّادة بتذكّرني وبتذكّرك : بهالمتل الصّيني : عيش الحياة أعمى أخرس أطرش أبكم، بترتاح وبتريّح، والله معك. المصدر : صوت المحبّة

  المسافات الله معك... بيخبّروا عن إستاذ مادّة الجغرافيا كان عم يشرح لتلاميذو عن المسافات يلّي بتفصل بين الشّمس والأرض وبين الشّمس والقمر وبين كوكب زحل والزّهرة والأرض والقمر، وعجقت على التّلاميذ بالحسابات بين سنين ضوئيّة وقمريّة وشمسيّة.  أحد الطلّاب بيرفع إيدو وبيسأل الإستاذ ممكن تحدّدلي شو المسافة يلّي بتفصل بين الطّالب والإستاذ؟ بالبداية الإستاذ صُدم بالسّؤال وبلحظة لملم أفكارو وقلّو المسافات بين البشر ما بتنقاس بسنين ضوئيّة ولا شمسيّة ولا قمريّة، بتنقاس بالأبعاد الروحيّة والإنسانيّة لأنّو مرّات كتيرة منكون قاعدين حدّ بعض بسّ نحنا بعاد عن بعض أكتر من الشّمس عن القمر. الزّوّادة بتقلّي وبتقلّك : جرّب قد ما فيك تكون قريب من إخوتك يلّي موجودين حدّك، قصّر المسافات بينك وبينن ما تستحي تعبّرلهن عن محبتك وعطفك يمكن يجي نهار تطلبن ما تلاقين، ساعتها ما بينفع النّدم، والله معك. المصدر : صوت المحبّة

  حطّ قلبك بين إيدين يسوع بيقول بادري بيّو : يا ربّ لو كان عندي قلوب ما بينعدّوا و كل قلوب الأرض و السما كنت بقدّمهن كلّن إلك ! حطّ قلبك بين إيدين يسوع و هوّي بيحوّل هالعضلة الزغيرة لمصدر حبّ كبير!  أريد قلبًا أنمو من فيض حبّه قلبًا يبقي لي دومًا يشدّني إليه.  قلبًا يحبّ ضعفي لا يخجل به هذا قلبك ربّي من سواك يسوع.  أريد قلبًا يغمر كل جراحي يبدّد كل خوفي يطهّر روحي.  قلبًا يكون راحتي في ظلِّه أرتاح، هذا قلبك ربّي من سواك يسوع. أريد قلبًا حاضرًا يسمع صرختي يسهر على ضعفي لا يغفل عنّي يفكّ كل قيد يحرّر فكري هذا قلبك ربي من سواك يسوع!! المصدر : صفحة Jesus My Lord

إذا قلبك حلو إنت حلو! "الإنسان ينظر إلى الظاهر و أمّا الربّ فإنه ينظر إلى القلب." (١ صم ١٦، ٧) كيف ما كان شكلك الله خلقك عا صورتو و مثالو و إنت كتير حلو!  و إذا قلبك حلو إنت حلو! ما تخاف من رأي الناس فيك و فكّر كيف بدّك ترضي الربّ و بس! َوالله معك! المصدر : صفحة Jesus My Lord

  الروح القدس يعلِّمكم بيقلنا الكتاب المقدّس : "الروح القدس يعلِّمكم في تلك الساعة ما يجب أن تقولوا." أوقات كتير منعتل هم إنّو عنّا شي إستحقاق كيف بدنا نتصرّف شو بدنا نحكي شو بدنا نقول و منقعد نحضّر و بالآخر بيمرق و منقول حسّيت كأنّو مش أنا كنت عم بحكي.  أكيد مش نحنا!  الروح القدس اللي بعتو يسوع يكون حدنا هوّي اللي ساعدنا و دبّر كل شي!  أرسل روحك أيُّها المسيح فيتجدّد وجه الأرض! المصدر : صفحة Jesus My Lord

  الأفضل الله معك... بيخبّروا إنّو بيوم من الإيّام كان في مجموعة من السّيدات عم يعملوا صبحيّة وكانوا كلّ الوقت عم يحكوا إنّو كلّ إم بتتمنّى على طول لأولادها الأفضل، بس مع الأسف ولا وحدة منّن كانت عم تقدر تحدّد شو الأفضل بالحياة.  الملفت إنّو كان في سيّدة عم تسمع الحديث بس مش عم تحكي ولا كلمة، لمّا سألوها ليش ساكتة؟ يا ريت بتشاركينا بالحديث وبتقوليلنا بنظرك مين هوّي الأفضل؟  جاوبت السّيدة بكلّ حكمة :  الأفضل هوّي صاحب القلب يلّي بيعيش بصدق مع ذاتو مع النّاس ومع الله، والأفضل هوّي الشّخص يلّي ما بينسى، يلّي بيحبّ وصادق بِحُبّو، والأفضل هوّي يلّي دايمًا بيصلّيلك بصمت وإنت ما بتعرف إنّو على طول عم بيحطّك بقلب الله.  الزّوّادة بتقلّي وبتقلّك : لحتّى تحصل على الأفضل بحياتك لازم تسعى إنّك تكون عم بتعيش حياة متلاني من حضور الله وما تقدّم للنّاس إلّا يلّي بتتمنى إنّك تحصل عليه. انشالله الرّب بيبعت لولادكن أفضل الأشخاص، والله معك. المصدر : صوت المحبّة

  من وين عم تجيبوا القوّة ؟  مرّة سألوا أبونا : من وين عم تجيبوا القوّة مع كل هالظروف و الصعوبات و الإضطهادات عبر التاريخ؟  جاوب : نحنا المسيحيِّين القوّة بتجي لعِنّا!  شمسنا و نور حياتنا يسوع المسيح، طريقنا هوّي يسوع المسيح... و إلهنا حيّ ما بيموت...  قوّتنا بوجودو!  ما تخافوا و ما تستسلموا! الله يقوّيكن! المصدر : صفحة Jesus My Lord

  عا نيّة العِيَل ! اليوم صلاتنا عا نيّة العِيَل، مش بس المفكَّكِة... كلّ العيل. يا رب الإشيا اللي إنت قلت عنّا مقدّسة نحنا البشر عم نخرّبها...  قلتلنا العيلة مقدّسة و ما منشوف إلّا عِيَل عم تتفرّق.  قلتلنا حِبّو بعضكن ما منشوف إلّا ناس متخانقة.  قلتلنا أكرم أباك و أمّك ما منشوف إلّا العكس تحت إسم التطوُّر و إنّو العيلة شي قديم بطّل عالموضة... يا ربّ إجمع أفراد العِيَل تحت جناحك و ملّي قلوبن حبّ و اللي بعدن مجموعين قوّي علاقتن حتّى ما نضعف قدّام أي تحدّي قد ما كان صعب... آميـــــــن. المصدر : صفحة Jesus My Lord

  تذكّر يا قيصر إنّك إنسان ! بيخبرو إنّو كان في إمبراطور روماني موظِّف زلمي كل شغلتو إنّو يبقى معو كل الوقت و يضل يقلّو :  "تذكّر يا قيصر إنّك إنسان !" كل واحد مِنّا بحاجة يضل يسمع هالجملة!  قد ما وصلت لمراكز و قد ما كان عندك سلطة بالآخر إنت إنسان !  و الإنسان تراب و إلى التراب يعود... يا ربّ وحدك إنت ملك الملوك و حاكم الحكّام و قائد القادة... آميـــــــن! المصدر : صفحة Jesus My Lord

  الصليب هوّي قوّتنا بيقول القدّيس يوحنّا فم الذهب :  "الصليب حطَّم قيودنا، وجعل سجن الموت كلا شيء، هو الحائط المنيع، ودرع لا يُقهر.  الصليب فتح الفردوس، وأدخل اللص، وأوصل جنس البشر إلى ملكوت السموات بعدما إقترب من الهلاك وصار غير مستحق ولا للأرض التي هبط إليها." الصليب هوّي قوّتنا، هوّي اللي بيعطينا الأمل بالقيامة بعد كل شي عم نمرق فيه... ما تخافوا! الله عاطول معكن! المصدر : صفحة Jesus My Lord

  شو بدَّك تصير بس تكبر؟ مرّة ولاد زغار عم يسألوا بعضن شو بدّن يصيرو بس يكبروا...؟ أنا بدّي صير طبيب، أنا معلمة، أنا ممثّل، أنا مهندسة...  بقيت بنت قالتلن أنا بدّي حبّ و صلّي.  كلّن قالولها إنّو فيكي تحبّي و  تصلّي من هلّق مش ضروري تنطري لتصيري كبيرة!  جاوبت : كل ما إكبر كل ما يكبر قلبي و يساع حب و صلا أكتر !  هالزغيرة اللي ناطرة تكبر تا يكبر حبها و إيمانها معها فاهمة الحياة صح و فاهمة أساسيّات مشروع الله صح!  حبّ و آمن بعدين بيجي كل شي تاني... الله معكن! المصدر : صفحة Jesus My Lord

  الشّجاعة الله معك... بيخبّروا عن مارتن لوثر كينغ الزّعيم الأمريكي يلّي كان من أصول إفريقيّة، والنّاشط السّياسي الإنساني، المطالب بإنهاء التمييز العنصري ضد السّود سنة ١٩٦٤ والحائز على جائزة نوبل للسّلام، لمّا سألو عن الشجاعة وكيف سعي لحتّى يكون إنسان شجاع، جاوب من أوّل يوم قرّرت إنّي دافع عن الحريّات شفت حياتي متل سلّم طويل أوّل درجاته ظاهرين قدّام عيوني بس مش قادر شوف آخرو، قرّرت إني إصعد درجات السلم رغم كلّ الصعوبات يلّي بدّا تعترضني على أمل إنّي أوصل لآخر السلم، وبالنّسبة إلي هيدي هيّ الشجاعة. الزّوّادة بتقلّي وبتقلّك : على دروب الحياة رح نوقع ورح تعترضنا صعوبات كتيرة، مش عيب إذا وقعنا، الشجاعة إنّو ننهض ونكمّل المسيرة بشجاعة لنوصل لتحقيق الهدف، والله معك. المصدر : صوت المحبّة

  الإنكسار الله معكن... بيخبّر جبران خليل جبران وبيقول :  أنا تركت ضيعتي بشرّي وسافرت مع إمّي على الولايات المتّحدة الأمريكيّة، عشت حياة قاسية وصعبة، علّمتني الحياة دروس كتيرة أهمها إنّو من حقّ الإنسان يبكي لمّا بيكون موجوع جسديًا أو نفسيًا، كمان من حقّ الإنسان إنّو يحزن لمّا بيخسر حدا عزيز على قلبو، إنّما ممنوع على الإنسان إنّو ينكسر لو مهما إعترضتو المصاعب على دروب الحياة، لازم يعرف ينحني قدّام العواصف بفصل الشّتي، ويرفع راسو صوب السّما بفصل الرّبيع، يكبّ عنّو كلّ ما هوّي أرضي بفصل الخريف، ويجمع غلال الحياة ليقدّمها لمعطي الحياة خلال فصل الصّيف. الزّوّادة بتقلّي وبتقلّك : حياة الإنسان هي فصول أربع لازم نستفيد منها لحتّى نتجدَّد ونعطي ثمار وثمارنا تدوم للأبد، والله معك. المصدر : صوت المحبّة