الزوادة اليومية

  الميّ للرّكبة بيخبّروا عن تعلب وجمل كانوا واقفين على ضفتيّ النهر، التّعلب كان عندو رغبة بالإنتقال للضّفة التّانية من النّهر، سأل الجمل شو هوّي عمق الميّ ولوين بيوصل، جاوب الجمل الميّ مش كتير غميقة بتوصل للرّكبة، قفز التّعلب بالنّهر وطمّتو الميّ بعد جهد كتير كبير قدر يطلع من الميّ، تسلّق على صخرة وقال للجمل:  غشّاش ليش ما قلتلّي الحقيقة؟  جاوبو: قلتلك الحقيقة، الميّ للرّكبة بس ما سألتني إذا ركبتي أو ركبتك.  الزّوّادة بتقلّي وبتقلّك : لمّا بتستشير حدا بأمور الحياة، أكيد رح بيجاوبك إنطلاقًا من إختبارو، ما لازم تلتزم بحرفيّة تجارب الآخرين، يمكن تغرّقك ببعض الأحيان بدل ما توصّلك لبرّ الأمان، والله معكن...

  بيعرف حاجاتنا بيخبرو عن بسينة عم تقول يا ريت فيّي طير، سمعِتها سمكة قالتلها شو بقول أنا لا فيّي إمشي و لا  فيّي طير، سِمعُن عصفور قلّها شو مفكّرة المشي و الطيران حلوين؟ يا ريت أنا فيّي إسبَح... و نحنا متلُن عا طول منتطّلع عالإشيا اللي ما عنا ياها و ما منقدّر قيمة اللي منملكُو و مننسى شو قلّنا ربنا بالوصايا: لا تشته مقتنى غيرَك، و غيرها من الآيات و أقوال القدّيسين اللي حكيو عن هالموضوع : "فإنّي قد تعلمتُ آن أكون مكتفياً بما أنا فيه." (في ٤: ١١) "لا بما على الأرض."  (كو3 :  2) "لأنّ إهتمام الجسد هو موت ولكن إهتمام..." (رو ٨ : ٦) "والله قادر ان يزيدكم كل نعمة لكي تكونوا و لكم كل إكتفاء كل حين في كل شيء تزدادون في كل عمل صالح" (٢ كو ٩: ٨)...  أشكروا الله عا كل شي ناعِم عليكن فيه و تأكّدوا إنو هوّي بيعرِف حاجاتنا أكتر منا و بيعطي كل واحد عهالأساس... المصدر : صفحة Jesus My Lord

! tomorrow في حزّورة بتقول: شو هوّي الشّي اللّي عاطول جايي عالطّريق بس و لا مرّة بيوصَل مطرح ما رايِح؟ الجواب الصّح طلع: "بكرا"، هوّي عاطول جايي بس لما يوصَل بيصير إسمو "اليوم" و هيك "بكرا" عاطول جايي بس و لا مرّة بيوصَل!   في إشيا بحياتنا شو بتشبَه "بكرا" منضلّ ناطرينا و بس نقول وصلِت بتصير شي تاني!  يا رب لتكُن مشيئتك مبارح و اليوم و بكرا و بكل لحظة، شو ما كان إسمو الوقت إنت يا رب بتتحكّم فيه و أنا بوثق بحِكمتك انتَ يا قائد سفينة حياتي... "لِكُلِّ شَيْءٍ زَمَانٌ، وَلِكُلِّ أَمْرٍ تَحْتَ السَّمَاوَاتِ وَقْتٌ" (سفر الجامعة ٣: ١) المصدر : صفحة Jesus My Lord

فَلي عملتموه... بيخبرو عن جامعة فيها ٣٥٠٠٠ تلميذ.  مرّة صبيّة من الطلّاب رايحة عا صفها بتشوف بنت قاعدة عالأرض عم تبكي و الكل عم يمرق من حدّا بدون ما حدا يوقف أو يهتم.  هالطالبة قرّبت و قعدت حدها عالأرض و سألتها ليش عم تبكي؟  طلعت وقعت و كاحلها عم يوجعها و مش قادرة تقوم تمشي.  قالتلها إنّو رح تضل معها حتّى تقدر تقوم.  بعد شوي ساعدتها و وصّلتها على مكتب الإسعافات الأوليّة بالجامعة. شكرتها كتير  و قدّرتلا وقفتها حدا مع إنن ما بيعرفو بعضن من قبل. قدّيش حلو بهالصوم تعمل لفتة قد ما كانت زغيرة تجاه حدا ما بتعرفو متل ما هالصبيّة كل اللي عملتو إنها وقفت و سألت سؤال!  بيقول يسوع: كل ما فعلتم لأحد أخوتي الصغار فلي عملتموه... الله معكن...

أبيض وأسود لما انسأل عازف بيانو ليش من بين كل الآلات الموسيقيّة اختارَها هيّي جاوَب إنّو بيشبِّه كبسات هالآلة لإيام الحياة منها أبيض منها أسود بس مع بعضُن بيعملُو لحن كتير حلو! ما تيأسُوا بالإيّام السّودا، صلّوا و اطلبوا القوّة من الله و بالإيّام البيضا ما تِنسُوا كمان تصلّوا لتشكروا الله!  الرّب يرافقكُن و تكون حياتكن كلّها موسيقى فرحة و ألحان. المصدر : صفحة Jesus My Lord

لبنان مخلّع! "مغفورة لك خطاياك ،قُم واحمل سريرك وامشِ" و لا مرّة يسوع عطي الشّفاء الجسدي وحدو، عاطول في الشّفاء الرّوحي قبل!  و هيدا الشّي اللي عصّب الفريسيين كتير و خلّاهن يتآمروا عا يسوع لأنو نفوسهن الضّعيفة مش قادرة تقبَل إنّو في حدا قادِر يشفي أبعَد من أوجاع الجسد!  يا رب اليوم لبنان مخلّع و يمكِن حتى ما بقا عندو أربع أصحاب يحملوه لعندَك...  إنتَ يا رب قادِر تشفيه، و كلنا إيمان إنّك ما بتترُك "وقفَك عالأرض"...  مش بس وطننا مخلّع، نحنا كمان، كل واحَد بشي، في اللّي مخلّع بعيلتو، بشغلو، بصحتو، بحياتو اليوميّة...  إشفينا يا رب، أغفرلنا خطايانا الكتيرة و قلّنا قومو احمِلو فراشكن و امشوا، و ما نمشي إلاّ صوبَك و عا طريقَك... إرحمنا يا يسوع يا فيض المراحِم! المصدر : صفحة Jesus My Lord

  ما تيأسوا بيخبرو عن تنين أصحاب عم يحكو و يتشاورو بآخر الأخبار و عن الحياة و الناس كيف بيتعاملو معها.  قال الأوّل : منمَرِّق الوقت كيف ما كان ما كلها مرّة منعيش هالحياة و خلص.  قلّو التاني: مش مزبوط! الإنسان بيموت مرّة وحدة بس بيعيش كل يوم!  الأوّل معو حقّ إنّو مرّة وحدة منعيش حياتنا عهالأرض و التاني معو حق إنّو حياتنا عالأرض عبارة عن كتير إيّام و كل يوم مٍنّن فرصة تا نعيش بفرح و منموت مرّة وحدة!  بالآخر تنيناتن معن حقّ حياتنا الأرضيّة وحدة بس هيّي عبارة عن محطّات نحنا منقرّر إذا بدنا نملّيهن حياة أو بدنا نكون عاطول متشائمين و حتّى الموت ما منخاف مِنّو لأنّو متل ما يسوع قام باليوم التالت نحنا رح نقوم... ما تيأسوا قد ما كان الوضع صعب و خلّو عندكن أمل و رجا... والله معكن. المصدر : صفحة Jesus My Lord

  نور العالم! "ثُمَّ كَلَّمَهُمْ يَسُوعُ أَيْضًا قَائِلًا: «أَنَا هُوَ نُورُ الْعَالَمِ. مَنْ يَتْبَعْنِي فَلاَ يَمْشِي فِي الظُّلْمَةِ بَلْ يَكُونُ لَهُ نُورُ الْحَيَاةِ»." (يو ٨: ١٢) يا نور العالم اللي ضوّا عالدني بميلادو و بحياتو و بصليبو و بقيامتو ما تحرم ولا عَين من النور...  يا ربّ أصعب شي بالدني العتمة، بتخوّف!  يا رب نحنا ضعاف، إذا نحنا انجرّينا عالظلمة ما تتركنا هونيك، مِدّلنا إيدك قد ما بعَّدناك عَنّا ما تفلّ...  ردنا لعندك و نوّر دربنا بمحبتك و رحمتك ما تخلّينا نِنغلب قدّام ضعف طبيعتنا البشريّة اللي التحديّات قدّامها كبيرة...  اعطينا إرادة الحياة و القوّة حتّى إذا التقينا بإخوة إلنا شدّتن العتمة نقدر نكون لو شمعة زغيرة بحياتن و نعمل فرق للأحسن قد ما كان زغير...  مِنّك يا ربّ منطلب... المصدر : صفحة Jesus My Lord

موجوع؟ صلّي للقدّيسة رفقا... هالقدّيسة اللي صبرت عا أوجاع الحجر ما بيحملها... رفقا حبّت يسوع للآخر و ولا لحظة سألت ليش هيك عم يصير معي أو ليش أنا من بين كل الناس. كان عا شفافها فيه كلمتين بس: "لتكن مشيئتك" يا رفقا، إنتي اللي علّمتي الولاد الزغار من قلبك منطلب منّك تْعَلمينا نقبل مشيئة الله بفرح شو ما كانت. و متل ما خبّيتي الولاد و حمَيتيهُن من الموت بدَير القمر منطلب منّك تحمينا من حالنا و من الخطيّة و تخلّينا نتمثّل فيكي حتّى ما تموت المحبّة فينا و نبعد عن ربنا. اليوم بعيدك منحمِلّك لبنان بصلاتك و منتذكّر ترتيلة الكبير وديع الصافي: يا قدّيسة رفقا صرتو تلاتة رِفقا إنتي يا أمينة شربل و الحرديني خلّو بلادي زينة تحت السما الزرقا... بلادي بلاد الإلفة والطهر والقداسة زرعوا فيها الخلفة والقهر والمآسي، صلّولا تا ترجع صوت الخالق تسمع، بلادي هيّي مرجع، مرجع لازم تبقى يا قدّيسة رفقا! المصدر : صفحة Jesus My Lord

  ملك المستقبل سعيد هو ملك كان لقبو ملك المستقبل، لأن همّو الوحيد كان إنّو يفتّش عن أشخاص قادرين يقرو المستقبل. بيوم عرف إنّو في رجّال إسمو أبو إبراهيم ممكن يفيدو، سأل:  "قدّيش بياخد مصاري؟".  قالولو :  "ولا شي، بس ببعض الأوقات بيقبل قمح".  حمّل الملك كميّة كبيره من القمح وراح لعندو، وقبل ما يسألو قلو: "إذا سمحت تقبل منّي هالقمحات".  "بعتذر يا خيّي، بيجاوب أبو إبراهيم ، عندي قمح بيكفيني اليوم". الزوّاده بتقلّي وبتقلّك : يا خيّي ما تهتمّ ببكرا، خلّي بكرا يهتم بحالو، ولا تستهون بالحاضر لأن الحاضر شو ما حمل إلك، هو كنزك. المصدر : صفحة Jesus My Lord

عيد الأم!  نحنا بلبنان ما عنّا شي تقليدي و لكلّ قاعدة عنا إستثناءات ما بتِخلَص...  حتّى أعيادنا ما منعيّدها متل الكل... اليوم بعيد الأم منعيّد إم الفادي، إم الكون، إم المسكونة كلّها إمنا مريم العدرا و معها منصلّي لكل إم مش معيّدة، لكل إم خسرت إبنها و لكل ولد خسر إمو بإنفجار ٤ آب.  منصلّي عا نية كل إم مريضة ما عم تلاقي دوا، عا نية كل سيّدة قرّبِت تصير إم و عتلانة همّ تلاقي حليب لإبنها، عا نية كل إم ولادها هاجروا و معيّدة بدونن، و عا نية كل إم ولادها حدّها و خيفانة عا مستقبلهن و شايفتُن قدّامها عم يتعذّبوا كل يوم تا يأمّنوا أقل متطلّبات الحياة.  منصلّي كمان عا نية كل سيدة حلمها تكون إم و ربنا بعد ما عطاها هالنّعمة و أكيد ما منِنسى كل إم إنتقلت من بيناتنا تا تعيّد بالسما.  هالسّنة هديّتنا إلكُن صلا من كل قلبنا حتّى بالعيد الجايي يكون زهّر ربيع هالبلد و نملّي الدّني ورود و ضحكات امّهات فرحانة! المصدر : صفحة Jesus My Lord

  أوتوستراد إلى السماء! بدكن توصلُو عالسّما؟  القصّة هينة!  روحوا عالقدّاس!  هيك بيقول الطّوباوي الشاب كارلو أكوتيس:  "القربان الأقدس هو طريقي الرئيسي السّريع إلى السّماء." أحد مبارك و قدّاس مقبول للكل!  يسوع يكون معكن و يحرسكُن وين ما كنتو! المصدر : صفحة Jesus My Lord

  يا مار يوسف ينعاد عليك! لمّا عيلتَك كانِت بخطَر اخدْتُن باللّيل عا مصر... ساعِدنا نحمي عيالنا من كلّ خطَر أو شرّ. إنتَ اللّي تعِبت و اشتغلْت نجّار و طعمَيت عيلتَك من عرق جبينَك... ساعِد كل ربّ عيلة يِكفي عيلتو. إنتَ يا شفيع العمّال...ساعِد كل إنسان يحصَل عا فرصة العمل اللّي بيستاهَلها. إنتَ يا بيّ العيلة المقدّسة... خلّي عيالنا تكون كلّها متل عيلة النّاصرة و تكون بخدمِة الله. يا مار يوسف ينعاد عليك بالسّما و ينعاد عا كل شخص حامل إسمَك عالأرض!  شفاعتو معكن... آمـــــــــــين. المصدر : صفحة Jesus My Lord

  تخايل بس هالإحساس!!  مرّة الممثّل جيم كاري قال:  تخايل تكون فقير كتير و يجي حدا مع كاميرا عم يصَورك و معو وجبة أكل و إنت مضطرّ إنّك تاخدها لأنّو ما عندك بديل أو بتضلّ جوعان و بتصير تتذكّر كمّ يوم إلك بلا أكل.  تخايل بس هالإحساس!!  إذا بتريدو ما بقا تعملو هيك و لمّا بدكن تساعدو، أعطوا بحُب مش عالسكت مش للدعاية و إهانة كرامة الناس!  "وَأَمَّا أَنْتَ فَمَتَى صَنَعْتَ صَدَقَةً فَلاَ تُعَرِّفْ شِمَالَكَ مَا تَفْعَلُ يَمِينُكَ،" (مت ٦: ٣)...  الله معكن. المصدر : صفحة Jesus My Lord

شو ما صار أركُض تخبّى فيه! من أقوال البابا شنودة : "البعض يظنّ أنّ حبّه لشخص معناه أن يحميه ويدافع عنه مهما أخطأ، أمّا الحب الحقيقي هي أن ينقذه من أخطائه ولو بتوبيخه عليها حتى يتركها." يعني مش إذا ربّنا سمَح يصير معنا شي معيّن حتى يردنّا عن الخطيّة يعني الله ما بيحبّنا!  الله بيّ بيحبّ ولادو بلا حدود و متل ما البيّ بيوبّخ ولادو تا يتركو إشيا مش منيحة و يكونو أحلى أشخاص و أحلى صورة هيك ربّنا كمان!  إذا ما عمِلَّك كل شي بدّك ياه مش يعني ما بيحبَّك!  هوّي بيعرِف كيف يحميك من حالَك و بيعرِف مصلحتَك أكتر منّك... اوثَق بحِكمتو و اتّكل عليه و شو ما صار أركُض تخبّى فيه!  تذكروا الصّلا اللّي علّمنا اياها يسوع و منردّدها عاطول:  "أبانا الذي في السماوات...." المصدر : صفحة Jesus My Lord

  حبّو خيّكن الإنسان بيخبرو عن رجّال ختيار ماشي عالطّريق شافِتو صبيّة وصّلِتو مطرح ما رايِح.  تاني يوم إجا عا بيتَها و معو كرتونة بيض بلدي من عندو تا يشكرها، تفاجَأت إنّو ما كانت ناطرة مقابِل أبدًا للشّي البسيط اللّي عملِتو.  هالصّبية خبّرِت رفقاتها شو صار معها.  صارو كلّن وين ما شافو هالزّلمي يوقّفولو حتى يجبلُن بيض  مع إنّن من قبل كانو يشوفوه عالطّريق و ولا مرّة فكّرو يوصلوه!  لمّا تنطُر مقابِل للخير اللّي بتعملو مش متل بس تكون عم تخدُم من قلبك بلا حساب!  حبّو خيّكن الإنسان و مطرح ما فيكن تساعدو ما تقصّرو و تذكّرو شو جاوب يسوع لما سألوه:  «يا رَبّ، متى رأَيناكَ جائعاً فأَطعَمْناك أَو عَطشانَ فسَقيناك ؟ ومتى رأَيناكَ غريباً فآويناك أَو عُرياناً فكَسَوناك ؟ ومتى رَأَيناكَ مريضاً أَو سَجيناً فجِئنا إِليكَ؟» فيُجيبُهُمُ المَلِك: «الحَقَّ أَقولُ لَكم: كُلَّما صَنعتُم شَيئاً مِن ذلك لِواحِدٍ مِن إِخوَتي هؤُلاءِ الصِّغار، فلي قد صَنَعتُموه». المصدر : صفحة Jesus My Lord

  التغيير نهار جديد!  الأرض متل العادة عم بتعرّض قاراتها الخمسه لأشعّة الشمس.  بس إذا الشمس لكلّ النّاس، كلّ النّاس ما عندن نفس المكان بالشمس.  كلّ النّاس ما بتملك نفس النهار.  الفجر ما بيبسط المعدة الفارغه.  الفجر ما بيبتسم لليئسانين.  ما بيعني شي النهار للنفس اللي بتبقى بليل الأفكار السودا.  مش من زمان غيّرنا السنة، وهلق غيّرنا الشهر.  بس في ناس ما بيتغير شي بنظرن.  لازم تشرق فكره أو صلا، أو تصرّف.  كلّ إنسان بيقدر يجدّد لإنسان تاني وجّ الشمس. والله معكن... المصدر : صوت المحبّة

  بصفّ مين بدكُن تكونو؟ بيخبرو عن ولدَين كانو عم يتغدّو و صارو يلعبو بالصّحون و الكبّايات وقعِت كبّاية و انكسرِت.  حتّى ما يَعرفو أهلُن جمَّعو القزاز و خبّوهن بخزانة و نِسيو الموضوع.  بعد فترة عم يِلعبو غمّيضة و فات واحد منّن تخبّى بالخزانة و جرَح حالو بالقزاز!  الزوّادة اليوم بتقلّنا : انّو قدّ ما كانت الحقيقة صعبة لازِم نقولها لأنّها عاطول بتلاقي طريقها و بتبيِّن لو قد ما طوّلِت.  ما تخافو من شي و تذكّرو:  "الشَّاهِدُ الأَمِينُ لَا يَكْذِبُ، وَالشَّاهِدُ الزُّورُ يَنْفُثُ كَذِباً." (أَمْثَالٌ ١٤: ٥) و ما تنسُو إنّو كلّ خير بيرجَع لصاحبو و كل شرّ كمان! إنتو اختارو بصفّ مين بدكُن تكونو و شو بدكن يِرجعلكُن و الله معكن. المصدر : صفحة Jesus My Lord

  "من لمَسَني؟" لبنان لمَسَك يا رب!  اِلو سنين عم ينزُف و ولا علاج نفَعو... نحنا كلنا لمَسناك يا رب!  رغيفنا عم ينزُف، صحّتنا عم تنزُف، أحلامنا عم تنزُف، كل تفصيل بحياتنا عم ينزُف... "يا ابنتي إيمانُكِ خلّصكِ! إذهبي بسلام!".  قِلّنا يا رب متل ما قِلت للمرأة النازفة، إزرَع فينا إيمان متل إيمانَها تا نقرّب منّك بلا حسابات و اشفينا متلها مع إنّنا خاطيين، أغفرلنا و سامِحنا... منّك يا رب منطلُب! المصدر : صفحة Jesus My Lord

  الصلا أوكسيجين الروح من أصعب الإشيا إنّو الواحد ما يقدر يتنفّس قدّيش مهمّ هالنفس، قدّيش مهمّ الأوكسيجين لجسم الإنسان تا يعيش!  و من ميلة تانية لمّا نكون كتير زعلانين منعبّر و منقول:  مخنوقين بدنا نتنفّس...  يا ربّ نحنا كل يوم عم نختنق لـ ١٠٠ سبب و سبب.  بهيك وقت صعب ما فينا ما نتذكّر قول القدّيس بيو:  "الصلا أوكسيجين الروح." تعو كلنا نتوحّد بالصلا عا نوايا بعضنا، عالكترة الصلا أقوى و بتوصل للسما أسرع!  منخصّ بالذكر المرضى اللي مش ملاقيين دوا، اللي عتلانين هم يفوتو عالمستشفى، اللي تعبو من الوجع...  منصلّي كمان عا نيّة كل شخص تعبان و جوعان و بردان و عاطل عن العمل و خيفان...  يا رب إنفخ فينا نفس جديد متل أوّل يوم خلقت الإنسان و نفخت فيه الروح... يا رب نحنا منتنفّس معك...  يا إبن داود إرحمنا! المصدر : صفحة Jesus My Lord

غمضو عيونكن! ليش لمّا نحلم منغمّض عيوننا؟ ليش لما نفكّر بإشيا حلوة منغمّض عيوننا؟ ليش لمّا نصلّي و نرتّل منغمّض عيوننا؟ و غيرا و غيرا من المواقف... عنجد ليش قولكن؟! السبب بسيط:  لأنّو في إشيا ما بتشوفها العين و إذا شافتها ما بتعطيها حقها بس القلب بيحسّ فيها!  لمّا تغمّض عيونك بتكون عم تعطي الضَو الأخضر لقلبك يحسّ بكل تفصيل و يروح فيه للآخر.  لمّا تصلّو من كل قلبكن بلا ما تفكرو رح تغمضو عيونكن و تركزو عا يسوع وحدو و تسمعو صوتو قد ما كان فيه ضجّة حولكن و تحسّو بوجودو حدكن...  غمضو عيونكن عن كل شي بشع و افتحو بواب قلبكن للربّ و الله معكن. المصدر : صفحة Jesus My Lord

  الطريق إلى الكمال خبريّتنا اليوم عن النحّات الشهير مايكل أنجلو اللي زارو شخص بالوقت اللي هو ع وشك الإنتهاء من إحدى منحوتاتو.  وبتاني زياره لأنجلو، تعجّب الزاير لمّا شافو بعدو عم يشتغل بذات التمثال.  وسألو بتعجّب :  - أكيد ما كنت كل هالفتره عم تشتغل بهالتمثال! وجاوبو أنجلو:  - بلى.  كنت عم بشتغل فيه كل الوقت!  كنت عم نقّح هالجهه! ونعّمت قسم من الوجه.  ونفّرت الشفاف شوي، وبيّنت عضلات الإيدين والإجرين، وكنت منهمك بوضع اللمسات الأخيره للتمثال.  قلّو الزاير:  - لكن، بيتهيّألي إنّو هالتفاصيل الزغيره مش مهمّه إطلاقًا، لا بل بالنسبه إلي هي تافهه جدًّا. ساعتها، تطلّع فيه مايكل أنجلو وجاوبو:  - بالنسبه إلك، هيدا أمر تافه، لكن بالنسبه إلي، هالتفاصيل التافهه هي حجر عثره بطريق الكمال.  والكمال منّو تافه أبدًا. زوّادة اليوم بتسألك :  وإنت شو بدّك: حياة عاديّه، متل الكلّ، وماشي حالها، ومعقوله، ومليانه بالتفاصيل الزغيره اللي بعد بدّها شغل؟ أو حياة ما عم بتوقّف الشغل فيها، لأنك ما رح تقبل بأقلّ من الكمال؟ المصدر : صوت المحبّة

  تخفيف الوزن بيخبّروا إنّو كان فيه زيز بيحب كتير إنّو يطير.  ولكن كان عندو مشكله وحيدة :  كان لمّا يطير، يتعب بعد كم دقيقة طيران.  وإستشار واحد من أصحابو بالموضوع.  ونصحو إنّو يخفّف من وزنو.  وبدل ما يخفّف الزيز من كترة الأكل اللي عم يضرّو، قرّر إنّو يخفّف من ريشات جوانحو.  وصار يشيل ريشه قدّام ريشه، حتى لاقى إنّو وزنو صار معقول.  وساعتها حاول صاحبنا يطير، ولكن كانو طارو كل جوانحو. الزوّادة بتقلّي وبتقلّك : ونحن هيك كمان.  بعلاقتنا مع ألله، حابّين كتير إنّو نطير ونوصل لعندو.  ولكن ع قدّ ما همومنا كتار، وإنشغالنا فيها بياخد كل وقتنا، منصير نلغي صلا من هون، وزيارة قربان من هون، وقدّاس من هون وصوم من هون، ومنقول: «بسيطه، كلّها مرّة".  وبيوصل وقت بتكون طارت فيه الجوانح اللي بدّها توصّلنا للّه.  والزوّادة بتدعيك اليوم إنّو تنتبه.  كل ما حسّيت برغبه تمدّ إيدك وتشيل ريشه من جوانحك، تذكّر هالخبريه، واعدل عن قرارك. المصدر : صوت المحبّة

رجع لأصلو! بيخبرو عن تلج أبيض عالجبال مبسوط كتير بموسَم الشّتي و التّزلج شايف حالو و مش مصدّق إنّو هوّي محطّ إهتمام الكلّ.  بعد فترة، بلّش يدوب حتّى بالآخِر إختفى و رِجع ميّ متل ما كان بالأصل. الإنسان هيك كمان بعد ما تِخلَص مهمّتو عالأرض بيرجَع لتراب متل ما كان بالأوّل!  كِرمال هيك منبلِّش صومنا بعبارة : أذكُر يا إنسان أنّك من التّراب و إلى التّراب تعود!  بس ما بيخلَص كلّ شي هون!  من بعد هالجملة و من بعد الصّوم و الصّلب و الموت في قيامة!  هيدا الشّي اللّي ربنا خصّص فيه الإنسان، قدّملو الحياة الأبديّة... و الإنسان بعدو بيرفُض النّعمة و غرقان بزواريب هالأرض!  انشالله هالصّوم بيكون محطّة مهمّة بحياة الكلّ تا يرجعو ليسوع و لجوهر المسيح... آمـــــــــــين! المصدر : صفحة Jesus My Lord

  إذهب أولاً فصالح أخاك بيقول القدّيس يوحنّا الاسيوطي:  "الغضب في القلب مثل السوس في الخشب." و كلنا منعرف شو بيصير بالآخر بالخشب المسوّس!  ما تتركو غضب و حقد بقلوبكن و خلّي هالصوم يكون فرصة للكل حتّى يتصالحو و يتفاهمو و يحِبّو و ينحَبّو بعيد عن كل شي سلبي...  جهزو قلبكن تا يستقبل يسوع بكل قدّاس و قبل ما تتناولو فكرو إذا متزاعلين مع حدا و بقلبكن فيه شي مش حلو تجاه حدا ... "فإذا كنت تقرّب قربانك الى المذبح وذكرت هناك أنّ لأخيك عليك شيئًا، فدع قربانك هناك عند المذبح واذهب أولاً فصالح أخاك ثم عد فقرّب قربانك" (متى ٥: ٢٣: ٢٤) المصدر : صفحة Jesus My Lord

  ختيار إبن ١٨ سنة!  بيخبرو عن زلمي ختيار سألوه قدّيش عمرك؟ قلّن ١٨.  ضحكو و قالولو اسمالله بعدك شبّ بسّ قدّيش عمرك عنجدّ؟  قلّن عمري ١٨ مع ٦٢ سنة خبرة!  هالختيار اللي عمرو ٨٠ سنة عندو حبّ و رؤيا للحياة و نشاط و فرح و إندفاع إبن ١٨ سنة عنجد ما عندو ياهن!  الزوّادة اليوم بتقلّك : ما تعدّ سنين و إيّام، حياتك ما بتنقاس بعدد الشموع اللي بتطفيهن، بالعكس حياتك بتنقاس بالطريقة اللي زنت بتشوفها فيها! هيك ربنا علّمنا نكون أحرار و مستقلّين!  حِبّو حياتكن كيف ما كانت و اشكرو الله عا كل شي و عيشو بفرح و أمل و رجا و سلام حتّى أصعب المواقف!  يسوع يِسكن بقلوبكن و يبقى معكن عا طول. والله معكن... المصدر : صفحة Jesus My Lord

  غسيل الروح! بيقول بادري بيو إنّو الإعتراف هوّي غسيل الروح.  و بيكمّل فكرتو و بيقول إنّو حتّى أوضة نضيفة و ما حدا ساكن فيها بتجمّع غبرة!  إذا بتتركها جمعة و بترجع بتلاقيها بدّا تنضيف عن جديد!  كيف الإنسان!  سرّ الإعتراف هوّي اللي بينقّي الروح و القلب من كل ثقل و تعب و خطيّة و هوّي حاجة لكل إنسان! توبوا إلى الربّ إنّ الملكوت قريب، عودوا إلى الحب فالخارج عنه غريب!! المصدر : صفحة Jesus My Lord

  أجمل باقة بزمن الصوم الزوّادة اليوم جمعتلكن باقة أقوال للقدّيسين عن الصوم حتّى نتأمّل فيها كل واحد عا طريقتو.  شاركونا أي قول حبّيتو أكتر أو حسّيتوه أقرب لإلكن. ١."صَوم اللسان خير من صوم الفم وصوم القلب أخيَر من الإثنين" (مار إسحق السرياني ) ٢."ثمين هو الصوم الطاهر أمام الله , وهو محفوظ ككنز فى السماء ، الصوم سلاح أمام الشرير , وترس نقاتل به سهام العدو." (القديس مار إفرام السرياني) ٣."الصوم الحقيقى هو الَّذي يتدرّب فيه الصائم على ضبط النفس ويستمر معه ضبط النفس كمنهج حياة." (البابا شنودة) ٤."فإنه لا يمكنك أن تصعد إلى أورشليم "السماء" وتأكل الفصح دون أن تحفظ صوم الأربعين" (القديس أثناسيوس الرسولي). ٥."أتريد أن تصعد صلاتك إلى السماء، فإمنحها جناحين، هما الصوم والصدقة"  (القديس أوغسطينوس) المصدر : صفحة Jesus My Lord