الزوادة اليومية

  صفحة سنة جديدة بأوَّل يوم من سنة ٢٠٢٤، منشكرك يا ربّ عالسنة اللي مرقت بكل اللي فيها.  و منصلّيلك المزمور ١٢:٩٠ "عَلِّمْنَا إِحْصَاءَ أَيَّامِنَا، لَعَلَّنَا نَتَعَقَّلُ بِقَلْبٍ حَكِيمٍ!" عطينا يا ربّ نفهم إنّو الوقت و السنين و الإيّام اللي عم نقضّيها عالأرض منها إلّا فترة زغيرة حتّى نلتقي فيك و علِّمنا نعيش مع خَينا الإنسان عهالأساس! اليوم فتحنا صفحة سنة جديدة، منوعدك يا ربّ نكرِّسها لخدمتك و للحبّ و الإيمان.  كلّ الناس بتحطّ أهداف للسنة الجديدة... نحنا هدفنا الوحيد إنّو نكون معك يا رب!  انشالله هالسنة الجديدة بتحمل لكلّ واحد منكن نوايا قلبو! المصدر : صفحة Jesus My Lord

  عاصفة الحبّ بيقولو إنّو قبل ما ربنا يعطيك نعمة معيّنة أو ينقلك من محل لمحل بيسمح إنّك تمرق بعاصفة معيّنة.  بس لسبب وحيد إنّو الشتي بيِروي النبات و بيكَبرو!  و هيك نحنا بعد كل عاصفة منكبر، مننضج و منصير قادرين أكتر نستوعب عطايا ربنا إلنا و نقدّرها... الله يملي بيوتكن نِعَم و رجا و إيمان و حبّ! المصدر : صفحة Jesus My Lord

  الحظ و الصدفة! في كلمتين مش موجودين بقاموس المسيحيّين :  الحظ و الصدفة! ما في شي بيصير بالصدفة و لا شي خصّو بالحظ!  كل شي هوّي مشيئة الله!  بس تصير تشوف الأمور بهالطريقة بتوضح كتير إشيا ! نحنا منآمن بحكمة ربنا و بس!  اتّكلوا عليه و الله معكن. المصدر : صفحة Jesus My Lord

  الكلام والأعمال الله معك... بدّي مِنكُن اليوم تلات دقايق لحتى نفكّر إنّو العالم حوالينا ورشة عمل.  ما لازم نخاف، نشَمّر على زنودنا، نغطس بالعتمة ونكون نحنا النور. لازم نتذكّر إنّو الربّ إجا على الأرض كرمال المرضى، مش كرمال الأصِحّاء، أكَل وشِرب مع الخاطيين، لَمَس ضعفُن، غفرلُن خطاياهُن، بَدَل ما يغرقوا بأوحالها، كان يعطُف علَيُن ويدفّيُن بنعمتو ومحبتو. الزوّادة بتقلّي وبتقلّك : ما تنطُر مين بيبلِّش لحتى تتبَعو، لازِم تكون إِنتَ المـُبادِر الأَوَّل.  القدّيس بولس بيدعيني وبيدعيك لحتى نرشد الكسالى إلى الطريق الصحيح، ونشجّع الخايفين، نساعد الضعفاء ونصبر على كلّ الناس، والله معك. المصدر : صوت المحبّة

  الوعد الله معك... بيخبّروا عن إنسان كان على طول يوعد بس كتير قليلة الأوقات يلّي كان فيا يوفي بوعودو، تزوّج والربّ رزقو عيلة وكانوا ولادو عم يكبروا قدّام عيونو وكان الإبن الكبير كتير ذكي، وبسرعة إكتشف المشكلة يلّي عند بيّو،  فكّر بالحلّ وكان على طول يتذكّر قول الشّاعر: داوني بالَّتي كانت هي الدّاء.  بإحدى اللّيالي وعد بيّو وعود ما بتتحقّق حتّى بالأحلام، مرقت الإيّام بسرعة وإجا البيّ عم بيطالب إبنو بتحقيق الوعود يلّي وعدو ياها، الإبن بكلّ زكاء بيقول:  يا بيّي لازم نكون صادقين بوعودنا، إذا ما كنَّا قادرين ننفّذ ما لازم نوعد، كتار هنّي النّاس يلّي بيبنوا حياتهن وبيحلموا إنطلاقًا من كلمة أو من وعد، حرام نحبطن ونخلّي أحلامن تتحطّم على صخور الوعود الكاذبة. الزّوّادة بتدعيني وبتدعيك : لحتّى نقلّل من الوعود ونكتّر من تنفيذ المطالب، أو إذا بدّك بتدعينا لحتّى نقلّل من الكلام ونكتّر من الأفعال، والله معك. المصدر : صوت المحبّة

  happy birthday to you أغاني عيد الميلاد كتيرة و الولاد حافظينها و بيردّدوها بكل اللغات.  بيخبرو عن صبي زغير قالولو ببرنامج ترفيهي للولاد : غنّيلنا غنيّة لعيد الميلاد.  قام صار يغنّي happy birthday to you.  فكّروه ما فهم اللي انطلب منّو بوقت هوّي فاهم كتير منيح و كمّل happy birthday to you Jesus! هالزغير عارف معنى العيد و عارف مين صاحب العيد... يا ربّ عطينا نهنّي إمّك بولادتك و علّمنا نفهم إنّو إنت وحدك العيد!  الله يرافقكن و يملّي بيوتكن أعياد! المصدر : صفحة Jesus My Lord

صوت الوقت الله معك... بإحدى الجلسات مع صديقي صاحب كتاب «هكذا علّمتني الحياة» بيقلّي :  يا صديقي بعالمنا صار في كتير ضجيج وأصوات مرتفعة، بتجرّب تضارب على بعضا، علّمتني الحياة ولا مرّة إسمع لصوت الوقت، لأنّو على طول بيدعيني لإترك الكلّ وإلحقو، ولا مرّة إسمع لصوت المال يلّي بيدعني لإخسر كلّ شي من أجل إنّي إربحو، ولا مرّة إسمع صوت المستقبل لأنّو على طول بيدعيني لحتّى صارع كلّ شي وإربحو، لازم إسمع صوت الرّب يلّي بيقلّي إتبعني وأنا بعطيك كلّ شي وبهديك على الدّرب يلّي بيوصلك للملكوت. الزّوّادة بتقلّي وبتقلّك : بين كلّ الأصوات ما لازم نسمع إلّا صوت الرّب عم بيقول ملكوت الله بداخلكن، هوّي الوحيد يلّي لازم تطلبوا إنّو يتحقّق وصدّقوني كلّ الأمور التّاني بتنعطى لإلنا وبتنزاد والرّب على طول بيكون معنا. المصدر : صوت المحبّة

وُلِدَ المسيح هلّليويا !! اليوم بعيد الميلاد المجيد السما مفتوحة و عم تستقبل ملايين الصلوات اللي بتوصّل دغري لقلب الرب!  اليوم في بيوت فرحانة و بيوت حزينة... في عِيَل لأوّل مرّة عم تحتفل بالعيد و فضيت كرسي حول طاولتن...  منصلّيلك يا ربّ تكون هالكرسي الفاضية عالأرض زادت عا طاولتك السماويِّة!  منصلّيلك عا نيِّة كلّ طفل مش قادر يعيّد، عا نيّة كل شخص بردان أو جوعان أو خيفان!  منصلّيلك عا نيِّة كلّ عيلة زادت طفل حتّى متلك يكبر بالقامة و النعمة و عيلتو تشبه عيلة الناصرة!  منصلّي يا ربّ عا نيِّة كلّ ختيار ظروف الحياة خلِّتو يكون وحيد، منصلّيلك كمان عا نيِّة كل شبّ و صبيِّة ناطرن تغيير كبير بحياتن و عتلانين همّ المرحلة اللي جايي، منصلّيلك عا نيّة كل مريض وَجَعو ما خلّاه يعيش العيد... و بهالنهار المبارك منشكرك من كلّ قلبنا عا كلّ نعمة عطيتنا اياها و منقلّك اليوم و بكرا و إلى الأبد :  إنت دبِّر، نحنا منوثق فيك يا طفل زغير بقلب كبير!  آمين آمين آمين! وُلِدَ المسيح هللويا!! المصدر : صفحة Jesus My Lord

  شو رح تقدّم هديّة ليسوع ؟ هيدا موسم الأعياد و موسم الهدايا... فكّرت شو رح تجيب هدايا لَلّي بتحبّن؟ طيب شو رح تقدّم هديّة ليسوع صاحب العيد؟ فكّرت فيا؟... شو رأيك تقدّملو خطاياك؟ قلبك؟  ثقتك؟  ما هوّي كرمال هيك إجا عالأرض!  الله معكن. المصدر : صفحة Jesus My Lord

متابعة السّير الله معك... بيوم من الإيّام إلتقى أحد الصّحافيّين بِـ ونستن تشرشرل رئيس وزراء بريطانيا الشّهير وسألو شو تحديدو للنّجاح، جاوب بكلّ بساطة:  إنّك تمرّ بفشل ورا فشل ورا فشل وما تستسلم، إنّما على طول يضلّ عندك رغبة بمتابعة السّير لتوصل للهدف هيك بتكون إنسان ناجح.  الزّوّادة بتقلّي وبتقلّك : مش عيب إنّو نوقع أو نفشل، عيب إنّو ننحبط ونتسمّر بمكاننا، والله معك. المصدر : صوت المحبّة

  نصيحة من وحي العيد ! الزوّادة اليوم عندها نصيحة إلك من وحي العيد : آمِن متل مريم أوثق متل يوسف خلّي عندك أمل متل الرعاة خلّي يكون عندك هدف متل المجوس مَجِّد الله متل الملايكة حِب متل يسوع! هيدا معنى العيد! المصدر : صفحة Jesus My Lord

  دور مار يوسف بحياتنا من أقوال البابا فرنسيس عن القدّيس يوسف :  «كشف ملاك الربّ ليوسف عن الأخطار الَّتي هدّدت يسوع ومريم ، وأجبرتهما على الفرار إلى مصر ثمّ الإستقرار في الناصرة.. وكذلك في زمننا هذا ، يدعونا الله إلى التعرّف على الأخطار التي تهدّد عائلاتنا وطلب حمايتها من الأذى من القدّيس يوسف».  اليوم الزوّادة دعوة لكل واحد مِنّا يتأمّل بهالمقولة و يتذكّر دور مار يوسف الكبير خصوصاً بهالزمن المبارك. المصدر : صفحة Jesus My Lord

  مين هوّي الصديق الحقيقي؟ كلّ حياتنا منسأل حالنا مين هوّي الصديق الحقيقي؟ الجواب سهل كتير!  الشخص اللي بيقربك من الله هوّي صديق حقيقي و الشخص اللي بيبعدك عَنّو مش صديقك! فكّر بهالمعيار و عيد حساباتك هيك بتعرف تختار الناس من حولك!  يوم مبارك مع الطفل يسوع! المصدر : صفحة Jesus My Lord

  المسخرة الله معك... بيخبّروا عن شاب كان على طول يتباهى بالنّكات يلّي يكبّها شمال ويمين ومع الأسف بأغلب الأحيان هالنّكات كانت تكون جارحة لكتار من النّاس  ، بيوم من الإيّام كان عم يتناول بكلامو  رجال قصير القامة وشو كانت صدمتو كبيرة لمّا اعترضو خيّو الزّغير وقلّو:  لازم تنتبه على موضوع كتير حسّاس كلّ مرّة بتسخر من النّاس النّاصحين هالأمر ما بيخليك تكون كتير ضعيف، وكلّ مرّة بتضحك على حدا مظهرو الخارجي بشع هالأمر ما بيزيدك جمال، وكلّ مرّة بتسخر من إنسان فاشل هالموضوع ما بيزيدك نجاح، بنصحك تترك الخلق للخالق وتشتغل لتجمّل نفسك. الزّوّادة بتقلّي وبتقلّك : لمّا الرّب خلقني وخلقك على صورتو ومثالو خلقنا، ولا مرّة الصّورة والمثال بيكونوا بالشكل الخارجي إنّما بالأخلاق والقيم والمبادي، خلّينا نشكر الله على كلّ مخلوقانو، والله معك. المصدر : صوت المحبّة

  التّوبة الله معك... بيخبّروا عن كاهن قضّى كلّ حياتو مرافق للمساجين وكان على طول يشجّعهن على التّوبة، ويقلّهن الله ما بيشبه البشر الله رحمة ومسامحة، مع الأسف البشر بينسوا كلّ ماضينا الحلو قدّام آخر هفوة أو زلّة بتصدر عنّا، بوقت يلّي الرّب بيمحي كلّ ماضينا السّيّء قدّام توبتنا الصّادقة، خلّينا نبادر نتوب ونرجع لعندو. الزّوّادة بتقلّي وبتقلّك : خلّينا ما ننتظر آخر لحظة بحياتنا لنرجع لعند الربّ، خلّينا نبادر ونرجع لعندو باللّحظة الحاضرة، خلّينا على طول نتذكّر إنّو كلّ لحظة بحياتنا ممكن تكون آخر لحظة، والله معك. المصدر : صوت المحبّة

  ما تنسوا بفضل مين بيخبرو إنّو طيور الفلامينغو لونن زهر بس في منّن بيكونوا زهر غامق و منّن زهر فاتح.  شو الفرق؟ فرجت الدراسات إنّو طير الفلامينغو اللي لونو فاتح هوّي عاطول الأم!  و الأولاد بياخدوا لونن الغامق منها!  كل ما فتح لونها كل ما غمق لون ولادها و صاروا حلوين و صحّتهن منيحة!  هالأم بالحقيقة عم تعطي من ذاتها لولادها! تطلعوا بحالكن... إذا شفتوا إنّو ريشاتكن حلوين ما تنسوا بفضل مين... يا رب، بشفاعة إمنا مريم تحمي كل الأمّهات و تعطيهن الصحّة و إرحم كل إمّ صارت عندك بالسما... آمــــــــــــين! المصدر : صفحة Jesus My Lord

  إنت حاضر ؟ تعوا نتخايل إنّو يسوع قاعد حدنا و عم يقول لكل واحد مِنّا : يا إبني، ما تستسلم.  أنا قوتك.  مع كل شي مرقت و عم تمرق فيه أنا حدّك.  الإشيا اللي كنت عم حضّرلك اياها قربت أعطيك اياها، رح تشوف و تلمس كل شي أنا وعدتك فيه بالكتاب المقدّس... أنا قادر أعمل المستحيل بالنسبة للناس.  أنا بقدر  قدّملك إشيا حتّى ما بتفكّر فيها أو حتّى تطلبها! أنا بحبّك!  أنا جيت كرمالك حتّى خلصك... إنت حاضر؟ المصدر : صفحة Jesus My Lord

  الأفراح والأحزان الله معكن... بيخبّروا عن صديقين من إيّام الطّفولة كانوا عايشين سوا، بالأفراح وبالأحزان على طول سوا، مع الأسف اختلفوا وكتر القال والقيل بيناتهن، وصار كلّ واحد منّن يعاتب ويعتب على التّاني، الهوّة كبرت بيناتهن وصار كلّ واحد ماشي بطريق وما التقوا أبدًا، في واحد منّهن مرض قرّر يبعت رسالة لصديقو، كتبلوا فيا، بفتخر إنّي عشت أنا ويّاك أجمل الإيّام، بعتذر على كلّ لحظة عتاب عشتها أنا وإنت، رح أصمت وإترك للصّمت يعبّر عن صدق مشاعري تجاهك. الزّوّادة بتقلّي وبتقلّك : الصّمت بكتير من المواقف بيعبّر أكتر من الكلام، خلّينا نحكي إذا في عنّا كلمات أبلغ من الصّمت، والله معك. المصدر : صوت المحبّة

  رجا القيامة هالوقت من السنة هوّي وقت حب و فرح.  بس في بيوت و عِيَل فقدت أحد أفرادها و لأوّل مرّة عم يمرق العيد بدونو... هالناس عيدن فيه غصّة و اللي بيعزّيهن بس هوّي رجا القيامة... يا طفل العيد، ما تخلّي حدا زعلان و فرِّح قلوب الكل شو ما كانت ظروفهن... و منقلّك متل ما بتقول الترتيلة:  يلي صاروا عندك ربّي عيدن الليلة بسماك... المصدر : صفحة Jesus My Lord l

  فرحة بتملّي الدني ! كلّ ما خِلق طفل بتفرح عيلتو و القريبين منّن و بيتقبّلوا تهاني إنّو هالعيلة كبرت!  كيف إذا كان الطفل اللي انولد هوّي يسوع!  هالفرحة بتملّي الدني و كل بلاد العالم!  يسوع اللي توحّدت حولو شعوب الأرض عم يدعينا اليوم نرجع لهالوحدة و يرجع هالحب يسكن القلوب و يزيد!  فرح و نور المسيح بقلوبكن! آميـــــــن! المصدر : صفحة Jesus My Lord

القانون الله معك... بيخبّروا عن الأديب الفرنسي مونتيسكيو، سألوه :  برأيك كيف لازم يكون القانون لحتّى نعيش بأمن وعدالة وسلام؟  جاوب بكلّ بساطة :  القانون لازم يكون متل الموت ما بيرحم حدا وبنفس الوقت بيعامل الكلّ بالتساوي. الزّوّادة بتقلّي وبتقلّك : القانون هوّي المقياس يلّي بيحكم بين النّاس وإذا انوجد بتتحوّل الغابة لوطن، ولمّا بيغيب بيصير الوطن غابة بلا قانون، خلّينا نعيش تحت سقف القانون بالتّساوي ما يكون في عنّا صيف وشتي على سطح واحد، والله معك. المصدر : صوت المحبّة

  عاشوا بسعادة للأبد !!! بآخر كل قصّة منقرا : عاشوا بسعادة للأبد !!!  منجي عالواقع ما منشوف هالفرح اللي بيحكوا عنّوا بالقصص!  معقول كل هالكتّاب ما معن حق!  معقول ما حدا منّن قال الحقيقة!؟ تعوا اليوم نقرا بالإنجيل معقول يكون متل كل الكتب التانية؟!  يسوع مش قصّة بكتاب و لا الإنجيل كتاب تاريخ!  كتابنا المقدّس كتاب حياة بيحكي كل واحد مِنّا و أهمّ شغلة إنّو من خلالو ربنا وعدنا بالخلاص و الفرح الأبدي و خلّانا نختبر هالشي معو مش متل قصص الخيال بيخبروا عن إشيا منحلم فيا و ما فينا نوصلها!  كلنا فينا نوصل عالسما! نهاركم مبارك! المصدر : صفحة Jesus My Lord

  عم إمشي على خطواتك الله معك... بيخبّروا عن بيّ كان ماشي مع إبنو الزّغير على التّلج وكان البيّ عم يرسم الأثر على التّلج بخطوات ثابتة لحتّى إبنو يمشي وراه، بيلتفت البيّ لإبنو وبيقلّو يا إبني إنتبه وين عم بتحط إجرك، بيقاطعو الإبن وبيقلّو لا يا بيّي بترجّاك إنتبه إنت وين عم بتحطّ إجرك، لمّا البيّ سأل الإبن عن كلامو قلّو :  أنا عم إمشي وراك عم حطّ إجريّي محل إجريك كلّ ما كانت دعساتك ثابتة بكون أنا عم إمشي بأمان. الزّوّادة بتقلّي وبتقلّك : خلّينا نتبع خطوات يلّي سبقونا لأنّهن كانوا ماشيين على خطوات الرّب، هيك أكيد منوصل لمحل ما وصلوا ومنتمتع بمشاهدة وجّ الرّب، والله معك. المصدر : صوت المحبّة

  قوّة الميلاد ! بوحدة من وعظاتو بيقول البابا فرنسيس:  "لا توجد أزمة بإمكانها أن تطفئ نور الميلاد." قد ما كِبرت الأزمات و كانت كتيرة ميلاد الربّ يسوع بيبقى أقوى منّن كِلُّن!  هالميلاد اللي غلب الطبيعة البشريّة و غلب قوانين الأرض حتّى إنّو غلب هيرودس و قوانينو و جيشو!  العيد مش بس شجرة و مغارة و هدايا و عزايم!  العيد هوّي لمّا نرجع نزرع فينا قوّة الميلاد و روح الله اللي إذا ما انوجدت فينا منكون عايشين بس ما فينا حياة! يا ربّ إنت اللي شايف و عارف كلّ شي، ما تقبل يبقى بيت ما يفوت عليه نور الميلاد قد ما كان مسكّر عا حالو إنت عندك الحلّ... آميـــــــن! المصدر : صفحة Jesus My Lord

  أنا نور العالم "أحوّل الظلمة إلى نور... هذه الأمور سأصنعها لشعبي و لا أخزلهم." (أش١٦،٤٢) و قلتلنا كمان أنا نور العالم من يتبعني لا يمشي في الظلام و إشيا كتير غير حتّى تعطينا القوّة نكمّل و كل ما تعِبنا نتذكّر إنّك هون و إنّك رح تغيّر كل شي و ما رح تردنا خايبين أبداً ! إنت اللي ميلادك غيّر وج الكون و قيامتك غيّرت كلّ المفاهيم الأرضيّة ما عندك شي مستحيل!  ضوّي يا ربّ أكتر جوانب مظلمة من حياتنا حتّى يصير كل شي أوضح و أحلى معك للأبد.... آميـــــــن! المصدر : صفحة Jesus My Lord

  أمنيات الأطفال هالسّنة !!! بيقولوا إنّو من أكتر المواقِف اللّي الإنسان بيفرَح فيها هيّي لمَّا يكون عم يختِبر فرح العطاء. العطاء مش يعني تقدِّم كتير...  العطاء يعني لمّا تقدِّم الإشيا من قلبَك! بهالزَّمن المبارك و كل يوم من حياتَك إذا قادِر تفرِّح أي شخص بشي زغير ما تتأخَّر... أمنيات الأطفال هالسّنة و رسايِلن لبابا نويل بتدمَع العيون...  ولاد عم تطلُب شوكولا، بيتزا، برغر... ولاد عم تطلُب بوط، ولاد عم تطلُب كنزة تِدفى فيها من البرد!! طول عمرُن أحلام الولاد العاب و إشيا حلوة!  مَنُّن عارفين إنّو أمنياتُن اليوم هيّي آبسَط حقوقهن... بميلادَك يا رب، ما تخلّي قلب موجوع! آميـــــــن! المصدر : صفحة Jesus My Lord

  إشتغل ليسوع ! "مهما كان عملكم، فإعملوه من كلّ قلوبكم كأنّه للربّ لا لإرضاء الناس." (قول٢٣،٣) شو ما كنت بتشتغل و لو ما كنت مبسوط باللي عم تعملو و لو كان في كتير إشيا بتخلّيك تروح و مَنّك راضي فكّر إنّو أنا عم بشتغل ليسوع و مش لحدا تاني أبداً !  بتصير تخلّص شغلك بفرح!  مع يسوع كلّ شي حلو و أوثق إنّو اللي بتعملو للربّ من كلّ قلبك ما فيه ما يكون مبارك و إيد الله ظاهرة فيه... يسوع يرافقكن بنهاركن وين ما كنتو! المصدر : صفحة Jesus My Lord

  حمل الصّليب الله معك... بزمن صار الصّليب موضة منحملو على صدورنا، منعلّقو على قزاز سيَّاراتنا، منطبعو على حيطان الحيّ، مندقّو وشم على زنودنا ومنتبارى مين بيكبّر صليبو أكتر، بترجَّاكن ما تفهموني غلط، حابب اليوم أنا وإنتو نتأمّل بعبارة زغيرة بس معناها كتير كبير، بالحياة في فرق بين إنّو نلبس صليب، أو نحمل صليب. الزّوّادة بتقلّي وبتقلّك : الرّب يسوع غيّر معنى الصّليب من بعد ما كان علامة ذلّ وعار وإنكسار حملو وصيَّرو علامة مجد وإنتصار.  خلّينا نحمل صلباننا بفرح ونتذكّر إنّو بالصّليب مننتصر على كلّ التجارب، والله معك. المصدر : صوت المحبّة

  مِنْ ثِمَارِهِمْ تَعْرِفُونَهُمْ بيقول الربّ يسوع :  "مِنْ ثِمَارِهِمْ تَعْرِفُونَهُمْ. هَلْ يَجْتَنُونَ مِنَ الشَّوْكِ عِنَبًا، أَوْ مِنَ الْحَسَكِ تِينًا؟" (مت ٧: ١٦) عم يقلنا إنّو جذور الشجرة مخبّايين تحت الأرض بس منعرف إذا نَوعن منيح أو لأ من نوعيّة الثمر اللي بتعملن الشجرة! و الناس هيك جذورن و أفكارن و نفسيّتهن مخبّايين بقلوبن بس بيبَينوا بتصرُّفاتن! يا ربّ يكونوا ثمارنا عم يعكسوا وجودك بقلبنا و إزرع فينا روحك القدّوس حتّى يصيروا ثمارنا أحلى و أحلى و الناس تشوفك فينا من خلالن! آمــــــــــــين! المصدر : صفحة Jesus My Lord

  مصدر النَّجاح بتقول القدّيسة تريزا دي كالكوتا :  "أنا لا أصلّي للنّجاح، بل لإكتمال إيماني." يا ربّ أعطيني إيمان كبير و ثقة فيك كبيرة و شو ما كانت النّتيجة إنت بتعرِف أكتر منّي!  النّجاح اللّي أنا بشوفو و بفكِّر فيه ٨مش نفس النّجاح اللّي إنتَ مخطِّطلي إلو لحياتي و أنا بوثَق فيك و بس! ما بدي نجاح إلّا اللي إنتَ مصدَرو! المصدر : صفحة Jesus My Lord

  عيشة الملوك الله معك... بيخبّروا عن صبي إجا لعند بيّو وسألو شو لازم إتعلّم لحتّى بس إكبر إشتغل ويصير عندي ثروة كبيرة وعيش متل الملوك؟ جاوبو بَيّو : ما في ولا مهنة بتخلّيك تعيش عيشة ملوك، في تلات إشيا جوهريّة بالحياة لازم تنمّيها عندك أخلاقك، قناعاتك وتواضعك، هودي التلاتة هنّي ثروتك يلّي ما فيك تشتريا بالمال هنّي جهد وعمل يومي وهودي يلّي بيخلّوك تعيش ملك على هالأرض إنت وماشي صوب السما.  الزّوّادة بتقلّي وبتقلّك : الملك هوّي الكريم بأخلاقو، الكبير بتواضعو، والغني بقناعاتو مملكتو ما بتكون بهالأرض إنّما بتبلّش على هالأرض وبتكمّل بالسّما، والله معك. المصدر : صوت المحبّة