الزوادة اليومية

  السيد فواز فؤاد شمعون من مواليد سرعين ١٩٤٨ متأهل من السيّدة أمال شمعون وعنده ولدان وهو ضابط متقاعد في قوى الأمن ومقيم في بيت الشعار ورقم الهاتف 04913807 - أو 03728444 . وكما يخبر عن حالته : "شاهدت لفترة طويلة دما في البراز ولم أبالي حتى أصبح معي نزيف يومي فدخلت مستشفى أبو جودة فقرّر الدكتور غابي أبو سليمان إجراء ناضور لمعرفة سبب النزيف وذلك كان بشهر تشرين الأول ٢٠١٣ فتبيّن وجود ورم سرطاني فجهّزوني لإجراء عمليّة جراحيّة لإستئصال المرض في صباح اليوم التالي. وقبل دخولي إلى غرفة العمليات إبتدأتُ بالصلاة لمريم العذراء ولمار شربل وطلبتُ منه شفاعته ونعمة الشفاء ومرافقتي وقت العمليّة. وعند إنتهاء العمليّة خرج الطبيب الجرّاح وقال لولدي أنّ والدك حالته صعبة وليس أمامه إلاّ مدّة قصيرة من الحياة. وعند خروجي من العمليّة قلتُ للعائلة وللأطبّاء أنني شفيتُ لأنني قد شاهدتُ القدّيس شربل أثناء العمليّة كصورته التي ظهر فيها بالمحبسة يشتغل مع الأطباء ويساعدهم ويلهمهم. أُجريت لي بعدها أربع جلسات كيميائية إلى أن تدخّل الدكتور جورج شاهين وأوقف العلاج لأنني شفيتُ من مرضي بتاريخ ٢٢ من شهر تشرين الثاني ٢٠

  العمر الحقيقي مقابل أي مبلغ ممكن تعطي عيونك لحدا؟ مليون أو أكتر؟ ولا بمال الدني!  عيوننا هنّي صوره عن أغلى ما منملك. منقول : "بحافظ عليه متل بوبّو عيني" .  عيوننا يعني ٢٦٤ مليون خليّه بتفرجينا النور والأشكال والألوان بالعالم.  لمّا منسافر ومنقول شفنا الصين كلّو بفضل عيوننا.  وزن العين ٧ غرامات ونص، عيوني التنَين بوزن مكتوب.  ٢٥ غرام لسفرة العمر، أخفّ زوّادة وأهمّ زوّادة، وبالرغم من كلّ هالأمور مش عيوننا هنّي المهمّين.  منقدر نملك عيون وما نشوف.  لأن ورا العيون لازم يكون في شخص، شخص حابب فعلًا يشوف ويفهم ويحب.  بالحقيقه، حتى نشوف منيح لازم شرطَين: وجود العيون ونوعية النظر.  الزوّاده بتقلّكن :   مش الأعمى أعمى البصر، إنّما أعمى البصيره.  إحذرو أنو ينقال عنكن : "لهم عيون ولا يبصرون"... المصدر : صوت المحبّة

  ثمرة الفصول الأربعة بتقول القدّيسة تريزا دي كالكوتا:  "المحبّة ثمرة تنضج في جميع الفصول وهي في متناول كل يدّ." منسمع كتير هلّق موسم هالشغلة و خِلص الموسم و بلّش موسم شي تاني... يعني مش كل شي منلاقيه عاطول إلّا المحبّة موسمها ما بيخلص و ما بتطلع عا شجر عالي ما بينطال، إن كنت زغير و إن كنت كبير بتقدر توصّلها! قطفوا منها إلكن و وزعوا لغيركن قدّ ما فيكن.  كل ما توزّع منها كل ما زهّرت و عطيت ثمار أكتر و أكتر ... ما تنسو وصيّة يسوع إلنا حِبّو بعضكن بعالم فيه كل شي إلّا حبّ حقيقي... المصدر : صفحة Jesus My Lord

  الشوفير القوي!  مرّة صبي زغير سأل جدّو كيف بدّو يصير شوفير قوي كتير.  قلّو جدّو الشوفير تا يصير قوي لازم يتمرّن و يسوق عا طرقات وعرة و ضيقة و صعبة.  نفس الشي بيتطبّق عالحياة... الإنسان الناجح هوّي اللي طريقو بتكون فيها صعوبات و تحدّيات و بيتعلّم يتخطّاها!  الصعوبات و الوجع ما بيدمروك بالعكس بيقووك تذكّرو اللي منقولو عاطول إنّو بعد الصليب في قيامة و حياة و شخص قوي تحمّل و نطر و صبر و خلّصو يسوع! صحّ صعوباتنا أكتر من كتار يا رب بس إنت قلت من يصبر للنهاية يخلص، رح نشدّ عا حالنا و رح نصبر، خلّصنا يا رب... المصدر : صفحة Jesus My Lord

  دبّر ما كان حائدًا... أرسل روحك أيّها المسيح فيتجدّد وجه الأرض... بس وعدنا يسوع إنّو باقي معنا طول الأدهار وِفِي بوعدو و بعتلنا الروح القدس يبقى معنا دايماً.  ما تتردّدو تصلّولو و تطلبو مواهبو و تردّدو الصلا اللي كلنا منعرفها :  هلمّ أيّها الروح القدس و أرسل من السماء شعاع نورك...  بكل صلا كل شخص في جملة يمكن بتعيّطلو او بتلمس قلبو، بآخر هالصلا في جملة بتقول: دبّر ما كان حائدًا...  يا رب كل أمورنا بإيدك، دبّرنا و خلّي كل إيّامنا عنصرة و نستاهل رفقة روحك القدّوس...  منشكرك يا روح الرب عا مواهبك اللي عطيتنا ياها و منصلّيلك و منطلب معونتك كل يوم و كل لحظة...خلّيك معنا! المصدر : صفحة Jesus My Lord

  خَيّو أو عدوّو؟ بيخبرو عن طبيب بيشتغل بطوارئ مستشفى وصلت قدرة هالقسم الإستيعابيّة للآخر، بعد فيهن يستقبلو شخص واحد بس...  سيّارة مسرعة ضربت شخص ما بيتّفق معو أبداً و ما بيحبّو و خَيّو للطبيب  وقع عن السطح و تأذّى كتير و التنين جابن الإسعاف عالمستشفى و هوّي لازم يقرّر مين بيستقبل!  شو هالقرار الصعب... مين قولكن رح يخلّص؟  خَيّو أو عدوّو؟  كلكن رح تجاوبو خَيّو أكيد.. بس بتعرفو شو عمل؟  إستقبل عدوّو و عملو الإسعافات الأوليّة و إهتمّ فيه و إتّصل بأقرب مستشفى حجز مطرح لخَيّو  و طلب منّن يهتمّو فيه و بس خلّص شغل راح لعندو بقي معو تا شفي...  كتار رح يقولو ما معو حقّ و كتار رح يقدرو اللي عملو.  شو ما كان رأيكن تذكّرو شو قلنا يسوع : أحبّوا أعداءكم و : "لأَنَّهُ إِنْ أَحْبَبْتُمُ الَّذِينَ يُحِبُّونَكُمْ، فَأَيُّ أَجْرٍ لَكُمْ؟ أَلَيْسَ الْعَشَّارُونَ أَيْضًا يَفْعَلُونَ ذلِكَ؟" (مت ٥: ٤٦) المصدر : صفحة Jesus My Lord

أقوى سلاح !   بتقول قدّيسة الورود تريزيا الطفل يسوع : "إنّ الغفران هو أقوى قوّة في الأرض يمكن أن نتسلّح بها." و البشر بحِقدن عا بعضن و ما حدا عم يسامح حدا هنّي بإرادتن مسَلْمين سلاحن!  ليش بدّك تكون بلا حماية ما زال سلاحك مِنّك و فيك بقلبك!  أغفر و سامح و حِبّ بيصير بإيدك سلاح قوي كتير بوجه الشر و ربنا قائد معركتك و ما بتكون إلّا ربحان.  مع إنّو تريز كانت رقيقة و ناعمة و بتحبّ الورود بس كمان كانت محاربة شرسة بقلب أبيض ما بيعرف إلّا يسامح!  بشفاعة تريز منصلّيلك يا رب تكون رفيقنا بكل لحظة و كل ثانية و توفّقنا و تغمرنا بخيراتك حسب مشيئتك... المصدر : صفحة Jesus My Lord

الغِربة صعبة بيخبرو عن صبيّة راحت عند أهلها اللي بيتن بمنطقة بعيدة.  إجت بدّا تفلّ بتقلها إمها إذا مسكرين الطريق بترجعي بتنامي هون.  قالتها الصبيّة أكيد ، هيّي و ماشية بتسمع الأم عم تقول للبَي : يا ريت تكون الطريق مسكرة... قامت هالصبيّة عملت برمة بالسيارة و رجعت و قالتلن حظّي حلو رح نام هون الطريق مسكرة مع إنّو ما كان في شي عالطريق... الأهل اللي بنفس البلد بيشتاقو لولادن هلقدّ و بيعملو أي شي تا يبقو سوا كيف الأهل اللي ولادن بعاد عنّن محيطات و قارّات و بلاد...  الغِربة صعبة عالباقي و عالرايح...  منصلّي اليوم يا رب عا نيّة كل عيلة فرقتها الظروف، عا نية كل شب و صبيّة إضطرّو يفلّو تا يحقّقو أحلام ما كان إلها مطرح ببلدن و عا نيّة كل اهل عايشين مع  الصور و بيشمّو ريحة مخدّة باردة... يا رب علّمنا إنّو قدّ ما بعدنا نرجع نتلاقى متل وقت مريم و يوسف ضَيّعو يسوع و رجعو التقو بالهيكل عندك... مِنّك يا ربّ منطلب المصدر : صفحة Jesus My Lord

  اذكرني بصلاتك!   "إنَّ أوّل طريقة للصلاة من أجل شخص ما هي التحدّث إلى الله عنه أو عنها.  إذا فعلنا هذا بشكل متواتر ويوميّ لن ينغلق قلبنا أبدًا وسيبقى مفتوحًا على الإخوة"  من أقوال البابا فرنسيس اللي كان عم يحكي عن اهميّة انّو نصلّي مش بس إلنا كمان لغيرنا!  مش اللي بيحبّ بيخبّر أهلو و الكلّ عن اللي بيحبّن؟  كيف بالأحرى بَينا السماوي اللي قادر ينتبه علين إن كِنّا و إن ما كِنّا معن!  خلّونا نكرّس اليوم للصلا عا نيّة غيرنا يمكن ناس محدّدين و يمكن عامّة لكل شخص عايز صلا مين ما كان...  و كونو أكيدين إنّو متل ما إنتو عم تذكرو ناس بصلاتكن غيركن عم يصلّيلكن و إنتو مش عارفين و ما تنسو إنّو الصلا اللي من القلب بتوصل دغري عالسما!  انشالله كل صلواتكن مقبولة! المصدر : صفحة Jesus My Lord

  الحياة مبادلة شبّ راح عند الأب أنسالم، وسألو :  كيف بدّي حب اللّه؟".  قال الشبّ : " قدّمت لألله أفكاري وصلواتي، شغلي وتعبي إنّما بعدني حاسس إنّي بعيد عنّو، شو لازم قدّملو بعد؟". جاوب الأب أنسالم : " كان في ملك بدّو يجوّز بنتو، وهي أصرّت ما تتجوز إلّا العريس اللي بيقدّملها أحلى وأغلى هديّه.  تقدّمو العرسان وكانت كل مرّة ترفضن لأنّ ما تعجبها الهديّه.  حتّى إجا شبّ وإيديه فاضيين، سألتو : "ما عندك شي تقدّملي يّاه؟".  جاوبها : " جايي قدّملك ذاتي وبس تبادليني الهديّه بقدر قدّملك كل شي"." الزوّاده بتقلّي وبتقلّك : "يا إبني بتقدر تعطي اللّه كل شي لما بتتعلّم تقبل منّو كل شي".  الزوّاده بتقلّك أحلى هديّه بتقدّمها للرب هيّي إنّك تقدّملو ذاتك، متل ما هو بذل ذاتو كرمالك ع الصليب. المصدر : صوت المحبة

  فيتجدّد وجه الأرض! من أجمل الأقوال اللي بتحكي عن الروح القدس هيّي للقدّيس أنطونيوس البدواني اللي قال:  "النار عندها ٤ طباع: بتحرق، بتطهّر، بتدفّي و بتعطي ضَو.. هيك الروح القدس بيحرق الخطايا، بيطهّر القلوب، بيعطي دفا و طاقة و بيضوّي عتمة الجهل!" يا روح السلام، يا روح الحب، يا روح الرب!  حلّ علينا و عا بيوتنا، بارك عيالنا و اللي منحبّن و رافقهن عا طول و عطينا نحنا و ياهن مواهبك المقدّسة! عطينا الفهم تا نعرف نحلّل الإشيا صحّ، عطينا القوّة تا نتحمّل و نواجه الصعوبات، عطينا التقوى تا نعرف نصلّي، عطينا مخافة الله تا نعيش بخَوف الله مش الخَوف من الله و الفرق كبير، عطينا العلم تا نشغّل المنطق اللي عطانا ياه ربنا، عطينا المشورة تا نحطّ قناعاتنا عا جنب و نسلمك حياتنا و نقلّك لتكن مشيئتك و عطينا الحكمة تا نعرف نميّز بين الخير و الشر... أرسل روحك ايها المسيح فيتجدّد وجه الأرض! المصدر : صفحة Jesus My Lord

  إلّا طوابير الخبز !!!   طوابير بنزين، طوابير مازوت... كل شي إلّا طوابير الخبز مش مقبولة بالـ ٢٠٢١!  مشهد الناس واقفة قدّام الأفران عم تفتّش عا ربطة خبز و خيفانين ولادن ينامو جوعانين ما بيقبلو لا عقل و لا منطق! يا رب عطينا خبزنا كفاف يومنا و علّمنا نتقاسم خبزتنا قد ما كانت زغيرة مع جارنا حتّى ما يبقى جوعان... منصلّي اليوم يا رب عا نيّة كل عيلة عم تواجه صعوبة تأمّن لقمة العيش و منذكر كل شخص عم ينام جوعان و مش عارف إذا بكرا رح ياكل... منعرف يا رب و منآمن إنّك خبز الحياة...ما تتركنا! المصدر : صفحة Jesus My Lord

مع آلامك يا يسوع "الله يعتني عناية عظيمة بالإنسان ولا يوجد إنسان ليس تحت عناية الله وخاصّةً أولئك الذين يطلبون وجْهَه ويحتملون الآلام من أجل ذلك" (القدّيس مار إسحق السرياني) كل ما تضيق الدني و تكتر الأوجاع قولو مع آلامك يا يسوع.  حَولو كل تعبكن لإماتات و كل ما تحسّو ما بقا في أمل تذكرو هالقول لمار إسحق السرياني اللي عم يذكّرنا إنّو الله عم يعتني فينا عا طول و خصوصاً إذا كِنّا موجوعين بيصير يعتني فينا زيادة!  كيف الأهل بيزيد إهتمامن بإبنن إذا كان مريض نفس الشي!... المصدر : صفحة Jesus My Lord

  إسمو لبنان!...صلّولو... بيخبرو عن إنسان كان بأوّل عمرو الدّني مش سايعتو، صحتو متل الحديد ما بقي إنجاز ما عملو و شو كان حلو متل القمر.  صار يكبر بالعمر و بلّشِت الأمراض تضرب جسمو... السّنة الماضية انضرب قلبو و تبيّن إنو مرضو ما إلو علاج و رح يضل موجوع بقلبو كل حياتو.  جرّب يتعالج و يرجع يقوم بس جسمو كلو عم يوجعو كل شغلة وجع شي و مش بس هيك... إيام العزّ كان غني و عندو ثروات بس مرِض ما عم يلاقي دوا، صار جوعان و ما عم يلاقي أكل، بردان ما في دفى... تا تِكمَل معو قبل مبارح حرَق حالو و شو بيوجّع الحِرق!  مرق فترة زاح عن الطريق الصّح و طمِع و غرّو الفساد، تركوه محبّينو و أصحابو و حتى عيلتو و ولادو و ما حدا قبلان يرجع إلاّ ما يتوب و يصحّح أغلاطو و هوّي مش قادر يوقف عا إجريه... فوق كل أوجاعو، وحيد!... ما في إلو إلاّ الصّلا... ما عرّفناكن عهالشّخص:  إسمو لبنان!...صلّولو... المصدر : صفحة Jesus My Lord

  ينعاد علينا معِك! من أجمل أقوال القدّيس خوري آرس عن إمنا مريم : "فوق في السّماء، مريم العذراء تملك كلّ النِّعَم وتوزّعها على البشر المحتاجين إليها على الأرض." اليوم بعيدِك يا إمّ الدّني منصلّيلك تغمرينا بشفاعتك و تتّطلّعي علينا بقلبِك الحنون و تشوفي النِّعَم اللي محتاج إلها كل واحد مِنّا و كل بيت و تصلّي معو لإبنِك يسوع حتّى يحصَل عليها.  يا مريم وطننا اليوم يتيم... كوني إمّو و تشفّعيلو عند البَيّ السماوي!  يا عدرا، إنتِ اللي إبنك ما بيرفضلِك طلب، أذكري بصلاتِك لبنان و شعبو و كل شخص محتاج لأي نوع من المساعدة و منخصّ بالذِّكر كل جوعان، كل مريض، كل تعبان، كل محتار، كل شخص ناطر إستحقاق، كل شخص ضايع مش قادر يفكّر و لا يقرّر، كل شخص مسَكرة بوجهو البواب و ناطر فرصة و باب أمل... يا إمّي، ينعاد علينا معِك! المصدر : صفحة Jesus My Lord

  سكّان السما راضيين علينا ؟ في حدا كان عم يتأمّل جمال يسوع و مريم، في حدا كان يخدم يسوع و مريم، كان هدفو الوحيد إنّو يرضيهن و ما كان بدّو شي تاني أبداً... عن مين قولكن عم نحكي؟  مار يوسف أكيد!  و مش نحنا اللي عم نحكي، هودي كلمات القدّيسة تريزيا الطفل يسوع اللي بقصيدتها رقم ١٤ توجّهتلو و قالتلو إنّو نحنا متلو  عم نتأمّل يسوع و مريم و همنا الوحيد نخدمهن و يكونو سكّان السما راضيين علينا!  صلاتنا اليوم هيّي لطلب شفاعة مار يوسف اللي خدم و ضحّى بصمت و تأمُّل و إيمان و كان بَي حقيقي ليسوع بطفولتو... يا مار يوسف نحنا قد ما كبرنا منبقى أطفال بالروح، وجِّهنا متل ما نَصَحت الطفل يسوع و إحمينا متل ما حميتو... علّمنا نكون أبناء صالحين للرب بشفاعتك و شفاعة صاحبة القصيدة القدّيسة تريزيا الطفل يسوع، باركو بيوتنا و عيالنا و احمِلو صلواتنا ليسوع... المصدر : صفحة Jesus My Lord

  يمين كاذب! من أقوال القدّيس يوحنّا السلمي : "الكذب يطفئ المحبّة، واليمين الكاذبة إنكار لله، الطفل لا يعرف الكذب، وكذلك النفس المنزّهة عن الشر، من امتـلـك مخافـة الـرب تغـرب عـن الكـذب، حاويـًا في داخله قاضيًا لا يُرشى أعني وجدانه." في ناس بتحلف عن كذب بلا ما يرفّلها جفن، في ناس بتكذب و بتشهد زور و ما اكترن هالإيّام، في ناس ما بتفكّر بعواقب اللي بتقولو و لا بتعمل تقييم ذاتي.  في ناس بتكذب متل ما بتتنفس!  بيألفو القصّة و بيصدقوها و بينشروها و هنّي سبب توتر بكل مطرح بينوجدو فيه...  منصلّي اليوم عا نيّة هيدا النوع من الناس اللي الشر بيتحكّم بتصرّفاتن و يوم عن يوم عم يغرقو بالخطيّة أكتر و أكتر حتّى يفهمو غلطن و يرجعو عَنّو بأسرع وقت و ما يأَجْلو توبتهن اليوم انت هون و بكرا يمكن لأ... المصدر : صفحة Jesus My Lord

  ماراثون المحبّة في قصّة كتير حلوة منتشرة عا مواقع التواصل بتحكي إنّو بماراتون كل الوقت كان اللاعب نفسو متصدّر السبق و دغري من بعدو في لاعب بالمركز التاني.  بس قرّبو عالآخر وقف اللاعب الأول فكّر إنّو خِلِص السبق ما انتبه لخطّ النهاية و هيدي كانت فرصة دهبيّة للتاني تا يسبقو و يربح.  بس الكل تفاجأ إنّو وصل لحد الأول و قلّو إنّو خطّ النهاية بعد قدّام!  و الشب اللي لمّا وصل و ربح المرتبة الأولى ما قبل إلّا ما تشاركها مع اللي كان بالمرتبة التانية كرمال أخلاقو الرياضيّة العالية.  واحد مِنّن كان قادر يربح لَو غدر بس ما قبل أبداً و التاني كان في ياخد الجايزة وحدو و هوّي كمان ما قِبل أبداً!  هودي هِنّي النفسيّات اللي عم نفقدن اليوم بحياتنا.  يا رب إزرع فينا روحك القدّوس و خَلّيه ينعم علينا بمواهبو اللي هيّي أساس الفرح و السلام و كل شي! المصدر : صفحة Jesus My Lord

  طاقة فرج "لا يمكن للرب أن يلهم رغبات لا يمكن تحقيقها، لذا يمكنني، رغم صغر حجمي، أن أجاهد من أجل القداسة..." (القدّيسة تريزيا الطفل يسوع) إذا ربنا زرع فيك شي طموح كون أكيد إنّو فيك توصلّو، كيف؟  إنت و شطارتك و قدّيش رح تكون جدّي بمحاولتك لتحقّق طموحك... شو ما كانت العقبات بطريقك و شو ما كان نوعها إن كانت معنويّة، عا شكل ناس، مادّيّة... ما تخلّيها توَقفك، كل عقبة فيها طاقة فرج فتّش عليها لو تعبت بس لمّا تلاقيها رح تكون صرت بأوّل خطوة عا طريق تحقيق رغبة قلبك... متل ما تريز ما كان في بفكرها و قلبها إلّا القداسة و ما وفّرت و لا فرصة بتقرّبها من هالشي ما أخدتها و راحت فيها للآخر...  يا وردة السما رشّي طريق طموحاتنا بورودك و صلّيلنا تا يكون عِنّا القوّة و الجرأة عالقليلة إذا كِنّا بمطرح ما بيشبهنا و بعيد كتير عن الطموح اللي زرعو فينا يسوع إنّو بكل بساطة نفلّ تا نبلّش نفتّش عالدرب اللي رسملنا ياه يسوع... المصدر : صفحة Jesus My Lord

  70 مرّة 7 مرّات!  بـ ١٣ ايار ١٩٨١ كان في محاولة إغتيال للبابا القدّيس يوحنّا بولس التاني و نفّذها شب تركي إسمو أحمد أقجى.  كان في كتير ردّات فعل مندّدة باللي صار و داعمة للبابا و تطلب أقصى العقوبات للشب.  بقلب فورة هالغضب اللي عمّت العالم طلع البابا بعد ٤ أيّام من الحادثة و قال : "عم صلّي عا نيّة الأخ اللي قوّص عليّي الرصاص."  كتار إستغربو كيف سامح حدا بعدو مجرّب يقتلو!  و ما إكتفى البابا بهالتصريح، بعد سنتين زار البابا هالشب بالحبس و رجع قلّو بوجهو إنّو مسامحو!  قدّيش تفكير و إيمان هالبابا القدّيس قريبين من السما و قدّيش يسوع ساكن قلبو و مليان حب للآخر و قدّيش متشوّق للحياة الأبديّة تا سامح حدا كان عم ياخدلو حياتو "الأرضيّة" و نحنا إذا حدا قلنا كلمة ما عجبتنا و لأسباب أقل شي بينقال عنها إنها سخيفة منحقد عليه و منعمل ١٠٠ مشكلة... "يا رب، كم مرّة يخطئ إليّ أخي وأنا أغفر له؟ هل إلى سبع مرات، قال له يسوع: لا أقول لك إلى سبع مرات، بل إلى سبعين مرّة سبع مرات"! المصدر : صفحة Jesus My Lord

  ع نية الأطباء.. إلى الربّ نطلب بيقول القدّيس يعقوب برسالته (٥/١٥) :  “وصــلاة الإيمان تشفــي المريض، والــرب يقيمه، وإن كان قد فعـل خطيّة تغفر له”. بإختصار، يا رب منصلّي عا نيّة كل شخص مريض او عندو حالة صحّيّة معيّنة أو عندو جراحة أو اي نوع من العلاج، منطلب منّك تكون حاضر مع كل طبيب في بإيدو مصير إنسان...  قدّملن نعمة الصحّة و لتكن مشيئتك يا رب... منّك يا رب منطلب... المصدر : صفحة Jesus My Lord

حسب توقيت السما! مقتطفات من إنجيل اليوم : إنْصَرَفَ يَسُوعُ إِلى نَواحِي صُورَ وصَيْدا، وإِذَا بِٱمْرَأَةٍ كَنْعَانِيَّةٍ مِنْ تِلْكَ النَّواحي خَرَجَتْ تَصْرُخُ وتَقُول : «إِرْحَمْني، يَا رَبّ، يَا ٱبْنَ دَاوُد!... » حِينَئِذٍ أَجَابَ يَسُوعُ وقَالَ لَهَا :  «أيَّتُهَا ٱلمَرْأَة، عَظِيْمٌ إِيْمَانُكِ! فَلْيَكُنْ لَكِ كَمَا تُريدِين»... اليوم نحنا مدعوّين نتذكّر إنّو يسوع إجا عا لبنان، و مدعوّين نتذكّر إنّو بس طلبت المرا "من بلادنا" بكل إيمان إستجبلها يسوع المسيح!  كل هيدا تا نقول إنّو المفتاح هوّي الإيمان...  و تا نقول إنّو يسوع مش بعيد أبداً عَنّا و موجود بأرضنا و بارك تراب هالوطن... ما تيأسو، آمنوا و أكيد رح يستجيب حسب توقيت السما!... المصدر : صفحة Jesus My Lord

  ذوي الإرادة الصلبة بيخبرو عن تنين أصحاب عم يتحدّو بعضن مين بيقدر يبكّل الإسوارة عا إيدو بإيد وحدة.  ما كانو يقدرو! قالت وحدة للتانية اليوم حسّيت كتير مع اللي عندن إعاقة جسديّة.  و لا مرّة فكّرت قبل بتفاصيل حياتن..كيف بيقدرو يدبرو حالن بدون ما حدا يساعدن؟  قدّيش صعب أصلاً الواحد يطلب مساعدة حدا و ما يقدر يتّكل عا حالو!؟ كتير صعب...  يا رب منصلّي اليوم عا نيّة كل ذوي الإحتياجات الخاصة، ساعدن و اعطيهن الصبر و القوّة تا يكملو مشوارن بعزم و إيمان... المصدر : صفحة Jesus My Lord

شو يعني إبنك تجلّى؟! يا مريم يا أم الله إبنك بالمجد تجلّى... شو يعني إبنك تجلّى؟!  لمّا طلع يسوع عالجبل و معو بطرس، يوحنا و يعقوب و صار يصلّي و شافو التلاميذ اللي كتير قراب من يسوع حدث التجلّي وقت انسمع صوت من السما عم يقول :  «هَذَا هُوَ ابْنِي الْحَبِيبُ الَّذِي أَنَا سُرِرْتُ بِهِ»!  وقتها فهمو يمكن شوي أكتر طبيعة يسوع الإلهيّة هنّي اللي متعودين يشوفوه بيناتن بطبيعتو الإنسانية بس.  و هنّي ما احتفظو باللي شافوه إلن، بالعكس بشّرو التلاميذ الباقيين و نقلو بشارة ألوهيّة يسوع  لكتير أجيال... يا رب تجلّى بوطننا و بيوتنا و قلوبنا و عقولنا...  انشالله عيد تجلّي الرب اليوم بيكون مناسبة تا نرجع ليسوع الرب الإله اللي نحنا بأمسّ الحاجة لوجودو و تجلّيه بحياتنا اليوميّة... المصدر : صفحة Jesus My Lord

شو أكتر شي غالي برأيكن؟ سألو أشخاص شو أكتر شي غالي برأيكن؟  كانت الأجوبة المجوهرات، بيوت و سيارات... بس زادولن عالسؤال عبارة "ما بينقاس بالمصاري" تا فكّرو يقولو: امّي، بيّي، عيلتي، الحب، السلام... نحنا عايشين بعصر صارت المادة فيه طاغية عالإشيا المهمّة و ساكنة بعقل الناس و أوّل شي بيخطر عالبال!...   هالموقف بيذكّرنا برسالة بولس الرسول الأولى إلى تيموثاوس ٦: ١٠ بس قال: "مَحَبَّةَ الْمَالِ أَصْلٌ لِكُلِّ الشُّرُورِ، الَّذِي إِذِ ابْتَغَاهُ قَوْمٌ ضَلُّوا عَنِ الإِيمَانِ، وَطَعَنُوا أَنْفُسَهُمْ بِأَوْجَاعٍ كَثِيرَةٍ"  يا رب عطينا نرجع للأصل، نرجع  للأساس، نرجع للصلا و للإيمان! المصدر : صفحة Jesus My Lord  

٤ آب كل ليلة ضحايا إنفجار مرفأ بيروت عم يهمسو بدينة المسؤولين : ليش نحنا متنا؟  ليش انتو مع عِيَلكُن و نحنا لأ؟  كرمال مين؟ كرمال شو؟  من سنة لليوم ما نشفت دموع اللي بيحبّوهن و حتّى اللي ما بيعرفوهن، مين مِنّا ما حفظ أساميهن و صوَرهن و صارو عايشين معو و كل يوم بيفكرّ فيهن!  مِنّا بنهارِتها فَرَقِت عا لحظة كان هونيك و فلّ، مِنّا كان ياخد هالطريق يومها ما بيعرف ليش راح من  غير طريق... كلنا كنا مشاريع ضحايا بهالنهار!  نحنا بقينا، بس شو، كرمال: الإمّ اللي كبّرت إبنها و علّمتو و شافت حالها فيه و أخدوه منها!  الشبّ اللي حضّر لعرسو أخدو مِنّو الصبيّة اللي حبها!  العيلة اللي بتنطر معاش البَي آخر الشهر، أخدوه منها و أخدو معن الحنان و الأمان و لقمة الخبز...  للشهداء منقول أكيد السما بتلبقلكن أكتر و إذا عدالة الأرض تأخّرت أو ما إجت، قدّام عدالة السما ما في حصانات عا حدا... "لا تدع المشهد الحزين لعدم وجود العدالة البشريّة يُدخِل الإضطراب الى نفسِك فهذا أيضًا له قيمته في تدبير الأمور!"  (بادري بيو) المصدر : صفحة Jesus My Lord