زوّادة يوم ١٨ أيلول ٢٠٢٣

الله والنّاس  

الله معك...

بيخبّروا عن شاب قضّى كلّ حياتو حابب يعرف شو الفرق بين الله والإنسان وما حدا كان يعطيه الجواب الشّافي الوافي.

بيوم من الإيّام قصد منسكة على راس الجبل إستقبلو ناسك متقدّم بالسّن، قبل التّحيّة سألو : 

ممكن تقلّي شو الفرق بين الله والإنسان؟ 

جاوبو بكلّ حكمة وقداسة لمّا بتطلب طلب من الإنسان بتحطّ راسك بالأرض وبتطلب الطلب، لمّا بدّك تطلب من الربّ بترفع راسك بالعالي وبتطلب طلبك، والأهمّ من هيك لمّا بتخاف إنسان بتهرب من وجّو، بس لمّا بتخاف الله بيصير عندك رغبة وشوق إنّك تشوف وجّو، ما قدر الشبّ إلّا ما رفع راسو لفوق وقال يا ربّ ما تحرمني من إنّي شوف وجّك.

الزّوّادة بتقلّي وبتقلّك :

تنين ما فينا نعيش بلاهن الله والنّاس خلّينا نعيش مع النّاس تحت نظر الله ورعايتو، والله معك.

المصدر : صوت المحبّة