الزوادة اليومية

  اتطّلع فوق قرّر مزارع يروح ع بستان جارو ويقطف من محاصيل البستان. أخد كيس كبير وراح ع الحقل، لحقو إبنو الزغير. شاف بيّو عم يتطلّع وراه وقدّامو، ع الشمال وع اليمين قبل ما يمدّ إيدو ع أوّل شجره. فجأه بيحسّ المزارع بحدا عم ينكزو، بيلاقي إبنو الزغير واقف حدّو وبيقلّو : بيي، نسيت تتطلّع لفوق. الزوّاده بتذكّرنا بكلام المزمور القائل : "أين أهرب من نور وجهك، إن صعدت إلى السما فأنت هناك، وإن إنحدرت إلى الجحيم فأنت حاضر". المصدر : صوت المحبة

البخيل وكيس المصاري اللي وقع... بخبرو إنو من زمان، كان في زلمي بخيل وطميع كتير، ما حدا بيتحمّل ظلمو إلاّ رفيقو.  من هوي وصغير تعوّد على أطباعو، مرة كان البخيل مسافر، وراكب على الحمار تبعو، وصل قدام بيت رفيقو، ربط الحمار وفات يرتاح هوي وياه.  من بعد ما شبع، ترك محلو بسرعة، وركض لبرا هوي وعم يصرخ ويقول، نسيت كيس مصريات عَ ضهر الحمار.  ولو بتعرفو شو في بقلبو، ٣٠ ليرة من دهب.  ان شالله ما يكون حدا سرقن.  بعد تعب وتفتيش، ما بلاقي الكيس، عصّب كتير، وفلْ عَ بيتو حزين. تاني يوم، كانت بنت رفيقو عم تلعب بالجنينة، بتلاقي كيس في ٣٠ ليرة دهب. بتركض لعند بيها، بتقلو : بيّي صرنا أغنيا، ليك شو لقيت، بس البيْ لما شافن، عرف إنو هودي الدهبيات يللي مضيعن رفيقو.  راح بسرعة وقدملو ياهم، إنما الرفيق كان كتير مخادع، بلش يصرخ ويقول بالكيس كان في ٤٠ ليرة دهب مش ٣٠، بيتوجه لعند القاضي وبيشتكي على البيْ وبنتو وبيتّهمن إنو سارقين ١٠ ليرات من الكيس. البيً وبنتو بيشهدو وبيقسمو يمين، إنو هنّي ما أخدو ولا ليرة من الكيس، وما كان بداخلو، إلا ٣٠، بس الرفيق ضلْ مصرّ على قرارو. القاضي ت يعلمو درس، بقول أنا أكيد الكيس يللي

  الثقة سيّدة عجوز دخلت لملحمه، وطلبت من اللحّام نص كيلو لحمه. ووقفت تتفرّج ع الناس بالشارع.  سألها اللحّام ليش مش عم بتراقبه هوي وعم بيزين اللحمه متل ما الكل بيعملو؟ جاوبتو : "إذا نقّصت من اللحمه اللي أنا طالبتها، أنا بخسر قطعه أو اتنين، إنّما إنت بتخسر ثقتي وثقة كتار فيك وبيصيرو يقول عنك لص، فليش بدّي راقبك؟". الزوّاده بتقلّي وبتقلّك : الثقة لا تؤخذ إنّما تعطى. لازم نوثق بالناس متلما أللّه وثق فينا. والله معك... المصدر : صوت المحبة

  ماتت الكنيسة من بعد ما تعب وما كان عم يقدر يجمع ولاد رعيتو أصدر البونا بالجريده المحليّه إعلان غريب بيقول: "بنعي لحضرتكن يا أولادنا الأحبّاء بكل أسف وحزن موت الرعيه. الدفن رح يتمّ يوم الأحد الساعه 11,00." ومتل ما بتتصوّرو يوم الأحد المذكور وبالسّاعه المذكوره، الكنيسه كانت مليانه والناس وصلو لبرّا، وهيدا أمر ما صار قبل بهالرعيّه. ما في ولا محل فاضي ولا حتى للوقوف. وقدّام المذبح كان موجود نعش أسود. وعظ الخوري بالقدّاس قال : " ما بعتقد رعيّتنا رح ترجع للحياة، إنّما بما إنكن موجودين يا ريت بتمرقو بالدّور قدّام النعش لنظره أخيره. إذا بتريدو بالدّور، وإضهرو من السكريستيا واللي بيريد يقدّس يرجع من الباب التاني". الكل تساءلو مين هالميت. ومشيو بالدّور. كل واحد تطلع بقلب النعش وكمّل طريقو ساكت وملبّك ومحتار. كل واحد مرق قدّام نعش الرعيّة المذكوره كان عم بيشوف بقلب النعش صورتو بمرايه حطّها الخوري بقلب النعش. الزوّاده بتقلّي وبتقلّك : الرعيّه مش حجر الرعيّه، نحن البشر بس ندفنها منكون عم ندفن حالنا واللّه معك... المصدر : صوت المحبة

خلّيك بالبيت بيخبرو عن صبيّة انعدت كورونا من شغلها و هيّي من الناس اللي ما كانت آخدة الموضوع بجديّة.  هيّي ما كانت حاسّة بشي و لا عارفة إنّو بها شي لوقت ما إمها انحرّت و ضاق نفسها صارت عم تختنق أخدوها عالمستشفى و طلع معها كورونا و البنت عادْيِتها! البَي متوفّي و الأم بالعناية عم تحارب تا تعيش هيدا بلا ما نقول قدّيش تعذّبو تا لقيو مستشفى تستقبلن. تخايلو قدّيش هالصبيّة خايفة تفقد إمها اللي ما عندها غيرها و قدّيش حاسّة بالذنب إنها استهترت و ما انتبهت كفاية.  الزوّادة بتقلّي وبتقلكن : وَفرو عا حالكن عذاب الضمير و خوف تفقدو ناس بتحبّوهن و انتبهو، البسو الكمّامة، ما تقَربو عا حدا، ما تفَوتو شي عا بيوتكن مش معقّم و صَلّو! حكينا كتير و رح نضلّ نحكي لأنّو واجبنا نجرّب نساهم بنشر الوعي عن خطورة هالموضوع... يا رب تحمي أهلنا و ولادنا و عيالنا و تردّ كل مريض لعيلتو... آميـــــــن. المصدر : صفحة Jesus My Lord

  لقاء السما بالأرض ع صفحه دفتر قديم ٢ رهبان قريو إنّو في محل بهالكون بتلتقي فيه السما مع الأرض. وقرّرو يفتشو عليه. برمو كلّ الدني، إجتازو مخاطر، تحمّلو مشقّات وتضحيات، وإنتصرو ع تجارب كتيرة. كل معلوماتن بتقول إنّو المطرح اللي عم بيفتشو عليه بيوصلولو من باب واحد. وصلو ولقيو الباب، وفتحوه بتعرفو وين لقيو حالن؟ كل واحد بقلب غرفتو بالدير. الزوّاده بتقلّي وبتقلّك : كلّ واحد منّا متل هالرهبان، وكل واحد منّا بيقدر يلاقي اللّه مطرح ما هو موجود، لأن اللّه حاضر مطرح ما في إنسان بيطلبو. والله معك... المصدر : صوت المحبة

  ملك المستقبل فيليب هو ملك كان لقبو ملك المستقبل، لأن همّو الوحيد كان إنّو يفتّش عن أشخاص قادرين يقرو المستقبل. بيوم عرف إنّو في رجّال إسمو أبو ابراهيم ممكن يفيدو، سأل : "قدّيش بياخد مصاري؟". قالولو :  "ولا شي، بس ببعض الأوقات بيقبل قمح". حمّل الملك كميّة كبيرة من القمح وراح لعندو، وقبل ما يسألو قلو : "إذا سمحت تقبل منّي هالقمحات". "بعتذر يا خيّي، بيجاوب أبو ابراهيم، عندي قمح بيكفيني اليوم". الزوّاده بتقلّي وبتقلّك : يا خيّي ما تهتمّ ببكرا، خلّي بكرا يهتم بحالو، ولا تستهون بالحاضر لأن الحاضر شو ما حمل إلك، هو كنزك. والله معك... المصدر : صوت المحبة

  أهمّ دوا كان في مقابلة عالتلفزيون مع طبيب، سألوه شو برأيك أهم دوا عا مرّ التاريخ؟ جاوب : المحبّة! فكّرو المذيع عم يمزح و قلّو : و بركي ما نفع؟ ردّ الطبيب : هَينة، زيدو الكميّة! بعد أحد بشارة زكريا، بلّشنا نتحضّر لميلاد الرب يسوع.  هالنصيحة بوقتها! هالزمن هوّي وقت محبّة و فرح و صلا!  بعطيكُن وصيّة جديدة، حِبّوا الناس وكِلّ الناس... خلّي يا يسوع حياتي تكون مراية لحياتك! ما في إلّا المحبّة دوا لكل مشكلة بحياتنا! هالطبيب حطّ إيدو عالجرح و لاقالو الدوا! المصدر : صفحة Jesus My Lord

حبة الذرة من زمان وع ضهر سفينه كان في رجّالين راجعين ع بلدن، من بلد كتير بعيد وكان بلدن جزيرة زغيره وكتير بعيدة. واحد منهن بيلاحظ حبّة زغيره ع الأرض، بيلمّها وبيتفحّصها. حبّة ذرة، واحده ما بتفيد، لو كان كيس مليان كان بينفعني. وزتّ الحبّه. التاني لمّ الحبّه وحطّها بجيبتو، ولما وصل ع الجزيره زرعها، كبرت وعطيت نبتة ذره، محصول زغير. لكن الرجال رجع زرع المحصول وقطف محصول جديد، عطى منو أصحابو وزرع الباقي، ولمّا زرعو الكلّ كان المحصول كتير كبير. حبّة زغيره خلّت كل أهل الجزيره يعرفو الذره ويزرعوه. كل شي بيبلش زغير حتى الإنسان. وبالعنايه بيكبر. وبالإيمان فيه بيثمر. لكن إذا منتطلّع بحالنا منلاقي إنّو ما عنّا نفس طويل وما عم نعطي حدا فرصه تانية حتى يثبّت ذاتو، وأوقات ما منعطي حالنا فرصة تانية. الزوّاده بتقلنا : نِعَم اللّه كتيرة إخوتي إنّما أوقات بتوصل لعنّا من خلال أحداث زغيره وناس زغار، يمكن ما بقا يملّولنا عيننا. الزوّاده بتحط بين إيدَيك كلمات مار يعقوب إنّو الإيمان إذا ما ترافق بالأعمال بيموت. والله معك... المصدر : صوت المحبة

إن كان الله معنا فمن علينا!؟ انسألو كذا شخص عن السبب اللي معقول يخلّيهن يحسّو بالوحدة. قال الأوّل : إصابتي بكورونا جبرتني أنحجر وحدي ١٥ يوم كانو كتير صعبين. قال التاني : أنا بحسّ حالي وحيد بس كون زعلان.  قال التالت : لمّا رفقاتي يكون بَيتن بعيد. قال الرابع : أنا ‏سبب وحدتي إنّي شفت شخص واحد على إنّو الكل! شو ما كان رح يكون جوابكن إنتو عن هالسؤال، الشي الأكيد إنّو لَو حولكن كل شي في ناس بالدني و إنتو بعاد عن الله رح تكونو وحيدين و عندكن فراغ كبير... و العكس صحيح لَو تركوكن كل الناس و كنتو وحدكن عالأرض بسّ الرب موجود بحياتكن بتكونو مكتفيّين... بالنهاية إن كان الله معنا فمن علينا!؟... المصدر : صفحة Jesus My Lord

  لا تشتهِ مقتنى غيرك! بيخبرو عن شب إشترى سيّارة عاديّة و حتّى إنّو في أجدد منها كتير و في منها كتير، شافها زلمي بيعرفو دغري تحوّل لميكانيسيان و إجا بدّو يفحصها و صار بدّو يدقّق بأصغر التفاصيل و صار يقلّو للشبّ : بتعرف كنت شوف هالسيّارة عالطريق حسها بشعة بس هيدي عجبتني، ليك وقفتها، ليك شكلو مصروفها منيح و سريعة، خلص بدّي جيب متلها... و الشب واقف مش عارف شو يرد... أشكر ربك عا يلّي عندك و ما تتطلّع عالإشيا عند الناس! ربنا بيعرف حاجة كل واحد و بيعطيه ياها و زيادة. صار الوقت بعض الناس اللي عايشة متعودة إنّو اللي إلن إلن و اللي لغيرن كمان إلن يفهمو إنّو هيك ما بيمشي الحال!... تذكّرو وصايا الله و بالأخصّ "الوصيّة العاشرة" : لا تشتهِ مقتنى غيرك! والله معكن... المصدر : صفحة Jesus My Lord

  ولاد الرب بيخبرو عن أصحاب عم يتذكّرو وقت ضيعتن كانت مهدّمة بالحرب و بس رجعو تا يعمرو بيوتن.  كل واحد صار يقول شو بيتذكّر.  حدا قال : بتذكّر كان بيتنا كومة حجار، حدا قال بيتنا كان مزرعة، واحد تاني قال : نحنا ما رمّمنا ما بقي عنّا شي أصلاً ، هنّي كان مبيّن عا وجّهن الزعل بس آخر واحد كان شارد و بس سألوه إذا فايق لهيداك الوقت قلّن : أنا ما بتذكّر إلّا الحسّون اللي كان جدّي معلقو بالشبّاك هوّي و عم يعمّر البيت، صوتو بعدو بدينيّي كأنّو مبارح و إبتسم... بحدث معيّن، كل شخص بيشوف من زاويتو و بيعلق بذاكرتو إشيا غير عن الباقيين بس العبرة من الموضوع إنّو فيك تتذكّر إشيا بتزَعلك و فيك تتذكّر إشيا بتفَرْحك، فيك تشوف السواد بالصورة و فيك تفتّش عا نقطة الضَو قد ما كانت زغيرة... نحنا ولاد الرب، ولاد الرجا، أبناء النور، ما تنسو هالشي...! المصدر : صفحة Jesus My Lord

  الشهادة في رجّال مُلحد ما كان يقدر يقتنع إنّو يسوع المسيح قام من بين الأموات. وكان عم بيفتّش عن أدلّة للقيامه.  قصد أحد الكهنه المعلّمين باللاهوت ع أمل إنّو يلاقي عندو جواب. بدخوله لبيت الكاهن بتصدف إنّو أحد الأشخاص كان عم يسترشد عند الأبونا. الخوري لاحظ وجود الختيار، وببسمة حلوة بيقدّم للختيار كرسي ت يقعد. ولما إجا دور الختيار، شكا للخوري مشكلتو الإيمانيّة. بلّش الأبونا يعطي براهين، إنطلاقًا من ألوهيّة يسوع وظهوراتو بعد القيامه. وقال الختيار: 'أنا اقتنعت'. فرح الأبونا، إنّما تفاجأ بسرعة إقتناعو وسألو : 'دخلك شو اللي عجبك أكتر شي بحديثي؟ '.  جاوب الختيار : 'عجبتني طريقتك الحلوة لمّا قدّمتلّي كرسي حتى ما إتعب من الوقوف'. الزوّاده بتقلّي وبتقلّك : انتبه يمكن بنهارك تلتقي بناس كتار شكّو برحمة اللّه، بمحبتو، بحضورو أو حتى بوجودو. ما تنسى اليوم وما تستهون برسالتك يمكن بأي عمل رح تعملو نور اللّه رح يسطع واللّه معك. المصدر : صوت المحبة

  مرطبان السعادة!  شي مرة سامعين ب"مرطبان السعادة"؟ بيخبرو عن صبيّة عندها مرطبان كل ما يصير معها شي حلو بتكِتبو عا ورقة زغيرة و بتحطها بالمرطبان و لمّا شي يوم تكون زعلانة بتسحب ورقة بتتذكّر إشيا حلوة بتبتسم بلا ما تقصد... كان شعارها بالحياة : خبّي فكرتك البيضا ليومك "الأسود"!  حبّيتو الفكرة بس حسّيتو ما عندكن شي تكتبو؟ ما عم تعرفو تفرحو بكل اللي نحنا فيه؟ نحنا "مرطبان سعادتنا" موجود بكل بيت! عِنّا بين إيدينا الكتاب المقدّس اللي كِلّو آيات فرح و سلام و أمان... حتّى النصّ "الحزين" وقت الصلب بينفخ فينا فرح و أمل لأنّو في حدث القيامة من بعدو!  سعادتكن و أمانكن و سلامكن بإيدكن إنتو و ما تقبلو حدا يتحكّم فيهن، إبن الله ما بيقبل زعَل مصدرو الأرض يعكّرلو فرح سماوي!... المصدر : صفحة Jesus My Lord {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.} {إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}

تعلموا منها الصبر!  هالقصّة مأخودة من كتاب القدّيسة تريزيا الطفل يسوع بقلم المطران المثلث الرحمة جورج كويتر . مرّة تطوّعت القدّيسة تريزيا بالدير تساعد راهبة ختيارة ترافقها من الكنيسة عا طاولة الأكل. هالراهبة كان خلقها ضيّق قد ما مريضة و كبيرة بالعمر. كانت تطلع فشّة الخلق بتريزيا.  مثلاً إذا هزّت هيّي و ماشية كانت تفكّر إنّو تريزيا ما هدّتها منيح و تصرخ عليها : يا زغيرة كنت كسرت إجري بسببك! و إذا مِشيِت تريزيا عالبطيء بتعيّط عليها بتقلها عجلي شوي و هدّيني منيح مش حاسّتك واقفة حدّي! يمكن إذا منقرا القصّة منضحك بس إذا حطّينا حالنا مطرح تريزيا اللي كانت تسمع هالحكي كل يوم مش شي كتير حلو و هيّي ما كانت أبداً تنزعج أو تعصّب؟ ما فينا ما نقدّر قدرتها عالصبر و نصلّيلها تعلمنا كيف! المصدر : صفحة Jesus My Lord {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.} {إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}

  ١٣٦ عجيبة بالعالم في تقريبا ١٣٦ عجيبة للإفخارستيا بكتير بلدان بالعالم و إعترفت فيهم الكنيسة. وهنّي  مجموعين بمعرض مع لوحات بتعرّفنا عالمطرح اللي صارت فيه العجيبة. برم هالمعرض القارّات الخمسة و هوّي نوع من البشارة بالقربان المقدّس... هالمعرض كان فكرة الطوباوي الشب كارلو اكوتيس!  بيوم الرب منصلّي تا تكون أعجوبة تحوّل الخبز لجسد الرب و الخمر لدَمّو ببيوتنا و قلوبنا... بهالسر العظيم ربنا موجود بيناتنا و معنا و من خلالو منتوحّد فيه... اليوم الفرحة فرحتين، فرحة اللقاء مع الرب بالقربان و فرحة عيد مار ميخائيل رئيس الملايكة اللي قاتل الشيطان و ضهّرو من الجنّة و يُعتبر شفيع رجال الشرطة! بَرَكتو معكن و أحد مبارك للكل... المصدر : صفحة Jesus My Lord {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.} {إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}

زعيم المافيا والعشرة ملايين دولار بيخبرو عن زلمي قضى ٥٠ سنة من حياتو بغرفة مستشفى مع إنّو صحتو كتير منيحة بس هوّي بترتاح نفسيتو هونيك بيحسّ بأمان! الإنسان عاطول بيفتّش عالسلام و الشعور بالأمان بالأشخاص و المطارح و بينسى إنّو هالشعور اساسو بقلبو هوّي! إذا جوّاتك مرتاح بترتاح وين ما كنت و مع مين ما كنت! و سلامك الداخلي مصدرو وجود الرب بقلبك و بحياتك... "سلامًا اترك لكم. سلامي اعطيكم. ليس كما يعطي العالم اعطيكم انا!" المصدر : صفحة Jesus My Lord {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.} {إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}

  المليونير الدليفيري بيخبرو عن ميليونير فكّر كيف فيه يساعد بفترة الحجر المنزلي الناس اللي ما بقا عندن مدخول.  صار يجي عالدكّان يشتري إشيا و يتنكّر عامل ديليفيري يروح يدقّ عالباب و يقلّن للناس إنّو صاحب المحل اللي بيشتغل عندو عامل عرض و عم يوزّع غراض لسكّان الحَي! هالزلمي فكّر بغيرو و ساعد عا طريقتو و عمل فرق كبير! نزل من قَصرو عالأرض و شاف خَيّو الإنسان كيف عايش و لشو محتاج و تصرّف.  هوّي بيآمن إنّو ما مناخد معنا عالسما إلّا أعمالنا و كل شي أملاك و أموال بتبقى هون و ما إلها قيمة فوق! "مُرُورَ جَمَل مِنْ ثَقْب إِبْرَةٍ أَيْسَرُ مِنْ أَنْ يَدْخُلَ غَنِيٌّ إِلَى مَلَكُوتِ اللهِ" (إنجيل متى ١٩: ٢٤) والله معكن... المصدر : صفحة Jesus My Lord {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.} {إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}

العمل بمحبة بعد حياة عاشتها ببساطه وهدوء إنتقلت هالختياره توقف بالصف قدّام باب السما. وكانت كلّما قرّب دورها تسمع أكتر كلام الرب يسوع : "إنت أسعفتني لمّا كنت جريح ع الأوتوستراد، تفضّل الجنّه إلك". "إنت ديّنت بدون فايده السما إلك". "إنت عملت عمليّة قلب مفتوح ببلاش، السما إلك تفضّل".  والختياره صارت محتارة بأمرها، مش ذاكره أبدًا ولا عمل بطولي بحياتها. حاولت تترك الصف بس الملاك منعها تغادر. وكلّما قرّبت شوي كلّما دق قلبها أكتر. ولمّا وصلت قدّام الرب ما حسّت إلّا وهي محاطه ببسمتو الحلوة وبصوتو الحنون قلّها : " إنتِ كويتيلي كل قمصاني، تفضلي ع السما". الزوّاده بتقلّي وبتقلّك : أوقات منستصعب نتخيّل قديش مهمّة حياتنا الهاديه ورسالتنا اليوميّه ومنصير ننبّش ع إشيا كبيره نشعر من خلالها إنّو أيّامنا مش رايحه ضيعان. بس بالحقيقه اللي ما بيتقدّس بالأمور البسيطه، مش قادره الأمور العظيمه تقدّسو. وربنا هو يللي بيقدّسنا كلنا. المصدر : صوت المحبة {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.} {إنّ التعليقات

  select all قال القدّيس أوغسطينوس عن المحبّة : "إن للقلب صمّامين يعملان معًا الأوّل مكتوب عليه تحب الربّ إلهك من كل قلبك والثاني مكتوب عليه قريبك كنفسك ولا يمكن للقلب أن يعمل بصمّام واحد" ما فيك تقول انّك بتحبّ الله و تكون بتحكي عا جارك و ما بتحبّو، و ما فيك تكون بتحبّ الناس و ما بتحبّ الربّ! اللي بيحبّ بصدق متل ما وصّانا ربنا بيكون عندو توازن بقلبو بين حبّ الربّ و حبّ الناس بدون ما نفرّق بين اللي بيحبنا و اللي ما بيحبنا بدون شروط!  اعملو select all و حبّو قد ما فيكن و شوفو نِعَم ربنا كيف رح تعبّي حياتكن! والله معكن... المصدر : صفحة Jesus My Lord {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحنريض المختلف أو المسّ بالكرامات.} {إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}

  الوعود... من نحنا و زغار منوعد أهلنا نكون شاطرين بالمدرسة و نقعد عاقلين. منكبر و بتكبر معنا الوعود، لإخواتنا إنّو نوقف حدّن دايما، لرفقاتنا إنّو نبقى سوا عاطول، للّي منحبّن إنّو ما رح نخون ثقتن، لربنا إنّو نحفظ وصاياه... بس تعطي وعد بدّك تكون قدّو متل ما بتتوقّع إنّو اللي وَعَدك يوفي بوَعدو. يسوع وعدك بالحياة الأبديّة و انصلب و رجع قام كرمالك... إنت بشو وعَدتو؟ و شو عملت تا تكون قد المسؤوليّة؟! المصدر : صفحة Jesus My Lord {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.} {إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}

  كلّن يعني كلّن كتار إنطفت شمعتن عالأرض و ضوّت بالسما. كتار بطّلو بيناتنا و سبقونا لعندك يا رب. ناس انتَسِت مع الوقت و ناس وجع فراقن بعدو بيحرق كأنّو مبارح. اليوم تذكار الموتى، في ناس يمكن ما عندن حدا يصلّيلن أو يتذكّرن حتّى، اليوم خلّونا نصلّيلن كلّن، كلّن يعني كلّن: منعرفن أو لأ، بيقربونا أو لأ، كنّا نتّفق معن أو لأ... يا رب أغمر برحمتك كل اللي تركو هالأرض، كلنا إيمان إنّو عندك أحلى ... والله معكن... المصدر : صفحة Jesus My Lord {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.} {إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}