الزوادة اليومية

الصّادقون الله معكن... بزمن كترت فيه الألوان، وصار كل لون يتصارع مع التّاني وصاروا النّاس ملوّنين، أشبه بالحرباية، بتتبدّل ألوانن كلّ مرّة بيتعرّضوا لأشعّة الشّمس، وصاروا أشبه بقوس القزح فيهن من كل الألوان، بيجي شاب لعند بيّو مصدوم من هالحالة، ومش قادر يعرف الصّالح من الطّالح، والصّادق من الكذّاب، بيسألو وبيقلّو:  «يا بيّي مين هنّي النّاس الصّالحين؟»  جاوب البيّ :  «هنّي يلّي ما بيعرفوا يتلوّنوا تحت أشعة الشّمس، لأنّو بياض قلوبهن غالب على كل الألوان كل ما جرّبوا يتلوّنوا.» الزّوّادة بتقلّي وبتقلّك : الصّدق بيستند على القلب ونقاوتو، والصّادقين هنّي بالدّرجة الأولى أنقياء القلوب يعني ورثة الملكوت لأنّو أنقياء القلوب هنّي يلّي بيورتوا ملكوت السّماء، والله معكن. المصدر : صوت المحبّة

  صرخَة صوب السّما بيقول أحد الأخصّائيّين النَّفسيّين إنّو لاحَظ إنّو كلّ النّاس هالإيّام بتبيّن منيحة و ماشي حالها لوقت ما تِحكي معها بأي موضوع عميق، وقتها رح تعرِف إنّو كل شخص ورا إبتسامتو و صُوَرو الحلوين في قصّة حزينة عم يجرّب يخبّيها و يهرُب من إنّو يواجِهها... يا رب نحنا تعبانين عا كل المستويات، ابعتلنا روحَك القدّوس اللّي هوّي بالتّعب راحة و بالبكاء تعزية!  صلاتنا اليوم صرخَة صوب السّما:  يا مخلّص خلَّصنا! المصدر : صفحة Jesus My Lord

  صايِم... بيخبرو عن زلمي راح عالشّغل مين ما يحكيه ما يردّ.  سألوه شو صايِر معو.  قلّن : أنا هيك بعصّب لمّا كون مش شربان قهوتي.  قالولو : بسيطة إذا تأخّرت و ما لحّقت هلّق بتشرَب هون.  قلّن: لأ ما تأخّرت، صايِم.... اللّي بيصوم تا يخبّر الناس و يربَّح ربّنا جميلة لازم يتذكّر شو بيقول يسوع : "وَمَتَى صُمْتُمْ فَلاَ تَكُونُوا عَابِسِينَ كَالْمُرَائِينَ، فَإِنَّهُمْ يُغَيِّرُونَ وُجُوهَهُمْ لِكَيْ يَظْهَرُوا لِلنَّاسِ صَائِمِينَ. اَلْحَقَّ أَقُولُ لَكُمْ: إِنَّهُمْ قَدِ اسْتَوْفَوْا أَجْرَهُمْ." (مت ٦: ١٦)... بداية أسبوع مباركة و الله رفيقكن دايمًا! المصدر : صفحة Jesus My Lord

  إلعَب عا مستوى عالي ! كانِت القديسة تريزيا الطفل يسوع تقول إنها ما بدّا تكون بيّاعة متجوّلة ، لأنّو هيدا الشّغل ما بيربِّح كتير.  و مع هيك في كتير ناس بتعيش بهالطريقة البسيطة و حتّى في منّن بيقبَلوا يندفعلُن بالتّقسيط.  بس أنا بدّي أعمِل مضاربِة ببنك الحب، بدي إلعَب عا مستوى عالي!  معليش إذا خسِرت.  أنا ما بهتم بالنتايج يسوع هوّي اللّي بيهتم فيهن أنا بس بحبّ كتير حتّى إنّي ما بعرِف إذا كنت غنيّة أو فقيرة، هيدا الشّي رح أعرفو بالمستقبل!  عم تقلّنا تريز حبّوا للآخر شو ما كانت النّتايج و بهالطّريقة بتكونوا عم تكنزوا كنوز إلكن بالسّما متل ما قال يسوع و هونيك بتعرفوا قديش ثروتكن الحقيقية... الله معكن! المصدر : صفحة Jesus My Lord

  ملّي وقتَك... بيقولو إنّو ما حدا بيقدَر يزيد وقت عا حياتو بس الأكيد إنّو بيقدَر يزيد حياة عا وقتو!  هيدي نصيحة لكل واحد منّا :  ملّي وقتَك حياة و حب و فرح و غفران لأنّو وقتنا هون محدّد و يمكِن ما يكون في بُكرا، خلّوا كل ثانية هون تكون مميزة و إلها قيمة و هيك منزرَع عالأرض إيمان بكرا بيزهّر بالسّما. الله يزيد حياة عا وقتكُن و يكون عاطول معكن! المصدر : صفحة Jesus My Lord

  كتّروا الصلا !   بيخبرو عن أبونا عم يسألوه الناس عن شو لازم يصومو.  قلّن إنّو الصوم عن الأكل مهمّ بس في شي كتير أهمّ!  صاروا يفكّروا شو معقول يكون أهمّ من الصوم و القطاعة.  قلّن : صوموا عن إنكن تضلّوا تتشكّوا من كل شي، صوموا عن إنكن ما تحبّوا بعضكُن، صوموا عن إنكن تحاكموا بعضكن، صوموا عن إنكن تِجرحُوا بعضكن بالحكي و التصرّف، صوموا عن إنكن تِحكوا عن الصلا بدل ما تصلّوا عنجد!   كتّروا الصلا، الحب، الإيمان، الرّجا و أهمّ شي الشّكر!  اشكروا الله عا كل شي، عا أبسط تفصيل، عا أزغر شغلة... وقتها بس رح يتفتّحوا عيونكُن عا فَيض النعِّم بحياتكُن و رح تصيروا تشوفوا قديش عندكن إشيا بدل ما تضلوا مركزين عالإشيا الناقصة! الله معكن! المصدر : صفحة Jesus My Lord

  اوثقوا فيّي !   الطفل بيفكّر إنّو كل الأباريق سخنة لأنّو مرّة في إبريق حرَقلو إيدو!  و الإنسان هيك بِطبعو لما يخيب أمَلو بِحدا بيصير كتير صعب يرجَع يوثَق بالناس و إذا شخص سبّبلو أذيّة بيصير يشوف كل الناس مؤذيّين ... و الأمثلة ما بتخلَص! ربنا بيقلنا اوثقوا فيّي، أنا هوّي الطريق و الحق و الحياة.  وحدو يسوع المسيح مصدَر الأمان.  معو بتسقُط كل أفكارنا القديمة، معو تعلّمنا مفاهيم جديدة، معو كبرنا و صرنا نعرِف نميّز، معو و مع مواهب الروح القدس صرنا نفهم الإشيا أكتر و ما بقا نشوف المواقف بعيوننا البشريّة بس!  يا ربّ عطينا نكون أطفال بالروح و حكماء بالحياة حتّى معك نتخطّى كل الصعوبات... آميـــــــن. المصدر : صفحة Jesus My Lord

  جوانِح الصوم ! بيقول القدّيس يوحنّا فم الذهب :  "الصّيام وحدَه لا يُصعِدُك إلى السَّماء، بل أنتَ تحتاج معَه إلى أجنحةِ المحبَّة." الصوم عن الأكل مهمّ بس وحدو ما بيكفّي، بدّو محبة تا يِكمَل!  تذكّروا شو بتقول التّرتيلة اللّي تعلّمناها نحنا و زغار :  كيف بتوصَل عالسما إذا ما بتحبّ؟ حِبّ العالم متل ما بيحبَّك الرّب!  المحبة هيّي السّر!  انشالله صومكُن بيكون مزيّن بالمحبة الحقيقية و انشالله جوانِح الصوم و الحب بيحملوكن صوب السّما... آميـــــــن. المصدر : صفحة Jesus My Lord

  الصَوم والصلاة جناحان نطير بهما إلى السماء "وَمَتَى صُمْتُمْ فَلاَ تَكُونُوا عَابِسِينَ كَالْمُرَائِينَ، فَإِنَّهُمْ يُغَيِّرُونَ وُجُوهَهُمْ لِكَيْ يَظْهَرُوا لِلنَّاسِ صَائِمِينَ. اَلْحَقَّ أَقُولُ لَكُمْ: إِنَّهُمْ قَدِ اسْتَوْفَوْا أَجْرَهُمْ. وَأَمَّا أَنْتَ فَمَتَى صُمْتَ فَادْهُنْ رَأْسَكَ وَاغْسِلْ وَجْهَكَ، لِكَيْ لاَ تَظْهَرَ لِلنَّاسِ صَائِمًا، بَلْ لأَبِيكَ الَّذِي فِي الْخَفَاءِ. فَأَبُوكَ الَّذِي يَرَى فِي الْخَفَاءِ يُجَازِيكَ عَلاَنِيَةً” (إنجيل متى ٦: ١٦-١٨) مش ضروري كل الناس تعرف إنّك صايم و لا توقف حياتك لأنّك ما أكلت لكم ساعة!  عيش حياتك اليوميّة، إدرس، إشتغل، إحكي مع الناس، إضحك، إفرح...  أكيد ربنا ما بدّو إنّك تزعل و تضل جائر و ما بتتحاكى و تحكي الناس بطريقة بشعة و تتحجّج بالصَوم!  الصَوم فرح، هوّي طريقة لنتقرّب من الربّ متل ما كان يقول أبونا بشارة أبو مراد :  "الصَوم والصلاة جناحان نطير بهما إلى السماء"... الله معكن. خدّام الرب ®

  صوم بينك و بين ربّك يمكن اليوم أكتر جملة رح تسمعوها و تشوفوها كيف ما برمتو هيّي : أذكر يا إنسان أنّك من التراب و إلى التراب تعود...   في جملة بهالزمن المبارك كتير بتلفتلنا نظرنا و حابين نضوي عليها.  بيقول يسوع ما تفرجو حدا إنكن صايمين، قومو غسلو وجكن و إهتمّو بشكلكن و اضحكو ما تعبسو!  منشوف كتير ناس بتقلّك ما تحكي معي راسي عم يوجعني صايم، أو ناس بتضهر مش مغسلة وجها تا يقولو إنّو هنّي صايمين و مش رايقة معن و عندك ناس إذا ضيفتن شي بيقولولك لأ صايمين ما عم ناكل هالشغلة و هالشغلة.  ..ما تستعملو صومكن للفت النظر و إلّا بيروح ضيعان!  مش الهدف يعرفو كل الناس إنّك صايم أو إنّك بتصلّي.  بلا ما تحكي فرح الربّ اللي فيك بيخبّر عنّك، أعمالك المنيحة بتعكس إيمانك. صوم بينك و بين ربّك اللي شايف كل شي.  دعوتنا إلكن اليوم إنّو تصومو و تعيشو معاني الصوم للآخر مش تحكو عن الصوم و الفرق كبير!  صوم مقبول و الله معكن. خدّام الرب ®

ما تحكموا عالمظاهر ببخبرو عن زلمي لبناني بيزرع تفّاح. الكل بيعرِف إنّو تفّاحاتو كتير طيبين و شكلُن حلو.  هالزلمي بينزّل إنتاجو عالسوق بكياس كبار.  بس مع الوضع الإقتصادي و قد ما صار مستعمِل هالكياس في منن تخزّقوا...  و كتار من التّجار بالمدينة بس يشوفوا الكياس مخزوقة ما يشتروا منّو و يقولوا إذا الكيس هيك كيف التفّاحات؟ أكيد مهتريّين و مش مناح! هالموقف بيذكّرنا بالشخص اللّي بينحكَم عليه من شكلو و تيابو...  في ناس تيابها مش جديدة بس قلبها من ذهب و في ناس تيابها كتير حلوين بس قلبن مش حلو!  و لا مرّة تحكموا عالمظاهر في كتير إشيا بالدني بتبيّن حلوة كتير و هيّي ما بتكون هيك و العكس صحيح!  يسوع علّمنا ما نحكُم و ما ندين و عاطول نقيّم حالنا مش غيرنا!  "لماذا تنظُر إلى القشّة في عين أخيك، ولا تبالي بالخشبة في عينِك؟"... الله يرافقكن. المصدر : صفحة Jesus My Lord

  الإنسان متل السّهم 🏹 بيخبرو عن شب طَموح محمّس كتير يصير رجُل أعمال ناجِح.   كان يضلّ يشتغل ليل نهار حتّى يحقّق هدفو.  مرّة كان ماشي بيمرُق بجنينة كنيسة و بيشوف زلمي ختيار قاعِد.  حشريتو خلّتو يقرّب من الختيار و يسألو شو عم يعمِل. قلّو الختيار: عم بتأمّل جمال الطبيعة و أشكر ربنا عا كل هالإشيا حولي.  قلّو الشب: هيدا تضييع وقت، أنا ما فيّي أقعُد متلك عندي أهداف لازم حقّقها.  إبتسم الختيار و قلّو:  أوقات الإنسان متل السّهم لازم يرجع لورا تا يرجع ينطلق أقوى و الحياة مش شغل و بس!  ما فهِم الشب شو سِمع!  بعد كم سنة صار رجل أعمال كبير بس ما كان عندو لا عيلة و لا أصحاب يتشارَك معُن نجاحو و كان كل وقتو شغل و يضلّ تعبان، لوقت ما تذكّر نصيحة الختيار!  تطلّع صوب السّما، شكر الله عا كل شي، أخد عطلة كرّسها كلّها للرّب و من بعدها رِجع أقوى!  أنتَ يا ربُّ قوّتي ... الله معكن. المصدر : صفحة Jesus My Lord

  الصوم الحقيقي ✝️ بعد كم يوم بيبلّش الصوم الكبير و من أقوال البابا شنودة التالت عنّو :  "الصوم الحقيقي هو الذي يتدرّب فيه الصّائم على ضبط النفس ويستمرّ معه ضبط النّفس كمنهج حياة." متل ما منتحضّر لكتير مناسبات بحياتنا كمان لازم نتحضّر للصوم اللّي هوّي بِدَورو بيحضّرنا للموت و من بعدو للقيامة مع يسوع! منصلّي يا رب صومنا يكون حقيقي و يقرّبنا منّك أكتر حتّى نحسّ بوجودك معنا بكل خطوة و ببركتَك بكل قرار مناخدو... آميـــــــن. المصدر : صفحة Jesus My Lord

  ربنا ما خلق الناس نسخ! "عاتِب صديقَك فلعلّه لم يفعَل، وإن كان قد فعَل فلا يعود يفعل.   عاتِب صديقَك فلعلّه لم يقُل، وإن كان قد قال فلا يكرّر القول.   عاتِب صديقك فإنّ النميمة كثيرة" (سفر يشوع بن سيراخ ١٩: ١٣-١٥) بالحياة مواقف و ظروف كتيرة و ناس كتار و ولا واحد بيشبه التاني، كل واحد بيتصرّف بطريقة، بيفكّر بطريقة، بيهتمّ بطريقة، بيخاف بطريقة، بيعتل همّ بطريقة مختلفة...  ربنا ما خلق الناس نسخ!  خلقن مختلفين و كل واحد بيتميّز بشي مش تا يتخانقوا، بالعكس تا يكَملوا بعضن!  من هون منصلّي عا نيّة وحدة الكنيسة، حط بطريقنا يا رب ناس نشوفك فيهن، نترافق نحنا و إياهن عالطريق اللي بتوصّل لعندك و  علّمنا ما نسمح للنميمة و غيرها تفرّق أشخاص إجتمعوا بإسمك... آميـــــــن. المصدر : صفحة Jesus My Lord

  ورقة الرّوزنامة الله معكن...   بالكنيسة يلّي بقدّس فيها، في رجّال بأغلب الأوقات بعد الذّبيحة الإلهيّة بيتقدّم منّي وبيعطيني أوراق زغار من مصادر مختلفة، متل الرّوزنامة أو خبز الحياة أو من أقوال القدّيسين، ومرّات بتكون الورقة مكتوبة بخطّ إيدو، وآخر مرّة عطاني ورقة كاتبها بخطّ جميل جداً، رح بقراها بكلّ أمانة :  «الصّديق جزء من الحياة، والحبيب نبض الحياة، والأخ أمان، والأخت حنان، والأب فخر، والزوجة إستقرار، والأم ّكلّ ما ذكر سابقًا». الزّوّادة بتقلّي وبتقلّك : الإنسان خلق حتّى يعيش مع أصدقاء وأحبّاء، مع وأخوة وخيّات، داخل مجتمع، وكل أفراد المجتمع بيألّفوا عيلة، والأم هيّي القلب النابض بالعيلة، خلّينا نعتني بقلوبنا لحتّى تضلّ عيالنا ومجتمعاتنا بألف خير، والله معكن. المصدر : صوت المحبّة

  عيد الحب اليوم عيد الحب، وما فيني خلّيه يقطع من دون ما إحكي عن الحب. مين منّا ما بيحبّ؟  منبلّش بالطّفل الزغير ومنخلص مع كلّ إنسان كبير. الكل بيعرف يحبّ! بس حُبّ عَنّ حُبّ بيِفرق !! في حبّ المصلحة اللي نتيجتو فشل العلاقات، وفي حُبّ بدِّي سمِّي: جواب الحبّ!  حب الطّفل هوّ حب بريء للشّخص اللي بيعطيه الحنان والحبّ.  حب اللي ما بيخاف من شي لمّا يكون بين إيدين اللي بيحبّن!  بيعمل أي شي من دون خوف لأنّو بيعرف إنّو اللي بيحبّو مش ممكن يئذيه. الله حبّنا حُبّ كبير ما بيوقف عا حدود! حَبّنا حُبّ من دون شروط.  حَبّنا لدرجة إنّو مات كرمالنا. معقول ما نحبّو نحنا بدورنا من دون شرط أو مصلحة؟! مستعدّين نجاوب على حب الله:  بدِّي حب متلك يا ربّ؟ حُبّ بيمرق بالصّليب وبينتهي بالقيامة؟ عيد حُبّ مبارك عالجميع ♥️ يسوع بيحبّنا، خلّونا نحبّو. الله معكن... خدّام الرب ®

  التّحليل الله معكن...  بيخبّروا عن شاب تخرّج من الجماعة وإنتقل من صالات الجامعة ومختبراتها إلى عالم العمل، وكان متخصّص بالفيزياء.  بأوّل يوم عمل، وقبل ما يدخل على المختبر، بتستوقفو على الباب هالجملة يلّي بتقول :  «إذا حبّيت تكمل حياتك سعيد، ما تحلّل كلّ شي، ولا تفسّر كلّ شي، ولا تدقّق بكلّ شي، كتار هنّي يلّي حلّلوا الألماس وإكتشفوا إنّو بالأصل حبيبات من الفحم».  الزوّادة بتقلّي وبتقلّك : الحياة حلوي ببساطتها، خلّينا نعيشا بسلام وبلا تعقيد، ولا يوم لازم ننسى إنّو أجسادنا هيّي حبيبات تراب وللتّراب رح بترجع، خلّينا نجمّل أرواحنا لأنّها من الله خرجت، وللّه لازم ترجع، والله معكن. المصدر : صوت المحبّة

  ما تخافوا !   مرّة انسأل أحد القدّيسين ليش الله تاركنا و ما بيعمل شي تا يمنع عنّا الإشيا اللي عم تصير.  جاوب: كل ما يزيد الطبيب عنايتو الطبيّة لمريض كل ما يكون عم يقطع الأمل من شفائو!  لمّا ربنا "يتركك" بيكون بدّو اياك تقوى و تتعلّم لأنّو بيحبّك و بيعرف شو الأفضل إلك! القدّيس صاحب هالفكرة هوّي جيروم اللي قال:  "الأب لا يهذّب إبنه لو لم يحبّه، والمعلّم الصالح لا يصلح من شأن تلميذه ما لم يرَ فيه علامات نوال الوعد.  عندما يرفع الطبيب عنايته عن مريض، يكون هذا علامة يأسه من شفائه."...  ما تخافوا و اوثقوا بحكمة ربنا و الله يرافقكن عا طول وين ما كنتو! المصدر : صفحة Jesus My Lord

  لا تدينوا كي لا تدانوا ! بيخبرو عن قصر بيشتغلو فيه ٤ حرّاس.  كل حارس واقف عا ميلة من القصر و ولا مرّة واحد منّن شاف إلّا الميلة اللي هوّي بيحرسها.  و لما انطلب منّن يوصفو القصر، كانت الأجوبة مختلفة مع إنّن عم يوصفو نفس المطرح بس كل واحد عم يخبّر من الزاوية اللي هوّي شايفها!  و هيك نحنا، ما تسمحوا لحالكن تحكموا عا حدا أو عا حدث معيّن لأنكن بتكونوا شايفين الأمور من زاوية وحدة و الصورة ما بتكون مكتملة و في إحتمال كبير تظلموا الناس بحكم جزئي!  لا تدينوا كي لا تدانوا! الله معكن! المصدر : صفحة Jesus My Lord

  النّدم الله معكن...   بيخبّروا عن شاب رجع على البيت وكان ناقم على كل النّاس يلّي التقاهن بحياتو، دخل على غرفتو، سكّر الباب ورفض إنّو يقابل حدا، مرق النّهار وهوّي على هالحالة، المسا بتدقّ إمّو  على باب الغرفة بيفتحلها، بتفوت وبتسألو عن سبب زعلو ونقمتو، جاوب بكلّ حسرة: أكتر صديق لإلي خانّي وطعنّي بضهري، بتقلّو الإم: يا إبني الحياة مدرسة والنّاس أجناس، ما تندم على معرفة أيّ شخص بحياتك، النّاس الطيّبين بيزرعوا بحياتك السّعادة، والنّاس الخاينين بيحطّوك إنت والتّجربة وجّ بوجّ، وأسوأ النّاس هنّي يلّي بيعطوك الدرّوس القيّمة يلّي ما بتنتسى. الزّوّادة بتقلّي وبتقلّك : بالحياة في كتير صعوبات وتجارب بتعترضنا، شو حلو لمّا منميز الخير من الشّر ومنتعلّم من الماضي وما منسمح أبدًا إنّو يكون سجن لإلنا، إنّما مدرسة كلّ يوم بتعلّمنا درس جديد، والله معكن. المصدر : صوت المحبّة

  نقطة الضعف ! صار الصوم الكبير قريب و لهالمناسبة و مع كل شي عم نعيشو بيقلنا البابا شنودة التالت :  "خذ نقطة الضعف التي فيك وإجعلها موضوع صلواتك وجهادك خلال الصوم." يا رب عِنّا نقاط ضعف كتيرة بدنا نصلّيلك تساعدنا تا نصير أقوى.  ساعدنا نقوّي إيمانّا، ساعدنا ما بقا نخاف، ساعدنا نفهم انّو إنت ما بتبعت شر للإنسان و إنّو الشر من صنعنا نحنا و نتيجة إشيا نحنا عم نعملها، ساعدنا نفهم و نقدّر الناس اللي حولنا، ساعدنا نتغلّب عا كبرياءنا و نروح صَوب الشخص الآخر نصالحو لأنّو هالدني ما فيها شي شو ما كان سبب الخلاف... نقاط ضعفنا ما بتخلص يا رب، منرفعلك إياها كلها و منصلّيلك عنها طالبين مساعدتك و رحمتك اليوم و كل يوم... آميـــــــن. المصدر : صفحة Jesus My Lord

  السّخرية الله معكن...  بيخبّروا عن رجّال ختيار كان مسافر بالقطار، وكانت كرستو بالوسط، بين شابّين مبيّن عليهن إنّهن من يلّي بيدّعوا المعرفة، وعندن حبّ للسّخرية والإستهزاء من الآخرين، قرّروا يسخروا من الرّجال الختيار، بيدخلوا معو بحوار وبيصيروا يسألوه أسئلة، وكان يجاوب بكلّ طيّبة وبساطة وكانوا هنّي عم بيتابعوا أسئلتهن يلّي بتحمل بطيّاتها سخرية وإستهزاء، بيسألو أحد الشّباب وبيقلّو: ممكن تقلّي إنت جاهل أو أحمق؟  قلّو بكلّ بساطة: أنا لا جاهل ولا أحمق، بس أنا كتير حزين لأنّي قاعد بين تنين الأوّل جاهل والتّاني أحمق. الزوّادة بتقلّي وبتقلّك : ما تسخر من النّاس ولا تقلّل من إحترامك لإلهن، خلّينا نتذكّر إنّو يلّي بيدقّ على الباب أكيد بدّو يسمع الجواب، ويلّي بيسأل أسئلة ما بتعنيه، أكيد رح يسمع كلام ما بيرضيه، والله معكن. المصدر : صوت المحبّة

  النّاس أجناس الله معكن...   بيخبّروا عن أحد الشّبان يلّي كان عندو حلم إنّو يكون أشجع الرّجال، أقواهن وأسعدهن، بيوم من الإيّام قصد أحد الحكماء وطلب منّو إنّو يتّلمذ على إيدو لحتّى يحقّق حلمو، بعد شهور من التّتلمذ على إيدين هالرّجال الحكيم، وبعد الكتير من الإختبارات والإمتحانات، توصّل الى حقائق تلاتي، الأولى بتقول:  الرّجال الشّجاع هوّي يلّي بيبادر إلى الإعتذار وقت الغلط، والرّجال القوي هوّي يلّي بيسامح وبيعفي عند المقدرة، والرّجال الأسعد هوّي يلّي أفاض عليه الرّب نعمة النّسيان. الزّوّادة بتقلّي وبتقلّك : تفكير البشر بيختلف عن تفكير الله، ومفاهيم البشر ما بتتطابق مع مفاهيم الله، نيّال يلّي بياخد يسوع معلّم لإلو وبيمشي حسب تعاليمو، أكيد بيكون الأسعد والأشجع والأقوى، والله معكن. المصدر : صوت المحبّة

  النميمة الله معكن...  بيخبّروا عن تلميذ كان كتير ناجح بالمدرسة، رفقاتو كانوا كتير يغاروا منّو، ومرّات كانوا يحكوا عنّو أحاديث مش صحيحة، هالموضوع كتير زعجو وقرّر يتوجّه لعند مدير المدرسة، يشكيلو همّو ويطلب نصيحتو، المدير إستمع للتّلميذ يلّي عرض مشكلتو بالتّفصيل وجاوبو بكلّ حكمة وقلّو :  يلّي بيحكوا عنّك وبقفاك هنّي تلات أقسام من النّاس  :  يلّي ما بيملكوا شو بتملك إنت، ويلّي ما بيقدروا يكونوا متلك، ويلّي ما بيوصلوا للمحلّ يلّي إنت واصل لإلو، ساعتها التّلميذ إبتسم، رجع على الصّف فرحان وعم يشكر الله على الوزنات والنّعم يلّي أفاضها الرّب بحياتو. الزّوّادة بتقلّي وبتقلّك : عيش حياتك، تاجر بوزناتك، ما تهتمّ لحديث النّاس  ، ما تغيّر حالك كرمال حدا، عيش بمخافة وتقوى الرّب، لأنّو هوّي عارف بخفايا قلوبنا، وحسب صاحب المزامير هوّي فاحص الكلى والقلوب، والله معك. المصدر : صوت المحبّة

  المصفاية وإبرة الخياطة بيخبرو عن مصفاية عم تنتقد إبرة خياطة... احزروا ليش!؟  قال لأنّو عندا فتحة!  المشكلة إنّو المصفاية كلها فتحات!  و قدّيش منشوف هالشي بحياتنا كل يوم... ناس بتنتقد عيوب غيرها و هيّي عيوبها أكتر بكتير! "قالَ الربُّ يَسوعُ: لا تَدِينُوا لِئَلاَّ تُدَانُوا. فَبِمَا تَدِينُونَ تُدَانُون، وبِمَا تَكِيلُونَ يُكَالُ لَكُم. مَا بَالُكَ تَنْظُرُ إِلى القَشَّةِ في عَيْنِ أَخيك، ولا تُبَالي بِالخَشَبةِ في عَيْنِكَ؟" بس هيك... و الله معكن. المصدر : صفحة Jesus My Lord

  الصّمت   الله معكن... بيخبّروا عن شبّ اتّهم بجريمة، شهدوا عليه شهود زور، أُدخل السّجن، ويوم المحاكمة حضروا محامي الإدّعاء ومحامي الدّفاع، كلّ واحد حكي بدورو يلّي ادّعى ادّعى، ويلّي دافع دافع، لحتّى وصل دور المتّهم، قلّو القاضي شو عندك تقولو للّجنة، سكت وما حكي ولا أيّ كلمة، سألو القاضي ليش بعدك صامت ومش عم تحكي؟  قلو:  «يلّي ما بيفهم من صمتي إنّي بريء، من غير الممكن يأكّد براءتي بس يسمع كلماتي.» الزّوّادة بتقلّي وبتقلّك : بزمن كتر في الكلام وصار الصّمت عملة نادرة، بدعيك تفكّر بالقول الفرنسي :  «تكلّم إذا كان هناك لغة أبلغ من الصّمت»، والله معك. المصدر : صوت المحبّة

بتعرفو وين تلاقوه! من أجمل أقوال الطوباويّ كارلو أكوتيس :  "الحزن هو النظرة نحو الذات ، والسعادة هي النظرة إلى الله". لمّا نتطلّع عا حالنا عاطول منلاقي إشيا تزعّلنا!  مثلاً : كان عندي حلم ما حقّقتو، أنا متخانق مع حدا، أنا مريض، أنا تعبان، أنا عندي مشاكل... بس لمّا نتطلّع صوب الله ما منشوف إلّا الإشيا الحلوة: يسوع بيحبنا، يسوع خلّصنا و عطانا الحياة الأبديّة، الله بيغفرلنا خطايانا، الله حاضر معنا عاطول...  تذكّروا إنّو الشرّ بيجي من الإنسان... و ربنا عاطول مصدر فرح و حُبّ و رجا و أمل!  بس تكونو عم تفتشو عالفرح الحقيقي صرتو تعرفو وين تلاقوه! الله معكن! المصدر : صفحة Jesus My Lord

  ما تخافوا شو ما صار بيقول البابا شنودة التالت جملة نحنا كتير بحاجة نسمعها كل يوم :  "في كل مرّة تخاف وبّخ نفسك على قلّة إيمانك." آمنوا و ما تخافوا، اتّكلوا عليه و هوّي بيدبّر كل شي بحكمتو و مشيئتو... ما تخافوا شو ما صار.... بس هيك! الله معكن. المصدر : صفحة Jesus My Lord