الزوادة اليومية

  يا رب ما تترك لبنان !  لبنان إلو فترة حاضر بيوميّات البابا فرنسيس و صلواتو حتّى إنّو خصّص اليوم ١ تموز ٢٠٢١ كيوم للصلاة و التفكير كرمال لبنان! بهاليوم في لقاءات و صلوات بروما و كمان رعايا كتيرة بلبنان متوحدة بالصلا معن...  يا رب إسمع هالصلوات و آستجب لنا كلنا، بنوايانا الكبيرة عا نطاق الوطن و بأزغر نوايا قلوبنا اللي ما حدا غيرك بيعرفها... يا رب ما تترك لبنان اللي قدّم قدّيسين عا مذابح روما...  تشفّعولنا بالسما! المصدر : صفحة Jesus My Lord

  أعطي وقت للتفكير ألله معكن بيخبّرو عن صيّاد كان قاعد تحت شجرة ناطر العصافير لحتى يتصيّدن.  لحظات وبيجي أبو الحِنّ بيوقف عالغصن قبالو، بيعلّي الصيّاد بارودتو حتى يقوّصو، بيصرخ أبو الحِنّ بيقلّو :  "وقّف، روق، خلّينا نتفاهم".  بيقلّو الصيّاد : نتفاهم؟ شو أنا مجنون؟ بدّي قوّصك حتى إتعشّى" بيقلّو أبو الحنّ : " بدّك تتعشّاني إلي؟ معقول عصفور متلي بدّو يعشّي رِجّال متلك، ما بطلعلك لقمة، لو أكلت بصلة بتشبّعك أكتر".  فكّر الصيّاد ولاقى إنّو أبو الحِنّ معو حقّ، ساعتها بيضبّ سلاحو وبيرجع على البيت ليفكّر شو لازم يحضّر عشاء. الزوّادة بتسألني وبتسألك : كمّ مرّة بحياتنا منكون متل هالصيّاد وبيكون عنّا كذا قرار وما منعرف شو بدنا نعمل؟ يا ريت مناخد الوقت اللازم للتفكير لناخد القرار الصحيح، خلّينا نتّكل على إلهامات الروح القدس، نعطيه كمّ دقيقة من وقتنا نصغيلو وهوّي بيعطينا إشارة حتى نمشي على الطريق الصحيح، والله معكن... المصدر : صوت المحبّة

  مار بطرس وبولس   كتار بيتساءلو ليش متل اليوم منحتفل بعيد القدّيسين بطرس و بولس و ليش أصلاً عيدُن بفرد يوم؟! إجمالاً بيكون عيد القدّيس بيوم وفاتو اللي يعتبر يوم ولادتو بالسما بس كمان أوقات في قدّيسين عيدن بيوم محدّد حتّى يلغي مناسبة وثنيّة كانت بهاليوم و الناس تصير تحتفل بأعياد القدّيسين و تنسى الإشيا القديمة البعيدة عن الله و الأمثلة كتيرة. بـ٢٩ حزيران كان في عيد ريموس و رومولوس اللي أسّسوا روما بالحقبة الوثنيّة و مين أحقّ من صخرة الكنيسة (بطرس) و من واحد من أكبر المعلمين بالكنيسة (بولس) يمحي هالتقليد الوثني من فكر الناس و يثبتو محلّو روما قلب المسيحيّة!  ينعاد عا كل شخص حامل إسمن! المصدر : صفحة Jesus My Lord

  ما تنطِّرُن كتير! بيقول القدّيس يوحنّا ذهبي الفم :  "لتحزن عندما تخطئ ، ليس خوفاً من العقاب بل لأنّك عصيت سيّدك ، السيّد الذي يحبّك و يطلب خلاصك." إذا زعّلت أهلك، قدّيش بتزعل؟  كتير!  نفس الشي إذا غلطت بحق ربنا، بَينا السماوي!  فكّر فيا... بس ما تنسو إنّو مع يسوع عاطول فيك ترجع عن الغلط و هوّي ناطر لحظة رجعتك، بتفرح السما و كل سكّانها!... ما تنطِّرُن كتير! المصدر : صفحة Jesus My Lord

الله يراني... اليوم ٢٧ حزيران ذكرى تطويب الأخ إسطفان نعمة. كان أخ إسطفان يحب كتير يشتغل بإيدو و هيك قضى كل حياتو يشتغل ببساتين و جناين الأديار اللي تعيّن فيها. كان أمين و حافَظ عاطول عا أملاك الدير و إنتبه للمنتوجات.  مش بس حَبّ الحقلة اللي فيها كان يكون قريب من السما هونيك كان يصلّي بسلام و ما حدا يلهيه، كمان تمثّل بالقدّيس يوسف اللي سمّوه أهلو عا إسمو و تعلّم النجارة بس كان بدَير ميفوق. ما وقّف هون كمّل يتعلّم و يستثمر قوّة جسمو اللي نَعَم عليه ربنا فيها لبناء الحجر كمان!  هودي كانو وزنات الأخ إسطفان اللي بصلاتو و إيمانو و محبتو زادو أضعاف و أضعاف و ما بينعدّو!  عطينا يا رب بشفاعة أخ إسطفان نعرف نستعمل نِعَمَك لخدمتك و علّمنا نشتغل و ما نخاف من قسوة الشغل حتّى بالآخر الغلّة ترضيك... يا ربّ إنت شايفنا و هالشي بيكفينا... المصدر : صفحة Jesus My Lord

  التربية مرّة سألو نابوليون : "أيمتين منربّي الولد؟"  جاوب نابوليون:  "قبل ما يولد ع القليلي بـ18 سنة". تعجّبو وقالو : "معقول قبل ما يولد كيف؟"  جاوب وقال : "لازم نربّي إمّو". الزوّادة بتقلّي وبتقلّك : الإم يللي بتهزّ السرير بيمينها بتهزّ العالم بشمالها. المصدر : صوت المحبّة

  طلب الرحمة بتقول الخبريّه إنّو من بعد ما ماتو بحرب الإقطاعيي والفلّاحين، بيلتقي بالسما خيّال تابع للملك وفلّاح متفاجىء من وجود عدوّه بالسما، وبيسألو :  "كيف وصلت لهون؟".  جاوب الخيّال : "ما بتصدّق إذا خبّرتك أنا وعم بوقع عن سرج الحصان وقبل ما أوصل ع الأرض طلبت الرحمة والمساعدة من الرب وليك وين صرت".  الزوّاده بتذكّرنا بالمتل الصيني يللي بيقول :   الرحمة الإلهيّة عندها ألف إيد، ونحن بحاجه إلن كلّن...  يا إنسان إرحم إخوتك البشر لأنّك دايمًا بحاجه لرحمة الرب، وتذكّر إلهنا علّمنا أجمل أمثوله بالرّحمه عن صليبو لمّا قال : " إغفر لهم يا ابتاه..." المصدر : صوت المحبّة

  صوت صارخ في البريّة اليوم 24 حزيران بيصادف تذكار ميلاد يوحنّا المعمدان.  هالقدّيس الكبير اللي كان رمز للقوّة و الجديّة.  كان كتير صارم و ما يقبل الغلط هوّي اللي قال عنّو النبي أشعيا "صوتُ صارخٍ في البريَّة"، هوّي اللي إجا بأعجوبة من أم عاقر، هوّي اللي مهّد لمجيء يسوع و هوّي اللي عمّد الناس و بشّرن بالرب... هوّي اللي عمّد يسوع عا نهر الأردن و يومها حلّ الروح القدس عا يسوع و وَإذَا صَوْتٌ مِنَ السَّمَاوَاتِ يَقُولُ: "أَنْتَ ابْنِي الْحَبِيبُ، بِكَ سُرِرْتُ"!   من وقت ما كانو يسوع و يوحنّا ببطن أمّهاتن علاقتن مميّزة!  قدّيش ميلاد و وجود يوحنّا المعمدان مع يسوع كانو نقطة تحوّل، بدونو كتير إشيا كانت تغيّرت...  يا رب عطينا قوّة و جرأة يوحنّا عا مواجهة الغلط و متلو ما نقبل فيه ابدا!  عطينا من قوّة إيمانو و تبشيرو بالرب بدون خوف! يا رب بتذكار ميلاد يوحنّا المعمدان منصلّيلك و منطلب شفاعتو. آمــــــــــــين! المصدر : صفحة Jesus My Lord

رح يجي يوم... "لا تعود تذكر الشدّة لسبب الفرح" (يو ٢١:١٦) رح يجي يوم....قد ما نطرتو.... بس يوصل هالنهار قد ما رح تفرحو ما رح يكون عندكن وقت تتذكّرو مشاكلكن و اللي كان مزعّلكن! إيماننا هوّي نعرف ننطر بثقة و صبر و كل ما حسّينا كل شي بوجهنا مسكّر نصلّي... كل ما تكونو تعبانين و زعلانين تذكّرو هالوقت اللي عم يحكي عنّن مار يوحنا بهالآية... ربنا يملّي ايّامكن فرح، آمــــــــــــين. المصدر : صفحة Jesus My Lord

  ختيار عنّايا   بـ22 الشهر دربك مليانة زوّار... قدّيش ناس عيّدوك بعيد البَي!؟ ما في بيت ما فيه صورة للعيلة عندك بعنّايا من هِنّي و زغار لوقت ما كبرو... يا قدّيس زار بلاد العالم كِلّو من محبستو! يا قدّيس حَبّ الكلّ و ساعد الكلّ و ما فرّق بين عِرق و جنس و دين و طايفة و منطقة! يا قدّيس جمع الكلّ بوقت كتيرة الإشيا اللي بتفرّق! يا شربل خلّي عينك عا لبنان مع اننا ما منستاهل لأننا ما عِنّا محبّة و فتحنا بوابنا للشرّ بإرادتنا!  يا شربل كتار عم ينامو بلا أكل، كتار ما عم يلاقو دوا، كتار ما عم تستقبلن المستشفى، كتار بلا شغل.... ضلّك معن و صلّيلن مش تا تروح مشكلتن، صلّيلن تا يتمّم ربنا مشيئتو بحياتن و يعطيهن نعمة الصبر و السلام و خبزهم كفاف يومهم... يا شربل ساعدنا يا شربل احمينا! المصدر : صفحة Jesus My Lord

  أبانا في السماوات... يا بيّي السماوي، شو بدّي قلّك اليوم؟  كيف بدّيي عايدَك؟  عا كم شغلة بدّي أشكرك؟  و الأهمّ شو بدّي جبلك هديّة إنت اللي هداياك غامرة حياتي بمناسبة و بدون مناسبة!؟ أنا بعرف إنّي مش إبن مثالي، و مَنّي متل ما كل بَي بيتمنّى يكون إبنو و عندي أغلاط و نواقص كتير بس إنت حبّيتني متل ما أنا ... شو بدّي اهديك؟... رح قدّملك قلبي متل ما هوّي بكل جروحو و تَعَبو و زَعَلو و تقلو...  هديتي متواضعة و ما بتليق بمجدك يا ربّ بس أنا بعرف إنّك قلت إنّو الفرحة بتملّي السما برجعة خاطي عالبيت و أنا بهالعيد عم قِلّك إنّي رجعت بهاليوم و باقي عا طول... ينعاد عليك يا بيّي... الله يخلّي كل البَيّات و يعطيكن القوّة تغمرو عيالكن بهالوقت الصعب و يرحم اللي سبقونا عالسما! المصدر : صفحة Jesus My Lord

  النور الحقيقي من بعد مشوار لبلاد الغرب، رجع الملك ع بلادو وحامل معو هديّه لكل أهالي مملكتو: ساعة قديمة بتتثبّت ع الأرض، وبتعدّ الوقت حسب الظلّ اللي بترسمو ع الأرض، من بعد إصطدام شعاع الشمس بعقاربها.  هالهديّة البسيطة قلبت حياة المملكة : من وراها، تعلّمو الناس يقسمو النهار لساعات، والأشهر لأيام.  وصاروا كلّهن دقيقين يحترمو مواعيدهن، وإنقلب هالوضع ع نفسيّتن، وصارو يوثقو بحالن أكتر، ويديرو شؤونن بوعي وجدّيّه.  وهيك وبعد سنين قليلة، إغتنو كلّن بالحكمه والمال والسلطة.  وبعد سنين طويلة مات الملك.  وحبّو أهالي المملكه يعملولو معبد تذكاري يعبّرو فيه عن مدى حبّن.  وبما إنّو الساعه هيّ رمز طيبة الملك وسبب غنى الأهالي، قرّر المجلس إنّو يبني حول هالساعة هيكل كبير مع قبّه مدهّبه وعظيمه.  وعند إنتهاء البناء، كان من الطبيعي إنّو تنحجب أشعّة الشمس عن الساعة، وإختفى هيك الظلّ اللي كان عم بينظّم حياة الشعب.  ومنهن كمّلو يكونو دقيقين بحياتن، وغيرن صار ينسى مواعيدو. الزوّادة بتقلّي وبتقلّك : خلّينا نفكّر اليوم بيسوع اللي أوقات كتيره تعصّبنا إلو، بدل ما يحييه فينا، عم يقتلو.  وبالتالي عم نضيّع المقياس ال

  بنظر الربّ إنت مهم!   في إحدى البواخر العظيمه برغي كتير زغير، كان هو ورفاقو مثبّتين لوح من البولاد. ولمّا وصلت الباخره لنصّ المحيط، قرّر هالبرغي يتخلّص من هالحياة المعتمه اللي عم بيعيشها، وبسبب شَغله تانيه مهمّة كمان :  معقولي، من ٤٠ سنه وهو عم يخدم هالباخره ما حدا قلّو كلمه شكر؟ "خلص! أنا فالل!" قال البرغي لصاحبو. "إذا إنت بتفلّ، نحنا كمان رح نروح معك!" جاوبوه البراغي. وهيك صار!  كل ما ضربت فيهن مَوجه، صارت البراغي ترقص وتحلّ من محلّا.  حتى المسامير اللي مهدّايه خشبة الشراع، صارت تصرّخ وتقول: عم تجبرونا نحنا كمان نترك محلّنا.  - كرمال ألله صرخت ألواح البولاد!  إذا ما وقَّفتو، راحت علينا! وكل الباخرة عرفت إنّو البرغي الزغير بدّو يترك السفينه يللي بلّشت ترجف كلّها سوا قدّام أمواج المحيط العاليه.  وإجتمعت الألواح والمسامير والبراغي والخشب ع إنّو يبعتو نداء للبرغي حتى يعدل عن قرارو. وهيك صار! وساعتها شعر البرغي الزغير إنّو هوي مهمّ كتير، أكتر ممّا كان بيتصوّر، وبعت يقول لكل أصحابو اللي ع الباخره إنّو قرّر يبقى محلّو. الزوّاده بتقلّي وبتقلّك : مش ضروري إنّو نكون بمركز

  ليش التساعية؟   ليش منصلّي تساعيّة؟  شو يعني تساعيّة و كيف بلّش هالنوع من الصلا؟! التساعيّة هيّي صلا لمدّة 9 أيام عا نيّة معيّنة و منطلب شفاعة قدّيس منختارو... ليش 9 أيام مش غير رقم؟  منعرف إنّو يسوع وصّى التلاميذ ما يتركو أورشليم و ينطرو الروح القدس و هنّي عملو بهالوصيّة بقيو يصلّو هنّي و مريم لمدة 9 ايام من وقت صعود الرب، توحّدو بالصلا بكل حبّ ما طول الوعد و بعد 9 أيام حلّ الروح القدس!  و من وقتها صارت صلاة التساعيّة بتتكرّر بالكنيسة! اختارو شفيعكن و صلّو معو و ارفعو نواياكن عالسما و انشالله كل طلبات قلوبكن تكون مستجابة، آمــــــــــــين! المصدر : صفحة Jesus My Lord

  بلشو من اليوم! بيقولو إنّو الفرق كبير كتير بين شخص بيحكيك بس يكون فاضي و بين شخص بيفضّي حالو تا يحكيك! أكيد صح... تخايلو إنّو حدا يحكيكن لأنّو ما عندو شي تاني يعملو أو بدّو شي منكن و تخايلو حدا مشغول كتير و مضغوط كتير و بيترك كل شي كرمالكن قدّيش بيحبكن... هون بتعرفو حالكن وين بسلّم أولويّات الناس... طيب، تعو نفكّر بالعكس، إنتو أيمتى بتحكو مع ربنا؟  أيمتى بتروحو عالقدّاس؟  بس بدكن شي؟  بس يكون ما عندكن مشاريع الأحد؟  بس يكون في شي مناسبة؟  او بتتركو كل شي و بتقدسو و بعدين كل شي باقي؟  قرّب الأحد... ما تأجلو... بلشو من اليوم! المصدر : صفحة Jesus My Lord

  نصيحة إمّ الله معكن...  بيخبّروا عن إمّ كانت عم بتوصّي ولادها، بتقلّن :  إذا كنتوا بتجربة لازم تلتجوا لإمّكن مريم، وإذا حسّيتوا ما حدا عم يسمعكن لازم تدخلوا بحوار مع مريم، وإذا كنتوا مسافرين خلّوا مريم تكون رفيقة سفركن، وإذا كنتوا عم بتغادروا هالدّني لتنتقلوا للحياة التّانية استسلموا بين إيدين مريم.  الزّوّادة بتقلّي وبتقلّك : سلّم حياتك لمريم، اسمعلا بقلبك، وأكيد رح تهمس وتقلّك :  لازم على طول تعمل شو بيطلب منّك الرّب يسوع وأكيد الفرحة بتغمر حياتك والسّعادة بتكون رفيقتك على طول، والله معك... المصدر : صوت المحبّة

  الثعلب والغراب مين مِنّا هوّي و زغير مش سامع أو دارس قصّة الثعلب اللي ضحك عالغراب و صار يقلّو صوتك كتير حلو غنّيلنا شي و الغراب صدّقو بس فتح تِمّو يغنّي وقعت الجبنة مِنّو و أخدها الثعلب! هالقصّة بتعلّمنا دروس كتيرة لحياتنا.  مثلا ما نِنغَشّ بالحكي الحلو و ما نصدّق شو ما كان و الأهمّ إنّو نوثق بحالنا و ما نعوز نبرهن لحدا شي و ما يهمنا رأي الناس فينا طول ما عايشين بخوف الله و رضاه.  "لا اعتدّ برأي الناس، ما أشدّ تقلّبه".  هودي كلمات القدّيسة تريزيا الطفل يسوع اللي فهمت كتير منيح عا ربنا شو بدّو... ما تخلّو حدا يتصرّف معكن متل هالثعلب، و ما تنطروه يعمل شي تا ياخدلكن جبنتكن بالعكس تقاسموها معو بكل إرادتكن لو هيك صار شو كانت القصّة بتكون بعد احلى!  أحِبّوا أعداءكم... والله يرافقكن... المصدر : صفحة Jesus My Lord

  إفتحو إنجيلكن في جملة شهيرة بتقول : "إنَّ النَّاسَ لا تَعرِف أنَّ كِتاباً واحداً قادرٌ على أنْ يُغيِّرَ مَجرى حياة إنسَان." أوقات كتير منقرا كتاب منتأثّر فيه، بالعبرة اللي فيه، بفكر الكاتب... هودي الكتب العاديّة كيف الكتاب المقدّس، كتاب ربنا، كتاب الحياة!  الإنجيل مش متل الكتب العاديّة مَنّو قصّة أو سرد أحداث منقريها و خلص، الإنجيل كتاب حَي، إذا بتقرا نفس الآية 10 مرّات كل مرّة بتوصلك رسالة شي و كل مرّة بتعنيلك شي و كل مرّة بتحكيك بطريقة!  الزّوّادة بتقلّي وبتقلّكن : إفتحو إنجيلكن، إحكو مع ربنا من خلالو، أعطوه مجال يشتغل و يغيّر بحياتكن!  إقرأ انجيلك بإستمرار بتوصل عالسما! المصدر : صفحة Jesus My Lord

  صباح الخير يا عدرا! بيخبرو إنّو مرّة بوقت صلاة المساء كان البابا كيرلس عم يبخّر بالكنيسة و لمّا وصل قدّام ايقونة العدرا قلها : صباح الخير يا عدرا!  إستغرب الشمّاس و قال لحالو أكيد البابا مضيّع و مفكّر حالو عم يصلّي الصبح...  فهم البابا من عيونو بشو عم يفكّر و قلّو :  يا إبني بعرف إنّو نحنا بالليل!  بس إمنا مريم بالسما و فوق ما في ليل و لا عتمة عاطول نهار و نور!  انشالله كل إيّامكن نور و فرح و سلام مع إمنا مريم و إبنها يسوع... أحد مبارك للكل... المصدر : صفحة Jesus My Lord

  الناس ناطرة بعضها عا غلطة بيخبرو عن فنّان كبير و مشهور عمل معرض و بين لوحاتو في وحدة كتير حلوة ما بقي حدا ما وقف قدّامها بس كلّن كانو عم يقولو نفس الشي :  بس لَو منتبهينلها أكتر ما كان راح لونها من النصّ ضيعانها كانت بتكون من أحلى اللوحات.  بس اللي ما بيعرفوه هالناس إنّو الرسّام عمل هالغلطة قصد حتّى يبرهن وجهة نظرو إنّو قد ما كانت الشغلة حلوة و متعوب عليها الناس عاطول رح تفتّش عالغلط أو الشي الناقص و تدلّ عليه و بينسو كل شي منيح!  هالوجهة النظر مش بس بالرسم، بتتطبّق عا كل شي بالحياة، الناس ناطرة بعضها عا غلطة بدل ما يساعدو بعضن تا تكون النتيجة حلوة بينطرو عالكوع تا يدلّو عا دعسة غيرن الناقصة حتّى حدا يبيّن عا حساب خَيّو الإنسان!   يا رب ليش الناس ما عم تحب بعضها متل ما طلبت مِنّا؟  ليش الناس ماشيين عا درب الشر و ما بدّن يرجعو؟  بس يصيرو يحبّو بعضن و يساعدو بعضن ساعتها بس بيعرفو الكل إنّن تلاميذ يسوع، غير هيك ما بيمشي الحال! والله معكن... المصدر : صفحة Jesus My Lord

  حياتنا ماراتون اللبناني بيفتح عيونو عم يركض!  لازم يركض يجرّب يعبّي بنزين تا يركض عالشغل اللي كلّو ركض بركض بيرجع لازم يركض عالسوبرماركت تا يجيب لولادو شي سعرو بعدو مقبول و يرجع يركض عالبيت تا يلحّق كهربا الدولة لأنّو الغسّالة ما بتدور عالإشتراك هيدا إذا كان في مَي و بيرجع كمان يركض يدرّس ولادو و يصلّي ما تروح الإنترنت هيدا إذا ما ركض يفتّش عا دوا مقطوع لأهلو!  بيغفى من تعبو ما بيعرف كيف و بيرجع تاني يوم بيعيد نفس الشي! حياتنا ماراتون بس بدون خريطة عم نركض نركض بس مش عارفين وين رايحين!  يا رب وحدك البداية و النهاية، وحدك الألف و الياء، آنت شايف بكرا و اللي بعدو و كل الإيام.  منصلّيلك و منطلب منّك تعطينا الصبر و القوّة نقدر نضل مكملين شو ما كانت الظروف و ما نستسلم أبداً و نآمن إنّو معك وحدك الخلاص! آمــــــــــــين. المصدر : صفحة Jesus My Lord

شو ما صار منكمّل معك للآخر! كتير منعيش أو منسمع عن مشاكل أو أمراض أو يمكن إشيا ما بتزبط من أوّل مرّة و بيقولولك يا رب هودي الناس مش آذيين نملة ليش هيك عم يصير معن؟!  ما بيستاهلو أبداً، شو هالصليب الكبير... و بتكتر التعليقات... بوقت إذا منتذكّر هالمزمور منفهم! "كَثِيرَةٌ هِيَ بَلاَيَا الصِّدِّيقِ، وَمِنْ جَمِيعِهَا يُنَجِّيهِ الرَّبُّ." (مز ٣٤: ١٩) يمكن تكون الطريق صعبة، ما حدا قال أصلاً إنها رح تكون سهلة و أكيد رح يكون في عقبات و صعوبات و طلعات و نزلات بس بالآخر لمّا ربنا يتدخّل و يصير كل شي منيح ما لازم ننسى نشكر و ننسى إنّو نحنا لحالنا ما منقدر نعمل شي و إنّو ما في خلاص إلّا بربنا يسوع المسيح إلو المجد!  يا رب عطينا نعرف نقرا بين السطور و نفهم عليك و عطينا نعمة الصبر حتّى شو ما صار نكمّل معك للآخر! المصدر : صفحة Jesus My Lord

  الإنتماء الله معكن... بيخبّروا عن صبي كان عم بيزور حديقة الحيوانات مع جدّو.   وصلو لقدّام قفص في طير نحنا منعرفو بديك الرّومي. سأل جدّو عن إسم هالطير، قلّو جدّو: «عند العرب إسمو الدّيك الرّومي، عند الرّومان إسمو الدّيك الفرنسي، عند الفرنسيّين إسمو الدّيك الهندي، عند الأمركان إسمو الدّيك التّركي، عند الأتراك إسمو الدّيك الهندي، عند الهنود إسمو الدّيك البيروني نسبة إلى البيرو...  بيتابع الجدّ وبيقول لحفيدو : المضحك إنّو هالطّائر ما بينتمي لأي بلد من البلدان.  الزّوّادة بتقلّي وبتقلّك : لو مهما كانت أسماءنا والبلدان يلّي عايشين فيها، ما لازم ننسى إنّو نحنا غربا ما مننتمي لأي وطن أرضي، لأنّو موطنّا الحقيقي هوّي السّما، والله معكن... المصدر : صوت المحبّة

  التّخلّي الله معكن...  زوّادة اليوم من أقوال الآباء القديسين: على دروب الحياة كتار يلّي بيتخلّوا عنّك، وحدو الرّب يلّي بيضلّ معك، جرّب تضلّ على طول مع الرّب بتكسب الكلّ وما حدا بيتخلّى عنّك.  الزّوّادة بتقلّي وبتقلّك : الإنسان بطبيعتو متطلّب وبيحبّ يكون عندو خيارات كتيرة، خلّينا أنا وإنت نتذكّر كلام الرّب، نطلب ملكوتو وكلّ الأمور التّانية تعطى وتزاد لإلنا، والله معكن... المصدر : صوت المحبّة

  الأمانة بيخبرو عن ست عم تسأل جيرانها كيف فيها تزرع ورد أصفر.  قالولها كتير هينة مرقي عالدير بالضيعة زارعين منّن كتير جيبي وحدة من الحوض و حطّيها بالتراب بجنينتك.  ما حِكيت شي بوقتها.  تاني يوم طلعت عالدير و طلبت تشوف الأبونا.  قالتلو بدّي إسأل إذا في مجال آخد من الحوض عود ورد أصفر إزرعها عندي. إستغرب الأبونا إنّو كل الناس المارقين بيقطفو عالرايح و الجايي و ما حدا بيسأل!  قالتلو الست :  ما بقبل آخد شي من الوقف بلا ما أطلب إذن ، هودي ليسوع!  قلها الأبونا :  يسوع بيتمنّى حدا أَمِين متلك ياخد من ورداتو و يزرعن و يهتم فيهن و يملّو جنينات الضيعة و عطرن ينتشر وين ما كان! الأمانة من أهمّ مميّزات المسيحي... حافظو عليها بوقت صارت نادرة، و إشتغلو حتّى تستاهلو ثقة ربنا! "قَالَ لَهُ سَيِّدُهُ: نِعِمَّا أَيُّهَا الْعَبْدُ الصَّالِحُ الأَمِينُ! كُنْتَ أَمِينًا فِي الْقَلِيلِ فَأُقِيمُكَ عَلَى الْكَثِيرِ. اُدْخُلْ إِلَى فَرَحِ سَيِّدِكَ." (مت ٢٥: ٢٣)... المصدر : صفحة Jesus My Lord