زوّادة يوم ٢١ تشرين الثاني ٢٠٢١

 

مين الأهمّ؟

الله معكن...

بيخبّرو عن شبّ بيحبّ الموسيقى كتير. 

جَبلو بيّو بيانو جديد. 

قَد ما انبسط بآلتو الجديدة، غفِي هوّي وعَم بيدقّ موسيقى. 

بس غِفي، بلّشو نوتات الموسيقى يتخانقو مع بعضن. 

بتقول الـ Do: «أنا بيحبّني أكتر منكن، لأنو أنا أهيَن شي يحفظني أنا أوّل نوتا». 

بترد الـ Ré: «أكيد أنا الأهمّ أكتر شي دقّ عليّي». 

بتعصّب الـ Mi وبترِد: «بلايي ما بتسوُو شي». 

وفاتو عالخط الـ fa sol la وsi، وعي الشبّ عَ صوتُن عَم يتخانقو، قالولو: «منيح وعِيت بالوقت المناسب، ممكن تقلّنَا مِين أحسن وحدة مِنّا بنظرك»؟ 

قلّن الشبّ: «كلكن حلوين ومهمّين قَد بعضكن، ما حدا أهَمّ من حدا، لأنّو ما فيّي دقّ ولا غنيّة بلا ما إستعملكن كلّكن، إذا نِقصِت نوتا منكن بيكون اللحن ناقص! ما تتخانقو أنا بدّي ياكن كلّكن».

الزوّادة بتقلّي وبتقلّك :

بالحياة نحنا هيك منتخانق، مين الأحسن ومين الأهم ومين الأوّل، ومننسى إنّو بنظر ربنا كلّنا متساويين، لأنّو كلّنا ولادو، خلينا نتذكّر التلاميذ، لما سألو يسوع مين الأهم فِيُن، قلّن: «يلّي بدّو يكون الأول فيكن لازم يكون الخادم لكلّ إخوتو»، والله معكن...

المصدر : صوت المحبّة