زوادة يوم ١٤ تشرين الأول ٢٠١٩/بالصلاة تنالون كل شيء/

[ بالصلاة تنالون كل شيء ] 

بيخبّرو عن طبيب كتير شهير، تَمّ إختيارو لحتى ينال جايزة نوبل للسلام على إنجازاتو الطبية يلّي حققها، بس مع الأسف خلال إنتقالو بالطيارة للحصول على الجايزة صار في عاصفة كتير قويّة أجبرت الطيار على الهبوط الإضطراري بأحد المطارات.

وهَون كانت صدمة الطبيب إنّو ما رح يوصل على الموعد، توجّه للمسؤولين عن المطار واعترض على التأخير يلّي صار ويلّي رح يمنعو من الوصول على الإحتفال وما رح يحصل على الجايزة يلّي بتسمحلو إنو يسجّل إسمو بالتاريخ.

بينصحوه يستأجر سيّارة لأنو المسافة مَنّا بعيدة، تلات ساعات من المسير وبيوصل، بس مع الأسف خلال المسير بتهبّ عاصفة وبيضيّع الطريق، بيلاقي حالو قدّام بيت بابو منّو مسكّر، بيفوت، بتستقبلو مَرا ختيارة بتقدّملو الأكل والميّ، وبلحظة بيسمع صوت طفل عم يبكي بتستأذن الختيارة، والحزن مبيّن على وجّها، بيسألها الطبيب عن السبب، بتقلو :

«حفيدي كتير مريض كل الوقت بصلّي لربنا لحتى يشفيه بس مع الأسف ربنا ما عَمّ يستجيب صلاتي، بيقولو في طبيب كتير شهير وحسب ما سمعت هوّي الوحيد يلّي قادر يشفيه، واليوم بدّو يستلم جايزة بالمدينة يلّي حَدّنا، بس أنا ما عندي وسيلة أوصل لعندو وقدّملو حفيدي ليعالجو».

بيبكي الطبيب وبيقول بكلّ ثقة :

«الله إستجاب صلاتِك، هوّي يلّي خلّا الطيّارة تهبط إضطراريًا بهالمدينة، وهوّي يلّي سمح إني آخذ سيارة وأوصل على بيتك، لحتى حفيدك ينال العلاج المطلوب ويحصل على نعمة الشفاء».

الزوّادة بتقلّي وبتقلّك :

عند الله ما في شي عسير.

خلّينا نتذكّر إنّو كل يلّي منطلبو بالصلا منحصل عليه، والله معك...

{نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.}


{إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}