الزوادة اليومية

  إجعل قلبنا مثل قلبك ❤️ اليوم أوّل يوم من شهر حزيران المعروف بشهر قلب يسوع اللي بيجي بعد أيّار شهر العدرا.  الكنيسة قصدت هالترتيب تا تقلنا إنّو مريم بتوصّلنا عند يسوع...  بلّشت هالفكرة من فرنسا سنة ١٨٣٣ و بعدنا لليوم منكرّس هالشهر لعبادة قلب يسوع، هالقلب اللي كلّو رحمة و حبّ و سلام. قلبك يا ربّ، اللي منشوف حَولو بالصور إكليل الشوك، هوّي القلب اللي ضحّى كرمالنا و من خلالو عطيتنا الحياة الأبديّة! يا يسوع الوديع والمتواضع القلب، إجعل قلبنا مثل قلبك❤ المصدر : صفحة Jesus My Lord

  ممنوع توقف إلّا ما توصل! بيخبّر لاعب كرة القدم الشهير كريستيانو رونالدو بأحد التصاريح : "لمّا كان عمري ١٥ سنة كنت عم بلعب مع رفقاتي قلتلن إنّو بس إكبر بدّي صير لعّيب فوتبول كتير مشهور بالعالم كلّو... بس ضحكو عليّي!" و شوفو اليوم حقّق حلمو!  قد ما الناس قالولك ما فيك و قد ما استخفّو بأحلامك و قد ما صَوّرولك قدراتك زغيرة ممنوع تستسلم، ممنوع تتأثّر بحكي حدا أو برأي حدا... قبل كل شي إنت إبن الله اللي ما عندو شي مستحيل و الباقي تفاصيل... بس يقلّك يسوع إنّو إيمانك بيزيح جبال كيف فيك تعتل هم و تصدّق حكي الناس!؟...  صَلِّب ايدك عا وجّك، اتّكل عا الله و إمشي، إذا تعبت فيك ترتاح و ترجع تكمّل، ممنوع توقف إلّا ما توصل! المصدر : صفحة Jesus My Lord

  بعرق وجهك تأكل خبزاً بيخبرو إنّو حيوانات الغابة كل يوم بيروحو يفتّشو عا أكل إلاّ الدب بيضلّ نايم!  كل ما قالولو يروح معن بيقلّن ما إلي جلادة و لشو بدي روح ما هالشّجرة النّايم تحتها فيها فواكه كتير و كل يوم بيوقع منها كم حبّة باكلن و بنام!  بيوم من الإيام إجت عاصفة كسرِت الشّجرة و ما بقا حملِت فواكه!  بكي الدب كيف راح مصدر راحتو و صار مجبور يروح يتعب يفتِّش عا أكل تا يعيش!  الزوّادة اليوم بتذكّرنا شو قلّو الربّ لآدم:  "بعرق وجهك تأكل خبزاً" و متل ما بيقول الكتاب المقدّس : "فقال لهم: إن الحصاد كثير ولكن الفعلة قليلون"...  ما تتّكلو عا غيركن، و لا تتّكلو عالإشيا اللي بتجي عالهيّن، ما في بركة بلا تعب!  اتّكلو عا حالكن و عالرّب اللي أكيد رح يكون معكن حتى تعبكن يزهّر! والله معكن... المصدر : صفحة Jesus My Lord

  السلام عليكِ يا مريم! بيخبرو إنّو القدّيسة ماتيلدا كانت تحب كتير إمنا مريم و تحتار كيف بدّها تكرّمها.  فكّرت إنّو تألّفلها صلا حلوة  تقلّها ياها و بلّشت تجرّب و تجرّب بس ما كانت تقتنع بشي كتبتو.  بعد محاولات كتيرة ظهرت عليها إمنا مريم و قالتلها ما تزعَل و إنّو أكتر صلا  بتفرّحها هيّي "السلام عليك يا مريم"! مع قرب ختام الشهر المريمي، خلّونا كلنا سوا نفرّح مريم و نردّد الصلا الأحبّ عا قلبها... شفاعتها معكن❤ المصدر : صفحة Jesus My Lord

  حبّ اللي ما بينحبّ! مرّة القدّيسة تريزيا الطفل يسوع قدّمت نصيحة للراهبة ماري للإفخارسيا و قالتلها لمّا رح تنحطّي بموقف صعب و تكوني بمعركة بينك و بين حالك إذا لازم تحبّي الشخص اللّي قدّامك أو لأ لأنّو زعجك إفتحي كتاب إسمو "الإقتداء" بقلبو رح تلاقي فصل عنوانو : "في وجوب تحمّل أخطاء الآخرين".  أنا فادني كتير كتير و ربّحني معارك كتير.  هيك إنتصر الحب مع تريز!  مع إنّو لَو بدها تفكّر متل كل الناس بهيك مواقف كان الأسهل تبعد و تكره و تمشي و تترك كل شي وراها.  إنّك تعمل جهد تا تحبّ "اللي ما بينحبّ" قوّة مصدرها السما و قلال اللي بيختارو هالطريق! الله معكن... المصدر : صفحة Jesus My Lord

ﻳﺴﻮﻉ حاضر ﺑﺎﻟﻘﺮﺑﺎﻥ سنة ﺍلـ ١٣٣٠ ٱﻧﻄﻠﺐ ﻣﻦ أﺑﻮﻧﺎ إﻧّﻮ ﻳﺮﻭﺡ ﻳﻌَﺮِّﻑ ﻭ ﻳﻤﺸَﺢ ﻓﻼّﺡ ﻣﺮﻳﺾ ﻋﻢ ﻳﻤﻮﺕ.  ﺑﻴﺮﻭﺡ ﻫﺎﻷﺑﻮﻧﺎ ﻭ كان ﻣﺴﺘﻌﺠﻞ ﻛﺘﻴﺮ ، ﺑﻴﺠﻴﺐ ﻗﺮﺑﺎﻧﺔ ﻣﻘﺪّﺳﺔ ، ﺑﻴﺤﻄﻬﺎ ﺑﻴﻦ ﺻﻔﺤﺎﺕ ﻛﺘﺎﺏ ﺍﻟﺼﻼ يلّي ﻣﻌﻮ ﺑﺪﻭﻥ أﻱ إﺣﺘﺮﺍﻡ ﻭ ﺑﻴﺮﻛﺾ ﻋﻨﺪ ﺍﻟﻔﻼّﺡ.  ٱﻋﺘَﺮﻑ ﺍﻟﻔﻼّﺡ ﻭ لمّا إﺟﺎ ﺍﻷﺑﻮﻧﺎ ﺑﺪّﻭ ﻳﻨﺎﻭﻟﻮ ﻓﺘﺢ ﺍﻟﻜﺘﺎﺏ ، ﺑﻴﻼﻗﻲ ﺍﻟﺼﻔﺤﺎﺕ يلّي ﺑﻴﻨﺎﺗﻦ ﺍﻟﻘﺮﺑﺎﻧﺔ ﻛﻠُّﻦ ﺩﻡ !  ﻫﻮﻥ ﺑﻴﺰﻋﻞ ﻛﺘﻴﺮ ﻣﻦ ﺣﺎﻟﻮ ﻭ ﺑﻴﺮﻛُﺾ ﻋﻨﺪ ﺭﻳّﺲ ﺍﻟﺪﻳﺮ ﻳﺨﺒﺮﻭ ﺷﻮ ﺻﺎﺭ ﻣﻌﻮ ...  ﺑﻴﻌﻄﻴﻪ ﺍﻟﺮﻳّﺲ ﺍﻟﻐﻔﺮﺍﻥ ﻭ ﺑﻴﺎﺧﺪ ﻣﻨّﻮ ﺍﻟﺼﻔﺤﺎﺕ يلّي ﺑﻌﺪُﻥ ﻟﻠﻴﻮﻡ ﻣﻌﺮﻭﺿﻴﻦ ب دﻳﺮ ب ﻛﺎﺳﻴﺎ ﺿﻴﻌﺔ القدّيسة ﺭﻳﺘﺎ.  الزوّادة بتقلّي و بتقلكن :  هيدي الأعاجيب هي تا ما ننسى آنّو ﻳﺴﻮﻉ إﻟﻪ ﺣﻲّ ﻭ ﻣﻮﺟﻮﺩ ﺑﺎﻟﻘﺮﺑﺎﻥ ﻭ إنّو ﻗﺪّﺍﺳﻨﺎ ﻣﺶ ﻣﺴﺮﺣﻴّﺔ أﻭ ﺑﺲ ﺗﺬﻛﻴﺮ بـ يلّي ﺻﺎﺭ ﻣﻦ ٢٠٠٠ ﺳﻨﺔ ! ﻳﺴﻮﻉ ﺣﺎﺿﺮ ﺑﺎﻟﻘﺪّﺍﺱ !  إﺣﺘﺮﺍﻡ ﺍﻟﻘﺮﺑﺎﻥ ﺍﻟﻤﻘﺪّﺱ ﻳﻌﻨﻲ إﺣﺘﺮﺍﻡ ﻳﺴﻮﻉ ! يلّي ﺑﻴﺤﻜﻮا ﺑﺎﻟﻘﺪّﺍﺱ، يلّي ﺑﻴﻠﻌﺒﻮا ﺑﺎﻟﺘﻠﻔﻮﻥ، يلّي بيتفرّجوا ع ﻏﻴﺮﻥ ﺷﻮ ﻻﺑﺲ ﻭ ﻫﻮﺩﻱ الإﺷﻴﺎ ﻋﻢ ﻧﺸﻮﻓﺎ ﻛﺘﻴﺮ ﺑﻬﺎﻹﻳﺎﻡ ، ﻋﻢ ﻳﻬﻴﻨﻮا ﻳﺴﻮﻉ ﺍﻟﺤﺎﺿﺮ ﺑﺎﻟﻘﺮﺑﺎﻥ ... ﺧﻠّﻮا ﻗﺪّﺍﺳﻜﻦ ﻳﻜﻮﻥ ﻋن جد ﻟﻘﺎﺀ ﺑﺎﻟﻤﺴﻴﺢ، و الله معكن... #خدّام_الربّ

  اوثقوا فيه! بيخبرو عن شبّ بيدرس و بيشتغل بمعمل بنفس الوقت تا يقدر يدفع قسط الجامعة و يساعد أهلو.  بيوم من الإيّام قرّرو بالمعمل يستغنو عنّو بلا ما يعطو سبب!  زعل هالشب كتير و راح عا بيتو عم يبكي مش عارف شو يعمل... بس وصل كانو أهلو عم يسمعو أخبار شوي بيطلع خبر عاجل: إنفجار خزّان محروقات بالمعمل اللي كان يشتغل فيه و ما حدا خلّص! أوقات ما منفهم حكمة ربنا و منزعل و منعاتبو عا خسارتنا بس ما بيطوّل تا يذكّرنا و يفرجينا إنّو ما في شي بيسمح إنّو يصير إلّا لمصلحتنا...  اوثقوا فيه و اتّكلوا عليه و هوّي عاطول معكن... المصدر : صفحة Jesus My Lord

  قفل ومفتاحو! بيخبرو عن ختيار قالولو عطينا مثل عن الوفا.  فكّر و قلّن: يمكن القفل مَثَل كتير بيعبّر عن الوفا.  ما فهمو عليه و سألوه كيف!  قلّن: القفل بيفضّل ينكسر عا إنّو يقبل يفتح بمفتاح غير مفتاحو! و نحنا؟ عند أوّل تحدّي منتراجع؟ منقبل نغيّر مبادئنا إذا حسّينا بخطر؟  أو معقول نضحّي و نكسر من حالنا كرمال رأينا و أفكارنا و إيماننا؟ فكرو فيها... الله معكن. المصدر : صفحة Jesus My Lord

  حِبّو و صلّو بيقول القدّيس نيكولاس من صربيا : "من يحبّك حقًا هو الذي يصلّي من أجلك إلى الله سراً." الصلا و الحب ما بيفترقو و هني أقوى سلاح  بوجه كل مشاكل و عوائق الأرض لأنّن بيفوتو عا قلب الربّ بلا مقدّمات!  و يمكن أكتر مثل عهالموضوع هوي لمّا شخص يصير معو شي حلو بيقولو "أكيد إمّو مصليِتلو."  بكلمات تانية: أكيد إمّو من كتر ما بتحبّو  موصّية السّما فيه! حبّو و صلّو للي بتحبّوهن و رح تلمسو أكيد حضور الربّ معهن و معكن!  الله يقدّسكن! المصدر : صفحة Jesus My Lord

  الأنانيّة مرض بيخبرو عن زلمي كان رايح بالباص عا ضيعة بعيدة.  بعد ٤ ساعات سفر تعب الزلمي و طلب من السايق يوقّفلو.  قال بينزل بيرتاح شوي و بيكمّل بباص تاني.  ما لحق نزل الزلمي و مشي الباص ٢٠ متر بتوقع عليه صخرة كبيرة و بيموتو كل اللي بقلبو!  أوّل جملة قالها الزلمي :  يا ريت كنت معن بالباص! الناس اللي سمعوه استغربو كتير، معقول حدا بيتمنّى يعيش هيك مصيبة و يموت!؟؟ قلّن الزلمي: لو ما وقف السايق تا ينزّلني كانت الصخرة إجت ورا الباص و ما كان حدا صرلو شي!  هالزلمي أكيد شكر الله عا نعمة الحياة بس كمان فكّر عكس الكل، و ما فكّر بحالو...  الأنانيّة مرض عم يصيب كتار هالإيام، صلاتنا اليوم عا نيّتهن حتى الرب يفوت عا حياتن و محبتو تشفي قلوبن و الله معكن... المصدر : صفحة Jesus My Lord

عودوا إلى الحبّ!  بيقول بادري بيو :  "إذا كان لديك الشجاعة لتقليد مريم المجدليّة في خطاياها، فليكن لديك الشجاعة لتقليدها في توبتها!" ما تأجّل توبتك و تقول بكرا بتوب، مين ضامنلَك يكون في بكرا!؟  توبوا إلى الربّ إنّ الملكوت قريب، عودوا إلى الحب فالخارج عنه غريب... ❤️ المصدر : صفحة Jesus My Lord

  هو الذي يفتح ولا أحد يغلق!  بيقول البابا شنودة التالت:  "كل مشكلة تبدو معقّدة أمامنا لها عند الله حلول كثيرة وكل باب مغلق له في يد الله مفتاح بل مفاتيح عديدة..." و الذي يفتح ولا أحد يغلق" (رؤ ٣:٧)." الله معكن و يفتح كل باب مسكر بحياتكن و يحل كل مشكلة شاغلة بالكن... بس هيك ❤️ المصدر : صفحة Jesus My Lord

  أقوى بمرّتين و أكتر! بيخبرو عن صبي زغير صار يبكي زعلان لأنّو إنكسر قلمو الرصاص بالنصّ.  قالتلو إمّو إنّو ما لازم يزعل أبداً ما صار شي.  جاوبها: كيف ما صار شي ما بقا عندي قلم!  أخدت مبراية و بريِت كل شقفة مكسورة وحدها و قالتلو: صار عندك بدل القلم تنين!  الزوّادة اليوم بتقلّنا : إنّو ما نزعل إذا إنكسرنا و ما نفكّر إنّو كل شي خلص هون، عا طول بعد الكسر في بداية جديدة. أوقات ربنا بيسمح ننكسِر تا نتعلّم شي و نرجع أقوى بمرّتين و أكتر! والله معكن! المصدر : صفحة Jesus My Lord

  الحب اللي بيجي من السما ما حدا بيغلبو! بس كنا نحضَر رسوم متحرّكة كان في شخصيّة كتير مهضومة اللي هيّي الملاك الحامل قوس و نشّاب و كل ما يصيب حدا بيطير فوقو قلوب و بيصير يحب! بيقول القدّيس خوسيه ماريا أسكريفا :  "إن كان الحبّ، حتّى الحبّ البشريّ، يعطي تعزية عظيمة هنا، كيف إذاً سيكون الحبّ في السماء". يمكن من هون إجت فكرة  الملاك لأنّو الحب اللي بيجي من السما ما حدا بيغلبو!  حب العالم متل ما بيحبك الرب... المصدر : صفحة Jesus My Lord

  خلّي عينَك عا لبنان اللي حبّيتو! بيقول البابا القدّيس يوحنا بولس الثاني اللّي زار لبنان و بيعرِف كل ظروفو: "لا تستسلموا لليأس فنحن شعب الفصح و"هللويا" هي أغنيتنا." هالعبارة بتنطبق علينا!  كل ما تزعَلو و تِقوى الصّعوبات من كل الأنواع و تقرّبو تستسلمو تذكّروها... اليوم ١٨ أيّار بيصادِف عيد ميلاد البابا القديس، ينعاد عليك بالسما و خلّي عينَك عا لبنان اللي حبّيتو! شفاعتو معكن، آمــــــــــــين! المصدر : صفحة Jesus My Lord

  يا أبيض يا أسوَد  بيخبرو عن شبّ و رفيقو بحكم شغلن اضطرو يفوتو عا بيت ناس ياخدو منن معلومات.  هني كانو مستعجلين كتير و ما عندن وقت بس الناس عزموهن عالقهوة.  أوّل واحد شكرن و قلّن إنّو ما بيشرب قهوة.  التاني قال: بشرب شوي.  بس فلّو قلّو لرفيقو إنّو هوي ما كان بدّو بس استحى منن و قال بيشرب شوي حتى يلتهو بالحكي و ما بيشرب و هني ما بينتبهو.  إذا شغلة ما بدك ياها مش عيب تقول!  هالقصة يمكن مثل بسيط كتير بس أوقات منواجه مواقف بالحياة إجباري ننقّي يا أبيض يا أسوَد ما فينا نختار الرمادي .  بيقلنا يسوع :  «لِيَكُنْ كَلاَمُكُمْ: نَعَمْ نَعَمْ، لاَ لاَ. وَمَا زَادَ عَلَى ذلِكَ فَهُوَ مِنَ الشِّرِّيرِ!» والله معكن... #خدّام_الربّ

  ما بحياتك رح ترضي الناس! إجا قزم عند عملاق يشكيلو همّو عم يقلّو كيف الناس بيتمسخرو عليه لأنَّو قصير كتير. قلّو العملاق شو مفكّر أنا مرتاح؟ أنا كمان بيتمسخرو عليّي لأنني كبير كتير! شو ما عملت وكيف ما كنت ما بحياتك رح ترضي الناس... أصلاً ما لازم يكون هيدا هدفك بالحياة! ما يهمّك رأي الناس فيك المهم هوّي راحة ضميرك بس تحط راسك عا مخدتك بالليل، المهم إنّو يكون بَينا السماويّ راضي عا تصرّفاتك وراضي عا نفسيتك وراضي عا نضافة قلبك ونواياك... والله معك. #خدّام_الربّ

  الخير اللي بتعملو بيرجعلك بيخبرو عن شجرة زرعوا حدّها شتلة زغيرة.  بإيام الصّيفية كانت الشمس بتحرُق وقفت الشجرة و خبّت الشّتلة بخيالها و حميتها.  بعد كم سنة كبرت الشّتلة و صارت صبيّة قويّة و الشجرة كانت صارت ختيارة.  طلعِت عاصفة و هوا كتير قوي وقفت بوجهو الشجرة و حميت الختيارة تا ما يتكسّرو أغصانها!  الخير اللي بتعملو بيرجعلك لو قد ما مرق وقت!  اعملو خير مع اللي بتعرفوه و اللي ما بتعرفوه، مع اللي بتتّفقو معو و اللي ما بتتّفقو معو... كل شي محفور بسجلّات السما و رح يرجعلكن اضعاف...  «لاَ تَكْنِزُوا لَكُمْ كُنُوزًا عَلَى الأَرْضِ حَيْثُ يُفْسِدُ السُّوسُ وَالصَّدَأُ، وَحَيْثُ يَنْقُبُ السَّارِقُونَ وَيَسْرِقُونَ.» (مت ٦: ١٩) المصدر : صفحة Jesus My Lord

السلام عليكِ يا مريم بيقول القدّيس جان فيانيه:  "إنّ واحدة من “السلام عليكِ يا مريم” إذا قيلت جيدًا، تهزّ جهنم تحت أقدام الشياطين". عم يقول هيك تا يذكّرنا إنّو الصّلا اللي تعلّمناها من نحنا و زغار ما لازم نكون عم نقولها متل اللي عم يسمّع درس و يعيد كلمات! "اذا قيلت جيدًا" يعني إذا قلناها من قلبنا مش بلساننا بس!  بشهر مريم، كلنا مدعوين نرجع للرّب و نصلّي من قلبنا عا نوايا كل واحد منا، عا نية عيالنا و بيوتنا و أهلنا و ولادنا، و عا نية لبناننا!  متل ما بكل شي الوحدة قوة، بالصلا كمان!  تعو نقول كلنا سوا: السلام عليكِ يا مريم يا ممتلئة نعمة الربّ معكِ مباركة أنتِ في النساء و مباركة ثمرة بطنكِ سيّدنا يسوع المسيح.. يا قدّيسة مريم يا والدة الله صلّي لأجلنا نحن الخطأة الآن و في ساعة موتنا آميـــــــن! المصدر : صفحة Jesus My Lord

  بتفوّل بنزين و بتوصل عالسما!   بيشبهو العلاقة بين الناس إذا كانت بلا ثقة لسيارة فاضية من البنزين.  فيك تضل قاعد فيا قد ما بدك بس ما بتوصلك لمطرح!  شو قولكن العلاقة بيننا وبين ربنا بينطبق عليا هالشي؟  أكيد !  إذا إنت بتقول إنْك بتآمن و بتصلّي بس وقت يصير معك شي بتبلّش تنبّش كيف بدّك تخلص منّو لحالك و لو قلت يا رب ساعدني بيضل عندك شك بمطرح من المطارح إنّو رح يستجبلي لأ ما رح يستجبلي... وثق بألله صلّب إيدك عا وجّك سلمو حياتك بكل معنى الكلمة و شوف كيف السيارة الفاضية بتفوّل بنزين و بتوصل عالسما!  الله معك...

  عاطول الطمّيع خسران! بيخبرو عن نمر بالغابة جوعان كتير لاقى خلد زغير طالع من وكرو مسكو تا ياكلو رجع تطلّع فيه و قال: لا لا كتير زغير ما بيشبّع!  شوي مرق غزال كبير، فرح النّمر و قال هيدا غدا حرزان.  ترك الخلد و ركض وراه بس الغزال كان سابقو و ما قدر يلحقو.  رجِع تا ياكل الخلد كمان ما لاقاه كان هرب تحت الأرض!  الزّوادة اليوم بتقلّنا : إنّو الطّمع و لا مرة خدم صاحبو... عاطول الطمّيع خسران!  ما تنسو إنّو ربنا علّمنا القناعة لأنو ما بيقبل ولادو يكونو خسرانين... الله رفيقكُن عاطول! المصدر : صفحة Jesus My Lord

  كذبة بيضا منسمَع كتير عبارات متل: معليش كذبة بيضا بتقطَع أو انجبرت كذّب شو بعمِل، أو لو قلت الحقيقة كان صار مشكلة و غيرها.  معقول يكون ربنا بيقبَل بالكذب حسب الظروف؟!  أكيد لأ... شوفو منيح شو بيقول الكتاب المقدّس : "وَأَمَّا الْخَائِفُونَ وَغَيْرُ الْمُؤْمِنِينَ وَالرَّجِسُونَ وَالْقَاتِلُونَ وَالزُّنَاةُ وَالسَّحَرَةُ وَعَبَدَةُ الأَوْثَانِ وجَمِيعُ الْكَذَبَة، فَنَصِيبُهُمْ فِي الْبُحَيْرَةِ الْمُتَّقِدَةِ بِنَارٍ وَكِبْرِيتٍ، الَّذِي هُوَ الْمَوْتُ الثَّانِي»" (سفر رؤيا يوحنا اللاهوتي ٢١: ٨) جميع الكذبة!!  بس هيك... و الله معكن! المصدر : صفحة Jesus My Lord

  هل أستطيع؟ زوّادة اليوم نصيحة من البابا فرنسيس لكل واحد مِنّا عن كيف لازم نتصرّف بقلب عَيلتنا.  بيقول البابا : "العائلة المثاليّة ليست موجودة، ولا وجود لزوج مثالي أو زوجة مثاليّة، ودعونا لا نتحدّث عن الحماة المثاليّة! نحن الخطأة فقط موجودون".  الحياة العائليّة الصحيّة تتطلّب إستخداماً دائماً لثلاث جمل هي:  "هل أستطيع؟ شكراً، وأعتذر"  "وتلافي إختتام النهار من دون تصالح"... إنشالله بتبقى عيالكن مجموعة بشفاعة كل القدّيسين آمــــــــــــين. المصدر : صفحة Jesus My Lord

  ينعاد عليك يا ختيار عنّايا ب ٨ أيّار ١٨٢٨ خلق صبي بعيلة لبنانيّة ببقاعكفرا.  أكيد الفرحة كانت كبيرة كتير بس اللي ما كانو عارفينو إنّو إبنن الزغير من هالضّيعة البعيدة رح يجمَع حولو ملايين الناس من لبنان و العالم.  هالشّب اللّي إختار يفوت عالدّير، ربنا إخترلو الطّب من بين إختصاصات السّما!  و صار يبعتو وين ما في مشكلة طبّ الأرض عجِز يحلّها و يخفّف أوجاع الناس.  هوي ما بيقبَض مصاري و ما بيهمّو إذا عندك ضمان أو تأمين، فاتورتو حبّ و إيمان و صلا!  اليوم عيد ميلاد مار شربل!   منشكرَك يا رب عن كل نعمة بعتتها  بشفاعة مار شربل لأيّ إنسان بهالدني!  ينعاد عليك يا ختيار عنايا يا جامع قلب الطّفل و نشاط الشّباب! المصدر : صفحة Jesus My Lord

  الله عاطول معك! بيقول الممثّل الشهير روبين ويليامز بإحدى المقابلات : "كنت فكّر إنّو أصعب شي بالحياة إنّك تكون وحدك بس طِلع أصعب شي إنّك تكون بين كتير ناس و تحسّ حالك وحيد."  معو حقّ!  بس تذكّر إنّو لو وين ما كنت و لو كنت بين ناس ما بيشبهوك و إنّو بأصعب الأوقات إنت و لا مرة رح تكون وحدَك لأنّو الله معك!  و لا لحظة تنسى هالشي، لمّا الكل يفلّو هوي بيبقى، لما الكل يكون مشغول هوي كل وقتو الك... ما تنسى! الله عاطول معك! المصدر : صفحة Jesus My Lord

  وثقوا فيها... "حبّ جميع الأمّهات إذا جُمِعَ في قلبٍ واحد، لن يوازي حب قلب مريم الطاهر".  هالمقولة هيي ‏للقدّيس لويس ماري دو مونفورت. عم تتخايلو كميّة الحب بقلب مريم هيّي اللّي ما كانِت تحكي كتير كانت تسمَع و تِحفظ كل شي بقلبها متل ما بيقلّنا الكتاب المقدّس... مريم اللّي و لا مرة تركت لبنان و لا مرة ما كانت حاضرة تلبّي نداء ولادها، و لا مرة ما تشفّعتلنا عند إبنها... كم مرّة قلنا خلص هيدي النهاية و يرجع يصير كل شي منيح ما منعرِف كيف... هودي صلوات إمنا مريم!  وثقوا فيها و صلّولها متل ما ولا مرّة تركِتنا اليوم كمان ما رح نكون وحدنا ما تخافوا... عطر ورودها يملّي بيوتكن و مسبحتها تزنّر عيالكن و بركة إبنها تزيّن حياتكن! آمــــــــــــين... المصدر : صفحة Jesus My Lord

  ورا كل رجل عظيم إمرأة بيقولو ورا كل رجل عظيم إمرأة ... مين ما بيعرِف القدّيس أغوسطينوس و قديش قدّم للكنيسة و بعدها الأجيال بتتناقل أقوالو لليوم.  معروف إنّو كان شب طايِش بعيد عن الله بس إرتدّ بصلاة إمّو القدّيسة مونيكا  اللّي بـ ٤ أيّار الكنيسة إحتفلت  بعيدها!  بصلاتها تقدّست هيّي و إبنها!  يا رب تبارِك كل عيالنا و تسمع و تستجيب صلوات الأهل لولادن... منّك يا رب منطلب. المصدر : صفحة Jesus My Lord

  خذهم إلى الأعلى !!! الطائر الوحيد الذي يجرؤ على نقر النسر هو الغراب، حيث يجلس على ظهره ويعض رقبته. لكن النسر لا يستجيب ولا يتشاجر مع الغراب ؛ ولا يقضي وقتاً ولا طاقة لإبعاد الغراب عنه.  وكل ما يقوم به النسر، هو فتح أجنحته والتحليق عالياً، لأنه يعلم، كلّما زاد إرتفاع الطيران كلّما كان من الصعب على الغراب التنفّس، ممّا يؤدّي بالغراب إلى السقوط بسبب نقص الأكسجين. الزوّادة بتقلّي وبتقلّك : توقف عن إضاءة الوقت مع الغربان فقط خذهم إلى أعلى مستوى لك وسوف يسقطون. #خدّام_الربّ

  أنا مش ساجد للحجر! ببداية الشهر المريميّ كتير ناس بتطلع عا حريصا أو بتزور مزار لإمنا مريم أو دير بإسمها أو بتعمل صمدة زغيرة للعدرا بالبيت.  لأ هالشي منّو عبادة تماثيل و صور!  أنا بس أسجد قدّام تمثال العدرا ما بكون وثني أنا مش ساجد للحجر أنا ساجد لرمزيّة هالتمثال الروحيّة و الفرق كبير!  يا عدرا ببداية هالشهر المبارك زنري لبنان بثوبك، إحمي عيالنا و ولادنا و أهلنا.  كوني حاضرة بكل لحظة بحياتنا يا رفيقة و صديقة الكل من الزغير للكبير.  تشفّعيلنا عن الرب نحنا الخاطيين تا يغمرنا برحمتو و متل ما بِطَلَب مِنِّك عِمِل يسوع أوّل عجيبة إلو بـ قانا منطلب منّك تصلّيلنا من فوق يا إمّ الكل... و الله معكن.

  كرّموها عظّموها 💖 بيقول القدّيس دون بوسكو:  "تناوُل القربان عامود أحد قُطبَيْ العالم.. أمّا الثاني فهو إكرام مريم العذراء." إذا غاب واحد من هالعواميد بيهتزّ العالم!  هالشهر المريمي المبارك فرصة لكل شخص يرجع يتصالح مع الله و مع السما...  شاركوا بالقداس و تناولوا جسد و دم الرب و اركضوا عا حضن مريم و قلبها الحنون... كرّموا مريم ببيوتكن، برعاياكن، و أهم شي بقلوبكن!!  العدرا ترافقكن! المصدر : صفحة Jesus My Lord