الزوادة اليومية

  المتفرّجون الله معكن... زوّادة اليوم كتير قصيرة بس بتحمل عِبَر كتير كبيرة. بإحدى الّلقاءات الجامعيّة سُئِل أنشتاين مين هنّي الأشخاص يلّي بدمّروا العالم؟ جاوب بكلّ بساطة يلّي بدمّروا العالم مش النّاس الأشرار إنّما الأشخاص يلّي بيوقفوا متفرّجين عليهن هنّي وعم بيقوموا بأعمالهن الإجراميّة التّخربيّة. الزّوّادة بتقلّي وبتقلّك : السّكوت عن الخطأ أبشع من الخطأ بحدّ ذاتو، لازم على طول نتذكّر إنّو السّاكت عن الخطيئة شيطان أخرس وبدل ما نسبّ العتمة خلّينا نضوي عود كبير، والله معكن. المصدر : صوت المحبّة

  الإفتخار الله معكن... بيخبّروا عن شاب كان كتير متكبّر ومغرور شايف حالو على كلّ يلّي حواليه، بيوم من الإيّام بيلتقي برجّال متقدّم بالسّن، علامات الحكمة ظاهرة على وجّو، بيدخل معو بحوار عن التّواضع والتّكبر، وبإبتسامة بيقول الختيار للشّاب بدّي إنصحك نصيحة : من العيب إنّو تفتخر بشي ما عملتو إنت، مثلاً من العيب إنّك تفتخر بجمالك، تذكّر هيدا عطية من الرّب مش إنت يلّي وجدتو، وما تفتخر بحسبك ولا بنسبك لأنّو مش إنت يلّي اخترتو إذا بدّك تفتخر لازم تفاخر بأخلاقك لأنّو الأخلاق إنت بتصنعها ما حدا بيعطيك ياها. الزّوّادة اليوم بتدعيني وبتدعيك : لحتّى نردّد مع القدّيس أغوسطينوس كلّ ما لدي هو منك، كلّ ما أملك هو منك، شغلة وحدة من صنعي وصنعك هي خطيّتنا، خلّينا نقدمها للرّب يلّي خلقنا، والله معكن. المصدر : صوت المحبّة

  باب السماء بتقول القدّيسة إليزابيث آن ساتون :  "باب السماء قليل الإرتفاع، فقط المتواضع يستطيع الدخول فيه." يا رب أعطينا تواضُع قلبَك القدّوس حتّى نمشي صوب السّما بخطوات ثابتة و إيمان و رَجا و حب كبير... آمين آمين آمين!  يوم مبارك للكلّ المصدر : صفحة Jesus My Lord

  ما إلها علاقة بالحقيقة! بيخبرو عن لعبة بتقول إنّو بيوقَفوا اللّاعبين صف ورا بعضُن و كل واحد في عا ضَهرو ورقة و أوّل واحد بتكون ورقتو عالحيط قدّامو.  آخر لاعب بدّو يرسُم عا ضهر اللّي قدّامو شي و اللّي قدّامو بدو يحسّ بحركة القلم و يرسم نفس الشّي للّي قدّامو و بيكمِّل نقل الرّسمة من لاعِب للاعِب لتوصَل للّي واقِف أوّل شي.  إذا منِجي منشوف الفَرْق بالرّسمات بين اللّي بلّش و اللّي خلصِت عندو اللّعبة ما بيشبهو بعض أبدًا!  و شو بتشبَه هاللّعبة نقل الحكي بين الناس كل ما تمرُق الخبريّة عند حدا بيزيد أو بينقِّص أو بيغيِّر فيها شي و بالآخِر بتوصَل ما إلها علاقة بالحقيقة!  "شَفَتَا الصِّدِّيقِ تُدْرِكَانِ مَا هُوَ حَقٌّ، فَتَنْطِقَانِ بِهِ، وَفَمُ الشِّرِّيرِ لَا يَتَكَلَّمُ إِلّا بِالْبَاطِلِ." (أَمْثَالٌ ١٠:‏٣٢) الله معكن! المصدر : صفحة Jesus My Lord

  الحب الحقيقي الله معكن... بيخبّروا عن بيّ دعى بيوم من الإيّام ولادو وصّاهن وقلّهن :  يا ولادي حتّى تكونوا ناجحين بالحياة لازم تعملوا كلّ الأعمال بِحُبّ، إذا حكيتوا لازم تحكوا بِحُبّ، وإذا صمتّوا لازم صمتكن يكون ناتج عن الحُبّ، إذا سامحتوا سامحوا بِحُبّ، وإذا عاتبتوا عاتبوا بِحُبّ، وإذا قرّرتوا تصلّحوا كمان صلّحوا بِحُبّ، خلّي الحُبّ يكون غامر حياتكن ما تنسحبوا وإعملوا شو ما بدّكن والأهمّ ما تنسوا إنّو الله محبّة. الزّوّادة بتقلّي وبتقلّك :  المسيحيّة ديانة المحبّة بإمتياز، ما تنسى إنّو الله محبّة، ومقياس المحبّة إنّو نحِبّ بلا قياس، وقمّة المحبّة إنّو نبذل ذواتنا عن يلّي بحبّونا، والله معكن.   المصدر : صوت المحبّة

  البيّ الله معكن... بيخبّروا عن شاب اختلف مع   بيّو، ترك البيت العائلي وسافر على بلد بعيد وكان عندو حقد وقساوة على بيّو.  بعد سنين، كبر، تزوّج وصار بيّ، بيوم من الإيّام قرّر يرجع لعند   بيّو، لمّا سألتو مرتو عن السّبب قلّها لمّا صرت بيّ عرفت مين هوّي البيّ الحقيقي وأدّيش أنا مغلّط بحق بيّي، تعلّمت إنّو البيّ هوّي الرّجال يلّي عطاني كلّ يلّي بيملكو، تعب لحتّى أكلت وشربت ولبست ونمت ملوى عيوني، بوقت يلّي هوّي كان يضلّ سهران، والحلو بالبيّ إنّو ما بيطلب من ولادو إلّا ٣ إشيا :  إنّو ما ينسوه أبدًا، يحترموه قدّام الله وقدّام النّاس، والأهم إنّو يكونوا على طول أفضل منّو بالحياة. الزّوّادة بتقلّي وبتقلّك : ما لازم ننسى إنّو كلّ واحد منّا بيجي على هالأرض من إم وبيّ، لازم نحترمهن ونكرّمهن وكلّ مين بيحترم إمّو  وبيّو عمرو على الأرض بيطول، والله معكن. المصدر : صوت المحبّة

  الطّمع بيقتُل صاحبو بيخبرو عن فارة فاتِت عا قبو و لقيِت أحلى شي بحياتِها : مرطبان كبير مليان حبوب من كل الأنواع.  قالِت خَي ما بقا لازِم إتعَب و روح فتِّش عا أكل هون في كتير.  و قعدِت بهالمرطبان تاكُل... بعد كذا يوم هيّي تاكُل و الحبوب تنقَص و هيّي تنزل لتحت لوقت ما فضي المرطبان و لقيِت حالها علقانة بقلبو و ما فيها تطلَع!  الزوّادة اليوم بتقلّنا إنّو الطّمع بيقتُل صاحبو و إنّو الإشيا اللّي مننغَش بشكلها الحلو بالأوَّل بلا ما نفكِّر بِتأثيرها عالمدى الطّويل بتوصِّل للهلاك... الله معكن المصدر : صفحة Jesus My Lord

  حياة التّسليم! مار بطرس الرسول لمَّا مِشي مع يسوع عالمَيّ و خاف و بلَّش يوقَع قلّو الربّ :  "يا قليل الإيمان، لماذا شككت؟" (متّى ١٤: ٣١). بتعرفو شو أحلى شي بالدّني؟  حياة التّسليم!  لما تسلِّم الله حياتك و تحطّها بين إيديه وتِنساها هونيك! وتكون أكيد بقلبَك و بعقلَك إنّو هوّي رح يدبِّر كل شي لمّا يصير الوقت... إنت عليك شغلتين تسلِّم و تعرِف تنطُر بصَبر! ما تحطّوا حدود بينكُن و بين الله، سلّموه كل شي و تذكّروا لوين وصِل إبراهيم بتِسليمو لمشيئة الربّ اللّي بيقِلّنا عنّو العهد القديم :  "كذلك أخذ إبنه الوحيد ليقدّمه ذبيحة محرقة، مسلِّماً الأمر لقدرة الله التي تستطيع أن تقيم من الأموات." (عب ١١) و بتعرفو كمالِة القصة... الله معكن! المصدر : صفحة Jesus My Lord

  الأعزّ إلى قلبك الله معكن... بيخبّروا عن أحد الحكماء، لمّا سألو تلميذو مين هوّي أعزّ النّاس على قلبك جاوب بكلّ بساطة :  الأعزّ على قلبي هوّي الإنسان يلّي أخلاقو كريمة، والجلوس معو على طول في منّو ربح وغنيمة، ونواياه متل السّماء بفصل الرّبيع صافية وسليمة، والإبتعاد عنّو بيكون خسارة كتير أليمة.   هالشّخص متل المسك كلّ ما كبر وتقدّم بالسّن بيصير حكيم وطول الإيّام والسّنين بنظر النّاس وبنظر الله بيزيدو قيمة. الزّوّادة بتقلّي وبتقلّك : الله بيحطّ على دروبنا أشخاص هنّي كنوز أعزّاء لازم نقدّرهم ونكرّمهم ونجتهد لحتّى ما نخسرهم لأنّو بخسارتهن منكون عم نخسر شقفة من ذواتنا، والله معكن. المصدر : صوت المحبّة

  سرّ الحياة الله معكن... لمّا سألوا شيشرون عن سرّ الحياة، جاوب :  هالسرّ بختصروا بـ ١١ الأوّل هو الفقير يلّي بيشتغل، والتّاني هوّي الغني يلّي بيستغلّ الفقير، والتّالت هوّي الجندي يلّي بيدافع عن الفقير والغني، والرّابع هوّي المواطن يلّي بيدفع للجندي وللفقير وللغني، والخامس هوّي الكسول يلّي بيتّكل على المواطن والجندي والفقير والغني، والسادس هو السكّير يلّي بيشرب بالنّيابة عن الكسول، والمواطن، والجندي، والفقير، والغني، والسابع هوّي مدير البنك يلّي بيسرق السّكير، والكسول، والمواطن، والجندي، والفقير والغني، والتّامن هوّي المحامي، يلّي بيغش مدير البنك، والسّكير، والكسول والمواطن والجندي والفقير والغني، ورقم تسعة هوّي الطّبيب يلّي بيقتل المحامي، ومدير البنك والكسول، والمواطن، والجندي، والفقير، والغني، والعاشر هوّي حفار القبور يلّي بيقبر الطّبيب، المحامي، ومدير البنك والكسول، والمواطن، والجندي، والفقير، والغني والحادي عشر هوّي السّياسي يلّي بيعيش من حفار القبور، والطبيب، والمحامي، ومدير البنك والكسول، والمواطن، والجندي، والفقير، والغني. الزّوّادة بتقلّي وبتقلّك : بالحياة في عندي وعندك الخيار

  متل قلب الطفل ♥️ أثبَتِت الدّراسات إنّو الطّفل بعمر ٦ سنين بيضحَك حوالي الـ ٣٠٠ مرة باليوم أمّا الأشخاص البالغين بيضحَكو بين ١٥ لـ ١٠٠ مرّة بأحسن الحالات! الطّفل بيفرَح بالإشيا البسيطة و ضحكاتو بتعكُس قلبو الحلو، أمّا بس نِكبَر بتتعقَّد الإشيا و بتصير الأسباب اللٌي معقول تكون سبب ضحكة بحياتنا أقلّ...  الزوادة اليوم بتذكّرنا بالتّرنيمة اللّي بتقول: إن لم تعودوا كالأطفال لن تدخلوا ملكوت السماء! قد ما كبِرنا ما لازِم نخسَر قلب الطفل اللّي زَرَعو الرّب فينا! الله معكن! المصدر : صفحة Jesus My Lord

  من مَيلتو أحمر ! مرّة في دكتور بالجامعة حامل كتاب لَونو أخضر و صار يقول للطلّاب إنّو هالكتاب أحمر.  كذا طالب ما سكتوا و قالولو دكتور هالكتاب أخضر و كلنا شايفين هيك إنت غلطان.  رجع قلّن :  أنا أكيد إنّو هالكتاب أحمر.  رجعوا إعترضوا كمان.  بعد وقت من المناقشة، برم الدكتور الكتاب و طلعت تاني ميلة من الغلاف أحمر!!  صار في سكوت بالصفّ مش عارفين الطلّاب شو يقولوا بس تعلّموا الدرس منيح إنّو ما لازم يقولوا لحدا إنّو غلطان قبل ما عالقليلة يشوفوا الموضوع من مَيلتو و وجهة نظرو! يا رب عطينا نميّز بين الصح و الغلط، إزرع فينا تقبّل الآخر و حبّ الآخر لَو ما كان بيشبهنا و رأيو متلنا... آميـــــــن. المصدر : صفحة Jesus My Lord

  العيلة الملكيِّة بيخبرو عن لاعب كرة سلّة مشهور عندو مؤتمر صحفي.  سألتو المراسلة إذا إلتقى بالعَيلة الملكيّة.  جاوبها :  يسوع و مريم و مار يوسف؟  فكّرتو عم يمزح.  قالتلو : لأ الأمير و مرتو و ولادو نازلين معك بنفس الفندق.  قلها: أنا ما بعرف إلّا عيلة ملكيّة وحدة هيّي يسوع و مريم و مار يوسف!  ممالك و ألقاب هالأرض باطلة.  وحدو يسوع المسيح ملك المجد!  يا رب أعطينا ما ننجرّ ورا أمجاد أرضيّة فانية... آميـــــــن. المصدر : صفحة Jesus My Lord

  الشّرف الله معكن... بيخبّروا عن شاب حوكم بقضيّة شرف وانسجن مؤبّد. بعد مضي ١٠ سنين من تنفيذ العقوبة مات الرّئيس وتمّ إنتخاب رئيس جديد، أصدر عفو شامل، وأكيد هالشّاب متل كلّ المساجين شملو العفو، لمّا طلع من الحبس ورجع لعند عيلتو سألو بيّو :  يا إبني شو تعلّمت بهالعشر سنين يلّي مضّيتهن بالحبس؟  جاوب : تعلّمت إنّو الشّرف مش بالأجساد متل ما بيقولوا كلّ أهل الشّرق، الشّرف بالكلام، بالصّدق بالمواعيد، بعدم الغشّ بالعمل، بالحب يلّي ما بيطلب مقابل، تعلّمت ما كون شريف بأمر وغير شريف بآخر، بكلّ بساطة تعلّمت كون شريف بالقول وبالفعل وبالعمل. الزّوّادة بتقلّي وبتقلّك : الشّرف نعمة من الربّ وخطوة على طريق البرارة، خلّينا نمشي بخطوات ثابتة على طريق الربّ نعيش الصّدق بمواعيدنا، والأمانة بأعمالنا، والمصداقيّة بأفكارنا والمحبّة من كلّ قلوبنا، والله معكن. المصدر : صوت المحبّة

من منكم بلا خطيئة؟ بيخبر شبّ إنّو هوّي و زغير كان رفيقو بالصف معو لعبة و هوّي كتير حبها قام أخدها و خبّاها بجيبتو.  بس رفيقو ضيّع اللعبة راح قال للمعلمة. طلبت المعلمة من التلاميذ يوقفوا بشكل دائرة و يغمضوا عيونن و قالتلن إنها رح تفتّش جيوبن.  و لمّا لقيت اللعبة ما وقّفت كمّلت تفتيش لآخر تلميذ و بالآخر طلبت منّن يفتحوا عيونن و قالت إنّو لقينا اللعبة و رجّعتها لصاحبها بدون ما تجرح مشاعر الصبي اللي أخدها.  و هالصبي صار اليوم شبّ و هالدرس بعدو مأثّر فيه إنّو ما لازم نحمل عيوب الناس و ننشرها بالعكس إذا ما عنّا كلمة حلوة بلا ما نقول شي أحسن!  الحكم عالناس بشع كتير، تذكّروا لمّا قال يسوع :  "من منكم بلا خطيئة فليرجمها بحجر!" الله معكن المصدر : صفحة Jesus My Lord

  أغلى سائل بالعالم ! مرّة انسأل إستاذ كيمياء شو هوّي أغلى سائل بالعالم...  الكل توقّعوا يسمّيلن شي مادّة كيميائيّة نادرة بس تفاجأوا لمّا جاوب: الدموع!  لمّا سألوا ليش؟ قال: لأنها مكوّنة من ١٪ مَي و ٩٩٪ مشاعر! إذا بكيت مش يعني إنت ضعيف بالعكس، يعني كنت قوي لوقت كتير طويل! العدرا بكيت قدّام الصليب!  العدرا ضعيفة؟ أكيد لأ...نحنا اللي قلنا للعدرا : مريم كفِّي البكاء المسيح قام حقِّا قام.  اليوم مدعوّين نفكّر إنّو بعد كل موت في قيامة و بعد كل دمعة في ضحكة مع يسوع!  انشالله كلّ إيّامكن فرح و سعادة... آميـــــــن! المصدر : صفحة Jesus My Lord

  كتار النوايا يا مار شربل اليوم   كتار النوايا يا مار شربل اليوم. قديش بدك تلحق… كل الناس عم تطلب وإنت بفرح عم بتوصل ليسوع. نيّال السما فيك ونيّال الأرض فيك بأعاجيبك كتروا المؤمنين. إنت بي حنون ما فيك تسمع أنين موجوع إلّا ما تمدلّو إيدك وتتشفّع عند يسوع. شكراً من القلب لأن بكل ٢٢ من الشهر وبكل عيد  من أعيادك بتكون موجود بين الناس عم تسمع همومن وجروحاتن وتبلسم بحنانك وعطفك كل يلي بيطلب شفاعتك. ما تتركنا تشفع فينا عند حبيبك يسوع أحمي لبنانك وجيشو وعيالنا وكل العالم ونور عقول شبيبتنا وكون معن دايماً تشفع لكل مريض موجوع. نوّر عقول حكامنا تيحكموا بعدل متل ما وصاهن يسوع. آمــــــــــــين. المصدر : موقع يسوعُنا

  ٢٠ شجرة بيخبرو عن زلمي زرع شجرة و إهتمّ فيها من وقت اللي كانت بذرة تا كبرت و صارت تزهّر و تعطي فواكة و كان فرحان فيها كتير.  بليلة بتجي عاصفة قويّة كتير و بتكسر الشجرة من جذعها... بكي الزلمي بس شاف تعب عمرو راح بثانية و رجع عا بيتو زعلان...  بعد فترة رجع زار أرضو و تفاجأ إنّو في ٢٠ شجرة زغيرة من نوع شجرتو طالعين هونيك!  و عرف إنّو لمّا إنكسرت شجرتو طار منها بذور و طلعوا بعد الشتي!  الفكرة إنّو لمّا ربنا ياخد منّك شي بيكون تا يعطيك إشيا!  و لا بَي ما بدّو مصلحة ولادو و الأحسن إلن... كيف إذا كان بَينا السماوي! الله معكن! المصدر : صفحة Jesus My Lord

  شرّبتو مَي! بيخبرو عن زلمي غني قرّر يعَمِّر مزار و ما بدّو حدا يدفع معو و بدّو ينكتب إسمو عليه حتّى يعرفوا الناس إنّو هوّي عمَّرو. هيك صار... بعد فترة بيحلم هالزلمي إنّو تمحّى إسمو و إنكتب إسم حدا تاني.  عصّب و ركض يشوف لاقى إنّو إسمو بعدو قال الحمدالله كان حلم.  كلّ ليلة صار يشوف نفس الحلم و نفس الإسم و يركض يتأكّد يلاقي إسمو بعدو... قرّر يفتّش عن صاحب الإسم اللي عم يشوفو بالحلم.  لمّا لاقاه طلع رجّال فقير كتير قام سألو إذا هوّي ساعد بعمار المزار.  جاوب الفقير أنا ما فيّي ساعد و إنت أصلاً طلبت ما حدا يتدخّل.  قلّو طيّب شو عملت!؟  جاوب: كنت مارق حد الورشة و شفت واحد من العمّال تعبان كتير شرّبتو مَي! خجل من حالو الغني و عرف إنّو الله ما بترضيه بالمال، بترضيه بأعمال الخير و الحب... والله معكن! المصدر : صفحة Jesus My Lord

  الثّروة الحقيقيّة الله معكن... بيخبّروا عن رجل أعمال مشهور بالولايات المتّحدة الأمريكيّة، كان همّو الوحيد تجميع المال والشّغل ليل نهار لحتّى ثروتو تكبر وودايعو بالبنوكي تكون عم بتزيد.  بيوم من الإيّام هوّي ورايح على الشّغل تعرّض لحادث سير، وخلال نقلو للمستشفى صار حديث بينو وبين أحد المسعفين، وشو كانت صدمة الرجّال كبيرة لمّا سأل المسعف شو الأجر يلّي بيقبضو بآخر الشهر؟  جاوبو: أنا متطوّع، ولمّا سألو عن الثروة وأهميّتها بالحياة جاوبو بشكر الله عندي عيلة بتحبني وأصدقاء طيّبين، عندي سقف بيحميني من المطر بفصل الشّتي ومن حرّ الشّمس بفصل الصّيف، لمّا برجع على البيت بلاقي طبخة طيّبة محضرتها مرتي باكلها مع عيلتي، ساعتها بيتنهّد رجل الأعمال وبيقلّو سمحلي إلّك إنت من أغنى رجال الولاية، بهنّيك على قناعتك. الزّوّادة بتقلّي وبتقلّك : الغنى ما بينقاس بالمال وبحساباتنا بالبنك، الغنى الحقيقي بينقاس بالقناعة وبالإتّكال على رحمة الله، خلّيني اليوم إتذكّر أنا وإنت القول يلّي بيقول : المال إذا بتدعس عليه بيرفعك، وإذا بتحملو على كتافك بتنحني وبتنكسر، والله معك. المصدر : صوت المحبّة

  الصليب سِلّم بيوَصّل عالسما ! بيقول القدّيس مار إفرام السريانيّ :  "بالصّليب غلب قسطنطين الملك البار أعداءه وإرتفع شأنه لمّا أظهر الربّ له علامة الصليب مضيئة في السماء قائلاً له : "بهذه العلامة تغلب أعداءك".  فغلب، وصار الصليب قوّة الملوك وعزاءهم ونصرتهم.  يضعونه فوق تيجانهم لكي يباركهم ويؤيّدهم وينصرهم." إحملوا صلبانكن بفرح، الصليب سِلّم بيوَصّل عالسما... المصدر : صفحة Jesus My Lord

  سفينة حياتنا بإيدَك كلّ النّاس بتقول : ما تستسلِم، ما تفِلّ، واجِه، تحمَّل... بس مش مزبوط!  أوقات لازِم تفِل!  في مطارح ما لازم تضلّ فيها...  أوقات ما لازِم تواجِه و تحطّ طاقتَك بمحل غلط... يا رب نوِّرنا و عطينا نعرِف وين نضلّ و من وين نفِلّ، أيمتى نحارِب و أيمتى نفهَم إنّو ما لازِم... سفينة حياتنا بإيدَك...  وصِّلنا عا بَرّ الأمان... مِنّك يا رب منطلُب! المصدر : صفحة Jesus My Lord

الثّرثرة الله معكن... بيخبّروا عن شاب كان يعاني من الثّرثرة ومع الأسف كان عايش بمحيط كلّو ثرثارين، بيوم من الإيّام قرّر يبتعد عن المحيط الموجود فيه وينتقل للسّكن بمحيط تاني، كان يتأمّل إنّو يكون أفضل، بس مع الأسف متل ما بيقولوا بلبنان :  «عم ينقل من الدلفي لتحت المزراب»" بيلتجي للطّبيعة، هوّي وعم يمشي بيسمع صوت ناي بيتبع الصّوت بيوصل لقدّام راعي كبير بالعمر بيقعد حدّو يستمتع بسماع الموسيقى، وبيحسّ بسلام كبير، لمّا خلّص الرّاعي من العزف سألو : إنت مين وليش عم تمشي بهالغابة؟  خبّرو عن مشكلتو قلّو :  إلك عندي نصيحة، قدّام أحاديث النّاس المؤلمة لازم تسمع، تبتسم، وتتجاهل، صدّقني بهالطّريقة بتكون صاحب قلب نقي، ونقاء القلب مش عيب وتجاهل الأمور مش هروب، والتّسامح مش ضعف هودي دروس بتتعلّمهن بمدرسة الحياة.  الزّوّادة بتقلّي وبتقلّك : النّميمة مرض مزمن، معدي وقتّال، لازم نستأصلو من حياتنا لأنّو السّعادة مرّات كتيرة بيكون مصدرها الأمور يلّي منخسرها مش يلّي منتمسّك فيها، والله معكن. المصدر : صوت المحبّة

المزح الله معكن... حابب أنا وإنتو اليوم نتأمّل بمجتمعنا اللّبناني شو صار في أمور مضحكة مبكية، على سبيل المثال لا الحصر لمّا إنسان بيجرّب يجرح خيّو الإنسان بيوصّلو الرّسالة بلطشة، إذا فهم عليه واعترض بيقلّو دغري شو باك يا زلمي عم نمزح، وإذا ما انتبه بيكون وصلّوا الرّسالة على طبق من فضّة، كرمال هيك حابب اليوم إتأمّل أنا وإنت بقصّة هاك الشّاب يلّي سأل بيّو شو يعني كلمة عم إمزح معك، جاوب البيّ:  المزح إنّو يكون طبعك مرح، صريح بكلامك، جريء بمواقفك بس إنتبه لازم تحافظ على الخيط الرفيع يلّي بيفصل بين الصّراحة والوقاحة، وما تنسى تميّز بين المزح مع النّاس والسّخرية من النّاس.  الزّوّادة بتقلّي وبتقلّك : باللّغة العربية في أحرف جرّ من إلى عن على، إنتبه بس بدّك تضحك ما تضحك لا على النّاس ولا من النّاس إضحك للنّاس، والله معك. المصدر : صوت المحبّة

  الوقت ما بيرجع! بهالفترة من السنة بتطلع نتايج إمتحانات المدارس و التلاميذ و الأهل بيكونوا عا أعصابن.  ناس بتفرح بعد تعب و شغل السنة كلها و ناس يمكن بتندم إنّو ما إشتغلت قبل هالنهار...  ما بعرف ليش هالفكرة ذكّرتني بمجيء الربّ التاني...  ناس بوقتها رح تفرح معو بعد تعب عالأرض و ناس رح تندم إنّو مِشيت بالطريق الغلط بوقت الندم ما بقا يفيد و الوقت ما بيرجع!...  يا رب عطينا نسهر ننطرك و نكون حاضرين نستقبلك متل ما لازم لمّا تجي... الله معكن. المصدر : صفحة Jesus My Lord

  أسس النّجاح الله معكن... بيخبّروا عن طلّاب جامعيّين كان عندهن حلم يختصر بكلمة هو النّجاح، بيوم من الإيّام وبعد بحث مضني وحثيث بيسألوا عميد الجامعة يلّي كانوا يعتبروه مثال لإلهن، كيف ممكن ينجح الإنسان بالحياة وشو الأسس يلّي بتحدّد النّجاح؟  جاوب :  الإنسان النّاجح هوّي يلّي بيعطي الأمل لليائسين، وبيعطي الحبّ للمكروهين، وبيتمنّى كلّ الخير للنّاس الحقودين، وبيتقاسم خيرات السّماء والأرض مع كلّ الجائعين. الزّوّادة بتذكّرني وبتذكّرك : بحياة الجماعة المسيحيّة الأولى كيف كانوا أعضاءها يتقاسموا خيرات الأرض والسّماء، يعيشوا المحبّة يلّي ما بتعرف حدود.  كانوا علامة وشهود للنّاس، والمؤمنين كانوا كلّ يوم يزدادوا عن يوم، ويلّي كان يميّزن عيشهن للمحبّة وكانوا كلّهن ناجحين، خلّينا اليوم نسعى لعيش النّجاح الحقيقي، والله معكن. المصدر : صوت المحبّة

  ما تنغشّوا بالمظاهر بيقول القدّيس أغسطينوس :  "هناك حرب قائمة بين روح الربّ وروح الشيطان روح النور وروح الظلمة لذلك كل ما يفعله الروح القدس يحاول الشيطان أن يصنع ما يشبهه لتضليل أولاد الله عن الحق!" في كتير إشيا حولنا بتغشّ، شكلها حلو، بس مضمونها شرّ... كلنا منعرف إنّو الشرّير ما بيجي بصورة بشعة عاطول متنكّر بأحلى الإشيا حتّى يشدّ الناس صَوبو!  ما تنغشّوا بالمظاهر، تطلّعوا عالقلوب و اطلبوا روح الحكمة من الروح القدس حتّى يرافقكن و يدِلكن عا درب الخير بهالدني! الله معكن! المصدر : صفحة Jesus My Lord

  شجر التفّاح بيخبرو عن ضيعة الناس فيها بيضلّوا يشكوا إنّو ما عم يعيش شجر التفاح.  كل ما شافوا حدا بيخبروا نفس الخبريّة.  بالآخر عملّن إجتماع مختار الضيعة و خبّرن نكتة.  أوّل مرّة ضحكوا كتير.  عادها مرّة تانية ضحكوا أقل و مرة تالتة ما ضحكوا أبداً!  قلّن متل ما هالنكتة ما بقا ضحّكتكن بس انعادت نفس الشي قصّة شجر التفاح!  بدل ما نضل نحكي عن الموضوع خلّينا نجرّب نعمل شي تا نغيروا بدل ما ناطرين حدا يجي يعملنا شي!  تعوا نعمل دراسات ليش هالزراعة ما عم تنجح، نشوف نوع التراب، الطقس، المَي... أكيد النتيجة بتكون أحسن من إنّو نحكي و نعيد و ما نعمل شي!  الزوّادة بتقلنا اليوم : إنّو يسوع كان يحبّ الحكي القليل و الفعل الكتير!. الله معكن! المصدر : صفحة Jesus My Lord

  الحظّ الحلو الله معكن... بيخبّروا عن رجّال بيحب الصّيد كتير، بيوم من الإيّام هوّي وعم يتصيّد أرانب بالغابة، وقع بجورة عميقة، لحسن حظّو ما صرلو شي، وأكتر من هيك بيلاقي بالجورة سلّم خشب بس كان الرّجال كتير تعبان، فكّر وقال خليني إرتاح شوي مدام السلّم حدّي موجود، بس مع الأسف بلّش يحسّ بالبرد، قال هالسّلم كتير طويل ما بيأثّر إذا بولّع منّو درجتين بتدفى عليهن وبرجع بطلع بس إرتاح، وصاروا درجتين يجرّوا درجتين وما عاد قادر إنّو يطلع لأنّو تدفّى على كلّ درجات السّلم. الزّوّادة بتقلّي وبتقلّك : بالحياة الرّب بيعطيني وبيعطيك فرص كتيرة للخلاص، ما لازم ولا مرّة نحرق فرص الخلاص يلّي الرّب بيعطينا ياها كرمال راحة موقّتة، والله معكن. المصدر : صوت المحبّة

  قيمة الإنسان الله معكن... بيخبّروا عن شاب كان من عيلة ذات حسب ونسب، حبّ صبيّة وقرّر يخبّر أهلو عن حبيبتو قبل ما تزورهن أوّل زيارة، ومتل العادي بلّشوا الأهل يسألوا عنها وعن أهلها وعن شغلها وعن حسبها ونسبها، وكان الإبن يجاوب على كل الأسئلة، بس الشّاب كان مستغرب سكوت جدّو يلّي كان حاضر هالجلسة، وساكت عم يسمع أسئلة الأهل.  لمّا خلّصوا الأهل من أسئلتهن بيقول الجدّ لحفيدو، خبّرني هالبنت مأدّبة، معلَّمة، وعندها أخلاق رفيعة؟  صمت الشّاب وما عرف شو بدّو يجاوب على السّؤال، قلّو جدّو يا إبني مش الحسب والنسب وكترة الدّهب هنّي يلّي بيقيّموا الشّخص هودي كلّهن بيزولوا يلّي بيضل هوّي الأخلاق والصّيت الحسن.  الزّوّادة بتذكّرني وبتذكّرك : بالمتل اللّبناني : يلّي بياخد القرد على مالو بيروح المال وبيبقى القرد قبالو، خلّينا نتخلّق بالأخلاق الحسنة والجمال الدّاخلي هودي أتمن من كنوز الدّني هودي يلّي ما بيزولوا، والله معكن. المصدر : صوت المحبّة

  المحب والحسود الله معكن... حابب اليوم أنا وإنت نتأمّل بهالحكمة الصّينية يلّي بتقول :  كتار هنّي يلّي بيتابعوا حياتك وبيمشوا على خطواتك ليتعلموا منّك الحكمة، وكتار هنّي يلّي بيتابعوا خطواتك ليسجّلوا سقطاتك وعثراتك بالعتمة، التّنَيْن معجبين فيك :  الأوّل معجب محب، والتّاني معجب حسود. الزّوّادة بتقلّي وبتقلّك : حاول على طول تتعلّم من حياة الآخرين، تحبّهن وتتقرّب منّهن ولا مرّة تنظر لإلهن بحسد وتغار منّهن، والله معك. المصدر : صوت المحبّة