زوادة يوم ٢٥ تشرين الثاني ٢٠١٩/سلام المسيح/

[ سلام المسيح ] 

بيخبرو عن منطقة كانت فيا إنتخابات البلدية قوية كتير وفرقت عا كم صوت.

نهار الأحد كانو كل الناس بالقداس شوي بيصير وقت السلام.

تنين قاعدين حد بعضن كانو ضد بعض بالبلدية بس إجا السلام بيقوم الزلمي ما بيعطيه للرجال اللي حدو!! معقول يوصل الحقد هلقد و كرمال شو؟ منصب وكرسي ما بيفيدو بشي... ليش شو عاملك الزلمي حتى يعميك الشر هيك...بعدين شو نفع تروح تقدس وإنت بهالنفسية أصلاً إنت ما بتستحي تفوت عا بيت ربنا وتتصرف هيك؟! ما فكرت للحظة إنو يسوع شايفك و قديش بيكون زعل منك...

عا كل حال دعوتنا إلكن اليوم تتصالحو مع حالكن قبل ما تتصالحو مع اللي حولكن وتسامحو وتحبو وتتقبلو الكل مهما إختلفنا معن بالرأي بالنهاية كل إنسان حر برأيو طالما ما عم يتعدى عا حرية غيرو...إذا مش قادرين تتخلصو من أحقادكن عالقليلة تركوها برا ما تفوتوها معكن عالكنيسة مطرحها مش هونيك ابداً و الله معكن...

{نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.}

{إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}