زوادة يوم ٨ كانون الثاني ٢٠٢٠/صعوبات الحياة/
[ صعوبات الحياة ]
بيخبرو عن مُحاضر كان عم يشرح كيف بيقدر الإنسان يتحكّم بمشاكلو وهموم الحياة، بيحمل بإيدو كاس مَي وبيرفعو، وبيسأل الحاضرين :
«شو هوّي بإعتقادكُن وزن كاس المي؟»
مِنُّن قالوا ٥٠ غرام ومِنُّن ١٠٠ غرام ومِنُّن ٥٠٠ غرام، بيجاوب المحاضر :
«ما بيهِمّ وزن الكاس، يلّي بيهِمّ هوّي الوقت يلّي منضل قادرين نحمل فيه الكاس».
وبيكفّي المحاضر شرحو وبيقول :
«إذا رفعت الكاس لمدّة دقيقة ما بيصير شي، بس إذا رفعتو لمدة ساعة، أكيد رح حسّ بوجع بإيدي، وإذا بحملو ١٢ ساعة يمكن من بعدها تاخدوني ع المستشفى…
وزن الكاس بعدو هوّي هوّي، بس كل ما طوّلت بفترة حملو، رح اتعب أكتر وأكتر، لأنو قدرتي على التحمّل رح تضعف».
الزوّادة بتقلّي وبتقلّك :
«هموم ومشاكل الحياة هيك هيّي، إذا منضل حاملينا ع كتافنا رح نتعب ويمكن نوقع تحت تقلها… خلّينا من وقت لوقت نرتاح، ونرجع نبلّش من جديد، هيك منقدر نحملها قد ما تكون تقيلة، ونكمّل المشوار ع دروب الحياة صوب الملكوت». والله معك...
{نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.}
{إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}
تعليقات
إرسال تعليق