الزوادة اليومية

  جدّد إيمانك بيقولو إنّو المؤمن بدل ما يقعد يعمّر حيطان يتخبّى وراهُن إذا فاض النّهر بيعمِل مركَب و بيقطَع فيه النهر اللّي خايف منو! بالإيمان بيختفي كل خوف، بالإيمان بتربح عالصعوبات، بالإيمان قادر تزيح جبال، بالإيمان بتخلِّص حالَك! بتتذكروا بعد كل أعجوبة عملها يسوع شو كان يقلّن للناس؟ إيمانك شفاك، إيمانك قد خلّصك... اليوم فرصة لكلّ واحَد منّا يجدّد إيمانو و الله رفيقكن عا طول! المصدر : صفحة Jesus My Lord

  النبع ما بيشرب من المَي اللي فيه النبع ما بيشرب من المَي اللي فيه، الشجرة ما بتاكل من الثمار اللي بتحملها و غيرها من الأمثلة اللي خلقها ربنا تا يقلنا إنّو لازم نعيش كرمال غيرنا و نساعد غيرنا و نقدّم اللي عِنّا لغيرنا...  و ما اكتفى ربنا بمخلوقات لتعلّمنا هالشي كمان هوّي كان أصدق مثل و ما خلّص حالو بس خلّصنا إلنا، ما استعمل القوّة اللي عطاه ايّاها بَيّو السماوي تا ما يموت و ما ينضرب و ما يتوجّع بالعكس استعملها قبل تا يشفي المرضى و يخفّف وجعن و يحيي الموتى!  شو بدنا بعد يصير تا نفهم أساس الحياة؟!  الله معكن... المصدر : صفحة Jesus My Lord

المطلوب واحد بس زار يسوع بيتُن، ما عرفِت شو بدا تعمِل و احتارِت شو بدّا تضيّف بس إختها ما ساعدتها!  إجِت عند يسوع و قالتلو : : "يا ربّ، أما يعنيك أنّ أختي تركتني أخدم وحدي، فقل لها تساعدني.  فأجاب الرّبّ وقال لها: مرتا، مرتا، إنّك مهتمّة ومضطربة في أمور كثيرة أمّا المطلوب فواحد." هيدا واحد من دروس يسوع لإلها و لإلنا إنّو عم تهتمّو بكتير إشيا مش أساسية و ناسيين الأهم!  و وقت مات خيّها اللي كان يسوع يحبّو كتير و راح عالقبر و طلب ينشال الحجر قالت : "يا ربّ، قد أنتَن، لأنّ له أربعة أيّام.  فقال لها يسوع ألم أقل لكِ إن آمنت سترين مجد الله؟" و هيدا كمان كان درس تاني إلها و إلنا إنّو بالإيمان ما في مستحيل عند ربنا!  صلاة القدّيسة مرتا ترافق الكل! والله معكن... المصدر : صفحة Jesus My Lord

نعم نعم و لا لا! بيخبرو عن تلميذ مش دارس و عندو إمتحان قلّو للّي قاعد حدّو يبرملو الورقة ما قبل الصبي ينَقلو.  قام قلّو أنا بلاقي حلّ وحدي.  بس توزّعو الوراق صار يصرّخ و يبكي إنّو بطنو عم يوجعو خافت المعلمة و بعتتو عند الممرّضة و ما عمل الإمتحان!  عجبتو الفكرة و صار كل ما في إمتحان ما يدرس و يعمل نفس الشي... بعد كذا مرّة إنتبهو الأساتذة للي عم يصير... بنهار عمل نفس الشي و يبكي موجوع ما حدا ردّ عليه بوقت كان عنجد مريض! الكذب بيجرّ الكذب و بيوصل لمرحلة حتّى لو كان الشخص عم يقول الحقيقة ما حدا رح يصدقو و رح ترتدّ عليه نتيجة أعمالو!  بيقلنا يسوع: ليكن كلامكم نعم نعم و لا لا و كل ما يزاد على ذلك فهو من الشرير.  ما تنسو هالشغلة أبدًا و الرب يرافقكن! المصدر : صفحة Jesus My Lord

  القلب الحلو كلنا منعرف قصّة يهوذا. يسوع بيعرف منيح قدّيش يهوذا بيحب المصاري و حتّى يعوّضلو عن هالشغلة بطريقة حلوة إختارو أمين صندوق مع إنّو يسوع كان عارف منيح إنّو كان عم يسرق من الصندوق و ما فضحو بين التلاميذ و عرف إنّو هوّي اللي رح يسلمو و كمان ما كشفو قدّام الكل حتّى إنّو عطاه فرصة يعيد حساباتو...  عم تتخايلو هالقلب الحلو اللي هلقدّ حَب قدّيش جرحتو الخيانة!  عجيب إنت يا رب بقلبك المحبّ، الطيّب و الحنون!  اعطينا نكون متلك و نحبّ متلك و لو شو ما كان المقابل من الناس... بالمختصر، يا يسوع الوديع و المتواضع القلب إجعل قلبنا مثل قلبك! المصدر : صفحة Jesus My Lord

  الله بيدبر! كلنا منعرِف إنّو الغراب لونو أسود بس اللي مش كتير معروف عنّو إنّو أوّل ما يفقّس البيض و يطلعو منها ولادو بيكون لونن أبيض.  بيفكّرن مش ولادو و بيتركُن و بيفلّ!  طبيعي متل كل الحيوانات بس تجوع بتعمِل صوت و لما يصيرو يصرّخو هالزغار بيفرُز جسمُن مادة ريحتها بتجذُب الحشرات و هيك بتقرّب الحشرات و بلتزّق عالمادة و بيتغذّو الزغار!  بيقول المزمور ١٤٧:  "الْمُعْطِي لِلْبَهَائِمِ طَعَامَهَا، ولِفِرَاخِ الْغِرْبَانِ الَّتِي تَصْرُخُ".  و بيقول الرب يسوع:  "اُنْظُرُوا إِلَى طُيُورِ السَّمَاءِ: إِنَّهَا لاَ تَزْرَعُ وَلاَ تَحْصُدُ وَلاَ تَجْمَعُ إِلَى مَخَازِنَ، وَأَبُوكُمُ السَّمَاوِيُّ يَقُوتُهَا. أَلَسْتُمْ أَنْتُمْ بِالْحَرِيِّ أَفْضَلَ مِنْهَا؟" (مت٢٦:٦) الغراب ترَك ولادو بس الله اهتمّ فيهن كيف إنت يا إنسان، المخلوق الأحب عا قلب الرب!؟  ما تخافوا قد ما اشتدّت الصعوبات... الله بيدبر! المصدر : صفحة Jesus My Lord

  إيمانك هوّي سلاحك!   بتقول الكاتبة الأميركية جويس ماير : "يحاول الخوف حملنا على الإستسلام ولكن الإيمان يقودنا إلى النصر." بس تسمَح للخوف جوّاتك يخلّيك تستسلم يعني إنت وقّفت تجرّب توصَل للّي بدّك إياه هون النتيجة ١٠٠٪ الفشل.  بس لمّا تآمن بالرب و إنّو في حدا قادِر يعمل كل شي و يساعدَك و يدعمَك بتبطّل لحالك عم تجرّب و هون كل الفرق!  قوّي إيمانك بينكسِر خوفك و لو جرّبت مليون مرة و فشلت بيكون في درس لازم تتعلّمو من هالشي و ما تتخلّى عن إيمانك لأنّو هوّي سلاحك الوحيد اللي رح يخليك ترجع تنجح و شو بتكون بوقتها طعمة النجاح احلى! الله معكن... المصدر : صفحة Jesus My Lord

  الصلا مفتاح السما بيقول البابا شنودة التالت :  "إنّ العذراء الصامتة المتأملّة، درسٌ لنا؛ فليتنا مثلها: نتأمّل كثيراً، ونتحدّث قليلاً." اليوم الأحد يوم الرب ما في أحلى من هالفرصة تا نتأمّل بكل تفصيل من القداس الإلهيّ متل ما إمنا العدرا ما حكيِت كتير بس لاحظِت أزغر الإشيا و حفظِت كل شي بقلبها!  اليوم دورنا نسمع شو عندو الرب يقول لكل واحد منا و نتوحّد فيه بالقربانة تا تحلّ بركتو علينا و عا بيوتنا و عيالنا و وطننا.  تذكّرو إنّو الصلا مفتاح السما و الكنيسة منبَع النّعم و الأمل!  أحد مبارك.🌷 المصدر : صفحة Jesus My Lord

بشو معَذبِة تيتا؟! بيخبرو عن صبي زغير سأل إمّو:  ليش في عندك كم شعرة بيضا؟!  قالتلو إمّو عم تمزح معو: الحق عليك! كل ما الولد يعذّب أهلو بيطلع شعرة بيضا!  فكّر الصبي و جاوبها: لكن إنتي بشو معَذبِة تيتا هلقدّ حتّى كل شعراتها بيض!؟ الزوّادة اليوم بتقلنا : إنّو ولادنا أذكياء كتير و دقيقين الملاحظة، بيتصرّفو متلنا و بيتعلّمو مِنّا!  ما فيكن تتطلّبو من إبنكن شي إنتو ما بتعملوه و تا يكون عِنّا جيل محبّ و بيخدم ربنا لازم نحنا بدورنا نكون هيك منحبّ بعضنا متل ما وصّانا ربنا و نعيش مسيحيّتنا و إيماننا للآخر! و الله معكن... المصدر : صفحة Jesus My Lord

  كيف منربح المعركة؟   بيقول القدّيس بادري بيو بوحدة من وعظاتو :  "تذكّروا إنّو الإنسان ما بيربَح معركة بدون الصّلا و القرار عندكُن بدكن تربحوا أو لأ." مين منّا ما عندو عالقليلة معركة وحدة بهالحياة عم يحارب فيها.  مين منا ما عم تواجهو عقبات كتيرة عم توقَف بينو و بين اللّي بيتمنّاه من أبسط الحقوق لأكبر الطموحات... صلوا صلوا صلوا و بتصير معارككن معارك لجنود السّما اللي ما بيخسَروا!  شفاعة مار ميخائيل معكن هوّي اللي حمّلو الربّ قيادة المعركة ضد الشيطان و نزّلو عا جهنّم!  ما تخافوا، الله دايمًا معكن... المصدر : صفحة Jesus My Lord

  الماضي والحاضر والمستقبل كتار من الناس عايشين بالماضي إن كان حلو و إن كان بشع متل كأنّو واقف عندن الزّمن!  و عندَك ناس عايشة بالحاضر، ناسية ماضيها و ما بتهتم بمستقبلها بتعيش كل يوم بيومو.  و عندَك الناس اللي كل همّها بكرا و مجنّدة ماضيها و حاضرها بس بخدمة المستقبل.  كرمال هيك بيقِلنا البابا القدّيس يوحنا بولس التاني:  "تذكروا الماضي و اشكروا الله، عيشوا الحاضر بحماس و نشاط و تطلّعوا عالمستقبل بثقة!".  بالنّهاية، الماضي موجود تا نتعلّم منو و نتقدّم و نشكر الله إننا شفنا يوم جديد و صرنا بالحاضر.  الحاضر هوي مرحلة الشّغل، متل كأنو ربنا عطانا فرصة تا ما نوقَع بنفس أغلاط الماضي و تا نحضّر أساسات لمستقبل مشرق.  و المستقبل مش مضمون!  بس إنت عليك تحصّن حالَك و توثَق بالله و بالطريق اللي رسملَك اياه!  يا رب، حياتي بماضيها و حاضرها و مستقبلها بين إيديك إفعل بها ما تريد! المصدر : صفحة Jesus My Lord

  السلام عليك يا مار الياس الحيّ بعيد مار الياس الحيّ منقلّو كلنا سوا : "السلام عليك يا مار الياس الحيّ يا نبيّ الله العليّ وصاحب الإيمان القويّ والغيرة الإلهيّة والسيرة الملائكيّة.  أنت كاروز الحق قد دحضت الزور ووبّخت صانعي الشرور وقرنت الغيرة المتّقدة بالحب المضطرم ففتكت بكهنة بعل، وأهطلت الأمطار بعد إنحباسها بصلواتك. فنسألك متضرعين، أن تجعلنا مستظلّين وبسنائك مستنيرين.  وإذ نلتمس منك المعونة والشفاعة نلتجئ إليك قائلين: نجِّنا من الشدائد والمصائب والشرور ومن فخاخ الأعداء المنظورين وغير المنظورين.  ردّ عنّا الضربات وأبعد الأمراض والأوبئة والقحط والغلاء وإدفع عنّا وثبات الخيالات الرديئة والأفراح الشرّيرة وكن لنا حافظاً ومنجّياً ومساعداً في كل ساعة من حياتنا.  وكما قبلت تنهّدات الأرملة ورددت لها إبنها الوحيد من بعد الموت وأحييته إقبل تضرعاتنا نحن الملتجئين إليك الآن وسدّد خطواتنا في سبيل البرّ لكي نحيا حياة نقيّة مرضية للّه ونستحق أن نمجّده تعالى معك ومع سائر القدّيسين في السماء إلى الأبد. آميـــــــن".  ينعاد عليكن و يحمي عيلكن و شفاعة مار الياس ترافقكن. المصدر : صفحة Jesus M

  أحرار وأقوى!!!   بيخبرو عن ملك ببلد بعيد أخد قرار إنّو ممنوع حدا يحكي غيرو و اللي بيخالف بينعدَم!  صارو هالناس عايشين ساكتين بلا و لا كلمة خيفانين من القصاص إذا خالفو القرار.  بيوم من الإيام بيموت الملك و أوّل ردّة فعل عند الناس كانت إنّو بلّشو يحكو و ما بقا وقّفو!  الزوّادة بتقلّنا اليوم : إنّو قد ما انحجزِت حريّة التعبير رح ترجع و أقوى!  ربنا خلقنا أحرار ما تقبلو و لا مرة حدا ياخد حق الله عطاكن اياه!  ما تنسو بيقلنا يسوع كونو ودعاء كالحملان و حكماء كالحيات... والله معكن. المصدر : صفحة Jesus My Lord

  القلوب الحلوة ❤️ بيقولو إذا بدّك تعرف قلب شخص إذا عنجد حلو بيكفي تطلّع كيف بيعامل شخص ما بيقدر يقدّملو أي شي بالمقابل!  ساعتها بس رح تتكوّن عندك صورة واضحة... الله يكتّر القلوب الحلوة الحقيقيّة حولكن و يبارك ايامكن...  بداية أسبوع مباركة! المصدر : صفحة Jesus My Lord

  رفيق الكل! ختيار نشيط كتير، ما بيهدا و ما بينام، إن جيت لعندو قبل الضّو أو بالليل بيستقبلَك!  أوقات الكبير بالعمر بتخفّ عندو حاسة السّمع، هوّي بالعكس بيسمَع حتى الإشيا اللي ما بتِنقال!  هوي من بيت زغير بضيعة بعيدة بس بيحكي كل اللّغات!  و مع إنّو ما ترَك لبنان بس زار كل بلدان العالم! الله اختارو من بين الرهبان تا يكون قدّيس عا مذابح الكنيسة، الله عطاه نعمة يكون طبيب السما عالأرض و بشفاعتو عند يسوع شفيو ناس كتار و انحلّت مشاكل كتير و بعدو دير عنايا ما عم يلحّق يسجّل عجايب و نِعَم...  شربل اليوم بعيدَك منطلُب من الرب تدوم للبنان شفيع كبير بالسّما و تضوّي سراج كل عيلة ما عندا زيت و لا أمل و ما تقبَل الظروف الصّعبة تعتِّم قلوب أهل و لا بيت...  ينعاد علينا معَك يا رفيق الكل! المصدر : صفحة Jesus My Lord

  مشيئة الله بحياتنا بتخبِّر الأخت ماري للقلب الأقدس إنّو مرّة سألت القدّيسة تريزيا الطفل يسوع:  إنتي صلّيتي حتى ما تنوجعي كتير و ليكي قدّيش عم تتوجّعي بمرضِك!  بتعرفو شو جاوبتِها!؟ قالت تريز: أنا طلبت من الله ما يسمع الصلوات اللي بتوقَف بوجه تحقيق مشيئتو و إرادتو بحياتي! عاطول منحكي عن مشيئة الله اللي مش دايمًا بتكون بتشبه نحنا شو بدنا و كيف منعيش متل صراع داخلي صعب بين إنّو ليش ما استجَبلنا و بين نقبَل مشيئتو و نتذكّر إنّو ربنا بيعرِف مصلحتنا أكتر منّا.  قدّيش تريز قوية!  قدّيش عندها تسليم لربنا بكل شي، قديش عندها سلام و إيمان!  منصلّيلها اليوم تعلّمنا و تساعدنا نكون متلها نعرِف نطلُب إرادة ربنا تتحقّق و مش إرادتنا نحنا... الله معكن! المصدر : صفحة Jesus My Lord

  شو يعني الحب؟ بيخبرو عن خي زغير سأل إختو الأكبر منّو بشوي شو يعني الحب؟ قالتلو: مش إنت كل يوم بتاخُد البسكويت من شنطتي؟  تلبّك الخي إنّو كيف عرفِت.  قالتلو: لأنّي بحبك كتير كل يوم عم حط بسكويت بنفس المطرح و عارفة إنّك عم تاخدُن! الحب تضحية، عطاء، دقّة ملاحظة للتفاصيل الزغيرة، بيكون بلا شروط، ما بيطلُب مقابل، ما بعاتِب... هيك يسوع حَبنا و طلب منا نحبّ إخوتنا و وصّانا نحب أعداءنا!  ما تنسوا هالشي و تذكروا إنّو وحدو الحب الحقيقي الصادق قادر يخلّص الناس من الشر و نتايجو... الله معكن! المصدر : صفحة Jesus My Lord

  كل شي بمحلّو! مبارح نشرت وكالة ناسا أجدد صُوَر للكون. بس نتأمّل جمال هالدني و ندقّق بكل تفصيل، ما في شي زايد، ما في شي ناقص كل شي قد ما لازم يكون...  يا رب منردّد اليوم و كل يوم نشيد المخلوقات تا نسبحك و نشكرك عا كل شي عِملِتو إيديك كرمالنا و نحنا خرّبناه من طبيعة و بيئة اللي لوثناهن... سامحنا يا رب!  مع كلِّ السموات تُنشدُ مجدَكَ مع كلِّ السحابات تنشُرُ لطفَكَ، مع كلِّ النيِّرات ترفَعُ سُبحَكَ مع كلِّ المخلوقات سأهتِفُ إلهي يا ما أجمَلَكَ ما أعظَمَ إسمَكَ في الأرضِ كلِّها إلهي يا ما أجمَلَكَ ما أعظَمَ اسمَكَ ما أبهاكَ في خلائِقِكَ...  يا أحبّ المخلوقات عا قلب الله ما تزَعْلوه! الله معكن... المصدر : صفحة Jesus My Lord

  حكيات المحتال! بيخبرو عن ضيعة سكّانها كلّن عميان بس حياتن هنيّة و مرتاحين و بيحبو بعضن.  مرّة إجا محتال قلّن و لا يهمكن أنا بشوف عنكن و بخبّركن شو عم يصير.  و بلّش يقول ليك فلان قطف تفاحات جارو، ليك هالزلمي شو ناصح، ليك هيدا بيتو مجوي... شوي شوي صارت المشاكل تفوت بين هالناس و صارو يتخانقو و بطّلو يحبّو بعضن و صار كل واحد منن مكوّن صورة بشعة براسو عن التاني مع إنّو مش شايفو بس اتّكل عا حكيات المحتال!  و إنت كم خبريّة بتسمع بالنهار و بتصدّق و بتصير تنشرها و تخبّر و إنت ما شفت و منّك أكيد و بيصير مشاكل!  ما تهتم بهالإشيا و ما تقبل حدا يتحكّملك بحياتك بس لأنّو قنعك إنّو هوي شايف أحسن منّك و تذكّر إنّو مش نحنا منحكُم عالناس، الله بيشوف التصرّفات و بيسمع اللي بينقال و اللي بينهمس و بيعرف خفايا النوايا بيحفظ حق الكل! نهار مبارك! المصدر : صفحة Jesus My Lord

  لتكن مشيئتك! ❤ بيخبرو عن صبي زغير سأل إمّو أيمتى هوّي بيروح عالمدرسة متل إخواتو.  قالتلو بس يصير عمرك ٣.  كل يوم يوعى و يسألها: صار عمري ٣؟  قالتلو إمّو: ليش هلقد حابب تروح عالمدرسة؟!  قلها: الكبار بيروحو عالمدرسة و أنا بدّي صير كبير! هالزغير مستعجل يكبر و الكبار اليوم بيتمنّو يرجعو زغار!  بيخلق الإنسان تلميذ بمدرسة الحياة و كل ما كِبر بيزيدو شهاداتو و خبرتو بس قد ما كِبر عالأرض بيضل إبن زغير بعيون بَينا السماوي!  نحنا ولادك يا ربّ، دبّر أمورنا و كل شي بيخصنا، إنت نفخت فينا الروح و كلنا ثقة إنّو إذا سلّمناك كل شي بتزهّر حياتنا بمشيئتك!  أبانا الذي في السماوات... لتكن مشيئتك! ❤ المصدر : صفحة Jesus My Lord

  كل رسمة إلها بسمة من بعد ما الزلزال ضرب نيبال، قرّرت مجموعة من الشباب والصبايا إنّو يجمعوا الأموال اللازمة لحتى يساعدوا الأطفال على التعامل مع هيدي التجربة المؤلمة من خلال العلاج عن طريق الفن.  فعلى مرّ السنين، تم إستخدم هيدا العلاج كوسيلة فعّالة للوصول للأطفال وضحايا الكوارث الطبيعية والحروب المصابين بصدمات نفسيّة.  كل طفل بيرسم على الورقة الأمور للي ما بيقدر يوصفا، مخاوفو، ومشاعرو وهيك بخففو عن أعبائهم النفسيّة والعاطفيّة. خلّينا نفكّر اليوم بكل شخص عم بقدّم أفضل ما عندو تيساعد الحزين والضعيف وعلّمنا يا رب، نعرف نشوفك بالأشخاص المحتاجة وبكل شخص منتلاقى فيه لأنك إنت وكّلتنا نهتم فين ونعكس نورك عالعالم. آميـــــــن. المصدر : صوت المحبّة

  القلب الطيّب قريبٌ من الله طيبة القلب بهالإيام تهمة!  منسمَع كتير: حرام ليك قلبو طيب بينضَحَك عليه... و عبارات من هالنوع بطريقة عم يصورو كأنو اللي قلبو طيَب مش ذكي بوقت هوي أذكى واحد لأنو اللي إيد الله بحياتو و بقلبو بيربح السما و هيدا الأهم!  بيقول البابا شنودة التالت:  "إنّ القلب الطيّب قريبٌ من الله، إنه مثل عجينة لينة في يد الله، يُشكلها مثلما يشاء، بعكس الأشرار الذين لهم قلوب صخرية صلبة قاسية لا تخضع لعمل الله فيها ولا تستجيب ولا تتشكل." يا رب اشتغِل بقلوب الكل و إسكن فيها و علّمنا نحب و نشوف الكل بعيونك، يا يسوع الوديع و المتواضع القلب إجعل قلبنا مثل قلبك...آميـــــــن❤ المصدر : صفحة Jesus My Lord

بالحب بتلمعو! بتخبّر القدّيسة تريزيا الطفل يسوع إنّو لمّا كانت مريضة كانت تتطلّع من الشباك تتفرج عا غروب الشمس تشوف كيف الشجر عم يلمعو متل الذهب لمّا يجي عليهن نور الشمس هيّي و عم تغيب.  صارت تريز تفكّر إنّو الشمس متل الحب بيغمر كل شي بيلتقي فيه.  و صارت تحسّ إنّو هيّي متل هالشجرات عم تلمع متل الذهب لأنّو غمرها حبّ الرب!  و بتقول إنّو كل ما بعّدنا عن الرب منبعد عن الحب و بتروح لمعتنا!  تذكّرو شو قَلنا يسوع:  أحبّوا بعضكم بعضاً بهذا يعلمون أنكم تلاميذي!  يعني بالحب بتلمعو! انشالله بتضلّ لمعة شمس الحب مزينة حياتكن و يبقى يسوع منوّر دروبكن! آمــــــــــــين. المصدر : صفحة Jesus My Lord

السما مليانة أطباء! يا ربّ، الوجع و المرض نعمة منّك منحملُن بفرح و رجا و حب و صبر و إبتسامة... بس يا رب ببلدنا الناس عم تموت كل يوم ببيوتها و عا بواب المستشفيات لأنّو مش قادرين يأمنو المبالغ المطلوبة أو لأنّو الدوا مقطوع...  السما مليانة أطبّاء إنت إخترتن متل مار شربل، رفقا، الحرديني و غيرن، كلنا إيمان إنّو إذا صلّينا من كل قلبنا رح يتدخلوا بالوقت المناسب إذا كانِت مشيئتك.  سامحنا يا رب الإنسان بطبعو بيخاف و الضغط اللي عم نعيشو كل يوم بأمننا الصحي، الغذائي و بأبسط حقوقنا عم يخنقنا!  اليوم صلاتنا عا نية كل مريض و كل شخص واقفة المصاري بينو و بين صحتو و حياتو... منخصّ بالذكر مرضى السرطان و خاصّة الصبيّة جيسي حبشي اللي تعرّفنا عليها بصورة عبّرت فيها قدّيش بتحبّ الرياضة و الحياة و اليوم حالتها عم تتدهور و العلاج غالي كتير...  يسوع يقدّملِك الصحة و يشفيكي و يخلّي ضحكتك و إيمانك اللي فاتو عا كل قلب! المصدر : صفحة Jesus My Lord

  الغرور والطمع بس بدّن يعطو مثل عن الغرور بيقولو: متل الطاووس.  شي مرّة منتبهين إنّو هالطّير شكلو حلو كتير بس صوتو لأ؟  و بالمقابل في طيور شكلها عادي و صوتها مميّز كتير!  غار منن الطاووس و قال لرجّال حكيم مش حرام هالشكل الحلو ما يكون عندو صوت و هوديك البشعين يروحو يغنو!؟  قلّو الحكيم: ربنا أعلم فينا، إنت لو كان صوتك و شكلك حلوين كان غرورك خلّاك تنصّب حالك ملك و سلطان عا باقي الحيوانات و بدّن موعد تا يحكوك!  الله بيوزّع نِعمو علينا عالقد لا زيادة و لا ناقص، هوي اللي خلقنا و بيعرف كل حاجاتنا... اوثقوا فيه و بعطاياه إلكن... الطمع بعمرو ما وصّل لشي منيح... الله معكن. المصدر : صفحة Jesus My Lord

    الحق والعدل إذا الواحد انسرق منّو شي بيبلّغ الشرطة، إذا كنا شي مطرح وصار معنا شي منروح عا أقرب مركز شرطة، إذا حدا أخدلنا من حقوقنا منلجأ للشرطة... هيدا بحياتنا اليوميّة.  شي مرّة شايفين صورة للملاك ميخائيل؟  منشوفو بإيدو سيف إلو حدين اللي هني الحق والعدل.  الملاك ميخائيل هوي اللي بيدافع عن الجنة مع جنودو، هوي اللي مهمتو يحارب الشر والأشرار، حتى إنّو بيسموه شفيع رجال الشرطة! الزوّادة بتقلّي وبتقلّكن : مطرح ما بتشوف شر عالأرض صليلو!  أطلب مساعدة جنود السما بكل معاركك... وما رح تكون إلاّ بأمان و سلام وربحان!  أيّها القدّيس ميخائيل، المدافع عنا في المعركة، تضرّع لأجلنا.  أيّها القدّيس ميخائيل، المنتصر على الشيطان، تضرّع لأجلنا. أيّها القدّيس ميخائيل، أمير الجيوش السماوية، تضرع لأجلنا... صلاتو معكن... والله معكن. #خدّام_الربّ

  الحب بيربح بالآخر! بيخبرو إنّو مرّة سألت الشمس الله: ليش إخترتني أنا من بين كل النجوم و حمّلتني هالمسؤولية الكبيرة إنّو كون مصدر نور و حياة لسكان الأرض. ليش ما نقّيت نجوم تانية يساعدوني يضوّو معي، كتير عم بتعب لحالي و يا ريت الناس عاجبهن!  بيضلو يقولو شوب احترقنا أيمتى بدها تغيب الشمس و أنا بكون عم بتعب تا أعطي أكتر ما عندي كرمالن!  جاوبها الرب: اخترتِك لأنك أقرب النجوم عالأرض و اكتر شي قادرة تدفّي الناس.  مع انو معك حق عا طول عندن شي ينتقدوه! انا عطيتُن إبني الوحيد، صلبوه!  مات كرمالن تا يخلّصن و كمان بقيو مش راضيين!  بس انا ما زعِلت منن و رح ضل حبّن دايمًا و انا أكيد إنّو الحب بيربح بالآخر. المصدر : صفحة Jesus My Lord

  blind spots بس الواحد يكون عم يتعلّم السواقة بيخبروه عن الـ blind spots اللي هنّي الزوايا اللّي ما منشوفها بالمرايات إجمالاً، كرمال هيك مش عاطول لازم نتطّلع قدامنا و ورانا بس كمان عا جنب مطرح ما في  الـ blind spots.  و الحياة نفس الشي، مشوار و ماشيينو كمان في إشيا منشوفها كتير واضحة و في إشيا لازم نعمل جهد زيادة تا نشوفها.  إجا يسوع نور العالم و ضوا عا كل شي ما ترك شي مخفي، كشفلنا كل الحقايق و عطانا حريّة الخيار بدنا نعيش بالنور أو بالعتمة... "ثُمَّ كَلَّمَهُمْ يَسُوعُ أَيْضًا قَائِلًا: «أَنَا هُوَ نُورُ الْعَالَمِ. مَنْ يَتْبَعْنِي فَلاَ يَمْشِي فِي الظُّلْمَةِ بَلْ يَكُونُ لَهُ نُورُ الْحَيَاةِ»." (يو ٨: ١٢)... المصدر : صفحة Jesus My Lord

مندوب الربّ! بيخبرو عن شب عايش روتين متلنا كلنا : شغل، بيت شغل بيت.  كل أهلو و أصحابو مشغولين حتّى وصل لوقت صار كتير وحيد و حزين حياتو ما فيا حياة! مرّة كان رايح عالشغل قرّب عا سيارتو صبي زغير ببيع ورود قلّو الشب إنّو ما عندو حدا يعطيه الوردة إذا إشتراها.  قلّو الزغير: إزرعها!  بتكبر و بيصير عندك شجرة كلها ورود ملوّنة مش ضروري تعطيها لحدا.  حبّ كتير هالشب ذكاء الصبي الزغير و كيف مع ظروفو الصعبة بيشوف الإشيا الحلوة و صار يحكي معو.  بالحديث عرف هالشب إنّو الصبي توفى بيّو كرمال هيك ترك المدرسة.  طلب منّو يحكي مع عيلتو و تتكفّل بتعليمو... هالزغير كسر الروتين و فرّح قلب إلو وقت حزين و فوّت الفرحة و الألوان عا حياة هالشب بوردة وحدة بس...  انتبهو لكل شي، ربنا عندو مندوبين عالأرض بيحكينا من خلالن! و الله معكن... المصدر : صفحة Jesus My Lord

  سلّمو حياتكن هون للرب بتقول القدّيسة تريزيا الطفل يسوع : "ساعدني يا يسوع كي أبسّط حياتي، من خلال تعلّمي ما تريد مني أن أعرفه فأصبح ذاك الشخص الذي تريده." بعد ما سلّمت حياتها الأرضيّة لمشيئة الرب و طلبت منو يخلّيها تصير الشخص اللي هوي بدو اياه بتكمّل و بترجع تقول بكل ثقة و إيمان:  "في السّماوات سيحقّق الله الطّيب كل ما أتمناه، لأنّني لم أنفّذ إرادتي الخاصّة على الأرض." عم تقلّنا تريز سلّمو حياتكن هون للرب، كونو عجينة بإيدو يعملها اللي بدو اياه و اقطفو الثمار بالسما مطرح ما ربنا بيعطينا أضعاف و أضعاف...  يا تريزا اطلبيلنا إنّو عطر ورودك يفوت عا كل بيت يحلّي حياة كل الناس، يمحي الزعل و يزرع الحب! المصدر : صفحة Jesus My Lord