الزوادة اليومية

نعم ولأ !! نحنا لمّا نقول نعم لشغلة بحياتنا منكون تلقائيًّا عم نقول لأ لإشيا تانية. تعو نفكّر فيا، مثلاً أنا لمّا قول نعم بقبل كون موظّف بهالمطرح بكون عم قول لأ لعروض تانية.  أنا لمّا بقول نعم أنا بشجّع هالفريق بكون عم قول لأ للفرق الباقية.  لمّا قول نعم هالإنسان هوّي شريك حياتي بكون عم قول لأ للباقيين.  لمّا تقول نعم للرب بتكون عم تقول لأ لكل شي ما بيتوافق معو!  مريم كانت أوّل وحدة قالت نعم لله و لأ لمعتقدات الأرض الفانية.  و نحنا؟  رح نمشي عا خطى مريم أو رح نضل مقَسْيِين قلبنا و عم نراوغ بالجواب عا سؤال ربنا الواقف عا بابنا ناطر؟...  فكرو فيا و الله يرافقكن! المصدر : صفحة Jesus My Lord

  اوثقوا بحكمة الله ! بيخبرو عن ستّ فقيرة كل يوم بتعمل عجينة بتبيعها لصيّادي السمك بدولار.  مرة هيّي و رايحة تبيع العجينة بياخدها من إيدها طير  النورس و بيهرب.  قعدت تبكي كيف بدّا تجيب أكل لولادها هلّق!  هيّي و ماشية التقت بخوري الرعيّة قالتلو: يا أبونا الله ظالم؟  قلها: لأ!  قالتلو طيّب ليش قِبِل إنّو النورس ياخدلي عجينتي!؟  جاوبها: إنتي ما تعتلي همّ هُوّي أدرى... ما في شوي بيطلع مَركَب بقلبو ١٠ صيّادين من المينا و بيركضو عند الخوري و بيقولولو: نحنا كِنّا عم نغرق لأنّو تشقّق المركب و صار يفوّت مَي.  صَلّينا و قِلنا يا رب خلّصنا و كل واحد مِنّا رح يدفع ١٠٠ دولار للفقرا، شوي مَرَق نورس وقعت مِنّو عجينة سكّرنا فيها الشقوق و جينا ندفع نِدِرنا و إنت يا أبونا وزعو عالفقرا... بس راحوا عطاها الأبونا المصاري و قلها: ربنا إشترى عجينتك بـ ١٠٠٠ دولار بدل الدولار الواحد!  اوثقوا بحكمة الله... هوّي أدرى. المصدر : صفحة Jesus My Lord

  العصا السحريّة 🪄 بيخبرو إنّو مرّة بمسابقة جمال، إنسألوا كل المشتركات السؤال نفسو و بيقول :  إذا هلّق كان معِك عصاية سحريّة و فيكي تستعمليها مرّة وحدة شو كنتي بتعملي؟ تنوّعت الأجوبة بين : بخفي الشرّ، بمحي الكذب، بعالج كل الأمراض، بخفي الحزن... بس الصبيّة اللي ربحت بتعرفو شو جاوبت؟  قالت: بخلّي العصاية السحريّة تتكاثر و تصير ٥٠ عصاية سحريّة و هيك بيصير عندي القدرة حقّق ٥٠ طلب! بعمل كل اللي قالوه و زيادة! كيف إذا بتعرفو إنّو عندكن بقلوبكن شي أقوى من عصا سحريّة هوّي الصلا!  يسوع قلنا صلاتكن و إيمانكن بيزيحوا جبال، كتروا صلاتكن حتّى كل شي يكون مبارك بإيد يسوع و كل شغلة حلوة بتعملوها بتِرجعلكن أضعاف... الله رفيقكن عا طول! المصدر : صفحة Jesus My Lord

  القدّيس بيعكس الضو علينا بيخبرو عن بنت زغيرة ماشية بكنيسة مع إمها.  صارت تشوف عالشبابيك لوحات لقدّيسين مصنوعين من قزاز ملوّن حلوين كتير.  صارت ماشية و تقرا أساميهن تحت الرسمات و تحفظ كل شي عم تشوفو.  رجعت عالبيت و صارت تخبّر الكل عن القدّيسين اللي شافتن، قد ما عادت هالكلمة قام سألها خيها شو يعني "قدّيس"؟  قالتلو: القدّيس هوّي حدا حلو كتير بيعكس الضو علينا و بيلَوِّن لحظاتنا من خلال شبّاك الكنيسة!  هالزغيرة قالت شو شافت و بنفس الوقت وَصَفِت القداسة بدقّة!  هيّي النور اللي بيبعتلنا اياه ربنا من خلال الكنيسة... انشالله حياتكن بتزهّر حبّ و قداسة... الله معكن. المصدر : صفحة Jesus My Lord

  إنت كمان مدعو للقداسة ! بيخبرو عن حُب القدّيس أغسطينوس لأمّو القدّيسة مونيكا و بيقولو إنّو من الإشيا اللّي قالها عنها :  إمّي كانِت بتيابها إمرأة و بإيمانها رجل و برصانتها و حكمتها ختيارة و بحنانها و حبها أمّ و بالتّقوى اللّي عندا إياها مسيحيّة! هالسِّت اللّي جمعِت كل هالصّفات أكيد إبنها ما رح يكون بعيد عن القداسة آبدًا! يا رب إزرَع فينا مواهِب روحَك القدّوس خصوصًا الفهم و الحكمة و القوّة حتّى نمشي عا درب القدّيسين و ليش لأ نكون نحنا كمان متلُن... آميـــــــن. المصدر : صفحة Jesus My Lord

  ألشيخ الأعمى بيخبرو عن ختيار فقد نظرو، وما عاد قادر ينتقّل وما عاد فيه يقوم من التخت وبدّو مين يهتم فيه ويساعدو. بيوم من الإيّام سمع عن طبيب قادر يعملّو عملية ت يرجّعلو نظرو وبالفعل هيك صار.  عمل العمليّة وبعد فترة بيكشفلو الطبيب عن عيونو وبيرجع يقشع متل الأوّل. بيطلب الختيار الفاتورة، وساعتها بيصرّخ وبيقول :  «معقول هلقدّ؟»  بيقلّو الطبيب :  «إذا شايف الفاتورة غالية أنا مستعد خفّض من السعر».  جاوبو الختيار وقلّو :  «لا مش هيك، عم بندهش من عطايا الله المجانيّة يلّي ما منقدّر قيمتها إلاّ لـمّا نخسرها، ومنها عطيّة البصر». الزوّادة بتقلّي وبتقلّك : «الرّب عطانا وزنات كتيرة، خلّينا نتاجر فيها ونعرف قيمتها قبل ما نخسرها». والله معكن. خدّام الرب ®

  معركِتنا ضدّ الشرّير بيقول القدّيس إفرام السريانيّ :  "ثمينٌ هو الصّوم الطاهر أمام الله، وهو محفوظ ككنزٍ في السماء، الصوم سلاح أمام الشرير، وترسٌ نقاتلُ بهِ سهامَ العدو". يا رب بارِك صومنا و اعطينا القوّة نكمّل فيه للآخِر.  سامِح أغلاطنا و ضعفنا البشريّ برحمتَك الكبيرة... ساعِدنا نعرِف نستعمِل صومنا سلاح بوجه الشرير و نربَح معركِتنا ضدّو بخلال هالصّوم و كل الإيام، آميـــــــن. المصدر : صفحة Jesus My Lord

  خبرة حياة الله معكن... بيقول أحد المعالجين النفسيّين:  كلّ مرّة بتلتقي بإنسان بيحكي بسرعة، لازم تعرف إنّو هالإنسان خجول وكتوم. ولمّا بتشوف إنسان بينام أكتر من نص نهارو لازم تعرف إنّو عم يتألّم. ولمّا بتشوف إنسان بيضحك للأمور العاديّة البسيطة تأكّد إنّو إنسان حزين. ولمّا بتشوف إنسان مبتسم لازم تعرف إنّو صاحب قلب طاهر ونظيف. ولمّا بتدخل بحوارات دايمة مع شخص لحدّ الإختلاف بالآراء لازم تعرف إنّو هالشّخص بيحبّك. ولمّا بتلتقي بشخص ما بيهتم بحدا تأكّد إنّو أصيب بإحباط من الأخرين. الزّوّادة بتقلّي وبتقلّك : لمّا منلتقي بالنّاس لازم نتجنّب الحكم عليهن لأنّو لكلّ إنسان تاريخو وخبرتو الشّخصية، الأهمّ من هيك ما نوقع بالأحكام المسبقة، والله معكن. المصدر : صوت المحبّة

  إيمان الأربعة ! بإنجيل القدّيس مرقس (٢: ١–١٢) منقرا عن شفاء المخلّع، الشب اللي لمّا ما قدرو وصلوا أصحابو عند يسوع، طلعوا عالسطح و نزّلوه من السقف!  هون منشوف إنّو هالشب شفاه يسوع من ورا إيمان أصحابو و نحنا بعدنا منقلّل من أهميّة مين هنّي رفقاتنا! تطلّع حولك، شوف إنت مع مين عم تكون، شوف إيمان الأشخاص اللي بحياتك بالربّ و كل ما بدّك تصير أصحاب مع حدا تذكّر هالزوّادة و تذكّر إنّو إيمان اللي حولك فيه يخلصك متل ما إيمانك فيه يخلصن! الله معكن. المصدر : صفحة Jesus My Lord

  خود يسوع معك الله معكن... بيخبّروا عن إمّ كانت كل يوم توصّي إبنها قبل ما يروح على الشّغل وتقلّو يا إبني ما تروح وحدك خود يسوع معك، خود فكر يسوع حتّى تكون وديع ومتواضع، خود قلبو حتّى تسلك بالمحبّة ، خود عينيه حتّى ما تنظر لعيوب النّاس  ، خود لسانو حتّى كلامك يصير نعمة للسّامعين، ولتسبيح الآب السماوي، خود إجريه حتّى تمشي على دروب الحق، خود عيونو حتّى تشوف فضائل النّاس وتستر عيوبن، خود إيدين يسوع ليساعدوك بصعوبات الحياة. الزوّادة بتقلّي وبتقلّك : خود معك يسوع على طول وقدّمو هديّة لكلّ النّاس يلّي بتلتقي فيهن، كون متل مريم يلّي قدّمت يسوع هديّة لنسيبتها أليصابات وهيك الفرح بملّيلك حياتك وحياة يلّي بياخذ يسوع، والله معك. المصدر : صوت المحبّة

  أطلبوا تجدوا مرّة شبّ سألوه رفقاتو: شو أكتر شي شجاع عملتو بحياتك؟  فكّرو رح يجاوب إنّو فات بتحدّي معيّن أو ما خاف بشي موقف، أو واجه حدا قوي... بس ما كان جوابو متل ما توقّعوا!  قلّن : أكتر شي شجاع عملتو بحياتي هوّي إنّي تجرّأت أطلب المساعدة! مش عيب تطلب المساعدة، ما حدا بيقدر يعمل كل شي وحدو!  و أوقات صعب كتير تطلب من حدا يساعدك كرمال هيك إسمها شجاعة!  و أوقات كتير الناس ما بتقدر حتّى تحلّ المشكلة و لمّا يخلصوا حلول الأرض أكيد مش يعني خلص كل شي!  مشاكل الأرض ما بتصمد قدّام حلول السما و تذكّروا شو قال يسوع: أطلبوا تجدوا، إقرعوا يفتح لكم... الله معكن. المصدر : صفحة Jesus My Lord

  أطلبوا تجدوا.. إقرعوا يفتح لكم مرّة شب سألوه رفقاتو : شو أكتر شي شجاع عملتو بحياتك؟  فكّرو رح يجاوب إنّو فات بتحدّي معيّن أو ما خاف بشي موقف، أو واجه حدا قوي... بس ما كان جوابو متل ما توقّعوا!  قلّن: أكتر شي شجاع عملتو بحياتي هوّي إنّي تجرّأت أطلب المساعدة! مش عيب تطلب المساعدة، ما حدا بيقدر يعمل كل شي وحدو!  و أوقات صعب كتير تطلب من حدا يساعدك كرمال هيك إسمها شجاعة!  و أوقات كتير الناس ما بتقدر حتّى تحلّ المشكلة و لمّا يخلصوا حلول الأرض أكيد مش يعني خلص كل شي!  مشاكل الأرض ما بتصمد قدّام حلول السما و تذكّروا شو قال يسوع: أطلبوا تجدوا.. إقرعوا يفتح لكم. المصدر : صفحة Jesus My Lord

  الفشل الله معكن... بيخبّروا عن رومل قائد الجيش الألماني الشّهير، الملقّب بثعلب الصّحراء، بيوم من الإيّام سألوه شو أوّل أسباب الفشل؟  جاوب بكلّ بساطة :  «إن أردت أن تكون فاشلاً حاول أن ترضي كل من هم حولك، حاول إرضاء كلّ النّاس». الزّوّادة بتقلّي وبتقلّك : لحتّى تكون إنسان ناجح بالحياة لازم تسمع للرب يلّي بيحكي بضميرك، سماع لصوتو بيهمسك بضميرك مشي على خطواتو وتذكّر على طول هوّي الطّريق يلّي بتوصل للحق والحياة، والله معك. المصدر : صوت المحبّة

حلّ الخلافات الله معكن... بيخبّروا عن رجّال كتير حكيم كان مختار الضّيعة وشيخ القبيلة، إشتهر بحلّ المشاكل وكانوا كلّ النّاس يحتكموا لإلو لحتّى يحللّن مشاكلهن، بعد سنين طوال من الخدمة أقعدو المرض، وبلّشوا كلّ النّاس يفكّروا بتذكية إبنو لحتّى يكون مختار محلّو، لمّا عرف الإبن بقرار أهل الضّيعة، قال لازم إستفيد من خبرة بيّي لازم أعرف كيف كان يحل كلّ المشاكل، توجّه لعندو وسألو عن سرّ نجاحو بحلّ المشاكل، جاوب البيّ وقال لإبنو :  «يا إبني المشاكل والخلافات متل الطّعام السّاخن ما بتقدر تاكل الطّبق إلّا إذا برد، هيك المشاكل بأكتر الأحيان لازم تتركها تبرد وبعدين بصير حلّها سهل». الزّوّادة بتقلّي وبتقلّك : كل عقدة وإلها حلّ، كل قفل وإلو مفتاح وكل مشكلة إلها حلول شرط إنّك تعطي حالك وقت لتفكّر بحلّها وتعطي أصحابها وقت لحتّى يستوعبوها، الوقت سيف ذو حدين لازم على طول نستفيد منّو للخير، والله معكن. المصدر : صوت المحبّة

بما نعطي! الله معكن... بإحدى البرامج الإذاعيّة طرح المذيع سؤال عبر الأثير : ما هو الأهم، الإمتلاك أم العطاء؟  وبلّش المذيع بتلقّى مداخلات المستمعين، وأجمل ما قيل كان بالإجابة التّالية :  «روعة الإنسان ليس بما يملك إنّما بما يعطي، الشّمس تملك النّار لكنّها تعطي النّور، تقضي على الظّلام وتعطي الدفء لكلّ المخلوقات». الزّوّادة بتذّكرني وبتذكّرك : بمثل الوكيل الجاهل يلّي هدم أهراؤو وعمّر أهراء أكبر منها، جمّع غلال لسنين طوال وما حسب حساب الصّوت يلّي رح بيقلّو :  اليوم تُأخذ نفسك منك، كلّ الّذي إقتنيته لمن يكون؟ يا ريت منكون هابيل، منقدّم أفضل ما منملك ولا مرّة نكون قايين ونقدّم فضلاتنا، والله معكن. المصدر : صوت المحبّة

  خلّوا الله محوَر حياتكن بيقولو إنّو تصنّعوا الكفوف عا صورة الإيد يعني ما إلُن وجود لو ما كان في إيد!  إذا الإيد ما كانت بقلب الكفوف ما بيكون إلن إستعمال و لا أهميّة.  نفس الشي نحنا خلقنا عا صورة الله و مثالو لأنّو بدونو نحنا ما كنّا موجودين و لأنّو إذا ما كان الله بقلب حياتنا منفقد أهمّيتنا!  خلّوا الله محوَر حياتكن و بيصير في معنى لكل شي... الله معكن عاطول! المصدر : صفحة Jesus My Lord

  أبيض 🤍 مش أسود 🖤 بيخبرو عن زلمي عم يقول لرفيقو أنا تعلّمت إنّو أحسن شي تخلّي قلبك يكون أسوَد لأنّو الأبيض بيتوسّخ بسرعة!  قلّو رفيقو أنا ما بوافق معك أبداً !  القلب الأبيض بيسكن فيه الله و مش ممكن يتوسّخ بالعكس مع كل فعل حبّ و رحمة بيصير أبيض أكتر!  ما تصَدقوا هالإشيا اللي منسمعها و فكروا إنّو الحب بيغلب كل شي.  يسوع بالحبّ غلب الموت و الشرّ... يا يسوع الوديع و المتواضع القلب إجعل قلبنا مثل قلبك 🤍 المصدر : صفحة Jesus My Lord

  المال باقي عالأرض بيعيش الإنسان إجمالاً كل حياتو عم يفتّش عالمصاري و كيف بدّو يأمّنها.  بس إذا منقرا حياة القدّيسين بيتصرّفو عكسنا!  كتير قدّيسين إجو من عِيَل غنيّة تخلّوا عن كل شي لأنّن عرفوا إنّو الغِنى الحقيقي هوّي يسوع المسيح!  واحد منّن هوّي القدّيس فرنسيس الأسّيزي اللي كان عايش حياة فخمة بس بعدين ترك كل شي و لحق يسوع.  و مرّة إلتقى بزلمي فقير قدّملو كل التياب اللي عندو و قال :  "الآن لدي فقط الله والكفاف." اعطينا يا ربّ نفهم إنّو المال باقي عالأرض و علّمنا نعرف نجمع إشيا بتمرق معنا من باب السما! الله معكن. المصدر : صفحة Jesus My Lord

  الخيانة الله معكن... حابب اليوم إرجع أنا وإنت بالتّاريخ لإيّام هتلر والحرب العالميّة الثّانية، مش لنتذكّر المآسي والدّمار والإقتتال، إنّما لنتوقّف عند مقابلة صحفيّة أجراها أحد الصحافيّين مع هتلر، ومن أجمل ما سألو :  «مين هنّي أرخص النّاس يلّي التقيتهن بحياتك؟» جاوبو هتلر :  «هنّي الخونة يلّي ساعدوني لإحتلّ بلادهن». الزّوّادة بتقلّي وبتقلّك : الرّب يسوع دعانا لحتّى نكون عمّال أمناء للخدمة، ما أرادنا خونة، خلّينا نتذكّر مصير الخادم الأمين كيف أجلسو الرّب من عن يمينو والخائن طرحو بالظّلمة البرّانيّة، نيّالنا إذا كنّا أمناء على القليل لأنّا رح منكون أمناء على الكثير، والله معكن. المصدر : صوت المحبّة

  نحنا بلا ربنا كمشة تراب! بيخبرو عن فراشة طايرة هيّي و عيلتها فرحانين من وردة لوردة.  شوي بيطلع هوا كتير قوّي و بيبطلو قادرين يتحكّموا بإتّجاهن و صاروا يخبطوا بالشجر... لمّا هدي الهوا أوّل شغلة عملوها شكروا الله إنّن بقيو مجموعين! نحنا لمّا نمرق بمطب بحياتنا منصير نتفاخر إنّو نحنا قوايا تخطّيناه و مننسى إنّو نحنا بلا ربنا كمشة تراب! "أَسْتَطِيعُ كُلَّ شَيْءٍ فِي الْمَسِيحِ الَّذِي يُقَوِّينِي." (في ٤: ١٣).  ما تنسوا هالشي و صلّوا و اشكروا! المصدر : صفحة Jesus My Lord

  وين بدّو يخبّي مصرياتو؟ بيخبرو عن شبّ محتار وين بدّو يخبّي مصرياتو.  سأل جدّو... قام جدّو قلّو :  خبّيهن تحت الإنجيل ما حدا منتبهلو هالإيّام!  كان الجِدّ عم يجرّب يوَصّل رسالة لحفيدو... و بالفعل وصلت و راح الشبّ صوب الإنجيل مسح عنّو الغبرة و صار يقرا كل يوم و يخبّر أهلو!  الإنجيل وجودو بالبيت مش واجبات و مَنّو كتاب تاريخ!  هيدا كتاب حياة كتاب حُبّ كتاب كلمة الله... اهتمّوا فيه و احكوا ربنا من خلالو و حَياتكن كلها بتتغيّر! الله معكن. المصدر : صفحة Jesus My Lord

  السّفر الله معكن... بيخبّروا عن شاب تعب من السّفر من بلد لبلد والهرب من القال والقيل وأحاديث النّاس يلّي ما بتخلص، إنتهى فيه المطاف على باب منسكة منهك القوى عطشان، جوعان، تعبان، بيحملو النّاسك وبيعتني فيه، وبس يوعا بيسألو هوّي مين؟ من وين جايي، وليش وصل على المنسكة بهالحالة؟  خبّرو إنّو إلو سنين تايه على وجّ الأرض هربان من حكي النّاس وأحكامهن، بيقلّو النّاسك :  شو بدّك بكلام النّاس لازم تروح محلّ ما بيرتاح قلبك، محل يلّي بتحسّ بالأمان، ما تمشي بطريق ما بتعجبك بس مشيت فيها لأنّو النّاس حطّوك عليها، لازم تمشي بالطّريق يلّي بتعجبك حتّى لو كنت عم تمشي هالطّريق وحدك. الزّوّادة بتقلّي وبتقلّك : إذا حسّيت إنّك غرقان بكلام النّاس ومضيّع الطّريق ما لازم تنسى إنّو الرّب هوّي طريق النّور يلّي بتمشّينا بالحقّ وبتوصّلنا للحياة الأبديّة، والله معكن. المصدر : صوت المحبّة

  الغربال الله معكن...   بيخبّروا عن رجّال مجنون كان قاعد بباحة الضّيعة، حامل غربال وعم بيغربل الهوا، تقدّم منّو شاب وسألو: شو عم تعمل؟  جاوبو: عم غربل الأصدقاء.  سألو الشّب مين يلّي نزلوا من الغربال؟  قلّو : "الغدّارين، السّارقين، المتملّقين، الأنانيّين، أصحاب الوجهين، ناكري الجميل، خائني العشرة، المنافقين..." وبلحظة كمّل الشّاب طريقو حزين لأنّو إكتشف إنّو الصّداقة صارت نادرة بعالم اليوم. الزّوّادة بتقلّي وبتقلّك : بتقدر يكون عندك كتار يلّي هنّي رفاق سفر، أو عمل، أو دراسة، قلال هنّي الأصدقاء، بس لازم تنتبه من كترة الأصحاب، والله معك. المصدر : صوت المحبّة

  هوّي بيدبّر كل شي بيخبرو عن راهب عايش بدير فقير كتير.  بَعَتوه رفقاتو عالسوق يشتري أغراض بإيّام الصوم حتّى يطبخوا.  نزل بس المصاري اللي معو ما كفّوا و ما قدر يجيب أكل.  هوّي و راجع كان عم يصلّي و يفكّر كيف بدّو يقلّن إنّو ما قدر يجبلن شي...  بس وصل تفاجأ إنّو لاقى صاحب مطعم تبرّعلن بأكل عا سنة!  شكر الله عا نعمتو و فهم إنّو و لا مرّة لازم الإنسان يتّكل عا حالو، و إذا بيسلّم أمرو لرَبّو هوّي بيدبّر كل شي... الله معكن. المصدر : صفحة Jesus My Lord

  عا خطى يسوع ! "تأمّل في المسيح سيّدك وربّك.. إنّه صام لكي يعلّمنا أنّ الصّوم هو طريق الملكوت."  هالعبارة من أقوال القدّيس باسيليوس الكبير. إنت اليوم عم تصوم لأنّك ماشي عا خطى يسوع! و ما في حدا مشي درب الربّ إلّا ما وصل للخلاص.  ما تخاف تمشي هالطريق قد ما فكّرتو صعب، يسوع بيحبّك و رح يساعدك و تأكّد انّو كل صعوبة بتواجهها هيّي تا تقوّيك مش تا تكسرك! الله معكن. المصدر : صفحة Jesus My Lord

  إرحمنا يا يسوع يا فيض المراحم... شرقت شمس يوم جديد... يا ربّ، منطلب منّك بهالنهار تعطينا نور يضوّي حياتنا اليوم و كل يوم حتّى العتمة تفلّ! إنت اللي قلت: أنا نور العالم من يتبعني لا يمشي في الظلام...  ما تتركنا غرقانين بالعتمة اللي نحنا عملناها... إرحمنا يا يسوع يا فيض المراحم...  الله يكون معكن و ينوّر طريقكن! المصدر : صفحة Jesus My Lord

  الحب الله معكن...  بيخبّروا عن عالم بالدّيانات قرّر يقضّي سنين عمرو متنقّل من بلد لبلد، شرط إنّو كل خمس سنين يعيش مع جماعة دينيّة مختلفة عن الأخرى، وبحضارة وثقافة جديدة. بعد سنين طويلة من الدّراسات النّظريّة والتّطبيقيّة توصّل إلى ما يلي: الحبّ متواجد بكلّ الدّيانات مع إنّو الحبّ ما في إلو أيّ دين. الزّوّادة بتذكّرني وبتذكّرك : بقول القدّيس أوغسطينوس أحبب وإفعل ما تشاء، بوقتها منكون عم نختبر قوّة الحبّ يلّي ما إلو دين، إنّما عندو القدرة على تغيير كلّ الأفكار والأقوال والأفعال، والله معكن. المصدر : صوت المحبّة

الصوم دوا للنفوس ! بيقول القدّيس يوحنّا الذهبيّ الفم :  "الصوم هو العلاج الطبيعي للنّفس المريضة والمتعبة ، فهو يقوّي النّفس ويجعلها أكثر إستعدادًا للتحمّل والصبر." متل ما لمّا جسم الإنسان يمرَض بياخُد دوا و بيفتّش عالعلاج تا يِشفى هيك لازم يهتمّ كمان بصحتو الرّوحية!  الدّوا الأوّل لنفوسنا هوّي الصوم... يا رب تِشفي النّفوس و الأجساد و ما تخلّي حدا موجوع... آميـــــــن. المصدر : صفحة Jesus My Lord

  بابا عم يحكي مع الله ! بيخبّر زلمي إنّو كان عم يصلّي و عم يدقّلو رفيقو عالتلفون بس ما ردّ.  رجع دقّ مرّة تانية، قام إبنو للزلمي ردّ و قلّو : عمّو مش عيب تقاطِع شخصين هنّي و عم يحكوا!  ما فهم عليه، كمّل الصبي و قال بكل جدّيّة: بابا عم يحكي مع الله إحكيه بعد شوي! هالزّغير مهضوم كتير بس كمان هالقصة بتذكّرنا إنّو الصّلا مش تِرداد كلمات حافظينها، الصّلا حوار مع الله، الصّلا علاقة مشاركة مع ربنا!  قديش بتنزِعِج إذا عم تحكي مع حدا و ما كان عم يسمعلَك و مهتم و مركّز بشي تاني!؟  نفس الشّي بس تصلّي لازِم كل تركيزَك يكون مع يسوع... صلّوا، إحكوا مع ربنا و إسمعولوا و إنشالله بيكون عاطول معكن! المصدر : صفحة Jesus My Lord

التّسامح والصّمت   الله معكن...  بيخبّروا عن إنسان كان عايش بمدينة ما فيها لا عدالة ولا نظام، بالنّسبة لإلو العدالة والنّظام بترتكز على شريعة الغاب، القوي بياكل الضّعيف، وشعارو إن لم تكن ذئباً أكلتك الذّئاب.  بيوم من الإيّام وعلى أثر مشكل، تمّ إدخالو للسّجن، وهونيك بيلتقي بسجين وصار حديث بيناتن عن التسامح والإنتقام، وبسرعة بلّش هالشّب يحكي عن بطولاتو، وصرّح إنّو هوّي ما بيسكت لحدا، ما بيسامح وعلى طول بياخد حقّو بإيدو، سمعلو السجين بكلّ إهتمام، ولمّا خلّص قلّو :  اسمحلي إعتذر منّك، كتار بمجتمعنا بيعتبروا التّسامح هزيمة والصّمت إنكسار، بس الحياة أثبتت إنّو التّسامح هوّي عمل بطولي أكتر من الإنتقام، والصّمت بدّو قوّة أكتر من الكلام. الزّوّادة بتدعيني وبتدعيك : لحتّى نتعلّم من يسوع المعلّق على خشبة الصّليب كيف سامح يلّي صلبوا، وكيف صمت وما ردّ على كل يلّي شتموا، كان متسلّح بالصّمت والمغفرة خلّينا نتشبّه في، والله معكن. المصدر : صوت المحبّة