زوّادة يوم ١٧ شباط ٢٠٢٠ /صبي أو بنت؟/

[ صبي أو بنت؟ ] 

بيخبرو عن صبيّة بتحب كتير الطبخ.

لِقيت دفتر وصفات زغير كاتبتو ستها فرحت كتير وصارت تقرا فيه و تستفيد من خبرة ستها بالطبخ.

بيوم من الإيّام هيّي وعم تقلب بهالدفتر لِقيت مكتوب عا صفحة إسم بيها وحدّو : تجوز الياس بـ ٢٠ أيلول ٢٠٠٠، بـ ١٠ تشرين التاني ٢٠٠٢ خلق شادي، بـ ٢٧ أيّار ٢٠٠٤ خلّف بنت!

ما صدّقت هالصبيّة عيونها!

"البنت" اللي بلا إسم بتكون هيّي!

هلق هيّي بتعرف إنّو متل كتير كبار بالعمر ستها بتحب الصبيان أكتر وكانو يمزحو بهالموضوع بس ما كانت متخايلة هالقدّ يكون التمييز كبير!

هالقصّة بس هدفها تذكّر بأهميّة شكر الرب عا نعمة الأطفال إن كانو بنات أو صبيان في عِيَل بتحلم يكون عندها طفل يملي حياتن!

الزوّادة بتقلّي وبتقلّك :

صار الوقت يشلحو الناس ثوب التمييز بهالموضوع اللي مع الأسف صرنا بالـ ٢٠٢٠ وبعدنا منسمع فيه و منشوفو! الله معك...

{نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.}

{إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}