الزوادة اليومية

  مش هوّي ذاتو هالوين! عيد جميع القدّيسين اللي بتحتفل فيه الكنيسة بـ ١ تشرين التاني مش هوّي ذاتو هالوين!  المسيحي ما بيحتفل بهالوين حتّى لو عم يتسلّى!  مرّة البابا فرنسيس قال بوَعظتو إنّو هالوين عيد للوثنيّين بيسجدوا قدّام الأصنام و بيقدمولن ذبائح بشريّة! كمّل البابا و قال :  "كيف يمكن للمسيحيّين الإحتفال بعيد الشيطان؟ وقد جاء المسيح كي يخلّصنا من حضوره القاتل للروح؟" عيد جميع القدّيسين هوّي عيد لنحتفل بقدّيسينّنا اللي منعرفن و اللي ما منعرفن تا يتشفّعولنا بالسما بس هالوين مناسبة لنشر الخوف و الأشكال البشعة و ما بيشبه القدّيسين بشي!  ما تعَودوا ولادكن عا إشيا غلط بس لأنّو الناس بيعملوها أو لأنها موضة... إرجعوا لجوهر العيد اللي هوّي وقت صلاة و مناسبة نتوحّد فيها مع سكّان السما اللي إختارن الربّ! الله معكن... المصدر : صفحة Jesus My Lord

  تواضع الأساسات كتار حكيو عن التواضع و التكبّر.  بيقول أحد الآباء إنّو أساسات البناء مثال عن التواضع لأنّو بيكونو مخبّايين تحت الأرض و بيحملو البناء تا يكون ثابت و ما حدا بينتبهلن أو حتّى بيتذكّرن!  الناس بتشوف البناء الواقف عا كتاف الأساسات و بيقولو شو حلو و كبير و مميّز و...و...!  كونوا بتواضع الأساسات ما تنطروا التقدير من حدا، إعملوا دوركن بلا إستعراضات و بَيكن السماوي هوّي اللي بيقدّركن و بيعطيكن حقكن و زيادة بالوقت الصحّ! بداية أسبوع مباركة و الله معكن... المصدر : صفحة Jesus My Lord

  ما تأجلوا رجعتكُن !   بيقولو فيك تبلّش تكون إنسان منيح "اليوم" أو "شي يوم" إنت حر تنقّي.  بس تذكّر إنّو "اليوم" إنت موجود فيه بس "شي يوم" مش أكيد رح تكون!  ما تأجلوا رجعتكُن للرّب حتى ما تكونوا تأخّرتوا ...والله معكن. المصدر : صفحة Jesus My Lord

سامِحني يا رب سامِحني يا رب غلَبني التّعب مبارِح و غفيت بلا ما إحكيك و اليوم وعيت مأخّر و صرت أركض تا لحّق الشغل و كمان مرّة ما حكيتَك. سامِحني عا كل مرّة تصرّفت كأنّو في شي أهمّ منّك بهالدني... بقدّملك نهاري و كل إيّامي و كل لحظة من حياتي اللّي هيي هدية منك!... يوم مبارك للكل! المصدر : صفحة Jesus My Lord

  صار يسبح! بيخبرو عن صبي زغير بيخاف من المَي و ما كان يقبل يتعلّم السباحة. قرّر بَيّو يعَلمو متل ما أكتريّة الناس تعلّموا! صحّ! حدا كبّن بالمَي! لمّا كبّو بالمَي ركضت الإم تبكي و تصرخ الصبي ما بيعرف يسبح! قلها البَي ما تخافي أنا هون بتدخّل إذا لازم معقول إتركو! و فعلاً الصبي صار يسبح! أكيد مش المقصود نكِب ولادنا بالمَي! الفكرة إنّو بَينا السماوي بيسمح بالصعوبات حتّى نتغلّب عا خوفنا و نصير أقوى و هوّي حاضر معنا عم يشوف كل شي و بيتدخّل وقت اللزوم! ما تخافوا من شي و تذكّروا إنّو الله عاطول معنا! المصدر : صفحة Jesus My Lord

  ما معو عصا سحريّة ! بتقول الأم تريزا دي كالكوتا:  "كنتُ أؤمن أنّ الصلاة تغيّر الأمور، لكنّني أعلم الآن أنّ الصلاة تغيّرنا و نحن نغيّر الأمور." ربنا ما معو عصا سحريّة إنت بتصلّي و هوّي بيحقّق الأمنيات!  من خلال صلاتك، إنت بتنضج روحيًّا و بتصير أقرب للرب و مع مواهب الروح القدس و إلهاماتو بتصير تآمن إنّك قادر تعمل فرق و بتغيّر!  يسوع بس قلنا إنّو إيمان قد حبّة الخردل قادر ينقل جبال كان عارف منيح قوّة صلاتنا و إيماننا اللي بيحوّلنا من إنسان ضعيف لأشخاص عندن قوّة كبيرة قادرة تعمل تغيير إيجابي... صلّوا! صلّوا! صلّوا! المصدر : صفحة Jesus My Lord

  إستفيدوا من رحمتي قبل فوات الأوان... بيخبرو عن زلمي قاعد بقهوة هوّي و رجّال تاني عم يحكوا و يضحكوا اللي بيشوفن بيقول أعزّ ّ الأصحاب.  بعد شوي قام واحد منّن فلّ بيقول التاني: شو بِكرهو هالإنسان منيح اللي راح! إنّك تكون مش صادق بِتَعَاملك مع الناس ما بتستفيد شي و إنّك تمثّل المحبّة كمان بشع كتير!  يسوع قلنا أحبّوا بعضكم بعضاً، قَلنا باركوا لاعنيكم، قَلنا أحبّوا أعداءكم، قَلنا إن ضربك أحد على خدّك الأيمن أدر له الأيسر...  وين نحنا من وصاياك و تعاليمك يا ربّ؟  رِدنا عا دربك يا رب و رجّعنا صوبك تا نحبّ متل ما طلبت مِنّا و أكتر، حتّى نعكس صورتك للكلّ و نطلع من أحكام الأرض السطحيّة و علّمنا نتذكّر إنّو عدالتك جايي كرمال هيك قلتلنا إستفيدوا من رحمتي قبل فوات الأوان... المصدر : صفحة Jesus My Lord

متل ما بتعامِل غيرَك رح تتعامَل ! بيقول القدّيس أغسطينوس :  "من لا يجاهد في صنع السلام وإحتمالِه مضايقيه لن يتمتّع بالسلام الإلهيّ ... لأنّه إن لم نغفِر لا يُغفَر لنا... وبالكيل الذي به نكيل يُكال لنا..." هالعبارة كفيلة تذكّرنا بمغزى حياتنا كلها!  بدّك تتحمّل الصعوبات الزغيرة تتوصَل للفرح الكبير...  و متل ما بتعامِل غيرَك رح تتعامَل...  فكّروا بهالشّي قبل كل تصرُّف و قبل كل قرار بتاخدوه و الله معكن! المصدر : صفحة Jesus My Lord

  ما تخلّي شي بقلبك أكّدت دراسة إنّو ١٠٪ من سكّان الأرض مصابين بالصمم ومن بين هالأشخاص، ٤٪ فقط قدروا يكملوا دراساتن ويشتغلوا أمّا البقيّة فتم إستبعادن عن الحياة المهنيّة.  لهيدا السبب، قرّرت مؤسّسة "X2000"، من شمال فرنسا ومتخصّصة بأجهزة الكومبيوتر، إنشاء برنامج خاص بيتعلّموا، من خلال أشرطة فيديو بلغّة الإشارات، كيف يكتبوا نص، كيف يستخدموا الإنترنت ووسائل التواصل الإجتماعي، وكيف يحطّوا سيرتن الذاتيّة عبر الأنترنت.  وهيك بتسعى هالمؤسّسة تساعد هالأشخاص يرجعوا يندمجوا بالحياة العمليّة. ونحنا اليوم مدعوّين ما نخلّي معرفتنا إلنا وحدنا وبس، خاصة معرفتنا بالرب يسوع، إنما نشهد لحبّو قدّام للي حولينا. المصدر : صفحة Jesus My Lord

لتكُن مشيئتك! اليوم الزوّادة نيّة منتمنّى تصلّو معنا كرمالها. يا ربّ منصلّي اليوم عا نية كل عيلة عندها مريض سرطان أو أي مرض ما إلو دوا و خصوصًا الأطفال. يا ربّ رافقُن برحلة علاجُهن الطّويل و الصّعب، خفّف وجعُن، و أعطيهن نعمة الصّبر يتحمّلو و نعمة الصّحة تا تبقى عيالهن مجموعة... ما تزعَل منّا يا رب، نحنا عا طول منقول لتكُن مشيئتك و منعنيها اكيد، بس صعب كتير نشوف اللّي منحبّن عم يتوجّعو و مش قادرين نساعدُن بشي... يا بينا السّماوي كون معن و مع اللّي عم يهتمّو فيهن... منّك يا رب منطلب. المصدر : صفحة Jesus My Lord

  بل حبًّا بك آميـــــــن! بيخبرو عن شب عم يحكي مع جدّو قلّو : عطيني نصيحة بعد خِبرتك الطويلة بالحياة. جاوَب الجد: اعمول أغلاط! إستغرَب الشّب معقول جدّي عم ينصحني أغلط! كمّل الجد و قال: عا شرط تتعلّم منن... يسوع عارف إنّو الإنسان ضعيف و بيغلَط بس كمان عارف إنّو قادرين نتعلّم من الغلط و عملنا سرّ التوبة!  الإعتراف هوي أول خطوة تا نتعلّم من غلطنا.  بس يكون عنا الجرأة نحكي عنّو منكون تخطّيناه و رح نفكّر كتير قبل ما نرجَع نعيدو!  ربّي و إلهي أنا نادم من كل قلبي على جميع خطاياي لا خوفًا من الجحيم و لا طمعًا بالنعيم بل حبًّا بك آميـــــــن! المصدر : صفحة Jesus My Lord

  إهتمام سكّان السما! بيخبرو إنّو قوانين الدير اللي كانت فيه القدّيسة تريزيا الطفل يسوع كانو ما بيسمحو للراهبة تطلع من الدير تحت أي ظرف و معروف عن تريز قدّيش معلّقة ببَيها خصوصاً بعد ما توفّت إمها.  تخايلوا قدّيش كان صعب عليها تعرف إنّو بَيها مريض كتير و يمكن ما يعيش و كل ولادو ترهّبوا ما عندو حدا يهتم فيه!  قدّيش قلبها الزغير الحنون زعل إنها مش قادرة تغمرو و تكون حدّو...  صلّت من كل قلبها للعدرا شفيعتها و قالتلها يا عدرا أنا هون بالدير بهتم بإبنك يسوع و نتي إهتمّيلي ببَيّي!  شو هالإيمان اللي عندها! نيّالها!  نحنا يمكن كنّا ضعفنا و فلّينا أو كنّا عاتبنا ربنا عهالموقف الصعب بس تريز بتعرف إنّو إهتمام سكّان الأرض ما بيبيّن قدّام حبّ و إهتمام سكّان السما!  شوفوا البَي اللي تريز وصّت العدرا فيه صار اليوم قدّيس! الله يرافقكن و يقدّسكن! المصدر : صفحة Jesus My Lord

  عِنّا بالسما إم ! بيقول القدّيس أغسطينوس :  "بالمرأة جلَبت الحيّة للإنسان الأول خبر الموت وبالمرأة نُقِلَت للناس بشرى الحياة." مريم اللي حملت أحلى بشارة، مريم اللي غيّرت كل المفاهيم و من خلالها ربنا عرّفنا عالحياة الحقيقيّة: يسوع المسيح! شو ما حكينا عن مريم قليل... ما تنسوا إنّو يسوع ما بيرفضلها طلب؟  أطلبوا شفاعتها عاطول لأنّو عِنّا بالسما إم ! المصدر : صفحة Jesus My Lord

سرّ الضحكة لأن الفرح والإبتسامة هنّي العلامات الحقيقيّة للي بميزونا كمسيحيّين، إبتسم لأن الربّ إبتسم.  فرح الخالق، للي عم يتأمّل كل واحد منّا، هو قوّتنا وأساسنا المتين.  "لأَنَّ فَرَحَ الرَّبِّ هُوَ قُوَّتُكُمْ" (سفر نحميا ٨ / ١٠).   إفرح لأنّك محبوب رغم كل الضعف والخطايا للي فيك.  إضحك لأنّو الآخرين بحاجة لضحكتك.  "الفرح شبكة من المحبة بها تصطاد النفوس" (الأم تريزا دي كالكوتا). المصدر : صوت المحبّة

  واحد وحدو ما بيقدر يكفّي معروف عن النّمل قدّيش بيتّكلو عالحياة الجماعيّة بس كان في نملة ما بتحبّ تساعِد حدا و لا حدا يساعِدها. بيوم من الإيام هيّي و عم تجمّع أكل للشّتي و تحطّن ببيتها بيجي ولد عم يلعَب بيسكّرلها مدخَل بيتها بحجار زغار و هيي وحدها ما كان فيها تزيحُن.  طلبِت مساعدة النّملات التّانيين بس ما حدا ردّ عليها لأنّو هيي ما ساعدتُن و لا مرة!  بعدين حكيتها ملكة النمل و فهمِت إنها لازم تكون سند لإخوتها النملات و إنّو واحد وحدو ما بيقدر يكفّي و يواجه كل شي.  نحنا هيك ربنا خلقنا جماعة مؤمنة بالكنيسة و علّمنا نحبّ و نساعِد غيرنا و أكيد كل شي رح يكون أحسَن!  في صلا للعدرا منردّدها بتقول:  "نَوِّري عُقول المَسيحيِّين، وردّي الضالّين مِنّا إلى حَظيرَة الخِراف الناطِقَة، أعني بيعَة السَيِّد المَسيحيّة الحَقيقيّة، الجامِعَة، الرسوليّة..." الله معكن. المصدر : صفحة Jesus My Lord

  قلب بيشبه البحر!  من حوالي سنتين، قرّر شاب بيبلغ من العمر ١٩ سنة، وخلال أوّل سنة من دراستو الهندسة بالجامعة، إنّو يبتكر طريقة يقدر من خلالها ينضّف المحيط من بقايا البلاستيك والمواد الغذائية.  ومن وقتها بلّش يصمم آلة بتمشي على الطاقة الشمسيّة بالبحر وبتلتقط كل النفايات للي بيطلعو بدربها.  واليوم، بلّش مع فريق عمل متخصّص بتنفيذ هالآلة تا تصير صالحة للإستعمال من سنة ٢٠١٦. يا ريت أنا كمان بنتبه للإشيا يلي بتوسّخلي قلبي وبتمنعني إلتقي بربّي، بلكي بقدر لاقي وسيلة لملم فيها دايماً خطاياي وإبقى مستعد تشوف وجّو، وجهاً لوجه. المصدر : صوت المحبّة

إحمي عائلاتنا بيقول البابا يوحنّا بولس التاني:  "كان القدّيس يوسف رجلاً عادلاً ، عاملاً لا يكلّ ، وصيًا مستقيمًا على أولئك الموكَلين إلى رعايته. أتمنى أن يحرس ويحمي وينوّر العائلات دائمًا." مع الأوضاع الصّعبة اللي عم نعيشها يا رب في عِيَل كتير تفرّقِت، في عِيَل فاتِت عليها المشاكل، في عِيَل بعدِت عنّك!  منصليلك يا رب بشفاعة مار يوسف و القديس يوحنا بولس التاني تجمَع كل العِيل و تحميهن و تعطيهن يعيشو بكرامة و يرجعوا صوبَك... آميـــــــن. المصدر : صفحة Jesus My Lord

  نصيحة من البابا فرنسيس بسنة الـ ٢٠١٦، بيوم الشباب العالمي وجّه البابا فرنسيس رسالة للشباب و من الإشيا اللي قلّن اياها: "كم يبدو لنا صعبًا أن نغفر أحيانًا!  ومع ذلك فالمغفرة هي الأداة التي وُضعت بين يدينا الضعيفتين لنبلغ إلى سكينة القلب.  إنّ ترك الحقد والغضب والعنف والإنتقام هي الشروط الضروريّة لنعيش سعداء".  دعوِتنا اليوم لكل شب و لكل صبيّة ما عم يقدرو يسامحو و حاسّين قلبن تقيل و زعلان يِقرو هالنصيحة من البابا فرنسيس و أكيد كل شي رح يكون أحسن و أحلى! المصدر : صفحة Jesus My Lord

إختصرلنا طريق السما... من زمان كانو يحملو جرار عا كتافن و يمشو مسافات تا يملو مَي من العين بالضِيَع.  بتخبّر مرا ختيارة لمّا سألوها شو تعلّمت من هالتجربة إنّو لمّا تحمل مَيّاتك عا كتفك كل الطريق و تكون معذّب مسافة طويلة تا تعبيهن بتصير تعرف قيمة كل نقطة مَي و ما بتفرّط فيهن!  منشكرك يا رب إنّك ما خلّيتنا نتعذّب تا نعرف القيمة و إنت تعذّبت عَنّا، منشكرك يا ربّ إنّك ما خلّيتنا نموت تا نعرف قيمة الحياة و إنت متت عَنّا و قمت كرمالنا، منشكرك إنّك وفّرت علينا ندوق هالكاس و إختصرتلنا طريق السما...  منحبّك يا يسوع، كون رفيقنا بنهارنا اليوم و كل يوم. المصدر : صفحة Jesus My Lord

  طريق القداسة مش صعب 😇 بتحتفل الكنيسة بأعياد القدّيسين و الطوباويّين بتاريخ وفاتن لأنها بتعتبر إنّو يوم إنتقالن من الأرض  هوّي يوم ولادتن بالسما.  متل يوم ١٢ تشرين الأوّل إحتفلنا بعيد الطوباوي الشاب الزغير كارلو أكوتيس اللي بيشبه كتير شباب و صبايا اليوم.  كان يحبّ الكومبيوتر و الإنترنت، كان عندو أصحاب ما كان عايش وحدو.  نحنا اليوم بحاجة كتير لشفعاء متل كارلو يِرجعو يشدّو الشباب عند الرب و الكنيسة و يفرجوهن إنّو طريق القداسة مش صعب بس بدّو إرادة و كتير حُبّ!  من أجمل الإشيا اللي قالها :  "الأمر الوحيد الذي يجب أن نخافه هو الخطيئة." و  "السعادة هي النظرة الموجّهة إلى الله، أما الحزن فهو النظرة نحو الذات." تأمّلوا بهالمعاني الحلوة و يومكن مبارك مع يسوع. المصدر : صفحة Jesus My Lord

اِسْأَلُوا تُعْطَوْا ... بتخبّر القدّيسة تريزيا الطفل يسوع عن فترة مرضها كانت محرورة كتير و الممرضة جابتلها شي سخن تدفّيلها إجريها فيه.  صلّت تريز للربّ و قالتلو يا يسوع انا عم بحترق و عم يجيبولي إشيا سخنة كمان يا ريت فيّي أشرب نص كبّاية مَي!  بس بتعرف يا يسوع أنا فرحانة كتير لو موجوعة لأنّي عم ساعدك تا نخلّص نفوس.  فلّت الممرّضة من عندها و من المفروض ترجع تاني يوم.  بتتفاجأ تريز فيها راجعة بعد دقيقة و جايبتلها شراب بارد!!  تريز زغيرة السما صارت شفيعة لكتار مِنّا، ورودها ملّوا الدني و ما حدا قَصَدها رجع خايب هيّي اللي قضت حياتها عالأرض توزّع حُبّ و كمّلت نفس الشي بس صارت بالسما! المصدر : صفحة Jesus My Lord

  صلّيت ؟! بيخبرو عن جيران عم يحكو و يسألو بعضن شو أكتر شي عملوه و ساعدُن لمّا كانو بفترة صعبة بحياتن.  كانت الأجوبة كتيرة مثلاً: حكِيت مع إختصاصي، أصحابي ساعدوني، عيلتي وقفِت حدّي، سافَرت، سكّرت تلفوني و بعّدت عن الناس لفترة... شخص واحد بس من الموجودين قال: صلّيت!  ليش الصّلا ما عم تكون أساسيّة بقا بحياة الناس و عم يفتّشو عا حلول بعيد عن الله و هوي الوحيد اللّي عندو سُلطة عا كل شي!  أكبر مشكلة عنّا بكلمة منو بتختِفي!  أصلاً ما لازم بس نصلّي وقت يكون بدنا شي لازم نصلّي تا نشكرو عا كل شي، لازم حياتنا تكون صلا و حوار مع الله!  بيقول القديس اوغسطينوس:  "الصلاة هي مفتاح السماء وبقوّتها يستطيع الانسان كل شيء." الله معكن! المصدر : صفحة Jesus My Lord

  الحق ع مين؟ من قديم الزمان، من إيّام آدم وحوّا لليوم، منقول الحق مش علينا، آدم حطّ الحق ع حوّا، وحوّا حطّت الحقّ ع الحيّة...  وهيك كمّلت مسيرة الإنسان، ما في أشطر منّا مِنبَرّي حالنا ومنحط الحقّ ع غيرنا، من دون ما نسأل شو دورنا بالحياة، وشو مسؤوليتنا تجاه الأحداث يلّي عم بتصير حوالينا...  منصير متل سفينة عم تغرق، وكل واحد من أفراد الطاقم بيقول:  «أنا مش مسؤول هيدي مسؤولية حدا تاني» وأوّلن القبطان يلّي ما كان أمين لوظيفتو، وهيك بتنتهي القصّة، بغَرَق السفينة وموت ركّابها. الزوّادة بتقلّي وبتقلّك : «بحياتنا اليوميّة، وحتّى ببيوتنا، في كتير مشاكل، خلّينا نتحمّل مسؤولياتنا وما نكِبّ اللوم ع غيرنا، هيك كلنا منخلّص ومنوصل لَبَرّ الأمان». والله معكن... #خدّام_الربّ

  ما رح تعطشوا أبدًا! مرّة جِدّ قدّم نصيحة لحفيدو بتقول :  ما تخلّي حالَك تعطَش لدرجة تخلّيك تقبَل تشرَب من أي كبّاية بتتقدّملك. يسوع عالصّليب لمّا قال أنا عطشان عطيو خل!  معقول يا رب إذا إنت و ما قدِرت ما تعطَش و كنت بموقف ما قدرت إلاّ ما تشرَب نحنا نقدر نعمل هيك شي!؟ غلط!  يسوع بيقدر يعمل كل شي بس هوي انهان تا يردّلك كرامتَك، مات تا تعيش، شِرب خلّ تا تشرَب إنتَ ماء الحياة!  بعد كل هالتّضحيات كرمالنا بيستاهَل منا يسوع ما ننسى إنّو نحنا ولاد الله و ما نقبَل بخطايا و إشيا ما بتليق بولاد ملك المجد!...  صلّوا و حبّوا و تأمّلوا بالإنجيل المقدّس و ما رح تعطشوا أبدًا! المصدر : صفحة Jesus My Lord

  إفتحلو قلبك ❤️ في ناس بتقول البحر بيروّق الأعصاب و ناس بتقول البحر غدّار و ناس ما بتعرِف البحر أبدًا بتسمَع شو بيقولو و بتتبنّى وجهة نظر و بتصير توزّعها بلا ما تكون عارفة عن شو عم تحكي!  هيك كمان الناس بيحكو عن الله بدون ما يختبروه بينشرو أفكار عنّو بلا ما يكونو بيعرفوه أصلاٌ!  تا تعرف الله بدك تعيش وجودو بحياتك و كل ما تقرّبت منو رح تعرف قديش هوي كلو حب و لا مرة  تبني رأيك عن بعيد...  يسوع أحلى حدا معقول تتعرف عليه، إفتحلو قلبك، هوي ناطر❤ المصدر : صفحة Jesus My Lord

  صورة الأرض مسؤوليتنا   أصدرت الـ " NASA" ومن بعد ٤٣ سنة صورة جديدة للكرة الأرضيّة كاملة ومن خلال لقطة وحدة عن بُعد ١.٦ مليون كلم عن الأرض بواسطة أجهزة متطوّرة خاصة.  يمكن تتفاجؤوا، بس معظم الصور للي عنا إياها عن الأرض هي تركيب صور أجزاء الأرض مأخودة من عدّة أقمار إصطناعية.  فهيدي الصورة هيّي الأولى من نوعها من بعد سنة ١٩٧٢، لمّا طاقم "أبولو ١٧" (17 Apollo) قدر ياخد صورة للأرض من ٤٥٠٠٠ كلم بس. قولك بعد ٥٠ سنة، وبظل التلوّث يللي عم يجتاح عالمنا، كيف رح تكون صورة أرضنا؟ المصدر : صوت المحبّة

  بلا مقابل راقبت مجموعة شباب وصبايا شارع من إحدى شوارع مونتريال بكندا ومن بعدها قرّروا إنّو يعطوا كل شخص وردة مقابل شي كتير غالي وثمين بيملكو: ضحكة.   فمن خلال هالمبادرة المميّزة قدروا هالشباب إنّو يخلّوا كل شخص بيلتقوا فيه يبتسم ويصير نهارو ونهارن أفضل.  تفاجؤوا كيف صارت هالضحكة تعدي وكيف صار الشارع كلّو منوّر بالورود والإبتسامات، فقرّروا إنّو يكملوا مشروعن لمدّة ٣٠ نهار. الدعوة إلنا اليوم بعالمنا المظلم نكون الضحكة للي بتعدي وبتشعّ بلا مقابل، للي بتعكس فرح الرب للأشخاص للي حولينا. المصدر : صوت المحبّة

مريم بتشدنا صوب السما بلّش شهر الورديّة المقدّسة و كتار من الآباء و القدّيسين حِكيو عن هالصلا، مثلاً : "بعد الفرض الإلهي، وذبيحة القدّاس، ما من مديح لذيذ على قلب يسوع وأمّه مريم القدّيسة مثل تلاوة المسبحة بحرارة وإيمان” (القدّيس عبد الأحد). " كل حبّة  من الورديّة المقدّسة لها معنى مُعين تقودك إلى الرب يسوع المصلوب، لذلك صلِّ لأجل ثمار الأسرار المقدّسة، لأنّنا جميعناً مدعوّون بالنعمة المُعطاة لنا فنصلّي من أجل ثمرة السر المقدّس." (البابا يوحنّا بولس الثاني) و غيرها كتير... و الكل أجمعوا إنّو هالصلا هيّي اللي من خلالها إمنا مريم بتشدنا صوب السما و بتبعدنا عن الخطيّة... والله يرافقكن🌹 المصدر : صفحة Jesus My Lord

معك ما في صدَف بيقول القدّيس يوحنّا بوسكو:  "أهرب من الصحبة السيئة كما تهرب من لدغة أفعى سامة.  إذا حافظتَ على صحبة جيدة، أؤكد لك بأنك ستفرح يوماً بالسماء مع القديسين.  أما إن بقيت مع الأصدقاء السيئين، فستصبح سيئاً بنفسك، وستكون في خطر فقدان روحك الى الأبد." يا رب حطّ بدربنا ناس نشوفك فيهن و يشوفوك فينا...  نحنا منعرف إنّو معك ما في صدَف و إنّو كل شخص منلتقي فيه رسالة منّك يا رب.  اعطينا مواهِب روحك القدّوس حتّى نفهم وجود كل شخص منلتقي فيه و نعرف نعكُس صورتك للكل و نميّز بين الخير و الشر... آميـــــــن. المصدر : صفحة Jesus My Lord

  فرِّحنا يا رب ببداية هالأسبوع ، صلا زغيرة كتير من القلب... يا رب... لمّا بطرس قضّى اللّيل كلّو عم يتصيّد و ما طلّع و لا سمكة فات اليأس عا قلبو و إستسلم... إنت بهالأوقات الصعبة عاطول بتتدخّل و كل مرة بتذكّرنا إنّو نآمن و نوثَق لآخر نفس!  يا رب إلنا وقت كتير عم نجرّب نعمِل شي بس شباكنا عم تضلّ فاضية... تعا يا رب، ملّيها من خيراتَك و أعطينا متل فرحة بطرس لما فرِح كتير بالسّمك بعد نطرة طويلة!  فرِّحنا يا رب، فرِّحنا يا رب... آميـــــــن. المصدر : صفحة Jesus My Lord

  بلّش صحّ! مع بداية السنة المدرسيّة والجامعيّة، منتنمى لكل الطلّاب تكون هالسنة سنة دراسيّة مثمرة مكلّلة بالنجاح ومنعطيكن ٤ نصايح ترافقكن خلالها :  - ناموا بكّير وما تطوّلوا السهر، على عكس ما بفكرو المراهقين أو الشباب، لأنّو ساعات النوم خلال الليل، ضروري تكون كافية حتّى تحصلوا على النشاط اللازم.  - ما تنسوا تاكلوا الصبح لأنّو الترويقة هي أهمّ وجبة بالنهار، بتعطيكن الطاقة للي إنتو بحاجة إلها. - منذكّركن تجربو تمارسوا الرياضة بعد نهار طويل متعب. - وأخيراً، خدوا معكن بالشنطة لوازمكن وكتبكن الأساسية بس، لتجنّب وضعية جسم سيئة ووجع الضهر. سنة دراسيّة موفقة ومنتمنى النجاح للجميع والله معكن... #خدّام_الربّ   #صوت_المحبّة