الزوادة اليومية

  الشكل الخارجي الله معك... الزوّادة اليوم هي دعوة لإلنا حتَّى ما نحكم على الأشكال الخارجيِّة.  مثلاً إذا شِفنا إنسان منظرو الخارجي مش حلو ما نبتعد عَنّو، نعطي حالنا فرصة نتعرَّف على جمالو الداخلي. إذا شفنا حَدا عابس ما نتركو يتخبَّط بحزنو، من المفترض نتذكَّر إنّو إذا بَدنا إبتسامة من حدا زعلان لازم نقدِّملو ياها. وإذا إلتقينا بحدا خِلقو ضيِّق وعَم بيعيِّط، حلو كتير نتقرَّب منّو ونساعدو يربّي عندو فضيلة الصبر. كتار هنّي المرّات يلّي فِيُن منوقف قدّام المظاهر الخارجيِّة وما منغوص للداخل، خلّينا نتذكّر كلام الربّ ونروح مع الأشخاص يلّي منلتقي فيُن للعمق، أكيد هونيك رح منلاقي الربّ. الزوّادة بتذكّرني وبتذكّرك : بكلام صاحب المزامير الإنسان بيتطلّع بعيون خيّو الإنسان، الربّ بيتطلع بقلبو، خلّينا نتطلّع بقلوب بعض ونكتشف حضور الربّ، والله معك. المصدر : صوت المحبّة

  من وين إجا إسم الشعنينة؟ بتعرفو من وين إجا إسم الشعنينة؟ هاليوم اللي فيه منتذكّر دخول يسوع عا أورشليم. كلمة شعانين هيّي من أصل عبري "هوشعنا" اللي بتعني : خلّصنا! و الشعب بس شاف يسوع صار يصرخلو خلّصنا خلّصنا لأنّن كانو عم يعانو من حكم الرومان اللي عذّبو كتير ناس و قَتَلو ألوف العالم. هالناس من ألفين سنة عرفو إنّو يسوع هوّي الخلاص. و نحنا بعد ألفين سنة خبرة بالحياة ما حلنا نعرف إنّو ما في خلاص إلّا بالمسيح و ما في غيرو طريق للسما!؟ ليش بعدنا عم نبعد عنّو!؟... اليوم فرصة إلنا نعيد النظر بكلّ حساباتنا و نتحضّر حتّى تكون قلوبنا كلها أورشليم و نستقبل يسوع فيها عن جديد! والله معكن... خدّام الربّ ®

نقطة على السطر الله معك... زوّادة اليوم زغيرة بالحجم كبيرة بالفعل. كلّنا منقول نقطة على السطر، بس ما منعرف إنّو بعد النقطة على السطر لازم نبلّش من جديد.  السؤال : أيمتين أنا وإنتو رح منحِطّ نقطة للخطيِّة بحياتنا، ونبلِّش مشوار النعمة يلّي ما بينتهي؟ أيمتين رَح منحِطّ نقطة لقِلِّة الإيمان، ونبلِّش مشروع اليقين يلّي ما إلو حدود؟ أيمتين رَح منحِطّ نقطة للتردُّد، ونبلِّش مرحلة النِعَم الأبديِّة يلّي بتملّي حياتي وحياتكن نِعم؟  أيمتين بدنا نحِطّ نقطة لقِلِّة الصلاة ونبني مع إخوتنا البشر ومع الربّ أجمل روابط الصلة؟ الزوّادة بتقلّي وبتقلّك : البطولة مِش إنّو نحِطّ نقطة على السطر ونبدي، البطولة أكتر من هيك، هيّي إنّو نهدّي، ما ننصاب بمرض التأجيل ونكمِّل بمشروع القداسة يلّي ما إلو حدود، والله معك. المصدر : صوت المحبّة

  العطاء من القلب الله معك... بيخبّرو عن الملكة ماري، ملكة إنكلترا يلّي إشتهرت بتواضعها، بيوم من الإيَّام كانت عَم تتجوّل بشوارع المدينة بلا حراسة، وفجأة صارت السما متلانة غيوم والدني بلَّشت تشتِّي.  وقفِت الملكة على باب بيت دقِّت على الباب فتحِتلها صاحبة البيت وإستقبلتها بكلّ فرح بلا ما كانت تعرف إنُّو هيدي هيّي الملكة، طلبت منّها شمسيِّة ووعدتها إنُّو ترجّعلها ياها باليوم التاني.  بالبداية، المرا عاشت التردُّد وما كانت حابِّة تعطيها شمسيِّتها، إنَّما فتحت خزانتها وعطيِتها شمسيِّة عتيقة. باليوم التاني بيدِقّ الباب بتفتح ستّ البيت بتشوف قدّامها حارس من الحرَس الملكي عطاها الشمسيِّة وشكرها بإسم الملكة، بكيت المرا لأنّها ما قدَّمت للملكة أثمن ما عندها إنَّما العكس. الزوّادة بتقلّي وبتقلّك : لمَّا بينطلب منَّك تعطي، ما تتردَّد تعطي من الحاجة اللي عندك، ولا مَرَّة تعطي الفضلات أو العتيق والبالي، بالعكس أعطي من أجوَد وأفضل ما عندك والربّ بيرجِّعلك بدَل الواحد ميِّة، والله معك. المصدر : صوت المحبّة

  عيد الأمّ ! نحنا بلبنان ما عنَّا شي تقليدي و لكلّ قاعدة عنَّا إستثناءات ما بتِخلَص... حتَّى أعيادنا ما منعيِّدها متل الكلّ... اليوم بعيد الأمّ منعيِّد إمّ الفادي، إمّ الكون، إمّ المسكونة كلّها إمنا مريم العدرا و معها منصلِّي لكلّ إمّ مش معيّدة، لكل إمّ خسرت إبنها و لكل ولد خِسِر إمُّو. منصلّي عا نيِّة كلّ إمّ مريضة ما عم تلاقي دوا، عا نيِّة كلّ سيّدة قرَّبِت تصير إمّ و عتلانة همّ تلاقي حليب لإبنها، عا نية كلّ إمّ ولادها هاجروا و معيّدة بدونن، و عا نية كل إمّ ولادها حدّها و خيفانة عا مستقبلهن و شايفتُن قدّامها عم يتعذَّبوا كلّ يوم تا يأمّنوا أقلّ متطلِّبات الحياة. منصلِّي كمان عا نيِّة كلّ سيِّدة حلمها تكون إمّ و ربنا بعد ما عطاها هالنِّعمة و أكيد ما منِنسى كل إمّ إنتقلت من بيناتنا تا تعيِّد بالسما. هالسِّنة هديِّتنا إلكُن صلا من كلّ قلبنا حتّّى بالعيد الجايي يكون زهَّر ربيع هالبلد و نملِّي الدّني ورود و ضحكات أمَّهات فرحانة! المصدر : صفحة Jesus My Lord

حنين لأهل البلد الله معك... بيخبِّر أحد المرسلين يلّي كان عَم بيبشِّر ببلاد أفريقيا إنّو إلتقى بشَبّ لون بشرتو بيضا.  بيركض هالشبّ وبيكِبّ حالو بين إيدَين هالمرسل رغم إنّو ما بيعرفو. حسّ الشبّ إنّو الكاهن إنصدم من هالتصرُّف، بيسألو الكاهن عن هالتصرف يلّي قام فيه بيجاوب الشبّ : «شفِت فيك ملامح بلادي». الزوّادة بتقلّي وبتقلّك : نحنا ولاد الملكوت لمَّا منلتقي بالناس لازم ننقل لإلُن صورة الملكوت يلّي بتُختَصَر بكلمات تلاتة إيمان ورجا ومحبة، والله معك. المصدر : صوت المحبّة

سرّ الطبيب الناجح الله معك... بيخبّرو عن رِجَّال تقدَّم من طبيب ناجح وسألو : «شو سِرّ نجاحك وتفوُّقك على كل زملائك وكلّ يلّي كانو عَم بيمارسو رسالة الطبّ قبلك»؟  جاوب : «بكلّ بساطة من أوَّل يوم فِتِت على الجامعة ولحدّ اليوم، بجرِّب إنِّي إتطُلِع على آخر المعلومات والإكتشافات، وما بكتفي ولا يوم بالمعلومات يلّي بعرفها، وعندي على طول حُبّ الإطِّلاع، مش للتباهي بالمعرفة إنَّما للإستفادة وإفادة كلّ مريض بيزور عيادتي». الزوّادة بتقلّي وبتقلّك : المعرفة ما إلها حدود، متل التواضع، كون متواضع وحطّ كل معرفتك بخدمة الناس، زراع التواضع بتحصد النجاح والمحبة، والله معك. المصدر : صوت المحبّة

إبتسامة حقيقيِّة بتكفي! من أقوال القدّيسة الأم تريزا دي كالكوتا :  "كلّ واحد منهم (عم تحكي عن الفقراء) هو يسوع متنكِّر.. كلما ابْتَسمْت لأحد ما فإنَّك عملت عمل للمحبِّة هديَّة لذلك الشخص." بوطن هلقدّ وَضعو صعب، عم تقِلّ قدرة الناس تساعد بعضها بس تذكّروا إنّو المطلوب أكتر من الماديَّات هوِّي الوقفة حد بعضنا و متل ما عم تقول الأم تريزا :  " إبتسامة حقيقيّة بتكفي!" و ما تنسى شو بيقول يسوع إنّو كلّ ما فعلتم لأحد إخوتي الصغار فَلِي عملتموه. المصدر : صفحة Jesus My Lord

   العوينات الزرق مرَّة راح زلمي عند حكيم العيون قلّو عيونو عم يوجعوه. قلّو الحكيم إذا بتشوف كل شي حَولك أزرق بيرتاحوا عيونك. راح عالبيت و بلّش يدهن كل شي أزرق و بالسيارة و بالشغل كل شي يلَونو أزرق. تِعِب رجع راح عند الحكيم قلّو يا حكيم هلكت أنا و لوِّن كلّ شي أزرق. ضحك الحكيم و قلّو : ما كان أحسن تِلبس عوينات زرق  بدل ما تلوِّن كلّ شي! أوقات بتفكِّر إنّو بتنحلّ الأمور بس تشوف غيرك بَدّو تغيير بوقت بيكون لازم تكون عم تتطلَّع من غير وجهة نظر! اعطينا يا ربّ نتغيَّر نحنا للأحسن بدل ما نقول إنّو الحياة بشعة و بدها تغيير! إذا كلّ واحد صار إنسان أحسن بيتحسَّن كلّ شي! والله معكن. المصدر : صفحة Jesus My Lord

يسوع نور العالم بيقول أحد الآباء : "عندما يشرق نور الشمس تهرب الوحوش الضاربة و تختبىء في أوجرتها و هكذا حينما نبتدىء في الصلاة، فهي شعاع يشرق علينا!" يسوع نور العالم و اللي بيتبَعو ما بيمشي بالعتمة! صلّوا حتّى يفوت النور عا قلوبكن و حياتكن و بيوتكن... آميـــــــن! المصدر : صفحة Jesus My Lord

  الله محوَر حياتنا الله معك... بِدعيكُن اليوم تفكّرو بهالحقيقة :  إنت وماشي بالطريق وكان الطقس مشمس، إذا كانت الشمس فوقك أكيد الخيال رح بيكون تحتك، وإذا كانت الشمس قدّامك خيالك بيركض وراك، وإذا كانت الشمس وراك خيالك بيسبَقك، إذا كانت الشمس بعيدة خيالك بيكون كبير، واذا كانت قريبة خيالك بيكون زغير. الشمس بترمز لَنور الربّ، والخيال هوّي العالم وهمومو وأحزانو، إذا حطّيت الربّ فوقك العالم كلّو بيصير تحت إجريك، وإذا الربّ كان قدّامك صار العالم وهمومو كلّن وراك، وإذا حطّيت الربّ وراك صار العالم كلّو قدّامك. الزوّادة بتقلّي وبتقلّك : بِقَدر ما منبعد عن الربّ العالم بيكبر قدّامنا، وبقدر ما نقرّب من الربّ العالم بيزغر قدّامنا، خلينا نمشي بطريق الربّ لأنّو وحدو هوّي النور والحق والحياة، والله معك. المصدر : صوت المحبّة

الشجاعة الله معك... بيخبّرو عن ضيعة كانو سكَّانها عايشين من الصَيد. بيوم من الإيَّام كل أهل الضيعة بيركضو على الشَطّ لأنّو وصلُّن خَبر إنّو في مركب للصيّادي انفقد بالبحر، وفريق الإنقاذ بينزل على البحر بهدف إنُّو يخلِّص الصيّادي يلّي عم بيصارعو العاصفة. فريق الإنقاذ بيرجع بعد مصارعة الموج وبيقول :  «خَلّصنا كلّ الصيّادي إلّا شَبّ واحد بعدو عالق على الجزيرة ونحنا بحاجة لمتطوِّعين يساعدونا». في شَبّ عمرو ١٦ سنة تطوَّع للمهمِْة، ركضت إمّو وقالتلو :  «بترجّاك بَيَّك مات بالبحر، وخَيَّك إلو تلات شهور ضايع بالبحر بترجّاك ما تروح». بس الشبّ ضلّ على قرارو. وعند الفجر رجع، ولمَّا قرّب من الشطّ صار يصرخ بأعلى صوتو ويقول لإمّو : «أنا رجعت والشبّ يلّي كان علقان هوِّي خَيِّي». الزوّادة بتقلّي وبتقلّك : ما تخاف تغامر بحياتك، ما تخاف تعمل منيح، حتَّى لو كلّ شي حوالينا عواصف وناس عم يتكبَّشو فينا، خلّونا نغامر كرمال الآخرين، ونعمل يلّي علينا وما حدا بيعرف كيف الخير بيرتَدّ علينا، والله معك. المصدر : صوت المحبِّة

  هلُمَّ أيُّها الروح القدس اليوم منتوحَّد بصلاة الروح القدس حتَّى يرافق كلّ واحد مِنَّا وين ما كان بهالأرض و شو ما كان عندو تحدِّيات و يغمرنا بمواهبو اللي نحنا كتير بحاجة لإلها.  هلُمَّ أيُّها الروح القدس، وأرسل من السماء شعاع نورك. هلُمَّ يا أبا المساكين. هلُمَّ يا معطي المواهب. هلُمَّ يا ضياء القلوب. أيُّها المعزِّي الجليل، يا ساكن القلوب العذب، أيَّتُها الإستراحة اللذيذة، أنتَ في التعب راحة، وفي الحرِّ إعتدال، وفي البكاء تعزية. أيُّها النور الطوباوي، إملأ باطن قلوب مؤمنيك، لأنَّه بدون قدرتك لا شيء في الإنسان ولا شيء طاهر : طهِّر ما كان دنساً، إسقِ ما كان يابساً، إشفِ ما كان معلولاً، لَيِّن ما كان صلباً، أضرم ما كان بارداً، دَبِّر ما كان حائداً. أعطِ مؤمنيك المتَّكلين عليك المواهب السبع، إمنحهم ثواب الفضيلة، هَب لهم غاية الخلاص، أعطهم السرور الأبديّ. آمــــــــــــين. المصدر : صفحة Jesus My Lord

قَوِّي إيماننا بيقِلنا الكتاب المُقدَّس عن يسوع :  "و كان يشفي كلّ مرض وكلّ ضعف في الشعب". (مت ٢٣:٤) اليوم صلاتنا عهالنيِّة حتَّى ربنا يشفي كلّ مريض شو ما كان مرضو و يعطيه الصبر و الإيمان و نعمة الشفاء. يا يسوع متل ما شفيت المُخلَّع، الأبرص، المنزوفة، العميان و غيرن و قلتلن إيمانكن خلَّصكن، قَوِّي إيماننا و ما تتركنا لو نحنا ضْعِفنا... آمــــــــــــين. المصدر : صفحة Jesus My Lord

  فكَّرت شعرها زهرة! بيخبرو عن إمّ و بنتها عم يمشوا، بتجي فراشة بتغطّ عا شعر البنت.  بتخاف البنت و بتصير تبكي.  قالتلها إمها إنّو الفراشة فكَّرت شعرها زهرة كرمال هيك إجت لعندها! وقفت الزغيرة تبكي و صارت تضحك!  هيك هالإمّ حوَّلت خوف بنتها لسلام و فرح.  و نحنا عنَّا ربّ بالسما حوَّل أكبر مخاوفنا لخلاص و مات و قام حتَّى نقوم نحنا كمان و ما بقا نخاف! يا يسوع، اللي معك بيختفي كل خوف، إنت يا مصدر السلام الداخلي... بحبك! المصدر : صفحة Jesus My Lord

  صرخة إيمان ليش الناس اللي بيتخانقوا بيصرخوا و صوتن عالي مع إنُّن بالمسافة كتير قراب و مش بحاجة يعلّوا صوتن تا يسمعوا بعضن؟ الجواب حلو كتير بيقول إنُّن صحّ بالمسافة قراب بس قلوبن بعاد و بيحسّوا حالن بعاد عن بعض! يا ربّ قرِّب القلوب و صفّي النوايا و ما تخلّينا نصرخ  عا خَينا الإنسان ، و لا تقبل نصرخ من الوجع أو التعب أو المرض... خلّي صرختنا الوحيدة تكون صرخة إيمان و حبّ تُوصَل للسما! آميـــــــن. المصدر : صفحة Jesus My Lord

  الكهربا الله معك... بيخبّرو عن مَرا وجَوزا كانو عايشين على راس الجبل وما كان في عندُن كهربا، لَبيوم من الإيَّام سِمعو بهالإختراع العجيب الغريب، ودفعو مصاري كتير للدولة، لحتَّى ركَّبِتلُن عواميد ومَدِّتلُن أسلاك كهربائيِّة، وأخيرًا صار عِندُن كهرباء.  وركَّبِت الدولة عِدَّاد لتعرف هالرِجّال ومَرتو قدَّيش عم يصرفو كهربا.  بس الصدمة إنُّن ما كانو عَم يستعملوها. بيوم من الإيَّام بتِبعَت الشركة عمّال التصليحات ليشوفو إذا في عندُن أيّ عطل ويصلحوه. بتِستَقبِلُن سِتّ البيت بالترحاب، بيسألوها إذا الكهربا معطَّلة عندُن، قالتلُن : «لأ، ونحنا كتير راضيين على هالإختراع كلّ ليلة منضوّي الضوّ تَنشعِّل القنديل ومنرجع منطفّيه». الزوّادة بتقلّي وبتقلّك : قدَّيش نحنا عم نعرف نستفيد من نور الربّ لنِقضي على العتمة الموجودة بداخلنا؟ قدَّيش عَم نشرِّع بواب قلوبنا لإلو لحتَّى يزيل العتمة من كلّ الزوايا؟ أو بعدنا مقوقعين ومسكّرين البواب والشبابيك؟ والله معك. المصدر : صوت المحبّة

  سلام و فرح مع يسوع ! بيقولو إنّو إذا بتقضِّي وقتك راكض ورا الفراشات رح يهربوا مِنَّك بس إذا بتزرع جنينة زهور بيِجوا هنِّي لعندك!  و هيك بدل ما تقول بدّي هيك و هيك و الله ما عم يساعدني و إنت راكض ورا الإشيا الأرضيِّة، فتّش عالربّ، روح زورو بالكنيسة، صوم، صلّي، تقرَّب مِنّو و وقتها كلّ شي بيصير أحلى و حياتك بتصير فيها سلام و فرح مع يسوع! الله يرافقكن! المصدر : صفحة Jesus My Lord

  القناعة الله معك... بيخبّرو عن تعلب كان ماشي بين الكروم بيوم شوب كتير.  شاف عنقود عِنَب دَهَبي شكلو طيِّب كتير، قال التعلب :  «هالعنقود رح يرويلي عطَشي بهالطقس المِشوِب».  بس كان في مشكلة، العنقود عالي كتير... رجع التعلب كَم فشخة لَوَرا، ركَض ونَطّ، بس ما قِدِر يوصل للعنقود.  جرَّب مَرَّة تانية وتالتة، بس ما قِدِر يطال العنقود.  قام كَفَّى طريقو وقال لحالو :  «ليش أنا عَم تَعِّب حالي ما أصلاً هالعنقود حامض ومِش طيِّب». الزوّادة بتقلّي وبتقلّك : لازم نتعلَّم نِشتغل، نتعب ونتشجَّع، ونكسِّر كلّ الحواجز الواقفة بينّا وبين أهدافنا.  ربنا ما علَّمنا نِنكِسِر بوِجّ الصعوبات، علِّمنا نتخطّاها وإذا كانت كتير صعبة نمرق من تحتها، والله معك. المصدر : صوت المحبّة

إيد الربّ بيخبرو عن شبّ وقع بحفرة و كتار مدّولو إيدن حتَّى يطَلعوه بس هوّي تمسّك بإيد خيّو من بين الكلّ و لمّا سألوه ليش قلّن :  لأنني أكيد إنّو إذا ما قدر يطلّعني رح ينزل يقعد معي! و إنت إذا عندك إنسان بتوثق إنّو رح يكون معك بكل الأوقات و يشاركك كل شي حافظ عليه و صلّي حتّى إيد الربّ تكون ممدودة لتنيناتكن و تغمركن بالحماية الإلهيّة... آميـــــــن. المصدر : صفحة Jesus My Lord

  غذاء الروح بيقول أحد الآباء : "الصوم لا يقتصر على منع الجسد من غذائه, وإنَّما يجب فيه من الناحية الإجابيّة تقديم غذاء للروح." يا ربّ، إنت خبز الحياة، إنت الغذاء لكلّ نفس ضعيفة إنت اللي قلت من يأكلني لا يَجُوع أبدًا، ساعدنا نفهم أهميِّة غذاء الروح و نعرف إنّو إنت مصدرو و كلّ ما تقرِّب علينا التجربة نلتجي عندك... آمــــــــــــين. المصدر : صوت المحبّة

  الحياة مِش كِلّها صعوبات الله معك... بيخبّرو عن صبيِّة ما في شي زابط بحياتها، مشكلة ورا مشكلة، بالآخر ما ضلّ عندها قدرة إنّو تتحمَّل، قالت: «لشو حياتي؟ أحسنلي إذا بموت». بيسمعها بالصدفة شبّ رفيقها من زمان. بيزعَل من اللي سمعو وبيصير يحكيها ويجرِّب يفرجيها حسَنات الحياة، وإنّو كل شي موَقَّت وبينحَلّ.  وهيّي كل ما يقلّها شي تكون محضّرة الجواب السلبي. عصّب الشبّ وتضايق كتير، وحَسّ وكأنّو مش هيدي رفيقتو اللي بيعرفها.  بلّش يقلّها إشيا يستفزّها ويعصّبها عن قصد، حتّى بالآخر قالتلو :  «خلص شو ما قلت وشو ما عملت ما رح إزعل مِنَّك». بيرِدّ الشبّ: «هيدا قصدي إنّو عَذّبِك أكتر ما بقدر، بسّ بالوقت ذاتو إنتي عارفة إنِّي مِش ممكن إأزيكي.. كرمال هيك ما بتزعلي مِنِّي، وهيك الحياة قدّ ما تقسى الظروف، ربنا ما بيقبل إنّو ولادو ينأزو.. وكرمال هيك، لازم يكون إيمانِك قوي وبدال ما تتمنّي الموت لازم تعيشي حياتِك بفرح، وتسعي لتتحقّق إرادة الربّ من خلالِك».  الزوّادة بتقلّي وبتقلَّك : مهما كِترِت الصعاب، خلِّي عينَك دايمًا على المصلوب، وتذكَّر إنّو الربّ ما بيتركنا لو قد ما افتكرنا إنّو الحلول مستحيلة، خلّي إ

  المهمّ يلّي بالداخل الله معك... بيخبّرو عن بيّاع بالونات كان حامل مجموعة من البالونات الملوَّنِة المتلانة بغاز الإليوم، وكان كل ما يمشي مسافة على الطريق يفلُت بالون بالهوا، لحتَّى يدِلّ الناس وخصوصي الولاد هوّي وين.  وأكيد بيِجو لعندو وبيِشترو مِنّو بالونات، وهالبالونات كانت من كلّ الألوان : أحمر، أصفر، أزرق، أسود، أخضر... وبلحظة، هالبِيّاع بيلاقي حالو قدّام صبي بشرتو سودا، بيسألو وبيقلّو : «إذا تركت البالون الأسود بيطير متل باقي البالونات»؟  بيبتسم البِيَّاع وبيقلّو : «قيمة البالون مِش بلَونو قيمة البالون بِيَلّي موجود بداخلو».  الزوّادة بتقلّي وبتقلّك : داخل الإنسان هوّي يلّي بيرفعو.  تصالح مع ذاتك، وثاق إنّو الله عطاك قدرة مش موجودة عند غيرك، ويلّي بيميّزك هوّي داخلك ومش خارجك، والله معك. المصدر : صوت المحبّة

  القيمة للعازف مش للكمان الله معك... بيوم من الإيَّام، بيتوزّع مناشير بالمدينة وإعلانات بكلّ الصحف عن عازف كمان رح بيزور المدينة لحتَّى يعزف معزوفات موسيقيِّة على كمانو الشهير يلّي قيمتو أكتر من ١٠٠ ألف دولار. كلّ الناس تجمَّعو بالساحة العامّة، العازف أبدَع بالعزف، كلّ الناس زقَّفولو وهيَّصولو. وقبل نهاية العرض، العازف بيضرب الكمان بالحيط وبيكسرو.  الناس بينصابو بالذهول، وبيقولو أكيد هالفنّان أُصيب بضرب من الجنون. بسرعة بيطلع مُقدِّم الحفل على المسرح ليخبِّر الناس إنُّو هيدا مَنُّو الكمان الأصلي، رح بيرجع الفنَّان على المسرح ورح يعزف على الكمان الأصلي الغالي الثمن، بس قلال من الناس يلّي ميَّزو الموسيقى وعِرفو الفرق. هالعازف أراد من خلال هالعمل إنّو يقول للناس المهمّ هو العازف مش الآلة. الزوّادة بتقلّي وبتقلّك : أنا وإنت متل هالآلة الموسيقيِّة، خلِّينا نستسلم بين إيدَين الربّ وهوّي بيعزف من خلالنا أجمل الألحان، والله معك. المصدر : صوت المحبّة