زوّادة يوم ٢٩ حزيران ٢٠٢٠/ورود المحبّة/

ورود المحبّة

بيخبرو عن جدّو ختيار عندو جنينة بيِهتَم فيها و بيزرعها ورود و خضرة و فواكه.

وَرداتو من كل الألوان و بيهتَم فيهن كتير، ممنوع وحدة منّن تدبل عا إمها.

كلّن بيقطفهن عالوقت و بيوعد فيهن القدّيسين!

الزنبقة البيضا بيحبها مار يوسف منحطها بالكنيسة قدّام صورتو. 

الورود الحمر بتحبّن القدّيسة تريزيا الطفل يسوع منحطّن قدّام صورتها بالبيت.

العدرا بتحبّن كلّن منعملها باقة مشكّلة منحطها قدّام البيت بالمزار!

هالختيار مزروع بقلبو حبّ الأرض و حبّ الرب و القدّيسين...

الزوّادة بتقلّي وبتقلّكن :

اليوم حتّى اللي بعدو بيآمن بالإنتماء للأرض عم يبلّش يفكّر يفلّ منها لأنّو ما عندو أبسط مقوّمات الحياة! 

ما بقى عِنّا غيرك يا رب إنت و قدّيسينك، وين ما كنّا رح نكون حاملين حبّك بقلوبنا و متل هالختيار أعطينا يا ربّ نرشّ ورود بحياة كل شخص منلتقي فيه... و الله معكن...

{نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.}

{إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}