الزوادة اليومية

  نصيحة بـ ... تلاتة الزوّادة نصيحة بتقول : لازم تذكر ع طول تلاتة: حِب، ضحّي، وسامح. ولازم تنتبه من تلات أفعال : ما تجرح، ما تخدع، ما تخون. وما لازم تعيش مع تلاتة : الأوّل جاهل والتاني خاين والتالت متكبّر. وما تنسى تعطي الناس تلاتة : المحبة والوفا والكلمة الطيبة. وآخر نصيحة، إذا بدّك تصادق حدا، لازم يكون عندو تلاتة : الأمانة والصدق والإخلاص. المصدر : صوت المحبّة

  بداية الصوم الكبير... بالمختصر المفيد ببداية الصوم الكبير الزوّادة بتذكّرنا شو قَلنا يسوع المسيح : "وَمَتَى صُمْتُمْ فَلاَ تَكُونُوا عَابِسِينَ كَالْمُرَائِينَ، فَإِنَّهُمْ يُغَيِّرُونَ وُجُوهَهُمْ لِكَيْ يَظْهَرُوا لِلنَّاسِ صَائِمِينَ. اَلْحَقَّ أَقُولُ لَكُمْ: إِنَّهُمْ قَدِ اسْتَوْفَوْا أَجْرَهُمْ." (مت ٦: ١٦). اليوم أوّل خطوة بمشوار الصوم هالسنة، انشالله بيكون مقبول و ربنا بيستجيب و بيتقبّل كلّ أماتاتنا و الله معكن! المصدر : صفحة Jesus My Lord

  بوجه الحرب... بوقت الحرب العالميّة التانية، كان الطيران الأميركي عم يقصف إيطاليا ما قدرو يقصفو دير سان جيوفاني، لأنّن شافو راهب واقف قدّامن بالجَو فاتح إيديه تا يحمي المنطقة.  بس خلصت الحرب إجو  العسكر تا يشوفو شو صار بهالمدينة اللي ما قدرو يعملولها شي، قامو التقو ببادري بيو و صارو يصرخو هوّي اللي كان واقف قدّام الطيارات بالجو و يدلّو عليه و رجعو عا أميركا يخبرو اللي بيلتقو فيهن عن هالحدث العجيب!  هيك الرب حمي هالمدينة و هالدير بشفاعة القدّيس بيو اللي متل كتير قدّيسين بلّشو عجايبو بحياتو و كمّلو بعد إنتقالو من هالأرض!  خَبّرنا هالقصّة تا نقول إنّو ما في إلّا الصلا بتوقَف بوجه الحرب... يا رب رجّع السلام عا كل بلاد العالم و إحمي الناس من الخطر و منخصّ بالذكر حرب روسيا و أوكرانيا...  مِنّك يا رب منطلب! المصدر : صفحة Jesus My Lord

  تا نكبر و نزَهّر! بيخبرو عن صبيّة عم تقول لرفيقتها إنّو هيّي شو ما عملت ما بيظبط معها و بتحسّ إنها متل المغنطيس للمشاكل و التعب و الزعل و ليش عاطول هالضيقات بتصير معها إلها و إنّو ما بقا عندها أمل بشي.  بتقلها رفيقتها إنّو كل الناس عندن صعوبات بحياتن بس الأكيد إنّو شي يوم رح يكون كل شي منيح متل ما الواحد بس يشوف جمال الوردات بيعرف قيمة الشتي اللي مرق عليهن!  نحنا هيك إذا ربنا سمح بهالإشيا اللي بتصير معنا مش تا نزعل بالعكس تا نكتسب نضج روحي و تا نكبر و نزَهّر!  و متل ما بيقول مار إسحق السريانيّ : "بمقدار الحزن والضيقة تكون التعزية،لأن الله لا يعطي موهبة كبيرة إلّا بتجربة كبيرة." الرب يرافقكن بكل الأوقات! المصدر : صفحة Jesus My Lord

  ما بيرفض طلب لأمّو!   بتقول القدّيسة تريزيا الطفل يسوع بكتاباتها إنّو إمنا مريم تميّزت عنّا إنها ما كان فيها تغلط، كانت معصومة من الخطيّة الأصليّة بس من ميلة تانية حظها كان أقل مِنّا بكتير! ليش؟ لأنّو هيّي ما كان عندها عدرا قدّيسة تحبها متل ما نحنا عنّا!! هالقدّيسة الزغيرة عرفت قيمة وجود إمنا مريم بحياتها و حياة كل الناس هيّي اللي إختبرت نعمة شفاء بشفاعة العدرا و صار في بيناتن علاقة قويّة كتير!  كلنا مدعوّين نتقرّب من العدرا إمنا، تذكّرو يسوع ما بيرفض طلب لأمّو!  اللي ما عندو مريم بحياتو متل الصحرا اللي ما فيها حياة... المصدر : صفحة Jesus My Lord

  بيوفي و زيادة! بيخبرو إنّو ببلد بعيد صار في مجاعة و كل الناس زعلانين.  مرّة بيشوفو زلمي عم يضحك قدّ ما استغربو إنّو شو في شي بيضحّك بهالوضع فكّروه مريض و أخدوه عا مستشفى الأمراض العقليّة!  هونيك هنّي و عم يفحصوه الأطبّاء سألوه ليش كان عم يضحك قلّن: كنت عم بقرا بالكتاب المقدّس و شفت آية بتقول : "بَلْ شُعُورُ رُؤُوسِكُمْ أَيْضًا جَمِيعُهَا مُحْصَاةٌ. فَلاَ تَخَافُوا! أَنْتُمْ أَفْضَلُ مِنْ عَصَافِيرَ كَثِيرَةٍ!" (لو ١٢: ٧) الله عطاني أمل و قلّي ما خاف و هوّي بيدبّر امري و أنا و ماشي لقيت شجرة كلها فواكه قطفت منها و أخدت لولادي و رجعت قلت بروح بتسلّى عالبحر بتصيّد السمك ما ساعت سيارتي الحمولة و كيف ما بدّي أضحك و ربنا بشو ما وعدني بيوفي و زيادة!  هالإيّام صار بنظر الناس اللي بيآمن و اللي بيسلّم أمرو لربّو عندو مشكلة!  غريبين البشر كيف بيشوفو الإشيا!  انشالله الرب بيضلّ حاميكن و كافيكن و مفرّحكن، ما تهتمو بشي تاني! المصدر : صفحة Jesus My Lord

  زبطو جنينتكن! نصيحة رجّال ختيار لجيل الشباب: ما تلحقو الفراشات بالحقلة، زبطو جنينتكن و الفراشات بيجو هنّي لعندكن!  بيقصد يقول هالختيار ما تروحو تفتشو عالفرح و السلام بعيد، اشتغلو عا حالكن و ما بتلاقو إلّا السعادة و السلام الداخلي هنّي لاقو طريقن عا قلبكن!  و لا مرّة اللي بيفتّش عن الفرح برّا لاقاه، بس لمّا بيزبطّ جنينتو يعني بيزيّن حياتو بالله و بالإيمان و بالحب، وقتها رح يزهر الفرح فيه و وقتها رح يفهم الشخص إنّو هوّي اللي بيخلق الفرح بحياتو و قد ما فتّش و جرّب و شو ما لاقى و لا شي منّن بيدوم...الله رفيقكن و مصدر فرحكن عا طول. المصدر : صفحة Jesus My Lord

  وجهة نظر... 👀 بيخبرو عن مَرا قلها جوزها هودي أخواتك كتير مصلحجيّي، لمّا كنت إشتغل و كان معنا مصاري كانو يضلّو عِنّا و لمّا خفّ شغلي و ما بقا معنا قدّ قبل ما بقا شفناهن عِنّا! قال لمرتو أنا بشوفها بغير طريقة إنّو لمّا بطّل وضعنا منيح ما بقا يِجو كتير حتّى ما يحرجونا و نِضطرّ نضيّفهن إشيا يمكن ما عِنّا غيرن! الزوّادة اليوم بتقلنا : قد ما كنت متأكّد من الشغلة و شايفها كتير صحّ عا طول في وجهة نظر تانية بالموضوع!  و لا مرّة تاخدو قرار قبل ما تْكَونو فكرة عن كل وجهات النظر المتعلقة فيه... و تذكّرو إنّو  بيقلنا يسوع المسيح لا تدينوا كي لا تدانوا... أكيد كل شي في من وراه سبب يمكن عيوننا اللي عاميها الغضب مش شايفتو... الله معكن. المصدر : صفحة Jesus My Lord

  أصعب ٨ إشيا بالحياة الزوّادة بتدعيني وبتدعيكُن للتأمّل بأصعب ٨ إشيا بالحياة : - تتعوّد ع شخص وفجأة يغيب من حَدّك. - ما تتلاقا بمين يفهمك أو يحِسّ فيك. - تحب إنسان ومستحيل إنّك تشوفو. - يموت بقلبك إنسان، هوّي بعدو عايش. - تحب شخص، ما إلك مطرح بحياتو. - يكذّب عليك شخص، ومع إنّك بتعرف الحقيقة، تصدّق كذباتو لأنّك بتحبّو. - تبتسم، رغم إنّو دموعك عم تحرق عينيك. - يجبرَك الزمن ع شي، إنت ما بدّك ياه. المصدر : صوت المحبّة

  عدالة الله "حين يتعرَّض أَحدٌ ما للظُّلم وَلا ينصفه أَحد، وَلا يتكلَّم النَّاس المحيطون به عن الظُّلم الَّذي أُلحق به بسبب عدم وجود المحبّة فيهم، فحينها الله نفسه سوف يتكلّم"  (القدّيس باييسيوس الآثوسيّ) حقّك ما بيروح، حقّك محفوظ مع أكتر حدا أمين عليك و عا مصلحتك، حقّك بيحصّلّك ياه بَيّك السماوي.  ما في بَي بيقبل يشوف إبنو مظلوم و يسكت!  بس الفرق إنّو ربنا عندو طرق خاصة فيه تا يفرجي الحقيقة و الحق قد ما طوّل الوقت... تشجّع، ما تخاف من شي لأنّو الله عاطول معك! المصدر : صفحة Jesus My Lord

  فواكه و شوكولا بيخبرو عن إمّ عندها طفلين.  بوقت الأكل قدّمت لواحد منّن صحن فواكه و للتاني صحن فيه شوكولا.  اللي معو الفواكه ما قِبِل ياكل و قلها لإمّو إنّو هوّي ما بدّو تفّاح و موز بدّو بدالن شوكولا!  قالتلو إمّو أنا ما عندي إلّا هيك ما فيّي أعمل شي!  زِعِل و بلّش بدّو يبكي! قلّو خيّو:  شو رأيك نتقاسم الفواكه و الشوكولا هيك تنيناتنا بيطلعلنا من كل شي!؟  فرحت الإم بدرس المشاركة اللي تعلّموه ولادها منّن لحالن و الحلو إنّو الفكرة طلعت منّن هنّي مش هيّي اللي قالتلن ياها و هيدا شي كتير مهم.  رَبّو ولادكن يتشاركو اللي عندن، ما تعَودوهن عالأنانيّة أو عا فكرة بعطي غيري الزايد عنّي أو الشي اللي ما بحبّو أو الشي اللي ما بعوزو!  بالعكس بس تعطي شي بيعنيلك و إنت كمان عايزو هيدا العطاء الحقيقي!  تذكّرو قول يسوع المسيح : "كلّ ما فعلتموه بأخوتي هؤلاء الصغار فَبِي فعلتموه" ( متى ٢٥ : ٤٥ ) ... والله معكن. المصدر : صفحة Jesus My Lord

  We Are The Champions من يومين ربح منتخب كرة السّلة للرّجال لأوّل مرّة بتاريخو البطولة العربيّة للمنتخبات اللي كانت عم تصير بِدُبي.  هالمباراة ما كانت هَينة أبداً.  قبل ٥ دقايق كان الفرق لمنتخب تونس ١٠ نقاط و كتار فقَدو الأمل بسّ الشباب ما قِبلو يستسلمو و بِقيو يقاتلو لآخِر ثانية و عدّلُو الأرقام و ربحو!  للّي إستسلم قبل بوقت منقلّو لبنان ما بيموت لا بالرياضة و لا بغير شي و طول ما في لبناني واحد واقف عا إجريه رح يضلّ يجرّب يرجع يعيش هالوطن اللي قد ما قلنا إننا زعلانين مِنّو بس تدقّ ساعة الصفر بتلاقينا كلنا حدّو!  هالمباراة فرّحت قلب كل لبناني إن كان بلبنان أو مغترب، فقير أو غني، زغير أو كبير، شو ما كانت طايفتو أو سياستو... يا ربّ خلّيك جامع هالشعب و خلّيك مفرّح قلبن و إفتحلن طاقة فرج لأنّن بيستاهلو يضحكو!  لبنان، يا وقف الله عالأرض، ما تخاف، اللي جايي أحلى ، السما كلها معك! المصدر : صفحة Jesus My Lord

  الممثّل والكاهن بيخبرو عن رفاق تنين درسو سوا، ولـمّا قرّرو يتخصّصو، الأوّل إختار عالم التمثيل والتاني دعاه الرب ليكون كاهن. بعد سنين طويلة قرّر أصدقاء الممثّل من بعد ما صار ختيار، يعملولو تكريم، وعزمو ع الحفلة كل رفقاتو القدامى ومِنُّن الكاهن.  بعد العشا طلبو المجتمعين من الممثّل، يقرا عليهن مقطوعة شعريّة، وافق ع طلبن بس بشرط، يرجع يقرا صديقو الكاهن هالمقطوعة. إقترح الكاهن يقرو مزمور «الرب راعيّ» يلّي تنيناتُن بيعرفوه من لـمّا كانو ولاد زغار. وافق الممثّل، يلي رتّل المزمور عن الغايب بلا غلط، ولـمّا خلّص الكل زقّفولو.  ولـمّا إجا دور الكاهن أخد كتاب الصلا من جيبتو وبلّش يصلّي المزمور، لدرجة كل الحاضرين صارو يبكو.  ساعتها بيقوم الممثّل من محلّو وبيقول :  «أكيد عرفتو شو الفرق بيني وبين صديقي الأبونا، أنا بعرف المزمور عن الغايب، بس هوّي بيعرف الراعي». الزوّادة بتذكّرني وبتذكّرك : إنّو نحنا مدعوّين على طول لمعرفة الرب يلي خلقنا ع صورتو ومثالو. المصدر : صوت المحبّة

  نعمة التواضع بيخبرو عن زلمي ختيار مشهور إنّو بيعرف أمثال و حكم كتير.  طلبو منّو الجيران يعطيهن حكمة يستفيدو منها، قلّن : "القليل كثير إذا قنعت ، و الكثير قليل إذا طمعت، البعيد قريب إذا أحببت ، و القريب بعيد إذا ابغضت!" شو حلوين المعاني اللي مخبايين ورا هالكلمات... هالختيار خبّرنا عن أهميّة القناعة و عن أضرار الطمع و بنفس الوقت بيضوّي عا قوّة المحبّة اللي بتغلب بُعد المسافات و إذا غابت المحبّة كيف بيصيرو الناس اللي حدّك بالجسد بعاد و غرباء بالروح!... يا رب عطينا نعمة التواضع قد ما حقّقنا إشيا بحياتنا ما تخلّينا ننغَرّ بمجد الأرض الباطل و علّمنا نحب متلك بلا حدود و بلا ما ننطر مقابل أبداً ... والله معكن. #خدّام الربّ

  قوموا من النّوم! كل واحد منّا خلّيه يتخايل حالو نايم و عم يحلم إنّو كان عا سطح سفينة مسافر و صار فيها عطل و غرقِت و لقيت حالك بالميّ!  مش هيك بس... إجو لحدّك ١٠ أسماك قرش جوعانين!  شو بدّك تعمِل تا تتخلّص منن!؟ أوّل شغلة لازم تعمِلها إنّك توعى لأنّو هيدا كلّو حلم!  نحنا هيك بتتراكَم علينا المشاكل من كل الأنواع و الأشكال و الأوزان و منصير نجرّب حلول موقّتة ما بتفيد بشي بوقت الحلّ أسهل بكتير!  لازِم نوعى و نفهم نحنا وين و ليش نحنا هون و الأهم مين نحنا و من وين جينا!  بس نوعى و نفهم إنّو نحنا ولاد الله و إنّو هوي خلَقنا و إنّو نحنا هون مرقِة طريق تا كنّا رجعنا لعندو بيهون كل شي لأنّو هوّي رح يحمل معنا كل شي... لو كنتو حاسّين حالكن وحيدين تأكّدو إنّو يسوع معكن عاطول لو ما حسّيتو فيه... قوموا من النّوم! المصدر : صفحة Jesus My Lord

  عيد الحب! "إن قال أحد: إنّي أحبّ الله، وأبغضَ أخاهُ، فهو كاذب.  " لأنّ مَنْ لا يحبّ أخاهُ الذي أبصَرَهُ، كيف يقدر أن يحبّ الله الذي لم يُبصِره؟ ولنا هذه الوصيّة منه: أنّ مَنْ يحبّ الله يحبّ أخاهُ أيضًا" (١ يو ٤: ٢٠-٢١). اليوم بعيد "الحب" منصلّي عا نيّة كل شخص مفكّر حالو بيحبّ الله و تصرفاتو يمكن بقصدو أو مش بقصدو بتناقِض هالشّي، منصلّي عا نيّة كل شخص قلبو معتّم ما فيه مطرح لمحبة الله و الناس، منصلّي عا نيّة كل شخص بيفصِّل المحبة عا قياسو و بيشوفها بس من عيونو حتى ربنا يفرجيه إنّو المشاركة و تقبُّل الآخَر هنّي أوّل خطوة عا طريق المحبّة الحقيقية...  و بالآخِر بيبقى حبيب الكل يسوع المسيح اللّي قد ما حبّنا مات كرمالنا!  ينعاد عالكل بظروف أحسن و شفاعة القدّيس فالنتين ترافقكن عاطول. المصدر : صفحة Jesus My Lord

  شو بدكن بعد أكتر؟ بيشبّهو اللّي بيعتل همّ للّي قاعد بكرسي هزّاز، بيتحرّك بمطرحو بس ما بيوصَل لمحلّ! تذكّرو رسالة القديس بطرس:  "مُلْقِينَ كُلَّ هَمِّكُمْ عَلَيْهِ، لأَنَّهُ هُوَ يَعْتَنِي بِكُمْ." (١ بط ٥: ٧) شو بدكن بعد أكتر؟  شو ما كان همّكن هوّي حاملو عنكن و كل هالأوهام و السّيناريوهات اللي بترسموها براسكن و بتتخايلوها صعبة و معقّدة و كبيرة و الزعل اللّي عم يسكن قلوبكن كلّها عالفاضي لأنّها ببساطة ما بتوصّل لمطرح!  اتركو يسوع يتصرّف و كلّ شي بيكون منيح... انزَلو عن كراسيكن الهزّازة و بلّشو مَشي إيد بإيد مع يسوع عا درب السّما... الله يكون عاطول معكن... المصدر : صفحة Jesus My Lord

  التعبير عن الحب زوّادتنا اليوم بتدعينا إنّو ما نستحي نعبّر عن محبتنا للأشخاص اللي حوالينا.  الحب هو أساس الحياة.  إسمعو هالخبريّة : هو كان رجّال قوي وهي كانت بنت ناعمة وحسّاسة.  تزوّجو وعاشو أحلى عيشه.  صار عندهن ولاد.  كبرو وريّشو وطارو كل واحد لحياتو.  ومتل كل بيّ وإمّ، رجعو لوحدتهن اللي بلّشوا فيها حياتهن.  وهيك فقدت المرا بسمتها وصارت عايشه بوحده رهيبه، لدرجه إنّو ما عادت تترك الفرشه.  خاف زوجها عليها ونقلها ع المستشفى بركي بيلاقولها علاج للمرض اللي عم ينهش جسمها.  ولكن كل طبيب كان يفحصها كان ينفض إيديه عاجز عن إيجاد الدوا والعلاج المناسب.  آخر إختصاصي أخد الرجّال ع جنب وقلّو :  "يا حبيبي، مرتك بكل بساطة مش حابّه بقا تعيش.  ومن دون ما يقول أي كلمه، فات الرجّال ع غرفة مرتو، قعد حدّها، مسكلها إيدها اللي إختفت بإيدو الضخمه وقلّها: "إنتِ مش رح تموتي..." "ليش؟"  سألتو مرتو بصوت خفيف.  "أنو أنا بحاجه إلك" جاوبها الزوج. وبإبتسامه خفيفة وعيون فرحانه بتتطلّع فيه وبتقلّو :  "دخلك، ليش ما قلتلّي هالشي من زمان؟" ومن بعد هالحادثه تحسّنت المرا، والي

  الحبّ أقوى من السنين بيخبرو عن رجّال ياباني، قرّر إنو يرمّم بَيتو، والكلّ بيعرفو إنّو البيوت باليابان مصنوعة من الخشب.  بلّشت ورشة الترميم، بس في مشهد إستوقف صاحب البيت لـمّا شاف حَردون عالق بين الحيطَين، وفي مسمار مختِرِقلو إجرو.  تعجّب الرجّال كيف بعدو هالحردون عايش، وهالمسمار إلو حوالي العشر سنين مختِرِقلو إجرو، يعني من يوم يلي عَمَّر هالبيت.  وصار يفكّر كيف عم ياكل؟ وكيف بعدو عايش كل هالسنين؟ بيقرّر يوقّف شغل ويقعد يراقبو، لحتى يكتشف هالسرّ.  بس الإنتظار ما طال، لـمّا شاف حردون تاني حامل بتِمّو أكل وجايب لرفيقو لحتّى ياكل. الزوّادة بتقلّي وبتقلّك : «الصديق الحقيقي هوّي يلّي بيوقف حَدنا بالفرح وبالكِرِه، هوّي يلّي بيعيش كلام الرب يسوع لـمّا بيدعينا لنفرح مع الفرحانين ونحزن مع الحزنانين، ما نتخلى عنُّن عند أوّل صعوبة». المصدر : صوت المحبّة

  شو أوّل شغلة بتفتَحها الصّبح؟  هيدي حزّورة كتار بيجاوبو عليها بتَسرُّع و بيطلَع الجواب غلط، منن بيقولو باب الأوضة تا نطلَع لبرّا، منن بيقولو البرداية، منن بيقولو الشّباك، منن بيقولو التّلفون...  بوقت الجواب المزبوط أبسط من هيك بِكتير!  أوّل شي منفتَحو الصّبح هنّي عيوننا!  لازم بس نفتحُن كلّ يوم نشكر الله إنّو عطانا نعمة يوم جديد و نجرّب نكون عا قد هالمسؤولية اللّي حمّلنا ياها و نستعمِل هالنّهار الجديد لخدمتو و تا ندلّ كلّ شخص منلتِقي فيه عا ربّنا... ما تنسو إنتو و عم تشكروه تصلّبو إيدكن عا وجكن و تسلّموه نهاركن بكلّ لحظاتو و مواقفو و تقولولو: إنت يا ربّ عطيتنا هاليوم إنتَ ديرو و و باركو و تصرّف فيه... نهاركن حلو مع يسوع... المصدر : صفحة Jesus My Lord

  بوصلة حياتنا تخايلو لو كل إنسان بيكون مكتوب عا جبينو أيمتى بيفلّ من هالدني، كنتو بتعاملوهن بنفس الطريقة؟  كم شخص ندمنا إنّو ما قضّينا معو وقت أكتر ، كم شخص ندمنا إنّو ما ردّينا عا تلفونو قلنا بعدين منحكيه، كم شخص ندمنا إنّو زعّلناه و ما لحقنا نعتذر مِنّو و غيرها من المواقف اللي لو كنّا عارفين أكيد كنّا غيّرناها...  يمكن إذا منتصرّف كل يوم كأنّو آخر يوم بتصير الحياة أحلى و أصدق و كلها محبّة!  قد ما اخترع الإنسان و تطوّر و تقدّم و إشتغل عا حالو بيضلّ عقلو ما بيستوعب سر الموت بس نحنا ولاد الله أكيدين من شغلة وحدة: يسوع غلب الموت و هالشي بيكفينا تا نعيش كل يوم عا رجا القيامة!... من وقت للتاني منذكر هالموضوع مش تا نفتح جروح و لا تا نزعل، بالعكس حتّى نرجع نبَرمج بوصلة حياتنا عالإتّجاه الصحيح... و الله معكن. المصدر : صفحة Jesus My Lord

  أيمتى نسكت و ما نحكي... "كوني مُحِبَّةً للصّمت لأنّ الثّرثرة لا تخلو من الخطأ."  (بادري بيو) ما أكتر الثرثارين بهالإيّام و ما أكتر الأخطاء بحق الناس و بحق الرب!  اللي بيحكي كتير معرّض أكتر للخطيّة، بيزيد تفاصيل و إشيا مش موجودة و بيكذّب بلا ما يحسّ و بيصير مضطرّ يؤلّف كذبة تا يغطّي عا كذبة و يطوّل الحديث و يغرق بالكذب أكتر و أكتر. هالوصيّة من بادري بيو كنز!  الصمت من الصفات المشتركة عند القدّيسين من زمان لليوم... أعطينا يا رب نعرف أيمتى نسكت و ما نحكي إلّا تا نقول إشيا حلوة بترضيك! آمــــــين! المصدر : صفحة Jesus My Lord

  يا مار ميخائيل...! كلنا متّفقين إنّنا اليوم بحاجة للمساعدة!  من مين؟  من النّاس؟  حتّى لو حصلنا عليها ما بِتدوم...  ما إلنا إلاّ ربّنا هوّي خالِقنا و بيعرِف كلّ إحتياجاتنا و كيف يعطينا ياها.  وحدة من طُرُق ربنا تا يساعِدنا هنّي الملايكة مِتل ما بيقلّنا المزمور ٩١:  "لأَنَّهُ يُوصِي مَلاَئِكَتَهُ بِكَ لِكَيْ يَحْفَظُوكَ فِي كُلِّ طُرُقِكَ." (مز ٩١: ١١). تعو اليوم نصلّي لرئيس الملايكة، الملاك ميخائيل، المعروف بقوتو، كيف لأ و ربنا وَكّلو بالمعركة الأكبر اللّي هيّي مع الشّرير!  يا مار ميخائيل، رئيس الملائكة، دافِع عنّا في المعارك، كُن عونَنا ضد شرّ الشّيطان ومكامنِه، وليفرُض الله عليه سلطانَهُ.  نضرعُ إليكَ بذلك.  وأنتَ يا قائد القوّات السماويّة، إدفع إلى جهنّم، بقوّة الله، الشيطان وسائر الأرواح الشريرة التي تجوب العالم لإهلاك النفوس. آمــــــين... يا مار ميخائيل إحمينا و دافع عنا! المصدر : صفحة Jesus My Lord

ملكنا آت بمجد عظيم! ليش يا رب عم تسمح بكل هالوجع؟  كل هالمرض؟  كل هالخوف؟  كل هالجوع؟  كل هالفقر؟  كل هالتعب؟  كل هالبرد؟  كل هالموت؟  كل هالظلم؟ ليش ساكت ما بتردّ !؟  ما عم تسمع صرخاتنا؟  صوتنا مش عالي كفاية تا يوصل للسما؟  ما تنسو إنّو اذا ما عم تسمعو جوابو مش لأنّو ما ردّ، لأنّو الضجّة بحياتكن عالية كتير!  و كمان في أجوبة لأسئلتكن كلها بالكتاب المقدّس، قدّيش صرلكن ما قريتو فيه؟!  منقرا بالإنجيل آية فيها تكون واحد من  الأجوبة عالأسئلة اللي بلّشنا فيها...  "إن كنا نتألّم معه، لكي نتمجّد أيضا معه." ( رو ٨: ١٧ ) أصبروا...ملكنا آت بمجد عظيم! المصدر : صفحة Jesus My Lord

  حَكي الناس بيخبرو عن شَبّ كان يضلّ زعلان، بيوم من الإيّام سألو صديقو شو سبب حزنو وليش بيضلّو مهموم، جاوبو:  «عم بتعب من كلام الناس، كتير عم يشغلّي بالي، بدّي منك نصيحة». جاوبو رفيقو:  «عمول متلي أنا بكتب كل حكي الناس عنّي ع دفاتر... بحطها تحتي وبوقف عليها، وهيك بصير أعلى منها». الزوّادة بتقلّي وبتقلّك : «الكلام رخيص، ما تهتم لَحكي الناس، خاصّة اذا كان ما بيقدّم ولا بيأخّر». المصدر : صوت المحبّة