الزوادة اليومية

  دودة القز فتح الولد الصندوق، يلّي كان يربّي فيه دود القز ليتطمّن ع الشرانق، وتفاجأ لـمّا شاف فراشة عم بتجرّب تطلع من نقر صغير. زعل كتير من منظر الفراشة يلّي عم تتعذّب لتطلع من الشرنقة وقرر يساعدها، وهيك صار. جاب مقصّ، وصار كل ما يشوف فراشة عم تفتح نقر صغير، يقرّب منها ويقصّ الشرنقة، بس الصدمة كانت كبيرة، لـمّا شاف قدّامو فراشة نايمة ع الأرض ومش عم تقدر تتحرّك، كانت جوانحها ملزّقة ع جسمها.  حاول يساعدها، بلّش ينفخ عليها، جاب ورقة وجرّب يغطِّيها، ورغم كل محاولاتو ما قدرت الفراشة تطير. فكّر الصبي وقال: «لازم إسأل حدا بسرعة». راح لعند بيّو وسألو عن السبب، جاوبو البيّ: «هالثقب الزغير، هوّي يلّي بيساعد الدم يطلع من جسم الفراشة ويفوت ع جوانحها، وهيك بتقدر تطير». الزوّادة بتقلّي وبتقلّك : «الصعوبات يلّي بتعترضنا بالحياة، هيّي الباب الضيّق يلّي منعبر منّو، حتّى نطير بأجنحة الروح صوب السما». والله معك... #خدّام_الربّ

  الملك الحقيقي الوحيد! اليوم آخر أحد من تشرين الأوّل، قرّر البابا بيوس الحادي عشر بعد الحرب العالميّة الأولى و صراعات الزعامات إنّو يكون هاليوم عيد يسوع الملك.  بهالخطوة قصدت الكنيسة تذكّرنا إنّو يسوع هوّي الملك الحقيقي الوحيد!  قدّيش نحنا بحاجة يكون كل يوم هالعيد حتّى البشر يعرفو إنّو كل مجد باطل إلّا مجد السما!  يا رب الناس عم ياكلن جنون العظمة و عم تغرْهن مناصب الأرض...  منصلّيلك يا رب حتّى تملك عا وطننا و عا عيالنا و عا حياتنا كلها من أوّل يوم لآخر نفس... آميـــــــن. المصدر : صفحة Jesus My Lord

  نبنيلَك بيوت كتير اليوم ٣٠ تشرين الأوّل تذكار القدّيس مكاريوس أسقف اورشليم.  هوّي اللي ساعد القدّيسة هيلانة (أم الملك قسطنطين) بالتفتيش عن الصليب المقدس و بس لقيِتها عطيتُو شقفة منها!  بعدِين الملك قسطنطين شَكَر القدّيس مكاريوس اللي كان بطريرك بوقتَها و طلب منو يعمّر على قبر المسيح كنيسة كبيرة و تكون مميزة و الملك بيِتكفّل بكل المصاريف.  و هيك صار، الكنيسة اليوم منعرفِها بإسم كنيسة القيامة الشهيرة!  هالبطريرك عمّر كنايس كتير و كان همّو يجمَع المسيحيين تحت جناح الرب...  يا رب اعطينا بشفاعتو نكمّل مسيرتو و نبنيلَك بيوت كتير نكرمّك فيها و تِكتَر لقاءاتنا فيك، آمين. المصدر : صفحة Jesus My Lord

  بحاول إتشبّه فيها! بيخبرو عن مُرسَل بالصين كان مسافر بالتران، وحَدّو كان قاعد صبي زغير.  خلال السفر كان المرسل عم بيصلّي بكتابو، ومن دون ما ينتبه بتوقع من كتاب الصلا صورة لمريم العدرا.  الصبي بيسأل المرسل : «مين هيدي السِتّ الحلوة؟»  جاوب المرسَل:  «هيدي إمّي».  بيقلّو الصبي بتعجّب :  «بس ما بتشبهك بالمرّة». قلّو المرسَل :  «بكل صدق، إلي خمسين سنة عم حاول إتشبّه فيها». الزوّادة بتقلّي وبتقلّك :  «إذا فعلاً نحنا أبناء الآب، لازم نتشبّه فيه ونعمل أعمالو، وإذا مريم إمنا، لازم نكون متواضعين متلها، ونحمل الرب لكل يلي منلتقي فيهن». والله معكن... #خدّام_الربّ

  حقوقكن محفوظة فوق ! "من جَرَّحَتْه الأشواك على الأرض كلَّلَته الأزهار في السماء" - القدّيس دون بوسكو يا ولاد الرجا، يا ولاد الرب، يا ولاد الكنيسة، قد ما زعلتو، قد ما تعذّبتو، قد ما كانت الظروف صعبة، كل ما اشتدّت العواصف بحياتكن ما تخافو!  كل ما كترت الأشواك عم ينزرع قبالها ورود إلكن بجنينة السما... و اللي عم يزرعلكن شَوك بطريقكن عالأرض إلو حساب بعدالة السما أكيد !  قد ما انظلمتو هون حقوقكن محفوظة فوق... الحياة عالأرض فترة إلك تا تزرع و تذكّر عاطول إنّو شو بتزرع بتحصد... الله رفيقكن عاطول... المصدر : صفحة Jesus My Lord

أعلى من أكبر خطاب... وحدها الأفعال هيّي اللي بتفَرجي الصدق، بالنسبة للكلمات مين ما كان بيحكي... يسوع كان يحكي قليل، بس أفعالو بتحكي عنّو و بتفرجي صدقو... يسوع اللي حبنا بالفعل مش بالحكي، اللي مات كرمالنا شو بدنا بعد أصدق من هيك حب! إذا للحظة حسّيت إنّك وحدك و ربنا تاركك تذكّر أفعال يسوع ساعتها بيتطمّن قلبك و بتعرف إنّو مش معقول يتركك و بيتدخل بتوقيت هوّي بيعرفو... أوثق فيه وحدو ضمانتنا! ما تلحقو الحكي و الكلام قد ما كان حلو و معسول، الحقوا الأفعال صوتها أعلى من أكبر خطاب... الله معكن. المصدر : صفحة Jesus My Lord

  مع آلامك يا يسوع قال القدّيس البابا يوحنّا بولس الثاني ب ٨ تشرين الأوّل ١٩٩٥:  "لا يوجد شرّ علينا مواجهته لا يواجهه المسيح معنا.  لا يوجد عدوّ لم ينتصر عليه المسيح مُسبقاً." كِلّ ما تواجهكن صعوبة، كِلّ ما يحاربكن الشر قولوا مع آلامك يا يسوع متل ما كانت تقول قدّيسة لبنان رفقا!  يسوع اللي ما بقي نوع وجع ما داقو و تحمّلو و ما بقي نوع شرّ و تآمر و خيانة ما تعرّضلو أكيد ما رح يتركنا نواجه شي وحدنا إنتو بس اطلبو مِنّو و اتركو الباقي عليه... الله يكون معكن بكل أوقاتكن ما تخافو! المصدر : صفحة Jesus My Lord

  ربنا شايف كل شي! إذا توقعت إنو الناس يعاملوك منيح لأنو إنت منيح و نفسيتك حلوة متل كأنك متوقع إنو ما يأذيك الثور لأنك نباتي ما بتاكل لحمة!  منقصد نقلّك إنو مش مزبوط دايماً كما تعامل تعامل، أوقات كتير بتكون إنت منيح بس بتطلع براسك و بتكون المظلوم بتبين بنظر الكل الظالم. يسوع كان عارف إنو هيك رح يصير هوي قلنا ها أنا أرسلكم كالحملان بين الذئاب.  و هوي وصّانا نحب أعدائنا بس ما قال أبداً إنو هالشي رح يكون هيّن.  مين منا ما عندو أعداء؟  مش ضرورة عداوة بمعنى العداوة يمكن حدا مخانق إنت و ياه و ما بتحكي معو، يمكن غيرة يمكن حسد يمكن كذب يمكن خيانة كلن هودي إشيا بتأذينا بس هون بتجي قوّة كونك مسيحي: إنك تقدر تسامح و تغفر و أوعا تفكّر إنو هالشي بيعني إنك ضعيف بالعكس أقوى إنسان هوي اللي بيقدر يتحدّى حالو و يكسر حقوقو هوي و راسو مرفوع إذا مش كرمال الإنسان اللي قدامو كرمال ربنا اللي شايف كل شي و الله معكن... #خدّام_الربّ

  أدِر له الأيمن! بيخبرو عن زلمي عندو جنينة زارع فيها فواكه و قمح.  مرّة كان قرَّب موسم القطاف و هوي ناطرو تا يبيع، وعي لاقى رف عصافير قاعدين بالشجرات و أكلو كل شي!!!  راح تعبو ضيعان كل الزّرع و السقاية و الإهتمام راحو...  شو بدو يعمل؟؟  فكّر يقوصهن كلن يفشّ خلقو بس بالنّهاية لو ماتوا ما رح يرجع المحصول...  نحنا هيك بحياتنا أوقات كتير منكون تعبانين بإشيا و ناطرين "المحصول" بيِجي حدا و بيخرّب كل شي... شو العمل؟  بنتقٍم منو؟ بئذيه؟  شو رح إستفيد؟؟  يمكن الأحسن إرجع إزرع و ما إيأَس بس هالمرّة بنتٍبه أكتر...  رد الشّر بالشّر ما بيفيد... بس تردّ الشّر بالخير قوتو وحدها بتضعف مش عن عبث قلنا يسوع من ضرَبك على خدّك الأيسر أدِر له الأيمن!  شو ربنا بدو يانا نضلّ عم ننضرب!!!  هوي عارٍف منيح إنو الخير و التّسليم للرّب هنّي اللي بيكسرو قوة الشّر... فكرو فيا... والله يرافقكن المصدر : صفحة Jesus My Lord

  النحلة.. العسل والله بيخبرو عن نحلة بفصل الربيع صارت تتنقّل من زهرة لزهرة، تجمع الرحيق، تحطّو بقلب القفير، وتعمل عسل.  ومن بعد ما جمّعت كميّة كبيرة من العسل انبسطت بحالها وقالت : «طيّب هيدا العسل لَشو؟ أكيد حتّى إتمرمغ وإتلذّذ فيه».  وهيك صار، نفّذت النحلة أفكارا بسّ النتيجة إنها غرقت بالعسلات، وما عاد عندها القدرة تطير حتّى ماتت، غرقانة بالعسل. الزوّادة بتقلّي وبتقلّك: «مرّات كتيري نحنا هيك بيصير فينا، منغرق بأفكارنا يلّي بتقتلنا، خلّينا نتحرّر من كل الأفكار ونحلّق بسما الإيمان». #خدّام_الربّ

إستثمار الوزنات بيخبرو إنّو من زمان إيّام ما كانت العبوديّة كتير منتشرة في سيدة عملت مجموعات سرّيّة تا تخلّص العبيد و بالفعل قدرت تعمل هالشي و خلّصت كتار و لمّا إنسألت شو لاقت صعوبات هيّي و عم تساعد العبيد يهربو جاوبت جواب صادم!  قالت: أصعب شي صار معي هوّي إنّي إقنع اللي عم ساعدو إنّو هوّي مش عبد!!! بس تشوف حالك عاطول مش منيح كفاية و شو ما تعمل ما بيكفي و بس تفكّر إنّك ما بتستاهل شي منيح و ما تقدّر حالك بتعرف إنّك بتكون عم تزعّل ربنا؟  هوّي اللي خلقنا عا صورتو و مثالو مش تا نحنا نعيش بقيود من صنع البشر!  نحنا حدودنا السما!  إنّك تعرف قيمة حالك و قدراتك و النِعَم اللي عطاك ياهن ربنا مش يعني أنانيّة أو غرور بالعكس هيدا شكر لله و إستثمار بالوزنات اللي عطانا ياهن... الله معكن... المصدر : صفحة Jesus My Lord

  حوار بين الحياة والموت! في قصّة أكيد كتار سامعينها بتقول:  مرّة الحياة سألت الموت ليش الناس بيحبّوني مع إنّي مرحلة قصيرة و ما بيحبّوك إلك ؟  قلها: بيحبّوكي لأنّو بهالمرحلة فيهن يحقّقو كتير إشيا، طموحات و إنجازات و بيِبنو علاقات مهمّة بس أنا بوقّفلن كل شي و بوصل بوقت ما حدا بيتوقّعني و ما فيهن ياخدو معن شي من اللي عملوه بوقتك بس هنّي ناسيين إنّو أنا كمان مرحلة، أنا جسر عبور، من بعدي كل واحد بيروح عالمطرح اللي أعمالو عالأرض بتحطّو فيه!  الناس بتميل للبدايات و ما بتحب النهايات... بس بينسو إنّو الموت كمان بداية للحياة الأبديّة اللي وعدنا فيها يسوع...  متل ما بتقول القدّيسة تريزيا الطفل يسوع: بماذا ينفعني الموت ماذا تعطيني الحياة، حياتي حبّك، لا أموت أبداً بل أدخل الحياة... يا ربّ عطينا نفهم كل هالإشيا و نشوفها بعيونك هيك منصير نشوف اوضح بكتير، آمــــــــــــين. المصدر : صفحة Jesus My Lord

  بسامحو؟ يا رب، إذا حدا كان مزعّلني و رجع ندمان، بسامحو؟  قَلّي الرب: اكيد.  و سألتو طيّب إذا حدا مزعّلني و ما ندم و لا عمل شي تا يصلّح غلطتو، بسامحو؟ قلّي اكيد!  استغربت إنّو كيف ربنا عم يقلّي سامح اللي مش ندمان و هوّي غلطان بحقّي؟!  ليش انا بدّي قدّم هلقدّ تنازل!  و قلّي يسوع تذكّر انّي قلتلك اللي بيضربك عا خدّك اليمين ابرملو الشمال و قلتلّك أحِبّوا اعداءكم... احترت و صرت فكّر ليش أنا هلقد بدّي كون منيح و غيري عم يستغلّو هالطيبة و يؤذوني اكتر... رجع كمّل يسوع و قلّي: ما عم بطلب منّك شي مستحيل!  هيدا الشي انا عملتو قبلك، انا سامحت اللي ضربوني و صلبوني، انا قلت للرب: اغفر لهم يا ابتاه لأنّهم لا يدرون ماذا يفعلون... انت حِب و سامح بقلب ابيض نضيف و ما تفكّر بلحظة انّو في حق إلَك بيضيع مع ربنا، كلّو مسجّل و محفوظ بسجلات السما و اكيد الحقّ اللي بيحصِّلّك ياه الله اقوى من الحق الضيّق اللي انت مفكّر انّك حصّلتو... الله يرافقكن المصدر : صفحة Jesus My Lord

الإتصال بالله كتار هِنّي يلّي بيحبّو يتواصلو مع الله.  ولنجاح هالإتصال مطلوب نقوم بهالخطوات :  لازم نخصّص وقت للربّ، والأهمّ نكون حاضرين للإصغاء، ما نخاف إنّو الخطوط يكونو مشغولين، عند الله في كتير خطوط بالتصرّف، بس انتبهو، لـمّا الرب بيرفع السمّاعة ممكن ما يقول ألو بس أكيد هوّي على السمع، وإذا الخطّ انقطع لازم نتأكّد إنّو أفكارنا المشوّشة هيّي السبب، لازم نعاود الإتصال وما لازم نحكي بدون توقّف، لحتى نسمع شو عم بيقلّنا الرب، وما ننطر وقت الضرورة حتى نتّصل بالرب، أو وقت يلّي بتكون التعرفة منخفضة، يعني بعد نص الليل أو بآخر الأسبوع، لأنّو الإتصال بالله مجّاني، مدفوع سلف. الزوّادة بتقلّي وبتقلّك : بعد كل هالتسهيلات، شو ناطر ما بتفتح قلبك للربّ وبتقلّو: «تكلّم يا رب إنّ عبدك يصغي»،  والله معك... #خدّام_الربّ

  غمضو عيونكن!  غمضو عيونكن و تخايلو معنا هالمشهد. إنتو بالنصّ و كل الأشخاص اللي موجودين أو انوَجدو بيوم بحياتكن حولكن كل واحد عا مسافة منكن غير عن التاني و مربوطين فيكن بخيطان.  كل ما كان الخيط أَسْمَك كل ما كانت العلاقة اقوى... و شو في خيطان عا كتر كبر المسافة انقطشت و وجّعت و شو في خيطان معركجة عا قد ما العلاقات معقّدة و شو في خيطان سميكة و قويّة و ماكنة بتربطنا بناس هنّي من اساسات حياتنا.  و في خيطان بتحسها هادية عا آخر نفس بين ثانية و ثانية بتنقطش لأنها اهترت من ورا مواقف و احداث صعبة اذيتنا و في خيطان نحنا فكّيناها بإيدنا قبل ما تلحق توجعنا...  و في خيطان صارت مربوطة طلوع من ميلة فينا و من ميلة بالسما و سكّانها...  هلّق فتحو عيونكن و تذكّرو إنّو الله خلقنا حرّين و إنّو كل هالخيطان إنتو بتتحكّمو فيها و إنتو بتقرّرو شو تخلّو و شو تفكّو و شو نوع الخيط و قدّيش طولو... الله يكون رفيقكن عاطول! المصدر : صفحة Jesus My Lord

  سلام المسيح بيخبرو عن منطقة كانت فيا إنتخابات البلدية قوية كتير و فرقت عا كم صوت.  نهار الأحد كانو كل الناس بالقدّاس شوي بيصير وقت السلام. تنين قاعدين حد بعضن كانو ضد بعض بالبلدية بس إجا السلام بيقوم الزلمي ما بيعطيه للرجال اللي حدو!!  معقول يوصل الحقد هلقد و كرمال شو؟  منصب و كرسي ما بيفيدو بشي...  ليش شو عاملك الزلمي حتى يعميك الشر هيك... بعدين شو نفع تروح تقدّس و إنت بهالنفسية أصلاً إنت ما بتستحي تفوت عا بيت ربنا و تتصرف هيك؟!  ما فكرت للحظة إنو يسوع شايفك و قديش بيكون زعل منك...  عا كل حال دعوتنا إلكن اليوم تتصالحو مع حالكن قبل ما تتصالحو مع اللي حولكن و تسامحو و تحبو و تتقبلو الكل مهما إختلفنا معن بالرأي بالنهاية كل إنسان حر برأيو طالما ما عم يتعدى عا حرية غيرو... إذا مش قادرين تتخلصو من أحقادكن عالقليلة تركوها برّا ما تفوتوها معكن عالكنيسة مطرحها مش هونيك أبداً و الله معكن... #خدّام_الربّ

  ممنوع التنمّر بيخبرو عن عصفور زغير إجا من المدرسة زعلان.  سألتو إمو شو صار قلّها إنو رفقاتو عم يقولو إنو هوي بشع كتير و هني ملونين.  فسّرتلو إمو إنو أكيد مش الكل لازم يشبهو بعضن و إنو هوي كتير حلو و قوي و قالتلو شوف أنا و البابا بشعين شي؟  قلها يا ريت بكون متلكن إنتو حلوين و قوايا.  قالتلو إمو إنو بس يكبر رح يكون متلن.  ما بقا زِعِل شو ما انقلو لأنو كتير حَبّ فكرة إنو هوي متل أهلو! نحنا هيك أوقات كتير بيِتجَرَّح فينا و الناس بتصنّفنا حسب شكلنا و حسب معايير هني اختاروها و ناسيين إنو ربنا خلقنا عا صورتو و مثالو!  مهمّ كتير نفسّر لولادنا و نعلّمن يوثقو بحالن شو ما صار و يِنعَمل توعية ضد التّنمر خصوصًا هلّق مع الرجعة عالمدارس! المصدر : صفحة Jesus My Lord

تريزا الأفيلية اليوم ١٥ تشرين الأول هوّي عيد القدّيسة تريزا الأفيلية.  منذكر شوي من أقوالها و نحنا مدعوّين اليوم نتأمّل فيها كل واحد بينو و بين حالو و كونو أكيدين نفس الكلمات بيلمسو كل شخص بطريقة غير عن التاني... "لا تدع شيئًا يُقلقكَ، لا تدع شيئًا يُخيفكَ، فكلّ شيءٍ هو زائلٌ وحده الله لا يتغيّر. الصبر ينال لك كل شيء، من يملك الله لا يحتاج شيئًا وحده الله يكفي!" "ليس للمسيح جسدٌ سوى “أنت” : إنّكَ العينان اللّتان بهما ينظر برحمةٍ الى هذا العالم، إنّك القدمان اللّتان بهما يمشي المسيح ليصنع الخير، إنّك اليدان اللّتان بهما يبارك المسيح هذا العالم." "إن الله كان طيّبًا جدًا معي ! لذلك لا أمعن التفكير بأمرٍ سيّئٍ سبّبه شخصٌ لي … فعندما أفكّر به لاحقًا (أي بعد أن يبرد غضبي) أجدُ بعض الفضائل الأخرى في ذلك الشخص" شفاعتها معكن! المصدر : صفحة Jesus My Lord

  بركة زيتوناتك من زمان لليوم هالوقت من السّنة معروف إنّو مخصّص لقطاف الزّيتون.  هالشّجرة اللّي إنذكرت كتير بالكتاب المقدّس إن كان بالعهد القديم أو الجديد.  أوّل ما خلص الطّوفان جابت الحمامة لنوح ورقة زيتون و من وقتها صار الزيتون رمز للسّلام.  و بمثل السامري الصالح إستعمل الزيت لعلاج الجروح : "فدنا منه وسكبَ زيتاً وخمراً على جراحه وضمّدها , ثم حملَه على دابّته وجاء به إلى فندقٍ وإعتنى بأمره".  و كل ما انذكر السّراج (دلالة عالنور) كمان ما بيضوي بلا الزيت.  "وأما العاقلاتُ , فأخذنَ مع مصابيحهنّ زيتاً في وعاءٍ." و يسوع المسيح كان يصلّي ببستان الزّيتون، و غيرها من الأمثلة الكتيرة اللي خلّت هالشّجرة يكون إلها مكانة خاصة بحياة كتار...  يا رب ملّي حياتنا من بركة زيتوناتك: أعطينا السّلام متل نوح، إشفينا متل ما عمل السّامري الصالح مع زلمي ما بيعرفو و خلّي سراجنا يضل فايض بالزيت و النور... المصدر : صفحة Jesus My Lord

  عطايا الله زوّادة اليوم هيّي نصيحة لكلّ إنسان بيقول الله ما عطاني أيّ نعمة، لازم كلّ يوم الصّبح بس تفتح عينيك لازم تفكر إنّو في إنسان العمى ما عم يسمحلو يتمتّع بمشاهدة جمالات الله، لمّا بتسمع أيّ موسيقى بتخدشلك سمعك تذكّر إنّو في ناس ما عم تسمع أجمل الأنغام، لمّا بتجدّف على إسم الرّب تأمل أدّيش في ناس بالحياة ما عندن القدرة على النّطق، لازم نتقرّب من الفقرا، نزور المرضى، نكون مستودع للنّعم ومصدر للرّاحة والعافية وبالنّهاية لازم نشكر الله ونتذكّر إنّو بالشّكر بتدوم النّعم.  الزّوّادة بتقلّي وبتقلّك :  يا ريت كل يوم منتأمّل بنصّ الوزنات ومنشكر الرّب على عطاياه إن كانوا وزنة أو إثنين أو أربعة، منتاجر فيهن ومنحصل على أضعاف وأضعاف ونتذكّر على طول إنّو هيدا من خير الرّب، والله معكن... #خدّام_الربّ

  إدنا اليوم ١٢ تشرين الأوّل عيد القدّيس تراخوص اللي لمّا سألو الوالي شو إسمك؟  جاوب أنا مسيحي!  و كمّل و قلّو إنّو هوي ما بيقدّم تضحية لآلهتكن المصنوعين من الخشب! عصّب كتير الوالي و أمر جنودو ياخدوه عالحبس و يضربوه و وصل معن التعذيب إنن يقطعولو دينيه و هوي ما غيّر بمواقفو أبدًا، كرمال هيك القديس تراخوص هوي شفيع الأذن...  صلاتو معكن! المصدر : صفحة Jesus My Lord

  مفتاح التغيير بيخبرو من زمان عن صاحب دكّان ختيار بيخبّي مفتاح الدكّان بمطرح قريب و مخبّر كل ولاد الضيعة وينو و بيقلّن إذا أنا ما كنت هون و عزتو شي فُوتو خِدُو اللي بدكن ياه و حطّو المصاري بالجارور.  هلّق في مدري كم قفل و كاميرات و أجهزة إنذار ، أكيد إنّو الأيّام تغيّرت بس كمان الناس تغيّرت... بالمبدأ العام الثقة صار محلها الشكّ، الأمانة عم تخفّ شوي شوي، المشاركة و القناعة غطّوا عليهن المصلحة الشخصيّة و الأنانيّة... الكلّ بيقولو يا ريت بترجع إيّام زمان كانت أحلى و كانو الناس عايشين أحسن ، شو بتفرق إيّام زمان عن اليوم؟  نحنا اللي تغيّرنا... لكن مفتاح التغيير هوّي نحنا... هنّي كانو يحبّو بعضن و نحنا؟  هنّي كانو يوثَقو ببعضن و يوقفو حد بعضن و نحنا؟  هنّي كانو يساعدو بعضن و نحنا؟  هنّي كانو صادقين و نحنا؟  و الأهمّ....هنّي كانو يصلّو...و نحنا؟؟؟ المصدر : صفحة Jesus My Lord

  صدفة حلوة اليوم 10 تشرين الأول ذكرى تطويب كارلو أكوتيس، الشاب الزغير اللي انعرف بعلاقتو المميّزة بالقربان المقدّس و قال عنّو : "القربان المقدّس هو الطريق السريع إلى السماء." صدفة حلوة يكون هالسنة ذكرى تطويبو نهار أحد ، يوم الرب، يوم اللقاء بالقربان!  شفاعتو معكن و خصوصاً مع الشباب اللي من عمرو حتّى يكونو ماشيين عا درب الرب و ما يلهيهن عنّو شي..آميـــــــن. المصدر : صفحة Jesus My Lord

  من نفس الموقع !  عصفورين ع شجره، الأوّل ع غصن والتّاني ع الغصن اللي تحتو.  الأوّل بيقول : "آه! هالورقه شو حلوه لونها حلو، أخضر فاتح بيجنّن". التّاني بيجاوب : "شو باك، هيئتك أعمى، صحيح لونها حلو لكن بنّي مش أخضر".  بيردّ الأوّل : إنت الأعمى، بشارط بكلّ الرّيش اللي ع جسمي إنها خضرا "،" وأنا بشارط بحياتي إنها بنيّه".  وبغضب، بيفور الدم بجسم العصفور العالي وبينزل وبيوقف بوجّ العصفور التّاني. " كيف بتتجرّأ تحكيني بهالطريقه؟".  وبيلتفت صوب الورقه وبيصرخ :  " معك حق لونها بنّي".  وبيطّلعو التنين لفوق وبيلاقوها خضرا.  إخوتي الزوّادة بتعزمنا قبل ما ناخد أي قرار ضدّ الآخرين نمشي معن فشخه زغيره، ونحاول نشوف الإشيا من مطرح ما هنّي شايفينها ونجرّب نتطلّع سوا ع نفس الهدف، ومن بعدها، القرار ما رح يكون حكم ع الآخرين إنّما لقاء معن. المصدر : صوت المحبّة

  من ثمارهم تعرفونهم بيخبرو عن ستّ كانت عم تنضّف خزانات المطبخ و وقع حبوب رزّ من الكيس عالأرض.  هيّي و عم تكنّسن و تكبّن شافها إبنها قلها أنا باخدن ما تكبّيهن.  أخدن و ركض عالجنينة حَطهن قدّام وكر النمل!  فرحت الأم بنفسيّة إبنها و طريقة تفكيرو اللي حتّى هيّي ما مرقت ببالها هالفكرة!  اللي هلقدّ محبّ و عندو رحمة تجاه أزغر المخلوقات اللي كتار ما بينتبهو لوجودن حتّى أكيد الرب ساكن قلبو و إذا التقيتو بهالشب أكيد رح تلتقو بيسوع.  تذكّرو إنّو قلنا من ثمارهم تعرفونهم و  كمّل : "هكَذَا كُلُّ شَجَرَةٍ جَيِّدَةٍ تَصْنَعُ أَثْمَارًا جَيِّدَةً، وَأَمَّا الشَّجَرَةُ الرَّدِيَّةُ فَتَصْنَعُ أَثْمَارًا رَدِيَّةً،" (مت ٧: ١٧)... الله يرافقكن... المصدر : صفحة Jesus My Lord