زوادة يوم ١٩ كانون الثاني ٢٠٢٠/الإهتمام بأصغر المخلوقات/

[ الإهتمام بأصغر المخلوقات ] 

بيخبرو عن ستّ ختيارة كل يوم الصبح بتقوم عالجنينة حد البيت بترِش برغل وقمح للعصافير بتقول يمكن بالشتي ما بيلاقو أكل!

صارو متل رفقاتها كل يوم بيجو بياكلو و يوم عن يوم صارو أكتر!

تاني مَيلة من الجنينة في صحن بتحط فيه أكل لكلب لمحِتو عم يضلّ بالحَي و بعد بتلاقو صحن تالت لبسَينة موَلدة حتّى تقدر تهتم بولادها!

الزوّادة بتقلّي وبتقلّك :

بس تبلّش تهتم بأزغر المخلوقات و تحسّ بضعفن و تساعدن بتكون أكيد حدا ما بيؤذي إنسان وحدا بينتبه لكل التفاصيل وما بيتأخّر يساعد وقت يقدر بدون ما يسأل إنت مين!

حلوة هالروح لو الكل بيفَتشو وين قادرين يساعدو بدل ما كل واحد متمسّك بغراضو وعم يفتّش يجمع غراض إلو وحدو بعد، كانت حياتنا بألف خير!...الله معك...

{نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.}

{إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}