زوادة يوم ٢٨ نيسان ٢٠١٩ /ترويض الذات/

[ ترويض الذات ] 

بيخبرو عن رجّال كبير بالعمر كِلّو حكمة وعايش بمخافة الله، بس كان على طول يشكي من تقصير بمسيرتو الروحيّة، سألو حفيدو عن مشكلتو، جاوب وقلّو :

«عندي صقرين لازم ع طول روّضُن، كمان عندي أرنبين لازم إنتبهلُن، وما خلّيهن يمشو برّات الطريق الصحيح، وعندي حيّة لازم ع طول حاصرها، وكمان عندي أسد لازم يضل مربوط جوّا القفص، وأكتر من هيك عندي مريض بدّي ع طول إهتمّ فيه».

بيتعجّب الصبي من حَكِي جدّو وبيسألو :

«مش معقول إنسان واحد يقدر يشتغل هالشغل كلّو؟»

تنهّد الجِدّ وقال لحفيدو :

«الصقرين هنّي عينيّي لازم ع طول شوف فيها يسوع، والأرنبين هنّي إجرييّ لازم إنتبه حتّى ما تمشّيني ع طريق الغلط، والحيّة هيّي لساني، لازم إلجمو حتّى ما يطلع منّي كلام معيب، والأسد هوّي قلبي يلّي أنا ويّاه بحرب دايمة ولازم يضل مقيّد بالتقوى، والرجّال المريض هوّي جسمي يلّي بحاجة عطول للإنتباه والعناية وهيدا الشغل هوّي همّي اليومي، وعم بيخلّيني كون مقصّر بكل واجباتي».

الزوّادة بتقلّي وبتقلّك :

«لازم تكون ملك ع نفسك، أفضل جهاد هوّي جهاد النفس يلّي إسمو الجهاد الأكبر، نتيجتو بتوصّلني وبتوصلك ع الملكوت». والله معك...