الزوادة اليومية

  إذا طرت ما تعلّي !   تخرّج شبّ من مدرسه الطيران وراح يزور ستّو مفتخر ببدلتو، مبسوط بشاراتو. وفرحت ستّو كتير كتير.  وغمرتو بفرح وإفتخار وقالتلو: - «يا تقبرني يا ستّي، أنا شايفة حالي فيك وباللي وصلتلّو.  وكتير مبسوطة كيف قدرت تنجح بدرسك وتصير طيّرجي.  بس، يا ضناي، برضاي عليك، ما تطير وإذا طرت أوعا تعلّي». إخوتي، ونحن قولكن مش هيك؟  بدنا نعمل طيّرجيي بس ما بدنا لا نطير ولا نعلّي؟ بدنا نكون مسيحيين، بس ما بدنا لا نحبّ ولا نضحّي؟ المصدر : صوت المحبّة

  إنت عمول اللي عليك و الباقي عالرب! بيخبرو عن لاعب مشهور ربِح مباراة و طلعلو جائزة شك بمبلغ كبير.  هوي و فالٍل من الملعب بتقرّب ست بتقلّو إنّو إبنها مريض كتير و بحاجة لعمليّة بتكلّف كتير مصاري أو بيموت.  بلا ما يفكّر قدّملها الشك اللي ربحو و راح.  تاني يوم بيقلّو شب رفيقو إنّو هالمرا طلعِت عاطول بتعمِل هيك و بستغِل الناس تا تاخد مصاري!  جاوَب اللاعب: يعني إبنها مش مريض و ما عم يموت؟ قلو: لأ!  جاوب: الحمدلله، هيدي أحلى خبريّة سمعتها! ولا مرة تفكرو إنّو فِعل الخير راح لحدا ما بيستاهَل، ولا مرّة الخير مطرحو غلط أو توقيتو غلط...  إنت عمول اللي عليك و الباقي عالرب! و الله معكن! المصدر : صفحة Jesus My Lord

  مَيل للخير و مَيل للشرّ بيقول القدّيس يوحنّا فم الذهب:  "لا يوجد إنسان بار وعادل وطاهر من الخطيئة بشكل مطلق.. من ناحيةٍ أخرى، لا يوجد إنسان خاطئ لا يملك القليل من الصلاح.. على سبيل المثال، واحد يرتكب السرقات والتخريب ولكنّه مرّاتٍ كثيرة يُبدي طيبةً ويساعد إنسانًا ما ويحزن للشرّ." كل الناس عندن جوّاتن مَيل للخير و مَيل للشرّ، الفرق بين إنسان و التاني بيصير بأي مَيل بتهتم أكتر و أي مَيل بتكبّر و بتغذّي!  يسوع عطانا الحريّة الكاملة تا نختار وين بدنا نكون... القرار إلنا بس ما تنسوا إنّو كل قرار مناخدو إلو نتايج!... الله معكن. المصدر : صفحة Jesus My Lord

  فكّر قبل ما تقرّر و تمشي بيخبرو عن مجموعة ذئاب ماشيين بالغابة، شوي واحد منّن صار يركض متل كأنّو في شي لاحقو.  قامو رفقاتو لحقوه و صارو يركضو متلو خايفين يكون في خطر وراهن و هنّي مش شايفينو!  بالآخر وصل الذئب و كمش أرنب و أكلو... وقتها عرفو إنّو هوّي كان راكض ورا الأرنب و هنّي لحقوه عالفاضي و ما طلعلن شي! و لا مرّة تلحق حدا بدون هدف واضح... ما حدا رح يحدّدلك أهداف الك كل واحد بالو بحالو... إلّا ربنا يسوع المسيح ما عندو هدف إلّا يخَلصك و يقدّملك الحياة الأبديّة و يحبّك!  فكّر قبل ما تقرّر و تمشي... الله معك! المصدر : صفحة Jesus My Lord

  النملة الزوّادة اليوم بتدعيني وبتدعيك، حتّى نتأمّل بالنملة، كيف بتعربش ع كومة الرمل وبيصير يوقع من تحتها... بتوقع، بترجع من جديد تعربش... وبترجع توقع، بس من جديد بتتشجّع بلا ما تستسلم لليأس والفشل... وهيك بيتكرّر المشهد، حتّى توصل النملة ع راس التلّة.  الزوّادة بتقلّي وبتقلّك : «مش عيب نوقع من مرّة لمرّة، العيب هوّي نستسلم لضعفنا.  إذا وقعت تحت الصليب، لازم توقف من جديد، وتكمّل مشوارك حتّى توصل لمجد القيامة». المصدر : صوت المحبّة

  شدّ عا إيدن! ببلَد أكلو ملوّث و المَي ملوّثة و الزبالة وين ما كان عم تهدّد صحّة الناس و الدّوا خالصة مدّتو أو مقطوع و الطّبابة كتير غالية مقارنةً مع معاشات الناس، مرض  السرطان عم يهدّد الكل... هالمرض اللّي ما عم يوفّر حدا لا زغير و لا كبير عم يوجّع الكل...  اليوم صلاتنا عا نية كل مريض، كل موجوع، كل شخص فقَد الأمل و استسلَم، كل عيلة عم تهتمّ بِحدا مريض، كل أهل مش عارفين إذا إبنن بيعيش لأنّو كمشة وراق إسمهن مصاري بيقرّروا هالشّي، عا نيّة كل طبيب و ممرّض/ة عم يشوفوا الوجع و مش قادرين يعملو شي، عا نية كل شخص حياتو و مستقبلو بخطَر بوقت أقلّ حقوق الإنسان هيّي الرّعاية الطبية! منصلّيلك يا رب تكون معن، تشدّ عا إيدن و تشفيهن... يا طفل المغارة ما ينحرَم حدا من نعمة الصحة... آميـــــــن. المصدر : صفحة Jesus My Lord

  هداياه غير شكل! وُلِد المسيح هللويا... وُلِد المسيح هللويا! وُلِد و جايِب معو من السما هدايا كتيرة للأرض و سكّانها!  هدايا ما بتتلاقى تحت شجرة و لا بتتثمّن بالمصاري... جايِب معو الفرح، الأمل، الرجا، الحب، السلام، العيلة المقدّسة و يوسف و مريم شفعاء دايمين إلنا، الروح القدس، الطفولة، الدفا، الصحّة و غيرها كتير... يا طفل المغارة وزّع هداياك عا كل بيوت لبنان، من أزغَر خيمة لأكبر قصر... و أغمُر هالبلد الزغير برحمتَك حتى يِبقى العيد...  منك يا رب منطلب!  عيدكُن مبارك! المصدر : صفحة Jesus My Lord

  جَمَعُن الطّفل يسوع بيخبرو إنّو بالحرب العالميّة الأولى ، كانِت حياة العسكَر مرعبة خصوصًا البريطانيّين، الفرنسيّين و الألمان.  كانو يقضّو عيد الميلاد بالخنادِق يسمعوا موسيقى قذايف و رصاص! بالـ ١٩١٤ في حدث مشهور إسمو "هدنة عيد الميلاد" وقت العسكَر البريطانيين خافوا كتير لمّا شافوا ضوّ طالِع من المُعسكر الألماني ليلة الميلاد و فكّروا إنّو جايي عليهن هجوم بس تفاجَأوا بصوت تراتيل ميلاديّة  فطُلعوا من الخنادِق و غنّوا مع "العدو" Silent Night! و تشاركوا الجيشين الأكل القليل اللّي كان معن و حتى إنّن لعبوا مباراة football سَوا!  اللّي فرّقتن السياسة و الحرب جَمَعُن الطّفل يسوع ليلة ميلادو...  عنجدّ إنّو ليلة الميلاد تُدفَن الحربُ و ليلة الميلاد يُمّحَى البغضُ!  ميلاد مجيد للكل ❤️ المصدر : صفحة Jesus My Lord

  ليلة الميلاد 🎅 بيخبرو عن شب بيحب عيد الميلاد كتير بيتحضرلو من قبل بشهر و بيضل معيّد بعد بشهر!  بلّش يحضر أفكار نشاطات للولاد و زينة و أغاني و كلّن يقولولو أوف من هلق ما بعد بكير... بس يكون الواحد عيدو بيحضر وين بدو يسهر و مين بدو يعزم و شو بدو بلبس من قبل بشهر... طيب كتير نحضر عيد الربّ من قبل بشهر!؟  يسوع بيقلنا لا تدرون متى يأتي إبن الإنسان.  لازم تضلّو دايماً جاهزين.  يا رب، بليلة عيد ميلادك نحنا حاضرين نستقبلك ببيوتنا و بقلوبنا و بحياتنا، ضلّك معنا ولا تتركنا... الله معكن! المصدر : صفحة Jesus My Lord

  الكنز الحقيقي إذا إلتفتنا حولنا، منشوف قدّيش في إشيا متعلّقين فيها ومكبّلتنا: - ما منقدر نشارك، لأنو معلّقين باللي منملكو. - منعطي ومنِندم، لأنو عيننا باللي عطيناه. - منقدّم ومنندم لأنو ناطرين ردّ جميل. يا ريت فينا نوصل لنهار نصير متل هالناسك اللي لقي حجر ثمين وإحتفظ فيه.  ولمّا قصدو مرّة شخص وشاف الحجر وطلبو منّو، قدّملوه ايّاه من دون تردّد.  وبعد كم يوم، رجع هالشخص لعند الناسك ومدّ إيدو وناولو الحجر وقلّو: - عم ردلّك اللي أخدتو منك.  بس بترجّاك إنك تعطيني بدالو، شي أثمن منو بكتير: اعطيني السرّ اللي سمحلك تتخلّى عن هالكنز بهالسهوله. الزوّاده بتقلّي وبتقلّك : اللي أثمن من العطاء هو التخلّي.  أعطينا يا رب، روح التخلّي اللي عند هالناسك، ونصير نقول اليوم وكل يوم: يا إلهي وكلّي، وحدك خيري الأعظم. المصدر : صوت المحبّة

  يسوع هوّي العيد! بيخبرو عن إم عازمة رفقات إبنها عالغدا و بالصدفة سمعتن عم يحكوا.  بيقول الأوّل قولكن جايي بابا نويل هالسنة لعنّا؟ بيرد صبي تاني بيقلّو مش أكيد لأنّو البنزين غالي و بيقول التالت يمكن ما يقدر يشتري هدايا لأنّو الدولار عم يطلع.  بيرد الرابع و ما في كهربا تا يشوف يسوق و هوّي ختيار بركي عمل حادث... ما تخلّوا واقعنا الصعب، البشع يسرق فرح العيد منكن و خصوصاً من الأطفال و يعتلوا هم إشيا أكبر منّن و تذكّروا إنّو صاحب العيد جايي شو ما كان سعر البنزين و الدولار و لو ما كان في كهربا!  يسوع جايي!  تعوا نعلّم ولادنا إنّو الهديّة حلوة بس مش هيّي العيد... يسوع هوّي العيد!  الله رفيقكن عاطول. المصدر : صفحة Jesus My Lord

شو بدنا بعد! بيخبرو عن أبونا بصف التعليم المسيحي بالمدرسة عم يعلّم الولاد تراتيل و يفسّرلن إنّو في منّن مزامير مرتّلة متل المزمور ٢٣ و طلب منّن يحفظوه للمرّة الجايي.  صار يسمّعلن وصل دور صبي بيوقف بيقول: الربّ راعي فلا يعوزني شيء و قعد.  بيسألو الأبونا ليش ما درس الباقي بيقلّو الصبي بكل براءة:  بيكفي أعرف إنّو الرب راعي و لا يعوزني شيء شو بدّي بعد!  عنجد شو بدنا بعد!  الله معنا وين ما كنّا و ما بيخلّينا نعوز شي و عاطول بيتدخّل بالوقت اللازم و بيعطينا حاجاتنا و زيادة حسب حكمتو!  بزمن العيد دعوتنا للكل نرجع للرب و نعيش معو الحب و نوثق فيه نسلمو كل شي و الله معكن... المصدر : صفحة Jesus My Lord

  هديّة العيد 🎁 بيخبرو عن ولد بعيلة فقيرة عم يحلم بهديّة عالعيد بس عارف إنّو هالشغلة صعبة تتحقّق... مرّة فات عالبيت لاقى علبة تحت الشجرة و مكتوب عليها إسمو!  فرح كتير بس لمّا فتحها بيّنت خيبة الأمل عا وجّو... كانت العلبة فاضية!  بس فيها رسالة من أهلو مكتوب فيها: نحنا منعتذر إنّو ما قدرنا نجبلك هديّة متل رفقاتك بس عبّينالك هالعلبة بَوسات و غمرات كتار! منحبّك كتير! ركض هالولد لعند أهلو و غمرن و عرف إنّو الهدية مش بقيمتها الماديّة، في ناس مجرّد وجودن بحياتنا هديّة لازم نشكر ربنا عليها كل يوم!  الله يكتّر من هالهدايا بحياتكن و الرب يكون معكن! المصدر : صفحة Jesus My Lord

مشروع لكل واحد منا! بيخبرو عن شجرة زغيرة بالغابة، قصيرة لدرجة حتّى الأرنب نط من فوقها و كل الشجرات ضحكوا عليها... كل يوم تسمع صوت مناشير و يجو العصافير يخبروها إنّو عم ينَقّوا الشجرات الكبار لصناعة السفن و هيّي تزعل لأنّو هيّي كمان بتحب تصير سفينة!  مرّة متل هالإيّام كمان سمعت مناشير و إجو الحيوانات قالولها إنّو الناس عم يختاروا شجر ليزينوهن لعيد الميلاد و كمان مرّة ما حدا إختارها و زعلت كتير... تاني سنة إجا صبي زغير و طلب من أهلو ياخد هالشجرة يزرعها بالجنينة تا تكبر و يزيّنها للعيد و هيك صار... هالشجرة فهمت إنّو الله بيحبها خلّاها تنزرع مش تنقص و عرفت إنّو مش إذا الكل عملوا شي نحنا لازم نعمل متلن مش إذا حياتنا ما بتشبه غيرنا يعني حياتنا مش حلوة!  يسوع عندو مشروع لكل واحد منّا... أوثقوا بطفل المغارة و الله معكن! المصدر : صفحة Jesus My Lord

  العذراء الصامتة المتأمّلة بيقول البابا شنودة التالت : "إنّ العذراء الصامتة المتأمّلة، درسٌ لنا؛ فليتنا مثلها: نتأمّل كثيراً، ونتحدّث قليلًا." بتذكّرنا هالجملة لمّا قال يسوع ليَكن كلامكم نعم نعم و لا لا و كل ما يزاد على ذلك فهو من الشرير!  عالمنا اليوم فيه حكي كتير و فعل قليل!  و كل ما زاد الحكي كل ما الخطيّة صار إلها مساحة أكبر !  يا رب بهالزمن المبارك، أعطينا نتعلّم من صمت مريم و نعرف بإلهام روحك القدّوس شو نقول و شو ما نقول... الله معكن. المصدر : صفحة Jesus My Lord

  التّجميل بزمن صارت عمليّات التّجميل موضة وأكتر أطبّاء بيشتغلوا بالبلد هنّي أطبّاء التّجميل، والنّاس صار همّن تجميل شكلن الخارجي، حابب أنا وإنتو اليوم، نفكّر بعمليّة تجميل داخليّة، هالعمليّة بتتطلّب تكبير لقلوبنا، شفط للبغض والحقد والضّغينة يلّي عم يحتلّوا أكبر مساحة من عقولنا، ونفخ لضمايرنا يلّي صارت هزيلة ومختيرة. الزّوّادة بتقلّي وبتقلّك : الرّب عم يطلب قلوبنا ليحبّ من خلالها، وإيدينا ليبني عالم متجدّد، وعيونّا ليشوف بنظرات جديدة، والسّنتنا لتسبيح وتمجيد إسمو، خلّينا اليوم نوقف قدّام المراية للحظات ونسأل حالنا أدّيش بعدنا محافظين على جمالنا الخارجي والدّاخلي يلّي الرّب أمّنّا عليهن، والله معكن. المصدر : صوت المحبّة

  توماس أديسون بيخبرو إنّو لمّا توماس أديسون إخترع اللمبة طلب من شب بالمكتب يجرّب الإختراع.  تلبّك كتير الشب و من كتر ما خاف وقعت اللمبة من إيدو و إنكسرت!  إستحى و زعل كتير و خاف يخسر شغلو.  تاني يوم بيرجع أديسون بيعيّطلو و بيكونو كل الموظّفين موجودين و بيرجع يطلب منّو يجرّب لمبة تانية رجع صنعها!  إستغربوا الكل و قالولو إنّو ليش إختار نفس الشخص و في إحتمال كبير يرجع يكسرها و يروح التعب عالفاضي!  قلّن أديسون : إذا إنكسرت اللمبة بتاخد معي يوم تا أعمل غيرها بس إذا ما عطيت هالشب فرصة يجرّب مرّة تانية و بقي مفكّر إنّو هوّي ما بيقدر يعمل هالمهمّة يمكن تاخد معو حياتو كلها ليرجع يبني ثقتو بحالو!  يا ريت الكل بيفكّر هيك و بيساعد الناس بدل ما ينطرن عا غلطة تا يكسرن و يدل عليهن!  من منكم بلا خطيئة فليرجمها بالحجر الأوّل... الله معكن. المصدر : صفحة Jesus My Lord

  حضارة بزمن كترت في الأبواب المسكّرة وصار النّاس مسكّرين على حالن، وعايشين بعزلة لا بيشوفوا حدا ولا حدا بيشوفن، خلّينا نفكّر بحضارة تانية إسمها حضارة المفاتيح، ومش حيلّا مفاتيح، بيقولوا مفتاح التّمّ لقمة، مفتاح الأذن نغمة بس الأهمّ مفتاح القلب كلمة. الزّوّادة بتقلّي وبتقلّك : لازم نفكّر بكلماتنا قبل ما نقولن، ونفكّر إذا هالكلمات رح بيكونوا مفاتيح للقلوب أو أساسات لبناء جدران بيننا وبين الآخرين، خلّينا نفكّر، أكيد كتار هنّي الكلمات يلّي ما رح نقولن، والله معكن. المصدر : صوت المحبّة

  ما تحكموا عالناس! بيخبرو عن زلمي ختيار ما بيحب عيد الميلاد و لا شي بيذكرو فيه!  ما بيحب الزينة و الأغاني و عجقة العيد و بيعيّط عالولاد إذا ضحكوا عالعالي... متل كأنّو حاطط قانون الفرح ممنوع و العيد ممنوع.  كل الجيران كانو يقولو هالزلمي شو سئيل بس هنّي ما بيعرفو إنّو هالختيار خسر إبنو بحادث سيّارة ليلة العيد كرمال هيك عم يتصرّف بهالطريقة...  ما تحكموا عالناس و عالمظاهر، لا تدينوا كي لا تدانوا و انشالله الطفل يسوع ما بيترك حدا زعلان بهالعيد و بيفوّت أمل و رجا عا بيوت الكل و بيمحي الحزن من العيون و القلوب و بيداوي كل الجروح... الله معكن. المصدر : صفحة Jesus My Lord

  فرصة جديدة! من أقوال الطوباوي كارلو أكوتيس عن الحياة عالأرض : "الحياة هديّة لأنّه طالما أنّنا في هذا العالم، يمكننا زيادة أعمالنا الصالحة.  فكلّما كانت أعلى، نتمتّع أكثر بالفرح الأبديّ مع الله." خلّونا نتأمّل بهالكلمات الحلوين و نخلّيهن يكونو شعارنا بالحياة اليوم و كل يوم و كل ما واجَهنا صعوبة نتذكّرن بيساعدونا!  و لا مرة تنسوا إنّو كل ما يسوع وعّانا من النوم بيكون عم يعطينا فرصة جديدة نعمِل شي حلو و نكنُز كنوز بالسما... نهار جديد، رجا جديد، فرصة جديدة! الله يرافقكن... المصدر : صفحة Jesus My Lord

  الحياة مش سبق! بيقولو إنّو تا تربح بلعبة الشطرنج ما فيك عاطول تقرّب حجارك لقدّام أوقات لازم ترجع كم خطوة تا تشوف أحسن و تاخد قرار أحسن.  و الحياة مش سبق اللي بيوصل قبل بيربح!  مش غلط يسبقوك الناس لقدّام، أوقات أحسن ترجع لورا، تعيد حسابات و تفكّر، بتصير الإشيا أوضح إلك! بهالوقت من السنة هوّي وحدة من المحطّات اللي لازم نوقف فيها شوي و نعمل تقييم لكل شي مرق و نفكّر بالخطوات الجايي و نطلب من الطفل يسوع يجيب للكل معو نِعَم و فرح و أمل و رجا و حبّ و حكمة تا نقدر معو نكمّل الطريق و نوصل للسما! الله معكن.. المصدر : صفحة Jesus My Lord

  قلوبنا متل الفخار بيخبرو عن زلمي بدو يعلّم إبنو درس، عندو عجينة الفخار و عندو صحن فخار مسِك الصّحن و كبّو عالأرض انكسر ١٠٠ شقفة و حمِل العجينة و كبّها عالأرض ما صرلها شي! ما فهِم الصبي بالأول، بعدين قلو بيّو: قلوبنا متل الفخار، إذا كانو قاسيين بينكسرو بسهولة بس إذا كانو ليّنين و بيسامحو ما بينكسرو مع الظروف... يا يسوع إسكن بقلوبنا و ما تخلّيهن يقسو قد ما كانت صعبة المواقِف، وحدَك مصدر قوتنا! الله معكن... المصدر : صفحة Jesus My Lord

  ما فيك ما تسامح من أقوال أحد الآباء :  "من لا يتسامح مع عيوب الآخرين يكسر جسرًا قد يحتاج يومًا أن يعبره فالكل يحتاج إلى التسامح." لمّا بدّك تقسّي قلبك و ما تسامح الناس، ما تستغرب إذا حدا ما سامحك إلك و كنت بحاجة لهالشي!  بالآخر بيقول يسوع :  بالكيل الذي تكيلون به يُكال لكم. سامحوا و حبّوا الناس، الوقت قصير عالأرض و ما في شي حرزان قد ما كان كبير و مهم بعيون البشر!  لمّا يقلّك يسوع حب عدوّك و صلّيلو ما فيك ما تسامح، لمّا يقلّك يسوع إذا حدا ضربك عا خدّك برملو التاني ما فيك ما تسامح، لمّا يقلّك يسوع أنا جيت كرمال الخطأة ما فيك ما تسامح، لمّا يقلّك إذا متخانق مع خيّك روح صالحو رجاع تعا عالكنيسة ما فيك ما تسامح!!  بالنهاية اذا عنجد انت مسيحي... ما فيك ما تسامح... الله معك 🙏 المصدر : صفحة Jesus My Lord

  الفرح بيخبّروا عن إنسان ما كانت البسمة تفارق وجّو، قَصَدو أحد الأشخاص التّعبانين من السّير على دروب الحياة، وسألو شو سبب فرحك؟  وشو بتنصحني أعمل لكون إنسان فرحان؟ قلّو: عندك خمس قواعد لازم تعيشن كل يوم من إيّام حياتك.  القاعدة الأولى : حبّ ذاتك متل ما الله حبّك.  الثّانية : ما تتعب من عمل الخير.  التّالتة : سامح متل ما سامحك بيك يلّي بالسما.  الرّابعة : ما تفكّر بالشّر ولا تعمل شرّ لقريبك.  والخامسة : لازم تضلّ متفاءل ببكرا يلّي جايي. الزّوّادة بتقلّي وبتقلّك : كتار هنّي النّاس السّلبيّين يلّي رح تلتقين بحياتك اليوميّة، ما تسمح ياخدوك محلّ ما هنّي بدّن، لازم إنت تاخدن لمدرسة الرّب، هونيك بيكتشفوا سبب الفرح الحقيقي، بيفرحوا وبيخلّوا غيرن يكونوا ناس فرحانين، والله معك. المصدر : صوت المحبّة

  لشو إجا يسوع؟ بيخبّروا عن كاهن ذكي كتير خرّيج أهمّ الجامعات ومن حملة الشهادات العليا، لمّا رجع على الوطن سلّموه رعيّة زغيرة بالجبل، سكاّنها بسطاء مزارعين كنزن حب الله وحب الحياة، بلش هالكاهن يشتغل بالرعيّة بكلّ فرح وحطّ مشروع تعليمي لأهل ضيعتو، فتح مدرسة، بلّش يعلّم الكبار والزغار وشوي شوي بلّشت الرعيّة تنشهر وأخبارا تنتشر بكلّ الأبرشيّة.  لبيوم من الإيّام قرّر صاحب السّيادة يزور الرعيّة، وتفاجأ من التحوّل يلّي صاير بالرعيّة، بنهاية زيارتو الرعويّة بيسأل خادم الرعيّة عن السّبب، قلّو بكلّ بساطة من يوم يلّي عيّنتني بالرّعية وأنا عم إتأمّل بهالكلمات:  «يسوع ما إجا ليعلّم النّاس بناء الكنائس والمعابد الضّخمة، إجا ليعمل من قلوب النّاس كنيسة ومن حالو مذبح وذبيحة، ومن الفكر والعقل كاهن خادم لأبسط البسطاء وأفقر الفقراء».  الزّوّادة بتقلّي وبتقلّك : شو حلو نردّد مع القدّيس أغسطينوس: كلّ ما لدي هو منك، كلّ ما أملك هو منك، عطيني فضيلة التّواضع لحتّى دوب بخدمة مشروعك الخلاصي وهيك من خلالي أنا الخاطئ بتعمل المعجزات، والله معكن. المصدر : صوت المحبّة

  من جيل لجيل! من الصلوات اللي كتبتها القدّيسة تريزيا الطفل يسوع:  "أيّها الطفل الصغير، يا كنزي الوحيد، إنّي أستسلم إلى نزواتك الإلهيّة، ولا أريد فرحاً آخر غير أن أجعلك تبتسم إطبع فيّ نعمتك لكي يرى الملائكة والقدّيسون، في يوم ولادتي في السماء".  كانت تتأمّل بطفولة يسوع كتير و عاشت كل حياتها عم تحلم تلتقي فيه و تفرح معو.  هالزغيرة فتّشت عا يسوع الزغير تَتشارك معو كل شي حتّى فرح السما!  نحنا يا رب بهالزمن المجيد، منتذكّر إنّك جيت و صرت طفل متل ولادنا و منصلّيلك ترافقن و تحميهن تا يكبروا و يكبر إيمانن معن و تبقى الرسالة مستمرّة من جيل لجيل... مِنّك يا رب منطلب. المصدر : صفحة Jesus My Lord

الدركي والصليب الأحمر 🚑 بيخبرو عن دركي عم ينظّم السير بشارع و عجقة كتير. شوي بيسمع زمّور سيارة صليب أحمر. ركض يطلب من السيّارات يوقفو عا جنب تا تمرق بس في زلمي ما كان يزيح حتّى إنّو الدركي صرّخ عليه بس بقي معنّد!  بس يكون إنسان بين الحياة و الموت قدّيش سخيف بيصير السبب اللي إنت مستعجل كرمالو...  فكّر لو حدا بتعرفو بهالإسعاف و حدا ما كان يمرّقن...  الزوّادة اليوم تحيّة لقوى الأمن و لشباب و صبايا الصليب الأحمر.  الله يحميكن و يعطيكن القوّة تكملوا رسالتكن الإنسانيّة! الله معكن... المصدر : صفحة Jesus My Lord

  قائد السفينة الله معكن...  بيخبّروا عن رجّال مولع بالبحر وبالمغمرات البحريّة، إشترى سفينة شراعيّة ووظّف عندو قبطان وبحّارة من الأشطر ومن أصحاب الخبرة العالية بعالم البحر، وصار يسافر من بلد لبلد ومن جزيرة لجزيرة يتحدّى كلّ العواصف والأخطار؛ بيوم من الإيّام وبعد رحلة طويلة بتسألو مرتو:  «يا رجّال ما بتخاف من البحر ومن العواصف والتيارات ويمكن المسارات المجهولة؟»  جاوبها بكلّ بساطة:  «مرّات كتيرة بتعترضنا العواصف، للحظات بحس إنّي تايه مش عم أعرف وين الطّريق، بس ولا مرّة خفت لأنّي بعرف قبطان السفينة». الزّوّادة بتقلّي وبتقلّك : حياتي وحياتك هنّي أشبه بسفينة عم تعبر بحر الحياة بتعترضها تجارب وعواصف كتيرة.  نيالنا إذا ما خفنا لأنّو الرّب هوّي القبطان يلّي عم بيقود سفينتنا وأكيد رح بوصّلها لبرّ الأمان، والله معكن. المصدر : صوت المحبّة

يسوع ما بخوّف! بعيد البربارة بتتبدّل وجوه الزغار و الكبار بيتنكُروا حتى نتذكّر أساس هالعيد و أهمّيتو و اللّي صار مع القدّيسة بربارة اللي إضطهدوها كرمال إيمانها المسيحي.  ما تِلبسوا وجوه بتخوّف، يسوع ما بخوّف و هوي جوهَر كل أعيادنا!  خلّي هالعيد يكون فرصة إلنا نفسّر لولادنا ليش عم نتنكّر و ليش عم ناكل قمح، ما تقبَلوا يتفرّغ العيد من معناه و يتحوّل لمظاهِر بلا مضمون!  بربارة مباركة و انشالله بينعاد عالجميع بالصحة و السلام و الأمان و الإيمان! المصدر : صفحة Jesus My Lord

  نؤمن بإله واحد... بيقول مار أنطونيوس الكبير :  "من لا يعرف الله لا يعرف شيئًا و لو كانت له علوم الدنيا بأسرها و من لا يملك الله لا يملك شيئًا و إن كانت له كنوز الدنيا كلّها." نحنا اللي بس نصلّي قانون الإيمان منقول :  نؤمن بإله واحد... خالق السماء و الأرض كل ما يُرى و ما لا يُرى يعني هوّي اللي خالق العلوم و الدني و الكنوز كيف معقول نتخلّى عنّو كرمالن!! تأمّلوا الفِكرة اليوم و كل يوم و الله يكون عاطول معكن! المصدر : صفحة Jesus My Lord

  نعم نعم أو لا لا بيخبرو عن حمار عم يتمشّى بالغابة لاقى جلد أسد ناسيينو الصّيادين قام لِبسو و صار فرحان كيف ما يمشي الكل عم يخاف منو.  عجبِتو الفكرة و تحمّس كتير حتّى إنّو نسي حالو و ضحِك عا صوت عالي و ساعِتها الكل عرف إنّو هوّي الحمار!  الزوّادة بتقلّنا اليوم قد ما الناس لِبسو وجوه و جرّبو يتخبّو، الحياة و المواقِف كفيلة تكشُف حقيقة الكل!  كرمال هيك دعانا يسوع نكون حقيقيّين و واضحين و طلَب منا يكون كلامنا نعم نعم أو لا لا و بس! الله معكن... المصدر : صفحة Jesus My Lord