الزوادة اليومية

مار شربل والعدرا !  رح نخبّركن عن الطفل يوسف مخلوف.  تعلّم يحبّ العدرا ببيتو.  كان زغير و يرافق إمّو بشهر ايّار عا زياح صورة العدرا و يرتّل "يا أمّ الله".  كانت العيلة كلها تتجمّع و تصلّي مسبحة الورديّة كل يوم.  كان عندو المغارة السريّة بالحقلة و فيها صورة العدرا !  يوسف مخلوف اللي لمّا فات عالدير و صار إسمو شربل كمّل متل ما علّموه أهلو يكرّم يسوع و يحبّ مريم حتّى وصل للقداسة!  مار شربل واحد من قدّيسين كتار اللي مريم مِسكِتلن إيدن و وصّلتن للقداسة عند يسوع!  و متل ما بتقول القدّيسة فيرونيكا جولياني :  "يسوع أتى إلينا عبر مريم ويريدنا الذّهاب إليه على الدّرب عينه." يا مريم بهالشهر المبارك كوني معنا و رافقي وطننا لبنان بجلجلتو تا يوصل للقيامة... المصدر : صفحة Jesus My Lord

  ورودكن رح تفتِّح! بيخبرو عن وردة ما كانِت عم تكبَر و لا تفتِّح لأنها بدون شمس، بدون ميّ، مزروعة بتربة مش منيحة، ما عم ينحطّلها مقوّيات، و الهوا حولها ملوّث! شو بتشبَه هالوردِة مواطن ما عم يقدر ينتُج لأنو مِتلها ما عندو أبسط مقوّمات الحياة! لكل مواطن متل هالوردة منقول إذا إنتَ ما طالبِت بحقوقك ما حدا رح يعطيك ياهن.  ربنا خلقنا عا صورتو و مثالو ما تقبلو تتشوه هالصورة، إبن الله ما بيستسلِم لأنو بيعرِف إنّو من كان الله معه فمن عليه... ما تخافوا من بكرا ورودكن رح تفتِّح و تنشر عطرها بشفاعة قدّيسي لبنان و العالم! المصدر : صفحة Jesus My Lord

  الله يرانا بيخبرو عن زلمي مَنَعو الدكتور عن الدّخان لأنو وضعو الصحي ما بيسمَح.  صار يروح يتمشّى و يدخّن بالمخفي حتى ما يشوفو حدا و يخبّر عيلتو و بالآخر غلَبو المرض و توفّى!  الدّخان بهالقصة متل الخطيّة اللي ربنا بيقلّنا ما تعملوها لأنّو بتأذيكن.  منصير نعمِلها بالمخفي و هيي تأذينا زيادة هيدا و ناسيين إنّو إذا الناس ما شافِت و حكيِت "الله يرانا" متل ما بيقول الأخ أسطفان!!  ما تخلّو الخطية تغلبكن و الله معكن! المصدر : صفحة Jesus My Lord

لتكن مشيئتك! بتساعيّة القدّيسة تريزيا الطفل يسوع في صلوات زغار لكل يوم.  وحدة منن بتقول : "يا وردةَ الكرملِ الصّغيرة، أنتِ الّتي تحمّلْتَ بصبرٍ الخيباتِ الّتي سمحَ بها الله، مع اِحتفاظِكِ في عمقِ روحِكِ بسلامٍ لا يَتغيَّرُ، لأنَّكِ لم تسْعِ سوى لتنفيذِ إرادة الله.  أطلبي لي التّكيُّفَ الكاملَ بهذه العبادةِ في كلِّ تجاربِ الحياةِ وخيباتِها.  إذا كانَت الغاياتُ الّتي أطلبُها في هذهِ التّساعيةِ مَرضيةً لله، اِحصلي لي عليها.  إذا لم تَكُنْ، صحيحٌ أنّي سأشعرُ بالحزنِ لهذا الرَّفضِ، لكنّني لا أرغبُ سوى بتنفيذِ إرادةِ الله ، وأُصلّي بالكلماتِ الّتي اِستعمَلْتِها أنتِ، لتُحقَّقَ مشيئتُكِ فيَّ." هالصلا بتذكّرنا بكلمتين تعو نخليهن يكونو شعار نهارنا اليوم و كل يوم و نعنيهُن و عنجد نسلّم حياتنا لله و هوي بيدبّر أحوالنا : لتكن مشيئتك! المصدر : صفحة Jesus My Lord

  santo subito بس مات البابا يوحنّا بولس التاني صارو الناس يصرخو: santo subito يعني قدّيس حالاً!  بس متل ما بتعرفو الفاتيكان بيستند عا عجايب حتى يعلن قداسة حدا.  العجيبة اللي أدّت لتقديس يوحنا بولس الثاني غريبة!  كان في مرا تعرضت لجلطة دماغية وتوفت ليلة تطويبو بـ ١ أيار ٢٠١١ شوي بتسمع صوت بيقلّا : قومي ما تخافي ورجعت للحياة!!  هالصوت كان صوت هالبابا القدّيس اللي عجز الطب قدّام قدرة ربنا بشفاعتو.  بدنا نصلّي اليوم عا نية كل مريض أو موجوع ونطلبلن نعمة الشفا عإيد يوحنا بولس التاني قدّيس العالم كلو!  والله معكن...

إرحموا من في الأرض يرحمكم من في السماء... كان معروف عن أبونا بشارة أبو مراد إنّو كان ياخد حصتو من الأكل بالدير و يقدّمها لأول فقير بيلتقي فيه حتّى إنّو بحرب الـ ١٩١٤ وقت صار في مجاعة كمّل هالشّغلة و صار يقعُد بلا أكل تا يطعمي الفقرا و طوّلت الحرب و هوي صار لونو أصفر و ضعِف كتير.  جابولو الطبيب فكّروه مريض لأنو ما حدا كان عارف شو عم يعمِل!  قلّن الدكتور بعد ما فحصو إنّو مريض بمرض الجوع و ما إلو دوا إلاّ إنّو ياكل منيح! الزوّادة اليوم بتقلّنا : إنّو لازم نتعلّم من سِيَر القديسين  و نِفهم إنّو لازم نخدُم غيرنا و نساعد بعيد عن الأنانيّة و كونو أكيدين إنّو ربنا ما بيترِكنا أبدًا... إرحموا من في الأرض يرحمكم من في السماء... الله رفيقكن عا طول. المصدر : صفحة Jesus My Lord

  جواز سفر إلى السماء بيقول القدّيس يوحنّا فم الذهب :  "الحب هو جواز السفر الذي به يعبر الإنسان كل أبواب السماء دون عائق." و بتقول الترتيلة : "كيف بتوصَل عالسما إذا ما بتحب، حِبّ العالم متل ما بيحبّك الرب." لكن هينة!  حِبَ كل الناس مين ما كانو، بتعرفُن ما بتعرفُن، بيحبّوك ما بيحبّوك، بتتّفق معن ما بتتّفق معن...كلن كلن!  إمشي و وزّع حب، لأ ما بتكون مجنون إذا عملت هيك!  السلاح الوحيد اللي بيغلُب الشر و العتمة هوي الحب... و مفتاح السما هوي الحب!  هلقد بسيط ربنا و هلقد نحنا منعقّد الإشيا!  جرّبنا طريقتنا و ما مشي الحال... جربو طريقتو و ما بتكونو الا فرحانين!  بالنّهاية ربنا ما عم يفاوضنا شو رأيكن تعملو هيك و مش هيك، ربنا رسمْلنا الطريق و قلنا كل شي بوضوح و عطانا حرية الخيار بس تذكّرو انو كل واحد بيتحمّل مسؤولية و نتايج خياراتو... الله معكن. المصدر : صفحة Jesus My Lord

حلم اليوم... حقيقة بكرا في سؤال دايماً منطرحو على الأطفال : "شو بدك تعمل بس تصير كبير؟"  وكتار الأجوبة للي منحصل عليها : معلمة، حكيم، وغيرن من المهن ومنتعجّب من مهن نادرة بيختاروها لما يصيروا كبار.  وكتار منن بس كبروا حقّقوا حلمن ووصلوا لمرحلة الإبداع والتفوّق.  مثلاّ بلندن، قرّر فريق عمل مؤلف من ٨ فنّانين إنّو يصنعوا مجسّمات عن الكرة الأرضيّة مميّزة وخاصّة للعيل، بتبرز السفرات والمغامرات وأجمل الأوقات للي قضوها مع بعض حول العالم. كرمال هيك خلّينا نسهر ع حلم ولادنا ونشجّعهن... لإنّو حلم اليوم، لا بدّ ما يكون حقيقة بكرا! المصدر : صوت المحبّة

  جنينة السما! بيخبرو إنّو القدّيسة تريزيا الطفل يسوع ما كانت أبداً تحكي شي أو تتذمّر من وجعها و لمّا كانت بآخر مراحل مرضها و حسّت إنّو قربت تفلّ من هالأرض قالت بس كلمتين: أنا تعبانة! و شافِت من الشّباك ورقة يابسة عالشجرة و شبّهت حالها فيها... و لما إنطفِت شمعة تريز وقعت هالورقة عن الشجرة! مَرَض تريز كان بيوجّع كتير و ما كان إلها علاج، تحمّلت كل شي بصمت لأنها عارفة إنّو عذاب الأرض فرح بالسما و وراق الشّجر اللي بتوقَع عالأرض بتنزَرع بجنينة السما! شفاعتها معكن! آمــــــــــــين. المصدر : صفحة Jesus My Lord

  ليش نحنا ما طلعلنا شي...؟ هالخبريّة حكمة بيتناقَلوها من زمان بتحكي عن شب عم يتأمّل القصور و قلّو لرفيقو: وين كنا نحنا بس تقسّمت المصاري عالناس؟  ليش نحنا ما طلعلنا شي...؟  قام أخدو رفيقو عالمستشفى و قلو: وين كنا نحنا بس تقسّمت الأمراض؟  ليش نحنا ما طلعلنا شي...؟ أشكر الله عاطول و عا كل شي!  بشكرك يا رب عا كل نعمة عاطيني ياها و بطلب منّك تفتحلي عيوني تا أعرف نبّش عا نقطة الضّو بقلب العتمة و إفهم قيمة عطاياك.. لك التّسبيح و الشكران لك المجد يا سر القربان! المصدر : صفحة Jesus My Lord

  مع الربّ ما في صدف! إنت و ماشي يمكن توقع بالصدفة، فيك تبقى عالأرض و فيك تقوم توقف هيدا شي إنت بتقررو و هيك بالحياة منوقع كتير و منواجه مشاكل و منتعب و منبكي بس بالنهاية إنك تستسلم و تضل تحت أو إنك تتشجّع و تمسّح دموعك و تبلش من جديد قرار ما حدا غيرك بياخدو أكيد إنت رح تتغير قبل و بعد "الوقعة".  بتكبر، بتوعى، بتفهم، بتتعلم... الحياة كلها طلعات و نزلات... يسوع بنزلاتنا بكون عم يعزينا و بطلعاتنا بيكون ساعدنا نقوم و نرجع نكمّل الطريق.  شو ما كان وضعنا ولا مرة تفكرو إننا لحالنا... هوي دايماً موجود و ما في شي بيصير هيك بلا سبب... مع الرب ما في صدف!  منصليلك اليوم يا رب نعرف نفهم حكمتك اللي كتير أوقات صعب عا عقلنا البشريّ يفهمها بوقتها بس مع الوقت منقول كتر خير الله اللي صار هيك... و الله معكن...

  فيك تسرع "شو هوّي عمل الخير للي ممكن تقوم فيه من دون ما الآخر يتوقّعو؟"  هيدا كان سؤال المسابقة للي أطلقتها شركة "Chevrolet" من حوالي شهر حتّى تحفّز الناس يقوموا بأعمال محبّة.  ومبارح، أُعلنت النتيجة والرابح هوّي "Ewan"، ولد بيبلغ عمرو ٩ سنين، بلّش يساعد المشرّدين بكاليفورنيا لما كان عمرو ٧ سنين وعلى مدّة سنتين ما وقّف يهتمّ فين ويقدّملن أكل وغطا للنوم. كتير حلوة المبادرة للي قام فيها "Ewan" بس الأحلى المبادرة للي قامت فيها شركة سيارات، قررت تدفع الناس ليسرعوا، ويقوموا بعمل الخير يمكن يخلّص حياة شخص تاني.  وإنت كمان، فيك تسرع حتى تخدم شخص محتاج. المصدر : صوت المحبّة

  مبيّن من قديش بتهتمّي فيه! بيخبرو عن ست ختيارة أوّل شغلة بتهتم فيها ببيتها مش المطبخ ما حزرتو!  عندها شخص للعدرا بتضلّ تنضّفو و تقطُف ورد تحطّن قدامو و تكرّم إمنا مريم و تصلّيلها.  سألوها الجيران: قديش صرلو هالشخص عندِك؟  قالتلُن: أكتر من ٣٠ سنة حتى إنّو تنقّل معنا إيّام الحرب!  جاوبوها: مبيّن قديم.  قالتلُن: ليش؟  لأنو مجرْوَح شوي و في مطارح رايح لونو؟  قالولها: لأ! مبيّن من قديش بتهتمّي فيه! أكيد نحنا ما منعبد تماثيل، نحنا منصلّي للّي بيمثّلوه و أهميتّهن بحياتنا هيّي لرمزيّتهن... و تذكّرو إنّو معيار الأهميّة بحياتنا هوّي كميّة الإهتمام و الحب!  و عند ربنا كمان!  نحنا مهمّين عندو لدرجة إنّو إهتمامو فينا و بحياتنا الأبديّة خلّاه يموت كرمالنا!  الله معكن... المصدر : صفحة Jesus My Lord

  حلوة الحياة لمّا فقد "Steve Fugate" أولاده بسبب الإنتحار والمخدّرات، قرّر أن يسافر سيراً على الأقدام في الولايات المتّحدة الأميركيّة لمدّة ١٢ سنة وهو حامل يافطة مكتوب عليها : "حبّ الحياة".  وكان هدفه الأساسي أن يذكّر الناس أنّهم قادرين أن يعيشوا حياة حلوة رغم المشاكل والصعوبات. وإنت، ما تفكّر أبداً إنّو الدنيي ما فيها مصاعب ورح تمرق متل ما منشوفا بالأفلام بس تأكّد إنّو حلوة الحياة لأن إنت بتحليّها وتأكّد إنّو لمّا تتّكل على الربّ رح تملا حياتك فرح ورجا. المصدر : صوت المحبّة

المسيح قام! "لو كان صليبك أنهى قصّة حبّك لما كنت الآن حيًّا أهتف المسيح قام!" لو ما يسوع مات كرمالنا، كونو أكيدين إنّو ما كنّا اليوم موجودين.  و تأكّدو إنّو لو ما بيحبنا هلقدّ ما كان تحمّل كل هالوجع كرمالنا... ما بفتكر في حدا معقول يحبنا أكتر من هيك! يا رب منصلّي حتّى يقوم وطننا لبنان مع قيامتك المجيدة و نحنا منعرف إنّو ما في صليب يكون النهاية، كل هالظروف الصعبة رح تفلّ و رح يشرق النور بهالبلد... ينعاد عليكن بالرجا و الحب و الصحّة و الأمل... المسيح قام! المصدر : صفحة Jesus My Lord

سبت النور... هالكلمتين لحالن زوّادة!  بيختصرو إيماننا المسيحي... اليوم هوي جسر العبور بين آلام الجمعة العظيمة و القيامة.  بهالنهار ما في كلمات تعبّر عن حبّ الربّ إلنا!  اليوم يسوع بيفرجي مجدو اليوم بيفرجي كل اللي قالولو عالصليب ما زالك إبن الله خلّص حالك إنو كل شي عند الربّ مدروس و إنو بالوقت اللي هوي بيشوفو مناسب ببين قدرتو و بيعمل العجايب اللي عقلنا البشري صعبة يفهمها.  طلبو منو ينزل حالو عن الصليب بس هوي كان بدو يفرجيهن إنّو قدرتو أكبر بكتير و غلب الموت اللي بيخوفهن كلن!  و هالشي بينطبق عا حياتنا، أنا بس أطلب شي من الله و ما يتحقق دغري مش يعني ربنا مش قادر يساعدني.  بس هوي حكمتو غير و توقيتو غير و طريقتو غير و الله معكن...

  عند الآب في منازل كتيرة بيوم الجمعة العظيمة يوم موت الربّ يسوع اسمحلي خبرك هالخبريّة:  في شخص كان هارب من الموت وكان عم بيفتّش ع مدينه ما فيها موت.  ترك مدينتو وسافر إلى بلد بعيد ع أمل إنّو هونيك ما يكون في موت.  وصل سأل قالولو لا ما في موت.  بعد فتره بيشوف شخص حاملينو ع كرسي لابس تياب كتير حلوه والنّاس ماشيين معو بموكب، سأل: "مين هيدا؟"  قالولو:  "هيدا الرجّال اشترى بيت ورايح يسكن فيه بس المشكل إنّو هالبيت بيدخل عليه وما عاد بيطلع منّو".  فهم إنّو هيدا الموت بس بوجه جديد.  ترك المدينه وراح ع مدينه تانيه وجّ جديد وتياب جداد للموت إنّما الموت موت، سافر إلى بلد آخر، هونيك سأل: "في عندكن موت؟".  قالولو:  "لأ، بس في عنّا رجّال بيطلّ من خلف الجبل بيعيّط لكلّ واحد بإسمو بيروح وما بيرجع لعندو".  قال:  "ضروري تروحو؟ شو بدكن منّو!؟ إنتو بشغلكن وهوي بشغلو".  عاش هونيك بفرح وسعادة وبعد فتره بيطلّ الرجّال وبيعيّطلو، قلّو :  "مش فاضيلك في عندي شغل فلّ".  إنّما بعد فتره رجع وعيّطلو، كمان الجواب كان مش فاضي، لبيوم من الإيّام بيقول لمرتو: 

  سوا منشهد للمحبة اليوم بخميس الأسرار بتعيش الكنيسة العشاء الفصحي الأخير، عربون محبّة وحضور أبدي للمسيح العريس مع الكنيسة، خطيبته.  وكان التقليد من زمان إنّو تتغسّل أرجل كل المؤمنين الحاضرين بالكنيسة، من الأصغر للأكبر، قبل ما يقتصر اليوم على غسل أقدام ١٢ شخص بس، رمز لرسل المسيح.  والليلة منزور ٧ كنايس رمز لإتمام الأسرار السبعة والرغبة  بعيشها بحرية ورضى ورمز للمراحل السبعة للي تنقّل فيا يسوع المسيح ليلة آلامه. المصدر : صوت المحبّة

هل تعلم؟ هل تعلم أنّنا نتأمّل اليوم، في "أربعاء أيّوب"، بالآلام التي إحتملها أيّوب البار وبآلام الربّ يسوع التي أضحت جسر عبور نحو فرح القيامة؟ كما أنّ الكنيسة تقيم في هذا النهار رتبة القنديل وتبارك الزيت وتمسح به جباه المرضى والمؤمنين.  وهذه الرتبة كانت في أساس سرّ مسحة المرضى، لذلك يُمسح المؤمنون بالزيت الذي يرمز إلى الشفاء والتشجيع والنور.  والمسح بالزيت هو علامة حبّ الرب للمتألّم والمُعذّب والخاطئ، لأنّه يُصبح "نوراً" على مثال يسوع نور العالم. المصدر : صوت المحبّة

  مع آلامك يا يسوع! بيقول القدّيس يوحنّا ذهبيّ الفم:  "هل شتمَك احد؟ أرسم العلامة على صدرِك وتذكّر كل ما حدث ( اثناء الصّلب) ...وإذ بكل شيء ينطفئ." اليوم الثلاثاء من أسبوع الآلام، و كل ما نقرّب بالإيام منحسّ و منعيش أحداث الصّلب أكتر و أكتر ...بس تفكّر قديش توجّع و تحمّل يسوع كرمالك بيهون وجعَك قد ما كان كبير و شو ما كان نوعو...أي وجع بس نقارنو بوجع يسوع بينطفي!  أي إهانة بس نقارنها باللي تعرّضلو يسوع بتختفي!  يسوع انصلَب تا إنت تعلّي راسَك، تا إنت ما تنكسِر، و تا يفرجيك قدّيش بيحبّك!  بهالأسبوع كلنا مدعوين نحطّ وجعنا حد وجع يسوع و نقول متل ما بتقول الترتيلة عن القدّيسة رفقا : حياتها بتعلّمنا نمشي درب السما طلوع و نردّد بألمنا مع آلامك يا يسوع! المصدر : صفحة Jesus My Lord

  86400 ﺩﻭﻻﺭ ﻟﻮ في بنك بيحطلّك بحسابك كل يوم الصبح 86400 ﺩﻭﻻﺭ ﺑﺪﻭﻥ ﻣﻘﺎﺑﻞ ﻭبس ﺗﺤﺖ ﺷﺮﻁ ﻭﺍﺣﺪ , أنك تصرفن كلن قبل ما يخلص النهار , ﻭ يلي بيضل ما بينزاد على ﺣﺴﺎﺏ ﺍﻟﻴﻮﻡ ﺍﻟﺘﺎني شو رأيك ؟ أﻛﻴﺪ رح تصرف ﻛﻞ ﺩﻭﻻﺭ ﻣﻦ ﺍﻟﻤﺒﻠﻎ ... قولك في متل هاﻟﺒﻨﻚ بـ ﻭﺍﻗﻊ ﺣﻴﺎﺗﻨﺎ ؟  ﻧﻌﻢ  هاﻟﺒﻨﻚ ﻣﻮﺟﻮﺩ ﻓﻌﻼً ...... هو ﺍﻟﻮﻗﺖ !!  كل يوم جديد الرب بيحط بحسابك 86400 ﺛﺎﻧﻴﺔ ﻭﺍﻟﻤﻄﻠﻮﺏ ﻣﻨﻚ تستفيد ﻣﻦ ﻛﻞ ﺛﺎﻧﻴﺔ. إذا بدك ﺗﻌﺮﻑ ﻗﻴﻤﺔ ﺍلسنة ؟ اﺳﺄﻝ تلميذ سقط إذا بدك ﺗﻌﺮﻑ ﻗﻴﻤﺔ ﺍﻟﺸﻬﺮ ؟ اﺳﺄﻝ ﺃم ﻭﺿﻌﺖ ﺃﺑﻨﻬﺎ باﻟﺸﻬﺮ ﺍﻟﺜﺎﻣﻦ.  إذا بدك ﺗﻌﺮﻑ ﻗﻴﻤﺔ ﺍﻷﺳﺒﻮﻉ ؟  إﺳﺄﻝ ﻣﺤﺮﺭ ﺍﻟﺠﺮﻳﺪﺓ ﺍﻷﺳﺒﻮﻋﻴﺔ إذا بدك ﺗﻌﺮﻑ ﻗﻴﻤﺔ ﺍﻟﺪﻗﻴﻘﺔ ؟  إﺳﺄﻝ شخص ما لحق ﺍﻟﻘﻄﺎﺭ. إذا بدك ﺗﻌﺮﻑ ﻗﻴﻤﺔ ﺍﻟﺜﺎﻧﻴﺔ ؟ إﺳﺄﻝ شخص نجا ﻣﻦ ﺣﺎﺩﺙ سير. إذا بدك ﺗﻌﺮﻑ ﻗﻴﻤﺔ ﺍﻟﻌﺸﺮ ﺛﺎﻧﻴﺔ ؟  إﺳﺄﻝ ﻋﺪّﺍﺀ ﻓﻘﺪ ﺍﻟﻤﻴﺪﺍﻟﻴﺔ ﺍﻟﺬﻫﺒﻴﺔ. ﺗﺬﻛّﺮ منيح ﺍﻟﻮﻗﺖ ما بينطر، مبارح راح و ما فينا نردو ﻭ ﺻﺎﺭ ﻣﺠﺮﺩ ﺫﻛﺮﻯ ﺳﻌﻴﺪﺓ ﻛﺎﻧﺖ ﺃو ﺣﺰﻳﻨﺔ , ﻭ بكرا مش إلنا ﻭ ﻻكن عنا ﺍﻟﻴﻮﻡ.  ما تنسى كرم العاطي ، ما تنسى الله. غيرك بيتمنى ثانية يرجع عالدني لي إنت فيا ت يغيير الكتير و إنت هلأ الربّ عاطيك الكتير إستثمرن لبعدين ... و الله معك...

من وين إجا إسم الشعنينة؟ بتعرفو من وين إجا إسم الشعنينة؟  هاليوم اللي فيه منتذكّر دخول يسوع عا أورشليم. كلمة شعانين هيّي من أصل عبري "هوشعنا" اللي بتعني: خلّصنا! و الشعب بس شاف يسوع صار يصرخلو خلّصنا خلّصنا لأنّن كانو عم يعانو من حكم الرومان اللي عذّبو كتير ناس و قَتَلو ألوف العالم. هالناس من ألفين سنة عرفو إنّو يسوع هوّي الخلاص. و نحنا بعد ألفين سنة خبرة بالحياة ما حلنا نعرف إنّو ما في خلاص إلّا بالمسيح و ما في غيرو طريق للسما!؟  ليش بعدنا عم نبعد عنّو!؟... اليوم فرصة إلنا نعيد النظر بكل حساباتنا و نتحضّر حتّى تكون قلوبنا كلها أورشليم و نستقبل يسوع فيها عن جديد! والله معكن...

  لمين جمعتو؟! بيخبرو عن شب ما عندو إلاّ حلم واحد و طموح واحد إنّو يجمّع مصاري و يصير غني و يشتري كل شي بدو اياه و يصرف بلا ما يعتل همّ إذا بيكفّوه مصرياتو.  كرمال هالهدف ما ترك شي ما عملو و بالآخر فعلاً صار غني كتير و بس قرّر يبلّش يصرف و ينبسط باللّي جمّعو صار يحسّ إنّو مش مرتاح و بس راح عالمستشفى طلع عندو مرض خطر و نادر ما إلو علاج و مش باقيلو كتير وقت عهالأرض!  هالقصّة بتذكّرنا بالمثل اللي عطاه يسوع عن الغني اللّي جمع كتير غلال و بدّو يعمّرلن أهراء كبير يساعهن تا يطمّن بالو إنّو عندو كتير بيكفّوه سنين طويلة و قلّو الرّب إنّو اللّيلة رح تموت لمين كل اللي جمعتو؟! "فهذا  يكونُ  مصيرُ  مَنْ  يكنِزُ  لنفسِهِ  ولا  يغتَني  عِندَ  الله"... تأمّلو منيح بهالفكرة و الله معكن! المصدر : صفحة Jesus My Lord

ما بدي حقّق حلمي منخبّركن اليوم عن "Iwona"، صبيّة ترعرعت بعيلة متواضعة بإحدى الضيع ببولندا، وكانت تحلم من هيي وصغيرة إنو تسافر ولكن بسبب إنشغال بيّا الدايم ليأمّن لقمة العيش ما قدرت تحقق حلمها.  واليوم، من بعد ما كبرت وتعلّمت واشتغلت، قررت "Iwona" ما تحقّق حلمها، إنما تشكر بيّا على كل لحظة ضحّى بحياتو كرمالها وتهديه سفرة من العمر على الـ " Singapore". اليوم الدعوة موجهة لكل واحد منّا حتّى يفكّر بالشخص اللي عم بضحّي كرمالو وعم يبذل من ذاتو وحياتو حتّى يمنحو السعادة...  شو رأيكن نصليلو ونعبر عن حبنا لإلو اليوم؟ المصدر : صوت المحبّة

  من الجلجلة للقيامة بتقول زغيرة السما القدّيسة تريزيا الطفل يسوع : "أثناء آلام المخلّص فاق النساء الرسل جرأة فتحدّين إهانات الجنود و مَسَحنَ وجه يسوع..." مع إنّو كانت صبيّة زغيرة بالعمر كانت تريز عندها ثورة عا كل شي، كانت مندفعة و محمّسة حتّى إنّو بوقت ما كانو كتير السيّدات عندن حقوق  و لا يعتبر دورن مهم هيّي ضوّت عاللي عملوه من إيام المسيح تا تقول إنّو المرأة قويّة و مش من هلّق من زمان و من مَيلة تانية كأنها عم تدعي السيّدات ما يقبلو بالظلم و ما يسكتو عملو متل ما النساء وقت الصلب، ما خافو و تشجّعو إنّن يتّحدو الجنود و وقفو مع يسوع، مع الحقّ!  تريز، يا وردة بعدو عطر كلماتها مزيّن حياتنا، تشفّعيلنا عند يسوع يعطينا القوّة و الشجاعة و الصبر تا تخلص هالجلجلة و نوصل معو للقيامة... آميـــــــن! المصدر : صفحة Jesus My Lord

  حدّد موقعك !!! بيخبرو عن شجرة بالغابة وقفِت تحتا النملة، قالت شو هالشجرة العملاقة!  وقف تحتا الثعلب، قال منيحة هالشجرة بس شايف أكبر منها،  مارِق صقر عالي بالسّما تطلّع فيها و قال ما أزغَر هالشجرة!  بالنهاية الشجرة نفسها!  كيف هيك كل واحد شافها غير عن التاني؟!  كل واحد منن حكَم من موقعو هوّي و من وجهة نظرو هوّي...  مثلاً الإنسان القريب من ربنا بيقول الله محبة، اللي بيخاف من الله رح يقول إنّو بيخوّف، اللي اختَبر رحمة الله و حصِل عا نِعَم رح يقول الله بيّ حنون و الإنسان البعيد يمكن يوصَل يقول الله مش موجود!  الله واحد، الله نفسو، بس الفرق هوّي موقَعَك إنتَ منّو!  قرِّب منو و وحدَك رح تعرف وين لازم تكون.  ما تلوم الله إنّو تاركك وحدَك و إنت اللّي واقِف بطريقة ما بتخلّيك تشوفو!  اليوم كلنا مدعوين نفكّر نحنا وين من ربنا و إذا لقينا حالنا بعاد، نعمل شي قبل ما يفوت الأوان! المصدر : صفحة Jesus My Lord

  الغلط مش النّهاية... بيخبرو عن فراشة فاتِت من شبّاك حبس.  قلّها الشب بالزنزانة: الناس بيعملو المستحيل تا يضهرو من هون، إنتي ليش جيتي؟!  قالتلو: الحرّ، حرّ بأفكارو مش وين هوّي!  يمكن تكون مسجون هون بس بأفكارك حرّ أكتر من كل الناس برّا اللّي هنّي سجناء أفكار بيخافو يقولوها حتّى قدام المراية! قلها الشب: أنا قاعد هون مجبور لأنني غلطت شوي و بستاهِل بس إنتي نيّالِك عندِك جوانح فيكي تروحي مطرح ما بدّك، فلّي!!  قالتلو الفراشة: غلّطت و تعلّمت يعني جوانحك عم يكبرو و أول ما بينفتَح هالباب الدّني ما رح تساعُن و رح تطير فيهن لبعيد كتير...  أنا جيت بس تا قلّك هيك...  لو غلّطت الله بيحبّك و هوي ما إجا كرمال الأبرار بل كرمال الخطأة تا يشفيلُن جوانحُن من تِقل الخطية و يرجعو يطيرو صوبو عالسما!... الغلط مش النّهاية، إعترِف فيه و سلّمو للرب و رح تختِبر أجمل بداية! المصدر : صفحة Jesus My Lord

المعجزات بأحد المؤتمرات الصحافيّه سألو بيكاسّو:  «بتآمن بالمعجزات؟».  جاوب وبحزم:  «أكيد بآمن!».  سألوه:  «شو سبب إيمانك؟».  جاوب:  «عرفت إنو أحد الرسّامين المشهورين إعترف إنّو ما رسم طوال حياته إلّا ٢٠٠٠ لوحه وأكتر من ٤٠٠٠ شخص بيدّعو إنّن بيملكو لوحه أصليّة من رسماتو».  الزوّادة بتقلّي وبتقلّك : بزمن كترت فيه الإشاعات للبحث عن الحقيقه وبتذكّرني وبتذكّرك بقول السيّد المسيح: «إن قالوا لكم إنّه هنا أو هناك فلا تصدّقوهم». والله معك...

  جايي بعدو القيامة! “ان أراد أحد يأتي ورائي فلينكر نفسه ويحمل صليبه ويتبعني” (مت ١٦: ٢٤) الصليب هوّي سلاحنا و قوّتنا عطانا اياه يسوع بعد ما غلب فيه أكتر شي بيخوّف الإنسان اللي هوّي الموت!  بصليب الربّ وصلنا الحياة، ما تخافوا من الصليب و لا تهربوا إنّو تحملوه لأنو ألَم الصليب هوّي جسر للخلاص و كل صليب قد ما كان تقيل، جايي بعدو القيامة...  الله يرافقكن و صليب الرب يرد عنكن كل شرّ! المصدر : صفحة Jesus My Lord

  ميزان الحب من أقوال القدّيسة تريزيا الطفل يسوع:  "ربنا لا يحتاج منّا لا أفعال كبيرة ولا أفكار عميقة، لا المواهب أو الذّكاء بل هو يعتزّ ببساطتنا." هالشّي إختبرِتو تريز بحياتها هيّي اللي كانت تحبّ الإشيا البسيطة لأنها بتآمن إنّو أزغر شغلة منعمِلها بحبّ بتوصَل عا قلب الله و ما بيتطّلع هوي بكبر الشّغلة، يسوع بيقيس كل شي بكميّة الحب الصادق اللي بقلبو!  اليوم قبل ما تعملُو أي شي حطّوه بميزان الحب و بعدين قرّرو إذا لازم تعملوه أو لأ و الله معكن... المصدر : صفحة Jesus My Lord