الزوادة اليومية

  المستحيل الله معكن... بيخبّروا عن شاب كان عم يعمل رياضة إغناطيّة وكان كلّ يوم خلال التّأمّل والصّلاة العقليّة يدخل مع الرّب بحوار جميل جدًا، وبيوم من الإيّام كان المقصد العام من الـتأمّل الطّلب من الرّب إنّو يعطي الإنسان القدرة على تحقيق المستحيل، خلال الـتّأمّل والمناجاة، بيسأل الشّاب سؤال:  معقول بقاموس الله تكون موجودة كلمة مستحيل؟ وبيسمع بعمق أعماقو صوت حنون بيقول: نعم عند الرّب في أمر مستحيل، بيسأل الشّاب بدهشة وبيقول يا رب شو هوّي المستحيل بقاموسك؟  بيسمع نفس الصّوت عم بيقول المستحيل إنّي إتخلّى عنّك وإتركك تضيع بعتمة الإيّام وتغرق بظلام الخطيئة. الزّوّادة بتدعيني وبتدعيك : لنتأمّل بنصّ الخروف الضّال والرّاعي يلّي ترك التّسعة وتسعين كرمال يفتّش عنّو ليحملو على كتافو ويرجّعو على الحظيرة، وهيك منتأكّد إنّو عند الرّب ما في مستحيل إنّما بيحوّل المستحيل إلى محال، والله معكن. المصدر : صوت المحبّة

ما تعيشوا متل حدا ! معروف إنّو كلّ نبتة بحاجة لظروف معيّنة حتّى تكبر و تنما و تكون منيحة.  مثلاً في نبات بيحب الشمس و منّن بيحبوا الفَي، منّن لازم نسقيهن كتير منّن لأ، منّن بيحبوا الشوب و منّن السقعة...  كل نبتة بحاجة لجَو معيّن تا تعيش.  و الناس كمان!  نحنا مش نِسَخ، ربنا خلقنا مميّزين، ما تعيشوا متل حدا!  فكروا إنتو شو بدكن و كيف بتكونوا فرحانين، الشغلة اللي بتزبط بحياة غيركن مش ضروري أبداً تكون منيحة إلكن!  إِنَّ الرَّبَّ دَعاني مِنَ البَطْن وذَكَرَ آسْمي مِن أَحْشاءِ أُمِّي- من سفر النبي أشعيا ٤٩.  فكروا فيها و نهاركن حلو مع يسوع! المصدر : صفحة Jesus My Lord

  إنت إبن الله !   بيخبرو عن نملة لونها نص أحمر و نص أسود عايشة بمملكة النّمل الأحمَر.  قاموا اجتمعوا و قرّروا يِنفوها خلّيها تروح عا مملكة النمل الأسود ما زال جزء من لونها متلُن.  زعلِت كيف تركِت عيلتها و أصحابها و فلِّت.  بس وصلت لهونيك كمان ما استقبلوها!  هالنملة تعرّضت لأبشع أنواع التمييز و العنصريّة حسب اللون!  راحِت عملِت مملكة لإلها سكّانها كل النمل المتروك و صارِت من أهمّ ممالِك النمل!  ما تزعَل إذا انرفَضِت بمُجتَمعَك لأنك ما بتشبهو!  بالعكس، آمن إنّو فيك توصل و الله بيحط إيدو معك و بتحقّق هدفك.  ما تقبَل حدا يكسرَك، إنت إبن الله و الربّ يرافقكن! المصدر : صفحة Jesus My Lord

  مطلوب تحبّ كتير! مين مِنّا ما بيعرف القدّيسة الأم تريزا دي كالكوتا اللي قضّت حياتها بخدمة كل يلّي المجتمع بوقتها ما كان يقبلن متل يلّي عندن أمراض معدية و الفقرا... و كانت تقول :  "إذا لا تستطيع أن تطعم مائة شخص، فأطعم واحد فقط."  متل ما أوّل ما بلّشت ما كانت تقدر تساعد كتير بس ما إستسلمت و قعدت بالبيت و قالت لحالها مش قادرة أعمل شي.  إشتغلت قد ما قدرت و صار ربنا يحطّ إيدو معها و صارت قدراتها تكبر و تكبر و تساعد ناس أكتر.  نحنا كمان مدعوّين نكون متلها ما نستسلم إذا حسّينا مش قادرين نعمل كتير!  مش مطلوب تعمل كتير مطلوب تحبّ كتير! الله يرافقكن! المصدر : صفحة Jesus My Lord

  أمور لا تتكرّر الله معكن... حابب اليوم أنا وإنتو نتأمّل بخمس أمور ما بتتكرّر بالحياة، الكذبة التي لا تغتفر، يلّي بتكسر الثّقة بينّا وبين الآخرين، واللّحظة يلّي ما مننساها يمكن من حلاوتها ومرّات من مرارتها، النّظرة يلّي بتغيّر قلب الإنسان من رقّتها ولطافتها ومرّات من ظلمها وقساوتها، والجرح يلّي ما بيشفى رغم مرور الإيّام والزّمن لأنّو عميق، والأشخاص يلّي ما بيتكرّروا بيصحّ فيهن القول هم ١٠ و ١٠٠ لا بل ١٠٠٠ في رجل. الزّوّادة بتقلّي وبتقلّك : عيش اللّحظة الحاضرة، ما تبكي على مبارح ولا تتشوّق لبكرا، بيكفي كلّ يوم خيرو وشرّو، قول الله وعيش نعمة الوقت الحاضر، والله معك. المصدر : صوت المحبّة

  سيطر عا حالك! بيقول أحد القدّيسين : "السيطرة ضارّة إلّا السيطرة على النّفس." إنّك تسيطر عا غيرك و تفرض حالك و رأيك و تتصرّف إنّك أهمّ من الباقيين شي مش منيح.  تذكّر إنّو يسوع بيقول اللي بدّو يكون الأوّل فيكن لازم يكون لإخواتو خادم... بس إنّك لمّا تسيطر عا حالك بتكون إنسان قوي كتير لأنّك بتكون غلبت طبعك البشري!... سيطروا إيه ... بس عا حالكن! الله معكن. المصدر : صفحة Jesus My Lord

  القوّة الله معكن... بيخبّروا عن شاب كان من أبطال الحرب بنظر الإمبراطور والحاشية الملكيّة، وأكتر من هيك هوّي من الجبابرة ومن أنصاف الآلهة، لا يقهر، كان الإمبراطور يطلب منّو ينزل لحلبة المصارعة ليحارب رجال أقوياء، وهيك كان الشّعب يتسلّى ويتلهّى عن التّفكير بالسّياسة وبالحكم وعن الأمور يلّي مش ماشية بالمملكة. بيوم من الإيّام كان هالشّب بحلبة المصارعة وشو كانت صدمتو كبيرة لمّا شاف قدّامّو  رجّال ضعيف، شفق عليه ورفض إنّو يحاربو، والنّتيجة إنّو عطاه فرصة جديدة بالحياة، بيتقدّم منّو الرّجال بتقدير كتير كبير بيشكرو لأنّو ما قتلو، وقلّو حابب فكّر أنا وإنت بحقيقة حياتيّة، بالحياة نحنا منشبه الطّيور والنّمل، بيسألو المحارب الجبّار كيف يعني ما فهمت، بيقلّو الرّجال لمّا الطّيور بتكون عايشة بتاكل كلّ نملة بتعترض طريقها، ولمّا الطّيور بتموت النّمل بياكلها، على دروب الحياة الظّروف بتتغيّر وبلحظة بتنقلب كلّ المقاييس، صحيح إنّو الكلّ بيعترفوا بقوّة وشجاعة الفرسان، بس شو حلو هالفرسان يكونوا متلك يعرفوا إنّو الزّمن أقوى منّهن بكتير. الزّوّادة بتقلّي وبتقلّك : لو مهما كنت قوي في حدا أقوى منك، لازم نتذك

  التّبدّل الله معكن... عالم اليوم هوّي عالم رقمي خلّانا نعيش بوحدة، وأكتر من هيك جعل من عالمنا موحش، منشوف أدّيش في عنّا أشخاص منتواصل معهن عبر وسائل الإتّصال الإجتماعي، ما منعرفهن ولا بيعرفونا، والبشع إنّو تعلّقنا فيهن بيخلّينا ننسى أصدقاءنا الحقيقيّين ومنتعلّق بأصدقائنا الرقميّين، أحد الشّباب كتب على صفحتو الرقميّة : «رح قدّرلك ظروفك إذا ما في عندك وقت لتحكيني، ورح قدّرلك ظروفك إذا ما عدت سألت عنّي، ورح قدّرلك ظروفك شو ما كانت الإنشغالات يلّي بعّدتك عنّي بس بالمقابل بتمنّى عليك تقدّرلي ظروفي بس إتغير معك وصير شخص تاني.» الزّوّادة بتقلّي وبتقلّك : التّباعد بين النّاس بيصير على الشّكل التّالي أنا بنطرك تحكيني وإنت بتنتطرني لإحكيك والنّتيجة كلّ واحد منّا بيضل بمحلّو ما حدا بياخد مبادرة وبيحكي التّاني وبتصير حالتنا ناس باردين بصداقتهن في ألواح جليديّة بتفصل بيناتهن وبتتوقف كلّ العلاقات، والله معكن. المصدر : صفحة Jesus My Lord

  هوّي بيعرِف شو بينفَعنا بيقول أحد الآباء القدّيسين :  "إنّ الله يعطيك ما ينفعك وليس ما تطلبه، إلّا إذا ما تطلبه هو النافع لك، وذلك لأنّك كثيراً ما تطلب ما لا ينفعك." أهلنا بيقولولنا لو قد ما كبرتو نحنا أهلكُن و منعرِف مصلحتكُن، هودي أهلنا عالأرض كيف بيّنا السماوي اللي خلَقنا و خلَق هالكون!  هوّي أكيد بيعرِف شو بينفَعنا و أوقات كتير نحنا مننجَر ورا أفكار و إشيا منفكّرها أحلى شي لإلنا و منزعَل لما ربنا ما يعطينا طلبنا كرمالها بس بعد وقت منتطَلّع منقول الحمدالله ما صارِت هالشّغلة!  إحمينا يا ربّ من حالنا قد ما إعترَضنا، آميـــــــن... الله يرافقكن! المصدر : صفحة Jesus My Lord

دروس الحياة الله معكن... حابب أنا وإنتو اليوم نتوقّف للحظات ونتأمّل بهالعبرة يلّي قريتها اليوم مدوّنة على ورقة من أوراق الرّوزنامة، والعبرة بتقول :  القلب لا يصحو إلّا بالألم، والعقل لا يتعلّم إلّا بالعبر، والقدم لا تأخذ درساً إلّا إذا وقعت في الحفر. الزّوّادة بتقلّي وبتقلّك : على دروب الحياة في كتير أمور بتعترضنا، حلو ناخدها بإيجابيّة ونتعلّم منها، بيصير الألم مطهّر، والوقوع حافذ للنّهوض والسّير من جديد، والعبر صرخات بالضّمائر النّايمة، والله معكن. المصدر : صوت المحبّة

  ما نراه في قلوبنا الله معكن... بيخبّروا عن صبي زغير راح لعند إمّو  وسألها بتعجّب وبكلّ بساطة وطيبة وبراءة الأطفال :  «ماما ليش منسكّر عيونّا لمّا منضحك من كل قلبنا، وليش منسكّر عيوننا لم منغمر حدا عزيز على قلبنا، وليش منسكّر عيوننا لمّا منكون عم نحلم أحلام حلوة، وليش منسكّر عيوننا لمّا منبكي على حدا ترك فراغ بقلوبنا، وليش منسكّر عيوننا لمّا منكون بحالة خشوع وإتحاد بالله وعم نصلّي من أعماق قلوبنا؟»  جاوبت الأم : لأنّو أجمل ما في الحياة ما منشوفو بعيونّا إنّما منشعر في بأعماق قلوبنا. الزّوّادة بتقلّي وبتقلّك : القلب هوّي مصدر العاطفة والحياة والإحساس، خلّينا نطلب من الرّب يعطينا قلب من نار لحتّى نحبّو وقلب من لحم ودم لحتّى نشوف النّاس ونحسّ فيهن وساعتها أكيد منحبّهن، والله معكن. المصدر : صوت المحبّة

  ربنا هوي مصدَر الحياة ! لمّا ربنا خَلَق السّمك، حِكي مع البحر و لما خَلَق الشّجر حِكي مع الأرض، بس لمّا خَلَقنا حِكي بينو و بين حالو... السّمك إذا منشيلو من البحر و المي بيموت و الشّجر إذا بينشال من التراب بيموت... و الإنسان بس يبعُد عن الله بيموت! ربنا هوي مصدَر الحياة إلنا، ما تنسوا هالشي... الله معكن! المصدر : صفحة Jesus My Lord

  تحصّنوا بالربّ تعوا نتذكّر شوي سفر التكوين.  لمّا ربنا خلق الإنسان خلّاه يكون عا صورتو و مثالو. (سفر التكوين الفصل الأوّل الآية ٢٦ وَقَالَ اللهُ:  «نَعْمَلُ الإِنْسَانَ عَلَى صُورَتِنَا كَشَبَهِنَا...) و لمّا الحيّة إجت تقنع حوّا تاكل التفّاحة بتعرفو شو قالتلها؟  شوفوا الحديث اللي صار : (سفر التكوين الفصل التالت الآية ٤ و ٥)  "وأما ثمر الشجرة التي في وسط الجنّة فقال الله: لا تأكلا منه ولا تمسّاه لئلا تموتا فقالت الحيّة للمرأة : لن تموتا، بل الله عالم أنه يوم تأكلان منه تنفتح أعينكما وتكونان كالله..." إنتبهتوا وين المشكلة؟! إنّو الشيطان عم يقنع الإنسان إنّو هوّي قادر يقدّملو شغلة ما عندو اياها اللي هيّي إنّو يكون متل الله، بوقت الربّ أصلاً قدّملو هالشي لمّا خلقو و عِمْلو عا صورتو و مثالو!! ما توقعوا بفخ الشرّير اللي حجتو أصلاً ساقطة!  ما تقبلوا يقنعكن بإشيا غلط، تحصّنوا بالربّ و الله معكن! المصدر : صفحة Jesus My Lord

  عيدوا حساباتكن... بيقول القدّيس أوغسطينوس عن المحبّة : "إنّ للقلب صمّامَين يعملان معًا الأوّل مكتوب عليه تحبُّ الربَّ إلهك من كلّ قلبك والثاني مكتوب عليه قريبك كنفسك ولا يمكن للقلب أن يعمل بصمّام واحد." ما فيك تقول إنّك بتحبّ الربّ و إنت بتكره خيّك الإنسان!  و لا فيك تقول أنا بحبّ الناس بس ما بآمن و ما بحب الربّ !  عيدوا حساباتكن... و الله معكن. المصدر : صفحة Jesus My Lord

  المسيحيّة والإحترام الله معكن...   بزمن صار الإحترام عملة نادرة، وسيطرت شريعة الغاب بين البشر وصار الكبير يأكل الزّغير، والقوي بيقضي على الضّعيف وصارت المقولة السائدة إن لم تكن ذئبًا أكلتك الذّئاب، حابب أنا وإنتو نتأمّل بهالمبدأ المسيحي:  إحترامك للنّاس ما بيعني إنّك بتخاف منّهن أو إنّك بحاجة لإلهن، إحترامك للنّاس هوّي مبدأ بتتعلّمو من دينك ومن تربيتك، إحترم تُحترم، وإحترامك للنّاس بيأكّد إنّك إنسان ثري بالأخلاق، غني بالقناعات، كبير بالتّواضع. الزّوّادة بتقلّي وبتقلّك : ما تسمح لأحكام النّاس يغيّرولك مبادءك والأسس يلّي تربّيت عليها، خلّي مثالك بالحياة هوّي يسوع المسيح يلّي إحترم العبد يلّي تفل بوجّو، وقيافا يلّي حكم عليه بالصّلب، ولصّ الشّمال يلّي شتمو على الصّليب، ما في تلميذ أفضل من معلمو، والله معك. المصدر : صوت المحبّة

  طلب الرحمة بتقول الخبريّه إنّو من بعد ما ماتو بحرب الإقطاعيّين والفلّاحين، بيلتقي بالسما خيّال تابع للملك وفلّاح متفاجىء من وجود عدوّه بالسما، وبيسألو : "كيف وصلت لهون؟". جاوب الخيّال : "ما بتصدّق إذا خبّرتك أنا وعم بوقع عن سرج الحصان وقبل ما أوصل ع الأرض طلبت الرحمة والمساعدة من الربّ وليك وين صرت". الزوّادة بتذكّرنا بالمتل الصيني يللي بيقول : الرحمة الإلهيّة عندها ألف إيد، ونحن بحاجة إلن كلّن... يا إنسان إرحم إخوتك البشر لأنّك دايمًا بحاجة لرحمة الربّ ، وتذكّر إلهنا علّمنا أجمل أمثوله بالرّحمة عن صليبو لمّا قال : "أغفر لهم يا أبتاه..." المصدر : صوت المحبة

  القال والقيل الله معكن... بيخبّروا عن شاب تعب من كلام النّاس ومن القال والقيل، بيقصد أحد أديار الحبساء، بيطلب يقابل رئيس الدّير، بيشكيلو همّو وبيقلّو تعبت من كلام النّاس، بيجاوبو الحبيس بكلّ تقوى وإيمان إذا وجّعك كلام النّاس ما لازم توجّع نفسك إنت وعم بتقضّي كلّ وقتك عم بتفكّر ليش قالوا هيك، وليش عملوا هيك، لازم توثق بربّك، توثق بنفسك وتتذكّر إنّو كلام النّاس كتير مرّات بيكون سببو الغيرة، ومرّات بيكون سببو الفشل، ومرّات بيكون كلام من أجل الكلام. الزّوّادة بتقلّي وبتقلّك : كلام النّاس متل الهمّ من حقّك تسمعوا بس ما لازم تسمحلو يعشعش براسك وبفكرك وبقلبك، لازم تسمع كلام النّاس وتخلّي ضميرك يحكم عليه، والله معك. المصدر : صوت المحبّة

  إمتحاناتنا كتار بيقول القدّيس توما الأكويني :  "أتريد قدوة في الصّبر ؟ إنَّك لواجِدٌ مثالَه الأكمل في الصليب ، صبرُ المسيح على الآلآم ، لنصبِر نحن على الإمتحان المُعَدِّ لنا شاخصِين إلى رأس إيماننا يبلغنا الكمال." يا رب، إمتحاناتنا كتار، كل واحد بشكل و بطريقة مختلفة.  شو ما كان إمتحاننا بهالدّني اعطينا الصبر متل ما إنت صبرت عالصليب و علّمنا إنّو الإمتحان بيقوّي إيماننا أكتر و نوثَق بحكمتَك اللي أوقات كتيرة عقلنا البشريّ ما بيقدَر يفهمها...  كون يا رب رفيق كل شخص بحاجة إلك اليوم و كل يوم... آميـــــــن. المصدر : صفحة Jesus My Lord

  نطور تا تخلص العاصفة... بيخبرو إنّو لمّا شتّت الدني صارت المَي بالبحيرة معكورة.  و ما بقا إجو السوّاح لأنّن بطّلوا قادرين يشوفوا الثروات اللي تحت المَي من حيوانات و أسماك و صَدَف!  نحنا كمان متل هالمَي لمّا تكون افكارنا معكورة و متأثرة بعوامل كتيرة ما بقا منشوف شي و منبعد عن حالنا حتّى و منبطّل نشبه شخصيّتنا الحقيقيّة!  لمّا تكون مارق بهيك ظرف، نطور تخلص العاصفة و ترجع تصفَى المَي و بيتوضّح كل شي و ساعتها بتصير عارف إنّك رح تتصرّف صحّ.  بتسألوا حالكن إذا في شي طريقة تخلص العاصفة أسرع؟  منقلكن أكيد !  بالصلا و الإيمان و طلب مساعدة الربّ ، نحنا وحدنا ما منقدر بس لمّا إيد الله بتتدخّل العاصفة بتهدا متل ما هديت بالبحر... الله معكن! المصدر : صفحة Jesus My Lord

  الحطّاب بيخبرو عن عيلة فيها البي حطّاب.  كانِت طلبات الولاد كتيرة كل يوم بدُّن شوكولا و ألعاب.  كان البي يشتغِل كتير تا يأمّن هالشّي و ما يحسّوا الولاد بأي نقص...  بيوم من الإيّام مرِض البَي كتير و ما بقا قدِر يروح عالشّغل.  حملِت الأم العدّة و راحِت هيّي تحطَّب!  ما قدرِت تجمِّع نفس كمّية الحطَب متل قبل، طلعلَها مصاري أقلّ بيكفوا بس تا تجيب أكل...  صرخوا عليها الولاد كيف إجِت بلا لِعَب و شوكولا و قالولها إنّن ما بيحبّوها!  هيّي مش قادرة تتحرّك من التّعب بس ما حكيِت شي... زعِل كتير البَي المريض من اللّي سمعو و قلّن بكرا الصّبح بتروحوا مع إمكن عالشّغل!  لمّا راحوا و شافوا قدّيش عم تتعب تا تجبلن أكل زعلوا من حالُن و اعتذروا منها و عِرفوا قيمة النّعمة اللّي هنّي مفكرينها تحصيل حاصِل...  يا رب اعطينا نقدِّر النّعمة و نعرِف نشكُر... آميـــــــن. المصدر : صفحة Jesus My Lord

  قام قام... حقًّا قام ! بيقول القدّيس أوغسطينوس :  "بالحقيقة جَلبَ الإنسان الموت لنفسه كما لإبن الإنسان أمّا إبن الإنسان فبِموته وقيامته جلبَ الحياة للإنسان". خطيّتنا بعّدِتنا عن الربّ بس هوي ما تخلّى عنّا أبدًا و انصلَب و مات كرمالنا و أكيد ما خلصِت القصّة هون!  قام، قام، حقًا قام و رجّعلنا الحياة و الأهمّ إنّو عطانا حياة ما حدا بيقدَر ياخِدلنا اياها لأنها مش حياة للجسد، هيّي حياة أبديّة للرّوح!  فكِّر فيها، شو ما كانِت الخطيّة اللّي عم تِغريك اليوم و تشدَّك صوبها، حرزانة تخسَر حياة أبديّة كرمالها؟...  قرِّر و تصرَّف عهالأساس و الله يكون عاطول معك! المصدر : صفحة Jesus My Lord

  إبتهجي أيّتها الأرض! صباح يسوع، صباح القيامة، صباح الحياة، صباح الفرح... يسوع المسيح اللي وفي بوَعدو بـ ٣ إيّام ، ما رح يتركَك هوّي اللي وَعَدك و قلّك ما تخاف أنا معك! ما تكون متل توما، أوثق إنّو ربنا حاضر و هوّي إله حَي و سَلمو أمرك، معو ما في إلّا نهايات سعيدة! يا ربّ، مع قيامتك اليوم، منصلّي عا نيّة وطننا و شعبو، عا نيّة المرضى، عا نيّة الفقرا، عا نيّة اللي فاقدين الأمل، عا نيّة كلّ يتيم و كل شخص وحيد، عا نيّة كل مغترِب، عا نيّة الجوعانين، و البردانين  و الحزانى و كل شخص بحاجة نتوحّد معو بالصّلاة... عطيهن القوّة و نعمة الصبر!  المسيح قام حقًّا قام!   إفرحي أيّتها السماوات و إبتهجي أيّتها الأرض! خدّام الرب ®

  حَقًّا قَامَ !! من أقوال القدّيس يوحنّا الذهبيّ الفم : "لو أنّه قام عقب إنصراف الحرّاس بعد اليوم الثالث كان لهم ما يقولون وما يقاومون به ويعاندون. لذلك بادر وسبق فقام، لأنّه كان يلزم أن يقوم وهم بعد يحرسون." يسوع ما ترك مجال للشكّ حتّى إنّو قام هوّي و القبر مسكّر بالحجر كبير و مختوم متل ما تركوه اليهود... يسوع ما تركلن مجال يلاقو و لا حجّة و لا سبب و لا تبرير، كسرلن كل معتقداتن، كل أفكارن، تخطّى كل حدود العقل البشريّ... كيف لأ و هوّي مش من هالعالم! هوّي إجا بس كرمالنا، و نحنا اليوم مع إنّو منغنى و منشوف حالنا بعصر التكنولوجيا اللي نحنا فيه و بالتطوّر و التقدّم بس بعد أكتر من ألفين سنة بعدنا عم نتصرّف متل اللي كانو بهيداك الوقت و متل كأنّو ما تعلّمنا شي! سامحنا يا رب... بعدنا عم نخلّي الشرّ يفوت بيناتنا، بعدها الخطيّة آكلتنا، بعدنا ما منحبّ بعضنا، بعدو إيماننا مش ثابت، بعدنا منشكّ، بعدنا منخاف... أعطينا يا رب نستاهل قيامتك! المسيح قام... حقًا قام! والله معكن... المصدر : صفحة Jesus My Lord

  سبت النور 🕯️ هالكلمتين لحالن زوّادة! بيختصرو إيماننا المسيحي... اليوم هوي جسر العبور بين آلام الجمعة العظيمة و القيامة. بهالنهار ما في كلمات تعبّر عن حبّ الربّ إلنا! اليوم يسوع بيفرجي مجدو اليوم بيفرجي كل اللي قالولو عالصليب ما زالك إبن الله خلّص حالك إنّو كل شي عند الربّ مدروس و إنّو بالوقت اللي هوّي بيشوفو مناسب ببيّن قدرتو و بيعمل العجايب اللي عقلنا البشريّ صعبة يفهمها. طَلَبو منّو ينزّل حالو عن الصليب بس هوي كان بدو يفرجيهن إنّو قدرتو أكبر بكتير و غلب الموت اللي بيخوفهن كلّن! و هالشي بينطبق عا حياتنا، أنا بس أطلب شي من الله و ما يتحقق دغري مش يعني ربنا مش قادر يساعدني. بس هوي حكمتو غير و توقيتو غير و طريقتو غير و الله معكن... خدّام الربّ ®

  الوقعة ما رح تأذيك ! اليوم بالجمعة العظيمة شو بدّك بعد يا إنسان تا تصدّق إنّو الله حدّك و تسلمو حياتك؟! بيقولو شخصين بيتتبعولك حياتك و خبارك بأدقّ التفاصيل:  اللي بيحبك كتير و يلي بيكرهك كتير، لازم يكون عندك الإيمان إنّو الله محبة و بس تعرف قدّيش بيحبّك بتتأكّد إنّو متابعلك حياتك لحظة بلحظة و ماشي حدك و قبل ما تتفركش بيكون مهديك. و إذا شي مرّة وقعت مش يعني هوّي مش هون، يعني الوقعة ما رح تأذيك بس رح تقوّيك أكتر. بس تصير من قلب مشكلتك تشكر الله بدون خوف نيّالك لأنو الله معك و إنت عارف! الله معنا فمن علينا! خدّام الرب ®

  سوا منشهد للمحبّة اليوم بخميس الأسرار بتعيش الكنيسة العشاء الفصحيّ الأخير، عربون محبّة وحضور أبديّ للمسيح العريس مع الكنيسة، خطيبته. وكان التقليد من زمان إنّو تتغسّل أرجل كل المؤمنين الحاضرين بالكنيسة، من الأصغر للأكبر، قبل ما يقتصر اليوم على غسل أقدام ١٢ شخص بس، رمز لرسل المسيح. والليلة منزور ٧ كنايس رمز لإتمام الأسرار السبعة والرغبة بعيشها بحريّة ورضى ورمز للمراحل السبعة للي تنقّل فيا يسوع المسيح ليلة آلامه. المصدر : صوت المحبّة

  ضوّي العتمة بموطننا! بأسبوع الآلام عم نتذكّر مواقف من حياة القدّيسين حتّى نختم صومنا بأحلى طريقة نحنا و عم نرجع لعمق إيماننا و تا نتذكّر إنّو نحنا كمان فينا نكون قدّيسين! مار شربل لمّا الله لهَمو يصير حبيس، كانو رؤساء الأديار ما بيعطو هالإذن بسهولة.  لمّا رئيس الدير كان متردّد إذا بيسمحلو أو لأ، صارت أعجوبة السراج لمّا طلع قرار ممنوع حدا يضوّي و مار شربل مش عارف و طلب يعبّولو السراج زيت و عبّولو اياه مَي حتّى يضحكو كيف ما رح يولع...  و لمّا رئيس الدير شاف ضَو جايي من أوضة مار شربل و إجا حتّى يقلّو كيف ما التزم بالقرار بيعرف قصّة المَي... و هون عرف إنّو هيدي علامة من الربّ إنّو هالراهب بيقدر يكون حبيس و من بعدها قدّيس! ضوّيت سراجك بالمَي... ضوّي العتمة بموطننا! المصدر : صفحة Jesus My Lord

حكمة سكّير الله معكن... بيخبّروا عن شاب كان يسكر لحتّى ينسى همومو، وكان على طول بس يسكر يروح لعند أحد أصدقاؤو يدقّ بابو وينام عندو، لحتّى تروح السّكرة وتجي الفكرة.  بيوم من الإيّام كان واعي، سألوه:  ليش بس تسكر ما بتروح إلّا لعند هالصّديق؟  جاوبهن :  «الإنسان يلّي بتضلّوا تتذكّروه بس تكونوا سكرانين هوّي الوحيد يلّي ما بتنسوه طول إيّام حياتكن، لأنّكن تذكّرتوه لمّا سكرتوا حتّى تنسوا همومكن وتنسوا كلّ العالم.» الزّوّادة بتقلّي وبتقلّك : كتار هنّي النّاس يلّي بينسوك وبتنساهن وقت الصّعوبات والمحن، قلال يلّي بيضلّوا واقفين حدّك بس تحسّ حالك متروك ومنسي، تذكّر إنّو الربّ معك وحدك على طول بوقت السّكرة وبوقت الفكرة، والله معك. المصدر : صوت المحبّة

  الطّيّبون الله معكن... بيخبّروا عن شاب سأل جدّو مين هنّي النّاس الطيبين؟  جاوب الجدّ بكلّ بساطة :  الطيّبين هنّي النّاس يلّي ما بتتغيّر صفاتهن، الكريم بيضلّ كريم حتّى لو افتقر، والمتسامح بيضلّ متسامح حتّى لو انظلم، والمحبّ بيضلّ محبّ حتّى لو انغدر. الزّوّادة بتقلّي وبتقلّك : الطّبية متل الجمال تنيناتهن بينبعوا من أعماق القلب متل ما الجمال ما بيتأثّر بتقاسيم الوجه، هيك الطّيبة ما بتتأثّر بالظّروف الخّارجيّة. المصدر : صوت المحبّة

  نيّالك يا أورشليم ... بأحد الشعانين يسوع بيدخل ع أورشليم ع جحش إبن آتان.  إجمالاً الملوك بس يحتلّو مدينة و يفوتو عليا بفوتو شايفين حالن وبقوّة السلاح ومعن جنود وعسكر.  يسوع فات عا أورشليم بكلّ تواضع وبسلام مع أغصان شجر بدل السلاح ومحل الجنود حولو ولاد زغار!  نيّالك يا أورشليم ... يا ريت يسوع بيفوت عا قلوبنا وضيعنا ومدننا وبيوتنا ووطننا... هوّي أكيد حابب يفوت بس يسوع ما بيفرض حالو عا حدا!  ناطر نقلو تفضل!  بتقول الترتيلة : أنا واقف على بابك ناطر إنّو تفتحلي الباب...  بس يفوت يسوع لازم يلاقي أحلى إستقبال : حبّ، حنّيِّة، فرح، سلام، صدق و إيمان !  يا ترى نحنا شو محضرينلو؟ والله معكن... خدّام الرب ®