الزوادة اليومية

[ حوّاء الجديدة ]  اليوم بداية الشهر المريمي، بهالوقت من السنة منكرّم مريم أكتر و أكتر ... مريم اللي غيّرت وجّ الكون، مريم اللي بيسمّوها حوّاء الجديدة بتعرفو ليش؟ حوّاء الأولى خلّت آدم يعمل أوّل خطيّة بس طلبت منّو ياكل التفّاحة بينما مريم خلّت آدم الجديد(يسوع) يعمل اوّل عجايبو بعرس قانا بطلب منها! حوّاء القديمة صدّقت الحيّة اللي بتمثّل ملاك الشرّ و من وراها خسرو الناس الجنّة بينما مريم صدّقت ملاك الرب جبرائيل و من خلالها رجع ربنا فدى البشريّة و خلّصن من الموت و عطاهن الحياة الأبديّة! مريم إنتي اللي معك إنقلبت كل المقاييس، منصلّيلك يا إمنا تزَنرِي لبنان و كل بيت فيه بتوبِك و تتشفّعيلنا عند الرب حتّى يكون بكرا أحلى و علمينا ما نيأس و ما نفقد الأمل! والله معكن... {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.} {إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}

[ لغة العيون ]   بيقول القدّيس يوحنّا التبايسي : "العين الشرّيرة تلبس منظار الشرّ فلا ترى سواء في كل شيء حتّى في أعظم القدّيسين أمّا العين البسيطة فترى جمالاً في كل مخلوق ولو كان لصّاً في لحظات إعدامه!" اليوم كل الناس حاطّين كمّامات. هالكمّامات غير إنها شكل من الوقاية من كورونا بتخبّي جزء من وجه الناس. هالوج اللي ما بقا يبيّن إذا عم يضحك، اللي ما بقا ينعرف إذا مبتسم، إذا تمتم... بس ما تنسو إنّو الكمّامة ما بتخبّي العيون اللي هنّي بوّابة القلب! العيون بيلمعو ذكا و فرح و بيضحكو و بيزعلو و بيتعبو و بيحكو كل اللغات! ما تغشكن الكمّامات! يمكن هيدي فرصة إلنا حتّى نتمرّن عا لغة العيون! يا رب منشكرك إنّو اليوم وعينا و فتحنا هديتين هنّي عيوننا! منطلب منّك يا رب تعلّمنا نشوف الناس بعيونك إنت و نحبّن متل ما إنت بتحبّن و بتحبنا!... والله معكن... {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.} {إنّ التعليقات المنشورة لا تعبر بأي شكل من الأشكال عن رأي مواقع "خدا

[ الجفاف ]   من زمان كانو الناس كل ما صار جفاف يصلّو للرب حتّى تشتّي الدني. قدّيش نحنا هلّق بجفاف من كل الأنواع؟ بلّشو من الجفاف الإقتصادي لتوصلو لأخطر نوع اللي هوّي الجفاف الروحي! خلّونا متل جدودنا بالتاريخ نصلّي، ما في إلّا الصلا بتخلّصنا! يا رب نفوسنا و حياتنا و أرضنا و بيوتنا متل حقول جافّة، إنت يا رب قادر عا كل شي، إنت رب المطر، إنت رب العطايا و النِعم، شتّي علينا من سلامك، إروينا من محبتك و رحمتك، حتّى نرجع نزهّر و نِنما... والله معكن... {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.} {إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}

[ بيوتنا كنايسنا ]  قلّو الشيطان ليسوع : أنا ربحت عليك بوقت الكورونا. قلّو يسوع : بشو ربحت؟ جاوب الشيطان : سكّرتلك كل كنايسك بكل البلاد. ضحك يسوع و قلّو : خسران و ولا يوم رح تربح. إستغرب الشيطان و سألو: بعد كل هيدا و متأمّل تربح! شو قصدك!؟ قلّو يسوع : صار عندي كنيسة بكل بيت! عدّ بيوت و عدّ كنايس! هيك فلّ الشيطان مكسور! و إنتو إذا بيتكن بعد ما صار كنيسة للرب، شو بعدكن ناطرين؟ ! ...والله معكن... {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.} {إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}

[ المساعدة مش عيب ]   بيخبرو عن زلمي عم يفلح أرضو. قاعد عا ضهر البغل وماشي بهالحقل، تفَركش البغل وصار الزلمي أنجأ مهدّى بإيد وحدة ورح يوقع ومش قادر يتوازن. مارق من حدّو شب عم يتصيّد قلّو عمّو شو صاير معك بساعدك؟ ما حطها عا حالو الزلمي وقلّو ما بني شي عم بعمل رياضة!  الزوّادة اليوم بتقلّك : مش عيب تقبل مساعدة من حدا، إذا حدا ساعدك بأي شي مش يعني إنت ضعيف أبداً، يمكن بظرف معيّن ما قدرت تتصرّف وحدك! وبتقلّك الزوّادة كمان إنّو يمكن تكون إنت مطرح الشب وتصادف حدا بحاجة إلك إسأل مرّة وتنين وتلاتة وساعد قد ما بتقدر وربنا بيكافيك!... نحنا بوقت لازم نحط إيدنا بإيد بعضنا تا نتخطّى هالصعوبات... والله معكن... {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.} {إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}

[ ما تقارن ]   بيقول أحد الكتّاب : "المقارنة هيّي الحرامي اللي بيسرق كل الأفراح". من نحنا وزغار بيقارنونا بغيرنا، ليكو شو بيشبه بَيّو، هوّي أقصر من خيّو، بعمرو إبن عمتو كان صار يحكي هوّي ما بيقول ولا كلمة، إبن الجيران أشطر منّو بالمدرسة، إبن خالتو عمل حكيم وهوّي عمل رسّام شغلتو ما بتطعمي خبز، عاطول بيكون في حدا أحسن منّك وعاطول إنت الأقل وغيرك الأكتر حتّى أوقات بتقتنع إنّو معن حق مع إنّو مش مزبوط! بتصير تسخّف أكبر إنجازاتك بس لأنّو هنّي قالو إنّو غيرك بيعمل أكتر !... بتكبر معنا هالشغلة ومع إنها بكتير محطات بحياتنا زعجتنا بس بتصير عايشة معنا ومنصير نعملها مع غيرنا بدون ما نقصد منصير نقارنن بغيرن ومنضيّع فرصة نشوفن عا حقيقتن الحلوة. الزوّادة بتقلّي وبتقلّك : ما تخلّي حدا يكسرلك صورة الله اللي فيك، ربنا عطاك ياها حتّى تعكس صورتو عالأرض وما تقبل بأقل من هيك!... ما تقارن وما تتقبّل تتقارن حتّى تفرّح وتفرح... والله معك... {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.}

[ التنمّر ]  بيخبرو عن عيلة سمك.. الأهل لونن أحمر والولاد كلّن حمر إلّا سمكة وحدة لونها أخضر. كل القرايب والجيران بيتطلّعو فيها بطريقة بشعة وبيقولو إنّو هيّي مش منّن! شو ذنبها هالزغيرة حتّى تتحمّل كل هالقساوة عا شي مش هيّي أصلاً إختارتو ولا إلها دور فيه! كم شخص حول الأرض بيتعرّض لهالنوع من المعاملة بس لأنّو ما بيشبه المحيط اللي هوّي فيه؟ كم طفل صار ما بدّو يروح عالمدرسة لأنّو رفقاتو بيتنمّرو عليه كرمال لون بشرتو؟ كم عاملة خدمة منزلية بتتعذّب و بتنهان بكلمات بعيدة كل البعد عن الإنسانيّة؟ وغيرها من الأمثلة اللي ما بتخلص... الزوّادة اليوم بتذكّرنا : إنّو الله خلقنا كلنا عا صورتو ومثالو، مين نحنا لنقيّم مخلوقاتو ونصنّفن ونتجبّر عا مشيئتو!؟ يا رب أنصر كل مظلوم وكون رفيق كل شخص تَرَكو المجتمع وحيد و نوِّر قلوب وعقول الكل تا يفهمو إنّو كلنا أخوة تحت سما وحدة... والله معكن... {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.} {إنّ التعليقات المنشورة لا تعبر بأي شكل من الأشكال

[ شو غيّر فيك كورونا؟ ]  غمضو عيونكن لثواني... تخايلو للحظة إنّو هلق راح خطر كورونا ووقفو كل التدابير ورجعت الحياة لطبيعتها! فتحو عيونكن هلّق وصلّو بكل أمل ورجا! يا رب إنت بتعرف قدّيش ناطرين هاللحظة! قدّيش تعبنا من الكمّامة والكفوف والزربة بالبيت والخوف عاللي منحبّن وتعقيم أقل غرض قبل ما يفوت عالبيت وياكلنا الهَم إذا عطسنا أو سعلنا أو وجعنا راسنا ونقعد نتذكّر اليوم شو وإذا نمرة سيارتنا بتسمح نروح نجيب غراض ونتحرقص الأحد بوقت القدّاس قاعدين بالبيت! صار الوقت نقيّم حالنا ونشوف هالتجربة شو غيّرت فينا؟ صرنا ناس أحسن أو لأ؟ يا رب بيقولو إنّو الدهب بيمتحنو بالنار، نحنا هلّق بنصّ النار، عطينا يا رب نطلع منها دهب وما تخلّي ضعفنا يغلبنا!... يا رب تشفي كل شخص انصاب بالفيروس وترحم كل شخص إنتقل من بيناتنا بسببو وتحمي كل الباقيين... الرب يتقبّل منكن... والله معكن... {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.} {إنّ التعليقات المنشورة لا تعبر بأي شكل من الأشكال عن رأي مواقع "

[ غيرة مار جرجس ]   بيخبرو إنّو مار جرجس بعد ما توفّى بَيّو راح هوّي وإمّو وإختو عا فلسطين وكان وقتها الحاكم إسمو يسطس. أخدو للقدّيس وعلّمو تربية مسيحيّة وفوّتو عالجيش وعلّمو الفروسيّة وكان مار جرجس عم يتعلّم بسرعة وما بيخاف أبداً حتّى صار مسؤول عن ٥ آلاف جندي وشريك بحكم فلسطين! بعدين بس توفّى يسطس إجا مار جرجس عا صور بلبنان! حتّى يحكي مع الإمبراطور بعدّة إشيا. بس ما حب أبداً اللي شافو هون. كل الناس بتعبد الأصنام والإمبراطور عم يهبّط الكنايس وعم يفلّل المسيحيّين من أشغالن. عصّب مار جرجس وخزّق منشور كاتبو الإمبراطور وبيضطهد فيه المسيحيين وهون بلّشو يؤذوه إلو حتّى الشهادة! كرمال هيك لقّبو "أمير الشهداء"... الزوّادة بتقلّي وبتقلّكن : اليوم عم نحتفل بعيدو وقدّيش نحنا بحاجة لروحيتو وغيرتو عالكنيسة و الرب.... ينعاد عاللي حاملين إسمو... والله معكن... {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.} {إنّ التعليقات المنشورة لا تعبر بأي شكل من الأشكال عن رأي مواق

[ مدرسة التواضع ]   مين مِنّا ما بيعرف القدّيسة الأم تريزا دي كالكوتا و قدّيش ساعدت ناس و قدّيش ساهمت بإمكانيّات كتير قليلة بتفرّح قلوب كتيرة! هيّي اللي رفضت تحضر حفل جايزة نوبل و طلبت المصاري يروحو للفقرا، هيّي اللي كانت تتقاسم أكلاتها مع أي حدا بتلتقي فيه، هيّي اللي سافرت عا آخر الدني تا تجيب مساعدات، هيّي اللي بلّشت من الهند وصارت قدّيسة للعالم كلّو! بتعرفو قدّيش كان حقّو توبها الأزرق اللي بتشوفوه بالصور؟ دولار واحد بس! تياب رخاص عا جسم شخص قلبو بيِسوا كنوز وجواهر العالم كلّو! منصلّي أنا وياكن للرب يسوع : يا رب علّمنا التواضع، علّمنا نحبّ ونخدم بعضنا، علّمنا نقشع أكتر من المظاهر، علّمنا نعرف نفوت عالقلوب ونقرا من العيون ونحبّ من قلب لقلب بدون ما نهتَم بأي شي تاني... والله معكن... {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.} {إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}

[ حوض الزهور ]   بيخبرو عن جدّو ختيار زارع حد بيتو حوض زهور ملوّنين حلوين كتير. كلّن مزروعين بذات التراب وبيسقيهن نفس المَي وقد بعضن، وكلّن بيرشّن دوا حشرات قد بعضن. في نهار وعي لاقى وحدة من الزهرات دبلانة والباقيين كلّن مفتّحين و ماشيين منيح. إستغرب بالأوّل بعدين فكّر وقال : هالزهرات متل الناس كلّن عايشين عا نفس الكوكب، كلّن خَلَقُن نفس الرب، كلّن عا صورتو ومثالو، بيحبّن كلّن، بس هنّي مِنّن بيزهرو عالأرض وبيبقى عطرن حتّى بعد ما يفلّو ومِنّن بيصيرو يابسين وما كأنّن إجو! منتذكّر سوا مثل الزارع : "خَرَجَ الزَّارِعُ لِيَزْرَعَ زَرْعَهُ. وَفِيمَا هُوَ يَزْرَعُ سَقَطَ بَعْضٌ عَلَى الطَّرِيقِ، فَانْدَاسَ وَأَكَلَتْهُ طُيُورُ السَّمَاءِ. وَسَقَطَ آخَرُ عَلَى الصَّخْرِ، فَلَمَّا نَبَتَ جَفَّ لأَنَّهُ لَمْ تَكُنْ لَهُ رُطُوبَةٌ. وَسَقَطَ آخَرُ فِي وَسْطِ الشَّوْكِ، فَنَبَتَ مَعَهُ الشَّوْكُ وَخَنَقَهُ. وَسَقَطَ آخَرُ فِي الأَرْضِ الصَّالِحَةِ، فَلَمَّا نَبَتَ صَنَعَ ثَمَرًا مِئَةَ ضِعْفٍ"... والله معكن... {نرجو ممن يرغب بإضافة تعليق، صيا

[ العنف الأُسَري ]   بيخبرو عن زلمي ومرتو كبار بالعمر. سألها الرجّال : دخلك مرق عيدك السنة وأنا ما تذكّرت؟! قالتلو لأ! قلها : كيف؟ إنتِ عيدك بشباط وصرنا بنيسان، صايرة عم تنسي يا مرا. قالتلو لأ! إستغرب هالزلمي لدرجة إقتنع إنّو مغلّط! قامت قالتلو : تاريخ حبّك إلي هوّي تاريخ ميلادي، يعني كل يوم! الزوّادة بتقلّي وبتقلّكن : عم نسمع كتير إنّو العنف الأسري عم يزيد مع الحجر المنزلي وإنّو نسبة النساء المعنّفات صارت عالية كتير. كيف هيك؟! معقول ما عم تشوفو بغير بلاد كيف ناس عم تموت وحدها بالمستشفيات عم تتمنّى حدا من عيلتها يشدّلها عا إيدها؟ ما عرفتو قيمة إنّو عِيَلكن معكن والحمدالله الكل صحتو منيحة؟ يا رب فتّح عيون وقلوب هالناس حتّى يقَدّرو قيمة النعمة اللي هنّي فيها وخود حق كل مظلوم ورافقن و احميهن... حبّو بعضكن اليوم لأنّو ما حدا ضامن بكرا... والله معكن... {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.} {إنّ التعليقات المنشورة لا تعبر بأي شكل من الأشكال عن رأي مو

[ الرحمة الإلهيّة ]   من أقوال يسوع المسيح للقدّيسة فوستين : "أعطيكِ ثلاث طرق لتمارسي الرحمة نحو قريبك. أوّلاً بالأعمال، ثانياً بالكلام، ثالثاً بالصلاة. ففي هذه الدرجات الثلاث يكمن ملء الرحمة، وهي برهان قاطع عن حبّك لي. بهذه الأساليب تُمجّد النفس رحمتي وتُوقّرها. نعم، إنّ الأحد الأوّل من الفصح هو عيد الرحمة ولكن ينبغي أن يكون هناك أعمال رحمة." اليوم عيد الرحمة الإلهيّة منوحّد صلواتنا يا رب حتّى تغمرنا برحمتك قبل ما تجي عدالتك! إرحم يا رب كل مريض، كل موجوع، كل فقير، كل جوعان، كل خيفان، كل شخص معمي البصيرة ما عم يشوفك! إرحمنا يا يسوع يا فيض المراحم... والله معكن... {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.} {إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}

[ متل النحلة  ]  في حقيقة علميّة بتقول إنّو النحلة بتعقص مرّة وحدة وبتموت.  بتعرفو لو نحنا متل النحل يمكن كانو البشر إختفو من زمان! تخايلو يكون الإنسان بيموت كل ما "عقص" حدا تاني! يمكن بكلمة، بنظرة إستخفاف، بتصرّف... نحنا ربنا عطانا الفرصة عاطول إنّو نصلّح أغلاطنا بس ما بعرف قدّيش عم نستفيد من هالشي... كرمالن البشر عم يمشو ورا الشر أكتر!! الزوّادة بتقلّي وبتقلّكن : بدل ما "تعقصو" شو رأيكن تستعملو قدراتكن تا تعملو عسل!... "وَٱلنِّهَايَةُ، كُونُوا جَمِيعًا مُتَّحِدِي ٱلرَّأْيِ بِحِسٍّ وَاحِدٍ، ذَوِي مَحَبَّةٍ أَخَوِيَّةٍ، مُشْفِقِينَ، لُطَفَاءَ" (١ بطرس ٣: ٨...) والله معكن... {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.} {إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}

[ أعمال الرحمة ]   بيقول البابا فرنسيس بمَرسوم يوبيل الرحمة رقم ١٥ : "دعونا نعيد إكتشاف أعمال الرحمة الجسديّة: نطعم الجائع، نسقي العطشان، نُلبس العاري، نستقبل الغريب، نعتني بالمريض، نزور المسجون وندفن الميّت. ودعونا لا ننسى أعمال الرحمة الروحيّة: ننصح الشاكّ، نعلّم الجاهل، نحذّر الخاطئ، نعزّي المحزون، نغفر الإساءة، نتحمّل الشخص المزعج بصبر، ونصلّي إلى الله من أجل الأحياء والأموات". الزوّادة بتقلّي وبتقلّكن : بهالوقت ضروري نتذكّر أعمال الرحمة ونطبّقها بحياتنا مع الناس اللي ربنا حطّن بطريقنا ونصلّي حتّى تحلّ رحمتو الإلهيّة عالأرض و عا بلدنا... ارحموا من في الأرض يرحمكم من في السماء... والله معكن... {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.} {إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}

[ الصديق الحقيقي ]   بيقولو الجار قبل الدار، نحنا منقول : الصديق قبل الطريق! بس تاخد قرار بحياتك وتختار طريق تمشيه لازم تنقّي حدا يمسكلك إيدك بهالطريق، حدا إذا تفركشت ووقعت يساعدك توقف وتسند عا كتفو، حدا إذا زعلت أو تدايقِت من شي تقدر تحكيلو، حدا بس يصير معك شي حلو بيكون أوّل واحد بتفكّر تحكيه تخَبرو، حدا بيحبّك لأنّك إنت ومتل ما إنت بعلّاتك قبل حسناتك... الصديق هوّي عيلتك، بس إنت بتختارها!  اللي عندو صديق حقيقي بحياتو عندو نعمة... الزوّادة بتقلّي وبتقلّكن : إذا رفعنا عيوننا صوب السما، يسوع صديق الكل ناطرنا وأكيد هوّي أحلى رفيق لدربنا خصوصاً بهالظروف الصعبة... والله معكن... {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.} {إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}

[ لبنان في قلب الله ]   كم واحد مِنّا حلم يهاجر يأسّس حياة برّا، كم واحد مِنّا إنظلم وما أخد فرصة هون، كم حدا لو ما كان في محسوبيّات وحسابات غريبة عجيبة كان أكيد وصل لمطرح أبعد بكتير، كم مرّة كل هالأشخاص وغيرن نَدَبو حظّن إنّن خلقو بهالبلد!؟ بتعرفو؟ إيه من بين كل شي في بلاد عا كوكب الأرض ربنا حطنا هون بلبنان... لب (قلب) نان (إله)...حطنا بقلبو! بالرغم من كل شي صار وكل شي عم يصير بيبقى هالبلد الزغير نعمة... وما بينخاف عليه! الزوّادة بتقلّي وبتقلّكن : ما تخافو وصلّو وكونو أكيدين وآمنو إنّو لبنان ما بيموت، لبنان ما بينتهي، وأكيد لبنان بكرا أحلى يمكن مش بكرا بكرا بس قد ما تأخّر الفرج جايي! يا رب نحنا بقلبك وإنت بقلبنا! خلّصنا! يا إبن داوود إرحمنا !... والله معكن... {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.} {إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}

[ صلوات الأهل ]   بيخبرو عن صبيّة عم تزور هيّي ورفقاتها صليب عا راس جبل عالي شوي نزلو دموعها! سألوها رفقاتها ليش، قالتلن إنّو هيّي جايي عهالمطرح بحياتها مرتين قبل اليوم. مرّة هيّي وبَيها قبل ما يتوفّى وإختها وبتتذكّر وقتها  إنّو بَيها صار يبكي! قرّبت لحدّو قالتلو ليش عم تبكي قلها إنّو عم يصلّي، هون ربنا بيسمع كل الصلوات لأنّو الجبل عالي قريب عالسما! سألوها طيّب وأيمتى كانت تاني مرّة؟ قالتلن : تاني مرّة كان عمري ١٤ سنة هربت من البيت وجيت بالباص. قالولها : ليش؟! جاوبت : كان كل شي صعب وكل شي مسكّر بوجّي تذكّرت شو قال بَيّي وجيت صلّي كان ضروري إتأكّد إنّو ربنا سمعني!... قالولها وهلّق ليش عم تبكي! قالتلن : هلّق صرت أعرف إنّو بَيّي ما كان عم يطلب شي إلو، كان عم يصلّي تا ربنا يحمينا أنا وإختي... وبالحادث اللي صار توفّى هوّي وخلصنا نحنا بأعجوبة... الزوّادة بتقلّي وبتقلّكن : كم مرّة صلوات أهلنا حميونا وخلّصونا! يا رب تخلّي كل العيَل مجموعة والعيَل اللي أفراد منها سبقونا عالسما منصلّيلن يكونو معك.... والله معكن... {نرجو ممن ير

[ السنة كل شي غير! ]   نحنا غير، الناس كلّن غير، كنايسنا غير، ضِيَعنا غير، مدننا غير، بلدنا كلّو غير! وحدو ربنا ثابت ما تغيّر! هوّي اللي قال : "اَلسَّمَاءُ وَالأَرْضُ تَزُولاَنِ، وَلكِنَّ كَلاَمِي لاَ يَزُولُ (إنجيل لوقا ٢١: ٣٣)." اليوم التاني بعد القيامة المجيدة، اليوم بتبلّش البشارة بقيامة المسيح متل ما بلّشت بين التلاميذ و إنتشرت بالعالم كلّو وبعدا لليوم كلمتو مطبوعة فينا وبكتير من شعوب الأرض! اليوم كمان منقلكن ما تخافو وما تيأسو نحنا ولاد الرجا وربنا معنا وانشالله رح نعيّد معو سنة الجايي بكل كنايس الأرض ورح ترجع الأجراس تدِق وتحتفل بقيامتو!... والله معكن... {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.} {إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}

[ المسيح قام ]   "فَقَالَ الْمَلَاكُ لِلْمَرْأَتَيْنِ: لا تَخَافَا أَنْتُمَا، فَإِنِّي أَعْلَمُ أَنَّكُمَا تَطْلُبَانِ يَسُوعَ الْمَصْلُوبَ. لَيْسَ هُوَ ههُنَا، لِأَنَّهُ قَامَ كَمَا قَالَ." اللي بيآمن عنجد بيعرف و كلّو ثقة إنّو يسوع ما قال شي ما عملو ولا وَعَد بشي وما وِفِي فيه! قلّن رح قوم وقام! وهوّي قلنا ما تخافو وقلنا أنا باقي معكن حتّى إنقضاء الدهر وغيرها وغيرها... اللي خايف اليوم يتذكّر شو قال يسوع والأهمّ يتذكّر إنّو ربنا ما بيعمل دعايات ولا شي، ربنا بيقول الإشيا متل ما هيّي! المسيح قام حقّاً قام ونحن شهود على ذلك ورح نبقى شهود عا كل أقوالك اللي هيّي أفعال يا رب وننشرها لكل الكون!... الزوّادة بتقلّي وبتقلّكن : ينعاد عالكل بظروف أحسن إنشالله ومنصلّي تحمل قيامة المسيح قيامة و فرح وصحّة وسلام للبنان والعالم أجمع... والله معكن... {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.} {إنّ التعليقات المنشورة لا تعبر بأي شكل من الأشكال عن رأي مواقع "خدام الرب"

[ إجا الوقت ]   ( الشعب الجالس في ظلمة أبصر نوراً عظيماً ، والجالسون في كورة الموت وظلاله أشرق عليهم نور". ) متّى ٤: ١٦ إجا الوقت ظلمة الخطيّة المخيمة عالأرض تروح و يشرق نور المسيح! إجا الوقت نعرف قيمة النعمة اللي عطانا ياها يسوع بسبت النور! هوّي اللي بيعرف كل شي عَنّا وبيعرف إنّو أكتر شي بيخوّفنا الموت، مات عالصليب وغلب الموت بسبت النور تا نبطّل نخاف! إنشالله نور المسيح بيفوت عا كل بيت و بيبارك سكّانو. يا رب خلّي نورك يضوي عتمة المستشفيات الغرقانة بالأمراض خصوصا كورونا ويشفي كل موجوع. يا رب نوّر درب اللي إنتقلو من بيناتنا لعندك!... يا رب قد ما بعدنا عنّك إنت ما تتركنا وضوّي حياتنا بوجودك... والله معكن... {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.} {إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}

[ اليوم عيد الحب! ]   لأ مش مغلطين بالنهار! بالجمعة العظيمة بطّل القلب رمز الحب، صار الصليب!  محبّة يسوع إلنا هيّي اللي علّقتو عالصليب مش المسامير!  وبس قالولو إذا إنت إبن الله نزال تا نآمن فيك، قولكن اللي مشي على المَي و شفي المرضى وقوّم الموتى ما كان قادر ينزل عن الصليب؟ هوّي طلع عالصليب بإرادتو كمان مرّة بس لأنّو بيحبنا! ما مَيَّز وقال هيدا بحبّو هيدا لأ، أو هيدا بحبّو كتير وهيدا أقلّ، حتّى إنّو حب اللي ضربوه وعذّبوه وتمسخرو عليه لدرجة إنّو سامحن! بيحبنا كلنا يعني كلنا! مين ما كنّا وكيف ما كنّا، بخطايانا، بضعفنا، بخوفنا، بتعبنا... قولكن لأنّو في كورونا، يعني يسوع ما بقا يحبنا؟ بالعكس! نحنا اللي فكّرنا إنّو عقلنا البشري وذكانا وإختراعاتنا وعلمنا بيحلّو محلّ ربنا وحطّيناه عا جنب مع إنّو كل شي عنّا من عندو! الزوّادة بتقلّي وبتقلّكن : صار الوقت ترجع البشريّة لخالقها! جمعة عظيمة مباركة، الله معكن! {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.} {إنّ ال

[ الليلة السهرة مع يسوع ]   الليلة ما تعملو ولا مشروع، الليلة نسو التلفزيون والإنترنت، الليلة السهرة مع يسوع!  هوّي اللي راح عا بستان الزيتون وطلب من بطرس وإبنَي زبدى يسهرو معو. بعّد عنّن شوي وصار يصلّي  وقال : «يَا أَبَتَاهُ، إِنْ أَمْكَنَ فَلْتَعْبُرْ عَنِّي هذِهِ الْكَأْسُ، وَلكِنْ لَيْسَ كَمَا أُرِيدُ أَنَا بَلْ كَمَا تُرِيدُ أَنْتَ». بس خلّص صلا لاقاهن نايمين وعاتَبن كيف ما قدرو يسهرو معو حتّى ساعة وحدة! يا رب نحنا ما رح نغفى و باقيين معك ومنردّد معك : ليس كما نريد نحن بل كما تريد أنت بكل شي بحياتنا من أزغر تفصيل لأكبر قرار... بهالليلة عطيت تلاميذك جسدك ودمك ونحنا صرلنا فترة محرومين من هالنعمة... منصلّيلك يا رب حتّى تخلّصنا من كورونا حتّى نرجع نتوحّد معك بالقربانة!... والله معكن... {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.} {إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّ

[ يا صبر أيّوب! ]   اليوم الأربعاء من أسبوع الآلام حِمِل إسم أيّوب النبي. هالتسمية إلها عدّة أسباب أهمها إنّو الآلام اللي تحمّلها أيّوب بتذكّرنا بالآلام  اللي تحمّلها المسيح. وسبب تاني مهم كتير إنّو شخصيّة أيّوب بتفرجينا وبتأكّدلنا إنّو اللي بيتحمّل وبيصبر عالصعوبات دايماً عندو نهاية حلوة ناطرتو وإنّو قد ما طوّل الظلم والشرّ ولا ممكن يربح! في تقليد شائع بهاليوم بيجمعو المؤمنين سبع أنواع زهور بينقعوهن بمَي وبيغسلو وجهن فيهن. والزهور دلالة عالعطر اللي بيفوح منها وهالشي بترجع رمزيتو للمرأة التائبة اللي قدّمت الطيب و للنساء اللي بس راحو عالقبر أخدو معن طيب. و ليش ٧؟ بهاليوم بتقرا الكنيسة ٧ رسايل و ٧ أناجيل اللي بترمز لأيّام الخلق الستّة و لراحة الرب باليوم السابع! الزوّادة بتقلّي وبتقلّك : هاليوم غني بدلالاتو الروحيّة، دعوتنا إلكن اليوم للتأمّل والصلا وتأكّدو إنّو آخر الصبر فرح وخلاص ما تيأسو! والله معكن... {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.} {إنّ التعليقات المن

[ بحاجة لقدّيسين ]   بيخبرو الناس كتير قصص عن أعمال المكرم أبونا بشارة أبو مراد بالحرب العالميّة الأولى. كان يجمع المساعدات و يوزّعها عالمحتاجين و يجمع أكل من بيوت الأغنيا ويقدمو للجوعانين. كان يقتصد بأكلو وبلبسو ويعطي أكلاتو وتيابو للناس اللي بحاجة إلن. كان يبقى إيّام بلا أكل ووجّو أصفر حتّى يترك حصتو للولاد حتّى ما ينامو جوعانين! وكان يصلّي ويصوم ويطلب من العدرا ومن يسوع وهنّي ما كانو يبخلو عليه أبداً! الزوّادة بتقلّي وبتقلّكن : كلنا دارسين بكتب التاريخ عن قساوة هيديك الايّام عالناس. وكلنا سمعنا أشخاص عم يوصفو إيّامنا هيدي بحرب عالميّة تالتة. نحنا اليوم بحاجة للصلا وللصوم ولقدّيسين! يا رب عطينا كل واحد منّا بمحيطو وقد ما بيقدر يساعد عا طريقتو حتّى كلنا نقدر نقطع هالأزمة... والله معكن! {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.} {إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقً

[ عم نعطي ثمار؟ ]  اليوم أوّل إيّام أسبوع الآلام. منتذكّر اليوم بس يسوع لعن شجرة التين اللي بيشبهوها للشعب اليهودي لأنها خضرا بس بلا ثمر متلن لأنّن بوقتها فرجو إنّن ناس بدون إيمان ! بعدين كمّل يسوع طريقو ووصل عالهيكل وشاف التجّار فيه وقلّن : "أليس مكتوباً بيتي بيت صلاة يدعى لجميع الأمم وأنتم جعلتموه مغارة لصوص" بعدين شفي مرضى كتير خافو إنّو الناس تلحقو و تآمن فقرّرو يقتلوه! كل هالأحداث متل كأنها مراية للّي عم نعيشو اليوم! قدّيش نحنا اليوم ناس عنجد عايشين إيماننا وعم نعطي ثمار؟ أو فاضيين ومنشبه التينة اللي شافها يسوع؟ في تيّارات عم تستهدف كنيستنا اليوم، رح نخلّيها تجرفنا أو رح نواجه؟ ونحنا في تحدّيات كتير بحياتنا، مثلاً بس نشوف حدا بيشكّل خطر عا مصالحنا كيف عم نتصرّف؟ متل اليهود عم نخطّط نؤذيه أو عم نشتغل عا حالنا حتّى نتحسّن؟ وغيرها من الأسئلة اللي بتطرح حالها... تأمّلو بهالأحداث اليوم وصلّو! والله معكن... {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.

[ الكنيسة بشر مش حجر ]   تذكّرو إنّو الكنيسة بشر مش حجر! اليوم كل بيت كنيسة ويسوع متل ما فات يسوع عا أورشليم رح يفوت اليوم عا كل بيت... كبار وزغار إستقبلوه، ضوّوا شموعكن، إحملوا أغصان الزيتون... وقولولو هوشعنا يا إبن داوود! خلّصنا يا رب، خلّصنا من كورونا ومن كل الأمراض، خلّص لبنان من مشاكلو، خلّصنا من الزعل، خلّصنا من الخوف، خلّصنا من خطايانا، خلّص العيل من التفكّك، خلّص العاطلين عن العمل، خلّص الجوعانين، خلّص كل شخص عم يقول بقلبو ومن قلبو يا رب!! شعنينة مباركة للكل وإنشالله السنة الجايي منشعنن كلنا سوا ببيت الرب!  والله معكن... {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.} {إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}

[ هوشعنا يا إبن داوود ]   بتعرفو من وين إجا إسم الشعنينة؟ هاليوم اللي فيه منتذكّر دخول يسوع عا أورشليم. كلمة شعانين هيّي من أصل عبري "هوشعنا" اللي بتعني : خلّصنا! والشعب بس شاف يسوع صار يصرخلو خلّصنا خلّصنا لأنّن كانو عم يعانو من حكم الرومان اللي عذّبو كتير ناس و قَتَلو ألوف العالم. هالناس من ألفين سنة عرفو إنّو يسوع هوّي الخلاص. ونحنا بعد ألفين سنة خبرة بالحياة ما حلنا نعرف إنّو ما في خلاص إلّا بالمسيح وما في غيرو طريق للسما!؟ ليش بعدنا عم نبعد عنّو!؟... الزوّادة بتقلّي وبتقلّكن : اليوم فرصة إلنا نعيد النظر بكل حساباتنا و نتحضّر حتّى بكرا تكون قلوبنا كلها أورشليم ونستقبل يسوع فيها عن جديد! والله معكن... {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.} {إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}

[ عادلٌ هو الرب ]   بيخبرو عن بنت زغيرة أهلها توفّو بحادث سير و هيّي عايشة عند ستها. هالبنت السنة أوّل مرّة بتشارك بالشعنينة. قبل بسنين كانت تبكي وما تقبل تروح عالقدّاس لأنّو ستها الختيارة ما بتقدر تجبلها تياب جداد و شمعة مزيّنة متل الباقيين! متل هالوقت و يمكن قبل كانو الناس يبلشو shopping الشعنينة، هالسنة إنقلبت كل المفاهيم والعادات الفاضية اللي فرّغت العيد من مضمونو! هالسنة ما في مين ولادو أحلى وشفتي شو ملَبسي ولادها وهوّي شمعتو أكبر وسنة الماضية كانو تيابن أحلى... هالسنة في مساواة بين الغني والفقير و الكل... عدلك يا رب شَمَل كل سكّان الأرض وصارو كل الولاد متساويين... هالفيروس الزغير يمكن فتّح عيون كتار بعد ما كان الغرور عاميهن وعايشين عالمظاهر ورجعو لمخافة الله و لجوهر العيد... الزوّادة بتقلّي وبتقلّك : "عادل أنت أيّها الرب وجميع أحكامك مستقيمة وطرقك كلها رحمة وحق وحكم" (سفر طوبيا ٣: ٢) ...والله معك {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.} {إ

[ سرّ التوبة ]   بيخبرو عن أهل علّمو بنتن الزغيرة درس لكل حياتها!  هيّي ما عملت كارثة! هيّي أخدت لعبة إختها! قالولها أهلها إنّو ما بيكفي إذا إعتذرت وإنّو ما بيخلص الموضوع. أوّل شي بتقولي بعتذر بعدين لازم تقولي للّي زعّلتي : شو فيّي أعمل حتّى تصير أحسن؟ هيك الولد بيتعلّم يتحمّل مسؤوليّة بس يجرح حدا أو يزعّل حدا وبيعرف إنّو إذا إعتذر المشكلة اللي تسبّب فيها ما بتنحلّ ولازم يعمل شي حتّى يعوّض للشخص التاني! وهيك بس سألت إختها شو فيها تعمل حتّى تبطّل زعلانة قالتلها إنّو ترجّعلها اللعبة ومشي الحال! الزوّادة بتقلّي وبتقلّكن : نحنا اللي بطّلنا زغار وتصرّفاتنا بتؤذي أكتر بكتير من قصّة لعبة قولكن الإعتذار بيكفي؟ أكيد لأ، لازم نعمل مبادرة نجرّب فيها نْدَاوي الجرح اللي سبّبناه مع وعد صادق إنّو ما يتكرّر اللي صار!... يمكن وصلنا لهيك مجتمع لأنّو زرعو فينا إنّو كبرياءنا هوّي الأهم! يا رب عطينا نعرف نرجّع الجوهر سر التّوبة... والله معكن... {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالك