الزوادة اليومية

شرف.. تضحية.. وفاء اليوم منصلّي عا نيّة كل عنصر بالجيش اللبناني، منصلّيلو لأنّو خطّ الدفاع الأوّل عن لبنان، منصلّيلو لأنّو بس يصير حريق بيركض يطفّي النار، منصلّيلو لأنّو وين ما في خطر من اي نوع هوّي أوّل واحد بيكون حتّى نحنا نكون بأمان، منصلّيلو لأنّو ببساطة حياتو مش إلو! منصلّيلو لأنّو مع كل هالتعب معاشو ما بقا بيأمّنلو أبسط حاجات عيلتو، منصلّيلو اليوم بعيدو حتّى الربّ يكون رفيقو بهالطريق اللي إختارها!  انشالله منرجع نعيّد بظروف أحسن... المصدر : صفحة Jesus My Lord

الملكوت بيتعمّر بحجارة صغيرة الزوّاده بتدعينا اليوم حتى قبل ما نطمح بالإشيا الكبيرة، خلّينا نبلّش بالإشيا الزغيره اللي منعيشها كل يوم. كان فيه شاب عم يكتب بعض الأفكار اللي عم بتجول بخاطرو بالوقت اللي إمّو كانت عم تكوي التياب.  وكانت أفكارو : إذا شفت حدا عم يغرق، بزتّ حالي بالميّ حتى خلّصو. إذا إحترق شي بيت بهبّ لنجدة الأطفال تخلّصهن من النار. إذا صار فيه شي زلزال، رح كون بين أوّل ناس بيخاطرو بحياتهن ت يسعفو الآخرين. وبعدين رح كرّس كل حياتي لخدمة الفقرا بالعالم... وبتناديه إمّو :  ـ إذا بتريد يا ماما إنزل ع الدكّان وجيب ربطة خبز. وبيجاوبها :  ـ ماما، مش شايفه الدني عم بتشتّي؟ الزوّاده بتقلّي وبتقلّك : شو رأيكن، شو كان أحسن لهالشاب، يفكّر كل هالأفكار البطوليه أو يحقّق طلب زغير لأمّو؟. والله معك... المصدر : صوت المحبّة

  التغيير نهار جديد!  الأرض متل العادة عم بتعرّض قاراتها الخمسه لأشعّة الشمس.  بس إذا الشمس لكلّ النّاس، كلّ النّاس ما عندن نفس المكان بالشمس.  كلّ النّاس ما بتملك نفس النهار.  الفجر ما بيبسط المعدة الفارغه.  الفجر ما بيبتسم لليئسانين.  ما بيعني شي النهار للنفس اللي بتبقى بليل الأفكار السودا.  مش من زمان غيّرنا السنه، وهلق غيّرنا الشهر.  بس في ناس ما بيتغير شي بنظرن.  لازم تشرق فكره أو صلا، أو تصرّف.  كلّ إنسان بيقدر يجدّد لإنسان تاني وجّ الشمس. المصدر : صفحة Jesus My Lord

  إنتو من أي فريق؟ بيخبرو عن دبّين كمشوهن من الغابة و جابوهن عا قفاص بجنينة الحيوانات.  زعلو كتير!  واحد منّن جرّب يضرب القفص و يخبط فيه ما قدر يفتح الباب..  غلبو اليأس و قعد ما بقا جرّب قال خلص علِقت هون كل حياتي.  التاني جرّب يضرب القفص مرّة و تنين و تلاتة و عشرة و ما كان يوقّف حتّى كسر القفل و هرب!  مع إنّو نفس نوع الدببة يعني مبدئيّا نفس القوّة و موجودين بنفس نوع القفص كيف واحد قدر يطلع و التاني لأ!؟  الأوّل قال بجرّب و ما قدر من أوّل مرّة إستسلم بسرعة بس التاني ما كان شايف قدّامو إلّا حرّيتو و شو ما كلّف بدّو ياها و ضلّ تا أخدها!  الخطيّة قفص كبير بقلبو كتار كتار، منّن بيجربو يتوبو بس بيرجعو دغري بيوقعو و في ناس لأنّو عيونن و قلوبن مش شايفة إلّا الخلاص و الملكوت مع يسوع بيعملو المستحيل تا يتوبو و ما يرجعو عهالدرب أبداً ... إنتو من أي فريق؟ ملاحظة : باب التسجيل بالفريق التاني عاطول مفتوح! المصدر : صفحة Jesus My Lord

الناس متل الكتب!  الناس متل الكتب!  منّن غلافن حلو و مضمونن بالعكس!  منّن غلافن عادي و مضمونن كتير حلو، منّن غلافن مش موفّق بس المضمون عامل كل الفرق.  في منّن ملوّنين و كلّن حياة و منّن بالأسود و الأبيض بتحِسْهن كتير جدّيّين.  منّن لغتهن سهلة و مبسّطة بتوصّل للقارئ دغري و منّن كلماتن معقّدة و بدّك تعمل جهد تا تفهم عليهن متل الناس نفس الشي! شو رأيكن نحنا لحقنا و بدنا نشبه كتاب نكون الكتاب المقدّس!  نكون حقيقيّين و واضحين متلو، نكون مصدر أمان و سلام و معلومات صحيحة و الأهمّ نكون متلو لأنّو يسوع موجود فيه!  الله يرافقكن و يبارك حياتكن. المصدر : صفحة Jesus My Lord

الإبتسامة بتعدي إبتسم لذاتك : ضلّ إبتسم لحدّ ما جأرتك وعبستك وقساوتك يختفو.  إبتسم لذاتك لحدّ ما بسمتك تدفّي قلبك وتفرح إنت بوجّك اللي عم يضحك.  وساعتها، إحمل بسمتك وطلّ فيها ع الآخرين.  وإبتسم: إبتسم للوجوه المتروكه، للوجوه الخجوله، الحزينه، المريضه، الصبيّه والنديّه، الجليله والمجعّده.  إبتسم للوجوه بعيلتك وبين أصحابك.  وعدّ إذا بتقدر، البسمات اللي رح تخلقهن بسمتك.  وشوف كيف رح بتكون هالحركه الزغيره عم تحمل الحياة والرجا، وعم بتكون نقطة إنطلاق لتوبة خاطئ، وعم تربح أصدقاء مخلصين.  وإبتسم لألله: بقبول كل إرادتو بحياتك.  وخود ع عاتقك تكون رسول الفرح وبسمتك أداة بتساهم بزرع السلام بكل القلوب. الزوّادة بتقلّي وبتقلّك : بإيام إنعدمت فيها البسمة، وصارت الوجوه اللي حوالينا أغلبها حامله الهمّ والحزن، فكّرت شي مرّه إنّو البسمه بتحمل رساله؟ المصدر : صوت المحبّة

سقط القناع..!   بيخبرو عن زلمي بدّو يعلّم إبنو درس مهمّ بالحياة قلّو : "إذا أردت أن تصاحب رجلًا فأغضبه.. فإن أنصفك من نفسه فلا تدع صحبته.. وإلا فإحذره!" بيقولو إنّو الناس بس يِندَق فيها أو تعصّب بتبيّن عا حقيقتها كيف بتتعامل معك و عهالأساس بتشوف إذا لازم هالشخص يكون قريب مِنّك أو لأ لأنّو إذا كان في قناع بهالوقت بالتحديد بيوقع و قد ما رجعو جرّبو يلبسوه متل كأنّو بيصير هالقناع شفّاف مبيّن كل شي وراه، ما بقا يقدر يخبّي شي!  منقرا بسفر المزامير :  "لِيُعْطِكَ حَسَبَ قَلْبِكَ، وَيُتَمِّمْ كُلَّ رَأْيِكَ."  (اَلْمَزَامِيرُ ٢٠: ٤)  الرب يعطيكن حسب قلوبكن أخوتي و قبل ما تتقرّبو من الناس صلّو و أطلبو من يسوع هوّي اللي متل ما إختار تلاميذو يختار رفقات دربكن... المصدر : صفحة Jesus My Lord

رنّموا هللويا! بيقول القدّيس البابا يوحنّا بولس الثاني : "لا تستسلموا لليأس فنحن شعب الفصح و 'هللويا' هي أغنيتنا." اليوم الأحد يوم الرب، بهاليوم كلنا مدعوّين نتذكّر مين نحنا!  نحنا ولاد الله، ولاد الرجا و الفصح و القيامة و بهالعيلة الكبيرة الكل بيحبّ بعضو و بيوقف حدّ بعضو و اليأس ممنوع!  بالآخر كل شي رح يكون منيح قد ما كان الطريق صعب، اوثقوا بهالشي...  قومو كل واحد قادر يوصل عالكنيسة، روحو خبرو يسوع كل شي!  و ما تنسو: رنّموا هللويا! المصدر : صفحة Jesus My Lord

إستشيروا بَيكن من أقوال بادري بيو اللي كتير نحنا بحاجة نسمعها و نطبّقها اليوم : "إنّك تعمل حسنًا بألا تباشر بتاتًا ايّ عمل بدون أن تكون قد طلبتَ أولاً العون الإلهي." ما تعملو اي شي قد ما كان زغير قبل ما تسَلموه ليسوع، ما تعملو شي قبل ما تطلبو مساعدة ربنا... إذا عملتو عجينة ببيتكن حطّو عليها علامة الصليب و اطلبو من الرب يباركها، إذا بدكن تعملو أي خطوة بحياتكن الشخصيّة، العائليّة، العمليّة... ما تنسو تتّكلو عا الله أوّل شي و تطلبو مشورة الروح القدس بعدين تصرّفو!  أكيد لو ما طلبتو من يسوع هوّي ما بيتركّكن، بس متل ما قبل ما تضهرو أو تعملو شي بتستشيرو بَيكن هيك لازم تكون علاقتنا ببَينا السماوي. "تَوَكَّلْ عَلَى ٱلرَّبِّ بِكُلِّ قَلْبِكَ، وَعَلَى فَهْمِكَ لَا تَعْتَمِدْ. فِي كُلِّ طُرُقِكَ ٱعْرِفْهُ، وَهُوَ يُقَوِّمُ سُبُلَكَ..."  (أمثال ٣: ٥-٦) الله يكون رفيقكن عاطول! المصدر : صفحة Jesus My Lord

الثمار الطّيبة في رجّال ختيار عم يزرع ببستانو، بيمرق الحاكم حدّ البستان، وبيوقف وبيسألو : "قدّيش عمرك يا عم؟". "صار عمري ميّة سنه"  ردّ الختيار.  بيقلّو الحاكم : "ميّة سنه؟."  "يا صديقي سؤال بس بلا زعل؟ ليش عم تتعب بزرع هالشجرات، طالما مش رح تعيش حتى تاكل من ثمرهن؟. " معك حق" ، رد الختيار، "بس بحب خبرك شي، أنا لمّا جيت ع هالدني لقيت ثمار كتيرة وطيبة ناطرتني أكلت منّا، بحب لمّا إترك هالدني كون تارك ثمار طيبه وكثيرة للآخرين" .  الزوّادة بتدعينا نفكّر بهالمتل الشعبي : زرعوا أكلنا نزرع فيأكلون!!!  بتوعينا ع الحقيقه يللي بتقول:  إنتظار المقابل بيتعّب أكتر من العمل بحدّ ذاتو. المصدر : صفحة Jesus My Lord

  ما في مطرح للغصن اليابس!  بيخبرو عن ست ختيارة راحت مع ولادها عا مزار ليسوع.  هالمزار بجنينة و حَولو كلّو شجر و ورود.  ضيّعوها للختيارة شوي لاقوها عم تشيل الوراق و الأغصان اليابسين من الوردات! بس سألوها شو عم تعمل قالتلن جنينة يسوع لازم تضل حلوة هَودي اليابسين ما بيسوى يبقو! الزوّادة بتقلّي وبتقلّك : يقول الرب للتلاميذ : "أنا الكرمة الحقيقيّة... أنا الكرمة وانتُم الأغصان الذي يثبت فيّ وأنا فيه هذا يأتي بثمر كثير... إن كان أحد لا يثبت فيّ يطرح خارجًا كالغصن فيجفّ ويجمعونه ويطرحونه في النار فيحترق".  (يو ١٥: ١-٦)... كرمال هيك ما في مطرح للغصن اليابس!  خلّونا اليوم نتمسّك بيسوع أكتر و أكتر حتّى ما نيبس و تبقى فينا حياة! والله معكن... المصدر : صفحة Jesus My Lord

  يعبّي فراغ حياتنا أوقات الوِحدة بتفرض حالها عليك و قدّيش هيّي ضيف تقيل لما تلاقي كل اللي حولك مشغولين و عندن إشيا يعملوها إلّا إنت بتحسّ كأنّو الناس عم يمرقو من حدّك و ما بيشوفوك!  قدّيش بشع تكون عم تفتّش عا رفيق و ما تلاقي حدا حدّك بيبطّل الوقت يمشي، ما في شي بيمشي إلّا دموعك عا خدّك بدون سبب معيّن! وقالَ لهُم يَسوعُ : في هذِهِ اللَّيلَةِ ستَترُكوني كُلُّكُم...  بعدين قلّن نفسي حزينة حتّى الموت، إسهروا معي و لاقاهن كلّن نايمين مع إنّو ليلتها كلّن قالولو ما منتركك لو بدنا نموت معك! لازم نتذكّر إنّو كل شي معقول نمرق فيه يسوع عاشو قبلنا و قد ما كانت إيّام صعبة و قد ما كِنّا وحيدين يسوع وحدو قادر يعبّي كل فراغ تركوه البشر... أعطينا يا رب نسهر معك كل يوم و ما ننام مش لأنّك طلبت مِنّا، بس لأنّو نحنا ما فينا نكمّل بدونك لأنّك متل الشمس بعيد عَنّك ما في حياة يا نور العالم! المصدر : صفحة Jesus My Lord

شو كبيرة و تقيلة سلّة طلباتنا يا مار الياس... اليوم ٢٠ تموز منحتفل بعيد مار الياس الحَي.  قدّيش نحنا اليوم بحاجة لمار الياس المعروف بعنادو بس عن حق! هوّي المعروف بالحرب يلّي عملها عالفساد والوثنيين، منطلب منّك يا رب تعطينا متلو القوّة حتّى نقاوم فساد وكفر عصرنا و ما أكترو! منصلّيلك يا مار الياس ترافقنا و تتشفّعلنا و تساعدنا بكل لحظة من حياتنا و منذكر خاصّة كل أهل ضحايا إنفجار مرفأ بيروت اللي خسرو ولادن و إخواتن و اللي بيحبّوهن، صليلن متل ما صلّيت و ردّيت للأرملة حياة إبنها الوحيد من الموت.  شو كبيرة و تقيلة سلّة طلباتنا يا مار الياس... تشفّع كمان للبنان و شعبو حتّى نشهد قيامة هالوطن مع إنّو أكلنا اليأس و التعب و الهمّ و الخوف... و منعيّد كل شخص حامل إسم الياس، انشالله بيكون هالقدّيس الكبير  رفيقكن عاطول! المصدر : صفحة Jesus My Lord

  عيون الناس صبيّتين بالبيت واقفين قدّام واجهه زجاج كبيره بتطلّ ع الطريق. الأولي تطلّعت بالسما وقالت : "ليك هالسما شو صافيه وحلوة، وهالمرا ع الطريق أنجأ عم فيها تمشي كيف قادره تحمل كلّ هالغراض؟". الصبيّه التانيه بتتطلّع بالواجهه وبتقول : "ليكي شعراتي كيف مش ظابطين اليوم، بس تيابي كتير حلوين ولابقينلي مش هيك؟". الزوّادة بتقلّي وبتقلّك : كلّ واحد منّا بحياتو قادر يتطلّع ويشوف مآسي الناس حتى يخفّفها أو أفراح الناس حتى يشارك فيها. كما وإنّو بيقدر يتطلّع بعيون الآخرين وما يشوف إلّا حالو. خلّينا نكون النّور اللي قد ما كان زغير بيضوي العتمه وبيدلّ القراب منو ع الطريق الصحيح، خلّينا نفتح دايمًا واجهة قلبنا حتى تدلّنا ع محبّه الناس وما نسكّرها حتى ما تصير مرايه نشوف فيها بس صورتنا نحنا. المصدر : صوت المحبّة

  ختيار عنّايا يا ختيار برَمت العالم و ولا مرّة طلعت بطيّارة. يا ختيار زرت كل البلدان من دون ما تضهر من محبستك. يا ختيار عندك طاقة قد كل شي في شباب. يا ختيار بدل ما تكون بحاجة لمساعدة ما بقي حدا ما ساعدتو. يا ختيار جمعت الكل حولك و ما فرّقت ابدا لا بدين و لا طايفة و لا عرق و لا جنس... بتعرف شو؟!  نحنا الختياريّي بالروح و إنت اللي خلقت و كبرت و عشت و متت و تقدّست و بعدك شب، بقلبك، بحبّك، بإيمانك و بروحك الطيبة! اليوم عيدك، و شو كتار اللي بيحبّوك و عم يعيدوك!  قد ما شكرناك ما منقدر نكافيك عالفرق اللي عاملو بحياة الملايين!  يا شربل ردّيت كتار عا درب الله و شفيو كتار بشفاعتك عند يسوع، تشفّع لشعب لبنان تا تخلص هالجلجلة و نشوف القيامة! المصدر : صفحة Jesus My Lord

  إعرف الأولويات! غريب كيف عاطول الناس بيعتلو همّ المستقبل بس بالمنطق يمكن حتى ما يكونو موجودين فيه! غريب كيف كلنا كل حَكِينا عن بكرا شو رح نعمل و نحنا مش أكيدين إنّو حتى في بكرا عهالأرض! منتذكّر مَثَل الغني اللي أرضو أنتجِت كتير و صار يفكّر شو بدو يعمل و قال بهبّط الإهراءات اللي عندي و بعمّر أكبر منن تا يساعو محاصيلي بس ربنا قلو إنّو الليلة إنت رح تموت لمين بيبقى اللي عملتو؟! مش غلط تفكّر و تخطط للمستقبل و تكون طموح  بس قبل كل هيدا بدّك تكون حاضر للنّقلة عالسما و ما تنسى إنّو هونيك الباب ضيّق ما بيفوتو ممتلكاتك و مصرياتك بس اعمالك المنيحة!  إعرف الأولويات! السما بالأول بعدين اي شي تاني... والله معكن... المصدر : صفحة Jesus My Lord

  أسكن ببيوتنا كمان! عيلة تريزيا الطفل يسوع كانت كبيرة و مؤلّفة من إم و بَي و ٩ ولاد! هالعيلة قدّمت كتير للسما! أوّل شي قدّمتو هالعيلة هيّي ٤ ملايكة(بنتين و صبيين) إنتقلو من هالأرض بكّير بعد ما خلقو بشوي.  بقي في خمس صبايا، خمس عمّال بحقل الرب، خمس خدّام للمذبح، خمس راهبات!   ماري، بولين و سيلين اللي فاتو عالرهبنة الكرمليّة و ليوني كانت راهبة بدير الزيارة.  و تريز ما قبلت تكون راهبة عاديّة، راحت للآخر وصلت لأعلى درجة بهالسلّم و صارت قدّيسة! شو هالعيلة الحلوة!  بتعرفو هالعيلة مش أم و بَي و ٩ ولاد، هالعيلة أوّل أفرادها هنّي يسوع و إمّو مريم!   "إِنْ لَمْ يَبْنِ الرَّبُّ الْبَيْتَ، فَبَاطِلًا يَتْعَبُ الْبَنَّاؤُونَ. إِنْ لَمْ يَحْفَظِ الرَّبُّ الْمَدِينَةَ، فَبَاطِلًا يَسْهَرُ الْحَارِسُ." (مز ١٢٧: ١) يا ربّ متل ما سكنت هالبيت و الكل كانو بخدمتك و صار في قدّيسين، أسكن ببيوتنا كمان! المصدر : صفحة Jesus My Lord

  الفم العذب بيخبّر شبّ و بيقول إنّو من هوّي و زغير إمّو علّمتو إنّو ما يحكي شي إذا ما كان عندو شي حلو يقولو! بقيت هالفكرة براسو و كبرت معو و بقي يتصرّف عهالأساس بحياتو الإجتماعيّة و العمليّة. و هالنصيحة اليوم عم ننقلها لكل واحد مِنّا، تخايلو قدّيش العالم بكون أحلى إذا ما بينقال إلّا إشيا حلوة! عنجد شو حلو!  إذا كل واحد مِنّا بيبلّش يطبّق هالشي بمحيطو الزغير بيعمل فرق! "الفم العذب يُكَثِّر الاصدقاء، واللسان اللطيف يُكَثِّر المؤآنسات" (سفر يشوع بن سيراخ ٦: ٥) المصدر : صفحة Jesus My Lord

  منصلّي من أجل لبنان 🇱🇧 إنسأل أبونا أيّا آية من الكتاب المقدّس بتجي عا راسو اليوم بس يفكّر بلبنان...  بتعرفو شو جاوب؟ "فَقَالَ لَهُمْ: «نَفْسِي حَزِينَةٌ جِدًّا حَتَّى الْمَوْتِ. اُمْكُثُوا ههُنَا وَاسْهَرُوا مَعِي»." (مت 26: 38)!! منصلّيلك يا رب عا نيّة هالبلد اللي عا قد ما زغير همّو كتير كبير! منصلّيلك يا ربّ عا نيّة كل مظلوم و عا نيّة كل صاحب حقّ مهدور. كل ما صلّينا يا رب منقول لتكن مشيئتك كما في السماء كذلك على الأرض، اليوم منقلّك يا رب لتكن عدالتك كما في السماء كذلك على الأرض...  منّك يا رب منطلب! آمــــــــــــين. المصدر : صفحة Jesus My Lord

  يسوع معنا من أقوال الطوباوي كارلو أكوتيس : "إنّ المسيح موجودٌ في السرّ الأقدس تماماً كما كان موجوداً منذ ٢٠٠٠ سنة مع الرسل، الفرق ليس إلّا أنّ في تلك الفترة كان على الناس أن تتنقّل بإستمرار كي تراه، أمّا نحن فيَكفينا أن نجد أيّة كنيسة قريبة، إنّ أورشليم في ديارنا". اليوم كلنا مدعوّين نتأمّل بهالجملة نحنا اللي ما بيمرق يوم ما منفتّش عا يسوع، ما بيمرق يوم ما منسألو وينك يا ربّ... كارلو هالشب الزغير اللي كانت علاقتو بالقربان المقدّس مميّزة كتير رسملنا الطريق... في سر القربان رَبّي معي مدى الأيام... المصدر : صفحة Jesus My Lord

  أزمة بنزين أو أزمة نفسيّة؟! أنا ما بوقف بالصفّ عالبنزين بوصل بعكس السير بعبّي و بضلّ ماشي أنا بدّي أنطر ساعتين و أنا بقرب الشخص الفلاني أو بعرف مدري مين او بشتغل مدري وين!  حضرتك اللي عم تشوف حالك بمعارفك و بشطارتك، بفتكر كل الناس إذا بتقصد فيها تعمل متلك عالقليلة مرّة أو فيها توصل لغالون بنزين تحطّو ببيتها بس المشكلة اللي هيّي أكبر من أزمة البنزين هيّي أزمة النفسيّة المريضة!  أنا مبلا بوقف بالصف مش لأنّو قبلان باللي عم يصير بس لأنّو مَنّي أحسن من غيري مع إنّي قادر أعمل نفس الشي! إذا في حدا لازم ينطر بالشمس هوّي أنا مش بيّي و جدّي و ناس من عمرن!  شو رح يحسّ هالختيار اللي ناطر بالشوب ساعتين بس إجي أنا عبّي و فلّ لأنّو عندي "واسطة"؟  أو ما بيهمّ شو رح يحسّ المهم أنا مشّي حالي؟  غريبين الناس! طول ما كل واحد بيفكّر بحالو و بس و طول ما كل واحد شايف إنّو هوّي أهمّ من غيرو ما رح يتغيّر شي... ربنا مش هيك علّمنا إرجعو لتعاليم الله بتصير الدني بألف خير... المصدر : صفحة Jesus My Lord

  الكذبة بتجرّ كذبة من اقوال أحد الكتّاب :  "من يكذب مرّة لا يدرك قدر الورطة التي وقع فيها، فعليه أن يخترع 20 كذبة أخرى للحفاظ على هذه الكذبة." فعلاً هيك... الكذب بيكرّ متل المسبحة، أوّل كذبة بس تقرّب تنكشف بينجبر صاحبها يغطّيها بكذبة تانية و هيك بيصيرو يجرّو بعضن و ما بقا بيقدر يوقف! أريح شي إنّك ما تفوت بهالدوامة من الأساس لأنّو الطلعة منها صعبة كتير!  يسوع كان عارف كتير منيح لوين بيوصل الكذب كرمال هيك حَذّرنا و قلنا:  ليكن كلامكم: نعم نعم لا لا وما زاد على ذلك فهو من الشرير...  لو فكّرتو أوقات إنّو كذبة بتوفّر عليكن موقف صعب و بتخلّصكن من مشكلة كونو أكيدين إنها رح تصير متل طابة التلج رح تكبر و تكبر و بالآخر رح تنكشف هيّي و كل اللي إجو من بعدها و بوقتها المشكلة اللي هربتو منها بالأصل رح تصير مشكلتين و تلاتة!  فكرو فيا... و الله معكن المصدر : صفحة Jesus My Lord

  رقم 1 بيقولو كونو متل رقم 1 بجدول الضرب قد ما كان قِدّامو رقم كبير و عملاق ما بيعطيه أكبر من حجمو أبداً.  و نحنا هيك لازم نكون ما ننغري بالإشيا الكبيرة و نعظّمها و نخلّيها تاخد من وقتنا و من إهتماماتنا بالحياة و تبعدنا عن الأهمّ اللي هوّي ربنا يسوع المسيح إلو المجد!  ما تقبلو شي يلهيكن عَنّو هوّي الألف و الياء هوّي البداية و النهاية... إرحمنا يا رب! المصدر : صفحة Jesus My Lord

  كما نحن نغفر !   اليوم ٦ تمّوز عيد الأنبا سيسويص الكبير.  مرّة واحد من الرهبان تخانق مع رفيقو و قرّر ينتقم مِنّو و حكي معو الأنبا سيسويص بس ما كان يسمع مِنّو و بقي مقرّر يعمل اللي براسو!  قام الأنبا سيسويص قرّب لَحَدّو و صار يتمتم بس قصد إنّو يسمعو صار يصلّي الأبانا و يقول : "لا تغفر لنا ذنوبنا، كما نحن لا نغفر لِمَن أخطأ إلينا". بس سمع الراهب إستحى من حالو كيف هوّي عم يتصرّف عكس وصيّة الله و قام عند رفيقو تصالح معو!  قبل ما تعملو أي شي فكرو ربنا رح يكون راضي عليّي أو لأ؟! المصدر : صفحة Jesus My Lord

! Start / finish من أقوال الكاتب الشهير باولو كويلو : "نحن البشر نعاني مشكلتين كبيرتين: الأولى أن نعرف متى نبدأ والثانية أن نعرف متى نتوقّف." عنجد هيدي هيّي مشكلتنا! ما منعرف أيمتى نبلّش و لا أيمتى نوقف.  نبلّش شو؟  و نوقف شو؟ نبلّش نصحّح أغلاطنا، و نوقّف نعيد نفس الأغلاط! نبلّش نصلّي، و نوقّف نلتهي عن ربنا! نبلّش نحبّ، و نوقّف نكره! نبلّش نعيش و نوقّف نموت! نبلّش نمشي عا طريق ربنا و نوقف نتعلّق بالإشيا الأرضيّة! المصدر : صفحة Jesus My Lord