زوّادة يوم ٢٤ كانون الثاني ٢٠٢٤

-

 


جاد بيكذب كتير!



بيخبرو عن صبي إسمو جاد بيكذب كتير! 

مرّة خبّر رفقاتو بالمدرسة إنّو هوّي و عم يلعب بالغابة شاف مخلوق غريب و صار كل ما يخبّر القصّة لحدا تاني يزيد عليها إشيا جديدة. 

الكلّ صار متحمّس يروح يشوف هالمخلوق و جاد مبسوط إنّو مركز الإهتمام. 

صارت القصّة تنتقل بسرعة كل ولد يخبّر أهلو و الأهل يخبرو أصحابن...حتّى وصلت الخبريّة للصحافة اللي قرّرت تروح عالغابة تعمل تقرير عن هالمخلوق و مقابلة مع جاد!

هون جاد خاف كتير و ما عرف شو يعمل! 

بالآخر ما كان عندو حلّ إلّا يقول الحقيقة لو رح يزعلو مِنّو الكل لأنّو كذّب و تعلّم درس كتير مهم! 

عا أمل هالموقف اللي صار مع جاد يخلّينا نصير نفكّر مرتين قبل ما نقول شي... الله معك.



المصدر : صفحة Jesus My Lord

تعليقات

إرسال تعليق

المشاركات الشائعة من هذه المدونة

زوّادة يوم ٢٤ آذار ٢٠٢٤

-
صورة
  من وين إجا إسم الشعنينة؟ بتعرفو من وين إجا إسم الشعنينة؟ هاليوم اللي فيه منتذكّر دخول يسوع عا أورشليم. كلمة شعانين هيّي من أصل عبري "هوشعنا" اللي بتعني : خلّصنا! و الشعب بس شاف يسوع صار يصرخلو خلّصنا خلّصنا لأنّن كانو عم يعانو من حكم الرومان اللي عذّبو كتير ناس و قَتَلو ألوف العالم. هالناس من ألفين سنة عرفو إنّو يسوع هوّي الخلاص. و نحنا بعد ألفين سنة خبرة بالحياة ما حلنا نعرف إنّو ما في خلاص إلّا بالمسيح و ما في غيرو طريق للسما!؟ ليش بعدنا عم نبعد عنّو!؟... اليوم فرصة إلنا نعيد النظر بكلّ حساباتنا و نتحضّر حتّى تكون قلوبنا كلها أورشليم و نستقبل يسوع فيها عن جديد! والله معكن... خدّام الربّ ®
قراءة المزيد

زوادة يوم ١٨ آب ٢٠١٩ /القِجّة/

-
صورة
[ القِجّة ]   بيخبّرو عن صبي زغير إشترالو بَيّو قِجّة وقلّو : «يا بيّي هيدي القِجّة لحتى تخبّي قرشَك الأبيض ليومَك الأسود، لما بيكون معك مصاري لازم تحطُّن بالقِجّة وبس تنتلي مناخدها على البنك بيصير عندك حساب بتستعملو وقت الحاجة» الصبي إنبسط بالفكرة وبلَّش يجمّع بالقِجّة وصار عندو حلم إنّو تِنتِلي. وبيوم من الإيام بيجي لعند بَيّو وبإيدو القجة وبيقلّو : «بابا القجة إنتَلِت». البيّ بياخدها على البنك لحتى يفتح حساب لإبنو بس كانت الصدمة كبيرة لما شاف بين المصاري قطع من الكرتون المدوّر. بيسأل إبنو عن السبب، قلّو ما كنت مفكّر إنّو المهم شو حطّ فيها، كنت مفكّر إنّو المهم تِنتِلي القِجّة. الزوّادة بتقلّي وبتقلّك : حياتنا مِتل القجّة، مش مُهمّ إنّو نملّيها، المهم من شو منملّيها، بحِبّ أتذكّر أنا ويّاكن إنّو المفكرة المتلانة ما بتعني حياة متلانة، والله معك...
قراءة المزيد

زوادة يوم ٢٢ آب ٢٠١٩ /مشروع الله بحياتك/

-
صورة
[ مشروع الله بحياتك ]   كان في شَبّ عَم بيفتّش وضايع، ليش ما عَم يقدر يفهم الله : شو بدّو الله منّو؟ ليش ما بيقلّي شو بَدّو منّي؟ راح لعند أحد الكهنة وخبّرو عن كلّ يلّي بقلبو. هنّي وعم يتمَشّو، وصل الكاهن لحدّ وردة، قطف مِنها قمر بعد ما فتّح، بيعطيه للشبّ، وبيطلب منّو يفتّحو بلا ما ينزعو أو يقطش أي ورقة من وراقو! الشبّ تعجّب، شو خَصّ موضوعو بالوردة. بَس جرّب يفتّح الوردة، شاف إنّو صعبة يفتّحها من دون ما ينزعها. ساعتها قلّو الأبونا : «إنت بإيدَيك ما فيك تفتّح الوردة من دون ما تنزعها، بس الله بالوقت المناسب وبإيدَيه اللي خلق فيهُن كلّ شي، بيفتّح الوردة تَ يفوح عطرها ويظهر جمالها! إذا إنت ما فيك تفتّح وردة من دون ما تنزعها، كيف متوقّع إنّك تفهم مشروع الله لحياتك قبل ما يصير الوقت المناسب؟ سَلّمو الوقت ومشروعَك، وتطلّع فيه بعيونَك هوّي بيعرف الأوقات، وجَرِّب إنت تفهم العلامات، وثاق بحبُّو لإلَك وهوّي بيفتّح وردتَك بالعالم ليفوح عِطرَك ويتمجَّد إسم الرب بحياتَك»، والله معك...
قراءة المزيد

زوادة يوم ٢٣ آب ٢٠١٩/عمَل الخير بيِعدي/

-
صورة
[ عمَل الخير بيِعدي ]  بيخبّرو عن زلمي ضهر من بَيتو كانت الدِني صاحية، شوي غيّمت وصارت تبرُق وترعُد وتشتّي! شاف رِجّال ختيار ماشي ومعو شمسية، طلب مِنّو يمشي حَدّو. بعد مسافة بيفوت الختيار بمدخل بناية بيسكّر الشمسية وبيقول للزلمي : «أنا وصلت عَ بيتي ومش عايز الشمسية، خِدها وبس توصل أعطيها لحدا غيرك يكون عايزها». وبقيت هالشمسية تبرُم كل الليل من حدا لحدا!  الزوّادة بتقلّي وبتقلّك : كتير حلو تكون مِتل هالرِجّال، تبادِل الخير بالخير، متل ما الله بَعَتلك مِين يساعدك ناطر مِنّك إنت تساعد غيرك، وهيك المساعدة بتصير حالة بتِعدي، والله معك...
قراءة المزيد

زوادة يوم ١٩ آب ٢٠١٩ /القيمة للعازف مش للكمان/

-
صورة
[ القيمة للعازف مش للكمان ]   بيوم من الإيام، بيتوزّع مناشير بالمدينة وإعلانات بكل الصحف عن عازف كمان رح بيزور المدينة لحتى يعزف معزوفات موسيقية على كمانو الشهير يلّي قيمتو أكتر من ١٠٠ ألف دولار. كل الناس تجمّعو بالساحة العامة، العازف أبدَع بالعزف، كل الناس زقّفولو وهيّصولو. وقبل نهاية العرض، العازف بيضرب الكمان بالحيط وبيكسرو، الناس بينصابو بالذهول، وبيقولو أكيد هالفنّان أُصيب بضرب من الجنون. بسرعة بيطلع مُقدّم الحفل على المسرح ليخبّر الناس إنّو هيدا مَنّو الكمان الأصلي، رح بيرجع الفنّان على المسرح ورح يعزف على الكمان الأصلي الغالي الثمن، بس قلال من الناس يلّي ميّزو الموسيقى وعرفو الفرق. هالعازف أراد من خلال هالعمل إنّو يقول للناس المهمّ هو العازف مش الآلة. الزوّادة بتقلّي وبتقلّك : أنا وإنت متل هالآلة الموسيقية، خلّينا نستسلم بين إيدَين الربّ وهوّي بيعزف من خلالنا أجمل الألحان، والله معك...
قراءة المزيد