زوادة يوم ٢٨ كانون الأوّل ٢٠١٩/الحلّاق والصبي الذكي/

[ الحلّاق والصبي الذكي ] 

بيخبرو عن صبي زغير، فات على محل حلاقة، بيقول صاحب المحل للزبون يلّي عم يحلِقلو :

«شوف هالصبي شو غبي، لـمّا بحطّ بإيد اليمين دولار وبحطّ بالإيد التانية نص دولار، بياخد النص وبيترك الدولار».

الصبي بيفوت بيحيّي صاحب المحل والزبون، ومتل كل يوم بياخد النص دولار، بيبتسم للحلاق وبيمشي.

بيقول الحلاق للزبون :

«شفت شو غبي، أخد النص دولار وترك الدولار».

بس القصة ما خلصت هون لـمّا فلّ الزبون من صالون الحلاقة، بيلتقي بالصبي وبيسألو :

«ليش أخدت النص دولار مش الدولار؟»

قلّو :

«لأني نهار يلّي باخد الدولار بتخلص اللعبة هون».

الزوّادة بتقلّي وبتقلّك :

«ما لازم نحكم على الناس ونحطّن بأطر معيّنة لأنو مرات كتيرة أحكامنا بتكون خاطئة وهنّي بيكونوا على حقّ».

خدوا وقتكم تتعرفوا عالناس وتعلموا من لمنيح والقبيح وربنا بيحاسب ….أكبر مدرسة الحياة بين الناس ومع الناس …

والله معك...

{نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.}

{إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}