الزوادة اليومية

  دِرعكُن بحروب الأرض بيقول القدّيس يوحنّا فم الذهب:  "يمكنك إقامة مذبح لله في أذهانك عن طريق الصلاة." كل ما كان الله حاضِر بفكرَك و صلاتَك كل ما رح تحسّ إنّك قريب منو أكتر، متل كأنّو بيتَك بيصير كنيسة و حياتَك قدّاس متواصِل... ضوّوا شموعكُن، ولعوا بخوركُن، صلّوا و حبّوا بعضكن!  حضورَك يا رب نبع نِعَم بحياتنا، أعطينا نعرِف نتطلّع حولنا و نشوف عطاياك الكتيرة إلنا و نتعلّم نشكرَك عا كل شي...  الصّلا الصّادقة قد ما كانت زغيرة بتفوت عا قلب الرب و بتستجاب.  قد ما شكيت همّك للنّاس، أوقات بس عبارة "يا رب" طالعة من القلب بتكفي يخرق صوتك السّما و ربنا اللي بيعرف شو في جوّاتك بيشيل الخوف و بيزرَع فيك السلام!  ما تخافوا من شي، الصّلا هيي دِرعكُن بحروب هالأرض... والله معكن. المصدر : صفحة Jesus My Lord

  مفتاح السعادة يقول غاندي :  "السّعادة هي عندما يكون ما تعتقدُه وما تقولُه وما تفعلُه في تناغم." قصده يقول إنّه لما تكون بتفكّر بشي وبتحكي شي تاني وبتتصرّف عا أساس شي تالت رح تتعب!  سرّ السّعادة بالحياة هوّ ببساطتها ونكون أشخاص صادقين أقوالنا بتعكُس تفكيرنا وتصرّفاتنا بتترجِم التنين متل ما هي.  مفتاح السعادة هو القُرب من الله لأنه معه كل الأفكار بتصير واضحة والروح القدس بيلهمنا بالكلمات وتصرّفاتنا بتصير مبنيّة على فكرة انه نخاف نزعّله مش نخاف منه.  الله يرافقكم ومواهب الروح القدس تملّي حياتكم والفرح يغمُر بيوتكم.  المصدر : Jesus My Lord

بيتو أحلى بكتير...! بيخبرو عن بنت زغيرة معلّقة كتير بستها.  بيوم من الإيام مرضت الختيارة و توفّت...  لما سألت الزغيرة عن ستها قالتلها إمها إنّو التيتا راحِت عند يسوع.  قالت البنت: أيمتى راجعة؟  جاوبِتها الأم: ما فيها ترجَع لأنّو يسوع بيتو بالسّما.  مرة الأم عم تعلّم الزغيرة تصلّي قبل ما تنام.  بتقلها البنت: ما بحبّو ليسوع، بخاف منو ما عم يخلّي التيتا تجي لعندي!  جاوبِت الأم: يسوع ما بيخوّف، بيروحو لعندو الناس الحلوين متل التيتا لأنو بيتو أحلى بكتير من هون و هوّي بيهتم فيهن و بيحبّن كتير...  قالِت البنت: يعني تيتا مبسوطة كتير هلق؟  قالِت الأم: اكيد!  جاوبِت البنت: بحبّك يا يسوع!  هيك نحنا البشر بس نتطمّن عاللّي منحبّن منرتاح... كتار منا انحطّوا بموقَف متل هالأم و ما عرفوا شو بدّن يقولو...  ما تقبلوا الموت يشوّه صورة يسوع بعيون الزغار هوّي اللّي مات عالصليب تا يغلُب الموت كرمالنا كلنا! الله معكن... المصدر : صفحة Jesus My Lord

  جنود الربّ! بيقول القدّيس مرقس :  "من أراد الإنتصار على التّجارب بدون صلاة وصبر إزداد ضيقه بسببها." التّجارب موجودة حولنا كل يوم، منها بيمرُق بسرعة و ما بتأثّر علينا و منها بتاخُد وقت و جهد تا نطلَع منها...  كرمال هيك عم يقلّنا القدّيس مرقس إنّو التّجارب موجودة و ما رح تفلّ إنت اللّي لازم تعرِف تتصرّف معها و تصلّي!   تذكروا إنّو ربنا بيعطي أصعب معاركو لأقوى جنودو... الله معكن. المصدر : صفحة Jesus My Lord

  خلّوا جوّاتكن مزهّر بوجود يسوع! بيخبرو عن جنينة ورد حلوة كتير، في شب هوّي مستِلمها بيهتمّ فيها.  هاجَر هالشّب و بقيِت الجنينة ما حدا عم يزبّط شي فيها و لا يسقيها و يحطّلها مقوّيات، يبسوا و دبلوا كل الوردات فيها...  هيك النّفس البشريّة إذا إنتركِت و ما إهتمّينا فيها  بالإعتراف و المناولة و الصلا رح تدبَل!  خلّوا جوّاتكن مزهّر بوجود يسوع! الله معكن... المصدر : صفحة Jesus My Lord

  من يصبر للنهاية يخلُص منقرا بإنجيل القدّيس متّى لما يسوع قال لتلاميذو :  "حِينَئِذٍ يُسْلِمُونَكُم إِلى الضِّيق، ويَقْتُلُونَكُم، ويُبْغِضُكُم جَمِيعُ الأُمَمِ مِنْ أَجْلِ ٱسْمِي. وحِينَئِذٍ يَرْتَدُّ الكَثِيْرُونَ عَنِ الإِيْمَان، ويُسْلِمُ بَعْضُهُم بَعْضًا، ويُبْغِضُ بَعْضُهُم بَعْضًا." يا رب عطينا نعمة الصّبر و قوة الإيمان لو شو ما صار معنا و عطينا نحبّ كل الناس و نشوفك فيهن و ما نتصرّف معهن عا أساس هنّي كيف بيعاملونا.  نحنا منوثَق فيك يا يسوع، إنت اللّي قلت من يصبر للنهاية يخلُص، ساعدنا نحقّق هالشّي و ما نوقَع بفخّ اليأس و الشّر و الإستسلام...  بداية أسبوع مباركة للكل🌹 المصدر : صفحة Jesus My Lord

  مريم.. الطريق الأقصر اللّي بيوصِّل ليسوع كتار من القدّيسين كرّموا مريم العدرا و واحد منن هوي بادري بيو اللّي حكي كتير عن مريم و ولا مرة نسي يسوع.  وحدة من أقوالو :  «عندما تمرُّ أمام أيقونةِ العذراء مريم يَجِب أنْ تُردِّد: "السلامُ عليكِ يا مريم، بَلِّغي مِن قِبَلي سلامي ليسوع."» خلّونا عا طول نتذكّر إنّو مريم هيّي الطريق الأقصر اللّي بيوصِّل ليسوع.  و تذكّروا إنّو ما بيرفض طلب لإمو ابداً!... شفاعة إمنا مريم و بادري بيو معكن و بصلواتُن بيكون يسوع دايمًا حاضِر بحياتكن! ❤ المصدر : صفحة Jesus My Lord

  نحنا بأشدّ الحاجة إلك في كتير كنايس عا اسمها بلبنان.  منلاقي كلمة "مار" قبل إسمها و مش كلمة "قدّيسة" لأنها معادِلة للرّسل! شجاعِتها و حبّها ليسوع خلّوها تكون أوّل الشّهيدات بالكنيسة و اليوم عيدها. عم نِحكي عن مار تقلا اللّي هيّي شفيعة كتار من اللبنانيّين و اليوم نحنا بأشدّ الحاجة نتأمّل بسِيَر القديسين و نتمثّل بإيمانُن حتى نرجَع لروحيّة المسيح اللّي وحدها بتوصِّلنا للخلاص.  شفاعتها معكن! المصدر : صفحة Jesus My Lord

  منصبك ما بيحدّد ذكاءك بيخبرو عن ملك عم يقول إنّو أذكى ناس بالمملكة هنّي الوزراء اللي عندو.  كل الحاضرين وافقوا لأنّو بيعتبروا إنّو الملك بيفهم بكل شي و ما بيغلط إلّا شبّ واحد تجرّأ و قال إنّو مش الوزراء أذكى ناس و في يكون أي حدا من عامّة الشعب أذكى منّن و إنّو قادر يبرهن هالشي.  قال هالشب لواحد من الوزراء : الملك قرّر يكبّلك سيارتك بالنهر.  صرخ الوزير و قال : أنا سيارتي كتير غالية بدكن تدفعولي حقها.  و قال هالشب لواحد من الشباب بالمملكة: الملك قرّر يكبّلك سيارتك بالنهر.  قال الشب: غريب... مش كل شي بهالمملكة للملك؟  جاوبوه مبلا أكيد.  قلّن: يعني سيارتي هيّي سيارة الملك! معقول يكبّ سيارتو بالنهر!؟  الزوّادة بتقلّي وبتقلّك : منصبك ما بيحدّد ذكاءك و لا قدراتك... الذكاء و الحكمة من مواهب الروح القدس، أطلبوها منّو و اتّكلوا عليه تا يكون عاطول رفيقكن بكل المواقف! المصدر : صفحة Jesus My Lord

الخوف بيخبرو عن ولد زغير خيفان من الرعد و الشتي.  قالتلو ستّو: يا تيتا ما في شي بيخوّف القصّة كلها إنّو في غيمة بالسما صرخت بدَيْنِة رفيقتها قامت نقزت و صارت تبكي!  إقتنع الصبي بالخبريّة و صار بس يشوف رفقاتو خايفين يخبرن ياها و هيك بطّلو الولاد يخافو من الرعد و الشتي و من ولد لولد إنتقلت هالقصّة الرمزيّة الزغيرة و شالت الخوف من قلوبن. الزوّادة اليوم بتذكّرنا بطفولتنا...  كلنا مين منّا ما خاف من الرعد و مين منّا ما ركض تخبّى بأهلو و خاف ينام وحدو!  بس هالتيتا اللّي بسّطت الموضوع قدرت تغلب الخوف.  و نحنا إذا كانو قلوبنا بسطاء و أنقياء و ما منعقّد الإشيا و منكبّرها و منعطيا أكبر من حجمها شوفو كيف بيروح الخوف و بتنحلّ مشاكلنا.  بيقول يسوع:  "طُوبَى لِلأَنْقِيَاءِ الْقَلْبِ، لأَنَّهُمْ يُعَايِنُونَ اللهَ..." الله معكن. #خدّام_الربّ

ما تخلّي مطرح للغضب! مع كل ضغوطات الحياة، مع كل أنواع الناس اللي منتلاقى فيهن كل يوم، مع كل الظروف اللي ما عم تخلّينا نتنفّس، أوقات منعصّب... فكرة إنّو يفوت الغضب عا قلوبنا هَينة بس إنّو يطلع أصعب بكتير لأنّو متل ما قال أحد القدّيسين إنّو الغضب بالقلب متل السوس بالخشب، بيصير يفوت أكتر و أكتر و كل ما طوّل بيصير أصعب نتخلّص منّو... منحسّ قلبنا تقيل. إخوتي... طبيعي إنّو نعمل ردّة فعل عا إشيا منشوفها غلط، تذكّرو حتّى يسوع عصّب بس شاف التجّار بالهيكل!  بس المهم ما تقبلوا هالغضب يسكن بقلبكن و الحل لهالشي هوّي إنّو يكون قلبكن مليان من الرب ساعتها ما رح يلاقي الغضب مطرح لإلو يبقى فيه... الله معكن. المصدر : صفحة Jesus My Lord

  قلم بإيد الله معروف عن القدّيسة تريزا دي كالكوتا تواضُعها و محبّتها للفقير و كانِت تعمِل كل شي لخدمة ربنا اللّي قال كل ما عمِلتُم لأحد إخوتي الصغار فلي عملتموه و كانِت تحبّ كتير تشبِّه حالها بقلم بإيد الله... يا رب عطينا متلها نسلّمك كل طاقاتنا و كل قدراتنا حتى إنت تتصرّف فيها لخير خينا الإنسان.  اعطينا نسلّمك مفاتيح حياتنا و ما نتكّل عا حالنا، إنت اللّي ما عندك مستحيل، إنت اللّي منقضّي سنين نجرّب نعمل شي، بكلمة منّك بيصير. ساعدنا يا رب نكسُر هالأنا الإنسانية اللّي كتير أوقات عم توقَف حاجز  بيننا و بينَك.  عطينا نشوفَك بكل شخص منلتقي فيه و نعاملو عهالأساس مين ما كان يكون بشفاعة الأم تريزا منّك يا رب منطلب... المصدر : صفحة Jesus My Lord

  أورشليم إجِت لعِنّا! بيقول الطوباوي كارلو أكوتيس إنّو يسوع المسيح موجود بسرّ القربان نفس الشّي متل ما كان موجود من أكتر من ٢٠٠٠ سنة بين تلاميذو و بيقول إنّو الفرق بين هيداك الوقت و هلّق إنّو من قبل كانو الناس لازم يتنقّلو من منطقة لمنطقة تا يلتِقو بيسوع بس نحنا بيكفّي نلاقي أي كنيسة قريبة تا نلتقي فيه، أورشليم هيّي إجِت لعِنّا! كيف فيك تعرِف إنّو هلقد يسوع قريب و تِبقى بالبيت ما تروح تزورو و تلتقي فيه بالقربانة و تتركو ناطِر! بداية أسبوع مباركة للكل مع يسوع❤ المصدر : صفحة Jesus My Lord

  عَبّوا شنطتكن! بيقول أحد القدّيسين إنّو بالأوتيل في ناس بيلاقو مطرح ينامو و ناس تانيين بيدبرو حالن تا كان مرق الليل و الصبح بيقومو الكل بيحملوا شنطهن و بيفلو من الأوتيل.  نفس الشي الحياة، الكل رح يتركها بيوم من الإيّام إن كان عايش حياة فقيرة و عاديّة و إن كان غني و مشهور!  ما بياخدو معن إلّا أعمالهن إن كانت خير أو شر!  بعد عندكن وقت قبل ما تفلّو عَبّوا شنطتكن خير و أعمال بترضي الربّ... الله معكن. المصدر : صفحة Jesus My Lord

  أكبر قوس قزح طلبت الحكومة المكسيكيّة من مجموعة شباب متخصّصين بفنّ الكتابة على الحيطان إنّو يطرشوا حيطان إحدى ضيع المكسيك، مؤلفة  من ٢٠٩ بيت، ويقوموا بهالعمل مع أهلها.  والنتيجة هي مدينة مغطاية بالكامل من كعب الشارع لراس السطح، يعني مغطاية على مساحة ٢٣٣١٩ متر مربّع، بلوحة "قوس قزح".  والهدف من المشروع هو محاولة إعادة تأهيل البلدة وتحفيز شبابها للتجدد.  ومن وقتها، إنخفضت نسبة الجرايم بشكل كبير بالضيعة المشرقة وصاروا أهلها عايشين بسعادة وثقة أكتر. الزوّادة بتقلّي وبتقلّك : الفرح والسلام هني ثمار عمل الروح القدس بالقلب ؛ فالقلب يللي بيسكن فيه الله وبيتربع على عرشه المسيح بيكون قلب ممتلئ بالفرح والسلام الداخلي اللي بيفوق كل عقل! والله معكن... #خدّام_الربّ

  هوي بيتصرّف! بيخبرو عن زلمي و مرتو كان عندن دكّان و شغلُن ماشي منيح. فجأة صارت المشاكل الإقتصاديّة و بلّشت تجارتُن تخسَر و سكّر الدكان. هالعيلة مؤمنة كتير بس لمّا صار معن هيك الزلمي صار يقول ليش نحنا؟  ليش صار هيك؟  كيف بدنا نعيش؟  و مرتو تقلّو هيدي مشيئة الله و ربنا ما بيترك حدا بس ما كان شي ينفع تا يخفّف عنّو.  بيوم من الإيام بتلبُس المرا تياب سود متل وقت الحداد.  سألها جوزها مين مات؟  جاوبتو: الله!  قلها: مش حلو هالحكي!  قالتلو: إنت عم تتصرّف كأنو ما في الله و كأنّك وحدَك و فقدت إيمانك فيه!  قلها: أكيد بآمن بس خايف من بكرا...  قالتلو: ما فيك تآمن بيسوع بس ما بتوثق فيه!!  سلّمو مبارح و اليوم و بكرا و هوي بيتصرّف!  ما تخافوا قد ما كان الظرف صعب، حافظوا عا إيمانكن و ثقتكن بملك السّما، يسوع حاضِر عاطول... والله معكن. المصدر : صفحة Jesus My Lord

  الصليب حلو ! يا يسوع المسيح، كتير كان حلو لمّا كنت معلّق عالصليب! معقول في حدا بالدني شاف عذاب و وجع يسوع بيقول عن الصليب حلو!؟ الصليب حلو لأنّو كان الطريقة الوحيدة اللي سمحت يلتقي اللصّ مع الربّ و يحجز إلو مطرح بالسما... الصليب كان حلو لأنّو هونيك مريم صارت إمنا كلنا لمّا قال يسوع ليوحنّا: هذه أمّك. الصليب كان حلو لأنّو كتير ناس إرتدّت للإيمان من خلالو متل لمّا قال قائد المئة: حَقًّا كَانَ هذَا الإِنْسَانُ ابْنَ اللهِ! الصليب حلو لأنّو غَيَّر المفاهيم و كسر شوكة النهاية و الموت و فتح الطريق قدّام البدايات الحلوة و الحياة... صليب يسوع المسيح يكون معلق فوق قلوبكن حتّى تضلّ تنبض ايمان و رجا و فرح... آميـــــــن. المصدر : صفحة Jesus My Lord

  إحملوا صلبانكن بفرح ١٤ أيلول ... عيد إرتفاع الصليب المقدّس. بيخبرو بهالمناسبة عن بنت زغيرة كل عيد صليب بتنطر بَيها يجمّعلها قبّولة و يولّعها و تقعد تتفرّج عالنار و كانو أهلها يضوّو السطح بالشموع... كبرت هالبنت و بَيها ما بقا يقدر يجمع قبّولة و لا يطلع عالسطح يضوّيه بس هيّي ما قبلت و لا سنة توقّف هالتقليد مش لأنّو هيك تعوّدت بس لأنها عرفت لشو بترمز النار بهالعيد! لمّا لقيو صليب الرب صارو يولعو أعالي الجبال حتّى يخبرو بعضن و صارت النار تنقل من جبل لجبل تا وصل الخبر للقسطنطينيّة إنّو لقيو الصليب! ولعوا قبّولة و ضوّو سطوحكن و شرفاتكن تا تخبرو كل الناس إنّو نحنا لقينا الصليب و ما رح نقبل يضيع مِنّا لأنّو هالخشبة اللي بيوم من الإيّام كانت أداة للموت ربنا يسوع المسيح حوّلها لدرع إلنا و لجسر عبور للحياة! إحملوا صلبانكن بفرح... القيامة جايي❤ المصدر : صفحة Jesus My Lord

القلوب المكسورة 💔 بيقول البابا شنودة التالت إنّو عادة بالنسبة للناس الإشيا اللي بتنكسر بيبطّل إلها قيمة و بتنكب بس بالنسبة للربّ القلوب المنكسرة غالية كتير! كمان مرّة ربنا عم يذكّرنا إنّو حسابات السما ما بتشبه منطق الأرض و كمان مرّة عم يقلنا يسوع قدّيش بيحبنا و بيهتم بتفاصيل حياتنا و وحدّو بيعرف يداوي قلوبنا المكسورة الحزينة... يا رب، انت بتعرف كل شي و كلنا ثقة إنّك رح تعوّضلنا كل التقل بقلوبنا و تْحَولو لفرح أبدي ما حدا بيقدر يكسرو أو ياخدو مِنّا! "فَأَنْتُمْ كَذلِكَ، عِنْدَكُمُ الآنَ حُزْنٌ. وَلكِنِّي سَأَرَاكُمْ أَيْضًا فَتَفْرَحُ قُلُوبُكُمْ، وَلاَ يَنْزِعُ أَحَدٌ فَرَحَكُمْ مِنْكُمْ." (يو ١٦: ٢٢)... الله بيحِبكُن❤ المصدر : صفحة Jesus My Lord

  الملكة 👑 بيخبرو إنّو الملكة إليزابيث معفيّة من دفع الضرايب عالدّخل و رأس المال بس هيي ما بتِقبل و صَرلها بتدفعُن من ١٩٩٣! هالملكة لازم تكون قدوة لكل شخص بموقع سلطة شو ما كان نوعها. هالملكة ساوِت حالها بالناس. هالزوّادة بترجِّعنا لفكرة التواضع اللّي عم نفتقدو كتير بمجتمعاتنا. ناس فارغة بلا مضمون عم تعمِل المستحيل حتى تبيِّن و تفرجِي حالها و ناس بتشتِغل و بتتعب عالسّكت! ما تكون متل السّنبلة الفاضية راسَها لفوق، كون متل السّنبلة المليانة... بُكرا بس توقَف قدّام الرّب ما رح يسألك قدّيش حسابك بالبنك أو شو كان معك سيارة أو شو ماركة تيابك... رح يسألك شو الفرق اللّي عمِلتو بحياة غيرَك، رح يسألك ليش كنت قادِر تساعِد و ما ساعدت، رح يسألك ليش تكبّرت عا خيّك الإنسان مع إنّو مِتلك مِتلو، رح يسألك إشيا رح تستِحي تجاوِب عليا... إرجعو عالطّريق الصّح قبل ما يفوت الأوان! والله معكن... المصدر : صفحة Jesus My Lord

أعلى بناية بيخبرو عن شخص عم يفتّش كيف بدّو يصير صاحب أعلى بناية بالمدينة عم يستشير رفقاتو بس كل واحد قلّو شي! الأوّل قلّو: شو هالسؤال! بدّك أعلى بناية بتروح بتعمل تصميم و بتعمّرها! التاني قلّو: و لا اهين! بتروح بتبرم كل بنايات المدينة و بس تلاقي أعلى وحدة بيناتن بتشتريها! التالت قلّو: لا تعمّر و لا تفتّش و تتعب أحسن حلّ نقّي أي بناية و هبّط كل الباقيين بتبقى وحدها واقفة و أكيد بتكون الأعلى! أي نصيحة قولكن احسن؟ .... كل واحد بيشوف الدني بعيونو و بقلبو... متل ما بيكون قلبك هالشي بينعكس عا تصرفاتك و نصايحك لغيرك! يا رب عطينا عيون و نفسيّة الصديق الأوّل! أحد مبارك بشفاعة إمنا مريم العدرا. #خدّام_الربّ

  نعمة التواضع بيخبرو عن زلمي ختيار مشهور إنّو بيعرف أمثال و حكم كتير. طلبو منّو الجيران يعطيهن حكمة يستفيدو منها، قلّن : "القليل كثير إذا قنعت ، و الكثير قليل إذا طمعت، البعيد قريب إذا أحببت ، و القريب بعيد إذا أبغضت!" شو حلوين المعاني اللي مخبّايين ورا هالكلمات... هالختيار خبّرنا عن أهميّة القناعة و عن أضرار الطمع و بنفس الوقت بيضوّي عا قوّة المحبّة اللي بتغلب بُعد المسافات و إذا غابت المحبّة كيف بيصيرو الناس اللي حدّك بالجسد بعاد و غرباء بالروح!... يا رب عطينا نعمة التواضع قد ما حقّقنا إشيا بحياتنا ما تخلّينا ننغَرّ بمجد الأرض الباطل و علّمنا نحب متلك بلا حدود و بلا ما ننطر مقابل أبداً... والله معكن. #خدّام_الربّ

  ما تخافوا في خبريّة بيتناقلوها من جيل لجيل بزحلة بتقول إنّو من زمان كانو الأتراك طمعانين بأرض زحلة. حشدو جيش كبير مؤلّف من ٥٠٠٠ جندي مع سلاحن و إجو حتّى يحتلّو زحلة اللي عدد شبابها ٤٠٠، يعني معركة خسرانة أكيد ! هالقصّة مكتوبة بالصحافة الفرنساوية اللي نقلت عن الجنود الأتراك إنّن صارو يبرمو و يفلّو واحد ورا التاني و يقولو إنّو في رماد بعيونن! و بس انسألو كيف معقول جيش هلقد كبير و مجهّز يخسر؟ قالو : لو ما اللي لابسة أبيض و أزرق عم تكب علينا رماد من فوق كنّا أكيد ربحنا بس ما بقا قشعنا! الزوّادة اليوم بتذكّرنا إنّو ولا نهار العدرا تركت لبنان، و لا نهار ما كانت شايفتنا و عتلانة همنا و حاميتنا... كيف اليوم بهالأوضاع الصعبة! كونو عا ثقة إنّو إمنا مريم سهرانة علينا و ما تخافو لأنّو مطرح ما بتكون مريم يسوع بيكون موجود! ما تخافو، ما تخافو، ما تخافو... الله معكن! #خدّام الربّ

  عنّا إم بالسّما بيقول القدّيس توما الأكويني: "لا يوجد على الأرض حزن لا تستطيع مريم العذراء شفاءه." كل ما الطفل يزعل، كل ما حَسّ بخطر، كل ما خاف... بيتخبّى بإمّو! بيكبر و بيكبر هَمّو معو و بيصير في اشيا إمّو يمكن ما تقدر تحلها... بس ما تنسو إنّو شو ما كان نوع مشاكلكن زغيرة إن كانت أو كبيرة عندكن إم بالسما ما عندا شي إلاّ تتشفّعلكن و تصلّيلكن و تساعدكن و تعتَل همكن... هيّي عندها الحلّ لكل شي لأنّو يسوع ما بيرفضلها طلب.... أنتِ الشفيع الأكرم عند إبنكِ يا مريم! كل عام وإنتو بألف خير و الله معكن... #خدّام_الربّ

  الحب ما في إلو عمر ! بيخبرو عن اتنين مجوّزين من ٤٦ سنة، كل سنة الزوج كان يجيب لزوجتـو بعيد ميلادها باقة ورد وبطاقة مكتوب عليها المعايدة: «حبي لإلك بيكبر كل يوم أكتر من يوم». وبعد فترة زمنيّة، الزوج بيمرض وبيموت، وشو صعب على الزوجة إنّو تعيّد أوّل عيد بلا زوجها. الصبح بيرِنّ جرس الباب، ولـمّا فتحت، لقيت عامل توصيل الورد متل العادة جايبلا باقة ورد، تفاجأت كتير وراحت على محل الورد وقالت للبيّاع: «أنا أكيدة إنكُن مغلّطين بالعنوان، إنتو بعتّولي وردات حدا تاني». بيرد بيّاع الورد وبيقِلّها: «زوجك قبل وفاتو دفع تمن باقات ورد لسنين كتيرة، وطلب منّا كل سنة نبعتلِك باقة بهالنهار مع هالبطاقة»... لـمّا فتحت البطاقة كان مكتوب فيها : «حبّي لإلك هوّي أبدي وأقوى من الموت وما بينتهي أبدًا». الزوّادة بتقلّي وبتقلّك: «الحب ما في إلو عمر وما بيتحدّد لا بزمان ولا بمكان، هوّي بذرة بتنزرع وبتفرّخ وبتعطي ثمار، والأجمل إنّو بيدوم للأبد». #خدّام_الربّ

  كونوا قنوعين! في حكمة بتقول : "القليل كثير إذا قنعت، والكثير قليل إذا طمعت، والبعيد قريب إن أحببت، والقريب بعيد إن بغضت." كم عيلة مكتفيّة بالقليل اللي عندها ياه و بتشكر الله ألف مرّة بالنهار و ما بيحسّو أفرادها إنّو ناقصن شي أبداً ؟ و كم شخص الطمع سكّرلو عيونو عن نعمة الله و قد ما عندو بيضلّ بدّو بعد!؟ كم شخص منحبّو من كل قلبنا لو في بيناتنا بحور و بلاد و قارّات، قد ما كنّا بعاد بالمسافة كل ما صار معنا شي منركض نحكيه و هوّي أوّل حدا بيخطر عا بالنا كل ما فكّرنا بشي حلو... الحب بيختصر المسافات شوفو مثلاً حب الله إلنا من السما للأرض! و أوقات بيكون جارك الباب بالباب بس بتحسّو بعيد عنّك مش كرمال شي بس لأنّو المحبّة ما لِقيت طريقها بيناتكن بعد! هالحكمة بتقلنا اليوم حِبّو كتير و كونو قنوعين! نهاركن مبارك مع يسوع 🌹 #خدّام_الربّ

  بوصلة صوب السما ! شي مرّة كنت رايح عا شي منطقة و ضيّعت بالطريق؟ أكيد كلنا صايرة معنا و بهالحالة و منحكي حدا منعرفو يدلنا أو منوقف نسأل عالطريق حدا مارق. طيّب نحنا منعرف إنّو هالحياة طريق منمشيها تا نوصل عالسما ؟ طيّب إذا ضيّعنا بهالطريق شو منعمل؟ في كتير إشيا نقدر نعملها : أوّل شي لازم نعرف إنّو نحنا ضايعين، تاني شي لازم نعرف إنّو الصلا هيّي البوصلة الوحيدة اللي بتدلّ عالإتّجاه صوب يسوع! صلّوا صلّوا صلّوا و الله معكن.... #خدّام_الربّ

  إيد الربّ ! لما الناس يكونو عم يفتّشو عا جروحَك و يكبسو عليها تا يوجّعوك عن قصد ما تخاف و ما تزعل عندَك بالسما بيّ بيكفي يحطّ إيدو عالوجع بيصحّ! "فوضع يديه على كل واحد منهم وشفاهم" (لو ٤: ٤٠)... الله معكن و إيد الربّ تبارك حياتكن و تشفي كل جروحكن! المصدر : صفحة Jesus My Lord

  المَي للركبة ! بيخبرو عن نمر سأل زرافة واقفة بالنهر إذا بتعرف قدّيش غميقة المَي. قالتلو: المَي بتوصل للركبة. قال: كتير منيح خلّيني إنزل بَورد شوي بهالشوب. هوّي نزل بالمَي و كان غرق غمرتو المَي لفوق راسو. ما عرف كيف طلع و قلها للزرافة: إنتي كذبتي عليّي بدّك تقتليني! و الزرافة تقلّو: ما تطلّع و شوف أنا المَي واصلة عند ركابي! أوقات بيكون نفس الموضوع في حولو كذا وجهة نظر و كل واحد بيشوف و مقتنع إنّو هوّي معو حقّ! الزوّادة اليوم بتقلّك : لمّا بدّك تعطي نصيحة لحدا حطّ حالك مطرحو أوّل شي!  تذكّرو إنّو الرب يسوع تا يوجّه الإنسان و يدلّو عالطريق تجسّد متلو! و الله معكن... المصدر : صفحة Jesus My Lord

  خلّيك بجوّ الربّ بيخبرو عن وردة حلوة كتير قطفوها وحطّوها بمزهرّية بالبيت مين ما شافها تلفتلو نظرو بس بعد كم يوم دبلت وماتت وانكبّت بالزبالة! بنفس الوقت كان في عشبة زغيرة كانت مزروعة حدّ الوردة ما حدا عاطيها أهميّة ولا منتبهلها بالجنينة، الوردة راحت وهيّي عاشت كتير! الزوّادة بتقلّي وبتقلّكن : إنّك ما تكون محطّ الأنظار، إنّو ما تكون مشهور، إنّو يكون شكلك عادي، إنّك تكون متل الكل مش يعني إنّك ناقص وإذا الناس ما إنتبهولك تذكّر عا طول إنّو بالسما في ربّ سهران عليك وبيحبّك كتير! المظاهر ما بتدوم وخصوصاً إذا الواحد طلع من بيئتو متل ما الوردة إنشالت من الأرض!... خلّيكن بجوّ الربّ والصلا والكنيسة لأنّو بس نطلع منّو منبعد عن الحياة! والله معكن... #خدّام_الربّ

  كيف عم تعاملو؟ ما حدا بهالدّني بيعرِف شو عم تفكّر بلا ما تحكي، بيفهَم شو بدّك بلا ما تطلب، بيحبّك قد ما زعّلتو، بيسامحك لو غلطت بحقو، ما بيتركك و بيمشي بس تكون مش قادر تفيدو، بيحِس فيك قد ما خبّيت زعلك و تعبك و همومك، ما بيحكم عليك كيف ما تصرّفت و منّك مجبور تبرّرلو شي، أحلى و أطيب قلب معقول تتعرف عليه... هوّي يسوع المسيح اللي قد ما حبّك يا إنسان مات عالصليب حتى إنت تعيش و ما بقا تخاف من الموت! إنت بالمقابل كيف عم تعاملو؟ المصدر : صفحة Jesus My Lord