الزوادة اليومية

  ما تخافوا! بيخبرو عن مختار ختيار بضيعة بعيدة بيعرف كل الناس من الكبير للزغير و حافظ أسامي الكل و أرقام السجل و مين بيقرب مين و حتّى سنين ميلادن!  شو ما انسأل بيجاوب بدون ما يعوز يرجع للسجلّات.  و كل ما صار مشكلة بيِجو لعندو...ما في حدا ما بيعرفو... هالختيار بيهتمّ بالكلّ.  مرّة مِرِض المختار و عازْ دَمّ.  اللي طلعو من نفس فئة الدمّ مع إنّن بيحبّوه كتير بس بيخافو من الإبرة!  خوفن تغلّب عا حبهن و ما تبرّعو بالدمّ و ما قدر المختار يقاوم و توفّى... الخوف بيقتل الإيمان و الحب... ما تخافوا !  كونو قوايا بيسوع هوّي وحدو مصدر ثقتنا و سلامنا و شجاعتنا و طريقنا للحب و الخلاص... المصدر : صفحة Jesus My Lord

  أهميّة الحوار اليوم زوّادتنا بدا تحكي عن موضوع كتار منا بيمرقو فيه كل يوم بحياتن و يمكن أوقات كتير ما منعرف نتصرف و بعدين منصير نقول يا ريت!  كل واحد عندو رأيو و أوقات كتير رأينا ما بيكون متل رأي غيرنا و هالشي بدل ما يكون فرصة للحوار بيولد مشاكل.  أكترية الوقت المشكل بيكون صريخ و عيطة و حكي و النتيجة إنو ما بقى بيحكو مع بعضن. شو رأيك اليوم نقلك إنو متل ما في أكل بتتركو يبرد تا تقدر تاكل كمان الخلافات إذا بتتركا تبرد بتنحل أحسن !  قصدنا نقول إنو بوقتها بتكون منفعل و عالتعصيب يمكن تقول إشيا ما بتعنيا تندم عليها بعدين.  كرمال هيك بس يصير معك شي ما تتصرف دغري خود فترة تفكر فيا و قرّر شو رح تعمل ساعتها واجه الشخص التاني بيكون عقلك عم يحكي مش إنفعالك!  إتكلو عا الله و ما تنسو : الله معنا فمن علينا! مين قال إنو ما في مشكل ما إلو حل؟  يسوع قال!  و الله معكن... #خدّام_الربّ

  اللي ما بتقبلو عا حالك ما تقبلو لغيرك ييخبرو عن زلمي عندو قنّينة عصير صرلها زمان ما بيعرف إذا بعدها منيحة أو لأ قام قال هات لإهديها لجاري.  بعد فترة راح عند جارو يعملّو زيارة قام الجار ضيّفو كبّاية عصير، ما عرف هوّي إنّو هيدي القنّينة اللي إلو ، بس شرب حسّ في طعمة مش مزبوطة قام قلّو لجارو يا جار هالعصير مش منيح يمكن ناسيهن برّات البراد، قلّو جارو: ما بعرف هيدي القنّينة اللي جبتلي ياها هلّق فتحتها...! اللي ما بتقبلو عا حالك، ما تقبلو لغيرك بكل شي بالحياة... الله يرافقكن المصدر : صفحة Jesus My Lor

  من شو خايفين!؟ بيقول البابا شنودة التالت : "ثق أنّك لست وحدك أنت محاط بمعونة إلهيّة وقوّات سمائيّة تحيط بك، وقدّيسون يشفعون فيك." كلنا عنّا قدّيس يمكن منحسّو أقرب إلنا و منصلّيلو يمكن شوي أكتر و منطلب شفاعتو و أكيد ما بيردنا خايبين و بيتشفّعلنا بالسما.  و حتّى لو نحنا ما طلبنا ربنا مجَنّدلنا من عندو ملايكة حارسة ترافقنا و تساعدنا بكل لحظة من حياتنا...  اوثقوا و ما تخافوا الله معنا و اللي ربنا معو ما حدا و ما شي بيقدر عليه و نحنا عنّا رب غلب الموت و قلنا إنّو باقي معنا طول الدهر...  من شو خايفين!؟  صلّوا! المصدر : صفحة Jesus My Lord

  التضحية بيُخبرو عن قصّة صارت بشمال هولّندا عن رجّال ومرتو كانو يحبّو بعضُن كتير وبطريقه مميّزة.  بعد أشهر قليله من زواجن اتُّهم الرجّال بجريمه ما عملها، حاكم المنطقه قرّر إعدامو شنقًا قدّام كلّ النّاس، وقرّر تنفيذ الإعدام لحظة دقّ الجرس بالكنيسه.  ولمّا صار الوقت، دقّ الجرس بس صوتو كان مبحوح متل كأنّو شي قطعة لحم كانت محطوطه بين الجرس وضراباتو.  النّاس ركضو حتى يعرفو السبب، وقدّيش تعجّبو لمّا شافوا المرا عم بتحاول تهدّي الضربه بإيديها لحتى صوت الجرس ما ينسمع، وهيك بتبعد الموت عن الشخص يللي بتحبّ.  وبفضل موقفها قررّ الحاكم سجن الزوج دون شنقو، وهيك قرّرت الزوجة إنّو تقضي مع زوجها كلّ الفترة اللي قضاها بالسجن قبل ما تنعلن براءتو. الزوّاده اليوم بتقلّي وبتقلّك : الحب الحقيقي هو بذل وقمّة البذل عاشها الرب يسوع لمّا علّمنا إنّو ما في حب أعظم من إنّو يبذل الإنسان نفسو عن الأشخاص يللي بيحبّن. والله معكن... #خدّام_الربّ

الثقة سيّدة عجوز دخلت لملحمة، وطلبت من اللحّام نص كيلو لحمة. ووقفت تتفرّج على الناس بالشارع.  سألها اللحّام :  "ليش مش عم بتراقبوه هو وعم بيزين اللحمه متل ما الكل بيعملو؟"  جاوبتو :  "إذا نقّصت من اللحمه اللي أنا طالبتها، أنا بخسر قطعة أو اتنين، إنّما إنت بتخسر ثقتي وثقة كتار فيك وبيصيرو يقول عنك لص، فليش بدّي راقبك؟". الزوّاده بتقلّي وبتقلّك : الثقة لا تؤخذ إنّما تعطى.  لازم نوثق بالناس متلما أللّه وثق فينا. المصدر : صوت المحبّة

  حزنكم سيتحوّل إلى فرح زعلانين؟  حاسّين بالظلم؟  عم تبكو؟  ما في شي متل ما كنتو مفكرين و حابّين؟  البواب مسكّرة بوجهكن؟... كيف ناسيين شو قال يسوع!؟ "الحق الحق أقول لكم، انّكم ستبكون و تنوحون و العالم يفرح. انتم ستحزنون، و لكن حزنكم سيتحوّل إلى فرح."   و لا مرّة يسوع وعد و ما وفي، ما تخافو... اللي نحنا فيه اليوم غيمة و بتمرق، رح يرجعولنا الضحكة و الفرح و الحياة... يا رب! المصدر : صفحة Jesus My Lord

  زمن المسؤولية زمن المسؤوليه: إسم كتاب بيلفت إنتباهنا لمسؤوليه جديدة:  المسؤوليه عند الشّراء.  ع كتر ما منشتري اللي ما إلو لزوم والكماليات، صارت قدرتنا ع الشراء مغلوطه.  نحن بالأحرى عايزين هوا نقي، مَي نقيّه، صمت، مدن بدون عنف، وقت فراغ أكبر... إنّما هودي كلّن ما منقدر نشتريهن وما منتذكرن وسط وجود سلع تافهه، منظرها وحدو اللي حلو.  الأهم والأغلى ما بينشرى.  شاه إيران مات من مرض السرطان وما كان أبدًا فقير.  ومتلو كتار.  الحب ما بينشرى، ولا شروق الشمس.  ونحن بكل عمى قلب، كرمالنا منركض ورا السلع الأرضيّه يللي بتبهرنا، إنّما ما بيصحّ إلّا الصحيح.  الزوّادة بتقلّي وبتقلّك : إنتبه كانو يقولو: أنا أفكّر إذًا أنا موجود؛ ما تخلّيُن اليوم يقولوا: أنا أشتري إذًا أنا موجود. المصدر : صوت المحبّة

مطابق للمواصفات  الناس بترتّب بيوتها و بتهتم فيهن حتّى بس يجي ضيوف يكون البيت نضيف و يستقبلوهن بأحلى صورة. كيف إذا هالضيف جايي يسكن عِنّا؟! إجباري البيت يضلّ مرتّب 24/24! نحنا اللي منضلّ ندعي يسوع يجي يسكن بقلوبنا، لوين عم نعزمو؟ عا مطرح نضيف و مرتّب أو مكركب و مجوي؟! فكرو فيا و شوفو إذا قلوبكن مش مطابقة للمواصفات كيف بدكن تحَضرو مطرح يليق بيسوع حتّى وجودو بقلبنا ينعكس عا كل حياتنا... المصدر : صفحة Jesus My Lord

إنتَ بتعرف حالك بيخبرو عن نجمتين بالسما عم يتخانقو مين برأي سكّان الأرض أحلى و مين لونها أجمل و مين بتضوّي أكتر و مش عارفين إنّو أهل الأرض بيشوفو التنين نقط بيض و ما بيفَرقو بيناتن!  الزوّادة بتقلّك اليوم : إنتَ بتعرف حالك و ما تقارن حالك بحدا و لا تغيّر حالك تا تعجُب حدا و أكتريّة الوقت رح يكون هوّي مش مهتم... كل ما حدا حسّسك إنّك مش منيح كفاية ما تزعل الله خلقك عا صورتو و مثالو  مين هنّي الناس تا يقَيمو شغل الله!   لو كل واحد بيعيش حياتو و بيترك الناس يعيشو حياتن و ما يحاول يتحكّم بالناس و يجرّب يعيش حياتن عنّن بتكون خطوة الأولى للفرح و السلام.  صلّيلنا يا رب نتطلّع بالمراية بضمير مرتاح و نقدر نشوفك بحالنا و بالناس اللي منلتقي فيهن. آمــــــــــــين. المصدر : صفحة Jesus My Lord

  بعيد عن العين بعيد عن القلب؟! بيقولو بعيد عن العين بعيد عن القلب، قولكن صح؟  كل واحد مِنّا بيوم من الإيّام خسر حدا بيعنيلو  سبقنا عالسما إذا ما بقا شفناه يعني ما بقا نحبّو و لا نفكّر فيه؟  أكيد لأ... بالعكس منصير عايشين عنّا و عنّو، منتنفّس عَنّو، بيصير عايش بقلبنا...  يا رب إستقبلن عندك بين القدّيسين و أغمرهن برحمتك و أعطينا نقدر نكمّل، أكيد منزعل بس اللي بيعزّينا إنّن معك... منذكر كلمات القدّيسة تريزيا الطفل يسوع: لا أموت أبداً بل أدخل الحياة... المصدر : صفحة Jesus My Lord

  صلّوا صلّوا و لا تملّوا... بيقول خوري آرس : "إنّ واحدة من "السلام عليكِ يا مريم" إذا قيلت جيدًا، تهزّ جهنّم تحت أقدام الشياطين" كيف إذا 10 السلام عليكِ يا مريم بكل بيت مسبحة!  و بعدكن مستغربين ليش العدرا بتطلب صلاة المسبحة  و ليش بيقولو المسبحة هيّي أقوى سلاح بوجه الشيطان!  صلّوا صلّوا و لا تملّوا... العدرا ترافقكن و تبارك بيوتكن و يبلشو كل إيامكن بالسلام عليكِ يا مريم... المصدر : صفحة Jesus My Lord

العطاء المعنوي كان في شاب مسيحي ملتزم بالكنيسة، ومتميّز بحُبّو للفقرا. بيوم من الإيام بيلتقي بشحّاد قاعد على جنب الطريق عم يطلب حسنة، بيوقف قدّامو لحتى يساعدو، بس لـمّا حطّ إيدو بجيبتو بيتفاجأ إنو مَنّو حامل مصاري، بيعتذر من الشحّاد وبيقلّو: «يا بيّي أنا بعتذر ما معي مصاري لحتّى أعطيك، أكيد بالرجعة بقدّملك يلي الله بيقدّرني عليه».  ردّ الفقير وقلّو :  «عطيتني أكتر من الكلّ» إندهش الشبّ وقلّو :  «مش معقول يا بيّي، أنا ما عطيتك شي».  بيجاوب الفقير وبيقلّو :  «لـمّا إعتذرت مني وقلتلّي يا بيّي، عطيتني أكتر من الكلّ لأنو إلي زمان مش سامع هالكلمة من حدا». الزوّادة بتقلّي وبتقلّك : «العطاء المادّي متل ما بتحصل عليه بسرعة بتصرفو بسرعة، العطاء المعنوي هوّي يلّي بيضلّ وبيعطي النتيجة الأفضل». والله معكن... #خدّام_الربّ

  من مين بتزعل أكتر ؟   من مين بتزعل أكتر : من حدا ما بتحبّو أو من حدا قريب إلك و مميّز عندك؟  منّن بيقولو بزعل من اللي ما بحبّو لأنّو اللي بحبّن أهين بكتير سامحن!  منّن بيقولو بزعل أكتر من اللي بحبّو لأنّي ما كنت بتوقّع يزعّلني و أكيد رح كون حسّاس أكتر تجاهو  و اللي ما بحبّو ما بعطيه هالأهميّة أصلاً ! شو ما كانت وجهة النظر اللي بتشوفوها أصحّ من التانية بيبقى تتذكّرو إنّو الله حبنا متل ما نحنا و ياما منغلط بحقّو و منعمل خطايا ما بتنعدّ من كل الأنواع و الأحجام و بيبقى يحبنا و ما بيوقف يسامحنا كل ما طلبنا من قلبنا.  شو قولكن نضلّ نغلط و نعمل اللي بدنا ياه هيك هيك بيحبنا و بيضل يسامحنا؟  أكيد لأ!  إذا بتحبّ عنجد، بتزعل من حالك إذا زعّلت اللي بتحبّو...  عهالأساس لازم نتصرّف مع ربنا و مع الكل! المصدر : صفحة Jesus My Lord

  صاحب الحكم الأخير! كم مرّة بتسألو حالكن شو معقول يكونو قالو عنّي؟  شو فكّرو بس شافوني؟  قالو إنّي بشعة؟  قالو إنّي قصير؟  قالو إنّي ناصحة؟  قالو عنّي سئيل أو مهضوم؟  معقول يكونو فهمو قصدي غلط؟  فكّرو إنّي بزيدها؟  معقول يكونو ما حبّوني؟  شو رح يقولو بس فِلّ؟  كل هالأسئلة و غيرها أكيد شي مرّة مرقت براسكن و يمكن أخدت من وقتكن و شغَلت بالكن و زعجتكن!  حكم الناس و لا مرّة كان موضوعي كل واحد بيشوف من زاويتو، و كتير أوقات ما بِيتَعْبُو حالن يفَتشو أبعد من المظاهر و بيحكمو عاللي بيشوفوه و المشكلة إنّو هالفكرة اللي تكوّنت صعب كتير تتغيّر...  قدّيش بتريّح فكرة إنّو الله بيعرفنا من جوّا؟!  قدّيش حلو إنّو صاحب أهمّ رأي و صاحب الحكم الأخير بيشوفنا بهلقد شفافيّة و بيعرف خفايا القلوب و النوايا و كل شي و ما في إحتمال لو زغير يفهمنا غلط... شو حلو!!  متل ما قال الأخ أسطفان نعمة:  الله يراني!  يا رب خلّي عيونك علينا و نعمتك بتكفينا... المصدر : صفحة Jesus My Lord

  صليبنا إنتصر! مرّة معلمة سألت تلاميذها شو معقول ينعمل بخشب و كمشة مسامير؟  كتار جاوبو طاولة، كرسي، رفّ، لعبة...  ولد واحد جاوب: الحياة!  صارو رفقاتو يضحكو عليه إنّو مش فاهم السؤال!  طلبت مِنّو المعلمة يفسّر جوابو قلها : الحياة عطانا ياها يسوع.  قالتلو صح بس وين الخشب و المسامير بالقصّة!؟  كَمّل و قلها: يسوع عطانا الحياة إلنا لمّا هوّي مات عالصليب المعمول من خشبتين و كمشة مسامير!  ما عِرفت المعلمة شو بدّا تقول!... يسوع حوّل الصليب من خشبة قصاص للمجرمين لخشبة نجاة للبشر، من شي بيخافو مِنّو الناس لجسر عبور إلن عا مطرح الخوف فيه مش موجود.  هالزغير اللي أهلو كانو كل سنة بليلة عيد الصليب يولعولو قبّولة و يخبروه قصّة الصليب اليوم صار كبير .  مع إختبارات الحياة و الصلبان الزغيرة المغروسة بدَربو صار يمرق من مرحلة لمرحلة و كِلّو ثقة إنّو الصليب مَنّو إلّا بداية طريق القيامة و الخلاص... ينعاد عليكن... صليبنا إنتصر! المصدر : صفحة Jesus My Lord

  إنّ اورشليم في ديارنا من أقوال الطوباوي كارلو آكوتيس :  "إنّ المسيح موجودٌ في السر الأقدس تماماً كما كان موجوداً منذ ٢٠٠٠ سنة مع الرسل، الفرق ليس إلّا أنّ في تلك الفترة كان على الناس أن تتنقّل بإستمرار كي تراه، أمّا نحن فيكفينا أن نجد أيّة كنيسة قريبة، إنّ اورشليم في ديارنا". اليوم الأحد كلنا مدعوّين نفتّش عا أورشليم اللي بديارنا و نروح نلتقي بيسوع بالقربان هونيك! أحد مبارك و شفاعة هالشب الزغير مع كل الشباب اللي من عمرو و معكن كلكن! المصدر : صفحة Jesus My Lord

  شو السرّ ؟ شو بيمرق ناس بحياتنا و لا واحد متل التاني لا بالشكل و لا بالمضمون... ناس منحبّن كتير، ناس منحبّن شوي أقل ، ناس عادي ما بيعنولنا و ناس بيزعجونا. ما فيك تبقى مع اللي بتحبّن و بس... الحياة بتخلّيك تتواجد بين الكل و بتختبرك كيف بتتعامل مع كل شخص منّن مين ما كان و كيف ما كان.  بس حدا يضل بحياتكن و يزعجكن و مش قادرين تبعدو لأي سبب ما تزعلو تذكّرو إنّو يسوع كان في ناس تلحقو قصد من مطرح لمطرح بس تا تزعجو و تجرّب تحرجو و مش بس هيك وصل حتّى ينخان من أقرب الناس تلميذو يهوذا باعو بعد كل العشرة فما تستغربو أي تصرّف بيصدر بحقكن من مين ما كان بس السرّ هوّي نتمثّل بيسوع كيف كان يتصرّف معن، يردّ عاللي لازم ينردّ عليه، يبعد بس لازم يبعد، و أكتر شي يسامح و يغفر... يا رب إنت اللي خلقتنا عا صورتك و مثالك عطينا القوّة نتحمّل الصعوبات اللي أوقات كتير بتكون عا شكل ناس... مِنّك يا رب منطلب المصدر : صفحة Jesus My Lord

براءة الأطفال في رجّال شاف صبي زغير راكع وحاطط إيديه ع قلبو ومغمّض عيونو وعم يحكي.  شدّو المنظر وقرّب يسمع شو عم بيقول.  تفاجأ لمّا سمعه عم بيعدّ أحرف الأبجديّه.  سألو : "شو عم تعمل؟"  قال الصبي : "عم صلّي، والصلا حكي مع الرب وأكتر من هيك الربّ بيحب إنّو الأولاد الزغار يصلّولو، وأنا مش حافظ ولا صلا.. كنت عم قلّو أنا حافظ الأبجديّه تعلّمتها اليوم هيك بقلّو ايّاها". الزوّادة بتذكّرنا بقول الأم تيريزا :  "الصلا بتكبّر القلب ت يصير قادر يساع أللّه اللي عطانا ذاتو ".  الصلا إنّي حبّ الرب لدرجة الإيمان التّام إنّو هو بيّي. المصدر : صوت المحبّة

شو هي القداسة ؟ القدّيس فـرنسوا كزافييه كان بيوم عم يتأمّل، وخطر ببالو سؤال : "شو القداسه؟ كيف بدي صير قدّيس؟".  وكأنو فهم من أللّه عم بيقلّو وهو ع راس جبل عالي : "جرّب اطلَع لعندي وبتعرف ساعتها شو القداسة".  وفرنسوا قبضاي بالتسلّق، عنيد، وبلّش يطلع.  بعد ساعه، وقع.  وبما إنّو كمان شجاع، رجع وقف وكمّل، ورجع وقع، ورجع وقف وكمّل.  بعدو كتير بعيد عن راس الجبل.  وقال لَألّله : "خلص فهمت، القداسه مش إلى".  وضحك أللّه، من كل قلبو، وبتعرفو قدّيش قلب اللّه كبير! وقال لفرنسوا : "يا صديقي، الظاهر ما فهمت عليّي، القداسه مش إنّك توصل لراس الجبل.. القداسه إنّك لمّا توقع ترجع توقف وتكمّل طريقك لعندي". الزوّاده بتقلّي وبتقلّك : مش عيب توقع، لازم إذا وقعت تتشجّع وتكمّل المسير، تذكّر الرب ع طريق الجلجله وقع ثلاث مرات بس كمّل المشوار ووصل لمجد القيامة. المصدر : صوت المحبّة

  عتلانين هموم من كل الأنواع! بيخبرو عن زلمي شاغل كل حياتو و بس صار بعمر التّقاعد حبّ يعمل مشروع زغير يعيش منو لأنو ببلدو ما في ضمان شيخوخة بس المصاري اللّي جمّعن كل حياتو علقو بالبنك.  الكبير بدل ما يرتاح و يعوّض عن تعب السّنين بدّو يعتل همّ إذا عاز يتحكّم، بدّو يعتل همّ إذا الطبيب وصفلو دوا يقولولو مقطوع، بدّو يعتل همّ يوقف كل النّهار بصفّ بنزين ما بيخلَص، بدّو يفكّر بمستقبل ولادو، وصل يعتل همّ حتّى شو بدّو ياكل!  إجمالًا الكبار بالعمر بيرتاحو، بيحبّو الموسيقى، بيحبّو المشاوير يعني راحة بال!  بس أكيد ما كانو عارفين إنن رح يضطرّو يضلّو عتلانين هموم من كل الأنواع لآخر حياتن... عا كل الأحوال ما تزعلوا و تذكّرو إنّو ربنا بيعطي أصعب معاركو و مهماتو لأقوى جنودو... منصلّي عا نية كل شخص كبر بالعمر حتى ربنا يكون إلو ضمان الشيخوخة و الرّفيق و الصّديق و الحامي و الطبيب و مصدر السلام و الأمان! المصدر : صفحة Jesus My Lord

  إنتو مين بتختارو؟ اليوم الزوّادة بتسألكن :  لو قالولكن فيكن تختارو القدّيس اللي بدكن ياه تقضّو معو يوم كامل مطرح ما بدكن، مين بتختارو؟ شو بتقولولو؟ وين بتاخدوه؟ الزوّادة بتتمنّى لو فيا تختارن كلّن!  بس يمكن بهالظروف منختار نقضّي يوم مع إمنا مريم و منروح عا أكتر محلّات منسيّة و متروكة مش تا نزعّلها بالعكس حتّى هيّي تفرّحن و تنشر سلامها، هيّي الأم الحنونة اللي قادرة تواسي الحزانى و الفقراء و تخفّف عنّن و تنقل معاناتن لإبنها و تتشفّعلن عندو هيّي اللي منرتّلها: أنتِ الشفيع الأكرم عند إبنكِ يا مريم و كلنا إيمان إنّو ما بينرَفضلها طلب... و إنتو مين بتختارو؟ المصدر : صفحة Jesus My Lord

  إحفظ يوم الرب! كيف فيهن الناس يقولو إنّو كل الإيّام متل بعضها؟  يوم الأحد مش متل باقي الإيّام! الأحد يوم الرب، يوم القربان، يوم وحدتنا بالرب، يوم جسد و دم يسوع المسيح، يوم الإفخارستيا، يوم حبّ الربّ للإنسان لأقصى حدود... بهاليوم كلنا مدعوّين نروح نزور بَينا السماوي ببيتو مع إخوتنا المؤمنين و نصلّي كلنا سوا عا نوايا قلوبنا... ما تنسو شو بتقول الوصيّة التالتة من الوصايا العشر : إحفظ يوم الرب! أحد مبارك للكل. المصدر : صفحة Jesus My Lord

  به ينتهي إلى النجاح بيخبرو عن صبي زغير رجع من المدرسة ركض عند إمّو قلها :  ماما معليش إذا بقيت بصفّي هالسنة؟  إستغربت إمّو السؤال و قالتلو ليش عم يسأل قلها : إنّو علاماتو مش كتير مناح بس مش مشكلة لأنّو معلّمتو كمان صرلها بنفس الصفّ ١٥ سنة! نحنا مرّات كتير منجرّب نخبّي فشلنا بس نقارنو بفشل غيرنا متل ما حاول هالطفل يعمل عن براءة أكيد! بدل ما لمّا تفشل تفتّش عا حدا تاني كمان تا تقول إنّو مش بس إنت بهالوضع، فتّش عا حدا ناجح تتمثّل فيه!  النجاح أو الفشل بيعتمدو عالطريق اللي إنت  بتختارو و ما حدا غيرك!  بس تذكّر إنّو تا تنجح لازم تتّكل عا الله بكل شي، إذا هوّي قبطان سفينة حياتك مش ممكن تغرق!  "به ينتهي إلى النجاح، وبكلمته يقوم الجميع" (سفر يشوع بن سيراخ ٤٣: ٢٨) المصدر : صفحة Jesus My Lord

  الوصايا عشر وصايا عمليّة :  ١ - إختار هدف نبيل وإقبل تتألم من أجلو  ٢ - تجنّب الإستخفاف بالقليل بكرا بتستخف بالكتير  ٣ - إعرف تمامًا شو بدّك ومن وين جايي  ٤ - ما تكبّر ولا تقلّل من قيمة قدراتك  ٥ - تعلّم تشتغل مع الآخرين  ٦ - ما تخلط بين السرعة والعصبيّة  ٧ - أصبر ع الوقت  ٨ - إقبل إنّو اليوم تضيّع وقتك حتى تتعلّم أمر بيفيدك بكرا  ٩ - قد ما بتقدر آتقن الشغل اللي عم بتقوم فيه  ١٠ - ولمّا الكل بيقولو: ما في جدوى، إنت قول بنعمة اللّه كل شي ممكن. الزوّادة بتقلّي وبتقلّك : إذا ما بتآمن بالمستحيل ما بتقدر أبدًا تحقّق المحال. آمن ببكرا حتى تقدر بسعادة تعيش اليوم. المصدر : صوت المحبّة

  تحصيل حاصل... المحروقات من أساسات الحياة اليوميّة.  بدونن ما في وسائل نقل و لا كهربا و لا إتّصالات و لا أفران و لا مستشفيات و لا مدارس و لا جامعات و لا محال تجاريّة و لا زراعة و لا صناعة و لا قطاع خدمات و لا حتّى في حياة بالبيوت.  الناس تحوّلت برّاداتن لخزانات و كَبّو أكل إنتزع و مش قادرين يشترو غيرو...  كل هالشي نتيجة عدم توفّر المحروقات...  من قبل ما كِنّا حتّى ننتبه لأهميّة دور المحروقات و نعتبرن تحصيل حاصل...  لَمّا فقدناهن عرفنا قيمتهن.  و يا ما ناس بحياتنا منتعوّد عليهن بروتين معيّن و ما منتخايل حياتنا بدونن بس يوم اللي بتصير منعرف قيمتهن...  يا رب ساعد بحلّ أزمات حياتنا الكتيرة وحدة ورا وحدة و إحفظلنا كل اللي منحبّن و فتّح قلوبنا و عقولنا تا نعرف قيمتن بدون ما نخسرن... المصدر : صفحة Jesus My Lord