الزوادة اليومية

  البكاء الله معكن... أحد الحكماء كان على طول يقول: ما تبكي إذا فقدت شخص عزيز على قلبك لأنّو الموت أخدو، ما تنسى هالشّخص أمانة والرّب افتقد أمانتو، ما تبكي إذا ابتعد عنّك أعزّ الأصدقاء وما برّر سبب غيابو هوّي يلّي خسرك مش إنت يلّي خسرتو، ما تبكي إذا خانك أعزّ اصدقاءك، شكور الله إنّك ما عشت طول العمر مغشوش بصدقو وبصداقتو، ما تبكي إذا ظلمك أقرب المقرّبين لإلك، شكور الله إنّك مظلوم مش ظالم، حاول طول حياتك ما تكون سبب لبكاء الآخرين وما تظلم حدا بحياتك. الزّوّادة بتذكّرني وبتذكّرك : بالقول الشّعبي: البكاء صابون القلوب، خلّي دموعنا تغسل آثامنا وتنقّي قلوبنا، والله معكن. المصدر : صوت المحبّة

  الجمال الله معكن... بيخبّروا عن صبيّة كان همّها الأوّل والأخير السّعي لإكتشاف سرّ الشّباب الدّايم والجمال يلّي ما بيزول، إستنفدت وقت طويل بالتّفتيش وجرّبت تلاقي الجمال بكلّ الأمكنة والأزمنة، وبيوم من الإيّام خلال بحثها بإحدى المكتبات ومطالعتها لكتاب عنوانو الخلود والجمال، بتستوقفها جملة بتقول : الجمال الحقيقي ولا مرّة بيكون بالأمكنة إنّما بالأشخاص يلّي بيرافقونا على هالأمكنة، والجمال ما بيكون بكيفيّة تمضيتنا للأوقات إنّما بالأشخاص يلّي منعيش معهن لمّا منكون عم نمضّي هالأوقات، من هاك اللّحظة وقّفت الصبيّة البحث والتّفتيش وقرّرت تستفيد من كلّ لحظة بتقضّيها مع الأشخاص يلّي بتحبّهن. الزّوّادة بتقلّي وبتقلّك : الجمال الحقيقي بينبع من داخل الإنسان، لا من الأمكنة ولا من الأزمنة يلّي منمضّي وقتنا فيهن، إنّما بينبع من داخلنا ومنتقاسمو مع يلّي منحبّهن، والله معكن. المصدر : صوت المحبّة

  أنا بوثق فيك ✝️ بيقولو إنّو لمّا ربنا يستجيب صلواتنا بيكون عم يزدلنا إيماننا.  و لمّا يمرق وقت و يرجع  يستجيب بيكون عم يعلّمنا الصبر.  و إذا ما إستجبلنا طلبنا بيكون عندو شي أحسن لإلنا!  أكتر شي حلو هوّي لمّا نكون عم نسأل الربّ ليش هالشغلة عم تصير معي؟ ليش أنا من بين الكل؟ و بعد فترة بس نفهم  بيتحوّل سؤالنا لشكر لله لحمايتو إلنا بوقت ما كِنّا عم نفهم حكمتو...  يا يسوع إنّي أثق بك و لتكن مشيئتك... بس هيك ❤️ المصدر : صفحة Jesus My Lord

  ما طلعلي شي! مرّة انسأل شب إنت شو طلعلك من الصلا؟ جاوب : ما طلعلي شي!  قالولو : لكن لشو بعدك بتصلّي!  قال : مش بس ما طلعلي شي، رح قلكن شو راح منّي! كمّل و قال: راح منّي الزعل، راح منّي التعب، راحت منّي الأنانية، راح منّي الخوف، راحت منّي الوحدة... مع ربنا حسابات الربح و الخسارة مش موجودة لأنّك عاطول ربحان بس بيكفي تتطلّع حولك تا تشوف النِعَم اللي الله عاطيك اياها... آميـــــــن! المصدر : صفحة Jesus My Lord

  بلا كاميرات ! بيخبرو إنّو بإلمانيا في مطارِح بيعلّقوا فيها كياس اكل للمحتاجين اللّي بيقدروا يمرقوا ياخدوا اللّي بدّن ايّاه وقت اللّي بدُّن بدون إحراج و لا كاميرات و لا شي...  بس بدنا نعمِل خير لازم نَعملو بِحُب و بدون ما نكون ناطرين بالمقابل لا شُكر و لا شُهرة و لا شي!  ما تِنسوا شو قّلنا يسوع ما تخلّوا إيدكُن اليمين تعرِف شو عملِت إيدكُن الشمال... الله معكن. المصدر : صفحة Jesus My Lord

  يا ربّ يا ربّ : ناس كتير بهالدني عم يناموا جوعانين، كون خبزن. ناس كتير بهالدني تعبانين، كون الراحة لإلن. ناس كتير بهالدني مرضى، كون علاج لإلن. ناس كتير بهالدني وحيدين، كون رفيقهن. ناس كتير بهالدني خايفين، كون إلهن الأمان. ناس كتير بهالدني محتارين، كون إلهن مصدر الحكمة. ناس كتير بهالدني خسروا أشخاص بيحبّوهن، كون إلن العزا و الرجا. ناس كتير بهالدني ضايعين كون إلهن بوصلة تردّن صوبك... نهاركم مبارك 🌹 المصدر : صفحة Jesus My Lord

  أعضاء الجسم الله معكن... بيخبّروا عن إستاذ علوم الحياة، كان عم يشرح لتلاميذو عن أعضاء الجسم وعن أهميّة كلّ عضو، وشو كانت صدمة التّلاميذ كبيرة لمّن قلّهن الأعضاء عندها ذاكرة وبتتعلّم من كلّ تجربة وخبرة بتمرق فيها، مثلاً القلب بيسكر وما بيوعا من سكرتو إلّا إذا تألّم، والعقل يصاب بالتكبّر وما بيرجع لحجمو الطبيعي إلّا من خلال الدّروس والعبر، والإجر بتفتكر إنّو عندها القدرة على المشي ع دروب الحياة وما بتعرف قدرتها إلّا لمّا بتسقط بالحفر، إذا بدنا ناخد الإنسان ككلّ ما بيعرف حجمو وقياسو إلّا إذا امتحن بالتّجارب، هيّي الوحيدة يلّي بتعلّم العبر. الزّوّادة بتقلّي وبتقلّك : لازم نشكر الله على كلّ عضو بجسدنا، لازم نشكرو على حواسنا، وشو حلو نحط هالأعضاء والحواس بخدمة مشروع الرّب الخلاصي، والله معكن. المصدر : صفحة Jesus My Lord

  السلحفاة بيخبرو عن سلحفاة زغيرة عايشة بالغابة مع عيلتها و باقي الحيوانات.  كل يوم تشوف الأرنب عم يركض بسرعة و تجرّب تعمل متلو ما كانت تقدر... بعدين فكّرت إنّو أكيد المشكلة من بيتها التقيل لو بتقدر تشيلو بتصير سريعة كتير!  بس هيّي مش عارفة إنّو بدون بيتها اللي الله عطاها إياه تا يحميها بتموت! الزوّادة اليوم رسالة لكل واحد مِنّا :   ما تتغيّر كرمال تصير متل حدا، الله خلقنا مختلفين و مميّزين!  أغمرنا يا رب بحبك و رحمتك و إزرع فينا القناعة... مِنّك يا رب منطلب! المصدر : صفحة Jesus My Lord

  بائعة الورد بيخبرو عن شب و صبيّة ماشيين عالطريق.  بتجي بنت زغيرة بتبيع ورد بتطلب منّن يشتروا وردة.  قام الشب إشترى كل شي معها.  فِرحت كتير البنت شكرتو و راحت.  لمّا سألتو الصبيّة ليش أخد كل الوردات قلها : حتّى ما تضل الزغيرة كل النهار بالشمس عم تجرّب تبيعن هيك فيها تروح تلعب مع رفقاتها بدل ما تكون عم تشتغل هيدي طفلة! هالشب فكّر بمصلحة الزغيرة و هوّي ما بيعرفها حتّى كيف نحنا ربنا اللي خالقنا وحافِظنا معقول للحظة تفكروا إنّو ناسينا!  قد ما صعبت الظروف، آمنوا إنّو يسوع حاضر و سامع و رح يتدخّل بالوقت اللازم... الله معكن. المصدر : صفحة Jesus My Lord

  سوء الظّن الله معكن...  بيخبّروا عن شاب كان شكّيك، صاحب أحكام مسبقة، وعندو سوء ظن بالآخرين، جرّب كتير ينتصر على العادة البشعة الموجودة عندو بس مع الأسف ما كان قادر لا ينتصر عليها ولا يتخلّص منها، وبيوم من الإيّام بيطلب من إمّو  فنجان شاي بتقلّو حط البريق على النّار وأنا جايي بحضّرلك الشاي، وبلحظة بيلاقي حالو واقف بالمطبخ قدّامّو  في بريق الشّاي بس ما كان عم يتشجّع يمد ايدو ويحملو، بيسمع صوت إمّو  عم بتقلّو ليش مش عم تحمل البريق؟، قلّها سوء ظنّي مش عم يسمحلي، لمّا سألتو عن السّبب قلّها مبارح كان سخن وحرقني. الزّوّادة بتقلّي وبتقلّك : كلّ الأمور بالحياة بتتغيّر، الإنسان بحدّ ذاتو بيتغيّر، ما تسمح لسوء الظّن يحجّمك ويسمّرك بمحلّك لازم تنتصر على سوء الظّن وتشيل من بالك الأحكام المسبقة وتمشي مع الآخرين على درب الرّب، والله معك. المصدر : صوت المحبّة

  جائزة نوبل للإنسانيّة ! معروف إنّو القدّيسة تريزا دي كالكوتا حصلت عا جائزة نوبل للسلام تقديرًا لمجهودها بمساعدة الإنسانيّة.  بس اللي مش كتار بيعرفوه إنها ما قبلت عشاء نوبل التقليدي وطلبت بدالو إنّو تتقدّم الـ 192 ألف دولار لمساعدة الناس الفقرا بالهند! الناس اليوم بتفتّش عالشهرة و عالمال و عالمظاهر و قليل كتير اللي مستعدّ يتخلّى عن كل هالإشيا تا يساعد غيرو...  عطينا يا رب قلب متل قلبك و متل قلوب القدّيسين تكون إنت ساكن فيه و هوّي يختار خطواتنا و أفكارنا و حياتنا... آميـــــــن. المصدر : صفحة Jesus My Lord

  المرآة والوجه الله معكن... بيخبّروا عن صبي من هوّي وزغير كان يسمع إمّو  تقول:  الوجّ هوّي مراية للقلب كلّ شي بقلبك بينعكس على وجّك، بيوم من الإيّام بيوقع وبيجرح وجّو بياخدوا لعند الطّبيب بيقطّلبو وجّو، بيركض لعند إمّو  وبيقلّها وجّي انجرح يعني قلبي انجرح، بتقلّو الإم مشكلة المراية والقلب قصّة أكبر من الجروح والقطب، لمّا المراية بتنكسر كلّ الصّور بتتشوّه متل القلب لمّا بينجرح كل الحقايق بتتشوّه. الزّوّادة بتقلّي وبتقلّك : القلب مركز العاطفة والأحاسيس، لازم نحافظ عليه وما نسمح إنّو ينجرح لأنّو مركز حضور الرّب، هوّي يلّي قال يا بني عطيني قلبك، والله معكن. المصدر : صوت المحبّة

  المظاهر الخارجيّة الله معكن... بيخبّروا عن صبيّة كانت كتير تهتمّ بمظهرها الخارجي، كلّ يوم تتأخّر على شغلها والسّبب إنّها كانت تقضّي وقت طويل قدّام المراية لتختار تيابها وتهتمّ بشعرها وجمال وجّها، تعرّفت على شاب وكانوا على طول يتزاعلوا والسّبب هوّي التّأخير على المواعيد، جرّب كتير يشرحلها ويقلّها إنّو سبب التّأخير هوّي التلهّي بالأمور الخارجيّة والإهتمام بالمظهر الخارجي، بس مع الأسف ما كانوا يوصلوا لنتيجة. بعيد ميلادها بعتلها باقة من الورد مرفقة ببطاقة معايدة مكتوب عليها: يلّي بتعّب الإنسان هوّي الإنخداع بالمظاهر الخارجيّة والوقوف عند حدود الملابس وعدم الدخول إلى القلب، يلّي بدّو يحصل على لؤلؤة ثمينة لازم يغوص إلى عمق الأعماق. الزّوّادة بتذكّرني وبتذكّرك : بكلام السّيد المسيح لتلاميذو بعد ليلة طويلة من الصّيد وكانت شباكهن فاضية، قلّهن إذهبوا إلى العمق وهونيك بتحصلوا على أوفر الغلال، خلّينا نتخطّى الحدود الخارجيّة نترك الشّط ونذهب للعمق، أكيد هونيك رح منلاقي كنوزنا، وما لازم ننسى محلّ يلّي بيكون كنزنا هونيك بيكون قلبنا، والله معكن. المصدر : صوت المحبّة

  ساكِن السّما حدّكن ! يسوع ما وَعَدنا إنّو دايمًا كل الناس رح يحبّونا، بس وَعَدنا إنّو هوّي رح يحبّنا عاطول!  و نحنا منتصرَّف بالعَكس!  منزعَل إنّو هالشَّخص ما بيحبني، هالشَّخص ناسيني، هالشّخص زَعَجني... منهتَم بالناس و مننسَى اللّي عطانا وعد أبدي بالحب!  كل ما ضاقِت فيكن الأرض ما تنسوا إنّو ساكِن السّما حدّكن و معكن إلى أبد الآبدين. آميـــــــن! المصدر : صفحة Jesus My Lord

  الإيمان شجاعة بيقولو إنّو الإيمان و الخوف متل القزاز و الحجر مش ممكن يجتمعوا بنفس المطرح!  بالنهاية الإيمان شجاعة و ثقة و الخوف متل الحجر مؤذي و قاسي! يا ربّ عطينا نآمن و نوثق فيك و ما نخلّي الخوف يلاقي طريق عا قلوبنا أبدًا... معك لا أخاف يا سيّد حياتي... أنت لدربي أوفى صديق❤️ المصدر : صفحة Jesus My Lord

  الأوفياء الله معكن... بيخبّروا عن شاب كان عم بيعاني من الخيانات المتتالية من قبل الأصدقاء، ورفاق الدّرب، وأصحاب الشّغل لدرجة إنّو ترك بيتو بالمدينة وقرّر يعيش وحدو بكوخ بالغابة، بيوم من إيّام التّلج والبرد بيلتقي صيّاد كبير بالعمر بيطلب منّو يفوت على كوخو المتواضع لحتّى يقدملو فنجان سخن، بيبلشوا يتحدّثوا وبيدخل معو بحوار عن الخيانة والوفاء بيقول الصّياد للشّب النّاس الأوفياء متل النّجوم ما بتقدر تشوفهم إلّا باللّيل ولمّا بتشتدّ الظّلمة، هيك الأوفياء والمخلصين بوقت الشدّة بينصهروا وبيبيّن معدنهم الجيّد والتّمين، بس مع الأسف في كتار خونة بيتساقطوا وقت الشّدة وبينطفي نورهن.  الزّوّادة بتقلّي وبتقلّك : بالحياة في كتير صعاب بتعترضنا متل النّار بتنقّينا وبتخلّينا نبيّن على حقيقتنا، نيّالنا إذا كنّا أوفيا وصمدنا بوجّ التّجارب لأنّو يلّي بيصبر للنّهاية بيخلص، والله معكن. المصدر : صوت المحبّة

  الوحدة الله معكن... بيخبّروا عن شاب كان عايش بعجقة الحياة، وعلى طول كان يخاف إنّو يخسر أي حدا من رفقاتو وأصحابو وأصدقاؤو، كان يساوم على كلّ المفاهيم، ويعمل أعمال ما بتطابق مع المبادئ يلّي تربّا عليها، كان كلّ يوم يخزق ورقة من وراق الرّوزنامة ويقرا شو مكتوب عليها، بيوم من الإيّام بيطلعلو ورقة مكتوب عليها: لو كانوا الكلّ ضدّك، وشفت حالك ماشي عكس السّير، لازم تمشي حسب إلهامات عقلك وإرشادات ضميرك، تمسّك بمبادئك حتّى لو صرت عايش وحيد لأنّو الوحدة أفضل من إنّك تعيش عكس نفسك لإرضاء الآخرين. الزّوّادة بتدعيني وبتدعيك : لنتأمّل بحياة القدّيسة تريزيا الطفل يسوع، عاشت حياة نسكيّة بعيدة عن كلّ النّاس بس كانت عايشة حسب القوانين الرّهبانية وتحت نظر الله، ولا يوم طلعت للرّسالة خارج الدير، أعلنتها الكنيسة شفيعة للمرسلين الأقرب الى النّاس، والله معكن. المصدر : صوت المحبّة

  الكلام والصّمت الله معكن... بيخبّروا عن شاب كان يعاني من مرض كترة الحكي، جرّب كتير يضبط لسانو بس مع الأسف بنهاية المطاف كان يفشل، بيوم من الإيّام بيقصد مركز للصّم والبكم وكان هدفو يتعلّم منّهن الصّمت، بعد كم يوم بيتعب بيقرّر يترك المركز، بيروح ليقابل المدير ويبلّغو قرارو، بيقلّو المدير بدّك تفلّ أكيد ما بمنعك بس اسمحلي أعطيك نصيحة: من أجمل المواقف إنّك تتعلّم تخلّي صمتك يتكلّم، وتخلّي كلامك يصمت، بهاك الوقت بتكون عم تكتب على قلوب النّاس بحروف من دهب. الزّوّادة بتقلّي وبتقلّك : في كتير من المواقف قدّامها الصّمت بيكون معبّر أكتر بكتير من الكلام، كرمال هيك حكي إذا في عندك كلام أبلغ من الصّمت، والله معك. المصدر : صوت المحبّة

  الأنوار الأرضيّة ! بيخبرو عن حشرة عم تطير و تقرِّب عالضّو ضلّت تقرِّب حتى حرقِت جوانحها...  آنتَ كإنسان انتِبه تحرُق حالَك إذا لحِقت الأنوار الأرضيّة...  وحدو يسوع المسيح نور العالم اللّي كل ما نقرِّب منّو منصير نشوف أوضَح و ما منحترق ابدًا!...  الله يرافقكن. المصدر : صفحة Jesus My Lord

  إنت وحدك بتكفينا! بيقول القدّيس أثناسيوس : "الروح القدس هو الَّذي يقدّم لنا جسد الربّ يسوع من على المذبح.. يقدّم للكنيسة جسد المسيح ليصير طعامها طول غربتها على الأرض فتحيا وتعيش عليه وتزداد ثباتاً." منصلّيلك يا يسوع تعطينا مواهب روحك القدّوس و من خلالو جسدك المقدّس حتّى نقدر نعيش غربتنا عهالأرض عا رجا اللقاء فيك.  اعطينا القربان زوّادة... إنت وحدك بتكفينا!  إنت اللي قلت من أكل جسدي لا يجُع أبدًا و من شرب دمي لا يعطش أبدًا! المصدر : صفحة Jesus My Lord

  ما تستحي بيقول القدّيس يوحنّا فم الذَّهب :  "إخجل عندما تخطىء ولا تخجَل عندما تتوب فالخطيئة هي الجرح والتوبة هي العلاج.. الخطيئة يتبعها الخجل والتوبة يتبعها الجرأة لكن الشيطان قد عَكَسَ هذا الترتيب فيعطي جرأة في الخطيئة وخجل من التوبة!" ما تستحي تصحّح غلطك بالعكس لازم تكون فخور بحالك و بالقوة اللي عطاك اياها يسوع تا ترجع عالطريق الصح... ما تِقبَل الخطيِّة تتحكّم فيك... الله معكن. المصدر : صفحة Jesus My Lord

  حليف من جوّا ! بيقولو بالتاريخ إنّو مستحيل عدوّ يقدر يحتلّ بلد معيّن إلّا إذا كان عندو حليف من جوّا!  نفس الشي نحنا ما بيقدر علينا العدوّ إلّا إذا نحنا ما سيطرنا عا جوّاتنا و خلّينا شقفة مِنّا تتّفق معو، الشي اللي بيضعّفنا أكيد! حَصنوا حالكن بالرب و ما رح تتطلعوا إلّا ربحانين. المصدر : صفحة Jesus My Lord

  الدّرس الصّعب الله معكن...  بيخبّروا عن الفيلسوف بسكال بيوم من الإيّام سألو أحد الصَّحافيّين شو هوّي أصعب درس بحياتك؟ جاوب لمّا كنت تلميذ على مقاعد الدّراسة كنت إعتبر أصعب درس هوّي يلّي لازم إحفظو قدّم في فحص وإنجح، ولما كبرت اكتشفت إنّو الدّرس الصّعب هوّي يلّي لازم إنساه خصوصًا إذا كانت راسب فيه. الزّوّادة بتقلّي وبتقلّك : الحياة مدرسة وكل مرحلة من مراحلها فيها دروس صعب نحفظها ودروس صعب ننساها الأهم يلّي منتعلّم منها دروس، والله معكن. المصدر : صوت المحبّة

  الجمال بقلبو أصلاً ♥️ انسأل مرّة نحّات كيف بتقدر تعمل إشيا هلقد حلوة من الصخر القاسي!؟ جاوب: الجمال بقلبو أصلاً، أنا بس بشيل الصخر الزايد... و إنت كمان الله زرع فيك قلب حلو أصلاً بيشبه قلبو! شيل كل شي واقف بينك و بين الربّ و مبعدك عنّو و ضلّك عم تقول يا يسوع الوديع و المتواضع القلب إجعل قلبنا مثل قلبك! المصدر : صفحة Jesus My Lord

قلّة الكلام الله معكن... بيخبّروا عن صبيّة كانت تعاني من مشكلة الثّرثرة وكتر الحكي، وعلى طول كانت تغلّط وينتقدوها رفقاتها بالشّغل وأصدقائها، وهالشّي كان يخلّيها على طول حزينة.  بيوم من الإيّام سألتها إمّها عن سبب حزنها، بتخبّرها عن مشكلتها بتنصحها إمّها وبتقلّها : لازم تقلّلي من الكلام وهيك بتكوني متل السّمكة يلّي بتتنفّس بلا ما تفتح تمّها وهيك إصطيادها بيكون كتير صعب، بتكمّل الإم الحديث وبتقول لبنتها يا ريت بتقلّلي من الكلام وبتكتمي أسرارك، صدّقيني يا إمّي كتار هنّي الصيادي بالحياة يلّي ناطرينك تحكي ليتصيّدوكي عند أوّل هفوة أو زلّة لسان وغلط بتغلّطيه.  الزّوّادة بتقلّي وبتقلّك : إذا بدّك تقلّل من أغلاطك قلّل كلامك وإذا بدّك تكتّر غلطك وتسمح إنّك تكون عرضة لإنتقادات النّاس ثرثر وكتّر كلامك، والله معك. المصدر : صوت المحبّة

  إمنا مريم... ما تتركينا... بيقول البابا يوحنّا بولس الثاني : "نتعلَّم من مريم أن نستسلِم لمشيئة الله في كلّ شيء.. نتعلَّم من مريم أن نثِق حتّى عندما يبدو أنّ كلّ أمَل قد إنتهى.. من مريم نتعلَّم أن نحبّ المسيح إبنها وإبن الله!" يا مريم نحنا اليوم كتير بحاجة نتعلّم هالإشيا كلها... عم نتّكل عا حالنا و عالناس تا نقرّر كل شي بحياتنا و ناسيين مشيئة الله.  فاقدين الأمل عالآخِر و مِستسلمين إنّو خلَص ما بقا في حل... قلوبنا قِسيت ما عم تعرِف تحِب و بعّدِت كتير عن حُب الرب و حُب الناس...  إمنا مريم، ما تتركينا... و ساعدينا نرجَع عا طريق الرب! آميـــــــن. المصدر : صفحة Jesus My Lord

  خبزنا كفاف يومنا بيخبرو عن عيلة البَي حلّاق عندو محل زغير.  مرّة بعتت الإم إبنها عند بَيّو ياخد منّو مصاري تا يشتري رزّ.  قلّو البَي للصبي هلّق بس يفوت زبون بعطيك المصاري و قعدو الصبي و البَي كل النهار و ما فات زبون.  رجع الصبي عالبيت و خبّر إمّو شو صار.  جمعت الإم ولادها و خبّرتن عن فوايد الخبز المعمول بالبيت و كيف منيح للصحّة و بيعمل عضلات و جابت طحين و عجنت و عملتلن.  فرحوا الولاد كتير و أكلوا كتير حتّى شبعوا.  قالتلن إمهن و الأكل اللي رح يجيبو بيكن مين بياكلن؟ قالولها نحنا ما فينا شبعنا كتير.  قامت الإم إتَّصلت بالبَي و قالتلو ما تجيب أكل اليوم ما حدا قادر ياكل!  و هيك هالإم وقفت حد زوجها بالظروف الصعبة و الولاد فرحانين ما حسّوا إنّو ناقصن شي!  يا رب أعطنا خبزنا كفاف يومنا و اعطينا نكون عِيَل متماسكة و مُحبّة بتوقف مع بعضها و بتسند بعضها بهالإيام الصعبة... الله يبارككن! المصدر : صفحة Jesus My Lord

  التوبة فِعِل بدّو شجاعة! بتقول القدّيسة مريم ليسوع المصلوب :  "في الحياة الأبديّة، أجمل النفوس هي تلك التي تابت بعد أن أخطأت كثيرًا." التوبة فِعِل بدّو شجاعة!  الإنسان بطبعو ما بيحب يعتذر، بيعتبر إنّو عم يتنازل و يكسر من حالو بوقت التوبة هيّي فرصة إلك تصحّح أغلاطك و تبلّش من جديد! كل إنسان بيغلط بس مش الكل عندن الجرأة يعترفوا بغلطن و يجربوا يصحّحوه!  يا رب عطينا من تواضع قلبك، حتّى ما نستحي نقرّب منّك قد ما كنّا غلطانين و نطلب رحمتك و غفرانك و نتطلّع صوب حياة أبديّة معك و مع بيّك بالسما... آميـــــــن. المصدر : صفحة Jesus My Lord

صلّوا إلكن و لغيركن 🙏 بيقول القدّيس بادري بيو :  "لنذكر أنّ قلب يسوع قد دعانا ليس فقط لتقديسنا، بل أيضًا لأجل تقديس النفوس الأخرى.  إنّه يريد منّا أن نساعده في خلاص النفوس." هيدي الرسالة لكل واحد منّا اليوم مش بس نحنا مدعوّين نخلّص حالنا كمان عنّا مهمّة نصلّي لخلاص النفوس الباقية و هيك بيصير فرح السما أكبر و أكبر !...  صلّوا إلكن و لغيركن... الله معكن! المصدر : صفحة Jesus My Lord

  إجعل قلبنا مثل قلبك ♥️ ببداية شهر قلب يسوع منصلّي : يا قلب يسوع الأقدس، ملك جميع القلوب، إنّي أكرّس لك اليوم قلبي، وأضعه كلّيًّا في خدمتك.  إنّي أقدّم لك نفسي بكلّ طاقاتها، وجسدي بكلّ حواسه.  وأريد أن أصرف حياتي كلّها في محبّتك وخدمتك والإقتداء بك، وأنوي أن أكون متعبّدًا حارًّا لسرّ محبّتك... يا يسوع الوديع و المتواضع القلب اجعل قلبنا مثل قلبك... شهر مبارك للجميع🌹 المصدر : صفحة Jesus My Lord