الزوادة اليومية

  الشكل الخارجي ما بيعبّر عن المضمون بيخبرو عن ملك شايف حالو كتير و كان في خبير بالمملكة كتير شاطر و الكل بيستشيرو.  قرّر الملك يسألو عن شغلة بس لما شاف شكلو غيّر رأيو و قال كيف معقول نصيحة منيحة تجي من حدا هلقد بشع!  قام الخبير قلّو : مولانا إذا بتسمحلي إسأل سؤال.  قال الملك: إسأل.  قلو الخبير: حضرتك بشو بتخزّن النبيذ؟  جاوب الملك: ببراميل خشب متل كل الناس.  قلو الخبير: معقول ملك عظيم متلك يخزّن نبيدو متل كل الناس بخشب مش ببراميل ذهب!  قال الملك: معك حق و أمر ينقلو النبيذ عا براميل ذهب.  بعد فترة انتزع النبيذ، عصّب الملك و بعت ورا الخبير و صار يصرّخ... قلّو الخبير: الشكل الخارجي ما بيعبّر عن المضمون شوف براميل الذهب كيف فيهن نبيذ منزوع و شوف نوعية النبيذ ببراميل الخشب العادي "البشع"... تعلّم الملك درسو منيح و عيّن الخبير مستشارو! المصدر : صفحة Jesus My Lord

  صيانة فوريّة!  ﻟﻔﺖ إﻧﺘﺒﺎﻫﻲ ﺇﺷﻌﺎﺭ ﻓﻲ ﺍﻟﻬﺎﺗﻒ ﻳﻘﻮﻝ :  ﻋﻠﻴﻚ ﺇﻓﺮﺍﻍ ﺑﻌﺾ ﺍﻟﻤﺴﺎﺣﺔ ﻷﻥّ ﺍﻟﺬﺍﻛﺮﺓ ﻣﻤﺘﻠﺌﺔ ﻭﺫﻟﻚ ﻗﺪ ﻳﺆﺩّﻱ ﺇﻟﻰ ﺗﻮﻗﻒ ﺑﻌﺾ ﺍﻟﺒﺮﺍﻣﺞ ..... ﻓﻘﻠﺖ ﻟﻨﻔﺴﻲ ﻣﺎﺫﺍ ﻟﻮ ﺃﻓﺮﻏﻨﺎ ﻣﺎ ﻓﻲ ﻧﻔﻮﺳﻨﺎ ﻣﻦ ﻣﺴﺎﺣﺎﺕ ﺯﺍﺋﺪﺓ ﻻ ﻣﻌﻨﻰ ﻟﻬﺎ ﻭﺗﺰﻋﺠﻨﺎ ﻛﺜﻴﺮﺍً ؛ ﻛﺬﻛﺮﻳﺎﺕ ﻣﺆﻟﻤﺔ ، ﻣﺸﺎﻋﺮ ﻣﺆﺫﻳﺔ ، ﻋﺎﺩﺍﺕ ﺳﻴﺌﺔ، ﺣﺴﺪ ﻭﺿﻐﺎﺋﻦ ﻭﺃﺣﻘﺎﺩ ﺗﺴﺘﻨﺰﻓﻨﺎ، ﺃﺻﺪﻗﺎﺀ ﺳﻠﺒﻴﻮﻥ، ﺯﻣﻼﺀ ﻣﺤﺒﻄﻮﻥ، ﺭﻓﻘﺎﺀ ﺳﻮﺀ، ﻋﻼﻗﺎﺕ ﺗﻀﺮ ﻭﻻ ﺗﻨﻔﻊ ، ﻭ ﻛﻞ ﻣﺎ ﻫﻮ ﻣﺰﻋﺞ ﻓﻲ ﺣﻴﺎﺗﻚ.  ﺃﻟﻴﺴﺖ ﺻﻴﺎﻧﺔ ﺩﻭﺍﺧﻠﻨﺎ ﻭﺗﻨﻈﻴﻔﻬﺎ ﻣﻦ ﺍﻟﺸﻮﺍﺋﺐ ﺃﻭﻟﻰ ﻣﻦ ﺻﻴﺎﻧﺔ ﻫﻮﺍﺗﻔﻨﺎ ؟ ! والله معكن. #خدّام_الربّ

  أعطِنا خبزنا كفاف يومنا... بيخبرو عن القدّيسة الأم تريزا دي كالكوتا إنّو مرّة راحِت عا فرن لتطلب مساعدة للولاد اللي عم تهتم فيهن بالميتم.  مدّت إيدها للخبّاز تا يعطيها خبز، قام تا يخلّيها تفلّ بزقلها بإيدها!  قامت قالتلو: هيدي رح آخدها إلي و مدّت إيدها التانية و قالتلو: اعطيني  خبز لولادي.  تعجّب من إصرارها و من تضحيتها و محبتها للولاد و صار هوي المصدر الأساسي للخبز بالميتم!  ما تزعل لمّا حدا يتصرف معك بطريقة بشعة و تحمّل إساءات الناس و كون أكيد إنّو ربنا رح يعوّضك أضعاف و أضعاف حزنك و تعبك... مع طوابير الخبز و المشاهد الحزينة اللي عم نشوفها كل يوم، منصلّي مع الأم تريزا اليوم و منقول كلنا بصوت واحد: أعطِنا خبزنا كفاف يومنا... والله معكن! المصدر : صفحة Jesus My Lord

  من خسارتي بعطي! قرّرت إمرأة مكسيكيّة، لمّا ما نجحت علاقتها مع خطيبها، إنّو تعطي خاتم الخطوبة من ألماس لثنائي بيستاهلو، بدل ما تردّو أو تبيعو.  ومن بعد ما نشرت عرضها على مواقع التواصل الإجتماعي، تلقّت قصص كتيرة.  ومن بين كل القصص اللي وصلتلها، إختارت تعطي الخاتم لشب وصبية اتحدّوا مشاكل وعراقيل كتيرة ليكفّوا مشوارهم سوا. الزوّادة بتقلّي وبتقلّك : خلّينا اليوم نتعلّم من هالمرأة، اللي رغم خسارتها قرّرت تعطي أغلى ما عندها لتفرّح قلوب تانية ونجرّب نعطي من ذاتنا ونوصّل سلام الربّ للقلوب المحتاجة. المصدر : صوت المحبّة

  الله كبير! بيخبرو عن بنت زغيرة سألت أهلها قديش الله كبير؟  كان مارق نسر بعيد و عالي بالسّما قالولها: قديش كبير هالنسر؟ قالتلن: كتير زغير قد النقطة!  بعدين أخدوها عا جنينة الحيوانات و وقفو قدّام قفص النسر و سألوها نفس السؤال: قديش كبير هالنسر؟  قالتلن: كتير كتير كبير!  قالولها إنّو الإنسان بيشوف الله حسب ما يكون قريب منو!  كل ما تقرّبنا منو كل ما حسّينا فيه أكتر و كل ما بعدنا عنو يمكن ما مننتبه لوجودو مع إنّو هوي ثابت ما بيتغيّر!  إخوتي اليوم، بذكرى تطويب الأخ أسطفان نعمة، أحد سفراء لبنان بالسما، كلنا مدعوين نرجع لحد يسوع و نتخبى تحت جناحاتو من عواصف هالدني و نصلّي للبنان تا يضلّ قريب من الله و الرب يردّ عنو كل شر!  الله كبير و رحمتو كبيرة، وحدو قادر يخلّصنا! المصدر : صفحة Jesus My Lord

  وحدو الثّابت بهالدني! بيخبرو عن شب راح عالصّيد بجبل بعيد بيشوف زلمي عم يحفر بالأرض كل مطرح شوي بيقلو يا عمّ ليش عم تحفر بهالجرد؟ بدّك ساعدك؟  قلّو الزلمي: كنت مخبّي ذهب بالتراب و ما عم لاقيهن بقا!  جاوب الشّب: كان لازم تحطّ شي علامة تا تعرف وين!  قلو: حطيت! كان في غيمة رمادية فوق المطرح... الزوّادة اليوم بتقلنا شغلتين:  ما تتّكلو عا إشيا مش ثابتة تقرّر مصيركن متل الغيمة اللي اتكل عليها الزلمي، ربنا وحدو الثّابت بهالدني!  و تاني شي: تذكّروا إنّو ما تكنزوا إلكن كنوز بالأرض لأنن ما بيدوموا متل ما ضاعوا دهبيات هالزلمي...  أحد مبارك وحلو مع يسوع❤ المصدر : صفحة Jesus My Lord

  ما عم يرد عليّي؟! كم مرة إلنا : خلص لو بدو ربنا يعطيني هالشغلة كان عطاني أو ما عم يسمعني لشو بدي ضل صلّي وأطلب، ما عم يرد عليّي، ناسيني بنص كل هالمشاكل، كيف الله بيسمح ينظلمو هلقد ولادو...؟  بيجاوبنا القدّيس مقاريوس الكبير:  "كثيراً ما يُؤخر الله أن يُعطينا ما نطلبه، وذلك لمنفعتنا، وهو يُعطينا أحياناً أشياءٌ أخرى، ويُشجعنا بها على أن نستمر في الطلب".  و بيكمِّل القدّيس يوحنا ذهبي الفم : "ثابر على الصلاة، لا تقل قد طلبت دفعة وإثنتين وثلاثة، ولم يستمع لي الرب، جاهد ولا تفارق الصلاة حتّى تجد مسألتك"...  تعو سوا نتأمّل بهالأقوال اللي أكيد إجو من خبرة هالقديسين بالإيمان...  صلوا صلوا صلوا ... الله معكن❤ المصدر : صفحة Jesus My Lord

  قلبو علينا ❤️ !  اليوم عيد قلب يسوع الأقدس.  ليش اليوم؟  قرّرت الكنيسة يكون عيد قلب يسوع الأقدس يوم الجمعة بعد الأحد الثاني بعد العنصرة و بعد عيد القربان بأسبوع حتى تذكّرنا نتأمّل بآلام و موت الرب يسوع نهار الجمعة العظيمة كرمالنا قد ما حبّنا قلبو!  و كمان نحنا مدعوين اليوم نتأمّل مش بس بموتو كمان بقيامتو من بين الأموات و بوعدو إلنا يبقى معنا بسر القربان و من خلال الروح القدس. قلبو معنا، قلبو علينا، قلبو بيحبنا!  و نحنا شو عم نعمل كرمالو؟... ينعاد عليكن... انشالله عاطول بتكونو بقلب يسوع و يسوع يكون بقلبكن! المصدر : صفحة Jesus My Lord

    الله شايفنا و عارف كل شي! بيخبرو عن صبي و بيّو عندن بقرة و ببيعو حليب تا يعيشو.  مرة شاف الصبي بيّو عم يخلط الحليب مي تا يبيع أكتر!  قلّو الصبي إنّو ما لازم يعمل هيك قام رد البي إنّو معليش ما حدا رح يعرف!  جاوب الصبي: إذا الناس ما عرفو، الله شايفنا و عارف كل شي! الزوّادة اليوم بتقلّنا : مع الطوباوي الأخ اسطفان نعمة: الله يراني... منصلّي حتى هالزوّادة الزغيرة تقدر تحرّك ضمير كل شخص مزروع الشّر بقلبو بأي موقع إن كان و ناسي إنّو الله شايفو... الله معكن! المصدر : صفحة Jesus My Lord

  حطّ كفّك "حط كفك".  كلنا منعرف هالتعبير وكلنا منستعمل هالحركة ولكن مين إخترعا وشو أصل هيدي الحركة؟  بلّشت هيدي الحركة مع اللاعبين الأميركيين "Dusty Baker" و "Glenn Burke" بآخر يوم من مباراة البيسبول، بـ ٧ تشرين الأول ١٩٧٧، لمّا "Dusty Baker" حقّق نجاح باهر ومن فرحتو وبطريقة عفوية رفع إيدو وحط " Glenn Burke " كفو.  واليوم بأكدو العلماء إنّو من خلال هيدي الحركة ممكن يتحسّن أداء فريق العمل بأي مجال كان.  فهي حركة نجاح، تشجيع وتهنئة. ونحنا اليوم خلينا نحط إيدينا بإيدين بعض لحتى نشجّع بعضنا ونمشي دايماً مع يسوع لقدّام. المصدر : صوت المحبّة

  ناطرينك يا رب❤! بيخبرو عن حاكم مدينة كان سهران و رجع عا قصرو باللّيل إنتبه إنّو واحد من الحرّاس عم يرجف من البرد و تيابو كتير رقاق قلّو مش بردان؟  جاوب الحارس: كتير بس منّي قادر إشتري تياب بتدفي ما عندي حل إلّا إتحمّل.  قلّو الحاكم: هلق بس فوت عالقصر رح إبعتلك تياب.  فرح الحارس كتير.  فات الحاكم و التهى و نسي الحارس... وعيو الصبح لقيو الحارس متوفي عالباب و حدّو مكتوب ورقة: كنت كل ليلة أتحمّل السّقعة بس وعدَك إلي يا حاكم عطاني أمل و أخد منّي إرادتي إنّي أصمد... ما تتعلّقو بأمل و وعود من صنع البشر... الناس بتنسى، الناس أوقات بيكون بدّا تساعد بس ما بتقدر و أوقات الناس ببساطة بتكذّب!  ما توثقوا إلاّ بوعد ربنا يسوع المسيح وحدو اللي وعد و وفي و فدانا عالصليب و وعدنا إنّو راجع... ناطرينك يا رب❤! المصدر : صفحة Jesus My Lord

  خايف شو بدّو يقلّو لبَيّو... بيخبرو عن شب بعتو بيّو يلِمّ البَيض من القِنّ. أخد سلّة و راح وبلّش يجمّعن.  صارو كتار كتير وما كان إلو جلادة يرجع عالبيت يجيب سلّة تانية. خلّص وبسَلتو في جبل بَيض، قال ما بيأثّر بمشي عا مهلي أحسن ما روح وإجي كذا مرّة.  هوّي وماشي تفَركش بحجر ووقع وتكسّرو كل اللي بالسلّة!  صار خايف شو بدّو يقلّو لبَيّو... نحنا هيك ربنا بعتنا عالأرض بمهمّة، طلب منّا ننشر كلمتو ونعيش المحبّة ونحب الناس ونصلّي ونعمل الخير... نحنا أوقات منختار طريق الشَرّ لأنّو الأسهل بلا ما نعذّب حالنا وبالآخر منطلع غلطانين وما منعرف كيف بدنا نواجه ربنا!... قبل كل تصرّف وكل كلمة فكرو إذا بتستحو تذكروها قدّام الرَب وحسب جواب هالسؤال تصرّفو!  والله معكن... المصدر : صفحة Jesus My Lord

  من أرض نائية... قرّر نيكولا، شاب من البرازيل، من حوالي ٨ سنين إنّو يحوّل أرضو النائية لغابة.  وهيدا للي صار.  فاليوم، صارت الأرض للي بيملكها "جنة عدن"، فيها طيور وزواحف وحشرات ومختلف أنواع الحيوانات الدابّة.  وكان الهدف الأساسي من هالمشروع إنّو بدل ما تكون الأرض كلها عمار وحجار وكآبة، تكون أرض خضرا فيها حياة. وقديش نحنا أوقات منشبه هالأرض النائية يللي منسعى نعمّر فيها أحلام متحجّرة ومننسى إنّو الرب قادر يحوّل الجفاف للي فيها لحياة، حياة أبدية. المصدر : صوت المحبّة

  إمشي جالس! بيخبرو عن سلطعون و إبنو ماشيين عالرّمل.  قال البيّ للزغير ليش هيك عم تمشي عا جنب؟ لازم تمشي جالس لقدام يا إبني!  قلو الزغير: ما بعرف! فيك تمشي قدامي تا شوف كيف؟  جرّب البي يمشي جالس قام تفركش و وقع!  حتى ما كان منتبه إنّو هوي كمان بيمشي عا جنب! الزوّادة اليوم بتقلنا :  ما تحكمو عا غيركن بإشيا ما فيكن إنتو تعملوها!  اعملو تقييم لحالكن قبل ما تصوّبو عا أغلاط أو ضعف غيركن.  عا طول شوفو قدراتكن إنتو و اطلبو من الربّ يساعدكن تطوروها و ما تتّطلعو عا غيركن كيف عايش و شو عم يعمل! ما تعيشو عنكن و عن الباقيين! الله معكن! المصدر : صفحة Jesus My Lord

  الرادار بيخبرو خبريّة مهضومة عن شب عم يقول لرفقاتو: كل يوم عم يكون في رادار عالطّريق و كل يوم بمرق من حدّو أكتر من ٤ مرّات و عم بمشي عالقانون و إلتزم بالسرعة، قولكن إذا مرة كنت مستعجل و سرعت بينسى كل المنيح القَبل و بيعملّي ظبط؟   هالشب كان عم يمزح بس مين منّا ما انحط بهيك موقف لو لمرّة وحدة؟  كم مرّة تفاجأتو بردّة فعل ناس كانو ناطرينكن عا غلطة و نسيو كل شي منيح عاملينو؟  الزوّادة اليوم بدّا تقلكن : ما تعاملوا متل ما بتتعاملو!  ما تنتقموا ما تحقدوا ما تحكموا... بيقلنا الإنجيل أحبّوا أعداءكم، إن أحببتم من يحبّكم فأي أجر لكم! الله معكن... #خدّام_الربّ

  تعو نصلّي بالأفعال! إجا شب عند أبونا قلّو:  ما عم بقدر صلّي... شو بدي أعمل!  جاوبو الأبونا : إذا شفت حدا تعبان و قادر تساعدو يرتاح ، إذا زرت حدا مريض تطمّنت عنو، إذا ساعدت فقير بشي قد ما كان بسيط هودي الإشيا كلن صلا!  أوقات ما منقدر نصلّي بالكلمات تعو نصلّي بالأفعال!... والله معكن. المصدر : صفحة Jesus My Lord

  وإنت شو بتختار؟   بيخبرو عن صاحب مكتبة ملحِد كل ما فات لعندو شخص يطلُب منو يجاوب عا سؤال و يحطّ جوابو بصندوق مسكّر.  السؤال كان نفسو للكل :  إذا طلع قرار إنّو يتخلّصو من كل الكتب بالبلد بس عندك فرصة تخلّص كتاب واحد تخلّيه معك و تعرّف الناس عليه، شو بتختار؟  صار يقرا صاحب المكتبة أجوبة الناس... شاف كتير عناوين غريبة عجيبة بس استوقفتو ورقة مكتوب عليها: الكتاب المقدّس...  حس بحشريّة إنّو شو فيه شي مميّز حتى حدا اختارو من بين كل شي في كتب بالعالم!؟  و صار يقرا فيه... ما قدر يتركو قبل ما خلّص آخر آية!  متل كأنو ورقة هالزبون فتحتلو قلبو و عيونو عالحقيقة الوحيدة بهالدني... يسوع المسيح! أوقات ربنا بيفوت عا حياتنا بطرُق ما منتوقّعها، حافظوا عهالعلاقة الحلوة مع بيّ السما، وحدو عنجد بيهتم فيك و بيختارَك من بين الكل لما حتى اللي إنت اخترتُن ينسوك... ❤ المصدر : صفحة Jesus My Lord

  خلّو الربّ رفيقكن!  بيخبرو عن شب مسافر.  كلّن عتلو همّو شو رح يعمل وحدو ببلد غريب!  و بلّشت ورشة ضبّ الشنطة.  بتعرفو شو أوّل شي حطّو بشنطو؟ لأ مش الـ passeport و لا تيابو! أوّل شي حط إنجيلو، مسبحتو، و صورة القدّيس شفيعو!  هالشب آخد معو صلوات إمّو و بركة الله، هالشب ما رح يعتل همّ إنّو رايح عا مطرح جديد ما بيعرف فيه حدا لأنّو حامل إيمانو بقلبو! إيمانك عابر للحدود و للمسافات...  يمكن الهجرة من أصعب المواقف بحياة الإنسان، و بمتل هالأوقات الصعبة ما في إلّا ربنا قادر يكون معنا بكل وقت و زمان و مكان و تحت كل السماوات!  خلّو الربّ رفيقكن، هوّي ما بيفلّ و ما بيترككن شو ما كانت الظروف... معك لا أخاف يا سيّد حياتي أنت لدربي أوفى صديق!  الله معكن... #خدّام_الربّ

  صعوبة التوبة! بيخبّر القدّيس جيروم عن قدّيش صعب الإنسان يتوب و كيف لازم يفكر تا يتخطّى عائق الخطية الواقف بينو و بين الرب! بيقول: عذوبة التفاح، بتعوّض مرارة الجذور والرّجا  إنّك تحقّق ربح بيفرّح إنت و بالسفينة بنصّ مخاطر البحر.  و بس تعرف إنّو صحّتك رح تصير منيحة ما بقا تفرق آثار الدوا و طعمتو البشعة و اللي بدو ياكل مكسّرات متل اللوز و الجوز و البندق... مجبور يكسر القشرة قد ما كانت قاسية...  هيك اللّي بدو يتقرّب من الرّب و يفرح معو لازم يتحمّل صعوبة التوبة! نهار مبارك و الله معكن! المصدر : صفحة Jesus My Lord

  الغبرة آكلة الإنجيل! من احلى أقوال و وصايا البابا شنودة التالت :  "إحفظوا الإنجيل؛ يحفظكم الإنجيل، إحفظوا المزامير؛ تحفظكم المزامير." كتار ببيوتن الغبرة آكلة الإنجيل لأنو منسي و ما حدا بيقرا فيه!  و كتار ما بيعرفو شو يعني مزامير مع إنّو منردّدن بتراتيل كتيرة بلا ما نعرف متل الرب راعي فلا يعوزني شيء و رفعتُ عينيّ إلى الجبال و غيرها... صارت الطابة بملعبكن!  شو رح تعملو؟  إفتحو أناجيلكن، الإنجيل مش كتاب تاريخ بيخبّر إشيا صارِت و خلصِت، الإنجيل كلمة حياة، كل يوم بيقلّك شي جديد مع إنّك عم تقرا نفس الكلمات!  تعرّف عالمزامير  بتتغيّر حياتك!  قرّب من يسوع بتقرّب من الحياة و الفرح و الرجا!  الله معكن و رفيقكن وين ما كنتو! وأحـــد مبـــــــارك. آميـــــــن! المصدر : صفحة Jesus My Lord

صلاتك بتحطّك بقلب الله!  من أقوال القدّيس "شربل" صلّي تا تصغي ، صلّي تا تفهم ، وصلّي تا تعيش إيمانك وتطبّق وتشهد ، صلّي تا تتحوّل لنور ، إصغِ بصلا وإفهم الحقيقة بصلا وعيش وإشهد بصلا خلّي حياتك تكون كلها صلا وخدمة.  صلّي بمخدعك بحرارة مع الربّ بتحفظ روحك وبتفتح عقلك على سرّ الله ، صلاتك الشخصية بإنفراد مع الرب بتحطّك بقلب الله ، صلاتك العائلية بحضن العيلة بتوضعك بحضن الثالوث ، صلاتك الجماعية بقلب الكنيسة بتثبتك بجسد المسيح.  + صلّي +  الإنسان اللي بيصلي بيعيش سر الوجود ، والإنسان اللي ما بصلي بالكاد موجود. #خدّام_الربّ

عليك إتّكالي، وفيك رجائي كان بادري بيو يصلّي كل يوم صلاة لقلب يسوع عا نية كل شخص طلب إنّو يذكرو بصلاتو.  تعو اليوم نصلّيها معو عن نوايا بعضنا! يا يسوع حياتي، أنت قلت:  “الحق، الحق أقول لكم، إسألوا تُعطوا، أطلبوا تجدوا، إقرعوا يُفتح لكم”...  ها أنا أقرع الباب وأسأل نعمة…(اُذكَر النّعمة).  أبانا… السلام… والمجد… يا قلب يسوع الأقدس، عليك إتّكالي، وفيك رجائي! يا يسوع العزيز إلى قلبي، أنت قلت:  "الحق، الحق أقول لكم، كلّ ما تَطلبون من أبي بإسمي، يُعطيكم إيّاه”  إنّي أطلب بإسمك من الآب السّماوي نعمة (أذكرها).  أبانا… السلام… والمجد… يا قلب يسوع الأقدس، عليك إتّكالي، وفيك رجائي. يا يسوع صديقي وكلّ ما لي، أنت قلت :  “الحق، الحق أقول لكم، السماء والأرض تَزولان وكلامي لا يزول”.  إنّي أعتمد على كلامك المنزّه عن كلّ خطأ وأطلب نعمة (أذكرها).  أبانا… السلام…. والمجد… يا قلب يسوع الأقدس، عليك إتّكالي، وفيك رجائي! صلا مقبولة للكل❤ المصدر : صفحة Jesus My Lord

  عشرة آلاف دولار!  بيخبرو عن شبّ كان يلوم اللّه لأنّو خَلَقو فقير، وما عطاه مال متل كتار من الناس، بيوم من الإيّام بيشكي همّو لجارو، وكان رجّال كبير بالعمر وبنفس الوقت كان كتير غني، قلّو: «إنت أكيد إنّو الله ما عطاك شي؟  جاوب الشبّ: «نعم»  سألو: «مين عطاك الحياة والصحّة؟»  جاوب الشبّ بسخرية:  «هيدا كلّو منّو شي».  ساعتها مسك الرجّال بإيد الشبّ وقلّو: «بتعطيني إصبعك وبعطيك بَدالو ألف دولار؟».  جاوب الشبّ «أكيد لأ».  رجع سألو الختيار:  «طيّب بتعطيني إيدك بدل ٥ آلاف دولار؟»  كمان جاوبو الشب: «لأ».  وهون قلّو الختيار:  «طيّب شو رأيك تعطيني عينك بدل ١٠ آلاف دولار؟»  جاوب الشبّ بغضب:  «إذا بتعطيني مال الدني ما بعطيك ولا أي شقفة منّي».  ساعتها بيتطلّع الرجال بهالشبّ وبيقلّو:  «ما زال هيك، ليش بتضلّك عتبان ع اللّه وبتقول منّو عاطيك شي؟» الزوّادة بتقلّي وبتقلّك: «الصحّة بتسوي مال الدنى كلها تاج ع روس الأصحّا، ما بيعرف قيمتها إلا المرضى». والله معكن... #خدّام_الربّ

  المسامير... اليوم ٨ حزيران بتحتفل الكنيسة بتذكار مسامير صليب المسيح.  بيقولو إنّو القدِّيسة هيلانة، لمَّا لقيت  صليب يسوع لقيت كمان المسامير واللّوح اللي انكتب عليه: "يسوع الناصريّ ملك اليهود".  كانو ٤ مسامير بحسب العلماء، واحد حطّتو بلجام حصان إبنها الملك قسطنطين تا يرافقو بالحرب و التاني صار ذخيرة بمدينة القسطنطينيّة و التالت انكبّ بالبحر مطرح ما كانو يغرقو السفن و المراكب حتّى ربنا يحمي المسافرين و الصيّادين و هيك صار!  أمّا المسمار الرابع بيقولو إنّو انوضَع بتاج الملك قسطنطين!  هالذخائر تباركنا و تحفظنا من الشّر بمحبة قلب ربنا يسوع المسيح و شفاعة القديسين آميـــــــن! المصدر : صفحة Jesus My Lord

  كلّه للخير الزوّادة اليوم رسالة لكل واحد منّا من البابا شنودة التالت بتقول: "أقول لكل مَن في ضيقة ردّدوا العبارات الثلاث الآتية : كلّه للخير – مصيرُها تنتهي – ربّنا موجود". بلّشوا نهاركن بهالفكرة الحلوة بيهون كل شي... الله يرافقكن وين ما كنتو. المصدر : صفحة Jesus My Lord

  الفساد السياسيّ سأل طفل والده ما معنى الفساد السياسي ؟ ؟ ؟ ؟ فأجابه : لن أخبرك لأنّك صغير وصعب عليك في هذه السنّ ولكن دعني  أقرّب الإجابة.  مثلاً أنا أصرف على البيت ... إسمي الرأسمالية.  أمّك تدير شؤون المنزل ... فهي الحكومة.  وأنت تصرف ... فيطلق عليك إسم الشعب.  وأخوك الصغير هو أملنا ...  لذلك نسمّيه المستقبل.  أمّا الخادمة التي تعمل لدينا وندفع لها أجر ... فهي القوى الكادحة.  فهل فهمت الآن .!؟  فقال له إبنه : لم أفهم كثيراً وذهب يفكّر في الموضوع  وفي الليل لم يستطع الطفل النوم فقام من فراشه قلقاً ولمّا سمع أخوه الصغير يبكي ذهب إليه فوجده بدون حفاضة وذهب ليخبر أمّه فوجدها غارقة في النوم ولم يجد والده فذهب ليبحث عنه في أرجاء المنزل فسمع صوته يلهو مع الخادمة.  فذهب إلى الفراش وفي الصباح قال لأبيه لقد عرفتُ معنى الفساد السياسي .!!  الفساد السياسي هو أن تلهو الرأسمالية بالقوى الكادحة وتكون الحكومة نائمة في سبات عميق عندها يصبح الشعب تائهاً ومهملاً ويصبح المستقبل غارقاً في القذارة ..!!!!!!! #خدّام_الربّ

  لبنان أرض القداسة! لبنان أرض القداسة، لبنان وقف الله عالأرض، لبنان اللّي قدّم قديسين للعالم كلّو :  شربل ورفقا ونعمة الله الحرديني و أسطفان نعمة و أبونا يعقوب الكبّوشي وأبونا بشارة ابو مراد...  اليوم عم يزيدو شفعائنا بالسما لأنّو منطقة بعبدات قدّمت شبّين من ولادها طوباويّين عا مذابح الكنيسة: ليونار عويس ملكي وتوما صالح. ما في خوف عا لبنان طول ما إيد الله عم تشتِغل فيه و تِجبُل من ترابو ناس ربّنا نفخ فيهن روح القداسة!  صلّوا و ما تخافوا... المصدر : صفحة Jesus My Lord

  خلّصنا و خلّص كل العالم! بيخبّر رسول قلب يسوع، القدّيس توما كرولي إنّو كان مرشد روحي لبنت زغيرة.  مرّة اجِت عم تعتِرف قالتلو إنّو كل ما تتناول بتشوف يسوع.  حتّى يتأكّد قلّها تاني مرّة بتشوفيه قوليلو بدي أطلب منّك شي و أطلبي خلاص نفس.  قالتلو الزغيرة : شو يعني خلاص نفس؟  قلها بكرا بتعرفي إنتي بس قوليلو مرشدي قلّي هيك.  بالفعل لمّا تناولِت البنت شافِت يسوع و خبّرتو شو انطلب منها، قلها يسوع إنّو كتير مبسوط من الطلب و إنّو لما تروح تعترِف رح يتحقّق طلبها.  لما اعترفِت و خلّصت بيفوت عالكنيسة زلمي عندو سُلطة و معروف عنّو إنّو ملحِد.  قرّب عند القديس توما و قلّو:  ما بعرِف كيف و ليش جيت لهون، بدّي إعترف!  و ركع هوّي اللّي ما بحياتو حدا شافو راكع أو منحني!  ساعتها فهمت الزغيرة شو يعني خلاص النفوس عن طريق قلب يسوع!  يا رب بقلبك المتواضع خلّصنا و خلّص كل العالم! المصدر : صفحة Jesus My Lord

  صلّوا، صلّوا، صلّوا! بيقول القدّيس البابا يوحنّا بولس الثاني :  "بس تصلّي المسبحة الورديّة بتكون عم تقدّم همومك لقلب يسوع الرحوم و قلب إمّو المحبّ." مين مِنّا ما عندو هموم بيفتّش عا حدا بيوثق فيه يتشاركها معو تا يخفّ ثقلها عَنّو...  اليوم عم يقلنا البابا القدّيس إنّو المسبحة بتحمل همومنا عالسما عند اللي ما عندو مستحيل، عند اللي بيحبنا لدرجة يحمل أوجاعنا عَنّا!  صلّوا، صلّوا، صلّوا!  قلب يسوع و مريم يغمركن و يخفّف وجعكن شو ما كان نوعو❤ المصدر : صفحة Jesus My Lord

  أنا معكن...!   بيخبرو إنّو مرّة القدّيسة تريزيا الطفل يسوع حلمت هيّي و نايمة إنّو رفيقتها الراهبة اللي كانت تهتم فيها هيّي و مريضة كانت عا شطّ البحر و معها شخصين ما بتعرفن.  قالولها تعي نروح مشوار بس قد منّن بخلاء و ما بدن يدفعو منيح استأجرو حمل بدل حمار و الحمل ما بيقدر يحمل تلات أشخاص عا ضهرو!  لمّا شافت هالحمل كيف مسكين و تعبان من شخصين عا ضهرو قالتلن أنا رح روح مشي و ما في شوَي وقع الحمل عالأرض من التعب...  بعدين طلع قدّامها حمل زغير ابيض مش شايفة متلو قبل قرّب منها و قدّم نفسو إلها.  هون فهمت إنّو رح يرافقها بمشوار حياتها و إنّو هيدا يسوع!  ربنا كافأها عا محبّتها لناس ما بتعرفن و تحمّلت اللي عملوه بدون ما تعترض...  الناس من هالنوع كتار بحياتنا بس يسوع عاطول حاضر تا يقلنا إننا مش لحالنا و تريز و ورداتها كمان... الله معكن! المصدر : صفحة Jesus My Lord