زوّادة يوم ١٩ كانون الثاني ٢٠٢١/عمل زغير/

-

 


عمل زغير


بيخبرو عن ملك حبّ يعرف كيف أهل مملكتو بيتصرّفو قدّام أي مشكلة بيمرقو فيها، وشو بيحكو عنّو لـمّا يكون في أي إهمال أو تقصير.

بيقرّر يتنكّر، ونزل حط صخرة بنصّ الطريق وإختفى ورا شجرة، ت يسمع أهل مملكتو شو بدّن يقولوا. 

وصل تاجر كبير، برم حول الصخرة تركها مطرحها وفَلّ.

 من بعدو، مرق كتير ناس، وصارو يحكو عن الإهمال يلّي بتعاني مِنّو المملكة وعن تقصير الملك والمسؤولين بالمملكة. 

راحو، وما عملو شي ت يزيحو الصخرة من نصّ الطريق، وكان الملك بعدو ناطر.

بآخر النهار بيمرق فلاّح حامل سلّة ع كتفو وراجع من شغلو تعبان، نزّل السلّة بسرعة، وزاح الصخرة وحطها ع جنب الطريق. 

وشو كانت مفاجأتو كبيرة، لـمّا بيلاقي صِرّة مطرح الصخرة، بيفتحها، بيلاقيها متلانة ليرات دهب، وجوّاتها رسالة قصيرة من الملك مكتوب عليها : 

«هيدا الدهب بيصير ملك للإنسان يلّي بيرفع الصخرة من نصّ الطريق».



الزوّادة بتقلّي وبتقلّك :


«مش مطلوب منّا نعمل أعمال كبيرة لندخل ملكوت الله، وحدها الأعمال البسيطة يلّي بتنعمل من القلب وبكل بساطة، هيّي اللي بتفرّحنا وبتدخّلنا ع الملكوت». والله معك...




المصدر : صوت المحبة

تعليقات

إرسال تعليق

المشاركات الشائعة من هذه المدونة

زوادة يوم ٩ أيلول ٢٠١٩/الشمعة المطفية/

-
صورة
[ الشمعة المطفية ]  بيخبّرو عن بيّ كان عندو بنت وحيدة، وكان يحبّها كتير. مرضِت، ومع الأسف بعد صراع مع المرض، إنتقلت لديار الربّ. البيّ ما قبل ولا أيّ تعزية، إنّما بالعكس دخل على غرفتو غلق الباب على حالو وما كان عَم يقبل إنّو يشوف حدا، كان عَم بيمضّي كل وقتو بالبكي على بِنتو.  بليلة من الليالي، ومن بعد ما أنهكو التعب نام وشاف بمنامو جوق من الملايكة يلّي ماشيين بتطواف صوب الحمَل المنتصر الجالس على العرش. يلّي لفَت نظر البيّ إنّو الملايكة كلّن حاملين شموع مضوّاية إلا ملاك واحد كانت شمعتو مطفيّة. بيجرّب البيّ يقرّب صوب الموكب ليشوف شو قصّة هالملاك، اكتشف إنها بِنتو، بيسألها ليش شمعتها مطفيّة، بتجاوبو : «يا بيّي كل مرّة بولّع شمعتي دموعك بيطفوها». الزوّادة بتقلّي وبتقلّك : نحنا برحلة، وحياتنا مَنّها إلا تحضير للانتقال لبيت الآب السماوي، ما لازم نحزن مِتل يلّي ما في عندُن رجا بالقيامة، خلّينا نردّد بصوت واحد : «المسيح قام حقًا»! ونجسّد هالقيامة بعيشنا اليومي، والله معك...
قراءة المزيد

زوادة يوم ٢٦ كانون الأوّل ٢٠١٩/سوبر ماركت السما !!!/

-
صورة
[ سوبر ماركت السما !!! ]   بتخبّر ست وبتقول، بيوم من الإيّام كنت ماشية بالطريق، بشوف آرمة مكتوب عليها (سوبّر ماركت السما). بقرّب صوب الباب، بينفتح قدّامي، بيستقبلني ملاك، بيقدّملي سلّة وبيقلّي : «تفضّلي يا أهلا وسهلا، فيكي تاخدي كل يلّي إنتي بحاجي إلو». كان المحل متلان من كل الأصناف، أوّل رفّ هوّي للصبر، أخدت حاجتي منّو. تاني رفّ للمحبّة، عبّيت منها وكمّلت طريقي، بوصل ع رفّ الحكمة، وهون الملاك بيتدخّل وبيقلّي : «خدي كتير من الحكمة بتلزملك، بتعوزيها وين ما بتروحي». وقدّام رفّ الإيمان أخدت أكتر ما فيّي، وأكيد ما حرمت حالي من شويّة شجاعة، وتذكّرت إنّي بحاجة كتير لنعمة المغفرة، أخدت إلي ولغيري… وقفت بالصف لإدفع، ولـمّا وصلت ع الصندوق، لقيت كياس من الفرح والسلام والصلا، حملت قد ما فيّي، سألت الموظّف : «قدّيش بتريد؟» ابتسم وقلّي : «الحساب مسدّد» ولـمّا أصرّيت إنّو لازم إدفع، إبتسم وقلّي : «يسوع مسدّد عنّك الحساب من زمن طويل!» الزوّادة بتقلّي وبتقلّك : «الرب يسوع إجا ع الأرض، وكرمال خلاصنا، افتدانا ودفع عنّا التَمَن الغالي يلّي ه
قراءة المزيد

زوّادة يوم ١٣ تشرين الثاني ٢٠٢٠

-
صورة
  لا تشتهِ مقتنى غيرك! بيخبرو عن شب إشترى سيّارة عاديّة و حتّى إنّو في أجدد منها كتير و في منها كتير، شافها زلمي بيعرفو دغري تحوّل لميكانيسيان و إجا بدّو يفحصها و صار بدّو يدقّق بأصغر التفاصيل و صار يقلّو للشبّ : بتعرف كنت شوف هالسيّارة عالطريق حسها بشعة بس هيدي عجبتني، ليك وقفتها، ليك شكلو مصروفها منيح و سريعة، خلص بدّي جيب متلها... و الشب واقف مش عارف شو يرد... أشكر ربك عا يلّي عندك و ما تتطلّع عالإشيا عند الناس! ربنا بيعرف حاجة كل واحد و بيعطيه ياها و زيادة. صار الوقت بعض الناس اللي عايشة متعودة إنّو اللي إلن إلن و اللي لغيرن كمان إلن يفهمو إنّو هيك ما بيمشي الحال!... تذكّرو وصايا الله و بالأخصّ "الوصيّة العاشرة" : لا تشتهِ مقتنى غيرك! والله معكن... المصدر : صفحة Jesus My Lord
قراءة المزيد

زوادة يوم ٢ أيلول ٢٠١٩/ما تخلّي الربّ ياخد إنت اعطيه/

-
صورة
[ ما تخلّي الربّ ياخد إنت اعطيه ]   بيخبّرو عن أحد خدّام الرعايا يلّي كان عَم بيزور بنت من ولاد رعيّتو بالمستشفى الخاص بمرضى العيون، وهالصبية كانت عَم بتجاهد لتنتصر على المرض وما تصير عميا، بتقول للكاهن بكل حزن وأسى : «أبونا الله رح يسمح إني صير عميا، الله رح ياخدلي بصري». بعد صمت كتير طويل بيقلّها : «ما تسمحيلو ياخدلِك بصرِك، بالعكس قدّميلو ياه أجمل وأقدس هدية». بتقول الصبية : «ما فهمت شو قصدَك» جاوب الكاهن : «إذا كان لا بد من فقد النظر قولي للربّ : يا بيّي يلّي بالسما، إذا كان لا بُدّ من إني إفقد نظري، ساعدني قدّملك ياه بطِيبة قلب، بلا تذمّر القلب، بلا إحتجاج. إحفظني من المرارة والإحباط، ساعدني ضلّ واثقة بمحبتك يلّي ما بتتغيّر، وبحكمتك يلّي ما بتغلط، ليتحوّل كل تذمّري الى تسبيح». ساعتها إبتسمت البنت وقالت : «أنا صرت مُبصرة». الزوّادة بتقلّي وبتقلّك : لَمّا بتحسّ بدَّك تخسر على الصعيد الصحي أو العائلي أو الإجتماعي، قدّم خسارتك للربّ بتتحوّل لربح، تذكّر كل شي عِنّا هوّي مِنّو ويلّي عَم نقدّملو يا هوّي عطية مِنّو، والله معك...
قراءة المزيد

زوّادة يوم ٣٠ تمّوز ٢٠٢٠/سنوبي و رورو/

-
صورة
سنوبي و رورو بيخبرو عن شرطي شاف بنت زغيرة مع إمها بمحل. الزغيرة حاملة معها لعبتين وحاطّتلن كمّامات حتّى تحميهن من كورونا! لفتتلو نظرو للشرطي قرّب قلها شو إسمن ألعابك؟ قالتلو هيدا إسمو سنوبي و التاني مش إلي بس إسمو رورو.  قلها لمين تاني لعبة؟ فكّر رح تقلّو لإختي أو هيك شي و تفاجأ بس قالتلو : رورو لرفيقتي هيّي مريضة ما فيها تضهر من البيت بتعطيني رورو آخدلها ياه مشوار و برَجعو. براءة هالزغيرة ما فيها ما تذكّرنا بس قال الرب يسوع: إن لم تعودوا كالأطفال لن تدخلوا ملكوت السماء... قدّيش نحنا اليوم بعاد عن نقاوة قلوب الأطفال... والله معكن... المصدر : صفحة Jesus My Lord {نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.} {إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}
قراءة المزيد