الزوادة اليومية

ما تأخّر الوقت منخبّركن اليوم عن صبي صغير، عمرو ١٠ سنين، من الولايات المتّحدة، مضى أشهر عديدة بلا مأوى، بملاجئ مؤقّتة مع أهلو. واليوم، ومن بعد ما رجعت تحسنّت أوضاعو، قرّر هيدا الصبي الصغير إنّو يصنع تياب للأطفال للي ما عندن مأوى. فمن خلال صفحتو على مواقع التواصل الإجتماعي عم يجمع قماش ومن خلال آلة إمّو للخياطة عم يخيّط تياب ويبعتن للمنظّمات للي عم تهتم بالعائلات المشرّدة.  بعد ما تأخّر الوقت حتّى نلتفت صوب خينا الإنسان، للي على صورة الله ومثالو، بعد ما تأخّر الوقت حتّى نقلّو : "انت مش وحدك، أنا معك والله معنا". المصدر : صوت المحبّة

  صار فيك تقطع ! لأنّو السواقة ورا شاحنات كبار ممكن تكون خطيرة والأخطر لمّا بدنا نقطع عنن، أطلقت شركة "Samsung" تقنيّة جديدة لتحافظ على سلامة المواطنين. فوضعت على خلف الشاحنة شاشات موصولة على كاميرات أماميّة بتعرض حركة السير قدامها، وهيك بيقدر السايق يعرف الوقت الممكن للمرور من دون إرتكاب أي حادث. بتتأمّل شركة "Samsung" من خلال هالتكنولوجيا الجديدة إنّو تخفّف من حوادث السير. منصلّي اليوم، على نيّة كل المؤسّسات للي عم تهتمّ بتوعية السائقين وعم تسهر على سلامتن. ومنشكرك يا ربّ لأنّك دايماً سهران على دروب حياتنا. آميـــــــن. المصدر : صوت المحبّة

  رافق مشوارنا يا رب... منصلّي اليوم ع نية ضحايا حوادث السير بلبنان الكتار... هالطرقات المعتمة، اللي كلها حُفر و إشيا بتفاجِئ السايقين بدون أي تحذير... منصلي يا رب عا نية كل شخص إنتقل من بيناتنا بحادث سير شو ما كان سببو وبالأخص خينا جورج الراسي. هالحوادث اللي اخدِت منا كتير عيل و شباب و صبايا... أغمرُن يا رب برحمتك الكبيرة و اعطي نعمة الصبر لأهلن و محبينّن و اغمر بحمياتك كل السايقين. بكتاب صلوات القدّيسة ريتا منلاقي صلا إسمها صلاة السائق بتقول : "أيّتها القدّيسة ريتا، يا رفيقة كلّ سائق ومسافر ووحيد، كوني عينًا ساهرة عليّ أنا المفتقر إلى عونك ومساعدتك. رافقيني في مشواري وإحفظيني من كلّ أذى أو حادث قد يؤذي جسدي أو روحي. آميـــــــن. (أبانا، السلام والمجد)" الله يحمي الجميع! المصدر : صفحة Jesus My Lord

  كيلو القطن أتقل أم كيلو الحديد؟ بيخبرو عن ١٠٠ كيلو حديد عم يشوفو حالن عا ١٠٠ كيلو قطن إنّن هني أتقل منن... بوقت التّنين عندن نفس الوزن! بعيون الله كلنا عنّا نفس الوزن، كلنا ولادو و خلقنا متساويين، الناس هيّي اللي خلَقِت الفروقات و صارِت تصنّف بعضها عا أساسها ! ما تقبَل حدا يحسّسك إنّك أقلّ من غيرك لسبب أو لتاني إنت إبن الله، إبن ملك الملوك، عندك سند بالسما أقوى من كل قدرات الأرض! فكّر بهالشي كل مرة بتحس إنّك زعلان لأنّو معايير الأرض ظلمتك و الله معك! المصدر : صفحة Jesus My Lord

  شو أبشع حبس بالعالم؟ مرّة انسأل زلمي ختيار عندو خبرة كبيرة بالحياة شو أبشع حبس بالعالم؟ جاوب: البيت اللي ما فيه سلام! السلام أكتر شعور بحاجة إلو الإنسان و إذا ما لاقاه ببيتو لأي سبب ان كان رح يتحوّل هالبيت اللي مفروض يكون مساحة أمان لمصدر قلق و تعب نفسي كبير و بيصير أبشع من الحبس! إذا بيتكُن مفتقد للسلام تأكّدوا من وجود الله فيه! يا ربّ السلام أعطنا السلام سلامًا علينا و على كل الأرض... سلام الرب بقلوبكن! ❤ المصدر : صفحة Jesus My Lord

الكبريتة من خشب شجرة وحدة بينعمل ألوف عيدان الكبريت و من ميلة تانية عود كبريت واحد قادر يحرق ألوف الأشجار! من هون منفهم إنّو متل هالكبريتة اللي ولّعت الغابة، هيك فكرة بشعة وحدة قادرة تمحي كل الأفكار الحلوة! يا رب عطينا القدرة نسيطر عا أفكارنا و ما ننجرّ ورا أفكار بشعة و خلّينا عا طول نتذكّر حُبّك اللي هوّي أساس هالحياة و تزهّر بنفوسنا الأفكار الحلوة و نقدر ننقلها لكل شخص منلتقي فيه. المصدر : صفحة Jesus My Lord

  هيك كمان ملكوت الربّ... بس يكبّ صيّاد السمك شباكو بيطلع فيها كل أنواع السمك. بعدين الصيّاد بياخد الشبكة عالشطّ و بيصير ينقّي السمك المنيح بيخلّيه و اللي مش منيح بينكبّ. هيك كمان ملكوت الربّ... من له اذنان سامعتان فليسمع! الله معكن. المصدر : صفحة Jesus My Lord

  كهربا من الجار! بيخبرو عن رجّال ختيار ما عندو حدا ساكن لحالو. بس صار إشتراك الكهربا غالي كتير ما قدر بقا يدفع. كان متأكّد إنّو صاحب الإشتراك اللي هوّي إبن عمّو رح يطوّل بالو عليه بالدفع بس تفاجأ لمّا قطعلو الكهربا و قال ما عم توفّي معو... بوقت جارو ما بيعرفو للختيار ناقل جديد عالحَي بس سمع بالقصّة مد شريط كهربا من بيتو للختيار بدون مقابل! مين طلع بيقربو أكتر؟ إبن عمّو أو الجار الغريب؟... بتذكّرنا هالخبريّة بمثل السامري الصالح... خلّونا كل واحد منّا قد ما بيقدر يكون السامري الصالح بحياة الناس اللي منلتقي فيهن متل ما قال يسوع بآخر المثل: «اِذْهَبْ وَٱفْعَلْ أَنْتَ هٰكَذَا».‏ (لوقا ١٠:‏​٣٦،‏ ٣٧‏) .‏.. الله معكن. المصدر : صفحة Jesus My Lord

  دم بخيل ! بيخبرو عن ست غنيّة عملت عمليّة و عازت دمّ ما كان حدا يتبرّع لأنّو الفئة نادرة. عرضو ولادها مبلغ من المصاري للّي بيتبرّع. سمع رجّال معروف إنّو بخيل و إجا تبرّع بالدم. لمّا طلعت المرا من المستشفى و كانت حاسّة إنها مدينة بحياتها لهالرجال اشترتلو ذهب هديّة بس لمّا تعرّفت عليه عرفتو بخيل و بيحبّ المصاري... بعد فترة رجعت اضطرّت هالستّ تفوت عالمستشفى، هالمرّة الزلمي ركض يتبرّع بدم طمع بالمقابل اللي رح يطلعلو. لمّا شفيت الستّ أخدتلو باقة زهور مع بطاقة شكر. قلها وين المصاري و الدهب؟!! جاوبتو: يمكن ما اشتريت هيك شي لأنّو عم يمشي بعروقي دم حدا بخيل و طمّيع! الزوّادة اليوم بتعلّمنا شغلتين : نساعد بس نكون قادرين بلا ما ننطر مقابل أبداً و إنّو نتشارك الخيرات اللي عطانا ياها ربنا مع غيرنا و ما نكون بخلاء أو طمّيعين أبداً ! و الله يرافقكن! المصدر : صفحة Jesus My Lord

  حقيقة معدن القلوب معو حق أحد الآباء القدّيسين لما قال : "لماذا إذاً نصلّي طالبين "ليأتِ ملكوتكَ" ما دام أسر هذا العالم يُبهجنا؟! لماذا نطلب في صلواتٍ مُتكررةٍ أن يسرع يسوع بمجيء ملكوته، إن كانت كل رغباتنا وإشتياقنا تنصبّ في إطاعة الشيطان هنا أكثر من أن تنصب في أن نملك مع المسيح؟!" و كمان ليش منقول للعدرا "صلّي لأجلنا نحن الخطأة" و نحنا ما بدنا نتوب و ليش منقول "نؤمن بإله واحد" و منعبد كتير إشيا بعيدة كل البعد عن الله! صلاتنا مش ترداد كلمات و مش واجبات! يسوع بيعرف حقيقة معدن القلوب و بيعرف اذا بتعني صلاتك أو لأ... والله معكن. المصدر : صفحة Jesus My Lord

  جحا وإبنو 👳🏽‍♀️ نحنا و زغار كانو يخبّرونا قصص جحا. وحدة منن بتقول: كان جحا و إبنو عندن حمار و ماشيين بالسوق تعِب جحا طلع عالحمار و كمّلو الطريق صارو الناس يقولو ليك هالبيّ تارِك إبنو يمشي و هوّي مرتاح. بعد مسافة نزِل جحا و طلع الصبي صارو الناس يقولو ليك هالصبي شو أناني هوّي مرتاح و بيو الختيار عم يمشي. بعدين قرّرو يطلعو تنيناتن عالحمار صارو الناس يقولو شو هالعالم اللي بلا رحمة راكبين تنين عالحمار بهالشّوب. آخر شي نزلو جحا و إبنو و مشيو ماسكين حبل الحمار صارو الناس يدلّو عليهن و يقولو يا حرام عندن حمار و رايحين مشي بهالشّوب!! شو ما عمِلت ما بتخلّص من لسان الناس! اللي بدو يحكي بدّو يحكي. ما تهتّم برأي الناس اللّي ما بيعبّر إلاّ عن أخلاقهن هنّي! اهتمّ بس برأي ربّ السما و ما بتكون إلاّ مرتاح! الله معكن! المصدر : صفحة Jesus My Lord

  أُغفروا يُغفَر لَكُم بيخبرو عن بيّ تخرّب ببيتو البرّاد و كان متّكل عا إبنو يصلّحلو اياه. تطلّع فيه الشّب لاقى القصّة بدّا شغل قال لبيو: خلص منكبّو و بشتريلك برّاد جديد. جاوب البي: إنتو هالجيل شو سهل عليكن تتخلّو عن الإشيا و تبدلوها بغيرها بدل ما تجربو تصلحوها و هالشي كمان بتعملوه بعلاقتكن مع الناس! إذا حدا غلّط يتبرمو ضهركن و بتمشو بتفتّشو عا غيرو و ما بتعطوه فرصة يبرهن إنّو الشي اللي صار بيتصلّح! يسوع لما سألو بطرس: يا رب، كم مرة يخطئ إليَّ أخي وأنا أغفر له؟ هل إلى سبع مرّات؟ جاوبو: لا أقول لك إلى سبع مرات، بل إلى سبعين مرة سبع مرات! الله معكن... 🌟 المصدر : صفحة Jesus My Lord

  رشّة حبّ ❤️ "إنّ إنتظارًا واحدًا يجعلُ قلبي يخفق و هو الحب الذي سأتلقّاه و الحب الذي سأستطيع منحه". هالجملة اللي كلها حب ما فينا ما نشوف فيها لمسة قدّيسة الحب تريزيا الطفل يسوع! تريز اللي عاشت كل حياتها تا تحبّ الناس لأنها عارفة إنّو هيدي الطريق لَتوصَل للحب الأكبر يسوع المسيح مع إنّو مش كل الناس حولها كانو بينحبّو و كان لازم تضحّي كتير! يا رب يلّي بعتت تريز و القدّيسين ينشرو الحب و السلام بهالعالم أعطينا نتعلّم منّن و نفهم إنّو حبّ السما ما بينقاس و أعطينا رشّة مِنّو تزيّن حياتنا و بيوتنا لأننا بعاد كتير عنّو...🌹🌹🌹 المصدر : صفحة Jesus My Lord

  أنتم ملح الأرض! بيخبرو عن ستّ عندها عزيمة غدا قضت نهارها بالمطبخ عملت كتير إشيا. لمّا إجو ضيوفها حبّو كتير السفرة و صارو يصَورو الأطباق قد ما شكلن حلو و كانو كتير محمّسين يدوقوهن كلّن. عالعجقة و السرعة هالست اهتمّت بالشكل و نسيت أهم مكوّن اللي هوّي الملح! كل الأكل مش مملّح و كان بلا طعمة... تذكّروا شو قال عنّا يسوع: "أنتم ملح الأرض!" نحنا اللي منعطي طعمة للحياة عالأرض! هلقد وثق فينا يسوع... يا رب عطينا نكون قد هالثقة و المسؤولية الكبيرة! ❤ المصدر : صفحة Jesus My Lord

ما بتردّنا خايبين... بتتذكّرو شو صار مع زكريا و أليصابات؟ كلنا منشبهُن كتير، كلنا عنا مشاكل و صعوبات و نوايا منعتبِرها صعبة أو مستحيلة حسب ما شايفين أو حسب معايير الأرض. و لمّا ربنا يستجِبلنا أوقات ما منصدّق و الشك بيفوت عا قلوبنا إنّو مش معقول كيف صار هيك و يمكِن نتقاصَص متل زكريا تا يقوى إيماننا أكتر! بس إذا منتذكّر منيح ما كانو وحدن بالمشهد، كمان إجِت لعندُن مريم بهالفترة!! وين في نعمة من ربنا في مريم... صلّولها و اطلبو شفاعتها كل يوم... إمنا السّماويّة ما بتردّنا خايبين... و الله معكن!🌹 المصدر : صفحة Jesus My Lord

خلّي عينك عا لبنان بعيدك يا إمّي من قلبي شلتي همّي. بحبّك يا سيدة لبنان إنتي يا إم النعمة. السلام عليكي مريم لجروحي إنتي البلسم بمغدوشة نطرتي يسوع و بقانا لأمرِك سلّم. إمّ الفادي و إمّ الكون و المسكونة بأجمل لون بتوبك زنّرتينا و بفضلك رح نبقى هون. خلّي عينك عا لبنان و زوري الجايع و العطشان إنتي و كل القدّيسين أعطونا الصبر و الإيمان ينعاد عليكن و صلاة و شفاعة إمنا مريم ترافقكن كل إيّامكن🌹 المصدر : صفحة Jesus My Lord

  أكرِم أباك و أمّك بيخبرو عن إم و بي مرّة قرّرو يشوفو إبنن مين بيحبّ أكتر. قالولو: إذا الماما فاتِت عا أوضة و تخرّب الباب ما بقا فيها تطلع و البابا كمان علِق بأوضة تانية و إنت فيك تساعِد واحد بس منن مين بتنقّي؟ فكّر هالصبي و قلّن: البابا! زعلِت الإم إنّو مع كل شي بتعملّو اياه ما نقّاها... كمّل الزغير و قال: بس  ساعِد البابا هوّي عندو عِدّة بيقدِر يكسر الباب و بيخلّص الماما! ما تنسو وصيّة الربّ أكرِم أباك و أمّك اللّي بتخلق بقلب كل طفل متل هالصّبي بس في ناس بيكبرو و بينشغلو و بينسوها.... الله يخلّي كل الأهالي اللّي عم تتعب تا تحمي عيالها و يرحم اللّي سبقونا لعندو... منّك يا رب منطلب! المصدر : صفحة Jesus My Lord

وعدو رح يتحقّق "اَلْحَقَّ الْحَقَّ أَقُولُ لَكُمْ: إِنَّكُمْ سَتَبْكُونَ وَتَنُوحُونَ وَالْعَالَمُ يَفْرَحُ. أَنْتُمْ سَتَحْزَنُونَ، وَلكِنَّ حُزْنَكُمْ يَتَحَوَّلُ إِلَى فَرَحٍ." (يو 16: 20). و لا مرّة يسوع وعَد و ما وفي... كرمال هيك شو ما كانت ظروفكُن، قد ما كانت إيامكن صعبة، قد ما كنتو زعلانين و لو قد ما حسّيتو البواب كلها مسكّرة بوجهكن... وعد يسوع إلنا بالفرح بدو يتحقّق... نحنا منوثَق بحكمتَك و توقيتَك يا رب! الله يرافقكن بكل الأوقات. #خدّام_الربّ

  نقطة على السطر شاب غلب بيّو بإقناعو للدخول ع الكنيسه فلمّا إقتنع دخل، وكان الكاهن عم يوعظ فقال بختام حديثو :  "نقطه ع السطر"  وسكت ورجع كمّل القدّاس.  ومن وقتها صار هالشاب يداوم ع الإشتراك بالقدّاس، بس لمّا يرجع للبيت بيصير يبكي ويذرف الدموع.  فسألو بيّو عن السبب فقال :  «تمنّيت يوم، حطّ نقطه لحياتي الماضية وبلّش حياة جديدة ع سطر جديد ع صفحة بيضا ما فيها سواد».  الزوّادة بتقلّي وبتقلّك : الحياة تلات أقسام: ماضي حاضر ومستقبل.  إستفيد من الماضي لتعيش الحاضر ومن الحاضر لتبني المستقبل. والله معك... #خدّام_الربّ

  المؤمن هوي مسكن لله!   ١١ آب : عيد القديسة كلارا. مين يعني؟  هيّي صبيّة غنيّة تركِت كل شي و راحِت عالدّير و  ساعدِت مار فرنسيس بتأسيس رهبنة الفرنسيسكان.  عيلتها ما قبلِت إنها تترهّب و جرّبوا يمنعوها بس ما قدروا حتى إنّو من بعدها لحقتها إختها كمان و كرّت المسبحة صبايا كلن مشيوا عا طريق يسوع بالخدمة و الفقر و المحبة و التبشير.  بتقول القدّيسة كلارا إنّو المؤمن بنظرها أهم من السماوات لأنّو السما ما بتساع الربّ بس المؤمن هوي مسكن لله!  فهمِت كلارا إنّو الإنسان هيكل للروح القدس و إنّو ربنا إختار يسكن فينا الشي اللي كتار منا بعدُن ما عم يعيشو عا أساسو و مفكرين حالن منفصلين عن الله!  ينعاد عا كل صبيّة حاملة إسم كلارا و صلاتها معكن! المصدر : صفحة Jesus My Lord

  قدراتن ما إلها حدود ! بينصّ القانون باليابان عا عقوبة بتوصل للحبس ٥ سنين لكل إنسان بيقلّل من قيمة شخص من ذوي الإحتياجات الخاصّة! هالناس الحلوين ما بدّن قانون تا يفرض إحترامن بس قلّة وعي المجتمع و تعاملو معهن بطريقة مش حلوة فرض هالشي!  هيدا باليابان أمّا عِنّا فأبسط حقوق هالأشخاص المميّزين بعد ما حصلو عليها.  وين ما كنتو بهالدني، إن كان في قانون لهالموضوع أو ما كان فيه لازم كل واحد مِنّا يحافظ عا خَينا اللي بيعبّر بطريقة مختلفة و يحبّو و يساعدو يتأقلم بمطرح يمكن غريب عليه و كلنا إيمان إنّو ذوي الإحتياجات الخاصة ربنا عاطيهن وزنات يستثمروها، ما توقفوا بوجه طموحاتن و تقرّروا عنّن حدود قدراتن!  يا ربّ أعطينا نكون سمعان القيرواني بحياة كل فرد منّن منلتقي فيه... والله معكن! المصدر : صفحة Jesus My Lord

  مفتاح السعادة بيقول غاندي :  "السّعادة هي عندما يكون ما تعتقدُه وما تقولُه وما تفعلُه في تناغم." قصدو يقول إنّو لما تكون بتفكّر بشي و بتحكي شي تاني و بتتصرّف عا أساس شي تالت رح تتعَب!  سرّ السّعادة بالحياة هوّي بساطتها و نكون أشخاص صادقين أقوالنا بتعكُس تفكيرنا و تصرّفاتنا بتترجِم التنين متل ما هنّي!  مفتاح السعادة هوي القُرب من الله لأنو معو كل الأفكار بتصير واضحة و الروح القدس بيلهمنا الكلمات و تصرّفاتنا بتصير مبنيّة عا فكرة إنّو نخاف نزعّلو مش نخاف منو! الله يرافقكن و مواهب الروح القدس تملّي حياتكن و الفرح يغمُر بيوتكن! المصدر : صفحة Jesus My Lord

  الربح الحقيقي معايير الربح و الخسارة معروفين. بالتجارة إذا بعت أغلى من ما إشتريت بتكون ربحان و إذا العكس خسران. بالـ basketball إذا سجّلت نقط أكتر من اللي ضدّك بتكون ربحتو. بالركض إذا بتسبق اللي ضدّك بتكون ربحت. وغيرا وغيرا... بس يسوع اللي إجا عالأرض قلب كل المقاييس و المفاهيم بيقول إنّو إذا خسرت كل شي و ما بقى إلك إلاّ قلبك و محبّة الربّ ما بتكون خسرت شي بالعكس إبتسم يا صديقي ربح الأرض باقي عالأرض بس الربح الحقيقي هوي مفتاح السما  و الله معكن... #خدّام_الربّ

موهبة بتسند عيلة لما عرفت كاترين، مراهقة عمرها ١١ سنة، إنّو ملايين من الناس، بمختلف أنحاء العالم، بيعطشوا وما بيقدروا يشربوا وإنّو ببعض الأحيان الصبايا متلها ما بروحوا على المدرسة ليأمنوا الميّ لعيلتن، قرّرت هي وإختها إنّو يستعملوا مواهبن بصنع أشكال بالورقة (origami) ويبيعوهم حتّى يساعدو هالأشخاص.  وهيدا للي صار، مع كل الأرباح للي حصلوا عليها، تم حفر بير بأفريقيا، والهند والمكسيك والبيرو وبعض المناطق بالولايات المتحدة. لو قد ما بتكون زغير وحاسس حالك ما بتقدر، ما تنسى الله شو حطّ فيك.  إنت قادر إنّك تستخدمن للخير، لمساعدة قريبك ولتمجيد الله. المصدر : صفحة Jesus My Lord

الصلاة من الجوانِح انسَألوا مجموعة أشخاص أيمتى بيصلّوا؟  الأجوبة كانت مختلفة.  مثلاً: بس يصير معي شي، بس بدي أطلب من الله يساعِدني، الأحد بالقدّاس، عالأعياد و المناسبات، بس كون زعلان...  أقلّ نسبة قالوا: كل يوم!  بيقول البابا شنودة التالت:  "الصّلاة ليست مجرّد طلب فقد يصلّي الإنسان ولا يطلب شيئاً، إنّما يتأمّل جمال الله و صِفاته المحيية للنّفس، هكذا صلاة التسبيح والتمجيد أسمى من الطلب." فيك تصلي تا تشكر الله عا نِعَم بحياتك، فيك تصلي بس لأنّك حابِب تحكي مع ربنا شو ما كان الموضوع، فيك تصلي تا تتأمّل بعظمتو بكل مخلوقاتو، فيك تصلّيلو بس لأنّك بدّك تقلّو إنّك بتحبّو!  الصلاة من الجوانِح اللّي حافظة طريق السما بتوَصّلَك لفوق بلا ما تطلُب! الله معكن! المصدر : صفحة Jesus My Lord

كل ما أجّلنا كل ما غرقنا بيخبرو عن إمّ أخدِت إبنها مشوار بالطبيعة و فكّرت تعلمو درس مهم.  طلبِت منّو يقطُف عشبة زغيرة من الأرض، راح الصبي و لقاها شغلة كتير هينة بعدين طلبِت منو يقبَع شتلة شوي أكبر كمان ما لاقى مشكلة أبدًا.  آخِر طلب كان كتير غريب، قالتلو يروح يقبَع شجرة سنديان!  قلها: مستحيل!  هيدي الشجرة قديمة كتير إلها زمان هون و جذورها متمكنين بالأرض كتير.  جاوبِت الأم: و هيك العادات البشعة بالحياة كل ما طوّلِت كل ما صار صعب نتخلّص منها!  كرمال هيك ما لازِم نتأخّر بالتوبة للرب لأنو كل ما أجّلنا كل ما غرقنا بالخطيّة اكتر! الله معكن! المصدر : صفحة Jesus My Lord

  عدالة السما جايي ٤ آب ٢٠٢٠... وقف الزمن بلبنان، الوقت من بعد هاليوم مش محسوب!  باللّحظة اللي طلع فيها الإنفجار وقّفت الأرض تبرُم و انفتحِت بواب السما تا تستقبِل وفود أطفال و شباب و صبايا و كبار بالعمر من كل المناطق ما عرفوا و لا نحنا عرفنا لهلق ليش راحوا و مين أخدُن منا...  أكيد هنّي حلوين لدرجة السما بتلبقلُن اكتر من أرض مش عارفة قيمِتهن..  هونيك الفرحة فيهن كبيرة بس هون الدموع ما نشفِت لأنّن فلّوا بدون إنذار ، ما لحّقوا يودّعوا حدا!  ناس اختفِت، ناس إنجرحِت بجسمها و بقلبها، ناس تهجّرت من بيوتها، بواب رزق تهدّمِت، أحلام تكسّرِت...ليش؟  كرمال مين؟  أسئلة كتيرة بعدها بلا أجوبة بس اللّي كلنا أكيدين منّو إنّو لو ضاعِت عدالة الأرض بزواريب المصالِح، عدالة السما جايي و مع ربنا ما بيضيع حقّ حدا...  يا رب أغمرُن بحُبّك و رحمتك و عطينا نصبُر عا رجا القيامة... آميـــــــن. المصدر : صفحة Jesus My Lord

القناعة كنزٌ لا يفنى بيخبرو عن ناس عم يتفرّجو عالسما بالليل شافوا نجمة حلوة بعيدة كتير، قالوا نيّالن الكواكب اللي قراب عليها يا ريت عِنّا متلها حدنا.  بوقت نحنا أقرب نجمة علينا هيّي الشمس اللي بدونها ما في حياة عالأرض!  تذكّروا في وحدة من الوصايا العشرة بتقول: لا تشته مقتنى غيرك!  لو بيكتفي الإنسان باللي ربنا ناعم عليه فيه و ما كان في طمع كانو الناس وفّروا عا حالن كتير مشاكل!  القناعة ثم القناعة ثم القناعة... والله معكن. المصدر : صفحة Jesus My Lord

  هيدا هوّي الحبّ! بيخبرو عن تنين إخوة بيشتغلو بالزراعة.  عندن ارضَين حد بعضن.  باللّيل واحَد من الإخوة فكّر و قال رح آخُد من الغلّات اللّي قطفتها اليوم و حطّها عند خيّي هوي بيعوزُن أكتر مني عندو عيلة و هيك صار.  رجِع عا بيتو فرحان كتير من اللي عملو و صار كل ليلة يروح ياخد من عندو يحط عند خيو و كانو غلّاتو عم يزيدو أكتر و أكتر و ربنا عم يرزقو! بليلة هوي و رايِح يعمِل نفس الشّي بيلتقي بزلمي حامل إشيا و جايي صوبو، طلع خيو!  كان عم يعمِل نفس الشي كل يوم لأنو كمان كان عم يفكّر إنّو خيي بحاجة أكتر مني!  الحب الكبير اللي جمع هالإخوة و كيف كل واحد فكر بالتاني و كان عم يجرّب يساعدو بدون ما يجرحلو مشاعرو هوي الحب اللي لازم نعيشو نحنا اليوم مع كل خي إلنا تحت هالسّما و هيدا نوع الحب اللي وصّانا فيه يسوع... والله معكن. المصدر : صفحة Jesus My Lord